“Chavelela Hinkwavo Lava Rilaka”

‘Yehovha u ndzi totile leswaku ndzi chavelela hinkwavo lava rilaka.’—ESA. 61:1, 2.

1. Yesu u va endlele yini lava rilaka naswona ha yini?

YESU KRESTE u te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yoh. 4:34) Loko Yesu a endla ntirho lowu a a nyikiwe wona hi Xikwembu, u kombise timfanelo letikulu ta Tata wakwe. Yin’wana ya tona i rirhandzu lerikulu leri Yehovha a ri kombisaka vanhu. (1 Yoh. 4:7-10) Muapostola Pawulo u vulavule hi ndlela yin’wana leyi Yehovha a kombisaka rirhandzu rolero ha yona loko a N’wi vitana “Xikwembu xa nchavelelo hinkwawo.” (2 Kor. 1:3) Yesu u kombise rirhandzu rero loko a endla leswi a swi profetiwe eka vuprofeta bya Esaya. (Hlaya Esaya 61:1, 2.) U hlaye vuprofeta byebyo esinagogeni eNazareta kutani a tirhisa marito ya byona eka yena. (Luka 4:16-21) Hi nkarhi wa vutirheli byakwe hinkwabyo, u va chavelele hi rirhandzu lava rilaka, a va khutaza a tlhela a va endla va va ni ku rhula ka mianakanyo.

2, 3. Ha yini valandzeri va Kreste va fanele va n’wi tekelela emhakeni ya ku chavelela van’wana?

² Valandzeri hinkwavo va Yesu va fanele va n’wi tekelela hi ku chavelela lava rilaka. (1 Kor. 11:1) Pawulo u te: “Hambetani mi chavelelana, mi akana.” (1 Tes. 5:11) Ngopfu-ngopfu sweswi hi fanele hi chavelela van’wana, hikuva vanhu va langutane ni “minkarhi ya mangava leyi swi nonon’hwaka ku langutana na yona.” (2 Tim. 3:1) Vanhu vo tala va timbilu letinene emisaveni hinkwayo va boheka ku hanya exikarhi ka vanhu lava vulaka va tlhela va endla swilo leswi vangelaka van’wana gome ni nhlomulo.

³ Hilaha vuprofeta bya Bibele byi profeteke hakona, emasikwini yo hetelela ya mafambiselo lawa yo biha ya swilo, vanhu vo tala va ‘tirhandza, i varhandzi va mali, va titiva, va titlakusa, i vasandzi, a va yingisi vatswari, a va nkhensi, a va tshembeki, a va na xinakulobye xa ntumbuluko, a va lavi ntwanano hambi wu ri wihi, i valumbeti, a va tikhomi, va ni tihanyi, a va rhandzi vunene, i vaxengi, va ome tinhloko, va tikukumuxa hi ku tinyungubyisa, va rhandza mintsako ku ri ni ku rhandza Xikwembu.’ Mikhuva yoleyo se yi nyanyile sweswi hikuva “vanhu vo homboloka ni vaxisi va ya emahlweni va nyanya evubihini bya vona.”—2 Tim. 3:2-4, 13.

4. Ku humelela yini hi swiyimo swa misava enkarhini wa hina?

⁴ Leswi hinkwaswo a swi fanelanga swi hi hlamarisa, hikuva Rito ra Xikwembu ri swi veka erivaleni leswaku “misava hinkwayo yi le hansi ka matimba ya lowo homboloka.” (1 Yoh. 5:19) “Misava hinkwayo” yi katsa swiyenge swa tipolitiki, swa vukhongeri ni swa mabindzu swin’we ni tindlela leti Sathana a ti tirhisaka ku hangalasa tidyondzo takwe. A swi kanakanisi leswi Sathana Diyavulosi a vitaniwaka “mufumi wa misava” ni “xikwembu xa mafambiselo lawa ya swilo.” (Yoh. 14:30; 2 Kor. 4:4) Swiyimo emisaveni hinkwayo swi ya emahlweni swi nyanya hikuva Sathana u hlundzuke ngopfu sweswi, hikuva wa swi tiva leswaku ku sale nkarhi wutsongo emahlweni ko va Yehovha a n’wi lovisa. (Nhlav. 12:12) Swa chavelela swinene ku tiva leswaku ku nga ri khale Xikwembu xi ta lovisa Sathana ni mafambiselo yakwe yo homboloka, nileswaku mphikamakaneta leyi Sathana a yi sunguleke malunghana ni vuhosi bya Yehovha yi ta tlhantlhiwa!—Gen., ndzim. 3; Yobo ndzim. 2.

Mahungu Lamanene Ma Chumayeriwa eMisaveni Hinkwayo

5. Vuprofeta lebyi vulavulaka hi ntirho wo chumayela byi hetiseka njhani emasikwini lawa yo hetelela?

⁵ Enkarhini lowu wo tika ematin’wini ya vanhu, leswi Yesu a swi profeteke swa hetiseka. U te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Mat. 24:14) Ntirho lowu wo chumayela emisaveni hinkwayo hi Mfumo wa Xikwembu wu le ku endliweni hi mpimo lowukulu swinene. Namuntlha, Timbhoni ta Yehovha to tlula 7 500 000 leti hlanganyelaka emavandlheni yo tlula 107 000 emisaveni hinkwayo, ti chumayela hi Mfumo wa Xikwembu lowu Yesu na yena a a chumayela a tlhela a dyondzisa ha wona. (Mat. 4:17) Vanhu lava rilaka va chaveleriwa swinene hi ntirho wo chumayela lowu endliwaka namuntlha. Phela, emalembeni mambirhi lama hundzeke, ku khuvuriwe vanhu va 570 601 va va Timbhoni ta Yehovha!

6. I yini leswi u nga swi vulaka malunghana ni ku kula ka ntirho wa hina wo chumayela?

⁶ Ku kula swinene ka ntirho lowu wa ku chumayela ku nga twisisiwa kahle hi ku xiya leswaku sweswi Timbhoni ta Yehovha ti hundzuluxela ti tlhela ti hangalasa minkandziyiso leyi sekeriweke eBibeleni hi tindzimi to tlula 500. Nchumu wo fana ni lowu a wu si tshama wu voniwa ematin’wini hinkwawo ya vanhu! Ku va kona ka xiyenge xa laha misaveni xa nhlengeletano ya Yehovha, ntirho wa xona ni ku kula ka xona swa hlamarisa hakunene. Handle ko kongomisiwa ni ku pfuniwa hi moya lowo kwetsima wa Xikwembu lowu nga ni matimba, a swi nga ta koteka leswaku nchumu wo fana ni lowu wu endleka emisaveni leyi leyi lawuriwaka hi Sathana. Leswi mahungu lamanene ma chumayeriwaka emisaveni hinkwayo, vanhu lava amukelaka rungula ra Mfumo va nga kuma nchavelelo lowu kumiwaka hi vanhu va Yehovha.

Ku Chavelela Vagandzeri-kulorhi

7. (a) Ha yini hi nga ta ka hi nga languteli leswaku Yehovha a herisa swilo leswi hi vangelaka nhlomulo sweswi? (b) Hi swi tivisa ku yini leswaku hi nga swi kota ku tiyisela nxaniso ni nhlomulo?

⁷ Emisaveni leyi leyi teleke vuhomboloki, hi ta langutana ni swiyimo leswi nga ta hi vangela nhlomulo. A hi nge languteli leswaku Xikwembu xi susa swilo hinkwaswo leswi hi vangelaka gome kumbe nhlomulo loko xi nga si lovisa mafambiselo lawa ya swilo. Loko ha ha rindzele siku rero, hi langutana ni nxaniso lowu hi ringaka ku vona loko hi tshembekile eka Yehovha niloko hi seketela vuhosi byakwe. (2 Tim. 3:12) Hambiswiritano, hi ku pfuniwa ni ku chaveleriwa hi Tata wa hina wa le tilweni, hi nga fana ni Vakreste lava totiweke va le mutini wa Tesalonika wa khale, lava kombiseke ku tiyisela ni ripfumelo loko va xanisiwa ni loko va ri emahlomulweni.—Hlaya 2 Vatesalonika 1:3-5.

8. Hi byihi vumbhoni bya le Matsalweni lebyi kombisaka leswaku Yehovha u chavelela malandza yakwe?

⁸ A swi kanakanisi leswaku Yehovha u chavelela malandza yakwe hi ndlela leyi faneleke. Hi xikombiso, loko Hosi ya Xisati Yezabele wo homboloka a lava ku dlaya muprofeta Eliya, muprofeta yoloye u sungule ku chava kutani a baleka, a kala a vula leswaku a a lava ku fa. Ematshan’weni yo va Yehovha a n’wi tshinya, u n’wi chavelerile a tlhela a n’wi nyika xivindzi xo endla ntirho wakwe wo profeta. (1 Tih. 19:1-21) Leswaku Yehovha u chavelela vanhu va yena swi nga tlhela swi voniwa eka leswi humeleleke evandlheni ra Vukreste ra lembe-xidzana ro sungula. Hi xikombiso, hi hlaya hi ta nkarhi lowu “vandlha eYudiya hinkwaro na Galeliya na Samariya ri [ngheneke] eka nguva ya ku rhula, ri akeka.” Ku tlula kwalaho, “leswi a ri famba hi ku chava Yehovha ni hi nchavelelo wa moya lowo kwetsima, a ri ya ri andza.” (Mint. 9:31) Na hina ha tsaka swinene leswi hi nga ni “nchavelelo wa moya lowo kwetsima”!

9. Ha yini ku dyondza hi Yesu swi nga hi chavelelaka?

⁹ Tanihi leswi hi nga Vakreste, hi chaveleriwile hi ku dyondza hi Yesu Kreste ni hi ku landzela xikombiso xakwe. Yesu u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.” (Mat. 11:28-30) Loko hi dyondza hi musa ni rirhandzu leri Yesu a khomeke vanhu ha rona kutani hi ringeta ku landzela xikombiso xakwe, ntshikilelo lowu hi nga ha vaka na wona wu nga hela.

10, 11. I vamani lava nga ha chavelelaka van’wana evandlheni?

¹⁰ Hi nga tlhela hi chaveleriwa hi Vakreste-kulorhi. Hi xikombiso, anakanya hi ndlela leyi vakulu evandlheni va nga va pfunaka ha yona lava ripfumelo ra vona ri tsanaka. Mudyondzisiwa Yakobo u tsarile a ku: “Xana u kona loyi a vabyaka [hi tlhelo ra moya] exikarhi ka n’wina? A a vitane vakulukumba va vandlha, kutani a va n’wi khongelele.” Vuyelo bya kona byi ta va byihi? “Xikhongelo xa ripfumelo xi ta hanyisa la nga pfukiki swinene, naswona Yehovha u ta n’wi pfuxa. Nakambe, loko a lo endla swidyoho, u ta rivaleriwa swona.” (Yak. 5:14, 15) Ni swirho leswin’wana swa vandlha swi nga chavelela van’wana.

¹¹ Hakanyingi vavasati swa va olovela ku vulavula ni vavasati van’wana hi swiphiqo swa vona swo hambana-hambana. Ngopfu-ngopfu vamakwerhu va xisati lava kuleke va tlhela va va ni ntokoto va nga nyikela xitsundzuxo lexinene ngopfu eka vamakwerhu va xisati lava ha riki vantshwa. Vavasati lava va Vakreste lava kuleke va tlhela va wupfa swi nga ha endleka na vona va tshame va langutana ni swiyimo leswi fanaka. Hi ku yingisela va tlhela va khathala, va nga va mpfuno lowukulu eka vamakwerhu lava ha riki vantshwa. (Hlaya Tito 2:3-5.) Ina, vakulu ni van’wana va nga “[vulavula] hi ku chavelela eka mimoya-xiviri leyi karhatekeke” exikarhi ka hina naswona va fanele va endla tano. (1 Tes. 5:14, 15) Nakambe i swinene ku tsundzuka leswaku Xikwembu xi “hi [chavelela] enhlomulweni wa hina hinkwawo, leswaku hi ta swi kota ku chavelela lava nga emahlomulweni ya mixaka-xaka.”—2 Kor. 1:4.

12. Ha yini swi ri swa nkoka leswaku hi ya eminhlanganweni ya Vukreste?

¹² Ndlela ya nkoka swinene yo kuma nchavelelo i ku va kona eminhlanganweni ya Vukreste, laha hi khutaziwaka hi mabulo lama sekeriweke eBibeleni. Hi hlaya leswaku Yudasi na Silasi va “khutaze vamakwavo hi tinkulumo to tala va tlhela va va tiyisa.” (Mint. 15:32) Swirho swa vandlha swi va ni mabulo lama akaka loko minhlangano yi nga si sungula ni loko se yi herile. Kutani hambiloko hi xaniseka hikwalaho ka xiphiqo xo karhi, a hi fanelanga hi tihambanisa ni vamakwerhu hikuva sweswo a swi nge antswisi timhaka. (Swiv. 18:1) Ku ri na sweswo, hi fanele hi landzela ndzayo leyi huhuteriweke ya muapostola Pawulo leyi nge: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.”—Hev. 10:24, 25.

Kuma Nchavelelo eRitweni Ra Xikwembu

13, 14. Kombisa ndlela leyi Matsalwa ma nga hi chavelelaka ha yona.

¹³ Ku nga khathariseki leswaku hi Vakreste lava khuvuriweke kumbe ha ha ku sungula ku dyondza hi Xikwembu ni hi swikongomelo swa xona, hi nga kuma nchavelelo lowukulu eRitweni ra xona. Pawulo u tsarile a ku: “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Rhom. 15:4) Matsalwa yo Kwetsima ma nga hi chavelela ma tlhela ma hi endla hi “faneleka hi ku helela, [hi] hlomisiwa hi ku helela eka ntirho wun’wana ni wun’wana lowunene.” (2 Tim. 3:16, 17) Ku tiva ntiyiso malunghana ni swikongomelo swa Xikwembu ni ku va ni ntshembo wa xiviri hi vumundzuku swi ta hi chavelela swinene. Hikwalaho, a hi hlayeni Rito ra Xikwembu ni minkandziyiso leyi sekeriweke eBibeleni leyi nga hi chavelelaka yi tlhela yi hi vuyerisa hi tindlela to tala.

¹⁴ Yesu u veke xikombiso lexinene hi ku tirhisa Matsalwa leswaku a dyondzisa ni ku chavelela van’wana. Hi xikombiso, siku rin’wana endzhaku ka ku pfuxiwa kakwe, u ‘pfulele vadyondzisiwa va yena vambirhi Matsalwa hi ku helela.’ Timbilu ta vona ti khumbeke swinene loko a ri karhi a vulavula na vona. (Luka 24:32) Muapostola Pawulo u ‘kanerisane ni vanhu hi Matsalwa’ a landzela xikombiso xa Yesu lexinene ngopfu. Le Beriya, vayingiseri vakwe va “amukele rito hi mapfundza lamakulu ya mianakanyo, va kambisisa Matsalwa hi vukheta siku ni siku.” (Mint. 17:2, 10, 11) Hikwalaho i swa nkoka swinene leswaku hi hlaya Bibele siku ni siku naswona hi vuyeriwa eka yona swin’we ni minkandziyiso ya Vukreste leswi endleriweke ku hi chavelela ni ku hi nyika ntshembo eminkarhini leyi yo tika!

Tindlela Leti Engetelekeke To Chavelela Van’wana

15, 16. Hi swihi swilo swin’wana leswi hi nga swi endlaka leswaku hi pfuna ni ku chavelela Vakreste-kulorhi?

¹⁵ Ku ni swilo swo tala leswi hi nga swi endlaka leswaku hi pfuna hi tlhela chavelela Vakreste-kulorhi. Hi xikombiso, hi nga ha pfuna vapfumeri-kulorhi lava dyuhaleke kumbe lava vabyaka hi ku va yela exitolo hi ya va xavela swakudya. Hi nga ha pfuna van’wana hi mintirho ya vona ya le kaya, xisweswo hi kombisa leswaku ha khathala ha vona. (Filp. 2:4) Kumbexana hi nga ha bumabumela vapfumeri-kulorhi hi timfanelo ta vona letinene, to tanihi rirhandzu, xivindzi ni ripfumelo.

¹⁶ Nchumu wun’wana lowu hi nga wu endlaka leswaku hi chavelela lava dyuhaleke i ku va endzela kutani hi yingiserisisa loko va hi byela hi mintokoto ya vona ya khale ni mikateko leyi va yi kumeke loko va tirhela Yehovha. Phela sweswo swi nga ha hi khutaza swi tlhela swi hi chavelela! Hi nga ha tlhela hi va hlayela Bibele kumbe minkandziyiso ya hina leyi sekeriweke eBibeleni. Kumbexana hi nga ha hlaya na vona xihloko xa Xihondzo xo Rindza kumbe Dyondzo ya Vandlha ya Bibele ya vhiki rero. Hi nga ha hlalela na vona yin’wana ya ti-DVD leti sekeriweke eMatsalweni. Naswona hi nga ha va hlayela kumbe hi va hlamusela mintokoto yo karhi leyi khutazaka leyi nga eminkandziyisweni ya hina.

17, 18. Leswi hi nga malandza ya Yehovha lama tshembekaka, ha yini hi nga tiyisekaka leswaku u ta hi pfuna a tlhela a hi chavelela?

¹⁷ Loko hi xiya leswaku mugandzeri-kulorhi wa Yehovha u lava ku chaveleriwa, hi nga ha n’wi boxa eswikhongelweni swa hina. (Rhom. 15:30; Kol. 4:12) Loko hi langutane ni swiphiqo swa vutomi naswona hi ringeta ku chavelela van’wana, hi nga va ni ripfumelo ro fana ni ra mupisalema loyi a yimbeleleke a ku: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” (Ps. 55:22) Minkarhi hinkwayo Yehovha u ta hi chavelela a tlhela a hi pfuna tanihi leswi hi nga malandza yakwe yo tshembeka.

¹⁸ Xikwembu xi byele vagandzeri va xona va le minkarhini ya khale xi ku: “Mina—hi mina Loyi a mi chavelelaka.” (Esa. 51:12) Yehovha u ta hi chavelela na hina naswona u ta katekisa matshalatshala ya hina yo chavelela van’wana. Ku nga khathariseki leswaku hi ni ntshembo wo ya hanya etilweni kumbe laha misaveni, un’wana ni un’wana wa hina a nga chaveleriwa hi marito lawa Pawulo a ma tsaleleke Vakreste-kulobye lava totiweke hi moya, a ku: “Onge Hosi ya hina Yesu Kreste hi byakwe ni Xikwembu Tata wa hina, lava hi rhandzeke naswona va hi nyikeke nchavelelo lowu nga heriki ni ntshembo lowunene hi musa lowu nga faneriwiki, va nga chavelela timbilu ta n’wina ni ku mi tiyisa exiendlweni xin’wana ni xin’wana lexinene ni le ritweni.”—2 Tes. 2:16, 17.

Wa Tsundzuka Xana?

• Ntirho wa hina wo chavelela lava rilaka wu kule ku fikela kwihi?

• Hi swihi swilo swin’wana leswi hi nga swi endlaka leswaku hi chavelela van’wana?

• Hi byihi vumbhoni bya le Matsalweni lebyi kombisaka leswaku Yehovha u chavelela vanhu vakwe?

[Xifaniso lexi nga eka tluka 28]

Xana wa va chavelela lava rilaka?

[Xifaniso lexi nga eka tluka 30]

Lavatsongo ni lavakulu va nga khutaza van’wana