Tshama ‘eMutini Wa Vuchavelo’ Kutani U Hanya!

“[A a] fanele ku ṭhama e mutini wa šitšhav̌elo ku ko ku fika rifu ra muprista lo’nkulu.”—TINHLAYO 35:28.

1. I mani Murihiseri wa ngati, naswona i goza rihi leri a nga ta ri teka ku nga ri khale?

MURIHISERI wa ngati wa Yehovha, Yesu Kreste u le kusuhi ni ku hlasela. Hi mavuthu ya yena ya tintsumi, ku nga ri khale Murihiseri loyi u ta teka goza a lwisana ni hinkwavo lava nga hundzukiki lava nga ni nandzu wa ngati. Ina, Yesu u ta tirha tanihi Muavanyisi la vekiweke hi Xikwembu hi nkarhi wa “nhlomulo lowukulu” (NW) lowu tshinelaka hi ku hatlisa. (Matewu 24:21, 22; Esaya 26:21) Kutani vanhu a va nge poni nandzu wa vona wa ngati.

2. I ndhawu yihi ntsena leyi hakunene yi nga vuchavelo, naswona i swivutiso swihi leswi lavaka tinhlamulo?

² Ndlela yo ya eku poneni i ku nghena endleleni leyi yaka emutini wo fanekisela wa vuchavelo ni ku tsutsuma u ponisa vutomi bya wena! Loko a amukeriwa emutini, mubaleki u fanele ku tshama kwalaho, hikuva hi yona ntsena ndhawu ya ntiyiso ya vuchavelo. Kambe u nga ha tivutisa, ‘Tanihi leswi vo tala va hina hi nga si tshamaka hi dlaya munhu, xana hakunene hi ni nandzu wa ngati? Ha yini Yesu a ri Murihiseri wa ngati? Muti wa manguva lawa vuchavelo i yini? Xana u kona loyi a hlayisekeke kwalaho la nga sukaka eka wona?’

Xana Hi Ni Nandzu Wa Ngati Hakunene?

3. I xivumbeko xihi xa Nawu wa Muxe lexi nga ta hi pfuna ku vona leswaku magidi ya timiliyoni ya hlanganyela enandzwini wa ngati?

³ Xivumbeko xa Nawu wa Muxe xi ta hi pfuna ku vona leswaku magidi ya timiliyoni ta vanhu emisaveni ya ni nandzu wa ngati. Xikwembu xi veke nandzu wo halata ngati ehenhla ka Vaisrayele hinkwavo. Loko munhu a kumiwa a dlayiwile naswona mudlayi wa yena a nga tiviwi, vaavanyisi a va fanele va pima mpfhuka wo sukela laha munhu wa kona a feleke kona leswaku va kota ku vona muti wa le kusuhi. Leswaku va susa nandzu, vakulu va muti wolowo lowu handle ko kanakana wu nga ni nandzu wa ngati a va fanele va tshova nhamu ya thokazi leri nga siki tirhisiwaka va ri tshovela enhoveni laha ku nga si tshamaka ku rimiwa laha ku tshamaka ku khuluka mati. Leswi a swi endliwa emahlweni ka vaprista va Valevhi ‘hikuva Yehovha a a hlawule vona leswaku va herisa timholovo leti vangiweke hi swiendlo swa vukarhi.’ Vakulu va le mutini a va hlamba mavoko ehenhla ka thokazi ivi va ku: “Mav̌oko ya hina a ma halatanga ngati leyi, kambe mahlo ya hina a ma v̌onangi ntšhumu. Oho Yehova! Wa nga riv̌alela tiko ra wena ra Israel, leri u ri kuṭuleke, kambe u nga v̌ekeli ngati le’yi pfumaleke nanḍu e šikari ka tiko ra wena ra Israel.” (Deteronoma 21:1-9) Yehovha Xikwembu a a nga lavi leswaku tiko ra Israyele ri thyakisiwa hi ngati kumbe vanhu va yena hinkwavo va langutiwa va ri ni nandzu wa ngati.

4. Babilona Lonkulu u ni matimu wahi ya nandzu wa ngati?

⁴ Ina, ku ni xilo lexi va nge i nandzu wa ngati lowu hlanganyeriwaka kumbe wa vaaki. Ehleketa hi nandzu wa ngati lowukulu lowu nga le henhla ka Babilona Lonkulu, mfumo wa misava wa vukhongeri bya mavunwa. Phela, u pyopyiwile hi ngati ya malandza ya Yehovha! (Nhlavutelo 17:5, 6; 18:24) Vukhongeri bya Vujagana byi tivula lebyi landzelaka Hosana ya ku Rhula, kambe tinyimpi, minkonaniso ya vukhongeri ni tinyimpi ta nkutsulo leti dlayaka ti n’wi endle a va ni nandzu wa ngati emahlweni ka Xikwembu. (Esaya 9:6; Yeremiya 2:34) Entiyisweni, u fanele a ri ni nandzu lowukulu wa mafu ya timiliyoni eka tinyimpi timbirhi ta misava ta lembe-xidzana leri. Hikwalaho, valandzeri va vukhongeri bya mavunwa ni vaseketeri ni lava hlanganyeleke etinyimpini ta vanhu va ni nandzu wa ngati emahlweni ka Xikwembu.

5. Xana vanhu van’wana va fane ni vanhu lava nga dlayangiki hi vomu eIsrayele hi ndlela yihi?

⁵ Vanhu van’wana va vange rifu ra vanhu van’wana hi vomu kumbe hikwalaho ka vusopfa. Van’wana va hlanganyele eku dlayeni va ri hi mintlawa, kumbexana hi ku kuceteriwa hi varhangeri va vukhongeri va va byela leswaku leswi a ku ri ku rhandza ka Xikwembu. Kasi van’wana va xanise malandza ya Xikwembu ni ku ma dlaya. Hambi leswi hi nga swi endlangiki swilo swo tano, hi ni nandzu lowu hinkwavo vanhu va nga na wona hikwalaho ka vutomi bya vanhu lebyi lahlekeke hikuva a hi nga wu tivi nawu wa Xikwembu ni ku rhandza ka xona. Hi fana ni munhu la nga dlayangiki hi vomu ‘loyi a dlayeke munhu-kulobye handle ko swi tiva, loyi a a nga n’wi vengi eku sunguleni.’ (Deteronoma 19:4) Vanhu vo tano va fanele va kombela tintswalo ta Xikwembu naswona va fanele va tsutsumela emutini wa vuchavelo wo fanekisela. Handle ka sweswo va ta va ni khombo ro hlangana ni Murihiseri wa ngati.

Mintirho Ya Yesu Ya Nkoka

6. Ha yini ku nga vuriwaka leswaku Yesu i xaka ra le kusuhi ra vanhu?

⁶ Le Israyele murihisi wa ngati a ku ri xaka ra le kusuhi ra mudlayiwa. Leswaku a ta rihiselela hinkwavo lava dlayiweke emisaveni naswona ngopfu-ngopfu malandza lama dlayiweke ya Yehovha, Murihiseri wa namuntlha wa ngati u fanele a ri xaka ra vanhu hinkwavo. Xiphemu xolexo xi hetisisiwe hi Yesu Kreste. U velekiwe a ri munhu la heleleke. Yesu u nyikete vutomi bya yena lebyi nga riki na xidyoho hi ku fa tanihi gandzelo ra nkutsulo, naswona endzhaku ka ku pfuxeriwa ka yena etilweni, u nyikele nkoka wa rona eka Xikwembu hikwalaho ka vudyoho bya vatukulu va Adamu lava faka. Xisweswo Kreste u ve Mukutsuri wa vanhu, xaka ra hina ra le kusuhi—Murihiseri wa ngati la faneleke. (Varhoma 5:12; 6:23; Vaheveru 10:12) Yesu u hlamuseriwa tanihi makwavo wa valandzeri va mikondzo ya yena lava totiweke. (Matewu 25:40, 45; Vaheveru 2:11-17) Tanihi Hosi ya le tilweni u hundzuka “Tatana l’a nga riki na ku hela” wa lava nga ta pfuneka eka gandzelo ra yena tanihi vafumiwa va laha misaveni. Va nga ta hanya hi laha ku nga heriki. (Esaya 9:6, 7) Kutani hi laha ku fanelaka Yehovha u veke Xaka leri ra vanhu tanihi Murihiseri wa ngati.

7. Tanihi Muprista Lonkulu, xana Yesu u va endlela yini vanhu?

⁷ Nakambe Yesu i Muprista Lonkulu la nga riki na nandzu, la ringiweke ni la nga ni ntwela-vusiwana. (Vaheveru 4:15) Exiphen’wini xolexo u tirhisa nkoka wa gandzelo ra yena leri rivalelaka swidyoho evanhwini. Miti ya vuchavelo a yi akeriwe “v̌ana v̌a Israel, ni . . . muluv̌eri [ni muhlapfa, NW] l’a akeke šikari ka v̌ona.” (Tinhlayo 35:15) Kutani Muprista Lonkulu u rhange a tirhisa risima ra gandzelo ra yena eka valandzeri va yena lava totiweke, “v̌ana v̌a Israel.” Sweswi ri tirhisiwa ni le ka ‘valuveri’ ni ‘vahlapfa’ emutini wa vuchavelo wo fanekisela. “Tinyimpfu [leti] tin’wana” ta Hosi Yesu Kreste ti ni ntshembo wo hanya hi masiku emisaveni.—Yohane 10:16; Pisalema 37:29, 34.

Muti Wa Vuchavelo Wa Namuntlha

8. Xana muti wa vuchavelo wo fanekisela i yini?

⁸ Muti wa vuchavelo wo fanekisela i yini? A hi ndhawu yo karhi yo fana na Hebroni, wun’wana wa miti ya vuchavelo ya Valevhi ya tsevu ni kaya ra muprista lonkulu wa Israyele. Muti wa vuchavelo wa namuntlha i lunghiselelo ra Xikwembu ro hi sirheleta eka rifu ni le ku tluleni ka swileriso swa xona mayelana ni ku kwetsima ka ngati. (Genesa 9:6) Ku nga khathariseki leswaku u endla hi vomu kumbe ku nga ri hi vomu, mutluri un’wana ni un’wana wa xileriso xolexo u fanele ku lava ku rivaleriwa hi Xikwembu ni ku suriwa ka xidyoho xa yena hi ripfumelo engatini ya Muprista Lonkulu, Yesu Kreste. Vakreste lava totiweke lava nga ni ntshembo wa le tilweni ni “ntshungu lowukulu” lowu nga ni ntshembo wa laha misaveni va pfunekile eka vuyelo bya gandzelo ra Yesu leri rivalelaka swidyoho naswona va le mutini wa vuchavelo wo fanekisela.—Nhlavutelo 7:9, 14; 1 Yohane 1:7; 2:1, 2.

9. Xana Sawulo wa le Tarso u tlule xileriso xa Xikwembu mayelana ni ngati hi ndlela yihi, kambe u ri kombise njhani langutelo ro hundzuka?

⁹ Loko a nga si va Mukreste, muapostola Pawulo u tlule xileriso malunghana ni ngati. Loko a ha ri Sawulo wa le Tarso, u xanise valandzeri va Yesu a tlhela a nyika mpfumelelo wa leswaku va dlayiwa. Pawulo u te: “Kambe ndzi tsetseleriwile, hikuva a ndzi endla hi ku kohleka, ndzi nga ri na ku pfumela.” (1 Timotiya 1:13; Mintirho 9:1-19) Sawulo a a ri ni langutelo ro tisola, endzhakunyana u swi kombise hi mintirho yo tala ya ripfumelo. Kambe ku laveka leswi tlulaka ripfumelo enkutsulweni leswaku hi nghena emutini wa vuchavelo wo fanekisela.

10. Xana swi kotekisa ku yini ku kuma ripfalo lerinene, naswona ku fanele ku endliwa yini leswaku ri hlayisiwa?

¹⁰ Munhu la nga dlayangiki hi vomu a a tshama eka wun’wana wa miti ya vuchavelo ya Israyele ntsena loko a nga kombisa leswaku u ni ripfalo lerinene eka Xikwembu malunghana ni ku halatiwa ka ngati. Leswaku hi kuma ripfalo lerinene, hi fanele hi kombisa ripfumelo egandzelweni ra Yesu, hi tisola eswidyohweni swa hina, ivi hi hundzuka etindleni ta hina. Hi fanele hi kombela ripfalo lerinene hi ku tinyiketela hi xikhongelo eka Xikwembu ha Kreste, hi kombisa sweswo hi nkhuvulo wa mati. (1 Petro 3:20, 21) Ripfalo leri lerinene ri hi pfumelela leswaku hi va ni vuxaka lebyi baseke na Yehovha. Ndlela yi ri yin’we ntsena yo hlayisa ripfalo lerinene i ku pfumelelana ni swilaveko swa Xikwembu ni ku endla ntirho lowu hi averiweke ku wu endla emutini wa vuchavelo wo fanekisela, hi laha vabaleki va le mitini ya khale ya vutumbelo a va fanele va yingisa Nawu ni ku hetisisa swiavelo swa vona swa ntirho. Ntirho lowukulu wa vanhu va Yehovha namuntlha i wa ku twarisa rungula ra Mfumo. (Matewu 24:14; 28:19, 20) Ku endla ntirho wolowo swi ta hi pfuna ku va vaaka-tiko va muti wa vuchavelo wa siku ra namuntlha lava vuyerisaka.

11. I yini lexi hi faneleke ku xi papalata loko hi lava ku tshama hi hlayisekile emutini wa vuchavelo wa namuntlha?

¹¹ Ku suka emutini wa vuchavelo wa namuntlha i ku tiyisa eku lovisiweni, hikuva Murihiseri wa ngati u ta hatla a teka goza a lwisana ni hinkwavo lava nga ni nandzu wa ngati. Lowu a hi nkarhi wo kumiwa u ri ehandle ka muti lowu sirhelelekeke kumbe endhawini leyi nga ni khombo ekusuhi ni ndzilakana wa madyelo ya wona. Hi ta hetelela hi ri ehandle ka muti wa vuchavelo wo fanekisela loko hi heleriwa hi ripfumelo eka gandzelo ro rivalela swidyoho ra Muprista Lonkulu. (Vaheveru 2:1; 6:4-6) Na hina a hi ta va hi nga hlayisekangi loko a hi amukele tindlela ta misava, hi yima endzelekanini wa nhlengeletano ya Yehovha, kumbe hi hambuka emimpimanyetweni yo lulama ya Tata wa hina wa le tilweni.—1 Vakorinto 4:4.

Ku Ntshunxiwa eMutini Wa Vuchavelo

12. Xana vanhu lava nga ni nandzu wa ngati eku sunguleni a va fanele va tshama nkarhi wo tanihi kwihi emutini wa vuchavelo wo fanekisela?

¹² Munhu la nga dlayangiki hi vomu eIsrayele a a fanele ku tshama emutini wa vuchavelo “ku ko ku fika rifu ra muprista lo’nkulu.” (Tinhlayo 35:28) Kutani vanhu lava nga ni nandzu wa ngati wa nkarhi lowu hundzeke va fanele va tshama emutini wa vuchavelo wo fanekisela nkarhi wo tanihi kwihi? Ku kondza loko mintirho ya Muprista Lonkulu, Yesu Kreste yi nga ha va vuyerisi. Pawulo u te: “Wa swi kota minkarhi hinkwayo ku ponisa lava tshinelelaka Xikwembu ha yena.” (Vaheveru 7:25) Ntsendze loko swivati swihi na swihi swa xidyoho ni nandzu wa ngati wo sungula wa ha ri kona, mintirho ya Muprista Lonkulu ya ha ta laveka leswaku vanhu lava nga hetisekangiki va va ni vito lerinene eka Xikwembu.

13. I vamani “v̌ana v̌a Israel” va namuntlha, naswona va fanele va tshama “[emitini] ya šitšhav̌elo” ku fikela rini?

¹³ Tsundzuka leswaku miti ya vuchavelo ya khale a yi akeriwe “v̌ana v̌a Israel,” valuveri ni vahlapfa. “V̌ana v̌a Israel” i Vaisrayele va moya. (Vagalatiya 6:16) Va fanele ku tshama emutini wa vuchavelo wo fanekisela ntsendze loko va ha hanya emisaveni. Ha yini? Hikuva va ha ri enyameni leyi nga hetisekangiki hikwalaho va lava ndzivalelo wa Muprista Lonkulu wa vona wa le tilweni. Kambe loko Vakreste lava totiweke va fa naswona va pfuxeriwa evuton’wini bya moya etilweni, a va ha vuyeriwi hi mintirho yo rivalela ya Muprista Lonkulu; va ta va va yi siyele makumu nyama, xikan’we ni nandzu wa ngati lowu nga eka yona. Eka vatotiwa volavo va pfuxiweke, Muprista Lonkulu u ta va a fe hi mpimo wo rivalela ni wo sirhelela.

14. Hi xihi xin’wana lexi endlaka leswaku lava nga ni ntshembo wa le tilweni va tshama emutini wa vuchavelo wa namuntlha?

¹⁴ Ku va ka vona vanhu va nyama swi endla leswaku lava nga ta va “vadyandzhaka swin’we na Kriste” etilweni va tshama emutini wo fanekisela wa vuchavelo ku kondza va heta pfhumba ra vona ra laha misaveni va fa va tshembekile. Loko va fa, va hambana ni xiyimo xa vumunhu hi laha ku nga heriki. (Varhoma 8:17; Nhlavutelo 2:10) Gandzelo ra Yesu ri tirha ntsena eka lava nga ni xiyimo xa vumunhu. Hambi swi ri tano, Muprista Lonkulu wa fa eka Vaisrayele volavo va moya loko va pfuxiwa va va swivumbiwa swa moya leswi nga ta tshama hi laha ku nga heriki etilweni tanihi “lava averiweke vutomi lebyi humaka eka Xikwembu.”—2 Petro 1:4.

15. I vamani ‘valuveri’ ni ‘vahlapfa’ va manguva lawa, naswona xana Muprista Lonkulu u ta va endlela yini?

¹⁵ Xana Muprista Lonkulu u ta “fa” rini malunghana ni ‘valuveri’ ni ‘vahlapfa’ va manguva lawa, a va pfumelela ku suka emutini wa vuchavelo wo fanekisela? Swirho leswi swa ntshungu lowukulu a swi nge suki emutini lowu wa vuchavelo xikan’we-kan’we endzhaku ka nhlomulo lowukulu. Hikwalaho ka yini? Hikuva va ta va va ha ri enyameni ya vona leyi nga hetisekangiki, ya vudyoho naswona va ta fanele ku tama va ha ri ehansi ka nsirhelelo wa Muprista Lonkulu. Hi ku tirhisa mintirho ya yena yo kutsula hi nkarhi wa vuhosi ni vuprista bya yena bya gidi ra malembe, va ta kuma vumunhu lebyi hetisekeke. Yesu u ta va nyiketa eka Xikwembu leswaku va vekiwa endzingweni wo hetelela, lowu nga papalatekiki, lowu nga taka wu nga ha vi kona nakambe ku ringa vutshembeki bya vona hi ku ntshunxa Sathana ni mademona ya yena swa xinkarhana. Leswi va hundzaka endzingweni lowu va ri lava amukelekaka eka Xikwembu, Yehovha u ta va vula lava lulameke. Xisweswo va ta fikelela vumunhu lebyi hetisekeke hi laha ku teleke.—1 Vakorinto 15:28; Nhlavutelo 20:7-10.a

16. Xana hi rini laha vaponi va nhlomulo lowukulu va nga taka va nga ha vuyeriwi hi mintirho yo rivalela ya Muprista Lonkulu?

¹⁶ Kutani, lava ponaka nhlomulo lowukulu va ta fanela ku hlayisa ripfalo lerinene hi ku tshama emutini wa vuchavelo wo fanekisela ku kondza ku va eku heleni ka ku Fuma ka Kreste ka Gidi ra Malembe. Tanihi vanhu lava endliweke va hetiseka, a va nge he vi na xilaveko xin’wana xa mintirho yo rivalela ya Muprista Lonkulu naswona va ta suka ehansi ka nsirhelelo wa yena. Kutani hi ndlela yoleyo eka vona Yesu u ta fa tanihi Muprista Lonkulu, hikuva a nge he va tirheli hi ngati leyi basisaka ya gandzelo ra yena. Hi nkarhi wolowo va ta suka emutini wa vuchavelo wo fanekisela.

17. Ha yini swi taka swi nga ha bohi leswaku lava pfuxiweke eku Fumeni ka Kreste ka Gidi ra Malembe va nghena emutini wa vuchavelo wo fanekisela naswona va tshama kona?

¹⁷ Xana lava pfuxiweke enkarhini wa ku Fuma ka Yesu ka Gidi ra Malembe va fanele va nghena emutini wa vuchavelo lowu nga riki wa xiviri ivi va tshama kona ku kondza ku fa muprista lonkulu? E-e, hikuva hi ku fa ka vona va hakele nxupulo wa ku dyoha ka vona. (Varhoma 6:7; Vaheveru 9:27) Hambi swi ri tano, Muprista Lonkulu u ta va pfuna leswaku va fikelela ku hetiseka. Loko vo hundza ndzingo wo hetelela hi laha ku humelelaka endzhaku ka Gidi ra Malembe, Xikwembu xi ta tlhela xi va vula lava lulameke hi ku va tiyisekisa hi vutomi lebyi nga heriki emisaveni. Kavula, ku tsandzeka ku fambisana ni swilaveko swa Xikwembu swi ta tisa xigwevo xa ku avanyisiwa ni ndzoviso eka munhu wihi na wihi loyi a nga hundziki eka ndzingo wo hetelela tanihi muhlayisi wa vutshembeki.

18. Malunghana ni vuhosi ni vuprista bya Yesu, i yini lexi nga ta sala ni vanhu hi laha ku nga heriki?

¹⁸ Eku heteleleni muprista lonkulu wa Muisrayele u file. Kambe Yesu “[u ve] Muprista Lonkulu hilaha ku nga heriki, hileswi a nga wa rixaka rin’we na Melkisedeke.” (Vaheveru 6:19, 20, xiitaliki i xerhu; 7:3.) Kutani ku tshika ka Yesu xikhundlha xa yena tanihi Muprista Lonkulu la yimelaka vanhu a ku heti vutomi bya yena. Mimbuyelo leyinene ya ntirho wa yena tanihi Hosi ni Muprista Lonkulu yi ta tshama ni vanhu hi laha ku nga heriki, naswona vanhu va ta va va n’wi kolota hi laha ku nga heriki hikwalaho ka ku va a tirhe eswiphen’wini leswi. Tlhandla-kambirhi, Yesu u ta rhangela evugandzerini bya Yehovha hi laha ku nga heriki.—Vafilipiya 2:5-11.

Tidyondzo Ta Nkoka Eka Hina

19. I dyondzo yihi malunghana ni rivengo ni rirhandzu leyi nga dyondziwaka elunghiselelweni ra miti ya vuchavelo?

¹⁹ Hi nga dyondza tidyondzo to tala eka lunghiselelo ra miti ya vuchavelo. Hi xikombiso, mudlayi loyi a a vengaka munhu a kala a n’wi dlaya, a a nga pfumeleriwi ku tshama emutini wa vuchavelo. (Tinhlayo 35:20, 21) Kutani xana munhu un’wana la nga emutini wa vuchavelo, wo fanekisela, a a ta pfumelela ku venga makwavo ku va kona embilwini ya yena hi ndlela yihi? Muapostola Yohane u tsarile: “Un’wana ni un’wana loyi a vengaka makwavo i mudlayi, kutani ma swi tiva leswaku ku hava mudlayi loyi vutomi lebyi nga heriki byi tshamaka eka yena.” Hikwalaho a hi “rhandzaneni, hikuva rirhandzu i ra Xikwembu.”—1 Yohane 3:15; 4:7.

20. Leswaku va pona Murihiseri wa ngati, i yini lexi lava nga emutini wa vuchavelo wo fanekisela va faneleke va xi endla?

²⁰ Leswaku va sirheleleka eka murihiseri wa ngati, vanhu lava nga dlayangiki hi vomu a va fanele va tshama emutini wa vuchavelo naswona va nga hundzi ndzilakano wa madyelo ya wona. Ku vuriwa yini hi lava nga le mutini wa vuchavelo wo fanekisela? Leswaku va pona Murihiseri wa ngati lonkulu, a va fanelanga va suka emutini. Hakunene, va fanele va tivonela eka swinavetisi leswaku va nga yi emakumu ka madyelo, hi ndlela yo fanekisela. Va fanele va tivonela leswaku va nga pfumeleli ku rhandza misava ya Sathana ku kula etimbilwini ta vona. Leswi swi nga ha lava xikhongelo ni matshalatshala, kambe vutomi bya vona byi titshege hi xona.—1 Yohane 2:15-17; 5:19.

21. I ntirho wihi lowu vuyerisaka lowu nga le ku endliweni hi lava nga le mutini wa vuchavelo wa namuntlha?

²¹ Vanhu lava nga dlayangiki hi vomu emitini ya khale ya vuchavelo a va fanele va va vatirhi lava hisekaka. Hi ku fanana, “v̌ana v̌a Israel” lava totiweke va veke xikombiso lexinene tanihi vatshoveri ni vahuweleri va Mfumo. (Matewu 9:37, 38; Marka 13:10) Tanihi ‘valuveri’ ni ‘vahlapfa’ emutini wa vuchavelo wa namuntlha, Vakreste lava nga ni ntshembo wa laha misaveni va nyikiwe lunghelo ro endla ntirho lowu wo ponisa vutomi kun’we ni vatotiwa lava ha riki emisaveni. Wa nga vona ndlela leyi ntirho lowu wu vuyerisaka ha yona! Lava tirhaka hi ku tshembeka emutini wa vuchavelo wo fanekisela va ta pona ku fela makumu emavokweni ya Murihiseri wa ngati. Ematshan’weni ya sweswo, va ta kuma mimbuyelo leyi nga heriki entirhweni wa yena tanihi Muprista Lonkulu wa Xikwembu. Xana u ta tshama emutini wa vuchavelo ivi u hanya hi laha ku nga heriki?

[Nhlamuselo ya le hansi]

A Wu Ta Hlamurisa Ku Yini?

◻ Ha yini ku nga vuriwaka leswaku magidi ya timiliyoni ma ni nandzu wa ngati?

◻ I swiphemu swihi leswi Yesu Kreste a swi hetisisaka malunghana ni vanhu?

◻ Xana muti wa vuchavelo wo fanekisela i yini, naswona munhu u nghenisa ku yini eka wona?

◻ Xana vanhu va ta ntshunxiwa rini emutini wa vuchavelo wo fanekisela?

◻ I tidyondzo tihi ta nkoka leti hi nga ti dyondzaka hi lunghiselelo ra miti ya vuchavelo?

[Swifaniso leswi nga eka tluka 16]

Xana wa swi tiva swiphemu swa nkoka leswi hetisisiwaka hi Yesu Kreste?