Xiviko Xa Vahuweleri Va Mfumo

“Tirha Ntirho Wa Muvuri Wa Rito”

XANA swi vula yini ku va muvuri wa rito? Rito leri i vuhundzuluxeri bya rito ra Xigriki leri nge eu·ag·ge·li·stesʹ, leri yelanaka swinene na rito eu·ag·geʹli·on, leri vulaka “mahungu lamanene.” Hikwalaho, muvuri wa rito i muchumayeri, kumbe murhumiwa wa mahungu lamanene.

Vakreste hinkwavo va ntiyiso i vavuri va rito hikuva va huwelela mahungu lamanene malunghana ni Mfumo wa Xikwembu. Hi laha ku fanelaka, muapostola Pawulo u khutaze Timotiya ku “tirha ntirho wa muvuri wa Rito.” Timotiya a a fanele ku teka ntirho lowu wu ri wa nkoka. Pawulo u n’wi khutaze ku ‘tihlayisa eka swilo hinkwaswo’ ni ku ‘hetisisa vutirheli byakwe hi xitalo.’—2 Timotiya 4:5.

Tanihi vavuri va rito, na hina hi teka ntirho wa hina wu ri wa nkoka naswona ‘ha tihlayisa,’ kumbe ku tshama hi lunghele ku avelana mahungu lamanene nkarhi wun’wana ni wun’wana. Xisweswo vo tala va kote ku tiva Yehovha ni switshembiso swa yena endzhaku ko va va vulavurisane ni Timbhoni ta Yehovha hi xitshuketa. Leswi hi leswi humeleleke eka Seymore, wanuna wa le Barbados.

Seymore a a ri mudyondzisi wa le xikolweni lexi lawuriwaka hi mfumo. Charles, mudyondzisi wa nkarhinyana exikolweni lexi fanaka naswona la nga un’wana wa Timbhoni ta Yehovha, a a ri muvuri wa rito la xalamukeke. A a ri mutirheli wa nkarhi hinkwawo, kumbe phayona, naswona u tirhise nkarhi wun’wana ni wun’wana leswaku a avelana mahungu lamanene ni van’wana. A ku ri ku nyikela vumbhoni ka Charles hi xitshuketa loku endleke Seymore a twa rungula ra Mfumo ro sungula.

Hi ku hatlisa na yena Seymore u tiyimisele ku avelana mintiyiso ya Bibele ni vo tala hi laha a nga kotaka ha kona. Kutani u sungule mabulo ya xitshuketa ni vanhu va laha a tirhaka kona, ngopfu-ngopfu swichudeni swakwe. Hambi leswi etindhawini tin’wana a ku nga fanelanga ku dyondzisiwa vukhongeri eswikolweni leswi lawuriwaka hi mfumo, wanuna loyi a a averiwe ku dyondzisa dyondzo ya vukhongeri ni mimpimanyeto ya mahanyelo. Kambe sweswi langutelo ra Seymore ra khale etimhakeni leti a ri siviwe hi vutivi lebyintshwa bya Bibele. Hi nkarhi wo wisa, a a vulavula ni vana vakwe malunghana na xitshembiso xa Xikwembu xa misava leyintshwa ni vutomi lebyi nga heriki lebyi taka.

Xana vana va angule njhani? Vo tala va kombise ku tsakela ka xiviri eka mahungu lamanene ya Mfumo wa Yehovha. Hi ku famba ka nkarhi, Seymore u sungule ku fambisa tidyondzo ta Bibele ni swichudeni swakwe swa 13. Ku tsakela ka swona a ku ri lokukulu lero swi lunghiselela ku dyondza Bibele kambirhi hi vhiki. Eku heteleleni vo tala va vona va sungule ku va kona eminhlanganweni ya Vukreste eHolweni ya Mfumo ya le kusuhi ya Timbhoni ta Yehovha. Ku ta fikela sweswi kaye wa vona va ve Timbhoni ta Yehovha leti tinyiketeleke ni leti khuvuriweke. Loko a ri Seymore, sweswi u hetisisa vutirheli byakwe hi xitalo hi ku tirha tanihi phayona ra nkarhi hinkwawo naswona a ri nkulu eka rin’wana ra mavandlha ya Timbhoni ta Yehovha eBarbados.

Lexi i xikombiso xin’we ntsena xa ndlela leyi ha yona Timbhoni ta Yehovha emisaveni hinkwayo ti ‘endlaka ntirho wa muvuri wa rito,’ nkarhi wun’wana hi ku nyikela vumbhoni hi xitshuketa. Va landzela xikhutazo xa Bibele lexi kumekaka eka Vakolosa 4:5, 6, lexi nge: “Tirhisanani ni va le handle hi ku tlhariha, mi ri karhi mi londzovota nkarhi lowu mi nga na wona. Ku vulavula ka n’wina a ku ve lokunene, loku nandzihaka masiku hinkwawo, mi ta tiva hilaha mi fanelaka ku hlamula un’wana ni un’wana hakona.”