Yehovha U Nyika Ku Rhula Ni Ntiyiso Hi Xitalo
“Nḍi [ta] v̌a horisa, nḍi v̌a nyika e nḍalo ya ku rula, ni yo ṭaka.”—YEREMIYA 33:6.
1, 2. (a) Xana rhekhodo ya matiko yi ri yini malunghana ni ku rhula? (b) Hi 607 B.C.E., hi yihi dyondzo leyi Yehovha a yi dyondziseke Vaisrayele mayelana ni ku rhula?
KU RHULA! Mawaku ndlela leyi ku naveriwaka ha yona, kambe ka pfumaleka ematin’wini ya vanhu! Lembe-xidzana ra vu-20, ngopfu-ngopfu, a ri vanga lembe-xidzana ra ku rhula. Ematshan’weni ya sweswo, ri ve ni tinyimpi timbirhi leti loviseke vo tala swinene ematin’wini ya vanhu. Endzhaku ka nyimpi yo sungula ya misava, ku tlhomiwe Ntwanano wa Matiko leswaku ku hlayisiwa ku rhula ka misava. Nhlengeletano yoleyo yi tsandzekile. Endzhaku ka nyimpi ya vumbirhi ya misava, ku tlhomiwe nhlengeletano ya Nhlangano wa Matiko hi xikongomelo lexi fanaka. Loko hi hlaya maphepha-hungu ntsena siku na siku hi yi vona kahle ndlela leyi wu tsandzekaka swinene ha yona.
2 Xana hi fanele hi hlamarisiwa hi leswi tinhlengeletano ta vanhu ti nga swi kotiki ku tisa ku rhula? Nikatsongo. Malembe yo tlula 2 500 lama hundzeke, vanhu lava hlawuriweke va Xikwembu, ku nga Israyele, va dyondzisiwe dyondzo emhakeni leyi. Hi lembe-xidzana ra vunkombo B.C.E., ku rhula ka Israyele ku xungetiwe hi mfumo wa misava lowu a wu ri ni matimba, ku nga Babilona. Israyele u langute eka Egipta leswaku a kuma ku rhula. Egipta ri tsandzekile. (Yeremiya 37:5-8; Ezekiyele 17:11-15) Hi 607 B.C.E., mavuthu ya Vababilona ma wise makhumbi ya Yerusalema ma tlhela ma hisa tempele ya Yehovha. Xisweswo Israyele u dyondze hi vuyelo byo biha leswaku ku titshega hi tinhlengeletano ta vanhu i vuhava. Ematshan’weni yo tiphina hi ku rhula, tiko leri ri sindzisiwe ku ya evuhlongeni eBabilona.—2 Tikronika 36:17-21.
3. Eku hetisekeni ka marito ya Yehovha hi ku tirhisa Yeremiya, hi swihi swiendlakalo swa matimu leswi dyondziseke Israyele dyondzo ya nkoka ya vumbirhi mayelana ni ku rhula?
3 Hambi swi ri tano, emahlweni ka ku wa ka Yerusalema, Yehovha u paluxe leswaku yena, ku nga ri Egipta, u ta tisela Israyele ku rhula ka xiviri. Hi ku tirhisa Yeremiya u tshembisile: “Nḍi [ta] v̌a horisa, nḍi v̌a nyika e nḍalo ya ku rula, ni yo ṭaka; nḍi v̌uyisa la’v̌a khomiweke v̌a Yuda, ni la’v̌a khomiweke v̌a Israel, nḍi tlhela nḍi v̌a akisa kukotisa mikarini ya khale.” (Yeremiya 33:6, 7) Xitshembiso xa Yehovha xi sungule ku hetiseka hi 539 B.C.E. loko Babilona ri hluriwile ivi mahlonga ya Vaisrayele ma nyikiwa ntshunxeko. (2 Tikronika 36:22, 23) Exiphen’wini xo hetelela xa 537 B.C.E., ntlawa wa Vaisrayele wu tlangele Nkhuvo wa Mitsonga etikweni ra Israyele, ro sungula endzhaku ka malembe ya 70! Endzhaku ka nkhuvo, va sungule ku pfuxa tempele ya Yehovha. Xana va titwe njhani hi mhaka leyi? Rhekhodo yi ri: “Tiko hikwaro ri endla huwa le’yikulu e ku ḍunisa Yehova, hikuv̌a ku sunguriwa masungulo ya yindlu ya Yehova.”—Ezra 3:11.
4. Xana Yehovha u va khutaze njhani Vaisrayele leswaku va endla ntirho wo aka tempele, naswona i xitshembiso xihi lexi a xi endleke mayelana ni ku rhula?
4 Kambe, endzhaku ka masungulo wolawo lama tsakisaka, Vaisrayele va hetiwe matimba hi vakaneti ivi va tshika ntirho wo aka tempele. Endzhaku ka malembe ma nga ri mangani, Yehovha u susumetele muprofeta Hagayi na Zakariya leswaku va khutaza Vaisrayele ku hetisa ntirho wo pfuxeta muako. Mawaku ndlela leyi va faneleke va nyanyuke ha yona loko va twa Hagayi a vulavula mayelana ni tempele leyi a yi fanele yi akiwa a ku: “Ku kwetsima ka yindlu ya le nḍaku ku ta tlula ka le’yo sungula, ku v̌ula Yehova wa mav̌andla; e šiv̌andleni leši, nḍi ta v̌eka ku rula”!—Hagayi 2:9.
Yehovha U Hetisisa Switshembiso Swa Yena
5. I yini lexi xiyekaka malunghana ni ndzima ya vunhungu ya Zakariya?
5 Ebukwini ya Bibele ya Zakariya, hi hlaya hi swivono swo hlayanyana leswi huhuteriweke ni vuprofeta lebyi tiyiseke vanhu va Xikwembu le ndzhaku hi lembe-xidzana ra vutsevu B.C.E. Vuprofeta lebyi lebyi fanaka byi ya emahlweni byi hi tiyisekisa hi nseketelo wa Yehovha. Byi hi nyika xivangelo xo tshemba leswaku Yehovha u ta nyika vanhu va yena ku rhula ni le sikwini ra hina. Hi xikombiso, eka ndzima ya vunhungu ya buku leyi nga ni vito ra yena, hi makhamba ya khume muprofeta Zakariya u vula marito lama nge: ‘Leswi hi leswi Yehovha a swi vuleke.’ Nkarhi wun’wana ni wun’wana, xiga lexi xi tivisa marito ya Xikwembu lama yelanaka ni ku rhula ka vanhu va Xikwembu. Swin’wana swa switshembiso leswi swi hetisekile le ndzhaku esikwini ra Zakariya. Hinkwaswo swi hetisekile kumbe swa ha ya emahlweni swi hetiseka ni namuntlha.
“Ndzi Ta Va Ni Rilondzo Hi Siyoni”
6, 7. Xana Yehovha a ri ni ‘rilondzo hi Siyoni hi vukarhi lebyikulu’ hi tindlela tihi?
6 Marito lawa ma humelela ro sungula eka Zakariya 8:2, (NW) laha hi hlayaka leswi: “Leswi hi leswi Yehovha wa mavandla a swi vuleke, ‘ndzi ta va ni rilondzo hi Siyoni, rilondzo lerikulu, naswona ndzi ta va ni rilondzo ha yena hi vukarhi lebyikulu.’” Xitshembiso xa Yehovha xa ku va ni rilondzo ni ku va hisekela swinene vanhu va yena, a swi vula leswaku a a ta lwela ku vuyetela ku rhula ka vona. Ku vuyeteriwa ka Israyele etikweni ra yena ni ku pfuxetiwa ka tempele a ku kombisa ku hiseka koloko.
7 Kambe, ku vuriwa yini hi lava va kaneteke vanhu va Yehovha? Ku hisekela ka yena vanhu va yena a ku ta kombisiwa hi “vukarhi lebyikulu” bya yena ehenhla ka valala volavo. Loko Vayuda lava tshembekeke a va gandzele etempeleni leyi pfuxetiweke, a a va ta swi kota ku kombisa vuyelo byo biha ehenhla ka Babilona wa matimba, loyi sweswi a weke. A va ta tlhela va ehleketa hi ku tsandzeka lokukulu ka valala lava ringeteke ku sivela ku pfuxetiwa ka tempele. (Ezra 4:1-6; 6:3) Naswona a va ta nkhensa Yehovha leswi a hetisiseke xitshembiso xa yena. Ku hiseka ka yena ku endle leswaku va hlula!
“Muti Wa V̌unene”
8. Emasikwini ya Zakariya, xana Yerusalema a wu ta hundzuka muti wa vutshembeki ku hambana ni le minkarhini yo sungula hi ndlela yihi?
8 Zakariya u tsala ra vumbirhi: “Yehova o ri.” Xana hi wahi marito ya Yehovha sweswi? “Nḍi [ta] tlhelela e Sion, nḍi ta aka e šikari ka Yerusalem; Yerusalem o ta v̌uriwa muti wa v̌unene, nṭhav̌a ya Yehova wa tinyimpi yi v̌uriwa nṭhav̌a le’yi nga hlawuleka!” (Zakariya 8:3) Emahlweni ka 607 B.C.E., Yerusalema a wu nga ri wona muti wa vunene nikatsongo. Vaprista ni vaprofeta va wona a va onhakile, naswona vanhu va wona a va nga tshembekanga. (Yeremiya 6:13; 7:29-34; 13:23-27) Sweswi vanhu va Xikwembu a va pfuxeta tempele, va kombisa ku tiboha ka vona eka vugandzeri lebyi tengeke. Hi tlhelo ra moya Yehovha u tlhele a tshama eYerusalema. Ku tlhele ku vulavuriwa hi mintiyiso ya vugandzeri lebyi tengeke eka yena, xisweswo Yerusalema a a ta vuriwa “muti wa v̌unene.” Tindhawu ta yena leti tlakukeke a ti ta vuriwa “nṭhav̌a ya Yehova.”
9. Hi kwihi ku cinca ka xiyimo loku xiyekaka loku veke kona eka “Israyele wa Xikwembu” hi 1919?
9 Hambi leswi switiviso leswi swimbirhi a swi twisiseka eka Israyele wa khale, swa ha ri ni nhlamuselo leyinene eka hina tanihi leswi lembe-xidzana ra vu-20 ri yaka eku heleni. Kwalomu ka malembe ya 80 lama hundzeke, hi nkarhi wa nyimpi yo sungula ya misava, vatotiwa va magidi ma nga ri mangani lava a va fanekisela “Israyele wa Xikwembu” va ye evuhlongeni bya moya, hi laha Israyele wa khale a yeke evuhlongeni ha kona eBabilona. (Vagalatiya 6:16, NW) Hi ndlela ya vuprofeta, a va hlamuseriwa tanihi mintsumbu leyi etleleke exitarateni. Hambi swi ri tano, a va ha ri ni ku navela loku humaka embilwini ko gandzela Yehovha “hi moya ni ntiyiso.” (Yohane 4:24) Hikwalaho, hi 1919, Yehovha u va ntshunxile evuhlongeni bya vona, a va susa exiyin’weni xa vona xa ku fa hi tlhelo ra moya. (Nhlavutelo 11:7-13) Xisweswo, Yehovha u hlamule xivutiso xa vuprofeta xa Esaya hi Ina la twakalaka: “Šana tiko ri nga tŝariwa hi siku riṅwe šana? Šana tiko ri nga v̌elekiwa kaṅwe”? (Esaya 66:8) Hi 1919, vanhu va Yehovha va tlhele va va kona tanihi tiko ra moya ‘etikweni’ ra vona vini, kumbe exiyin’weni xa moya emisaveni.
10. Ku sukela hi 1919, hi yihi mikateko leyi Vakreste va vatotiwa a va ri karhi va yi kuma ‘etikweni’ ra vona?
10 Vatotiwa va Vakreste va tirhe etempeleni leyikulu ya moya ya Yehovha va hlayisekile etikweni rolero. Va hlawuriwe tanihi “nandza la tshembekaka, wo tlhariha,” va amukela vutihlamuleri byo khathalela swilo swa Yesu swa laha misaveni, ku nga lunghelo leri va ha tiphinaka hi rona tanihi leswi lembe-xidzana ra vu-20 ri tshinelelaka makumu ya rona. (Matewu 24:45-47) Va yi dyondze kahle dyondzo ya leswaku Yehovha i “Xikwembu xa ku rhula.”—1 Vatesalonika 5:23.
11. Xana varhangeri va Vujagana va tikombise va ri valala va vanhu va Xikwembu hi ndlela yihi?
11 Kambe, ku vuriwa yini hi valala va Israyele wa Xikwembu? Ku hisekela ka Yehovha vanhu va yena ku kombisiwa hi vukarhi bya yena ehenhla ka vakaneti. Hi nkarhi wa nyimpi yo sungula ya misava, varhangeri va vukhongeri va Vujagana va ringete ku tshikilela swinene—ivi va tsandzeka—ni ku herisa ntlawa lowu lowutsongo wa Vakreste lava vulavulaka ntiyiso. Hi nkarhi wa nyimpi ya vumbirhi ya misava, vafundhisi va Vujagana a va hlanganile eka xilo xin’we ntsena: Eka matlhelo hamambirhi ya lava lwaka, va khutaze tihulumendhe ku sivela Timbhoni ta Yehovha. Hambi ku ri namuntlha, ematikweni yo tala varhangeri va vukhongeri va hlohlotela tihulumendhe ku sivela kumbe ku yirisa ntirho wo chumayela wa Vukreste wa Timbhoni ta Yehovha.
12, 13. Xana vukarhi bya Yehovha byi kombisiwa hi ndlela yihi ehenhla ka Vujagana?
12 Yehovha u swi xiyile leswi. Endzhaku ka nyimpi yo sungula ya misava, Vujagana xikan’we na Babilona Lonkulu, swi wile. (Nhlavutelo 14:8) Mintiyiso ya ku wa ka Vujagana yi tiviwe erivaleni, ku sukela hi 1922, loko ku chululeriwe ntlhandlamano wa makhombo yo fanekisela, lama xi paluxeke erivaleni xiyimo xa yena xa ku fa hi tlhelo ra moya ni ku tlhela ma tsundzuxa hi ku lovisiwa ka yena loku taka. (Nhlavutelo 8:7–9:21) Tanihi vumbhoni bya leswaku ku chuluriwa ka makhombo ka ha ya emahlweni, nkulumo leyi nge “Makumu Ya Vukhongeri Bya Mavunwa Ma Tshinele” yi nyikeriwe emisaveni hinkwayo hi April 23, 1995, ivi yi landzeriwa hi ku hangalasiwa ka madzana ya timiliyoni ya tikopi ta nkandziyiso wo hlawuleka wa Kingdom News.
13 Namuntlha, Vujagana byi le xiyin’weni lexi terisaka vusiwana. Eka lembe-xidzana ra vu-20 hinkwaro, swirho swa byona swi dlayanile eka tinyimpi leti chavisaka leti katekisiweke hi vaprista ni vafundhisi va byona. Ematikweni man’wana nkucetelo wa byona a wu nyawuli. Byi ya eku loveni xikan’we na Babilona Lonkulu.—Nhlavutelo 18:21.
Ku Rhula Eka Vanhu Va Yehovha
14. Hi xihi xivono lexi hlamuseriwaka hi marito ya vuprofeta, xa vanhu lava nga eku rhuleni?
14 Hi hala tlhelo, eka lembe leri ra 1996, vanhu va Yehovha va tiphina hi ndzalo ya ku rhula etikweni ra vona leri vuyeteriweke, hi laha swi hlamuseriweke ha kona eka xitiviso xa vunharhu xa Yehovha: “Yehova wa tinyimpi o ri: Ku ta v̌a ni v̌av̌anuna ni v̌av̌asati la’v̌akulu la’v̌a nga ta ṭhamisa mindyangweni ya Yerusalem kukotisa khale, uṅwana ni uṅwana a khomile nhonga e v̌okweni ra yena, hikwalaho ka ku dyuhala ngopfu; miṭenḍele ya muti yi ta tala v̌arisanyana ni v̌anhwanyana la’v̌a tlangaka kona.”—Zakariya 8:4, 5.
15. Ku nga khathariseki tinyimpi ta matiko, hi kwihi ku rhula loku tsakeriweke hi malandza ya Yehovha?
15 Xivono lexi xo tsakisa lexi hlamuseriwaka hi marito lawa xi kombisa nchumu wun’wana lowu xiyekaka emisaveni leyi leyi hlaseriweke hi nyimpi—vanhu lava nga le ku rhuleni. Ku sukela hi 1919, marito lawa ya vuprofeta bya Esaya ma hetisekile: “Ku rula, ku rula e ka loyi a nge kule, ni ka loyi a nge kusuhi! Nḍi ta v̌a hanyisa. Kambe . . . a ku na ku rula e ka la’v̌o biha, ku v̌ula Šikwembu ša mina.” (Esaya 57:19-21) Kavula, vanhu va Yehovha, hambi leswi va nga riki xiphemu xa misava, a va nge ku papalati ku khumbiwa hi minkitsikitsi ya matiko. (Yohane 17:15, 16) Ematikweni man’wana, va tiyisela ku nonon’hweriwa lokukulu, naswona va nga ri vangani va dlayiwile. Kambe, Vakreste va xiviri va ni ku rhula hi tindlela timbirhi letikulu. Yo sungula, va ni “ku rhula ni Xikwembu, hi Hosi ya [vona] Yesu Kreste.” (Varhoma 5:1) Ya vumbirhi, va ni ku rhula exikarhi ka vona vini. Va hlakulela “vutlhari byo ta hi le henhla,” lebyi nga ni “ku rhula, ni ku olova.” (Yakobo 3:17; Vagalatiya 5:22-24) Tlhandlakambirhi, va langutele ku tiphina hi ku rhula hi ndlela leyi hetisekeke swinene loko “v̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.”—Pisalema 37:11.
16, 17. (a) Xana “v̌av̌anuna ni v̌av̌asati la’v̌akulu” ku katsa ni “v̌arisanyana ni v̌anhwanyana” va tiyise nhlengeletano ya Yehovha hi ndlela yihi? (b) I yini lexi kombisaka ku rhula ka vanhu va Yehovha?
16 Ka ha ri ni “v̌av̌anuna ni v̌av̌asati la’v̌akulu” exikarhi ka vanhu va Yehovha, vatotiwa lava tsundzukaka ku hlula ko sungula ka nhlengeletano ya Yehovha. Vutshembeki ni ku tiyisela ka vona swi tlangeriwa swinene. Vatotiwa lava a va ha ri vantshwa va rhangerile hi nkarhi wa masiku lama hisaka ya va-1930, ni le nkarhini wa Nyimpi ya Vumbirhi ya Misava ku katsa ni le ka malembe lama tsakisaka ya ku kula loku landzeleke. Ku tlula kwalaho, ngopfu-ngopfu hi 1935, “ntshungu lowukulu” wa “tinyimpfu tin’wana” wu sungule ku vonaka. (Nhlavutelo 7:9; Yohane 10:16) Tanihi leswi Vakreste lava totiweke va kuleke naswona va nga ha riki vangani, tinyimpfu tin’wana ti rhangerile entirhweni wo chumayela naswona ti wu ndlandlamuxe wu ya emisaveni hinkwayo. Emalembeni ya sweswinyana tinyimpfu tin’wana a ti ri karhi ti khitikanela etikweni ra vanhu va Xikwembu. Phela, lembe leri nga hundza ntsena, ku khuvuriwe vanhu va 338 491 va kombisa ku tinyiketela ka vona eka Yehovha! Vanhu vo tano va ha ri vantshwa swinene, hi tlhelo ra moya. Vuntshwa bya vona ni ku hiseka ka vona i ka nkoka loko va ri karhi va engetela vanhu lava va yimbelelaka swidzuniso leswi tsakisaka “eka Xikwembu xa hina lexi tshameke exiluvelweni, ni le ka Xinyimpfana!”—Nhlavutelo 7:10.
17 Namuntlha, ‘mitsendzele yi tele hi majaha ni vanhwanyana,’ Timbhoni leti hisekaka ku fana ni vantshwa. Eka lembe ra ntirho ra 1995, ku amukeriwe swiviko leswi humaka ematikweni ya 232 ni le swihlaleni swa lwandle. Kambe a ka ha ri na nkwetlembetano wa matiko hinkwawo, a ku nga ri na rivengo exikarhi ka tinxaka, a ku nga ri na mavondzo lama nga fanelangiki exikarhi ka vatotiwa ni tinyimpfu tin’wana. Hinkwavo va kula swin’we emoyeni, va hlanganisiwe hi rirhandzu. Vumakwerhu bya misava hinkwayo bya Timbhoni ta Yehovha byi hlawulekile hakunene emisaveni leyi.—Vakolosa 3:14; 1 Petro 2:17.
Xana Swa N’Wi Nonon’Hwela Yehovha?
18, 19. Emalembeni lama sukelaka eka 1919, xana Yehovha u swi hetisise njhani leswi swi nga ha vaka swi tikombe swi nonon’hwa ku swi endla hi ku ya hi langutelo ra munhu wa nyama?
18 Le ndzhaku hi 1918 loko masalela ya vatotiwa ma ri magidi ma nga ri mangani ntsena ya mimoya-xiviri leyi hetiweke matimba, leyi a yi ri evuhlongeni bya moya, a ku ri hava loyi a ta vona ka ha ri emahlweni ndlela leyi swilo a swi ta hetelela swi yime ha yona. Hambi swi ri tano, Yehovha a a swi tiva—hi laha swi tiyisiweke ha kona hi xitiviso xa yena xa vuprofeta xa vumune lexi nge: “Yehova wa tinyimpi o ri: Ni loko mhaka leyi yi nga nonoṅhwa e mahlweni ka masalela ya tiko leri e masikwini wolawo, šana ni le ka mina yi nga nonoṅhwa-ke, ku v̌ula Yehova wa tinyimpi?”—Zakariya 8:6.
19 Hi 1919, moya wa Yehovha wu vuyetele vanhu va yena entirhweni lowu wa ha saleke. Hambi swi ri tano, a swi lava ripfumelo leswaku munhu a khomelela swi tiya enhlengeletanweni leyi leyitsongo ya vagandzeri va Yehovha. A va nga talanga, naswona swilo swo tala a swi nga si twisisiwa. Hambi swi ri tano, hakatsongo-tsongo Yehovha u va tiyisile tanihi nhlengeletano, a tlhela a va hlomisela ku endla ntirho wa Vukreste wo chumayela mahungu lamanene ni ku endla vadyondzisiwa. (Esaya 60:17, 19; Matewu 24:14; 28:19, 20) Hakatsongo-tsongo, u va pfune ku twisisa timhaka ta nkoka to tanihi vukala-tlhelo ni vuhosi bya vuako hinkwabyo. Xana a swi n’wi nonon’hwela Yehovha ku hetisisa ku rhandza ka yena hi ku tirhisa ntlawanyana wolowo lowutsongo wa Timbhoni? Hakunene nhlamulo i e-e! Leswi swi tiyisiwe eka matluka 12 ku ya ka 15 ya magazini lowu, lama kombisaka chati ya ntirho wa Timbhoni ta Yehovha eka lembe ra ntirho ra 1995.
“Mina Nḍi [Ta] V̌a Šikwembu Ša V̌ona”
20. Xana ku hlengeletiwa ka vanhu va Xikwembu ku vhumbhiwe leswaku a ku ta kula ku fikela kwihi?
20 Xitiviso xa vuntlhanu xi ya emahlweni xi kombisa xiyimo xa ntsako xa Timbhoni ta Yehovha namuntlha xi ku: “Yehova wa tinyimpi o ri: V̌onani, nḍi ta ponisa v̌anhu v̌a mina e tikweni ra v̌uša, ni le v̌usikwini; nḍi v̌a tisa, v̌a ta aka Yerusalem, ri ta v̌a tiko ra mina, mina nḍi v̌a Šikwembu ša v̌ona hi v̌unene ni ku lulama.”—Zakariya 8:7, 8.
21. Xana ndzalo ya ku rhula ka vanhu va Yehovha yi hlayisiwe ni ku ndlandlamuxiwa hi ndlela yihi?
21 Hi 1996 hi nga vula handle ko kanakana leswaku mahungu lamanene ma chumayeriwile emisaveni hinkwayo, ku suka “etikweni ra v̌uša” ku ya fika eka ra le “v̌usikwini.” Ku endliwe vadyondzisiwa lava humaka ematikweni hinkwawo, naswona va ku vonile ku hetiseka ka xitshembiso xa Yehovha lexi nge: “V̌ana v̌a wena v̌a šinuna hikwav̌o v̌a ta v̌a v̌adyondzisiwa v̌a Yehova, ku rula ka v̌ona ku v̌a lo’kukulu.” (Esaya 54:13) Hi ni ku rhula hikuva hi dyondzisiwa hi Yehovha. Leswaku ku fikeleriwa leswi, tibuku ti kandziyisiwe hi tindzimi to tlula 300. Lembe leri nga hundza ntsena, ku engeteleriwe tindzimi ta 21. Magazini wa Xihondzo xo Rindza sweswi wu kandziyisiwa hi nkarhi wun’we hi tindzimi ta 111, kasi Xalamuka! yona hi tindzimi ta 54. Mintsombano ya tiko ni ya matiko hinkwawo yi nyikela xikombiso xa le rivaleni xa ku rhula ka vanhu va Xikwembu. Minhlangano ya vhiki na vhiki ya hi hlanganisa ni ku hi nyika xikhutazo lexi hi xi lavaka leswaku hi tshama hi tiyile. (Vaheveru 10:23-25) Ina, Yehovha u dyondzisa vanhu va yena hi “v̌unene ni ku lulama.” U nyika vanhu va yena ku rhula. Mawaku ndlela leyi hi katekeke ha yona leswi hi hlanganyelaka eku rhuleni koloko ko tala!
Xana U Nga Hlamusela?
◻ Eminkarhini ya manguva lawa, xana Yehovha u ve ni ‘rilondzo hi vukarhi lebyikulu’ evanhwini va yena hi ndlela yihi?
◻ Xana vanhu va Yehovha va ku kuma njhani ku rhula, hambi ku ri ematikweni lama hlaseriweke hi tinyimpi?
◻ Xana ‘mitsendzele yi tele hi varisanyana ni vanhwanyana’ hi ndlela yihi?
◻ Hi wahi malunghiselelo lama endliweke leswaku vanhu va Yehovha va dyondzisiwa hi yena?
[Chati leyi nga eka tluka 12-15]
XIVIKO XA NTIRHO WA LEMBE RA 1995 WA TIMBHONI TA YEHOVHA EMISAVENI HINKWAYO
(See bound volume)
[Xifaniso lexi nga eka tluka 8, 9]
Hi lembe-xidzana ra vutsevu B.C.E., Vayuda lava tshembekeke lava pfuxeteke tempele va dyondze leswaku Yehovha hi yena ntsena xihlovo lexi tshembekaka xa ku rhula