Ku Lwela Ripfumelo Ra Hina

“Kwetsimisani Kreste tanihi Hosi etimbilwini ta n’wina, nkarhi hinkwawo mi lunghekela ku tihlamulela emahlweni ka mani na mani la lavaka ku tiva hi ta ntshembo lowu mi nga na wona.”—1 PETRO 3:15.

1, 2. Hikwalaho ka yini Timbhoni ta Yehovha ti nga hlamali loko ti kanetiwa, kambe i yini lexi ti xi navelaka?

EMATIKWENI yo tala, hi ntolovelo Timbhoni ta Yehovha ti langutiwa ti ri vanhu vo tshembeka, lava baseke emahanyelweni. Vo tala va ti languta ti ri vaakelani lavanene lava nga karhatiki. Kambe, lexi hlamarisaka, Vakreste lava va rhandzaka ku rhula va xanisiwe hi ndlela yo biha—hi minkarhi ya nyimpi ni ya ku rhula. A va hlamarisiwi hi ku kanetiwa ko tano. Entiyisweni, va ku rindzerile. Phela, va swi tiva leswaku Vakreste vo tshembeka a va “vengiwa” eka lembe-xidzana ro sungula C.E., kutani, xana lava va lwelaka ku va valandzeri va Kreste namuntlha va nga rindzela ku khomiwa hi ndlela leyi hambaneke ni yoleyo? (Matewu 10:22) Tlhandlakambirhi, Bibele yi ri: “Hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.”—2 Timotiya 3:12.

² Timbhoni ta Yehovha a ti fambi ti lava nxaniso, naswona a ti ma tsakeli maxangu—mindziho, ku khotsiwa kumbe ku khahliwa—leswi wu nga ha swi tisaka. Ti navela ku “hanya vutomi byo rhula ni byo hola” leswaku ti ta chumayela mahungu lamanene ya Mfumo wa Xikwembu handle ko kavanyetiwa. (1 Timotiya 2:1, 2) Ta wu tlangela ntshunxeko wa vukhongeri lowu ti nga na wona ematikweni yo tala leswaku ti ya emahlweni ni vugandzeri bya tona, naswona ti endla hinkwaswo leswi ti nga swi kotaka leswi ripfalo ra tona ri ti pfumelelaka ku swi endla leswaku ti va “ni ku rhula ni vanhu hinkwavo,” ku katsa ni vafumi va hulumendhe. (Varhoma 12:18; 13:1-7) Kutani, ha yini ti “vengiwa”?

3. Hi xihi xivangelo xin’wana lexi endleke leswaku Timbhoni ta Yehovha ti vengiwa hilaha ku hombolokeke?

³ Kahle-kahle, Timbhoni ta Yehovha ti vengiwe hi ndlela yo homboloka hikwalaho ka swivangelo leswi fanaka ni leswi endleke leswaku Vakreste vo sungula va xanisiwa. Xo sungula, Timbhoni ta Yehovha ti hanya hi ku landza ripfumelo ra tona ra vukhongeri, leri endlaka leswaku van’wana va ti venga. Hi xikombiso, ti chumayela mahungu lamanene ya Mfumo wa Xikwembu hi ku hiseka, kambe hakanyingi vanhu a va swi twisisi hilaha ku faneleke leswi endlaka leswaku ti hiseka, va languta ntirho wa tona wa ku chumayela wu ri “ku hundzula vanhu hi tihanyi.” (Ringanisa Mintirho 4:19, 20.) Naswona a ti ngheneli tipolitiki ni tinyimpi ta matiko, minkarhi yin’wana leswi swi langutiwe hi ndlela leyi hoxeke, leswaku Timbhoni i vaaki lava nga tshembekiki.—Mikiya 4:3, 4.

4, 5. (a) Xana Timbhoni ta Yehovha ti hlaseriwe njhani hi swihehlo swa mavunwa? (b) I vamani lava hakanyingi a va kucetela ngopfu ku xanisiwa ka malandza ya Yehovha?

⁴ Xa vumbirhi, Timbhoni ta Yehovha ti hehliwe hi mavunwa—mavunwa ya rihlaza ni timhaka leti soholotiweke malunghana ni ripfumelo ra tona. Hikwalaho ka sweswo, ti hlaseriwile swi nga fanelanga ematikweni man’wana. Ku tlula kwalaho, hikwalaho ka leswi ti lavaka ku tshunguriwa hi tindlela leti nga tirhisiki ngati hi ku pfumelelana ni leswi va rhandzaka ku yingisa xileriso xa Bibele xa ku ‘papalata ngati,’ hilaha ku hoxeke ti vuriwe “vadlayi va vana” ni “mpambukwa lowu tidlayaka.” (Mintirho 15:29) Kambe yinhla hi leswaku, Timbhoni ta Yehovha ti byi xixima ngopfu vutomi naswona ti lava ku kuma vutshunguri byo antswa swinene lebyi nga kona, bya tona ni vana va tona. Leswaku vana vo tala va Timbhoni ta Yehovha va fa lembe ni lembe hikwalaho ko ala ku pomperiwa ngati i mavunwa. Ku tlula leswi ntiyiso wa Bibele wu nga swi khumbiki hi ndlela leyi fanaka swirho hinkwaswo swa ndyangu, Timbhoni ti tlhele ti hehliwa hileswaku ti hahlula mindyangu. Kambe, lava va tolovelaneke ni Timbhoni ta Yehovha va swi tiva leswaku ti byi xixima ngopfu vutomi bya ndyangu naswona ti ringeta ku landzela swileriso swa Bibele leswi vulaka leswaku vavanuna ni vavasati lava tekaneke va fanele va rhandzana ni ku xiximana naswona vana va fanele va yingisa vatswari va vona ku nga khathariseki leswaku i vapfumeri kumbe e-e.—Vaefesa 5:21–6:3.

⁵ Eswiyin’weni swo tala, ku kumeke leswaku lava va kucetelaka ngopfu ku xanisiwa ka malandza ya Yehovha i vakaneti va vukhongeri lava va tirhiseke nkucetelo wa vona eka vafumi va politiki ni mintlawa ya vuhaxi bya mahungu ku ringeta ku kavanyeta mintirho ya Timbhoni. Xana hina Timbhoni ta Yehovha hi fanele hi angula njhani loko hi kanetiwa tano—ku nga khathariseki leswaku swi vangiwa hikwalaho ka ripfumelo ra hina ni leswi hi swi endlaka kumbe hikwalaho ka swihehlo swa mavunwa?

“Ku Anakanyela Ka N’wina A Ku Tiviwe Hi Vanhu Hinkwavo”

6. Ha yini swi ri swa nkoka leswaku hi va ni langutelo leri ringaniseriweke hi vanhu lava va nga ehandle ka vandlha ra Vukreste?

⁶ Xo sungula, hi fanele hi va ni langutelo lerinene—langutelo ra Yehovha—malunghana ni vanhu lava nga riki na ripfumelo leri fanaka ni ra hina. Loko swi nga ri tano, hi nga ha endla leswaku vanhu va hi venga kumbe va hi sola swi nga fanelanga. Muapostola Pawulo u tsarile a ku: “Ku anakanyela ka n’wina a ku tiviwe hi vanhu hinkwavo.” (Vafilipiya 4:5) Hikwalaho, Bibele yi hi khutaza leswaku hi va ni langutelo lerinene hi vanhu lava nga ehandle ka vandlha ra Vukreste.

7. I yini leswi katsekaka leswaku hi tshama hi “nga ri na xivati xa misava”?

⁷ Hi hala tlhelo, Matsalwa ma hi tsundzuxa kahle swinene leswaku hi “tihlayisa [hi] nga ri na xivati xa misava.” (Yakobo 1:27; 4:4) Rito leri nge “misava” laha, ku fana ni le tindhawini to tala eBibeleni, ri kombetela eka ntlawa wa vanhu lava nga riki xiphemu xa Vukreste bya ntiyiso. Hi hanya exikarhi ka vanhu lava; hi hlangana na vona emintirhweni, exikolweni ni le ndhawini yin’wana ni yin’wana. (Yohane 17:11, 15; 1 Vakorinto 5:9, 10) Kambe, hi tihlayisa hi nga ri na xivati xa misava hi ku papalata langutelo, mavulavulelo ni ku tikhoma loku lwisanaka ni tindlela letinene ta Xikwembu. I swa nkoka leswaku hi xiya ni khombo ra ku tolovelana ngopfu ni misava leyi, ngopfu-ngopfu ni lava va yi honisaka hi ku helela mimpimanyeto ya Yehovha.—Swivuriso 13:20.

8. Ha yini xitsundzuxo xa ku tshama hi nga ri na xivati xa misava xi nga hi nyiki xisekelo hambi xi ri xihi xa ku langutela van’wana ehansi?

⁸ Hambiswiritano, xitsundzuxo xa ku tshama hi nga ri na xivati xa misava a xi hi nyiki nikatsongo xisekelo hambi xi ri xihi xo va langutela ehansi lava nga riki Timbhoni ta Yehovha. (Swivuriso 8:13) Tsundzuka xikombiso xa varhangeri va vukhongeri bya Xiyuda, lexi hi buleke ha xona exihlokweni lexi hundzeke. Ndlela ya vukhongeri leyi va yi simekeke a yi va endlanga va amukeleka eka Yehovha; naswona a yi endlanga leswaku va va ni vuxaka lebyinene ni vanhu lava a va nga ri Vayuda. (Matewu 21:43, 45) Hikwalaho ka ku tivona va lulame ngopfu, vavanuna lava va hisekelaka etlhelo va va langutele ehansi Vamatiko. A hi swi lavi ku va ni langutelo ro tano leri tsaneke, hi delela vanhu lava nga riki Timbhoni. Ku fana ni muapostola Pawulo, hi navela leswaku hinkwavo lava twaka rungula ra ntiyiso wa Bibele va amukeleka eka Xikwembu.—Mintirho 26:29; 1 Timotiya 2:3, 4.

9. Xana langutelo lerinene ra Matsalwa ri fanele ri yi lawula njhani ndlela leyi hi vulavulaka ha yona hi vanhu lava nga riki va ripfumelo ra hina?

⁹ Langutelo ra Matsalwa lerinene, ri fanele ri khumba ndlela leyi hi vulavulaka ha yona hi vanhu lava va nga riki Timbhoni. Pawulo u lerise Tito leswaku a tsundzuxa Vakreste exihlaleni xa Kreta leswaku “va nga vulavuli ku biha hambi ku ri hi mani, va nga vi lava lwaka, va anakanyela, va kombisa ku rhula hinkwako eka vanhu hinkwavo.” (Tito 3:2) Xiya leswaku Vakreste a va nga fanelanga va vulavula ku biha “hambi ku ri hi mani”—hambi ku ri hi vanhu lava a va nga ri Vakreste eKreta, lava van’wana va vona a va tiviwa hi ku hemba, makolo ni vulolo. (Tito 1:12) Xisweswo, hi ta va hi nga fambisani ni Matsalwa loko ho tirhisa marito lama tsongahataka loko hi vulavula hi vanhu lava nga riki na ripfumelo leri fanaka ni ra hina. Ku va ni langutelo ra ku va hi tlakukile, a swi nge va kokeli vanhu van’wana evugandzerini bya Yehovha. Ematshan’weni ya sweswo, loko hi languta van’wana hi tlhela hi va khoma hi ku landza mimpimanyeto leyinene ya Rito ra Yehovha, hi “sasekisa dyondzo” ya Xikwembu.—Tito 2:10.

Nkarhi Wa Ku Miyela, Nkarhi Wa Ku Vulavula

10, 11. Xana Yesu u kombise njhani leswaku a a swi tiva loko ku ri (a) ‘nkarhi wa ku miyela’? (b) “nkari wa ku v̌ulav̌ula”?

¹⁰ Eklesiasta 3:7 yi ri: “Nkari wu kona wa ku miyela, wu kona nkari wa ku v̌ulav̌ula.” Kutani, hi lowu ntlhontlho: ku endla xiboho xa leswaku hi rini laha hi faneleke hi va ba hi makatla vakaneti nileswaku hi rini laha hi faneleke hi vulavula leswaku hi lwela ripfumelo ra hina. Hi nga dyondza swo tala eka xikombiso xa loyi a a ri ni vutlhari lebyi hetisekeke—Yesu. (1 Petro 2:21) A a wu tiva ‘nkarhi wa ku miyela.’ Hi xikombiso, loko vaprista lavakulu ni vakulukumba va n’wi hehla hi mavunwa emahlweni ka Pilato, Yesu “a nga hlamulanga.” (Matewu 27:11-14) A a nga lavi ku vula nchumu hambi wu ri wihi lowu a wu ta n’wi kavanyeta eku endleni ka ku rhandza ka Xikwembu. Ematshan’weni ya sweswo, u hlawule leswaku mintirho yakwe leyi tiviwaka hi mani na mani yi tivulavulela. A a swi tiva leswaku ntiyiso a wu nga ta yi hundzula miehleketo ni timbilu ta vona leti tikukumuxaka. Xisweswo u xi be hi makatla xihehlo xa vona, a miyela hi vomu.—Isaya 53:7.

¹¹ Kambe, Yesu a a wu tiva “nkari wa ku v̌ulav̌ula.” Minkarhi yin’wana, u va kanete hi ku kongoma naswona erivaleni vanhu lava a va n’wi sola, a va kombisa leswaku swihehlo swa vona swi hoxile. Hi xikombiso, loko vatsari ni Vafarisi va ringeta ku n’wi khomisa tingana emahlweni ka ntshungu hi ku n’wi hehla hileswaku u hlongola madimona hi ku tirhisa Belzebule, Yesu u hlawule ku paluxa swihehlo sweswo swa mavunwa. U nyikele swivangelo leswinene ngopfu ni swifaniso swa matimba ku heta mavunwa wolawo. (Marka 3:20-30; nakambe vona Matewu 15:1-11; 22:17-21; Yohane 18:37.) Hilaha ku fanaka, loko Yesu, endzhaku ka ku xengiwa ni ku khomiwa kakwe, a huduleriwe emahlweni ka Sanedri, Muprista Lonkulu Kayafasi hi mano u lerisile: “Hi Xikwembu lexi hanyaka ndza ku hlambanyisa leswaku u hi byela loko u ri Kreste N’wana wa Xikwembu!” Lowu na wona a wu ri “nkari wa ku v̌ulav̌ula,” hikuva loko a a lo miyela, a va ta vula leswaku wa swi kaneta leswaku i Kreste. Xisweswo Yesu u hlamurile a ku: “Ndzi yena.”—Matewu 26:63, 64; Marka 14:61, 62.

12. Hi swihi swiyimo leswi susumeteleke Pawulo na Barnaba ku vulavula hi xivindzi le Ikoniya?

¹² Nakambe ehleketa hi xikombiso xa Pawulo na Barnaba. Mintirho 14:1, 2 yi ri: “EIkoniya va nghena swin’we esinagogeni ya Vayuda kutani va vulavula lerova vunyingi lebyikulu bya Vayuda swin’we ni Magriki byi va vapfumeri. Kambe Vayuda lava nga pfumelangiki va kucetela ni ku yi hlohlotela hi ndlela leyi hoxeke mimoya-xiviri ya vanhu va matiko leswaku va lwisana ni vamakwavo.” The New English Bible yi hlayekisa xileswi: “Kambe Vayuda lava nga hundzukangiki va hlohlotela Vamatiko ni ku onha miehleketo ya vona leswaku va lwa ni Vakreste.” Leswi a va nga enerisekanga hi ku bakanya rungula ntsena, vakaneti va Vayuda va tlhele va sungula tsima ro va hembela mavunwa, va ringeta ku byala moya wa xihlawuhlawu eka Vamatiko leswaku va lwa ni Vakreste.a Kunene a va byi venge ngopfu Vukreste! (Ringanisa Mintirho 10:28.) Pawulo na Barnaba, va vone ku ri “nkari wa ku v̌ulav̌ula,” hi mhaka ya leswaku vadyondzisiwa lavantshwa va nga hela matimba loko va hehliwa erivaleni. “Hikokwalaho [Pawulo na Barnaba] va heta nkarhi wo leha va vulavula hi vurhena hi vulawuri bya Yehovha,” loyi a kombiseke leswaku wa va amukela hi ku va nyika matimba ya ku endla swikombiso leswi hlamarisaka. Leswi swi endle leswaku van’wana va ‘yima ni Vayuda kambe van’wanyana va yima ni vaapostola.’—Mintirho 14:3, 4.

13. Loko hi langutane ni xisandzu, hakanyingi hi wihi ‘nkarhi wa ku miyela’?

¹³ Kutani, hi fanele hi angula njhani loko hi soriwa? Hinkwaswo swi titshege hi swiyimo. Swiyimo swin’wana swi lava leswaku hi tirhisa nsinya wa nawu lowu kombisaka leswaku ku ni ‘nkarhi wa ku miyela.’ Swi tano ngopfu-ngopfu loko vakaneti lava va tiyimiseleke va ringeta ku hi endla leswaku hi phikizana na vona hi ndlela leyi nga pfuniki nchumu. Hi nga tshuki hi rivala leswaku van’wana a va swi lavi ku tiva ntiyiso. (2 Vatesalonika 2:9-12) Ku endla matshalatshala ya ku kanerisana ni lava timbilu ta vona ti tikukumuxaka, ti nga laviki ku va ni ripfumelo a swi pfuni nchumu. Tlhandlakambirhi, loko hi lwa hi matimba ku hlamulana ni muhehli un’wana ni un’wana la hi hehlaka, hi nga ha kavanyetiwa entirhweni wa nkoka ngopfu ni lowu vuyerisaka—wa ku pfuna vanhu va timbilu letinene lava hakunene va lavaka ku dyondza ntiyiso wa Bibele. Xisweswo, loko hi hlangana ni valala va hina lava lavaka ku hangalasa mavunwa ha hina, xitsundzuxo lexi huhuteriweke xi ri: ‘Hi va papalata.’—Varhoma 16:17, 18; Matewu 7:6.

14. Hi nga ri lwela njhani ripfumelo ra hina emahlweni ka van’wana?

¹⁴ Ina, leswi a swi vuli swona leswaku a hi ri lweli ripfumelo ra hina. Nilokoswiritano, wu kona ni “nkari wa ku v̌ulav̌ula.” Hi karhateke ngopfu hi vanhu lavanene lava va byeriweke swo biha ha hina. Hi tiyimiserile ku ri hlamusela kahle ripfumelo ra hina eka van’wana; hakunene, ha wu amukela nkarhi wo tano. Petro u tsarile: “Kwetsimisani Kreste tanihi Hosi etimbilwini ta n’wina, nkarhi hinkwawo mi lunghekela ku tihlamulela emahlweni ka mani na mani la lavaka ku tiva hi ta ntshembo lowu mi nga na wona, kambe mi swi endla hi moya wo rhula ni xichavo lexi enteke.” (1 Petro 3:15) Loko vanhu lava tsakelaka hakunene va lava ku kuma vumbhoni bya ripfumelo leri hi ri langutaka ri ri ra risima, loko va vutisa malunghana ni swihehlo swa mavunwa leswi boxiweke hi vakaneti, i vutihlamuleri bya hina ku lwela ripfumelo ra hina, hi nyikela tinhlamulo letinene leti sekeriweke eBibeleni. Tlhandlakambirhi, ku tikhoma ka hina lokunene ku nga pfuna ngopfu. Loko vanhu lava nga ni vuxiya-xiya lebyinene va vona leswaku hakunene hi lwela ku hanya hi ku landza mimpimanyeto yo lulama ya Xikwembu, va nga swi vona hi ku olova leswaku swihehlo leswi hi tlhandlekiwaka swona i mavunwa.—1 Petro 2:12-15.

Ku Vuriwa Yini Hiloko Ku Hangalasiwa Rungula Leri Hi Hehlaka?

15. Xana hi xihi xikombiso lexi kombaka ndlela leyi Timbhoni ta Yehovha ti hlaseriweke ha yona hi rungula leri soholotiweke emahungwini?

¹⁵ Minkarhi yin’wana Timbhoni ta Yehovha, ti hlaseriwe hi rungula leri soholotiweke emahungwini. Hi xikombiso, hi August 1, 1997, phepha-hungu ra le Russia ri kandziyise xihloko lexi hi hembelaka mavunwa, swin’wana leswi xi swi vuleke hileswaku Timbhoni ti lava leswaku swirho swa tona hinkwaswo swi ‘siya vasati va swona, vanuna va swona ni vatswari va swona loko va nga twisisi naswona va nga pfumeli leswi vona va swi kholwelaka.’ Un’wana ni un’wana la tolovelaneke ni Timbhoni ta Yehovha wa swi tiva leswaku xihehlo lexi i mavunwa. Bibele yi komba leswaku Vakreste va fanele va swi khoma hi rirhandzu ni xichavo swirho swa mindyangu ya swona leswi nga riki vapfumeri, naswona Timbhoni ti lwela ku landzelela nkongomiso wolowo. (1 Vakorinto 7:12-16; 1 Petro 3:1-4) Hambiswiritano, xihloko xexo xi kandziyisiwile, naswona vahlayi vo tala va kume rungula leri hoxeke. Xana hi nga ri lwela njhani ripfumelo ra hina loko hi soriwa?

16, 17, naswona ebokisini leri nga eka tluka 16. (a) Xana Xihondzo xo Rindza xi tshame xi vula yini malunghana ni ku angula loko ku nyikeriwa rungula leri nga mavunwa emahungwini? (b) Xana Timbhoni ta Yehovha ti nga angula eswiyin’weni swa njhani loko ku vulavuriwa ha tona hi ndlela yo biha emahungwini?

¹⁶ Laha na kona, “nkari wu kona wa ku miyela, wu kona nkari wa ku v̌ulav̌ula.” Xihondzo xo Rindza xi tshame xi swi veka hi ndlela leyi: “Hambi ha ri honisa rungula ra mavunwa eka maphepha-hungu kumbe hi lwela ntiyiso hi [ku tirhisa tindlela leti faneleke], swi titshege hi swiyimo, muhlohloteri wa ku sola ni pakani ya yena.” Eswiyin’weni swin’wana, swi nga antswa leswaku hi honisa rungula leri nga riki rinene ha hina, leswaku ri nga yi emahlweni ri hangalaka.

¹⁷ Eswiyin’weni swin’wana, ku nga ha va ku ri “nkari wa ku v̌ulav̌ula.” Mutsari wa maphepha-hungu kumbe muviki wa mahungu la tshembekaka swi nga ha endleka a byeriwe mavunwa malunghana ni Timbhoni ta Yehovha, naswona a nga ha tsakela ku kuma rungula ra ntiyiso malunghana na hina. (Vona bokisi leri nge “Ku Lulamisa Rungula Leri Hoxeke.”) Loko swiviko swa mahungu swi pfuxa rivengo leri kavanyetaka ntirho wa hina wo chumayela, vayimeri va hofisi ya rhavi ra Sosayiti ya Watch Tower va nga ha teka goza ro lwela ntiyiso hi tindlela leti faneleke.b Hi xikombiso, vakulu lava fanelekaka va nga ha averiwa ku ya hlamusela mhaka hi ndlela leyinene, ku fana ni le nongonokweni wa TV, laha loko vo tshama va nga yi, swi nga ha vulaka leswaku Timbhoni ta Yehovha a ti na nhlamulo. Etimhakeni to tano, hi vutlhari Mbhoni ha yin’we yi landzela nkongomiso wa Sosayiti ya Watch Tower ni vayimeri va yona.—Vaheveru 13:17.

Ku Lwela Mahungu Lamanene Hi Nawu

18. (a) Hikwalaho ka yini hi nga lavi mpfumelelo wa ku chumayela eka tihulumendhe ta vanhu? (b) Xana hi endla yini loko va hi alela ku chumayela hi ku ntshunxeka?

¹⁸ Vulawuri bya hina byo chumayela mahungu lamanene ya Mfumo wa Xikwembu byi huma etilweni. Yesu, la hi leriseke leswaku hi endla ntirho lowu, u nyikiwe “vulawuri hinkwabyo etilweni ni le misaveni.” (Matewu 28:18-20; Vafilipiya 2:9-11) Hikwalaho, a hi lavi mpfumelelo wo chumayela lowu humaka eka tihulumendhe ta vanhu. Hambiswiritano, ha swi xiya leswaku ntshunxeko wa vukhongeri wa pfuna eku hangalasiweni ka rungula ra Mfumo. Ematikweni lawa hi nga ni ntshunxeko wo hanya hi ku landza vugandzeri bya hina, hi ta tirhisa lunghiselelo ra le nawini leswaku hi wu sirhelela. Ematikweni lawa hi aleriweke ntshunxeko lowu, hi ta lwela ku wu kuma hi ri karhi hi landzela lunghiselelo ra nawu. Xikongomelo xa hina, a hi ku antswisa timhaka ta ntshamisano, kambe i ku ‘lwela ni ku simeka mahungu lamanene hi nawu.’c—Vafilipiya 1:7.

19. (a) Xana byi nga va byihi vuyelo bya loko hi ‘tlherisela swilo swa Xikwembu eka Xikwembu’? (b) Xana hi tiyimisele ku endla yini?

¹⁹ Tanihi leswi hi nga Timbhoni ta Yehovha, hi languta Yehovha a ri Hosi ya Misava Hinkwayo. Nawu wakwe wu tlakukile. Hi ti yingisa ngopfu tihulumendhe ta vanhu, xisweswo hi ‘tlherisela swilo swa Khezari eka Khezari.’ Kambe a hi nge pfumeleli nchumu xi kavanyeta ku hetisisa ka hina vutihlamuleri bya nkoka ngopfu—‘ku tlherisela swilo swa Xikwembu eka Xikwembu.’ (Matewu 22:21) Hi swi twisisa kahle leswaku loko hi endla tano hi ta “vengiwa” hi matiko, kambe leswi hi swi amukela swi ri xiphemu xa ntsengo wa ku va vadyondzisiwa. Rhekhodo ya Timbhoni ta Yehovha eka lembe-xidzana leri ra vu-20 i vumbhoni bya ku tiyimisela ka hina ku lwela ripfumelo ra hina. Hi ku pfuniwa ni ku seketeriwa hi Yehovha, hi ta ya emahlweni hi nga “rhuteli ku dyondzisa ni ku vula mahungu lamanene.”—Mintirho 5:42.

[Tinhlamuselo ta le hansi]

Wa Tsundzuka Xana?

◻ Hikwalaho ka yini Timbhoni ta Yehovha ti “vengiwa”?

◻ Xana hi fanele hi va languta njhani lava nga riki va ripfumelo ra hina?

◻ Loko hi langutane ni vakaneti, xana Yesu u hi vekele xikombiso xihi lexinene?

◻ Loko hi sandziwa, xana hi nga wu tirhisa njhani nsinya wa nawu lowu vulaka leswaku “nkari wu kona wa ku miyela, wu kona nkari wa ku v̌ulav̌ula”?

[Bokisi leri nga eka tluka 16]

Ku Lulamisa Rungula Leri Hoxeke

“Le Yacuiba, eBolivia, ntlawa wa vaevhangeli wu hlele leswaku xitichi xa TV xi kombisa filimi leyi handle ko kanakana yi humesiweke hi vagwinehi. Hikwalaho ka mimbuyelo yo biha leyi tisiweke hi nongonoko lowu, vakulu va endle xiboho xo endzela switichi swimbirhi swa TV va kombela ku swi hakela loko swo kombisa vanhu tivhidiyo leti nge Jehovah’s Witnesses—The Organization Behind the Name na The Bible—A Book of Fact and Prophecy. Endzhaku ko vona tivhidiyo ta Sosayiti, n’wini wa xitichi xa xiya-ni-moya u hlundzukile hikwalaho ka ku va ku vulavuriwe hi ndlela yo biha hi Timbhoni ta Yehovha eka nongonoko wa vagwinehi ivi a tikombelela ku endla xitiviso mahala hi nkarhi wa vunavetisi malunghana ni ntsombano wa tona wa muganga lowu taka. Nhlayo ya lava va veke kona a yi ri ehenhla hi ndlela leyi hlamarisaka, naswona vanhu vo tala lava nga ni timbilu letinene va sungule ku vutisa swivutiso leswinene loko Timbhoni ti va endzela ti ri evutirhelini.”—1997 Yearbook of Jehovah’s Witnesses, matluka 61-2.

[Xifaniso lexi nga eka tluka 17]

Minkarhi yin’wana, Yesu u va paluxe erivaleni vahehli lava a va n’wi xopa-xopa