‘Mi Rhandza Ntiyiso Ni Ku Rhula’!
“Rito ra Yehova wa tinyimpi ri nḍi tela, ri ku: . . . Mi tiranḍela ntiyiso ni ku rula.”—ZAKARIYA 8:18, 19.
1, 2. (a) Hi yihi rhekhodo ya vanhu malunghana ni ku rhula? (b) Hikwalaho ka yini misava leyi nga kona sweswi yi nga taka yi nga ku kumi ku rhula ka xiviri?
“MISAVA a yi si tshama yi va ni ku rhula. Endhawini yo karhi—ni le tindhawini to tala hi nkarhi wun’we—ku tshama ku ri ni nyimpi.” Sweswo swi vuriwe hi Profesa Milton Mayer wa Yunivhesiti ya Massachusetts, ya le U.S.A. Kunene i marito lama hlunamisaka swonghasi evanhwini! Ina, vanhu va ku lavile ku rhula. Van’watipolitiki va ringete mixaka hinkwayo ya tindlela to hlayisa ku rhula, ku sukela eka Pax Romana ya minkarhi ya Varhoma ku ya eka nawu wa “Mutually Assured Destruction” hi nkarhi wa Nyimpi ya Vusukumbele. Kambe, eku heteleleni matshalatshala ya vona hinkwawo ma tsandzekile. Swi hi laha Esaya a vuleke ha kona malembe-xidzana yo tala lama hundzeke leswaku, ‘varhumiwa va ku rhula va rile hi xiviti.’ (Esaya 33:7) Ha yini swi ri tano?
2 Xivangelo hi leswaku ku rhula loku nga heriki ku fanele ku huma laha ku nga riki na rivengo ni makwanga; ku fanele ku sekeriwa entiyisweni. Ku rhula a ku nge sekeriwi emavunweni. Hi yona mhaka leyi loko Yehovha a tshembisa ku vuyeteriwa ni ku rhula eka Israyele wa khale a nga te: “Waŝiv̌o, nḍi ta fambisa ka yena e ku rula tani hi nambu, ni ku twala ka matiko tani hi boboma le’ri halakaka.” (Esaya 66:12) Sathana Diyavulosi, xikwembu xa mafambiselo lawa ya swilo i “mudlayi,” ni “muhembi, ni tata wa mavunwa.” (Yohane 8:44; 2 Vakorinto 4:4) Xana swi nga kotekisa ku yini leswaku misava leyi nga ni xikwembu xo tano yi va ni ku rhula?
3. Hi yihi nyiko leyi xiyekaka leyi Yehovha a yi nyikeke vanhu va yena, hambi leswi va hanyaka emisaveni ya madzolonga?
3 Kambe, lexi xiyekaka Yehovha u nyika vanhu va yena ku rhula hambi loko va ha hanya emisaveni ya Sathana leyi hlaseriweke hi nyimpi. (Yohane 17:16) Hi lembe-xidzana ra vutsevu B.C.E., u hetisise xitshembiso xa yena hi ku tirhisa Yeremiya, ivi a nyika tiko ra yena ro hlawuleka ‘ku rhula ni ntiyiso’ hi ku ri tlherisela etikweni ra rikwavo. (Yeremiya 33:6) Naswona emasikwini lawa ya makumu, u nyikele ‘ku rhula ni ntiyiso’ eka vanhu va yena lava nga le ‘tikweni’ ra vona, kumbe exiyin’weni xa moya xa laha misaveni, hambi leswi va hanyaka enkarhini wa madzolonga swinene ku tlula wihi na wihi lowu tshameke wu va kona emisaveni, ku fikela sweswi. (Esaya 66:8; Matewu 24:7-13; Nhlavutelo 6:1-8) Loko hi ri karhi hi ya mahlweni ni ku kambisisa ka hina Zakariya ndzima 8, hi ta kuma ku twisisa loku enteke malunghana ni ku rhula ni ntiyiso lowu nyikiwaka hi Xikwembu, hi tlhela hi vona leswi hi faneleke hi swi endla leswaku hi hambeta hi swi kuma.
‘Mavoko Ya N’Wina A Ma Tiye’
4. Xana Zakariya u khutaze Vaisrayele ku endla yini, loko va lava ku kuma ku rhula?
4 Se i ra vutsevu hi twa xitiviso lexi nyanyulaka lexi humaka eka Yehovha, eka Zakariya ndzima 8: “Yehova wa tinyimpi o ri: Mav̌oko ya ṅwina a ma tiye, ṅwina la’v̌a twaka marito la’ma humaka miloṅwini ya v̌aprofeta e mikarini leyi ku nga sunguriwa ha yona yindlu ya Yehova wa tinyimpi, yi nga tempele, leŝaku yi akiwa. Hikuv̌a e mahlweni ka masiku wolawo, a ku nga ri na hakelo ya munhu, ni šifuwo a ši nga ri na hakelo; l’a humaka ni l’a tlhelelaka a v̌a nga ri na ku rula hikwalaho ka nala; a nḍi ṭhiketa v̌anhu leŝaku v̌a lwa.”—Zakariya 8:9, 10.
5, 6. (a) Hikwalaho ka ku heleriwa hi matimba ka Vaisrayele, xiyimo xi ve njhani le Israyele? (b) Hi kwihi ku cinca loku Yehovha a ku tshembiseke Israyele loko o rhangisa vugandzeri bya yena?
5 Zakariya u vulavule marito lawa loko tempele ya ha ri karhi yi pfuxetiwa eYerusalema. Enkarhini lowu hundzeke, Vaisrayele lava vuyeke eBabilona va hetiwe matimba ivi va tshika ntirho wo aka tempele. Hikokwalaho ka leswi va tiendleleke nchavelelo wa vona vini, a va wu kumanga nkateko ni ku rhula loku humaka eka Yehovha. Hambi leswi va rimeke masimu ya vona va tlhela va khathalela masimu ya vona ya vhinya, a va katekanga. (Hagayi 1:3-6) A swi vonaka onge a va tirheli “hakelo.”
6 Sweswi leswi tempele a yi ri karhi yi pfuxetiwa, Zakariya u khutaze Vayuda leswaku va ‘tiya,’ va va ni xivindzi, va rhangisa vugandzeri bya Yehovha. Xana a ku ta humelela yini loko va endlise sweswo? “Ŝeŝi, e ka masalela ya tiko leri, a nḍi nga ha v̌i leši ngi nḍi ri šona e mikarini ya khale, ku v̌ula Yehova wa tinyimpi. Nḍi byala ku rula, muri wa vinya wu ta v̌eka mihanḍu ya wona, ni misav̌a yi ta v̌eka ŝakudya ŝa yona, ni tilo ri nyika mbera ya rona, hikwaŝo ŝeŝo nḍi ta ŝi nyika masalela ya tiko leri, yi v̌a nḍaka ya wona. Kukota leŝi ngi mi ri šisanḍu e matikweni, ṅwina, yindlu ya Yuda, na ṅwina, yindlu ya Israel, nḍi ta mi hanyisa ŝeŝi, mi v̌a ku kateka. Mi nga tšhav̌eni, mav̌oko ya ṅwina a ma tiye!” (Zakariya 8:11-13) Loko Israyele o endla hi ku tiyimisela, a a ta kateka. Eku sunguleni, loko matiko ma tsakela ku tshaha xikombiso xa ku rhukaniwa, a ma vulavula hi Israyele. Sweswi Israyele a ta va xikombiso xa nkateko. Mawaku xivangelo lexinene swonghasi lexi a xi ta ‘endla mavoko ya vona ma tiya’!
7. (a) Hi kwihi ku cinca loku vanhu va Yehovha va veke na kona, loku chaputeke hi lembe ra ntirho ra 1995? (b) Loko u languta eka xiviko xa lembe na lembe, hi wahi matiko lawa u ma vonaka ma ri ni rhekhodo leyi xiyekaka ya vahuweleri, maphayona ni avhareji ya tiawara?
7 Ku vuriwa yini hi namuntlha? Emalembeni ya le mahlweni ka 1919, vanhu va Yehovha a va nga hiseki ngopfu. A va vanga ni vukala-tlhelo lebyi heleleke eka nyimpi yo sungula ya misava, naswona a va ri ni mukhuva wo landzelela munhu ematshan’weni yo landzelela Hosi ya vona, Yesu Kreste. Hikwalaho, van’wana va hetiwe matimba hi nkaneto lowu humaka ehandle ni lowu humaka endzeni ka nhlengeletano. Kutani, hi 1919, hikwalaho ka mpfuno wa Yehovha, va endle mavoko ya vona ma tiya. (Zakariya 4:6) Yehovha u va nyike ku rhula, naswona va humelerile swinene. Leswi swi voniwa eka rhekhodo ya vona ya malembe ya 75 lama hundzeke, lama helaka eka lembe ra ntirho ra 1995. Tanihi ntlawa, Timbhoni ta Yehovha ti papalata vutiko, rivengo ra tinxaka, xihlawuhlawu ni swihlovo swin’wana hinkwaswo swa rivengo. (1 Yohane 3:14-18) Va tirhela Yehovha hi ku hiseka ka xiviri etempeleni ya yena ya moya. (Vaheveru 13:15; Nhlavutelo 7:15) N’wexemu ntsena, va hete tiawara to tlula magidi ya timiliyoni va vulavula ni van’wana hi Tata wa vona wa le tilweni! N’hweti yin’wana ni yin’wana, va fambise tidyondzo ta Bibele ta 4 865 060. Avhareji ya 663 521 yi hlanganyele entirhweni wa vuphayona n’hweti yin’wana ni yin’wana. Loko vafundhisi va Vujagana va lava ku nyika xikombiso xa vanhu lava hisekaka hakunene evugandzerini bya vona, minkarhi yin’wana va kombetela eka Timbhoni ta Yehovha.
8. Xana Mukreste un’wana ni un’wana a nga pfuneka njhani eka ‘mbewu ya ku rhula’?
8 Hikwalaho ka ku hiseka ka vona, Yehovha u nyika vanhu va yena ‘mbewu ya ku rhula.’ Munhu un’wana ni un’wana la hlakulelaka mbewu yoleyo u ta vona ku rhula ku kula embilwini ya yena ni le vuton’wini bya yena. Mukreste un’wana ni un’wana la pfumelaka, la lwelaka ku endla ku rhula na Yehovha swin’we ni Vakreste-kulobye, wa hlanganyela entiyisweni ni le ku rhuleni ka vanhu lava nga ni vito ra Yehovha. (1 Petro 3:11; ringanisa na Yakobo 3:18.) Xana swoleswo a swi tsakisi?
“Mi Nga Ṭhukeni”
9. Hi kwihi ku cinca ka ku tirhisana ni vanhu va yena loku Yehovha a ku tshembiseke?
9 Sweswi hi hlaya xitiviso xa vunkombo lexi humaka eka Yehovha. Xana hi xihi? “Yehova wa tinyimpi o ri: Leŝi nḍi nga ṭunḍuka ku mi onha siku v̌atata wa ṅwina v̌a nḍi karihiseke, ku v̌ula Yehova wa tinyimpi, kutani nḍi nga hunḍukangiki, nḍi ṭunḍukile kambe masikwini lawa ku endla Yerusalem ni yindlu ya Yuda e ŝinene. Mi nga ṭhukeni!”—Zakariya 8:14, 15.
10. Hi yihi rhekhodo ya Timbhoni ta Yehovha leyi kombisaka leswaku a va nga chavi?
10 Hambi leswi vanhu va Yehovha a va hangalasiwile hi tlhelo ra moya hi nkarhi wa nyimpi yo sungula ya misava, etimbilwini ta vona a va lava ku endla leswi lulameke. Hikwalaho, endzhaku ko nyikela ndzayo yo karhi, Yehovha u hundzule ndlela ya yena yo tirhisana na vona. (Malakiya 3:2-4) Namuntlha, loko hi languta endzhaku ha n’wi nkhensa hi mbilu hinkwayo hikwalaho ka leswi a swi endleke. Ina, a hi “vengiwa hi vanhu va matiko hinkwawo.” (Matewu 24:9) Vo tala va khomiwile, naswona van’wana va dlayiwile hikwalaho ka ripfumelo ra vona. Hakanyingi hi langutana ni ku pfumala ku tsakela kumbe rivengo. Kambe a hi chavi. Ha swi tiva leswaku Yehovha u ni matimba yo tlula nkaneto wihi na wihi, lowu vonakaka kumbe lowu nga vonakiki. (Esaya 40:15; Vaefesa 6:10-13) A hi nge tshiki ku yingisa marito lama nge: “Langutela Yehova, u ṭhama u tiya; mbilu ya wena a yi tiye!”—Pisalema 27:14.
“Uṅwana Ni Uṅwana A Vula Le’ŝi Tiyeke Ka Warikwavo”
11, 12. I yini lexi ha un’we-un’we hi faneleke ku xi tekela enhlokweni loko hi lava ku yi kuma hi laha ku teleke mikateko leyi Yehovha a yi nyikaka vanhu va yena?
11 Leswaku hi hlanganyela hi laha ku taleke eka mikateko leyi humaka eka Yehovha, ku ni swilo leswi hi faneleke hi swi tsundzuka. Zakariya u ri: “Kambe leŝi mi faneleke ku ŝi endla hi leŝi: uṅwana ni uṅwana a v̌ula le’ŝi tiyeke ka warikwav̌o; av̌anyisani ŝinene hi ku rula e tihubyeni ta ṅwina; mi nga kungeleli v̌amakwenu e khombo e timbilwini ta ṅwina, mi nga ranḍi ku hlambanya ka v̌unwa, hikuv̌a ŝeŝo hikwaŝo nḍi ŝi v̌engile, ku v̌ula Yehova.”—Zakariya 8:16, 17.
12 Yehovha u hi khutaza ku vulavula ntiyiso. (Vaefesa 4:15, 25) A nga swi yingisi swikhongelo swa lava kunguhataka ku endla swilo leswi nga vavisaka van’wana, lava fihlaka ntiyiso leswaku va pfuneka vona vini, kumbe lava vulaka swihlambanyo swa mavunwa. (Swivuriso 28:9) Tanihi leswi a vengaka vugwinehi, u lava leswaku hi namarhela eka ntiyiso wa Bibele. (Pisalema 25:5; 2 Yohane 9-11) Ku tlula kwalaho, ku fana ni vakulukumba lava a va ri etinyangweni ta muti wa Israyele, vakulu lava tamelaka timhaka ta vuavanyisi va fanele va sekela ndzayo ya vona ni swiboho swa vona entiyisweni wa Bibele, ku nga ri eka mianakanyo ya vona vini. (Yohane 17:17) Yehovha u lava leswaku va ‘avanyisa hi ku rhula,’ tanihi varisi va Vakreste va ringeta ku vuyetela ku rhula exikarhi ka mintlawa yimbirhi leyi lwisanaka ni ku pfuna vadyohi lava hundzukaka leswaku va tlhela va kuma ku rhula ka Xikwembu. (Yakobo 5:14, 15; Yuda 23) Hi nkarhi lowu fanaka, va hlayisa ku rhula ka vandlha, hi ku ka va nga chavi ku hlongola lava kavanyetaka ku rhula koloko hi ku ya ka vona emahlweni va dyoha hi vomu.—1 Vakorinto 6:9, 10.
‘Ku Khana Ni Ku Tsaka’
13. (a) Hi kwihi ku cinca malunghana ni ku titsona swakudya loku Zakariya a ku vumbheke? (b) Hi kwihi ku titsona swakudya loku a ku hlayisiwa le Israyele?
13 Sweswi, hi twa xitiviso xa nkoka xa vunhungu: “Yehova wa tinyimpi o te: Ku tiṭona ŝakudya ka ṅhweti ya v̌umune, ni ka ya v̌untlhanu na v̌umbiri, ni ka ya v̌ukhume, ŝi ta hunḍukela yindlu ya Yuda e ku ṭaka ni mikhuv̌o le’minene; ntsena mi tiranḍela ntiyiso ni ku rula.” (Zakariya 8:19) Ehansi ka Nawu wa Muxe, Vaisrayele a va titsona swakudya hi Siku ro Phahlelana Mariyeta ku kombisa ku karhateka ka vona eka swidyoho swa vona. (Levhitika 16:29-31) Ku titsona swakudya ka mune loku boxiweke hi Zakariya handle ko kanakana a ku endleriwa ku rilela swiendlakalo leswi khumbaka ku hluriwa ni ku herisiwa ka Yerusalema. (2 Tihosi 25:1-4, 8, 9, 22-26) Hambi swi ri tano, sweswi tempele a yi ri karhi yi pfuxetiwa naswona Yerusalema ri tlhele ri va ni vaaki. Ku rila a ku cinciwa ku va ntsako, naswona ku titsona swakudya ku hundzuke minkarhi ya minkhuvo.
14, 15. (a) Xana ku tlangeriwa ka Xitsundzuxo a ku ri xivangelo lexikulu xa ntsako hi ndlela yihi, naswona xana leswi swi fanele swi hi tsundzuxa yini? (b) Hi laha swi voniwaka ha kona eka xiviko xa lembe na lembe, hi wahi matiko lama veke ni tinhlayo leti xiyekaka eXitsundzuxweni?
14 Namuntlha, a hi ku hlayisi ku titsona swakudya loku boxiweke hi Zakariya kumbe ku titsona swakudya loku lerisiweke hi Nawu. Tanihi leswi Yesu a nyikeleke vutomi bya yena hikwalaho ka swidyoho swa hina, hi tiphina hi mikateko ya Siku lerikulu ra ku Phahlelana Mariyeta. Swidyoho swa hina swi funegetiwile, ku nga ri swa xinkarhana, kambe hi ku helela. (Vaheveru 9:6-14) Hi ku landzelela xileriso xa Muprista Lonkulu wa le tilweni, Yesu Kreste, hi hlayisa Xitsundzuxo xa rifu ra yena tanihi wona ntsena nkhuvo wa nkoka lowu hlayisiwaka hi Vakreste. (Luka 22:19, 20) Xana a hi ‘khani ni ku tsaka’ loko hi hlengeletana lembe na lembe hikwalaho ka nkhuvo wolowo?
15 Lembe leri nga hundza, vanhu va 13 147-201 va hlengeletanile ku tlangela Xitsundzuxo, va tlula nhlayo ya 1994 hi 858 284. I vunyingi lebyikulu hakunene! Ehleketa ku tsaka loku veke kona emavandlheni ya Timbhoni ta Yehovha ya 78 620 loko tinhlayo letikulu swonghasi ti ri karhi ti ya eTiholweni ta tona ta Mfumo ku ya tlangela nkhuvo lowu. Hakunene, hinkwavo lava a va ri kona va susumeteriwe ‘ku rhandza ntiyiso ni ku rhula’ loko va ri karhi va tsundzuka rifu ra Loyi a nga “ndlela, ni ntiyiso, ni vutomi” ni loyi sweswi a fumaka tanihi “Hosi ya ku rula” leyikulu ya Yehovha! (Yohane 14:6; Esaya 9:6) Nkhuvo lowu wu ve ni nhlamuselo yo hlawuleka eka lava va wu khomeleke ematikweni lama hlaseriweke hi mpfilumpfilu ni nyimpi. Van’wana va vamakwerhu va hina va vone makhombo lama nga hlamuselekiki hi 1995. Hambi swi ri tano, ‘ku rhula ka Xikwembu loku tlulaka ku anakanya hinkwako ku rindze timbilu ta vona ni matimba ya vona yo anakanya, ha Kreste Yesu.’—Vafilipiya 4:7.
‘A Hi Rhuliseni Mombo Wa Yehovha’
16, 17. Xana vanhu va matiko va nga “rhulisa mombo wa Yehovha” hi ndlela yihi?
16 Kambe, xana timiliyoni toleto hinkwato leti veke kona eXitsundzuxweni ti huma kwihi? Marito ya Yehovha ya vukaye ma hlamusela: “Leswi hi leswi Yehovha wa mavandla a swi vuleke, ‘vanhu ni vaaki va miti yo tala va ha ta ta; naswona vaaki va muti wun’wana va ta ya eka va wun’wana, va ku: “A hi yeni hi timbilu hinkwato hi ya olovisa mombo wa Yehovha ni ku lava Yehovha wa mavandla. Na mina ndzi ta ya.” Kutani vanhu vo tala ni matiko ya matimba va ta ta va ta lava Yehovha wa mavandla eYerusalema ni ku rhulisa mombo wa Yehovha.’”—Zakariya 8:20-22, NW.
17 Vanhu lava veke kona eXitsundzuxweni a va tela ku ta “lav̌a Yehova wa tinyimpi.” Vo tala va lava a va ri malandza ya yena lama tinyiketeleke ma tlhela ma khuvuriwa. Timiliyoni ta van’wana lava a va ri kona a ti si ri fikelela goza rolero. Ematikweni man’wana nhlayo ya lava a va ri kona eXitsundzuxweni a yi tlula nhlayo ya vahuweleri va Mfumo ka mune kumbe ka ntlhanu. Vanhu lava vo tala lava tsakelaka va lava mpfuno leswaku va ya emahlweni va endla nhluvuko. A hi va dyondziseni leswaku va tsakela ku tiva leswaku Yesu u fele swidyoho swa hina naswona wa fuma sweswi eMfun’weni wa Xikwembu. (1 Vakorinto 5:7, 8; Nhlavutelo 11:15) Naswona a hi va khutazeni leswaku va tinyiketela eka Yehovha Xikwembu ni ku titsongahatela Hosi ya yena leyi a yi vekeke. Hi ndlela leyi va ta “rhulisa mombo wa Yehovha.”—Pisalema 116:18, 19; Vafilipiya 2:12, 13.
“V̌av̌anuna V̌a Khume V̌a Tinḍimi Hikwato Ta Matiko”
18, 19. (a) Eku hetisekeni ka Zakariya 8:23, i vamani namuntlha lava nga “mu-Yuda”? (b) I vamani namuntlha lava nga “v̌av̌anuna v̌a khume” lava “[khomelelaka] hi nḍungo wa nguv̌u ya mu-Yuda”?
18 Eka ndzima ya vunhungu ya Zakariya hi hlaya leswi ro hetelela: “Yehova wa tinyimpi o ri.” Hi xihi xitiviso xa Yehovha xo hetelela? “E masikwini lawa v̌av̌anuna v̌a khume v̌a tinḍimi hikwato ta matiko, v̌a ta tikhomelela hi nḍungo wa nguv̌u ya mu-Yuda, v̌a ku: Hi ta ya na ṅwina, hikuv̌a hi twile leŝaku Yehova o na ṅwina.” (Zakariya 8:23) Esikwini ra Zakariya, Israyele wa ntumbuluko a a ri tiko leri hlawuriweke hi Xikwembu. Hambi swi ri tano, hi lembe-xidzana ro sungula, Israyele u ale Mesiya wa Yehovha. Hikwalaho, Xikwembu xa hina xi hlawule “mu-Yuda”—Israyele lontshwa—tanihi tiko ra xona ro hlawuleka, “Israyele wa Xikwembu” la vumbiwaka hi Vayuda va moya. (Vagalatiya 6:16, NW; Yohane 1:11; Varhoma 2:28, 29) Nhlayo ya vanhu volavo loko yi helerile yi ta va 144 000, va hlawuriwe exikarhi ka vanhu leswaku va ta fuma na Yesu eMfun’weni wa yena wa le tilweni.—Nhlavutelo 14:1, 4.
19 Vo tala va lava 144 000 ana se va file va ri lava tshembekeke naswona va kume hakelo ya vona ya le tilweni. (1 Vakorinto 15:51, 52; Nhlavutelo 6:9-11) Va nga ri vangani va ha sele emisaveni naswona va tsaka ku vona leswaku “v̌av̌anuna v̌a khume” lava hlawulaka ku famba ni “mu-Yuda” hakunene i “ntshungu lowukulu . . . [lowu] huma[ka] ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.”—Nhlavutelo 7:9; Esaya 2:2, 3; 60:4-10, 22.
20, 21. Tanihi leswi makumu ya misava leyi ma tshinelaka, xana hi nga tshama hi ri ni ku rhula na Yehovha hi ndlela yihi?
20 Leswi makumu ya misava leyi handle ko kanakana ma tshinelaka, Vujagana byi fana na Yerusalema esikwini ra Yeremiya: “Hi langutele ku rula, kambe a hi v̌oni ku rula; ni nkari wa ku horisiwa, kambe ku tšhav̌isa ku kona.” (Yeremiya 14:19) Ku chava koloko ku ta chaputa loko matiko ma hundzukela vukhongeri bya mavunwa ivi ma byi herisa hi ndlela ya tihanyi. Endzhakunyana ka kwalaho, matiko hi woxe ma ta herisiwa eka nyimpi yo hetelela ya Xikwembu, eArmagedoni. (Matewu 24:29, 30; Nhlavutelo 16:14, 16; 17:16-18; 19:11-21) Nkarhi wolowo wu ta va nkarhi wa nkitsinkitsi hakunene!
21 Eka hinkwaswo leswi, Yehovha u ta sirheleta lava rhandzaka ntiyiso ni ku hlakulela “mbewu ya ku rhula.” (Zakariya 8:12; Sofoniya 2:3) Kutani, a hi tshameni hi hlayisekile etikweni ra vanhu va yena, hi n’wi dzunisa hi ku hiseka erivaleni, hi pfuna vanhu vo tala hi laha swi kotekaka ha kona leswaku va “rhulisa mombo wa Yehovha.” Loko hi endla tano, hi ta tiphina hi ku rhula ka Yehovha minkarhi hinkwayo. Ina, “Yehova o ta nyika tiko ra yena e matimba; Yehova o ta katekisa tiko ra yena hi ku rula.”—Pisalema 29:11.
Xana U Nga Hlamusela?
◻ Xana vanhu va Xikwembu va ‘endle mavoko ya vona ma tiya’ esikwini ra Zakariya hi ndlela yihi? Namuntlha ke?
◻ Xana hi endlisa ku yini loko hi langutane ni nxaniso, rivengo ni ku pfumala ku tsakela?
◻ I yini lexi katsekaka eku ‘vulavuleni ka hina ntiyiso ni van’wana’?
◻ Xana munhu a nga “rhulisa mombo wa Yehovha” hi ndlela yihi?
◻ Hi xihi xivangelo lexikulu xo tsaka lexi voniwaka eku hetisekeni ka Zakariya 8:23?
[Xifaniso lexi nga eka tluka 18]
N’wexemu, Timbhoni ta Yehovha ti hete tiawara ta 1150 353 444 ti vulavula ni vanhu mayelana ni Mfumo wa Xikwembu