Vatswari Ni Vana: Rhangisani Xikwembu!

“Tšhav̌a Šikwembu, u hlayisa milawu ya šona.”—EKLESIASTA 12:13.

1. I ku chava kwihi loku vatswari ni vana va faneleke va ku hlakulela, naswona ku ta va tisela yini?

VUPROFETA bya mayelana na Yesu Kreste byi vule leswaku ku ta va ni ku “ṭakela šitšhav̌o ša Yehova.” (Esaya 11:3) Ku chava ka yena a ku ri xichavo lexikulu ngopfu ni ku xixima Xikwembu, ku chava ku hlundzukisa Xikwembu hikokwalaho ka leswi a a xi rhandza. Vatswari ni vana va fanele ku hlakulela ku chava ko tano ka Xikwembu loku fanaka ni ka Kreste, loku nga ta va tisela ntsako hi laha ku tiseleke Yesu ha kona. Va fanele ku rhangisa Xikwembu evuton’wini bya vona hi ku yingisa swileriso swa xona. Hi ku ya hi mutsari un’wana wa Bibele, “hi yona fanelo hikwayo ya munhu.”—Eklesiasta 12:13.

2. Xana a xi ri xihi xileriso xa nkoka xa Nawu, naswona ngopfu-ngopfu a xi nyikiwe vamani?

² Xileriso xa nkoka swinene xa Nawu, ku nga leswaku, hi fanele ku ‘rhandza Yehovha hi timbilu, mimoya-xiviri ni ntamu wa hina hinkwawo,’ a xi nyikiwe ngopfu-ngopfu vatswari. Leswi swi kombisiwa hi marito lama landzelaka ya Nawu lama nge: “U ta yi dyonḍisa v̌ana v̌a wena [marito lawa ya mayelana ni ku rhandza Yehovha], u yi v̌ula e ndlwini ya wena, ne ku enḍeni ka wena, ni loko u ya etlela, ni loko u pfuka.” (Deteronoma 6:4-7; Marka 12:28-30) Xisweswo vatswari a va lerisiwe ku rhangisa Xikwembu hi ku xi rhandza vona hi voxe ni hi ku dyondzisa vana va vona leswaku va xi rhandza.

Vutihlamuleri Bya Vukreste

3. Xana Yesu u wu kombise njhani nkoka wo yingisa vana?

³ Yesu u kombise nkoka wa ku nyikela nyingiso hambi ku ri eka vana. Eka khamba rin’wana eku heleni ka vutirheli bya Yesu bya laha misaveni, vanhu va sungule ku tisa vana va vona eka yena. Swi le rivaleni leswaku hi ku anakanya leswaku Yesu a a khomeke ngopfu a a nga lavi ku karhatiwa, vadyondzisiwa va ringete ku sivela vanhu. Kambe Yesu u holovele vadyondzisiwa va yena a ku: “Tshikani vana va ta ka mina, mi nga tshuki mi va sivela.” Yesu u “vukarhile vana,” xisweswo hi ndlela leyi khumbaka mbilu swinene a kombisa nkoka wa ku nyikela vana nyingiso.—Luka 18:15-17; Marka 10:13-16.

4. I vamani lava nyikiweke xileriso xo ‘endla vanhu va matiko hinkwawo vadyondzisiwa,’ naswona leswi a swi ta lava leswaku va endla yini?

⁴ Nakambe Yesu u tlhele a swi veka erivaleni leswaku valandzeri vakwe va ni vutihlamuleri byo dyondzisa van’wana handle ka vana va vona vini ntsena. Endzhaku ka rifu ni ku pfuxiwa ka yena, Yesu u “humelel[e] hi nkarhi wun’we eka vamakwavo lava tlulaka 500”—ku katsa ni vatswari van’wana. (1 Vakorinto 15:6) Handle ko kanakana leswi swi humelele entshaveni ya Galeliya laha vaapostola va 11 a va hlengeletane kona na vona. Kwalaho Yesu u khutaze hinkwavo a ku: “Hikwalaho, yanani eka vamatiko hinkwavo, mi va endla vadyondzisiwa va mina, . . . mi va dyondzisa ku hlayisa hinkwaswo leswi ndzi mi leriseke swona.” (Matewu 28:16-20, xiitaliki i xerhu.) Ku hava Mukreste loyi a faneleke ku honisa xileriso lexi! Leswaku vatatana na vamanana va xi hetisisa swi lava leswaku va khathalela vana va vona xikan’we ni ku hlanganyela eku chumayeleni ka vanhu ni le ntirhweni wo dyondzisa.

5. (a) I yini lexi kombisaka leswaku vo tala va vaapostola a va tekile naswona swi nga ha endleka a va ri na vana? (b) I ndzayo yihi leyi tinhloko ta mindyangu ti faneleke ku yi tekela enhlokweni?

⁵ Hi laha ku xiyekaka, hambi ku ri vaapostola a va fanele va ringanisela vutihlamuleri bya mindyangu ya vona ni ndzhwalo wo chumayela ku katsa ni ku risa ntlhambi wa Xikwembu. (Yohane 21:1-3, 15-17; Mintirho 1:8) Leswi swi hikwalaho ka leswi vo tala va vona a va tekile. Xisweswo muapostola Pawulo u hlamuserile: “Xana a hi na fanelo ya ku famba-famba hi ri ni nsati la nga makwerhu eHosini, tanihi leswi vaapostola van’wana va endlisaka swona, ni vamakwavo va Hosi, na Petro, xana?” (1 Vakorinto 9:5, xiitaliki i xerhu; Matewu 8:14.) Swi nga ha endleka vaapostola van’wana a va ri ni vana. Van’wamatimu va khale, vo tanihi Eusebius, va vula leswaku Petro a a ri na vona. Vatswari hinkwavo vo sungula va Vakreste a va fanele va landzela ndzayo ya Matsalwa leyi nge: “Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.”—1 Timotiya 5:8.

Vutihlamuleri Bya Nkoka

6. (a) I ntlhontlho wihi lowu vakulu va Vakreste lava nga ni mindyangu va langutanaka na wona? (b) I vutihlamuleri byihi lebyikulu bya nkulu?

⁶ Vakulu va Vakreste lava nga ni mindyangu namuntlha va le xiyin’weni lexi fanaka ni lexiya xa vaapostola. Va fanele va ringanisela vutihlamuleri bya vona byo khathalela swilaveko swa moya ni swa nyama swa mindyangu ya vona ni ndzhwalo wa vona wo chumayela erivaleni ni ku risa ntlhambi wa Xikwembu. I ntirho wihi lowu faneleke ku rhangisiwa? The Watchtower ya March 15, 1964, yi te: “Ndzhwalo wo sungula wa [tatana] i ndyangu wa yena, naswona entiyisweni a nge tirhi tanihi nkulu loko a nga khathaleli ndzhwalo lowu.”

7. Xana vatatana va Vakreste va rhangisa Xikwembu hi ndlela yihi?

⁷ Kutani vatatana va fanele ku rhangisa Xikwembu hi ku yingisa xileriso xa ku ‘ya emahlweni va kurisa vana va vona hi ku va laya ni ku va dyondzisa milawu ya Yehovha.’ (Vaefesa 6:4) Vutihlamuleri byolebyo a byi nge nyikiwi munhu un’wana, hambi leswi tatana a nga ha vaka ni xiavelo xo langutela mintirho yo karhi evandlheni ra Vukreste. Xana vatatana vo tano va nga khathalela vutihlamuleri bya vona hi ndlela yihi—va wundla swirho swa ndyangu enyameni, emoyeni ni le mintlhavekweni—ivi hi nkarhi lowu fanaka, va rhangela ni ku langutela evandlheni?

Ku Nyikela Nseketelo Lowu Lavekaka

8. Xana nsati wa nkulu a nga n’wi seketela hi ndlela yihi nuna wa yena?

⁸ Kahle-kahle, vakulu lava nga ni vutihlamuleri bya ndyangu va nga pfuneka hi ku seketeriwa. The Watchtower leyi tshahiweke laha henhla yi boxe leswaku wansati wa Mukreste a nga seketela nuna wakwe. Yi te: “A nga ha n’wi nyika nkarhi lowu ringaneleke leswaku a lunghiselela swiavelo swa yena swo hambana-hambana, naswona a pfuneta ku hlayisa nkarhi wa risima, wa nuna wa yena ni wa yena n’wini hi ku va ni xiyimiso lexinene ekaya, a lunghisa swakudya hi nkarhi, va lunghekela ku ya eminhlanganweni ya vandlha hi nkarhi. . . . Hi nkongomiso wa nuna wa yena, wansati wa Mukreste a nga hoxa xandla swinene eku leteleni vana hi ndlela leyi va faneleke ku famba ha yona leswaku va tsakisa Yehovha.” (Swivuriso 22:6) Ina, wansati u vumberiwe ku va “mupfuni” (NW) naswona loko nuna wa yena a amukela mpfuno wa yena u ta va a endla hi vutlhari. (Genesa 2:18) Nseketelo wa yena wu nga n’wi pfumelela ku khathalela vutihlamuleri byakwe bya ndyangu ni bya vandlha.

9. I vamani evandlheni ra le Tesalonika lava khutaziweke ku pfuna swirho swin’wana swa vandlha?

⁹ Hambi swi ri tano, vavasati va vakulu va Vakreste a hi vona ntsena lava va faneleke va hoxa xandla eku seketeleni ka mulanguteri loyi a faneleke a “[risa] ntlhambi wa Xikwembu” ni ku khathalela ndyangu wa yena n’wini. (1 Petro 5:2) I mani un’wana a nga pfunaka? Muapostola Pawulo u khutaze vamakwerhu va le Tesalonika leswaku va va ni xichavo eka lava va “rhangelaka.” Kambe, loko a ya emahlweni a vulavula ni vamakwerhu volavo—ngopfu-ngopfu lava nga rhangeriki—Pawulo u tsale a ku: “Ha mi khongotela vamakwerhu, hi ri: Layani malolo, mi tiyisa lava helaka ntamu; pfunani lava tsaneke, mi lehisela hinkwavo timbilu.”—1 Vatesalonika 5:12-14.

10. Xana i vuyelo byihi lebyinene lebyi mpfuno wa rirhandzu wa vamakwerhu hinkwavo wu nga na byona evandlheni?

¹⁰ Mawaku ndlela leyi swi nga swinene ha yona loko vamakwerhu evandlheni va ri ni rirhandzu leri va susumetelaka ku chavelela lava tshikilelekeke, ku seketela lava tsaneke, ku laya lava nga riki na nawu ni ku lehisela hinkwavo mbilu! Vamakwerhu va le Tesalonika, lava ha ku amukelaka ntiyiso wa Bibele hambi leswi a a va ri ehlomulweni lowukulu, va tirhise ndzayo ya Pawulo va endlisa sweswo. (Mintirho 17:1-9; 1 Vatesalonika 1:6; 2:14; 5:11) Anakanya hi vuyelo lebyinene lebyi ntirhisano wa vona wa rirhandzu a wu ri na byona wo tiyisa ni ku hlanganisa vandlha hinkwaro! Hi ku fanana, loko namuntlha vamakwerhu va chavelelana, va seketelana ni ku layana, swi vevukisa vutihlamuleri bya vakulu bya ku risa naswona lava hakanyingi va nga ni mindyangu leyi va faneleke ku yi khathalela.

11. (a) Ha yini swi twala ku gimeta hi ku vula leswaku vavasati na vona a va katsiwa eritweni leri nge “vamakwerhu”? (b) I mpfuno wihi lowu wansati wa Mukreste la vupfeke a nga wu nyikaka vavasati lavantshwa namuntlha?

¹¹ Xana vavasati a va katsiwile exikarhi ka “vamakwerhu” lava muapostola Pawulo a a vulavula na vona? Ina, a va katsiwile, tanihi leswi vavasati vo tala va veke vapfumeri. (Mintirho 17:1, 4; 1 Petro 2:17; 5:9) I mpfuno wa muxaka muni lowu vavasati vo tano va nga wu nyikelaka? Ina, a ku ri ni vavasati lavantshwa evandlheni lava a va ri ni xiphiqo xo lawula “minsusumeto [ya vona] ya rimbewu” (NW) kumbe lava veke “mimoya-xiviri leyi tshikileriweke” (NW). (1 Timotiya 5:11-13) Namuntlha vavasati van’wana va ni xiphiqo lexi fanaka. Lexi va xi lavaka swinene i munhu la nga va nyikaka ndleve a tlhela a va anakanyela. Hakanyingi wansati wa Mukreste la vupfeke i munhu wo antswa loyi a nga nyikelaka mpfuno wo tano. Hi xikombiso, a nga bula hi swiphiqo swa munhu hi xiyexe ni wansati-kulobye leswi wanuna wa Mukreste a nga taka a nga koti ku bula ha swona hi ndlela leyi faneleke. Loko a kandziyisa nkoka wo nyikela mpfuno wo tano, Pawulo u tsarile: “Vavasati lava kuleke . . . a va dyondzise leswo lulama, leswaku va ta letela vavasati lavantshwa ku rhandza vanuna va vona ni vana va vona, va kota ku tikhoma ni ku tenga, va va lava hlayisaka mindyangu ya vona hi fanelo, va va ni tintswalo, va yingisa vanuna va vona, leswaku Rito ra Xikwembu ri ta ka ri nga sandziwi hi munhu.”—Tito 2:3-5.

12. I nkongomiso wa mani lowu swi nga swa nkoka leswaku hinkwavo evandlheni va wu landzela?

¹² Mawaku nkateko lowu vamakwerhu va xisati lava titsongahataka va nga wona evandlheni loko hi ntirhisano va seketela vavanuna va vona ni vakulu! (1 Timotiya 2:11, 12; Vaheveru 13:17) Vakulu lava nga ni vutihlamuleri bya ndyangu va pfuneka swinene loko hinkwavo va tirhisana leswaku va pfunana hi moya wa rirhandzu ni loko hinkwavo va titsongahatela nkongomiso wa varisi lava vekiweke.—1 Petro 5:1, 2.

Vatswari, I Yini Lexi Mi Xi Rhangisaka?

13. Xana vatatana vo tala va tsandzeka ku fambisa mindyangu ya vona hi ndlela yihi?

¹³ Malembe lama hundzeke muhungasi wa vanhu la dumeke u te: “Ndzi vona vavanuna lava humelelaka va ri ni tifeme leti tirheriwaka hi madzana ya vavanuna; va tiva ndlela yo langutana ni xiyimo xin’wana ni xin’wana, ndlela yo lawula ni ku vuyeriwa ebindzwini. Kambe bindzu lerikulu leri va nga na rona i mindyangu ya vona, kambe va tsandzeka ku ri fambisa hi ndlela ya kona.” Ha yini? Xana a hi mhaka ya leswi va rhangisaka bindzu ni swilo swin’wana ivi va honisa ndzayo ya Xikwembu? Rito ra xona ri ri: “Milawu le’yi nḍi ku nyikaka . . . U ta yi dyonḍisa v̌ana v̌a wena.” Naswona leswi a swi fanele swi endliwa siku na siku. Vatswari va fanele ku tinyika nkarhi—naswona ngopfu-ngopfu wa rirhandzu ra vona ni nkhathalelo lowukulu wa vona.—Deteronoma 6:6-9.

14. (a) Xana vatswari va fanele ku khathalela vana va vona hi ndlela yihi? (b) Xana ku letela vana hi ndlela leyi faneleke swi katsa yini?

¹⁴ Bibele yi hi tsundzuxa leswaku vana i ndzhaka leyi humaka eka Yehovha. (Pisalema 127:3) Xana u khathalela vana va wena tanihi nhundzu ya Xikwembu, nyiko leyi a ku nyikeke yona? A swi kanakanisi leswaku n’wana wa wena u ta tsaka loko u n’wi vukarha, xisweswo u kombisa nkhathalelo wa wena wa rirhandzu ni ku n’wi nyikela nyingiso. (Marka 10:16) Kambe ku ‘dyondzisa n’wana ndlela leyi a faneleke a famba ha yona’ a swi lavi ntsena ku n’wi angarha ni ku n’wi ntswontswa. Leswaku a hlomisiwa hi vutlhari byo papalata mintlhamu ya vutomi, n’wana u fanele ku kuma ni ndzayo ya rirhandzu. Mutswari u kombisa rirhandzu ra xiviri hi ku ‘laya n’wana wa yena.’—Swivuriso 13:1, 24; 22:6.

15. I yini lexi kombisaka nkoka wa ndzayo ya vutswari?

¹⁵ Nkoka wa ndzayo ya vatswari wu nga voniwa eka nhlamuselo ya mutsundzuxi wa le xikolweni wa vana lava taka ehofisini ya yena: “Va twisa mbilu ku vava, va tshikilelekile naswona a va titshembi. Va rila loko va hlamusela ndlela leyi xiyimo xi nga ha yona hakunene. Vo tala—vo tala swinene—va ringete ku tisunga, ku nga ri hi leswi va tsakeke ku tlurisa; kambe hikwalaho ka leswi va nga tsakangiki, va titwa va nga khathaleriwi naswona va tshikileleke swinene hikuva va ha ri vantsongo naswona se va byarhe ‘vutihlamuleri’ naswona i byikulu swinene.” U engeterile: “I xilo lexi chavisaka eka muntshwa ku titwa a ri ni vutihlamuleri bya swilo swo karhi.” I ntiyiso, vana va nga ha ringeta ku balekela ndzayo, kambe kahle-kahle va yi tlangela minkongomiso ni swipimelo swa vutswari. Va tsaka leswi vatswari va vona va khathalaka swinene hi ku va vekela swipimelo. “A ku ri ntshunxeko lowukulu eka mina,” ku vule n’wana un’wana wa kondlo-a-ndzi-dyi loyi vatswari va yena a va n’wi vekela swipimelo.

16. (a) I yini lexi humelelaka hi vana van’wana lava kurisiweke emakaya ya Vukreste? (b) Ha yini ku hambuka ka n’wana kahle-kahle swi nga vuli swona leswaku ndzetelo lowu nyikeriweke hi vatswari a wu nga ri wunene?

¹⁶ Kambe, ku nga khatariseki ku va ni vatswari lava va rhandzaka ni lava va letelaka kahle, vantshwa van’wana, ku fana ni n’wana wa vusopfa exifanisweni xa Yesu, va ala nkongomiso wa vutswari ivi va hambuka. (Luka 15:11-16) Hambi swi ri tano, swoleswo a swi nge vuli swona leswaku vatswari a va byi hetisisanga vutihlamuleri bya vona byo letela vana va vona kahle, hi laha Swivuriso 22:6 yi khutazaka ha kona. Marito lama nge ‘dyondzisa n’wana ndlela leyi a faneleke ku famba ha yona kutani a nga ka a nga suki eka yona’ a ma ri nawu eka mani na mani. Lexi vavisaka, ku fana ni n’wana wa vusopfa, vana van’wana va ta ‘tsan’wa ku yingisa mutswari.’—Swivuriso 30:17.

17. Xana vatswari va vana lava hambukeke va nga chaveleriwa hi yini?

¹⁷ Tata wa n’wana la hambukeke u titshandzile a ku: “Ndzi ringete hi matimba hinkwawo ku fikelela mbilu ya yena. A ndzi tivi leswaku ndzi endla yini hikuva ndzi ringete swilo swo tala. Ku hava lexi tirheke.” Hi tshemba leswaku vana vo tano lava hambukeke hi ku famba ka nkarhi va ta tsundzuka ndzetelo wa rirhandzu lowu va wu kumeke ivi va tlhelela hi laha n’wana wa vusopfa a endleke ha kona. Kambe, ntiyiso hi leswaku vana van’wana va xandzuka va tlhela va endla swilo swo biha ngopfu leswi vavisaka vatswari va vona ngopfu. Vatswari va nga ha kuma nchavelelo hi ku tiva leswaku hambi ku ri mudyondzisi lonkulu loyi a hanyeke emisaveni u vone Yudasi Iskariyota la heteke nkarhi wo leha a ri mudyondzisiwa wakwe a n’wi xenga. Naswona Yehovha hi yexe handle ko kanakana u twe ku vava loko vana va yena vo tala va moya va tshike ndzayo ya yena ivi va xandzuka handle ka ku va Yena a ri na xihoxo.—Luka 22:47, 48; Nhlavutelo 12:9.

Vana—Xana Mi Ta Tsakisa Mani?

18. Xana vana va nga swi kombisa njhani leswaku va rhangisa Xikwembu?

¹⁸ Yehovha wa mi khutaza n’wina vantshwa u ri: “Yingisani vatswari va n’wina, hikuva hi swona leswi lulameke emahlweni ka Hosi.” (Vaefesa 6:1) Vantshwa va rhangisa Xikwembu hi ku endla leswi. U nga tiendli xihunguki! Rito ra Xikwembu ri ri: “Šihunguki ši monya dyonḍo ya tata wa šona.” Naswona a wu fanelanga hi ku tikurisa u anakanya leswaku u nga hanya handle ka ku tshinyiwa. Ntiyiso hi leswaku “ku ni rixaka leri tivonaka ri basile, kambe a ri hlantswiwanga thyaka ra rona.” (Swivuriso 15:5; 30:12, American Standard Version) Kutani yingisa nkongomiso wa Xikwembu—“yingisa” leswaku u ta “tihlayisela,” “u nga [wu] riv̌ali,” “[wu] anakany[e]” leswaku u ta “[wu] hlayisa,” naswona “u nga fulareli” milawu ni ndzayo ya vatswari.—Swivuriso 1:8; 2:1; 3:1; 4:1; 6:20.

19. (a) I swivangelo swihi swa matimba swinene leswi vana va nga na swona swo yingisa Yehovha? (b) Xana vana va nga swi kombisa njhani leswaku va tsakela Xikwembu?

¹⁹ Mi ni swivangelo swa matimba swo yingisa Yehovha. Wa mi rhandza, naswona u nyikele milawu ya yena, ku katsa ni nawu wa leswaku vana va yingisa vatswari va vona, leswaku yi mi sirhelela ni ku mi pfuna ku tsakela vutomi lebyi tsakisaka. (Esaya 48:17) U tlhele a nyikela hi N’wana wa yena leswaku a mi fela leswaku mi ta ponisiwa exidyohweni ni le ku feni naswona mi tsakela vutomi lebyi nga heriki. (Yohane 3:16) Xana swa mi tsakisa? Xikwembu xi languta xi ri ematilweni, xi kambisisa timbilu ta n’wina ku vona loko mi xi rhandza hakunene ni ku tlangela malunghiselelo ya xona. (Pisalema 14:2) Sathana na yena u langutile naswona u tlhontlha Xikwembu, a vula leswaku a mi nge xi yingisi. Loko mi nga yingisi Xikwembu mi tsakisa Sathana kutani Yehovha wa “vaviseka,” (NW). (Pisalema 78:40, 41) Yehovha wa mi kombela: “Ṅwana nga, tlhariha, u ṭakisa mbilu ya mina [hi ku ndzi yingisa], nḍi ta kuma rito e ku hlamula la’v̌a nḍi rukanaka.” (Swivuriso 27:11) Ina, xivutiso hi lexi nge, Xana mi ta tsakisa mani, Sathana kumbe Yehovha?

20. Xana muntshwa un’wana u hlayise xivindzi xo tirhela Yehovha hi ndlela yihi hambi loko a chava?

²⁰ A swi olovi ku endla ku rhandza ka Xikwembu eka mintshikilelo leyi Sathana ni misava yakwe va mi tiselaka yona. Minkarhi yin’wana swa chavisa. Muntshwa un’wana u te: “Ku chava swi fana ni ku twa xirhami. U nga endla swin’wana ha kona.” U te: “Loko u twa xirhami, u ambala jezi. Loko u tama wa ha twa xirhami, u ambala rin’wana nakambe. Kutani u ya emahlweni u ambala ku kondza xirhami xi hangalaka u nga ha xi twi. Kutani ku khongela eka Yehovha loko u chava swi fana ni ku ambala jezi loko u twa xirhami. Loko endzhaku ka xikhongelo xin’wana ndzi twa ndza ha chava, ndzi ya emahlweni ndzi khongela, ku kondza ndzi titwa ndzi nga ha chavi. Naswona swa tirha. Swi ndzi humese ekhombyeni!”

21. Xana Yehovha u ta hi seketela hi ndlela yihi loko hakunene hi ringeta ku n’wi rhangisa evuton’wini bya hina?

²¹ Loko hi ringeta ku rhangisa Xikwembu hakunene evuton’wini bya hina, Yehovha u ta hi seketela. U ta hi tiyisa, a hi nyika mpfuno wa tintsumi loko wu laveka, hambi ku ri hi laha a endleke ha kona eka N’wana wa yena. (Matewu 18:10; Luka 22:43) Vanani ni xivindzi n’wina hinkwenu vatswari ni vana. Vanani ni ku chava ko fana ni ka Kreste, kutani swi ta mi tisela ntsako. (Esaya 11:3) Ina, “tšhav̌a Šikwembu, u hlayisa milawu ya šona, hikuv̌a hi yona fanelo hikwayo ya munhu.”—Eklesiasta 12:13.

Xana U Nga Hlamula?

◻ I vutihlamuleri byihi lebyi valandzeri vo sungula va Yesu a va fanele ku ringanisela eka byona?

◻ I vutihlamuleri byihi lebyi vatswari va Vakreste va faneleke ku byi hetisisa?

◻ I mpfuno wihi lowu kumekaka eka vakulu va Vakreste lava nga ni mindyangu?

◻ I ntirho wihi wa nkoka lowu vamakwerhu va xisati va nga wu endlaka evandlheni?

◻ I ndzayo ni nkongomiso wihi lowu swi nga swa nkoka leswaku vana va wu yingisa?

[Xifaniso lexi nga eka tluka 15]

Hakanyingi wansati wa Mukreste la vupfeke a nga nyika wansati lontshwa mpfuno lowu lavekaka

[Xifaniso lexi nga eka tluka 17]

I nchavelelo wihi lowu vatswari lava nga ni vana lava hambukeke va nga wu kumaka eMatsalweni?