Ku Susa—Xana I Lunghiselelo Ra Rirhandzu?
“WA KWETSIMA, wa kwetsima, wa kwetsima, loyi a nga Hosi ya matimba hinkwawo.” (Nhlavutelo 4:8) Hi ku ya hi nhlamuselo yoleyo, Yehovha i Xihlovo xa mimpimanyeto leyo kwetsima. Leswi swi tsariwe eka “Matsalwa layo Hlawuleka,” naswona Vakreste va boheka ku landzelela minkongomiso leyi. Hakunene, va fanele ku papalata nchumu wihi na wihi lowu nga tengangiki emahlweni ya Yehovha.—2 Timotiya 3:15; Esaya 52:11.
Bibele yi swi veka erivaleni: “Leswi loyi a nga mi vitana a hlawulekeke, hlawulekani na n’wina emahanyelweni hinkwawo ya n’wina. Hikuva ku tsariwile va ku: ‘Hlawulekani, hikuva mina ndzi hlawulekile.’” (1 Petro 1:15, 16) Ku sukela loko vandlha ra Vukreste ri sungurile eka malembe-xidzana ya 19 lama hundzeke, Vakreste va ntiyiso va lwe hi matimba ku ri sirhelela leswaku ri nga thyakisiwi hi tlhelo ra moya ni ra mahanyelo lama nga tengangiki.—Yuda 3.
Mhaka Leyi Nsirhelelo Wu Nga Wa Nkoka Ha Yona
Malandza hinkwawo ya Xikwembu ma langutana ni xiyimo lexi tlhontlhaka xo tshama va basile emahanyelweni ni le moyeni. Hikwalaho ka sweswo, valala vanharhu lava nga ni matimba va fanele ku aleriwa—Sathana, misava yakwe ni mimboyamelo ya hina ya vudyoho. (Varhoma 5:12; 2 Vakorinto 2:11; 1 Yohane 5:19) Misava ya Sathana yi ta ku ringa leswaku u tikhoma hi ndlela yo biha, yi ta ku kucetela leswaku u tekelela tindlela ta yona, naswona yi ta ku nyika rifuwo ra leswi vonakaka, ndhuma, xikhundla, xiyimo xa le henhla ni matimba. Kambe lava tiyimiseleke ku chivirikela vugandzeri bya ntiyiso va alela swilo leswi Sathana a swi nyikelaka kutani va tshama va “nga ri na šiv̌ati ša misav̌a.” (BX) Ha yini? Hikuva va lava ku tshama ehansi ka nkhathalelo wa vuhlayiseki ni wa rirhandzu wa nhlengeletano leyi baseke ya Yehovha.—Yakobo 1:27; 1 Yohane 2:15-17.
Yehovha u nyikele mpfuno eka xirho xin’wana ni xin’wana xa vandlha ra Vukreste lexi hlaseriwaka hi mintlhamu ya Sathana hikwalaho ka ku tsana ka vumunhu. Vakulu lava vupfeke hi tlhelo ra moya va hlawuleriwe ku sirhelela vandlha ni ku pfuna vadyohi hi rirhandzu leswaku va hundzuka eswidyohweni swa vona va endla mindzulamiso leyi lavekaka leswaku va hlakarhela. Mukreste wihi na wihi loyi a katsekaka eka swiendlo leswo biha u fanele a pfuniwa hi rirhandzu leswaku a hundzuka a cinca tindlela ta yena.—Vagalatiya 6:1, 2; Yakobo 5:13-16.
Ndlela Leyi Ku Susa Ku Nga Rirhandzu Ha Yona
Malandza lama khuvuriweke ya Yehovha lama endlaka xiendlo xo biha hi vomu naswona ma ala ku cinca ma fanele ma langutiwa tanihi lama nga hundzukiki kutani xisweswo a ma faneleki ku va vanakulobye va Vukreste. (Ringanisa 1 Yohane 2:19.) Vanhu vo tano a va nge pfumeleriwi ku tshama evandlheni leri tengeke ra Vukreste ivi va ri nyamisa. Va fanele ku hlongoriwa.
Mfanelo ya ku hlongola lava endlaka mintirho yo biha yi nga kombisiwa hi xiyimo lexi landzelaka: Hikwalaho ka ku andza ka minhlaselo ni ku xanisiwa ka swichudeni, swikolo swin’wana swi simeke nawu wa “ku swi hlongolela makumu swichudeni leswi tirhisaka matlhari kumbe ku xungeta hi ku tirhisa matlhari,” ku vika The Globe and Mail, phepha-hungu ra le Toronto, eCanada. Ku hlongola ku endleriwa ku sirhelela swichudeni leswi lavaka ku vuyeriwa etidyondzweni ta swona handle ko hlaseriwa hi swiendlo swa madzolonga.
Ha yini ku ri rirhandzu ku hlongola mudyohi la nga hundzukiki evandlheni? Ku endla tano i xikombiso xo rhandza Yehovha ni tindlela takwe. (Pisalema 97:10) Goza leri ri kombisa rirhandzu eka lava va landzelelaka swiendlo leswo lulama hikuva ri susa exikarhi ka vona loyi a nga ni nhlonhlotelo wo biha eka vona. Ri tlhela ri sirhelela ku tenga ka vandlha. (1 Vakorinto 5:1-13) Loko ku tikhoma loko biha swinene kumbe ku thyaka hi tlhelo ra moya swi pfumeleriwa evandlheni, a swi ta va leswi nyamisaka naswona a swi nga ta fanela ku nyikela ntirho wo kwetsima eka Yehovha, loyi a kwetsimaka. Ku tlula kwalaho, ku hlongola mudyohi swi nga n’wi pfuna ku vona ku biha ka ndlela ya yena leyi hambukeke, a hundzuka ni ku endla ku cinca loku faneleke xisweswo a tlhela a amukeriwa evandlheni.
Vuyelo Eka Van’wana
Loko xirho xa vandlha xi endla xidyoho lexikulu, xo tanihi vuoswi, a xi yi tsakisi mbilu ya Yehovha. (Swivuriso 27:11) Mukreste wihi na wihi loyi a welaka eku tikhomeni loko biha hi tlhelo ra rimbewu entiyisweni a nga ehleketi hi laha Yosefa a endleke ha kona loko nsati wa Potifaro a ringete ku n’wi sindzisa ku va ni vuxaka bya rimbewu na yena. N’wangulo wa Yosefa a wu ri lowu: “Nḍi nga endlisa ku yini ŝo biha le’ŝikulu ŝonghasi, nḍi dyohela Šikwembu šana?” (Genesa 39:6-12) Yosefa u xixime mimpimanyeto ya Yehovha leyo kwetsima kutani a baleka. Hi tlhelo rin’wana, muoswi u vonaka a pfumala rirhandzu leri enteke eka Xikwembu lerova a papalata ku enerisa ku navela ka yena ka nyama.—Vagalatiya 5:19-21.
Munhu la khuvuriweke loyi a tlulaka swileriso swa Xikwembu a nga kombisi ku karhateka hi xisandzu ni mbitsi leswi a nga ta swi vangela maxaka yakwe lama pfumelaka. Van’wana va tsandzeke ku langutana ni mintlhaveko leyi. Endzhaku ko kumisisa leswaku n’wana wakwe a tikhome hi ndlela yo biha, wansati un’wana wa Mukreste wa titshandza: “I vatsongo, loko va ri kona, vamakwerhu va xinuna ni va xisati lava vonakaka va twisisa ndlela leyi hi vavisekaka ni ku nonon’hweriwa ha yona. . . . Timbilu ta hina ta vava.” Vito lerinene ra ndyangu ri nga soriwa. Gome ni ku tivona nandzu swi nga tisa nhlomulo eka swirho leswo tshembeka swa ndyangu. Xisweswo ndlela leyi hoxeke ya mudyohi yi nga tisa nhlomulo endyangwini.
Mpfuno Wa Rirhandzu Eka Swirho Swa Ndyangu
Swirho swa ndyangu wa Vukreste leswi tshembekaka swa munhu loyi a hlongoriweke swi fanele ku tsundzuka leswaku ku susa i ndlela ya rirhandzu ni yo sirhelela. Matshalatshala hinkwawo lama nga kotekaka ma endleriwa ku pfuna mudyohi. Kambe loko a kombisa ku nga yingisi Xikwembu, naswona a tinonon’hwisa a nga kombisi ku hundzuka, vandlha ri fanele ku sirheleriwa naswona a ku na swikhomela-ndhawu, kambe ku fanele ku endliwa hi laha Rito ra Xikwembu ri kongomisaka ha kona: “Hlongolani lowo biha exikarhi ka n’wina.” (1 Vakorinto 5:13) Swi hi laha Mbhoni yin’wana yi vuleke ha kona, “ku susa i xiendlo xo tshembeka eka Yehovha.”
Loko xirho xa ndyangu xi susiwa, maxaka ya Vukreste ma karhateka. Hikwalaho vakulu lava hlawuriweke va endla hi laha va nga kotaka ha kona ku phyuphyisa hi tlhelo ra moya. (1 Vatesalonika 5:14) Vakulu va nga va khongelela va tlhela va khongela na vona. Hakanyingi, swa koteka ku endzela Vakreste lava vo tshembeka leswaku mi bula hi tinhla leti akaka ta Matsalwa. Varisi va ntlhambi va fanele va tirhisa nkarhi wihi na wihi ku tiyisa varhandziwa lava emoyeni minhlangano ya Vukreste yi nga si sungula ni le ndzhaku ka yona. Xikhutazo lexi engetelekeke xi nga nyikeriwa hi ku famba na vona evutirhelini bya nsimu. (Varhoma 1:11, 12) Varisi va moya va fanele va komba malandza lawa yo tshembeka ya Yehovha rirhandzu ni nkhathalelo lowu va fanelaka.—1 Vatesalonika 2:7, 8.
Ndlela ya munhu ya vudyoho a yi endli leswaku lava nga evandlheni va honisa un’wana ni un’wana endyangwini wakwe loyi a tshamaka a tshembekile eka Yehovha. Sawulo Hosi leyo homboloka ya Israyele yi tshikiwe hi Xikwembu, kambe Davhida a nga pfumelelanga leswi swi kavanyeta rirhandzu ra yena n’wini eka Yonathani n’wana Sawulo. Entiyisweni, ntwanano exikarhi ka Davhida na Yonathani wu ye wu tiya. (1 Samuwele 15:22, 23; 18:1-3; 20:41) Kutani hinkwavo lava nga evandlheni va fanele ku seketela ni ku rhandza Vakreste lava maxaka ya vona ma dyoheleke Yehovha.
Vona ndlela leyi ku nga ta va ku nga ri ku kombisa rirhandzu ha yona loko hi honisa ni ku nga kombisi musa eka vanhu vo tano lava tshembekaka! Swirho swa ndyangu leswi tshembekaka swi lava xikhutazo xo hlawuleka. Swi nga ha titwa swi ri swoxe naswona xiyimo xa swona xi ri lexi tikaka swinene. Kumbexana mi nga vulavula hi yinhla ya swa moya kumbe ntokoto lowu akaka hi riqingho. Loko munhu la susiweke a hlamula riqingho, kombela ku vulavula ni xaka leri nga Mukreste. U nga ha rhamba swirho swo tshembeka endyangwini wolowo eka minhlangano ya xinghana kumbe eswakudyeni ekaya ra wena. Loko u hlangana na vona u ri eku xaveni, u nga ha tirhisa nkarhi wolowo ku va ni xinghana lexi akaka. Tsundzuka, malandza lawa yo tshembeka ya Vakreste lama nga ni maxaka lama susiweke ma ha ri xiphemu xa nhlengeletano ya Yehovha leyi baseke. Va nga ha titwa va bakanyiwile ni ku hetiwa matimba hi ku olova. Hikwalaho, xalamukela ku va komba musa ni rirhandzu. Hambeta u endla leswinene ‘ngopfu-ngopfu eka va yindlu ya ku pfumela.’—Vagalatiya 6:10.
Tlangela Lunghiselelo Ra Yehovha
Hi fanele ku nkhensa hikwalaho ka leswi Yehovha Xikwembu a kombisaka nkhathalelo wa rirhandzu eka un’wana ni un’wana endyangwini wa vagandzeri va misava hinkwayo. Hi ku tirhisa nhlengeletano yakwe u nyikela malunghiselelo ya rirhandzu ku hi pfuna ku famba hi ndlela yo lulama emahlweni ka yena. Hambi loko xirho xa ndyangu xi endla xidyoho ha vomu kutani xi fanele ku hlongoriwa evandlheni, ku ni ndlela yo vuyiseriwa loko xi hundzuka hakunene. Leswi swi kombisiwa hi xikombiso lexi landzelaka:
Vakulu va ringete ku pfuna munhu loyi hi nga ta n’wi vitana Anna, kambe u tlhelele eku ‘dzaheni, eku nweni ni le ku tirhiseni ka swidzidzirisi.’ A nga hundzukanga naswona a nga ha hlanganyeli. Hambi swi ri tano, endzhakunyana, u sungule ku tsundzuka vunghana bya rirhandzu bya nhlengeletano ya Yehovha leyi baseke ni ku khongela leswaku a n’wi pfuna. Wa pfumela leswaku a nga yi twisisi ngopfu ndlela leyi vakulu va khathalelaka ha yona mayelana ni lava hambukaka. Anna u sungule ku va kona eminhlanganweni nakambe, naswona leswi swi yise eku hundzukeni. Endzhaku ka sweswo, u tlhele a amukeriwa evandlheni ra rirhandzu ni leri sirhelelaka. Nakambe, Anna u hanya hi mimpimanyeto ya Yehovha leyi tlakukeke ya mahanyelo. U nkhensa rirhandzu leri kombisiweke hi vakulu naswona u tlhela a ku: “A yi hlamuseleki ndlela leyi tibuku ta Vukreste ti ndzi pfuneke ha yona. Hakunene Yehovha u khathalela swilaveko swa hina.”
Ina, Xikwembu xi lunghiselele ndlela yo vuyela ha yona eka lava va hlongoriweke evandlheni kambe lava endzhaku va hundzukaka. Hi swi vonile leswaku hambi ku ri ku susa hi koxe i lunghiselelo ra rirhandzu. Kambe vona ndlela leyi swi antswaka ha yona ku papalata ntokoto lowu lowu vavisaka hi ku namarhela tindlela to lulama, ta Xikwembu xa hina xo kwetsima nkarhi na nkarhi! Nkarhi hinkwawo a hi nkhenseni lunghelo ro dzunisa Yehovha tanihi xiphemu xa nhlengeletano yakwe leyi baseke ya rirhandzu ni leyi sirhelelaka.
[Xifaniso lexi nga eka tluka 26]
Xana u kombisa rirhandzu eka maxaka lama tshembekaka ya lava va hlongoriweke evandlheni?