Swivutiso Swa Vahlayi

Yohane wo Sungula 4:8 yi hi byela leswi: “Ku hava ku chava erirhandzweni, hikuva rirhandzu leri hetisekeke ri susa ku chava.” Kambe Petro u tsarile: “Rhandzani nhlengeletano ya vamakwerhu. Chavani Xikwembu.” (1 Petro 2:17) Xana tindzimana letimbiri hi nga ti pfumelelanisa njhani?

Petro na Yohane havambirhi a va ri vaapostola lava dyondzeke hi ku kongoma eka Yesu Kreste hi byakwe. Xisweswo hi nga va ni ntshembo wa leswaku leswi va swi tsaleke swa pfumelelana. Malunghana ni tindzimana leti tshahiweke laha henhla, ntlhantlho wa mhaka, hi leswaku vaapostola lava havambirhi a va vulavula hi mixaka yo hambana ya ku chava.

A hi rhangeni hi xiya ndzayo ya Petro. Tanihi laha mongo wu kombaka ha kona, Petro a a nyikela Vakreste-kulobye xitsundzuxo lexi huhuteriweke mayelana ni langutelo ra vona hi valawuri. Hi marito man’wana, a hlamusela langutelo lerinene ro titsongahata eswivandleni swin’wana. Xisweswo, u tsundzuxe Vakreste ku titsongahata eka vavanuna lava nga eswikhundlheni swa vulawuri eka tihulumendhe ta vanhu, tanihi tihosi kumbe vafumi. (1 Petro 2:13, 14) Loko a ya emahlweni, Petro u tsarile: “Xiximani vanhu hinkwavo. Rhandzani nhlengeletano ya vamakwerhu. Chavani Xikwembu. Xiximani hosi leyikulu ya tiko.”—1 Petro 2:17.

Hi ku xiya mongo, swi le rivaleni leswaku loko Petro a vula leswaku Vakreste va fanele va “chav[a] Xikwembu,” a vula leswaku hi fanele hi va ni xichavo lexi enteke xo xixima Xikwembu, ku chava ku hlundzukisa vulawuri lebyikulu.—Ringanisa Vaheveru 11:7.

Ku vuriwa yini hi nhlamuselo ya muapostola Yohane? Eku sunguleni eka 1 Yohane ndzima 4, muapostola u vulavule hi ku kambisisa “marito lama huhutiweke” yo tanihi lama humaka eka vaprofeta va mavunwa. Marito wolawo entiyisweni a ma humi eka Yehovha Xikwembu; ma huma eka misava leyo homboloka, mafana na yona.

Ku hambana na sweswo, Vakreste lava totiweke “va huma eka Xikwembu.” (1 Yohane 4:1-6, NW) Leswaku swi tano, Yohane u khongeterile a ku: “Varhandziwa! A hi rhandzaneni, hikuva rirhandzu i ra Xikwembu,” Xikwembu hi xona xi rhangeke xi hi rhandza—xi “rhumele N’wana wa xona ku va mhamba ya swidyoho swa hina.” (1 Yohane 4:7-10) Xana hi fanele hi angurisa ku yini?

Swi le rivaleni, hi fanele ku tshama hi ri ni vun’we ni Xikwembu xa hina xa rirhandzu. A hi fanelanga ku chavisiwa hi xona kumbe ku kutsakutsa loko hi lava ku xi tshinelela hi xikhongelo. Eku sunguleni Yohane u te: “Loko ripfalo ra hina ri nga hi avanyisi, hi ni ku tshemba emahlweni ka Xikwembu. Hi amukela eka xona hinkwaswo leswi hi swi kombelaka hikuva hi hlayisa milawu ya xona.” (1 Yohane 3:21, 22) Ina, ripfalo lerinene ri hi nyika ntshunxeko wo tshinelela Xikwembu hi ri hava nchavo lowu wu hi hetaka matimba kumbe lowu wu hi sivelaka. Hikwalaho ka rirhandzu, hi titwa hi ntshunxekile ku ya kumbe ku tshinela eka Yehovha hi xikhongelo. Emhakeni leyi, “ku hava ku chava erirhandzwini.”

Hikwalaho, a hi endleni minxaka leyimbirhi ya ku chava yi pfumelelana. Mukreste nkarhi hinkwawo u fanele a va ni xichavo lexikulu eka Yehovha, lexi fambisanaka ni nxiximo lowu enteke, wa xikhundlha xakwe, matimba ni vululami. Kambe hi tlhela hi rhandza Xikwembu tanihi Tata wa hina naswona hi titwa hi ri vanakulobye lavakulu na xona naswona hi ntshunxekile ku xi tshinelela. Ematshan’weni yo siveriwa hi ku chava kwihi na kwihi, ha xi tshinelela, tanihi n’wana la twaka a ntshunxekile ku tshinelela mutswari wa rirhandzu.—Yakobo 4:8.