Nhlangano Wa Lembe Na Lembe

OCTOBER 7, 1995

NHLANGANO WA LEMBE NA LEMBE wa swirho swa Watch Tower Bible and Tract Society of Pennsylvania wu ta va hi October 7, 1995, eHolweni ya Nhlengeletano ya Timbhoni ta Yehovha, le 2932 Kennedy Boulevard, Jersey City, New Jersey. Nhlangano wo sungula wa swirho ntsena wu ta va hi 9:30 a.m., ivi wu landzeriwa hi nhlangano wa mani na mani wa lembe na lembe hi 10:00 a.m.

Swirho swa Vandla leri swi fanele ku tivisa Hofisi ya Matsalana sweswi, hi ku cinca kun’wana ni kun’wana ka tiadirese ta swona ta poso loku endlekeke n’wexemu leswaku mapapila ya ntolovelo ya xitiviso ni maphepha ya nhlawulo swi ta fika eka vona hi July.

Maphepha ya nhlawulo, lama nga ta rhumeriwa eka swirho swin’we ni xitiviso xa nhlangano wa lembe ni lembe, ma fanele ku tlhela ma rhumeriwa leswaku ma fika eHofisini ya Matsalana wa Sosayiti ku nga si hundza August 1. Xirho xin’wana ni xin’wana xi fanele xi tata xi tlhela xi rhumela phepha ra xona ra nhlangano hi xihatla, xi vula loko xi nga ta va kona. Rungula leri nyikeriwaka eka phepha rin’wana ni rin’wana ra nhlangano ri fanele ku va leri tiyeke emhakeni leyi, tanihi leswi hi nga ta tshembela ka rona loko hi kambisisa lava nga ta va kona hi xiviri.

Ku rindzeriwa leswaku nongonoko hinkwawo, ku katsa ni nhlangano lowu endliwaka ximfumo wa bindzu ni swiviko, wu ta hetiwa hi 1:00 p.m. kumbe endzhakunyana ka kwalaho. A ku nge vi na nongonoko wa ni ndzhenga. Hikwalaho ka leswi ndhawu yi nga yitsongo, ku ta ngheniwa hi thikithi ntsena. Ku hava malunghiselelo lama nga ta endliwa yo yisa nhlangano wa lembe na lembe eswivandleni swin’wana hi tinqingho.