Ndlela Leyi Vakreste Va Langutanaka Ni Ku Sandziwa Hi Vanhu Ha Yona

Xana u titwa njhani loko un’wana a ku sandza kumbe a haxa mavunwa ha wena ke? Hi ntolovelo wa hlundzuka swinene. Timbhoni ta Yehovha ti tokota swin’wana leswi fanaka ni sweswo nkarhi wun’wana ni wun’wana loko ti hlaseriwa hi rungula leri hoxeke kumbe leri soholotiweke eka maphepha-hungu. Kambe tanihi laha Yesu a vuleke ha kona eka Matewu 5:11, 12, ta ha ri ni xivangelo xo tsaka.

Hi xikombiso, buku ya Khatoliki ya le Jarimani yi vule leswaku “Mbhoni yin’wana ni yin’wana yi sindzisiwa ku hlenga mali ya le xikarhi ka 17 na 28 wa tiphesente, eka muholo wa yona leswaku yi yisiwa eyindlu-nkulu ya mpambukwa.” Hambi swi ri tano, Timbhoni ta Yehovha a ti vumbi mpambukwa, naswona ntirho wa tona hinkwawo wu hakeleriwa hi minyikelo yo tirhandzela. Vahlayi vo tala va hambukisiwile hi rungula leri ra mavunwa, leri Timbhoni ta Yehovha ti ri kumaka ri heta mongo. Kambe xana Vakreste va fanele ku angula njhani eka xisandzu lexi haxiwaka eka maphepha-hungu ke?

Xikombiso Lexi Vakreste Va Faneleke Ku Xi Landzela

Matewu ndzima 23 yi hlamusela kahle ndlela leyi Yesu a soleke vakaneti va yena va vukhongeri ha yona hikwalaho ka vukanganyisi ni mano ya vona. Xana leswi swi nyika Vakreste ndlela leyi va faneleke va langutana ni vaxopaxopi namuntlha ke? Doo. N’wana wa Xikwembu u sole vakaneti va yena va vukhongeri exisekelweni xa vulawuri byo hlawuleka ni ku twisisa loku a ri na kona, leswaku ku ta pfuneka mintshungu leyi a yi n’wi yingisile.

Matewu 15:1-11 yi hlamusela leswaku Yesu u soriwile hikuva ku vuriwe leswaku vadyondzisiwa va yena va tshika mukhuva wa Xiyuda. Xana Yesu u angule njhani? U yime a tiyile. Minkarhi yin’wana, Yesu u lwisane hi ku kongoma ni vaxopaxopi va yena, a kaneta mavonelo ya vona lama hoxeke. Hi vulavulelo leri tolovelekeke, Vakreste namuntlha a va hoxisi loko va ringeta ku lulamisa ku hehliwa ka ntirho ni tidyondzo ta vona, ni loko va ringeta ku hlamusela xiyimo hi ndlela leyi twalaka ni leyi twisisekaka. Va endla leswi leswaku va pfuna vanhu va timbilu letinene ku xiya leswaku ku soriwa ka Timbhoni ta Yehovha a ku na vumbhoni naswona ko onha vito ra tona.

Kambe xiya ndlela leyi Yesu a anguleke ha yona endzhakunyana loko vadyondzisiwa va yena va te: “Xana wa swi tiva leswaku Vafarisi va khunguvanyekile, loko va twile marito ya wena ke?” Vafarisi lava a va “khunguvanyekile”—a va nga lo hlundzuka ntsena kambe va ve vakaneti lava nga hundzukiki lava Yesu a va aleke. Hikwalaho u hlamurile a ku: “Va tshikeni, hi lavo-fe-mahlo lava fambisaka lavo-fe-mahlo.” Ku yisa ku vulavurisana emahlweni ni vakaneti volavo va rivengo a swi nga pfuni nchumu, a swi nga ta pfuna munhu, naswona a swi ta yisa eku phikizaneni loku nga pfuniki nchumu. (Matewu 7:6; 15:12-14; ringanisa 27:11-14.) Tinhlamulo leti Yesu a ti nyikeleke ti kombisa leswaku “nkari wu kona wa ku miyela, wu kona nkari wa ku v̌ulav̌ula.”—Eklesiasta 3:7.

Timbhoni ta Yehovha a ti rindzelanga leswaku un’wana ni un’wana a vulavula kahle hi tona. Ti ma teka ya ri ya nkoka marito ya Yesu lama nge: “Mi ni khombo n’wina loko vanhu hinkwavo va mi dzunisa, hikuva vatata wa vona va endlisile sweswo eka vaprofeta va mavunwa.” (Luka 6:26) C. T. Russell, muungameri wo sungula wa Sosayiti ya Watch Tower, u tshame a vutisiwa leswaku hikwalaho ka yini a nga tilweli eka vasandzi vakwe. U hlamule a ku: “Loko wo yimela ku raha mbyana yin’wana ni yin’wana leyi ku vukulaka, a wu nge yi kule.”

Hikwalaho a hi fanelanga hi pfumelela marito ya vakaneti lava tiyimiseleke ma hi hambukisa eku tirheleni ka Xikwembu. (Pisalema 119:69) A hi nyikeleni nyingiso entirhweni wa Vakreste va ntiyiso, ku nga ku chumayela. Vuyelo bya kona bya ntolovelo hi leswaku hi ta va ni minkarhi yo hlamula swivutiso ni ku hlamusela nkoka wa ntirho wa hina, tanihi ku antswisa mahanyelo ya munhu ni ku n’wi dyondzisa Rito ra Xikwembu.—Matewu 24:14; 28:19, 20.

Xana U Nga Langutana Ni Ku Hlekuriwa?

Yesu u byele valandzeri va yena a ku: ‘A mi va misava . . . Hikwalaho misava ya mi venga.’ (Yohane 15:19) Swiviko swo tala swa maphepha-hungu leswi sandzaka Timbhoni ta Yehovha ngopfu swi kombisa rivengo leri, naswona swiviko swo tano swi fanele ku honisiwa. Hambi swi ri tano, minkarhi yin’wana phepha-hungu ri nga vula rungula leri kombisaka ku kala vutivi hi Timbhoni kumbe leri soholotaka ni ku hlamusela mintiyiso yin’wana hi ndlela leyi hoxeke. Vatsari van’wana va maphepha-hungu va nga teka rungula eka swihlovo leswi hoxeke. Hambi ha ri honisa rungula ra mavunwa eka maphepha-hungu kumbe hi lwela ntiyiso hi ndlela leyinene, swi titshege hi swiyimo, muhlohloteri wa ku sola ni pakani ya yena.

Minkarhi yin’wana mintiyiso yi nga lulamisiwa hi papila leri tsariweke kahle ri yisiwa eka muhleri loko papila ri ta kandziyisiwa hinkwaro. Kambe papila ro tano ri nga endla leswi hambaneke hi ku helela ni leswi ku kunguhatiweke swona. Njhani? Vunwa byo sungula byi nga hangalasiwa swinene, kumbe vakaneti va nga va va kume nkarhi lowu engetelekeke wo kandziyisa mavunwa ni swisolo. Minkarhi yo tala i vutlharhi ku tshikela mhaka ya papila leri yaka eka vahleri emavokweni ya vakulu lava nga ni vutihlamuleri. Loko xiviko lexi hoxeke xa phepha-hungu xi hlohlotela xihlawuhlawu, hofisi ya rhavi ya Sosayiti ya Watch Tower yi nga tivisa mavandlha endhawini yoleyo hi mintiyiso leyi fanelaka xiyimo xolexo, xisweswo yi endla leswaku vahuweleri hinkwavo va kota ku nyika tinhlamuselo leti enerisaka eka lava va vutisaka.

Xana u lava ku katseka hi laha ku heleleke eka swihehlo swoleswo ke? Ndzayo ya Yesu ya leswaku “va tshikeni,” va honiseni, hi ku olova ya tirha eka ntlawa lowu wa vakaneti. Vakreste lava tshembekaka va ni swivangelo swa le Bibeleni swo papalata vagwinehi ni mavonelo ya vona. (1 Vakorinto 5:11-13; Tito 3:10, 11; 1 Yohane 2:19; 2 Yohane 10, 11) Loko un’wana a lava ku tiva leswaku ku soriwa ka Timbhoni i ntiyiso kumbe i mavunwa, vutivi bya wena lebyi tiyisiweke byi ta nyikela nhlamulo leyi eneleke.—Vona Xihondzo xo Rindza xa March 15, 1986, matluka 13 na 14.

Loko u langutane ni rungula leri soholotiweke eka phepha-hungu, yingisa ndzayo ya Swivuriso 14:15 leyi nge: “Muriv̌ali a pfumelela marito hikwawo, kambe l’a nga ni ku anakanya o šiya laha a kanḍiyaka kona.” Le Switzerland, vanhu vo tala a va hlundzukile, loko xiviko xa phepha-hungu lexi khumbaka mintlhaveko xi vule leswaku Mbhoni leyitsongo ya wansati yi file hikwalaho ka leswi maxaka ya yona ma aleke ku pfumelela ntlawa wa vatshunguri va yi pompela ngati. Xana swoleswo hi leswi humeleleke hakunene? E-e. Muvabyi u ale mpompelo wa ngati hikwalaho ka swisekelo swa vukhongeri bya yena, kambe u pfumele ku tshunguriwa hi swikhomela-ndhawu leswi nga riki na ngati. Loko leswi a swi lo sunguriwa ka ha ri na nkarhi kumbexana a swi ta va swi ponise vutomi bya yena. Hambi swi ri tano, va le xibedlhele va hlwele ku n’wi tshungula hi vomu, ku kondza a fa. Xiviko xa phepha-hungu a xi ti hlamuseli timhaka leti.

Hikwalaho, xiyisisa hi vukheta ntiyiso lowu swiviko sweswo swi nga na wona. Hi nga ha hlamusela lava hi vutisaka leswaku vakulu va vandlha va va kona eka swiyimo swo tano hi ndlela yo kombisa rirhandzu ni ku tlhela va fambisana ni swiletelo swa Bibele. Ku namarhela eka misinya ya milawu loko hi hlamula vanhu swi hi sivela ku tsutsumela ku endla swiboho.—Swivuriso 18:13.

Rungula Ro Titwela Hi Wexe I Ra Nkoka

Eka lembe-xidzana ro sungula, vanhu va hangalase mavunwa malunghana na Yesu Kreste leswaku va onha ndhuma ya yena, van’wana va n’wi vule muxengi. (Luka 7:34; 23:2; ringanisa Matewu 22:21.) Endzhakunyana, vandlha lerintshwa ra Vukreste ri hlangavetane ni ku kanetiwa loku hangalakeke loku a ku huma eka swirho swa vukhongeri ni swa misava. Tanihi leswi ‘Xikwembu xi hlawuleke leswi misava yi swi vonaka swi ri swa vuhunguki,’ vo tala va langutele malandza ya xona ehansi. (1 Vakorinto 1:22-29) Vakreste va ntiyiso va fanele va langutana ni xisandzu, lexi ku nga ndlela yo xanisiwa.—Yohane 15:20.

Hambi swi ri tano, Timbhoni ta Yehovha ta swi tlangela loko munhu loyi ti vulavulaka na yena a nga yi hi nghohe, naswona a kombisa langutelo leri fanaka ni ra vaendzi van’wana va Pawulo eRhoma, lava nga te: “Hi fanele ku twa miehleketo ya wena u yi vula hi nomo wa wena, hikuva loko yi ri dyondzo leyi yo hambuka, ha yi tiva leswaku ya ariwa hinkwako.”—Mintirho 28:22.

Nyika vanhu lava hambukeke nhlamuselo, u swi endla hi vunene. (Varhoma 12:14; ringanisa 2 Timotiya 2:25.) Va rhambe leswaku va tikumela rungula hi voxe mayelana ni Timbhoni ta Yehovha, leri nga ta va pfuna leswaku va nga xisiwi hi swihehlo swa mavunwa. U nga ha tirhisa tinhlamuselo leti kandziyisiweke hi Sosayiti ya Watch Tower leti nyikaka vuxokoxoko mayelana ni nhlengeletano, matimu ya yona ni tidyondzo ta yona.a Filipi u tshame a hlamula Nataniele hi ku vula ntsena a ku: “Tana, u ta vona.” (Yohane 1:46) Hi nga endla hi laha ku fanaka na hina. Un’wana ni un’wana loyi a swi tsakelaka wa amukeriwa hi malwandla eHolweni ya Mfumo ya ndhawu ya ka vona leswaku a ta tivonela hi yexe muxaka wa vanhu lowu Timbhoni ta Yehovha ti nga wona ni leswi ti swi pfumelaka.

U Nga Chavisiwi Hi Vakaneti

Swi khutaza swinene ku tiva leswaku xisandzu a xi tshikisi vanhu ku va Timbhoni! Hi nkarhi wa ku vulavurisana enkombisweni wa TV le Jarimani, vagwinehi va vule mavunwa yo tala hi Timbhoni. Muhlaleri un’wana u xiye ku tihlantswa ka vagwinehi ku ri milorho kutani a susumeteleka ku tlhela a ya emahlweni ni dyondzo ya yena ya Bibele ni Timbhoni. Ina, ku sandziwa hi vanhu minkarhi yin’wana ku tisa vuyelo lebyinene!—Ringanisa Vafilipiya 1:12, 13.

Muapostola Pawulo a a swi tiva leswaku van’wana va ta nyikela nyingiso “emintsheketweni ya hava” ku tlula ku wu nyikela entiyisweni. Hikwalaho u tsarile a ku: “Tiya minkarhi hinkwayo, byarha maxangu, tirha ntirho wa muvuri wa Rito, hetisa tifanelo ta ntirho wa wena.” (2 Timotiya 4:3-5) Kutani u nga pfumeli ku kavanyetiwa, ni ‘ku chavisiwa’ hi lava lwaka na wena. (Vafilipiya 1:28) Tshama u rhurile u tlhela u tikhoma naswona u huwelela mahungu lamanene hi ntsako, kutani u ta langutana ni ku sandziwa hi vanhu u tiyile. Ina, tsundzuka xitshembiso xa Yesu lexi nge: “Mi ta kateka loko va mi rhuketela, loko va mi xanisa ni ku mi lumbeta hi mavunwa layo tala hikwalaho ka mina. Tsakani, mi tsakisisa, hikuva hakelo ya n’wina i yikulu ematilweni; naswona va xanisise sweswo vaprofeta lava a va ri kona, n’wina mi nga si va kona.”—Matewu 5:11, 12.

[Nhlamuselo ya le hansi]

[Marito lama tshahiweke exihlokweni lama nga eka tluka 27]

Loko a langutane ni vakaneti, Yesu u byele vadyondzisiwa va yena a ku: “Va tshikeni.” Xana a vula yini?

[Marito lama tshahiweke exihlokweni lama nga eka tluka 29]

“Mi ta kateka loko va mi rhuketela, loko va mi xanisa ni ku mi lumbeta hi mavunwa layo tala hikwalaho ka mina.”—Matewu 5:11