Tshemba Yehovha, “Xikwembu Xa Nchavelelo Hinkwawo”

“A ku dzunisiwe Xikwembu tlhelo Tata wa Hosi ya hina Yesu Kreste, Tatana la nga ni tintswalo letikulu tlhelo Xikwembu xa nchavelelo hinkwawo.”—2 KOR. 1:3.

1. Hi xihi xilaveko lexi vanhu va nga na xona ku nga khathariseki leswaku va ni malembe mangani?

KU SUKELA loko hi velekiwa, hi lava ku chaveleriwa. N’wana a nga ha rila loko a lava leswaku hi n’wi chavelela, hi n’wi tlakula kumbe loko a twa ndlala. Ni loko se hi kurile, hakanyingi hi lava ku chaveleriwa. Ngopfu-ngopfu hi lava ku chaveleriwa loko hi ri eswiyin’weni swo tika.

2. Hi xihi xitiyisekiso lexi Yehovha a xi nyikaka lava n’wi tshembaka?

² Swirho swa ndyangu ni vanghana hakanyingi va nga hi chavelela hi ndlela yo karhi. Hambiswiritano, ku ni swiyimo swin’wana leswi vanhu va nga ta ka va nga swi koti ku hi chavelela eka swona. I Xikwembu ntsena lexi nga hi chavelelaka ku nga khathariseki leswaku xiyimo xa kona xi hi tshikilela ku fika kwihi. Rito ra xona ra hi tiyisekisa: “Yehovha u le kusuhi ni hinkwavo lava n’wi vitanaka, . . . naswona u ta ku twa ku rila ka vona [loko] va kombela ku pfuniwa.” (Ps. 145:18, 19) Ina, “mahlo ya Yehovha ma le henhla ka lavo lulama, ni tindleve takwe ti yingisa xirilo xa vona xo kombela mpfuno.” (Ps. 34:15) Kambe loko hi lava ku seketeriwa ni ku chaveleriwa hi Xikwembu, hi fanele hi xi tshemba. Mupisalema Davhida u swi veke erivaleni sweswo loko a yimbelela a ku: “Yehovha u ta va xisirhelelo lexi tlakukeke eka un’wana ni un’wana la pfotlosiweke, xisirhelelo lexi tlakukeke hi minkarhi ya maxangu. Naswona lava tivaka vito ra wena va ta ku tshemba, hikuva a wu nge va tshiki lava ku lavaka hakunene, Wena Yehovha.”—Ps. 9:9, 10.

3. Yesu u yi kombise njhani ndlela leyi Yehovha a va rhandzaka ha yona vanhu Vakwe?

³ Vagandzeri va Yehovha i va risima eka yena. Yesu u yi veke erivaleni mhaka leyi loko a ku: “Ntlhanu wa swindzingiri swi xavisiwa hi timali timbirhi ta nsimbi ta risima leritsongo, a hi swona ke? Kambe ku hava ni xin’we xa swona lexi rivalekaka emahlweni ka Xikwembu. Kambe ni misisi ya tinhloko ta n’wina yi hlayiwile hinkwayo. Mi nga chavi; mi ni risima ro tlula swindzingiri swo tala.” (Luka 12:6, 7) Yehovha u byele vanhu vakwe va khale hi ku tirhisa muprofeta Yeremiya a ku: “Ndzi ku rhandzile hi rirhandzu leri nga riki na makumu. Hi yona mhaka leyi ndzi ku kokeke hi musa wa rirhandzu.”—Yer. 31:3.

4. Ha yini hi nga swi tshembaka switshembiso swa Yehovha?

⁴ Loko hi tshemba Yehovha ni switshembiso swakwe hi ta chaveleleka loko hi ri emaxangwini. Hikwalaho hi fanele hi tshemba Xikwembu ku fana na Yoxuwa loyi a vuleke a ku: “A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina. A ku wanga ni rito rin’we eka wona.” (Yox. 23:14) Ku tlula kwalaho, hi nga tiyiseka leswaku hambiloko hi xaniseka hikwalaho ka swiyimo swo tika sweswi, “Xikwembu xa tshembeka” naswona a xi nge ma rivali malandza ya xona yo tshembeka.—Hlaya 1 Vakorinto 10:13.

5. Hi nga swi kotisa ku yini ku chavelela van’wana?

⁵ Muapostola Pawulo u vule leswaku Yehovha i “Xikwembu xa nchavelelo hinkwawo.” “Ku chavelela” swi vula ku tiyisa munhu loyi a nga emaxangwini kumbe loyi a nga ni gome. Sweswo hi nga swi endla hi ku herisa mbitsi kumbe gome leri a nga na rona ivi hi n’wi khutaza. Kahle-kahle Yehovha u endla sweswo. (Hlaya 2 Vakorinto 1:3, 4.) Ku hava nchumu kumbe munhu wo karhi loyi a nga sivelaka Tata wa hina wa le tilweni ku endla sweswo. Hikwalaho a nga endla xin’wana ni xin’wana lexi lavekaka leswaku a chavelela lava n’wi rhandzaka. Na hina loko se hi chaveleriwile, ha swi kota ku chavelela vapfumeri-kulorhi “emahlomulweni ya mixaka-xaka.” Sweswo hi nga swi endla “hi nchavelelo lowu Xikwembu xi hi chavelelaka ha wona.” Ku hava munhu loyi a nga hi chavelelaka kahle ku tlula Yehovha!

Ku Langutana Ni Swilo Leswi Vangaka Ku Xaniseka

6. Nyika swikombiso swa swilo leswi nga hi vangelaka ku xaniseka.

⁶ Hi lava ku chaveleriwa eswiyin’weni swo tala evuton’wini. Nchumu lowukulu lowu hi vangelaka gome i ku feriwa hi munhu loyi hi n’wi rhandzaka, ngopfu-ngopfu munghana wa hina wa vukati kumbe n’wana. Nakambe munhu a nga lava ku chaveleriwa loko a languteriwa ehansi hikwalaho ka xihlawuhlawu. Vuvabyi, vudyuhari, vusweti, swiphiqo swa vukati kumbe swilo swo homboloka leswi endlekaka emisaveni swi nga endla leswaku hi lava ku chaveleriwa.

7. (a) Ha yini hi lava nchavelelo loko hi ri eswiyin’weni swo tika swinene? (b) I yini leswi Yehovha a nga swi endlaka leswaku a horisa mbilu leyi “tshovekeke yi tlhela yi pfotloseka”?

⁷ Loko hi ri emaxangwini, hi xaniseka hi tindlela to tala. Kutani hi lava nchavelelo hikuva mbilu, mianakanyo, mintlhaveko, rihanyo ni ripfumelo ra hina swi nga ha khumbeka. Hi xikombiso, ehleketa hi mbilu. Rito ra Xikwembu ri vula leswaku mbilu ya hina yi nga “[tshoveka] yi tlhela yi pfotloseka.” (Ps. 51:17) Yehovha a nga hi pfuna exiyin’weni lexi, hikuva “u horisa vanhu lava timbilu ta vona ti vavisekeke, naswona u boha timbanga ta vona leti vavaka.” (Ps. 147:3) Hambiloko hi ri eswiyin’weni swo tika swinene, Xikwembu xi nga tiyisa timbilu ta hina leti vavisekeke loko hi khongela eka xona hi ripfumelo naswona hi yingisa swileriso swa xona.—Hlaya 1 Yohane 3:19-22; 5:14, 15.

8. Yehovha a nga hi pfuna njhani loko hi tshikilelekile emianakanyweni?

⁸ Hakanyingi mianakanyo ya hina yi lava ku chaveleriwa hikuva miringo yo hambana-hambana yi nga hi tshikilela swinene emianakanyweni. Hi lava mpfuno loko hi langutana ni miringo leyi. Hambiswiritano, mupisalema u yimbelerile a ku: “Loko miehleketo ya mina leyi ndzi karhataka yi tele endzeni ka mina, nchavelelo wa wena wu sungule ku vukarha moya-xiviri wa mina.” (Ps. 94:19) Ku tlula kwalaho, Pawulo u tsarile a ku: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” (Filp. 4:6, 7) Ku hlaya ni ku anakanyisisa hi Matsalwa swi nga hi pfuna swinene leswaku hi langutana ni ntshikilelo wa mianakanyo.—2 Tim. 3:15-17.

9. Hi nga langutana njhani ni ku tshikileleka emianakanyweni?

⁹ Minkarhi yin’wana, hi nga ha hela matimba swinene lerova hi va ekhombyeni ro hluriwa hi mintlhaveko yo biha. Hi nga ha ehleketa leswaku a hi nge swi koti ku byarha vutihlamuleri byo karhi bya le Matsalweni kumbe ku endla xiavelo xo karhi evandlheni. Yehovha a nga hi chavelela a tlhela a hi pfuna ni le xiyin’weni xo tano. Hi xikombiso: Loko Yoxuwa a lerisiwe ku rhangela Vaisrayele leswaku va ya lwa ni matiko lama nga ni matimba swinene lama nga valala, Muxe u byele vanhu a ku: “Vanani ni xivindzi, mi va ni matimba. Mi nga chavi kumbe mi tshuka emahlweni ka wona, hikuva Yehovha Xikwembu xa n’wina hi yena la fambaka na n’wina. A nge mi tshiki kumbe a mi siya hilaha ku heleleke.” (Det. 31:6) Hi ku pfuniwa hi Yehovha, Yoxuwa u kote ku rhangela vanhu va Xikwembu a va nghenisa eTikweni leri Tshembisiweke ni ku hlula valala va vona hinkwavo. Enkarhini lowu hundzeke, Muxe u pfuniwe hi Xikwembu hi ndlela leyi fanaka eLwandle ro Tshwuka.—Eks. 14:13, 14, 29-31.

10. I yini leswi nga hi pfunaka loko swiyimo swo biha swi khumba rihanyo ra hina?

¹⁰ Swiyimo swo biha swi nga khumba rihanyo ra hina. I ntiyiso leswaku ku dya kahle, ku wisa hilaha ku eneleke, ku endla vutiolori, ku basa emirini ni ku va ni makaya lama baseke swi nga hi pfuna. Nakambe loko hi ehleketa hi leswi Bibele yi swi vulaka hi vumundzuku, sweswo swi nga ha hi pfuna hi va ni rihanyo lerinene. Hikwalaho, swa pfuna leswaku loko hi ri emaxangwini hi tsundzuka leswi humeleleke Pawulo ni marito yakwe lama khutazaka lama nge: “Hi kamanyetiwile hi tindlela hinkwato, kambe a hi manyiwanga lerova hi nga swi koti ni ku famba; hi pfilunganyekile, kambe a hi yi pfumali hi ku helela ndlela yo huma; ha xanisiwa, kambe a hi siyiwi eku kayakayeni; ha tlatlalatiwa ehansi, kambe a hi lovisiwi.”—2 Kor. 4:8, 9.

11. Hi nga endla yini loko hi vona onge ripfumelo ra hina ra tsana?

¹¹ Miringo yin’wana yi nga khumba ripfumelo ra hina. Yehovha a nga hi pfuna ni le mhakeni leyi. Rito rakwe ra hi tiyisekisa: “Yehovha u seketela hinkwavo lava waka, naswona u yimisa hinkwavo lava nkhinsamaka.” (Ps. 145:14) Loko hi vona onge ripfumelo ra hina ra tsana, hi fanele hi kombela vakulu lava nga Vakreste leswaku va hi pfuna. (Yak. 5:14, 15) Naswona ku tshamela ku ehleketa hi ntshembo wa hina wa le Matsalweni wa vutomi lebyi nga heriki, swi nga hi tiyisa loko ripfumelo ra hina ri ringiwa.—Yoh. 17:3.

Swikombiso Swa Vanhu Lava Chaveleriweke Hi Xikwembu

12. Hlamusela ndlela leyi Yehovha a n’wi chaveleleke ha yona Abrahama.

¹² Mupisalema loyi a huhuteriweke u te: “Tsundzuka rito leri [Yehovha] u ri vuleke eka nandza wa wena, leri u ndzi rindziseke ha rona. Lowu i nchavelelo wa mina eku xanisekeni ka mina, hikuva rito ra wena ri ndzi londzovote ndzi hanya.” (Ps. 119:49, 50) Namuntlha, hi ni Rito ra Yehovha leri nga ni swikombiso swo tala swa malandza yakwe lawa a ma chaveleleke. Hi xikombiso, Abrahama a a karhatekile swinene loko a twa leswaku Yehovha u ta lovisa muti wa Sodoma na Gomora. U vutise Xikwembu a ku: “Xana hakunene u ta kukula wo lulama swin’we ni wo homboloka?” Yehovha u chavelele Abrahama hi ku n’wi tiyisekisa leswaku loko ko kumeka vanhu va 50 ntsena vo lulama, a a nga ta wu lovisa muti wa Sodoma. Hambiswiritano, Abrahama u vutise Yehovha minkarhi ya ntlhanu a ku: Ku vuriwa yini loko ko kumeka vanhu va 45 vo lulama? va 40? va 30? va 20? va 10? Yehovha hi ku lehisa mbilu ni hi musa u tiyisekise Abrahama leswaku muti wa Sodoma a a nga ta wu lovisa. Hambileswi a ku ri hava ni vanhu va khume lava lulameke emitini yoleyo, Yehovha u ponise Lota ni vana vakwe va vanhwanyana.—Gen. 18:22-32; 19:15, 16, 26.

13. Hana u swi kombise njhani leswaku u tshemba Yehovha?

¹³ Hana nsati wa Elkana a a lava n’wana hi mbilu yakwe hinkwayo. Kambe a a ri mhika, kutani sweswo a swi n’wi dyisa mbitsi. U khongele eka Yehovha hi mhaka yoleyo naswona Muprista Lonkulu Eli u n’wi byela a ku: “Onge Xikwembu xa Israyele xi nga hlamula xikombelo [xa wena].” Sweswo swi n’wi chavelerile Hana naswona “xikandza xakwe a xa ha tlhelanga xi vilela.” (1 Sam. 1:8, 17, 18) Hana a a tshemba leswaku Yehovha u ta tlhantlha xiphiqo xakwe. Hambileswi a a nga swi tivi leswaku ku ta va ni vuyelo byihi, u ve ni ku rhula ka mianakanyo. Hi ku famba ka nkarhi, Yehovha u hlamule xikhongelo xakwe. U tikile kutani a veleka n’wana wa jaha loyi a n’wi thyeke Samuwele.—1 Sam. 1:20.

14. Ha yini Davhida a a lava ku chaveleriwa, naswona u wu kume kwihi nchavelelo?

¹⁴ Hosi Davhida wa le Israyele wa khale i xikombiso xin’wana xa munhu loyi a chaveleriweke hi Xikwembu. Tanihi leswi Yehovha a “[vonaka] leswi mbilu yi nga swona,” loko a hlawula Davhida leswaku a ta va hosi ya le Israyele, a a swi tiva leswaku Davhida a a lava ku endla leswi lulameke ni leswaku a a rhandza vugandzeri bya ntiyiso. (1 Sam. 16:7; 2 Sam. 5:10) Hambiswiritano, endzhaku ka nkarhi Davhida u endle vuoswi na Bati-xeba kutani a ringeta ku tumbeta xidyoho xakwe hi ku lerisa leswaku nuna wakwe a dlayiwa. Loko Davhida a xiye leswaku u endle xidyoho lexikulu, u khongele eka Yehovha a ku: “Hlangula ku tlula ka mina nawu hi ku ya hi tintswalo ta wena to tala. Ndzi hlantswe xihoxo xa mina swinene, naswona ndzi basise eka xidyoho xa mina. Hikuva ndza ku tiva ku tlula ka mina nawu, naswona xidyoho xa mina xi le mahlweni ka mina nkarhi hinkwawo.” (Ps. 51:1-3) Davhida u hundzuke swi huma embilwini naswona Yehovha u n’wi rivalerile. Hambiswiritano, Davhida u boheke ku langutana ni vuyelo bya xidyoho xakwe. (2 Sam. 12:9-12) Nilokoswiritano, tintswalo ta Yehovha ti n’wi chavelerile.

15. Yehovha u n’wi pfune njhani Yesu emahlweninyana ko va a dlayiwa?

¹⁵ Loko Yesu a ri laha misaveni, u langutane ni miringo yo tala yo tika. Xikwembu xi pfumelele miringo yoleyo, kambe Yesu u tshame a tshembekile tanihi wanuna loyi a hetisekeke loyi minkarhi hinkwayo a a tshemba Yehovha a tlhela a n’wi yingisa tanihi Mufumi. Loko Yesu a ri kusuhi ni ku xengiwa ni ku dlayiwa, u khongele eka Yehovha a ku: “Ku nga endleki ku rhandza ka mina, kambe a ku endleke ka wena.” Ntsumi yi humelele eka Yesu kutani yi n’wi tiyisa. (Luka 22:42, 43) Xikwembu xi chavelele Yesu, xi n’wi nyika matimba ni mpfuno lowu a a wu lava hi nkarhi wolowo.

16. Xikwembu xi nga hi pfuna njhani loko hi langutane ni rifu hikwalaho ka ripfumelo ra hina?

¹⁶ Yehovha u ta hi pfuna leswaku hi tshama hi tshembekile hambiloko hi langutane ni rifu hikwalaho ka ripfumelo ra hina. Ku tlula kwalaho, ntshembo wa ku pfuxiwa ka vafi wa hi chavelela. Naswona hi ri langutele hi mahlo-ngati siku leri nala wo hetelela, ku nga rifu a “nga ta herisiwa” ha rona! (1 Kor. 15:26) Malandza yo tshembeka ya Xikwembu swin’we ni vanhu van’wana lava feke va le mianakanyweni ya Yehovha leyi hetisekeke naswona va ta pfuxiwa. (Yoh. 5:28, 29; Mint. 24:15) Ku va ni ripfumelo eka xitshembiso xa Yehovha xa ku pfuxiwa ka vafi swa hi chavelela swi tlhela swi hi nyika ntshembo lowu tiyeke loko hi xanisiwa.

17. Yehovha a nga hi chavelela njhani loko hi feriwe hi munhu loyi hi n’wi rhandzaka?

¹⁷ Swa chavelela swinene ku tiva leswaku varhandziwa va hina lava feke va ni ntshembo wo pfuxeriwa emisaveni leyintshwa yo saseka. Swilo leswi vangaka ku xaniseka swi ta va swi nga ha ri kona! Mayana lunghelo lerikulu leri nga ta kumiwa hi “ntshungu lowukulu” wa malandza ya Yehovha lama nga ta pona makumu ya mafambiselo lawa yo homboloka ya swilo ro amukela ni ku dyondzisa vanhu lava nga ta pfuxiwa laha misaveni!—Nhlav. 7:9, 10.

Ehansi I Mavoko Ya Xikwembu Lama Tshamaka Hilaha Ku Nga Heriki

18, 19. Malandza ya Xikwembu ma chaveleriwe njhani loko ma xanisiwa?

¹⁸ Muxe u tiyisekise Vaisrayele hi ku vula marito ya risimu leri khutazaka ri tlhela ri chavelela, a ku: “Ndhawu ya ku tifihla i Xikwembu xa minkarhi ya khale, naswona ehansi i mavoko lama tshamaka hilaha ku nga heriki.” (Det. 33:27) Hi ku famba ka nkarhi, muprofeta Samuwele u byele Vaisrayele a ku: “Mi nga hambuki mi tshika ku landzela Yehovha, mi fanele mi tirhela Yehovha hi mbilu ya n’wina hinkwayo. . . . Yehovha a nge va tshiki vanhu vakwe hikwalaho ka vito rakwe lerikulu.” (1 Sam. 12:20-22) Loko hi tirhela Yehovha hi ku tshembeka a nge hi fularheli. Minkarhi hinkwayo u ta hi pfuna.

¹⁹ Xikwembu xa va chavelela vanhu va xona xi tlhela xi va pfuna emasikwini lawa yo hetelela ya mangava. Ku tlula dzana ra malembe, magidi ya vagandzeri-kulorhi emisaveni hinkwayo va xanisiwile va tlhela va khotsiwa hikwalaho ko tirhela Yehovha. Leswi va humeleleke swi kombisa leswaku Yehovha wa ma chavelela malandza yakwe loko ma ringiwa. Hi xikombiso, un’wana wa vamakwerhu wa le tikweni ra khale ra Soviet Union u gweviwe malembe ya 23 ekhotsweni hikwalaho ka ripfumelo rakwe. Hambileswi a a khotsiwile, a a kuma minkandziyiso leyi sekeriweke eBibeleni leyi n’wi tiyiseke yi tlhela yi n’wi chavelela. U te: “Emalembeni wolawo hinkwawo, ndzi dyondze ku tshemba Yehovha naswona u ndzi nyike matimba.”—Hlaya 1 Petro 5:6, 7.

20. Ha yini hi nga tiyisekaka leswaku Yehovha a nge hi fularheli?

²⁰ Ku nga khathariseki leswi nga endlekaka eka hina enkarhini lowu taka, hi ta va hi endla kahle loko hi tsundzuka marito ya mupisalema lama chavelelaka, lama nge: “Yehovha a nge va fularheli vanhu vakwe.” (Ps. 94:14) Hambileswi hi swi lavaka ku chaveleriwa, na hina hi ni lunghelo lerikulu ro chavelela van’wana. Hilaha hi nga ta swi vona hakona exihlokweni lexi landzelaka, hi nga chavelela lava xanisekaka emisaveni leyi leyi nga ni swiphiqo.

A Wu Ta Hlamurisa Ku Yini?

• Hi swihi swilo swin’wana leswi nga hi tshikilelaka?

• Yehovha u ma chavelela njhani malandza yakwe?

• I yini lexi nga hi chavelelaka loko hi langutane ni rifu?

[Bokisi/Swifaniso leswi nga eka tluka 25]

NDLELA YO LANGUTANA NI SWILO LESWI NGA KHUMBAKA . . . 

▪ mbilu ya hina Ps. 147:3; 1 Yoh. 3:19-22; 5:14, 15

▪ mianakanyo ya hina Ps. 94:19; Filp. 4:6, 7

▪ mintlhaveko ya hina Eks. 14:13, 14; Det. 31:6

▪ rihanyo ra hina 2 Kor. 4:8, 9

▪ ripfumelo ra hina Ps. 145:14; Yak. 5:14, 15