Nchavelelo Lowu Humaka Eka ‘Xikwembu Xa Ku Chavelela Hinkwako’

“A ku vongiwe Xikwembu Tata wa Hosi ya hina Yesu Kriste, Tatana wa tintswalo, Xikwembu lexi ku chavelela hinkwako ku humaka eka xona; xa hi chavelela emaxangwini hinkwawo ya hina.”—2 VAKORINTO 1:3, 4.

1, 2. Xana i nchavelelo wa muxaka muni lowu vanhu lava rilaka va wu lavaka?

VANHU lava rilaka va lava nchavelelo wa xiviri—ku nga ri marito yo tlhava ni swihehlo. Hinkwerhu hi swi twile leswaku ‘hi ku famba ka nkarhi hi ta titwa ku antswa,’ kambe loko khombo ra ha ku sungula, xana hi wihi munhu la rilaka la chaveleriwaka hi mianakanyo yoleyo? Vakreste va swi tiva leswaku Xikwembu xi tshembise mpfuko wa vafi, kambe swoleswo a swi yi siveli mintlhaveko leyikulu ni ntshikilelo wa ku lahlekeriwa ka xitshuketa. Naswona loko u feriwe hi n’wana, vana lavan’wana lava hanyaka va nge n’wi sivi loyi a feke.

² Eminkarhini ya ku feriwa, hi pfuniwa ngopfu hi nchavelelo wa xiviri, nchavelelo lowu nga ni ntshembo lowu tiyeke eka switshembiso swa Xikwembu. Nakambe hi lava ntwela-vusiwana. Entiyisweni leswi swi ve tano eka vanhu va le Rwanda, ngopfu-ngopfu eka madzana ya mindyangu ya Timbhoni ta Yehovha ya kwalaho leyi lahlekeriweke hi varhandziwa va yona eku dlayeteriweni ka rixaka hi ndlela ya nsele. Xana vanhu hinkwavo lava rilaka va nga kuma nchavelelo eka mani?

Yehovha—Xikwembu Xa Nchavelelo

3. Xana Yehovha u xi veke njhani xikombiso xa ku nyika nchavelelo?

³ Yehovha u veke xikombiso hi ku chavelela hinkwerhu. U rhumele N’wana wakwe la tswariweke a ri swakwe, Kreste Yesu, emisaveni leswaku a ta hi nyika nchavelelo ni ntshembo lowu nga heriki. Yesu u dyondzise a ku: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Nakambe u byele valandzeri vakwe a ku: “A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.” (Yohane 15:13) Eka xiendlakalo xin’wana u te: “N’wana-wa-Munhu a nga telanga ku tirheriwa, kambe ku tirhela van’wana ni ku nyiketa vutomi bya yena ku kutsula lavo tala.” (Matewu 20:28) Naswona Pawulo u te: “Kambe Xikwembu xi kombisa erivaleni rirhandzu ra xona eka hina, hileswi Kriste a nga hi fela loko ha ha ri vadyohi.” (Varhoma 5:8) Hi matsalwa lawa ni man’wana yo tala, hi vona rirhandzu ra Xikwembu ni ra Kreste Yesu.

4. Ha yini muapostola Pawulo a tshame a langute eka Yehovha?

⁴ Muapostola Pawulo a ti xiya swinene tintswalo ta Yehovha leti nga fanelangiki. U ponisiwe exiyin’weni xa rifu ra moya, ku suka eka ku va muxanisi wa tihanyi wa valandzeri va Kreste ku ya eka ku va Mukreste la xanisiwaka. (Vaefesa 2:1-5) U hlamusela ntokoto wa yena: “Ndzi lontsongo eka vaapostola, a swi ndzi fanelanga ku vuriwa muapostola, hikuva ndzi xanisile [vandlha ra] Xikwembu. Kambe ndzi leswi ndzi nga swona hi tintswalo ta Xikwembu, kutani tintswalo ta kona, leti Xikwembu xi ndzi kombeke tona, a ti welanga ehansi. Ntiyiso wa kona hileswaku ndzi tirhile ngopfu ku va tlula hinkwavo; hambiswiritano, a ku tirhanga mina, kambe ku tirhile tintswalo ta Xikwembu leti ndzi nga kombiwa tona.”—1 Vakorinto 15:9, 10.

5. Xana Pawulo u tsale yini malunghana ni nchavelelo lowu humaka eka Xikwembu?

⁵ Hikwalaho swa fanela leswi Pawulo a tsaleke a ku: “A ku vongiwe Xikwembu Tata wa Hosi ya hina Yesu Kriste, Tatana wa tintswalo, Xikwembu lexi ku chavelela hinkwako ku humaka eka xona; xa hi chavelela emaxangwini hinkwawo ya hina; hikokwalaho, na hina hi kota ku chavelela lava nge maxangwini ya tinxaka-xaka, hi va chavelela hi ku chavelela loku na hina hi nyikiweke kona hi Xikwembu. Hikuva kukotisa leswi mahlomulo ya Kriste ma hi taleleke, nakona ha Kriste hi kuma ku chaveleriwa hi ntalo. Hikokwalaho, loko hi xaniseka, swi endlela leswaku n’wina mi va ni ku chaveleriwa ni ku ponisiwa; loko hi chaveleriwa, swi endlela leswaku na n’wina mi va ni ku chaveleriwa, kutani mi nyikiwa matimba yo chivirika emahlomulweni lama fanaka ni mahlomulo lawa ya hi xanisaka. Kutani ku tshemba ka hina ehenhla ka n’wina ku tiyile swinene, hikuva hi tiva leswaku, leswi mi averiwaka mahlomulo man’we na hina, mi ta averiwa na kona ku chaveleriwa loku hi nga na kona.”—2 Vakorinto 1:3-7.

6. I yini lexi kombisiwaka hi rito ra Xigriki leri hundzuluxeriweke va ku “ku chavelela”?

⁶ Mawaku marito lama khutazaka swonghasi! Rito ra Xigriki leri hundzuluxeriweke va ku “ku chavelela” ri fambelana ni “ku vitana munhu leswaku a ta eka wena.” Hikwalaho, “i ku yima ekusuhi na munhu leswaku u n’wi khutaza loko a langutane ni miringo leyikulu.” (A Linguistic Key to the Greek New Testament) Xidyondzi xin’wana xa Bibele xi tsarile: “Rito . . . nkarhi hinkwawo ri vula swo tala ku tlula ku twela vusiwana. . . . Nchavelelo wa Vukreste i nchavelelo lowu nyikaka matimba, nchavelelo lowu pfunaka munhu leswaku a langutana ni swiyimo hinkwaswo swa vutomi.” Nakambe wu katsa marito lama chavelelaka lama sekeriweke exitshembisweni lexi tiyeke ni ntshembo—wa ku pfuxiwa ka vafi.

Yesu Na Pawulo—Vachaveleri Lava Nga Ni Ntwela-vusiwana

7. Xana Pawulo u va chavelele njhani vamakwavo va Vukreste?

⁷ Mawaku xikombiso xo hlamarisa xa nchavelelo lexi Pawulo a xi nyikeke! U kote ku tsalela vamakwavo va le Tesalonika: “Hi hanyisene na n’wina hi moya wa musa, kukotisa manana la hlayisaka swinene vana va yena. Hikokwalaho, hi ku navela ngopfu ku mi komba rirhandzu, hi tilunghiserile ku avelana na n’wina ku nga ri ntsena Evhangeli ya Xikwembu, kambe na byona vutomi bya hina, hikuva mi hundzukile varhandziwa va hina lavakulu. Ma swi tiva leswaku hi hlayisile un’wana ni un’wana wa n’wina tanihi loko tatana a hlayisa vana va yena; hi mi khongoterile, hi mi tiyisile.” Ku fana ni vatswari lava nga ni rirhandzu, lava khathalelaka, hinkwerhu hi nga kombana rirhandzu ni ku anakanyelana enkarhini wa nhlomulo.—1 Vatesalonika 2:7, 8, 11, 12a.

8. Ha yini ku dyondzisa ka Yesu ku ve nchavelelo eka lava rilaka?

⁸ Hi ku kombisa nkhathalelo ni tintswalo leto tano, Pawulo a a tekelela Yesu, Xikombiso xakwe lexikulu. Tsundzuka xirhambo xa ntwela-vusiwana lexi Yesu a xi yiseke eka hinkwavo hi laha xi rhekhodiweke ha kona eka Matewu 11:28-30: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wina, yi ta kuma ku wisa; hikuva joko ra mina ra olova, ni ndzhwalo wa mina wa vevuka.” Ina, dyondzo ya Yesu ya phyuphyisa hikuva yi nyika ntshembo ni xitshembiso—xitshembiso xa ku pfuxiwa ka vafi. Hi xikombiso, lowu i ntshembo ni xitshembiso lexi hi xi nyikaka vanhu, loko hi va siyela broxara leyi nge Loko U Feriwa Hi Loyi U N’wi Rhandzaka. Ntshembo lowu wu nga hi pfuna hinkwerhu, hambi loko ku ri khale hi ri karhi hi rila.

Ndlela Yo Chavelela Lava Rilaka

9. Ha yini hi nga fanelanga hi va helela mbilu vanhu lava rilaka?

⁹ Ku rila a hi nchumu lowu endliwaka endzhakunyana ka rifu ra la rhandzekaka ntsena. Vanhu van’wana va hambeta va rila vutomi bya vona hinkwabyo, ngopfu-ngopfu lava feriweke hi vana. Mpatswa wo tshembeka wa Vakreste le Spain wu lahlekeriwe hi n’wana wa wona wa malembe ya 11 hi vukhale hi 1963 loyi a karhatiwa hi vuvabyi bya nkuvo wa byongo. Ku fikela ni namuntlha, va ha rila loko va vulavula hi Paquito. Masiku yo tswariwa, swifaniso, switsundzuxo, swi nga ha pfuxa mintlhaveko ya gome. Hikwalaho, a hi fanelanga hi hela timbilu ni ku ehleketa leswaku van’wana va fanele va miyerile ku rila hi nkarhi lowu. Vulawuri bya swa vutshunguri bya pfumela: “Gome ni ku pfilunganyeka ka mintlhaveko swi nga ha teka malembe yo hlaya.” Hikwalaho, tsundzuka leswaku tanihi leswi swivati swa le mirini swi tshamaka nkarhi wo leha, swi tano ni hi swivati swo tala swa mintlhaveko.

10. Xana hi fanele ku endla yini leswaku hi pfuna vanhu lava rilaka?

¹⁰ I swilo swihi swin’wana leswi hi nga swi endlaka leswaku hi chavelela lava rilaka evandlheni ra Vukreste? Hi mbilu hinkwayo hi nga ha byela makwerhu wa xinuna kumbe wa xisati loyi a lavaka ku chaveleriwa hi ku, “Loko ku ri na leswi ndzi nga swi endlaka, ndzi tivise.” Kambe entiyisweni i kangani munhu loyi a feriweke a hi vitanaka kutani a ku, “Ndzi ehlekete hi swin’wana leswi u nga ndzi pfunaka ha swona”? Hakunene, hi fanele ku teka goza leri faneleke leswaku hi chavelela lava feriweke. Kutani, i yini lexi hi nga xi endlaka hi ndlela leyi pfunaka? Hi leswi swiringanyeto swi nga ri swingani leswi tirhaka.

11. Xana ku yingisela ka hina ku nga va chavelela njhani lava rilaka?

¹¹ Yingisela: Xin’wana lexi pfunaka swinene lexi u nga xi endlaka i ku twela munhu la rilaka hi ku n’wi yingisela. U nga ha vutisa u ku, “Xana wa swi tsakela ku vulavula ha swona?” N’wi pfumelele a endla xiboho. Mukreste un’wana u tsundzuka loko ku fa tata wakwe: “Swi ndzi pfune ngopfu loko van’wana va ndzi vutisa leswi humeleleke ivi va yingisela hakunene.” Hi laha Yakobo a tsundzuxeke ha kona, hatlisa u yingisela. (Yakobo 1:19) Yingisela hi ku lehisa mbilu ni ntwela-vusiwana. “Mi rila ni lava rilaka,” ku bumabumela Bibele eka Varhoma 12:15. Tsundzuka leswaku Yesu u rile na Marta na Mariya.—Yohane 11:35.

12. Xana i xitiyisekiso xa muxaka muni lexi hi nga xi nyikaka lava rilaka?

¹² Nyika xitiyisekiso: Tsundzuka leswaku munhu la feriweke eku sunguleni a nga ha tivona nandzu, a ehleketa leswaku kumbexana a a fanele ku va a endle swo karhi. Tiyisekisa munhu leswaku a swi kanakanisi leswaku hinkwaswo leswi a swi koteka swi endliwile (kumbe swin’wana ni swin’wana leswi u swi tivaka swi ri ntiyiso ni leswi faneleke). N’wi tiyisekise leswaku leswi a titwisaka xiswona swi tolovelekile. N’wi byele hi van’wana lava u va tivaka lava hlakarheleke hi laha ku humelelaka loko va lahlekeriwe hi ndlela leyi fanaka. Hi marito man’wana, vana ni ku anakanyela ni ntwela-vusiwana. Mpfuno wa hina wa tintswalo wu nga vula swo tala! Solomoni u tsarile: “Marito la’ma v̌ulav̌uriweke hi nkari ma kotisa [maapula, NW] ya nsuku e ntewaneni wa silver.”—Swivuriso 16:24; 25:11; 1 Vatesalonika 5:11, 14.

13. Loko hi tiendla hi kumeka, xana sweswo swi nga pfuna njhani?

¹³ Tiendle u kumeka: Tiendle u kumeka ku nga ri masiku ma nga ri mangani yo sungula loko vanghana ni maxaka yo tala va ri kona ntsena kambe ni hi tin’hweti leti landzelaka loko swi fanerile, loko lavan’wana va tlhelerile evuton’wini bya vona bya siku na siku. Nkarhi wa ku rila wu nga ha hambana swinene, hi ku ya hi munhu. Ku tsakelana ka hina ka Vukreste ni ku twelana vusiwana swi nga pfuna swinene enkarhini wun’wana ni wun’wana wa xilaveko. Bibele yi vula leswaku “ku ni nakulobye l’a tlulaka makwav̌o.” Xisweswo, xivulavulelo lexi nge, “Munghana loyi a ku pfunaka loko u pfumala i munghana wa ntiyiso,” i mhaka leyi nga ntiyiso leyi hi faneleke ku hanya ha yona.—Swivuriso 18:24; ringanisa Mintirho 28:15.

14. I yini leswi hi nga vulavulaka ha swona leswaku hi chavelela lava feriweke?

¹⁴ Vulavula hi timfanelo letinene ta mufi: Lowu i mpfuno wun’wana lowukulu lowu nyikeriwaka hi nkarhi lowu faneleke. Vulavula hi mintirho leyinene leyi u yi tsundzukaka leyi endliweke hi mufi. U nga chavi ku tirhisa vito ra munhu. U nga endli onge hi loko munhu la rhandzekaka la feke a nga si tshama a hanya kumbe a nga si tshama a va kona. Swa chavelela ku tiva leswi buku leyi humaka eXikolweni xa Vutshunguri xa Harvard yi swi vuleke: “Ku hlakarhela lokunene ku va kona loko lava rilaka eku heteleleni va ehleketa hi mufi handle ko karhatiwa hi gome . . . Loko mintiyiso leyintshwa yi amukeriwa ni ku tswongiwa, gome ri hundzuka mianakanyo leyi pfunaka swinene.” “Mianakanyo leyi pfunaka”—mawaku ndlela leyi swi khutazaka ha yona ku tsundzuka minkarhi ya risima leyi u yi heteke u ri ni loyi a rhandzekaka! Mbhoni leyi lahlekeriweke hi tata wa yona malembe lama hundzeke yi te: “Swilo swo hlawuleka leswi ndzi swi tsundzukaka i ku hlaya Bibele na Tatana endzhakunyana ka loko a sungule ku dyondza ntiyiso. Xin’wana a ku ri ku pavalala eribuweni ra nambu hi vulavula hi swin’wana swa swiphiqo swa mina. A ndzi n’wi vona endzhaku ka malembe manharhu kumbe mune ntsena, hikwalaho, minkarhi yoleyo a yi ri ya risima swinene.”

15. Xana munhu a nga teka goza hi ndlela yihi leswaku a pfuna?

¹⁵ Teka goza loko swi fanerile: Vanhu van’wana lava rilaka va nga tiyisela ku antswa ku ri ni van’wana. Hikwalaho, hi ku ya hi swiyimo, teka magoza lama tirhaka leswaku u pfuna. Wansati un’wana wa Mukreste loyi a ri exirilweni wa tsundzuka: “Vo tala va te, ‘Loko ku ri na lexi ndzi nga xi endlaka, ndzi byele.’ Kambe makwerhu un’wana wa xisati wa Mukreste a nga vutisanga. U nghene ekamareni ro etlela, a andlula mubedo, kutani a hlantswa malakani lama nga ni thyaka. Un’wana u teke bakiti ra mati, ni swilo swo hlantswa kutani a sula laha nuna wa mina a hlanteleke kona. Lava a ku ri vanghana va ntiyiso, naswona a ndzi nge va rivali.” Laha ku nga ni xilaveko lexi nga erivaleni xo pfuna, vana wo sungula—kumbexana hi ku lunghiselela swakudya, ku basisa kumbe ku endla mintirho yin’wana. Kavula, hi fanele ku tivonela leswaku hi nga kavanyeti loko munhu la rilaka a lava ku va swakwe. Xisweswo, hi fanele ku lwela ku tirhisa marito ya Pawulo lama nge: “Hikokwalaho, leswi mi nga vitaniwa hi Xikwembu ku va vahlawuriwa va xona lava rhandziwaka, ambalani moya wa tintswalo, ni vunene, ni ku titsongahata, ni ku rhula, ni ku leha mbilu.” Tintswalo, ku leha mbilu ni rirhandzu swi nga ka swi nga heli.—Vakolosa 3:12; 1 Vakorinto 13:4-8.

16. Ha yini papila ni khadi swi nyika nchavelelo?

¹⁶ Tsala papila kumbe u rhumela khadi leri chavelelaka: Lexi hakanyingi xi honisiwaka i nkoka wa papila ni khadi ro xonga leri chavelelaka. Hi wihi mpfuno wa rona? Ri nga hlayiwa nkarhi na nkarhi. Papila ro tano a swi bohi leswaku ri va lero leha, kambe ri fanele ku kombisa ntwela-vusiwana wa wena. Ri fanele ku tlhela ri va ni marito ya moya kambe ri nga vi ro chumayela. Rungula ra xisekelo leri nge “Hi rila na wena” ri nga chavelela.

17. Xana xikhongelo xi nga tisa nchavelelo hi ndlela yihi?

¹⁷ Khongela na vona: U nga wu tekeli ehansi nkoka wa swikhongelo leswi u swi endlelaka Vakreste-kuloni lava rilaka. Bibele yi ri eka Yakobo 5:16: “Xikhongelo xa munhu wo lulama xi ni matimba ngopfu.” Hi xikombiso, loko lava rilaka va twa hi va khongelela, swi va pfuna leswaku va lwisana ni ntlhaveko wo tanihi ku tivona nandzu. Hi minkarhi ya ku tsana ka hina, ya ku hetiwa matimba, Sathana u ringeta ku hi tsanisa hi ku tirhisa “mano” yakwe, kumbe “swiendlo swa vukanganyisi.” Laha hi kona hi lavaka nchavelelo ni nseketelo wa xikhongelo, hi laha Pawulo a vuleke ha kona: “Khongelani minkarhi hinkwayo hilaha Moya wu mi letelaka hakona. Hikokwalaho, tshamani mi hitekile, mi nga karhali ku khongelela vahlawuriwa va Xikwembu hinkwavo.”—Vaefesa 6:11, 18; ringanisa Yakobo 5:13-15.

Leswi U Nga Swi Papalataka

18, 19. Xana hi nga kombisa vuxiyaxiya hi ndlela yihi emabulwini ya hina?

¹⁸ Loko munhu a ri eku rileni, nakambe ku ni swin’wana leswi nga fanelangiki ku endliwa kumbe ku vuriwa. Swivuriso 12:18 ya tsundzuxa: “L’a v̌ulaka ŝa hav̌a wa tlhav̌a kukota tlhari; kambe nomu wa lo’wo tlhariha wa hanyisa.” Minkarhi yin’wana, handle ko swi xiya, ha tsandzeka ku va ni vuxiyaxiya. Hi xikombiso, hi nga ha ku, “Ndza yi tiva ndlela leyi u titwaka ha yona.” Kambe xana wa yi tiva hakunene? Xana u tshame u lahlekeriwa hi ndlela leyi fanaka? Nakambe, vanhu va angula hi tindlela leti hambaneke. N’wangulo wa wena wu nga ha va wu nga fani ni wa munhu la nga exirilweni. Swi nga ha va swi fanerile ku vula leswaku, “Entiyisweni ndzi rila na wena hikuva na mina ndzi tshame ndzi langutana ni ku lahlekeriwa loku fanaka loko . . . a fa nkarhi lowu nga hundza.”

¹⁹ Nakambe swi ta va swi kombisa ku anakanyela loko u nga vulavuli hi leswaku mufi u ta pfuxiwa kumbe e-e. Vamakwerhu van’wana va xinuna ni va xisati va tlhaviwe ngopfu hi marito lama avanyisaka lama vuriweke malunghana ni ku langutela ka nkarhi lowu taka ka munghana wa vukati la feke a nga ri mupfumeri. Hina a hi vaavanyisi va lava nga ta pfuxiwa kumbe lava nga ta ka va nga pfuxiwi. Hi nga phyuphyisiwa hi ku tiva leswaku Yehovha, loyi a vonaka mbilu, u ta va ni musa swinene ku tlula leswi hina hi nga xiswona.—Pisalema 86:15; Luka 6:35-37.

Matsalwa Lama Chavelelaka

20, 21. I tindzimana tihi leti nga chavelelaka lava feriweke?

²⁰ Xin’wana xa swihlovo leswikulu swa nchavelelo, loko swi nyikeriwa hi nkarhi wa kona, i ku anakanyisisa hi switshembiso swa Yehovha hi vafi. Mianakanyo leyi nga eBibeleni yi ta pfuna swinene hambi loko munhu la feriweke a ri Mbhoni kumbe a ri munhu loyi hi hlanganaka na yena evutirhelini. Xana hi wahi man’wana ya matsalwa lawa? Ha swi tiva leswaku Yehovha i Xikwembu xa ku chavelela hinkwako, hikuva u te: “Mina, hi mina l’a mi tšhav̌elelaka” u tlhele a ku: “Tani hi munhu l’a tšhav̌eleriwaka hi mana wa yena, nḍi ta mi tšhav̌elela šiŝeŝo.”—Esaya 51:12; 66:13.

²¹ Mupisalema u tsarile: “Ku tšhav̌eleriwa ka mina e makhombyeni ya mina, hi leŝaku le’ŝi v̌uriweke hi wena ŝi nḍi hanyisile. Yehova, nḍi anakanya ku av̌anyisa ka wena ka khale! Kutani nḍi tšhav̌eleriwa. Tintŝalo ta wena a ti v̌e ku tšhav̌elela ka mina, hi laha u hlayeleke nanḍa wa wena.” Xiya leswaku rito ‘ku chavelela’ ri tirhisiwe hi ku phindha-phindha etindzimaneni leti. Ina, hi nga kuma nchavelelo wa ntiyiso wa hina vini ni wa van’wana hi ku hundzulukela eRitweni ra Yehovha hi nkarhi wa mahlomulo ya hina. Leswi, loko swi hlangane ni rirhandzu ni ntwela-vusiwana wa vamakwerhu, swi nga hi pfuna ku tiyisela ku lahlekeriwa ka hina ni ku tata vutomi bya hina nakambe hi ntirho lowu tsakisaka wa vutirheli bya Vukreste.—Pisalema 119:50, 52, 76.

22. I ku langutela kwihi loku hi nga na kona?

²² Nakambe hi nga hlula gome ra hina hi mpimo wo karhi hi ku tikarhatela ku pfuna van’wana emahlomulweni ya vona. Loko hi yisa nyingiso wa hina eka van’wana lava lavaka ku chaveleriwa, hi tlhela hi kuma ntsako wa ntiyiso hi ku nyika hi tlhelo ra moya. (Mintirho 20:35) A hi avelaneni na vona xivono xa siku ra ku pfuxiwa ka vafi loko vanhu va matiko hinkwawo, hi ku ya hi rixaka, va ta va va amukela varhandziwa va vona lava feke, emisaveni leyintshwa. Mawaku ku langutela konghasi! Mawaku mihloti ya ntsako leyi nga ta humesiwa hi nkarhi wolowo loko hi tsundzuka leswaku hakunene Yehovha i Xikwembu “lexi chavelelaka lava heleke matimba”!—2 Vakorinto 7:6.

Wa Tsundzuka Xana?

◻ Xana Yehovha i ‘Xikwembu xa ku chavelela hinkwako’ hi ndlela yihi?

◻ Xana Yesu na Pawulo va chavelele lava rilaka hi ndlela yihi?

◻ I swilo swihi swin’wana leswi hi nga swi endlaka leswaku hi chavelela lava rilaka?

◻ Xana hi fanele ku papalata yini loko hi tirhisana ni lava feriweke?

◻ Hi tihi tindzimana leti u ti rhandzaka leti chavelelaka eminkarhini ya ku lahlekeriwa?

[Xifaniso lexi nga eka tluka 15]

Teka goza hi ndlela ya vutlhari leswaku u pfuna lava rilaka