Ku Vonakala Ka Vona A Ku Timekanga

EMINKARHINI ya Bibele a ku ri ni Timbhoni to tshembeka ta Yehovha leti langutaneke ni swiphiqo ni ku nonon’hweriwa. Va langutane ni nkaneto naswona minkarhi yin’wana wu va hlurile. Kambe a va lan’wanga, va hela matimba. Kahle-kahle, ku vonakala ka vona a ku timekanga.

Hi xikombiso, muprofeta Yeremiya a a nyikiwe xiavelo xo va muprofeta wa Xikwembu eka tiko leri gwineheke ra Yuda. U twarise xitsundzuxo mayelana ni ku lovisiwa ka Yerusalema loku a ku ta. (Yeremiya 1:11-19) Hikwalaho, Yeremiya u ve ni minkwetlembetano yo tala ni vaaka-tiko-kulobye, lava a a va n’wi languta tanihi mutwarisi wa khombo.

Muprista Paxahuru, mulanguteri lonkulu la rhangelaka endlwini ya Xikwembu, u tshame a ba Yeremiya hikwalaho ka leswi a swi profeteke ivi a n’wi manya hi tingole. Hikwalaho ka maxangu lawa, Yeremiya u te: “Nḍi endliwe šihlekiso e siku riṅwana ni riṅwana, v̌a nḍi hleka hikwav̌o. Hikuv̌a hi masiku loko nḍi v̌ulav̌ula, nḍi tlakusa rito, nḍi huwelela e ka v̌anhu e ku nonoṅhwa ni ku onha; hikwalaho rito ra Yehova ri nḍi hunḍukele ku holov̌eriwa ni šisanḍu hi siku riṅwana ni riṅwana.” Muprofeta a a hetiwe matimba ku fikela laha a vuleke a ku: “A nḍi nga ha ṭhami nḍi ṅwi v̌ula, ni loko ku ri ku v̌ulav̌ula hi v̌ito ra yena [Yehovha].”—Yeremiya 20:1, 2, 7-9.

Hambi swi ri tano, Yeremiya a nga hluriwanga hi ku hetiwa matimba. Loko a vulavula hi “rito ra Yehov̌a,” u huwelerile a ku: “E ka mina ŝi fana ni nḍilo lo’wu hisaka e mbilwini ya mina, lo’wu nghenisiweke marambyini ya mina; kutani nḍi endla hi matimba e ku wu hlayisa, kambe nḍa tanḍeka.” (Yeremiya 20:8, 9) Hi nsunsumeto lowukulu wo vula ku avanyisa ka Xikwembu, Yeremiya u seketeriwe hi moya lowo kwetsima ivi a hetisisa xiavelo xa yena.

Muapostola Pawulo na yena a a ri ni swivangelo swo tala swo hela matimba, loko a a swi pfumelerile. U tiyisele makhombo ya ntumbuluko, ku fayekeriwa hi byatso, ku xanisiwa, ni ku himeteriwa. Ku engetela kwalaho, ‘a tikeriwa masiku hinkwawo ni ku karhateka emoyeni, loko a anakanya mavandlha hinkwawo.’ (2 Vakorinto 11:23-28) Ina, masiku hinkwawo Pawulo a a fanele a langutana ni swiphiqo, a a anakanya hi mavandlha lamantshwa lawa a veke ni xandla eku simekiweni ka wona. Ku tlula kwalaho, a a nga hetisekanga naswona a a fanele ku lwisana ni “riphantsu enyameni,” kumbexana mahlo lama nga voniki kahle. (2 Vakorinto 12:7; Varhoma 7:15; Vagalatiya 4:15) Van’wana va vulavule swo biha hi Pawulo naswona sweswo swi fikile etindleveni ta yena.—2 Vakorinto 10:10.

Hambi swi ri tano, Pawulo a nga ku pfumelelanga ku hetiwa matimba ku n’wi hlula. E-e, a a nga ri munhu la nga tolovelekangiki. (2 Vakorinto 11:29, 30) I yini lexi hlayiseke “ndzilo wakwe wa le ndzeni” wu pfurha? Xo sungula, a a ri ni vanakulobye lava n’wi seketelaka, van’wana va kala va ya na yena eRhoma laha a nga fika a hlayisiwa endliwini ya vabohiwa. (Mintirho 28:14-16) Xa vumbirhi, muapostola u langute xiyimo xa yena hi ndlela leyi ringaniseriweke. Vaxanisi ni vakaneti va yena a va hoxile, hayi Pawulo. Eku heleni ka vutomi bya yena bya laha misaveni, u langute vutirheli bya yena hi ndlela leyinene ivi a ku: “Leswi saleke, hileswaku harhi ya vuhluri yi ndzi yimerile, ku nga ku lulama loku Hosi, muavanyisi lowo lulama, yi nga ta ndzi nyika.”—2 Timotiya 4:8.

Ku tlula hinkwaswo, nkarhi hinkwawo Pawulo a tshinelela Yehovha Xikwembu hi xikhongelo, naswona ‘Hosi yi yimile na yena yi n’wi tiyisa.’ (2 Timotiya 4:17) Pawulo u te: “Ndzi nga endla hinkwaswo hi matimba ya loyi a ndzi tiyisaka.” (Vafilipiya 4:13) Ku vulavurisana ni Xikwembu ni Vakreste-kulobye, swin’we ni ku languta vutirheli bya yena hi ndlela leyinene, swi pfune Pawulo leswaku a hambeta entirhweni wa Yehovha.

Xikwembu xi huhutele Pawulo ku tsala a ku: “Loko hi ri karhi hi endla leswinene, hi nga karhaleni, hikuva hi ta tshovela hi nkarhi wa kona, loko hi nga heli mbilu.” (Vagalatiya 6:7-9) Ku tshoveriwa yini? Vutomi lebyi nga heriki. Kutani ke, vana tanihi Yeremiya, Pawulo, ni timbhoni tin’wana to tala leti tshembekeke ta Yehovha leti boxiweke eMatsalweni. Ina, vana tanihi vona, u nga hluriwi hi ku hetiwa matimba. U nga pfumeleli ku vonakala ka wena ku timeka.—Ringanisa Matewu 5:14-16.

[Swifaniso leswi nga eka tluka 25]

Pawulo na Yeremiya, a va pfumelelanga ku vonakala ka vona ku timeka