Kuma Nchavelelo eMatimbeni Ya Yehovha

“Loko miehleketo ya mina leyi ndzi karhataka yi tele endzeni ka mina, nchavelelo wa wena wu sungule ku vukarha moya-xiviri wa mina.”—PISALEMA 94:19.

EKA hinkwavo lava lavaka ku tiyisiwa nhlana, Bibele yi ni marito ya nchavelelo. Kutani a swi hlamarisi leswi The World Book Encyclopedia yi vulaka leswaku “vanhu vo tala swinene va ye eBibeleni leswaku va kuma nchavelelo, ntshembo ni nkongomiso loko va ri ni swiphiqo ni loko va kanakana.” Ha yini?

Hikuva Bibele yi huhuteriwe hi Muvumbi wa hina wa rirhandzu, “Xikwembu xa nchavelelo hinkwawo,” lexi “hi chavelelaka enhlomulweni wa hina hinkwawo.” (2 Vakorinto 1:3, 4) I ‘Xikwembu lexi nyikaka nchavelelo.’ (Varhoma 15:5) Yehovha u hi vekele xikombiso hi ku endla lunghiselelo ro hi ntshunxa hinkwerhu. U rhumele N’wana wa yena la tswariweke a ri swakwe, Kreste Yesu, emisaveni leswaku a hi nyika ntshembo ni nchavelelo. Yesu u dyondzisile a ku: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Bibele yi hlamusela Yehovha tanihi loyi “a hi rhwalelaka mpingu wa hina siku ni siku, Xikwembu xa ntiyiso xa ku ponisiwa ka hina.” (Pisalema 68:19) Vanhu lava chavaka Xikwembu va nga vula hi ku tiyiseka va ku: “Ndzi veke Yehovha emahlweni ka mina nkarhi hinkwawo. Hikuva u le vokweni ra mina ra xinene, a ndzi nge tsekatsekisiwi.”—Pisalema 16:8.

Tindzimana toleto ta Bibele ti kombisa rirhandzu lerikulu leri Yehovha Xikwembu a nga na rona eka hina vanhu. Swi le rivaleni leswaku u swi navela hi mbilu hinkwayo—naswona u ni vuswikoti—ku hi nyika nchavelelo lowukulu ni ku hi phyuphyisa eminkarhini ya maxangu. “Loyi a karhaleke u n’wi nyika matimba; kasi loyi a nga riki na wona matimba lamakulu u n’wi engetelela matimba.” (Esaya 40:29) Kutani, xana hi nga wu kuma njhani nchavelelo ematimbeni ya Yehovha?

Vuyelo Lebyi Chavelelaka Bya Nkhathalelo Wa Yehovha

Mupisalema u tsarile: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” (Pisalema 55:22) Ina, Yehovha Xikwembu wa va tsakela vanhu. Muapostola Petro u tiyisekise Vakreste va lembe-xidzana ro sungula a ku: “[Xikwembu] xa mi khathalela.” (1 Petro 5:7) Yesu Kreste u kandziyise ndlela leyi Xikwembu xi tekaka vanhu va ri va nkoka ha yona hi ku vula a ku: “Ntlhanu wa swindzingiri swi xavisiwa hi timali timbirhi ta nsimbi ta risima leritsongo, a hi swona ke? Kambe ku hava ni xin’we xa swona lexi rivalekaka emahlweni ka Xikwembu. Kambe ni misisi ya tinhloko ta n’wina yi hlayiwile hinkwayo. Mi nga chavi; mi ni risima ro tlula swindzingiri swo tala.” (Luka 12:6, 7) Hi va risima swinene eka Xikwembu lerova xi khathalela ni swilo leswitsongo ngopfu ha hina. Xi tiva swilo leswi na hina vini hi nga swi tiviki hikwalaho ka leswi xi khathalaka ngopfu hi un’wana ni un’wana wa hina.

Ku vona rirhandzu leri Yehovha a nga na rona eka yena swi n’wi chavelele ngopfu Svetlana, nhwanyana loyi a a ri nghwavava loyi ku vulavuriweke ha yena eka xihloko lexi hundzeke. A a ri kusuhi ni ku tisunga loko a hlangana ni Timbhoni ta Yehovha. Kutani u amukele dyondzo ya Bibele, leyi n’wi pfuneke ku tolovelana na Yehovha tanihi munhu wa xiviri loyi a khathalaka hi vuhlayiseki bya yena. Leswi swi khumbe mbilu ya yena, swi n’wi susumetela ku cinca mahanyelo ya yena kutani a tinyiketela eka Xikwembu. Swi tlhele swi endla leswaku Svetlana a va ni xivindzi xa ku tixixima lexi n’wi pfuneke ku tiyisela ku nga khathariseki swiphiqo swa yena ni ku va ni langutelo lerinene evuton’wini. Sweswi u ri: “Ndza khorwiseka leswaku Yehovha a nga ka a nga ndzi tshiki. Ndzi kume leswaku leswi tsariweke eka 1 Petro 5:7 i ntiyiso. Yi ri: ‘Mi lahlela ku vilela hinkwako ka n’wina eka [Yehovha], hikuva [wa mi] khathalela.’”

Ntshembo Lowu Sekeriweke EBibeleni Wa Chavelela

Ndlela yin’wana leyi Xikwembu xi hi chavelelaka ha yona i ku tirhisa Rito ra xona leri tsariweke, leri tameleke ntshembo wa vumundzuku lebyi hlamarisaka. Muapostola Pawulo u tsarile: “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Varhoma 15:4) Pawulo u byi kombise kahle vuxaka exikarhi ka ntshembo wa ntiyiso ni nchavelelo loko a ku: “Onge . . . Xikwembu Tata wa hina, [lexi] hi rhandzeke naswona [xi] hi nyikeke nchavelelo lowu nga heriki ni ntshembo lowunene hi musa lowu nga faneriwiki, [xi] nga chavelela timbilu ta n’wina ni ku mi tiyisa exiendlweni xin’wana ni xin’wana lexinene ni le ritweni.” (2 Vatesalonika 2:16, 17) ‘Ntshembo lowu lowunene’ wu katsa ku langutela ku kuma vutomi lebyi hetisekeke, lebyi tsakisaka ni lebyi nga heriki emisaveni leyi nga paradeyisi.—2 Petro 3:13.

Ntshembo wolowo lowu tiyisekisiweke ni lowunene wu khutaze Laimonis, ku nga xindzendzele lexi lamaleke lexi ku vulavuriweke ha xona eka xihloko lexi hundzeke. Loko a hlaya tibuku leti sekeriweke eBibeleni ta Timbhoni ta Yehovha, u tsakisiwe hi ku dyondza hi ta misava leyintshwa leyi nga ta fumiwa hi Mfumo wa Xikwembu, laha rihanyo ra yena ri nga ta endliwa lerinene. EBibeleni u hlaye hi ntshembo lowu landzelaka, lowu vangamaka wa ku horisiwa hi singita: “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” (Esaya 35:5, 6) Leswaku a ta fanelekela ku kuma vutomi eParadeyisini yoleyo, Laimonis u endle ku cinca lokukulu. U tshike ku nwa, naswona ku cinca ka yena ku xiyiwe hi vaakelani va yena ni lava va n’wi toloveleke. Sweswi u fambisa tidyondzo ta Bibele to hlaya, u avelana ni van’wana nchavelelo lowu kumekaka hi ku va ni ntshembo lowu sekeriweke eBibeleni.

Ntirho Wa Xikhongelo

Loko mbilu ya hina yi karhatekile hikwalaho ka swivangelo swo karhi, hi nga kuma nchavelelo hi ku khongela eka Yehovha. Sweswo swi nga hi rhula ndzhwalo wa hina. Loko hi khongela, hi nga chaveleleka hi ku tsundzuka swilo leswi tsariweke eRitweni ra Xikwembu. Pisalema yo leha ngopfu eBibeleni yi fana ni xikhongelo xo saseka. Muqambhi wa yona u yimbelerile a ku: “Oho Yehovha, ndzi swi tsundzukile swiboho swa wena swa vuavanyisi hilaha ku nga riki na makumu, naswona ndzi tikumela nchavelelo.” (Pisalema 119:52) Eka swiyimo swo tika swinene, ngopfu-ngopfu leswi katsaka rihanyo, hi xitalo nhlamulo yi ta hi tindlela to tala. Loko hi tirhisa matimba ya hina hi nga tikuma hi nga ku tivi laha kahle-kahle hi faneleke hi hundzukela kona. Vo tala va kume leswaku loko va endle hinkwaswo leswi va nga swi kotaka, ku ya eka Xikwembu hi xikhongelo ku endle leswaku va kuma nchavelelo lowukulu, naswona minkarhi yin’wana va kuma mpfuno lowu va nga wu rindzelangiki.—1 Vakorinto 10:13.

Pat, loyi a tsutsumiseriweke ekamareni ra le xibedlhele ra lava vabyaka ngopfu, u vone vuyelo lebyi chavelelaka bya xikhongelo. Loko se a hlakarherile u te: “Ndzi khongele eka Yehovha, naswona ndzi dyondze leswaku ndzi fanele ndzi titshega hi yena, ndzi ri ni ntshembo wa leswaku u ta endla xin’wana ni xin’wana lexi a xi rhandzaka. Nkarhi lowu hinkwawo a ndzi titwa ndzi rhurile; a ndzi ri ni ku rhula ka Xikwembu, loku ku vulavuriwaka hakona eka Vafilipiya 4:6, 7.” Mayana ndlela leyi tindzimana leti ti nga hi chavelelaka ha yona hinkwerhu! Kwalaho Pawulo wa hi khutaza: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”

Ku Chaveleriwa Hi Moya Lowo Kwetsima

Hi vusiku bya le mahlweni ka ku fa kakwe, Yesu u swi veke erivaleni eka vaapostola va yena leswaku ku nga ri khale a a ta va siya. Leswi swi va karhatile ni ku va khomisa gome. (Yohane 13:33, 36; 14:27-31) Hi ku xiya leswaku a va ta lava ku hambeta va chaveleriwa, Yesu u va tshembisile a ku: “Ndzi ta kombela Tatana kutani u ta mi nyika mupfuni un’wana [kumbe, muchaveleri] leswaku a va na n’wina hi masiku.” (Yohane 14:16; nhlamuselo ya le hansi ya NW) Laha Yesu a a vulavula hi moya lowo kwetsima wa Xikwembu. Hi xikombiso, moya wa Xikwembu wu chavelele vaapostola hi nkarhi wa ku ringiwa ka vona naswona wu va tiyisile leswaku va hambeta va endla ku rhandza ka Xikwembu.—Mintirho 4:31.

Angie, loyi nuna wa yena loyi a ri kusuhi ni ku fa endzhaku ka mhangu yo chavisa, u swi kotile ku langutana kahle ni maxangu ni gome hinkwaro ra xiyimo xa yena. Xana u pfune hi yini? U ri: “Handle ko seketeriwa hi moya lowo kwetsima wa Yehovha, a hi ta va hi nga swi kotanga ku langutana ni maxangu lawa a hi ri na wona ivi hi tama ha ha ri ni matimba. Hakunene matimba ya Yehovha ma kombisiwile eku tsaneni ka hina, naswona u ti kombise a ri khokholo hi nkarhi wa hina wa gome.”

Nchavelelo Wa Vumakwerhu

Ku nga khathariseki xiyimo lexi munhu a nga vaka eka xona evuton’wini, ku nga khathariseki swiyimo leswi vavaka leswi nga ha humelelaka, u fanele a kuma nchavelelo eka vumakwerhu lebyi nga kona evandlheni ra Yehovha. Vumakwerhu lebyi byi nyika nseketelo wa swa moya ni mpfuno eka lava nga eka byona. Kwalaho, munhu a nga kuma ntlawa wa vanghana lava nga ni rirhandzu, nkhathalelo ni lava chavelelaka, lava lunghekeleke ni ku rhandza ku pfuna ni ku chavelela van’wana hi minkarhi ya nhlomulo.—2 Vakorinto 7:5-7.

Swirho swa vandlha ra Vukreste swi dyondzisiwa ku ‘endlela hinkwavo leswi nga swinene, kambe ngopfu-ngopfu lava nga swin’we na vona eripfumelweni.’ (Vagalatiya 6:10) Dyondzo leyi va yi kumaka leyi sekeriweke eBibeleni yi va susumetela ku kombisa rirhandzu ra vumakwerhu ni ku kombisa xinakulobye lexikulu. (Varhoma 12:10; 1 Petro 3:8) Vamakwerhu va xinuna ni va xisati evandlheni va susumeteleka ku va ni musa, ni ku kombisa nchavelelo ni ntwela-vusiwana.—Vaefesa 4:32.

Joe na Rebecca, lava feleke hi jaha ra vona hi ndlela yo vava, va kume nseketelo lowu chavelelaka eka swirho swa vandlha ra Vukreste. Va ri: “Yehovha swin’we ni vandlha ra yena leri nga ni rirhandzu va hi pfunile hi nkarhi wa ku nonon’hweriwa ka hina. Hi amukele madzana ya makhadi, mapapila ni tiqingho. Leswi swi hi endle hi tlangela ndlela leyi vumakwerhu bya hina byi nga bya risima ha yona. Loko ha ha ri ni gome lerikulu hikwalaho ka mhangu, mavandlha yo tala ya le kusuhi ma tile ma ta hi pfuna, ma hi endlela swakudya ni ku basisa yindlu.”

Kuma Nchavelelo!

Loko maxangu ma sungula ku hlasela ni gome ri tinyika matimba, Xikwembu xi tshama xi lunghekele ku hi nyika nsirhelelo lowu chavelelaka. Leyi i ndlela yin’wana leyi tipisalema yi xi hlamuselaka tanihi lexi nyikaka vutumbelo lebyi chavelelaka, loko yi ku: “U ta ku sirhelela hi timpapa takwe, u ta tumbela ehansi ka timpapa takwe.” (Pisalema 91:4) Xifaniso lexi ku vulavuriwaka hi xona laha xi nga ha fanisiwa ni gama. I xifaniso xa xinyenyana lexi twaka khombo kutani xi pfula timpapa ta xona leswaku xi sirhelela vana va xona. Yehovha u va Musirheleri eka hinkwavo lava kumaka vuchavelo eka yena hi ndlela leyikulu.—Pisalema 7:1.

Loko u rhandza ku dyondza leswi engetelekeke hi Xikwembu, vumunhu bya xona, swikongomelo swa xona ni vuswikoti bya xona byo nyika nchavelelo, wa rhambiwa leswaku u dyondza Rito ra xona. Timbhoni ta Yehovha ti nga tsakela ku ku pfuna eka matshalatshala ya wena. Ina, na wena u nga kuma nchavelelo ematimbeni ya Yehovha!

[Swifaniso leswi nga eka tluka 7]

Ntshembo wa vumundzuku lowu sekeriweke eBibeleni wu nga nyika nchavelelo