Langutani Vanhu Va Vutshembeki Lebyi Tiyeke!

“I mani la nga ta ka a nga ku chavi, we Hosi, i mani la nga ta ala ku twarisa vito ra wena ke? Hi wena ntsena loyi a kwetsimeke.”—NHLAVUTELO 15:4.

1. Hi byihi vumbhoni lebyi J. F. Rutherford a byi nyikeleke malunghana ni vutshembeki lebyi tiyeke bya loyi a n’wi tlhandlameke, ku nga C. T. Russell?

JOSEPH F. RUTHERFORD, loyi a tlhandlameke C. T. Russell tanihi muungameri wa Sosayiti ya Watch Tower hi 1917, u vulavule enkosini wa Russell hi ku sungula a ku: “Charles Taze Russell a a tshembeke hi laha ku tiyeke eka Xikwembu, eka Kreste Yesu, eka fambiselo ra mfumo wa Mesiya. A a tshembeke swinene—ina, a tshembeke hambi ku ri ku fikela eku feni.” Entiyisweni, yeleyo a ku ri minkhenso leyinene yo yi vula malunghana ni nandza la tshembekaka wa Yehovha Xikwembu. Ku hava ku nkhensa loku hi nga ku nyikaka munhu wihi na wihi ku tlula ku vula leswaku u hlangavetane ni ndzingo wo hlayisa vutshembeki hi laha ku humelelaka, leswaku a a tshembekile—a tshembeke swinene.

2, 3. (a) Ha yini vutshembeki lebyi tiyeke byi ri ntlhontlho? (b) I vamani lava na vona va hlomeleke ku lwisana ni Vakreste va ntiyiso eka matshalatshala ya vona yo tshembeka hi laha ku tiyeke?

² Ku hlayisa vutshembeki i ntlhontlho. Ha yini? Hikuva vutshembeki lebyi tiyeke byi lwisana ni ku tilavela swa wena n’wini. Lavakulu exikarhi ka lava nga tshembekangiki eka Xikwembu i vafundhisi va Vujagana. Kambe, a ku si tshama ku va ni ku andza lokukulu ko pfumala vutshembeki ku fana ni le ka vuxaka bya vukati namuntlha. Vuoswi byi tele. Nakambe ku nga tshembeki ku tele exivandleni xa mabindzu. Malunghana ni leswi, ha byeriwa: “Vafambisi va mabindzu ni vatshila vo tala . . . va vula leswaku i swihunguki ni lava xisekaka hi ku olova ntsena lava tshembekaka hi laha ku tiyeke eka tikhampani ta vona namuntlha.” Vanhu lava “tshembekeke hi laha ku tiyeke” va languteriwa ehansi. Muungameri wa feme leyi dyondzisaka vanhu ku fambisa bindzu ni leyi endlaka vulavisisi, u ri: “Ku tshembeka hi laha ku tiyeke lokukulu ni loku ku nga kona ntsena i ku tshembeka eka wena hi wexe.” Hambiswiritano, ku vulavula hi ku tshembeka hi laha ku tiyeke eka wena hi wexe, i ku onha nhlamuselo ya rito leri. Leswi swi hi tsundzuxa leswi tsariweke eka Mikiya 7:2: “Munhu lo’nene o lov̌ile misav̌eni.”

³ Hi mpimo lowukulu swinene, Sathana ni madimona yakwe va lwisana na hina, va tiyimisele ku hi endla hi nga tshembeki eka Xikwembu. Hi yona mhaka leyi Vakreste va byeriwaka eka Vaefesa 6:12: “A hi lwi ni vanhu va misava leyi, kambe hi lwa ni mimoya leyo biha leyi nge henhla emimpfhukeni: Hi lwa ni tindhuna, ni vafumi, ni tihosi leti fumaka ta nguva leyi ya munyama.” Ina, hi fanele hi yingisa xitsundzuxo lexi: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka.”—1 Petro 5:8.

4. Hi yihi mimboyamelo leyi endlaka ku tshembeka hi laha ku tiyeke swi nonon’hwa?

⁴ Nakambe lexi endlaka ku tshembeka hi laha ku tiyeke swi nonon’hwa, i mimboyamelo ya vutianakanyi leyi hi yi kumeke tanihi ndzhaka eka vatswari va hina, hi laha swi boxiweke ha kona eka Genesa 8:21: “Makungu ya timbilu ta v̌anhu ma bihile”—naswona va ni vutianakanyi—“ku suka v̌uhlangini bya v̌ona.” Hinkwerhu hi ni xiphiqo lexi muapostola Pawulo a vuleke leswaku a a ri na xona: “Leswinene leswi ndzi navelaka ku swi endla, a ndzi swi endli, kambe leswo biha leswi ndzi nga naveliki ku swi endla, ndza swi endla.”—Varhoma 7:19.

Vutshembeki Lebyi Tiyeke I Nchumu Lowu Hlawulekeke

5, 6. Xana ku nga vuriwa yini malunghana ni leswi ku tshembeka hi laha ku tiyeke ku nga swona, naswona xana ku hlamuseriwe hi ndlela yihi?

⁵ “Vutshembeki lebyi tiyeke” i rito leri hlawulekeke swinene. Xisweswo Insight on the Scriptures yi ri: “Ku vonaka ku nga ri na marito ya Xinghezi lawa ma yi vulaka kahle nhlamuselo leyi kongomeke ya marito ya Xiheveru ni ya Xigriki, kambe xiga lexi nge ‘vutshembeki lebyi tiyeke,’ ku katsa ni mianakanyo ya ku tinyiketela ni ku tshembeka, hi laha swi nga ha kona, loko xi tirhisiwa malunghana ni Xikwembu ni ntirho wa xona, xa swi kota ku nyikela nhlamuselo leyi nga kusuhi.”a Malunghana ni “vutshembeki lebyi tiyeke” Xihondzo xo Rindza xi tshame xi ku: “Vutshembeki, vutihlamuleri, rirhandzu, ndzhwalo ni vutinyiketeri. Xana marito lawa ma na yini lexi xi fanaka? I swivumbeko swo hambana swa ku tshembeka.” Ina, ku ni vunene byo tala lebyi nga swivumbeko swo hambana swa vutshembeki lebyi tiyeke. Hakunene ku tele eMatsalweni laha vutshembeki lebyi tiyeke ni ku lulama swi fambisanaka kona.

⁶ Leswi pfunaka nakambe i tinhlamuselo leti landzelaka: ‘Vutshembeki lebyi tiyeke byi nga ha kombisa ku tshembeka ni ku tinyiketela loku hambetaka ni loku tshembekaka, loku nga tsekatsekiki kumbe ku ringeka.’ ‘Vutshembeki lebyi tiyeke swi vula ku tshembeka eka leswi munhu a swi vuleke hi ku hlambanya kumbe ku tinyiketela loku hambetaka eka vumbiwa kumbe misinya ya milawu leyi munhu a titwaka a bohekile eka yona; rito leri a ri ringanyeti ku namarhela ntsena kambe ri katsa ni ku ala ku yengiwa ni ku kuceteriwa leswaku u tshika lexi u namarheleke eka xona.’ Xisweswo, vanhu lava hambetaka va tshembeka ku nga khathariseki miringo, ku kanetiwa ni ku xanisiwa, va faneriwa hi ku vuriwa lava “tshembekeke hi laha ku tiyeke.”

7. Hi kwihi ku hambana loku nga endliwaka exikarhi ka ku tshembeka hi laha ku tiyeke ni ku tshembeka ntsena?

⁷ Hambiswiritano, emhakeni leyi swi nga ha va swinene ku fanisa ku hambana loku nga kona exikarhi ka ku tshembeka loku tiyeke ni ku tshembeka ntsena. Le vupela-dyambu bya United States, ku ni ximbyaru-mbyaru lexi humesaka mati awara yin’wana ni yin’wana. Swi endleka nkarhi na nkarhi lerova va kale va xi thya Mutshembeki wa Khale. Bibele yi vulavula hi swilo swo tano leswi nga hanyiki, swo kota n’weti, yi ku wa tshembeka, hikuva wa tshembeka. Pisalema 89:37 yi vulavula hi n’weti tanihi “mboni le’yi nge matilweni ya [ku] ṭhembeka.” Marito ya Xikwembu ku vuriwa leswaku ma tshembeka. Nhlavutelo 21:5 yi ri: “Loyi a tshameke exiluvelweni a ku: ‘Vonani, ndzi endla swilo hinkwaswo swi va leswintshwa.’ A engeta a ku: ‘Tsala, hikuva marito lawa ma tshembekile, ma ni ntiyiso.’” Hinkwaswo leswi swi tshembekile, swa tshembeka, kambe a swi na vuswikoti bya ku tinyiketela kumbe ku va ni timfanelo ta mahanyelo, to tanihi ku tshembeka loku tiyeke.

Yehovha, Mutshembeki La Tiyeke La Hlamarisaka

8. Hi byihi vumbhoni bya Matsalwa lebyi kombisaka xikombiso lexinene ngopfu xa vutshembeki lebyi tiyeke?

⁸ Handle ko kanakana, Yehovha Xikwembu i xikombiso lexinene ngopfu xa ku tshembeka loku tiyeke. Yehovha u tshembekile swinene erixakeni ra vanhu, u nyikele ni hi N’wana wa yena leswaku vanhu va ta kuma vutomi lebyi nga heriki. (Yohane 3:16) Eka Yeremiya 3:12, ha hlaya: “Tlhela, Israel muhunḍuki, ku v̌ula Yehova; nḍi nga ka nḍi nga ku khwanyaleri mombo, hikuv̌a mina [ndza tshembeka, NW].” Xin’wana lexi nakambe xi nyikelaka vumbhoni bya ku tshembeka loku tiyeke ka Yehovha, i marito lama tsariweke eka Nhlavutelo 16:5: “Wena, Loyi a nga kona ni loyi a ri kona, Loyi a tshembekaka, u lulamile.” (NW) Kutani nakambe, eka Pisalema 145:17, hi byeriwa leswi: “Yehova o lulamile tindleleni ta yena hikwato, [wa tshembeka, NW] e mitirweni ya yena hikwayo.” Entiyisweni, Yehovha wa hlamarisa eka vutshembeki bya yena lebyi tiyeke lerova Nhlavutelo 15:4 yi ri: “I mani la nga ta ka a nga ku chavi, we Hosi, i mani la nga ta ala ku twarisa vito ra wena ke? Hi wena ntsena loyi a [tshembekaka, NW].” Yehovha Xikwembu u tshembeka hi mpimo lowu tlakukeke swinene.

9, 10. Hi yihi rhekhodo ya vutshembeki lebyi tiyeke leyi Yehovha a yi endleke eku tirhisaneni ka yena ni rixaka ra Israyele?

⁹ Matimu ya tiko ra Israyele, ngopfu-ngopfu, ma ni vumbhoni lebyi teleke bya ku tshembeka loku tiyeke ka Yehovha eka vanhu va yena. Emasikwini ya Vaavanyisi, Israyele u tshike vugandzeri bya ntiyiso nkarhi na nkarhi, kambe Yehovha u va twele vusiwana, a va ponisa, hi ku phindha-phindha. (Vaavanyisi 2:15-22) Eka malembe-xidzana hinkwawo ya ntlhanu lawa ha wona Israyele a a ri ni tihosi, Yehovha u kombise vutshembeki bya yena lebyi tiyeke eka rixaka rolero.

¹⁰ Vutshembeki bya Yehovha lebyi tiyeke byi n’wi endle leswaku a lehisela vanhu va yena mbilu, hi laha swi tsariweke ha kona eka 2 Tikronika 36:15, 16: “Yehova, Šikwembu ša v̌atata wa v̌ona, a v̌a layile e mikarini le’yo tala hi tinṭumi ta yena, hikuv̌a a a ranḍa ku ponisa tiko ra yena ni v̌uako bya yena. Kambe a v̌a rukana tinṭumi ta Šikwembu, v̌a sanḍa marito ya šona, v̌a hleka v̌aprofeta v̌a šona, v̌ukari bya Yehova byi ko byi pfuka tiko ra yena ŝonghasi leŝaku ku nga ha v̌i na ku ponisiwa.”

11. Hi xihi xitiyisekiso kumbe nchavelelo lowu vutshembeki lebyi tiyeke bya Yehovha byi hi nyikaka wona?

¹¹ Hikwalaho ka leswi Yehovha a tshembekeke hi ndlela leyi tlakukeke, muapostola Pawulo u tsarile, hi laha swi rhekhodiweke ha kona eka Varhoma 8:38, 39: “Ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.” Ina, Yehovha wa hi tiyisekisa: “Ndzi nga ka ndzi nga ku tshiki, kumbe ku ku cukumeta, ni siku ni rin’we.” (Vaheveru 13:5) Hakunene, swa tsakisa ku tiva leswaku minkarhi hinkwayo Yehovha Xikwembu u tshembeke hi laha ku tiyeke!

Yesu Kreste, N’wana La Tshembekaka Hi Laha Ku Tiyeke

12, 13. Hi byihi vumbhoni lebyi hi nga na byona malunghana ni vutshembeki lebyi tiyeke bya N’wana wa Xikwembu?

¹² La tekeleleke Yehovha hi laha ku heleleke eku hlangavetaneni ni ntlhontlho wa vutshembeki lebyi tiyeke a ku ri Yesu Kreste naswona ka ha ri yena. A swi fanerile leswaku muapostola Petro a tshaha Pisalema 16:10 ivi a yi tirhisela eka Yesu Kreste eka Mintirho 2:27: “We Hosi, u nge ndzi rivali exivandleni xa vafi, u nge tshiki [mutshembeki, NW] wa wena a hela hi ku bola.” Yesu Kreste swa n’wi fanela leswaku a vuriwa “mutshembeki.” U tshembeke hi laha ku tiyeke eka Tata wa yena ni le ka Mfumo lowu tshembisiweke wa Xikwembu, hi ku helela. Sathana u rhange hi ku ringeta ku tshova vutshembeki bya Yesu hi ku tirhisa miringo, a n’wi komba swilo leswi nga n’wi vuyerisaka. Loko a tsandzekile, Diyavulosi u tirhise nxaniso, eku heteleleni a endla leswaku Yesu a fa emhandzini ya nxaniso. Yesu a nga kalanga a hambuka eka vutshembeki bya yena lebyi tiyeke eka Tata wa yena wa le tilweni, Yehovha Xikwembu.—Matewu 4:1-11.

¹³ Yesu Kreste a a tshembeke hi laha ku tiyeke eka valandzeri va yena hi ku landza xitshembiso lexi tsariweke eka Matewu 28:20: “Vonani, ndzi na n’wina masiku hinkwawo, ku ko ku hela misava.” Leswaku a hetisisa xitshembiso xolexo, u ye emahlweni hi ku tshembeka a rhangela vandlha ra yena ku sukela hi Pentekosta ya 33 C.E. ku fikela sweswi.

Vanhu Lava Nga Hetisekangiki Lava A Va Tshembeke Hi Laha Ku Tiyeke

14. Hi xihi xikombiso xa vutshembeki lebyi tiyeke lexi Yobo a xi vekeke?

¹⁴ Sweswi, ku vuriwa yini hi vanhu lava nga hetisekangiki? Xana va nga tshembeka hi laha ku tiyeke eka Xikwembu? Hi ni mhaka leyi xiyekaka ya Yobo. Sathana u endle mphikamakaneta yi va erivaleni emhakeni ya yena. Xana Yobo a a tshembeke hi laha ku tiyeke eka Yehovha Xikwembu kumbe o n’wi tirhela ntsena hikwalaho ko lava ku vuyeriwa ntsena? Sathana u tibume hi leswaku a nga hambukisa Yobo eka Yehovha hi ku xanisa Yobo. Loko Yobo a lahlekeriwe hi swilo swa yena hinkwaswo, vana va yena hinkwavo hambi ku ri rihanyo ra yena, nsati wa yena u n’wi khongoterile a ku: “Rukana Šikwembu, u fa!” Kambe Yobo a a tshembeke hi laha ku tiyeke, hikuva u vule leswi eka yena: “U v̌ulav̌ula kukotisa šihunguki loko ši v̌ulav̌ula. Šana hi ta amukela le’ŝo saseka e mav̌okweni ya Šikwembu, hi nga amukeri ŝo biha-ke? E timhakeni toleto hikwato Yobo a nga dyohanga hi nomu wa yena.’’ (Yobo 2:9, 10) Entiyisweni, eka lava a va ta va vachaveleri va yena, Yobo u te: “Hambileswi [Xikwembu] xi ndzi dlayaka, kambe ndzi ta tshembela eka xona.” (Yobo 13:15, New International Version) A swi hlamarisi leswi Yobo a amukeriweke hi Yehovha! Hikwalaho, Yehovha u byele Elifasi wa le Temani a ku: “V̌ukari bya mina byi pfurele wena ni v̌anakuloni la’v̌ambiri, hikuv̌a a mi v̌ulanga ŝa mina ŝinene kukotisa Yobo, nanḍa wa mina.”—Yobo 42:7, 10-16; Yakobo 5:11.

15. Hi byihi vumbhoni bya Matsalwa lebyi hi nga na byona malunghana ni vutshembeki lebyi tiyeke bya malandza yo tala ya Yehovha Xikwembu?

¹⁵ Hinkwavo vavanuna ni vavasati va ripfumelo lava hlamuseriwaka eka Vaheveru ndzima 11 ku nga vulavuriwa hi vona tanihi lava tshembekeke hi laha ku tiyeke. A va nga tshembekanga ntsena kambe va tshembeke hi laha ku tiyeke ni loko va langutane ni mintshikilelo. Xisweswo, hi hlaya hi lava “hi mhaka ya ku pfumela . . . va pfa[leke] milomo ya tinghala. Va timile mindzilo leyo leva, va pona ku tlhaviwa hi mabanga . . . Van’wana va xanisiwile hi ku hlekuriwa ni ku biwa, hambi ku ri ku bohiwa hi tinketani, va hoxiwa ekhotsweni. Va khandliwile hi maribye, va pulukanyisiwile hi le xikarhi hi ku sahiwa, va dlayiwile hi mabanga, va famba-famba hinkwako va ambele madzovo ya tinyimpfu ni ya timbuti, va swerile va ri emaxangwini, va twisiwa ku vaviseka.”—Vaheveru 11:33-37.

16. Hi xihi xikombiso xa vutshembeki lebyi tiyeke lexi muapostola Pawulo a xi nyikeleke?

¹⁶ Matsalwa ya Xigriki ya Vukreste na wona ma nyikela xikombiso lexi xiyekaka xa muapostola Pawulo. Hi laha ku fanelaka a a ta vula leswi eka Vakreste va le Tesalonika malunghana ni vutirheli bya yena a ku: “Mi timbhoni ta hina na xona Xikwembu i mbhoni: Mahanyelo ya hina eka n’wina lava pfumeleke, a ma ri lawa yo tenga ni lawa yo lulama, ma nga ri na nandzu.” (1 Vatesalonika 2:10) Hi ni vumbhoni lebyi engetelekeke bya ku tshembeka loku tiyeke ka Pawulo emaritweni ya yena lama tsariweke eka 2 Vakorinto 6:4, 5, laha hi hlayaka: “Etimhakeni hinkwato hi tikombile hi ri malandza ya Xikwembu hi ku tiyisela ka hina lokukulu emaxangwini, ni le ku karhatekeni, ni le mahlomulweni; eku biweni, ni le makhotsweni, ni le madzolongeni; emintirhweni leyo tika, ni le ku pfumaleni ka vurhongo, ni le ku titsoneni ka swakudya.” Hikwaswo leswi swi tiyisa vumbhoni bya leswaku muapostola Pawulo a a xiximiwa hikwalaho ka leswi a a tshembeke hi laha ku tiyeke.

Lava Tshembekeke Hi Laha Ku Tiyeke eMinkarhini Ya Manguva Lawa

17. Hi wahi marito ya J. F. Rutherford lama kombiseke ku tiyimisela kakwe ku tshembeka hi laha ku tiyeke?

¹⁷ Loko hi ta eminkarhini ya hina ya manguva lawa, hi ni xikombiso lexinene lexi ana se xi hlamuseriweke eku sunguleni ka xihloko lexi. Xiya leswi vuriweke ebukwini leyi nge Nsirhelelo Wa Misava Hinkwayo Ehansi Ka “Hosana Ya Ku Rhula,” eka tluka 146 ehansi ka xihlokwana lexi nge “Vutshembeki eNkarhini Wa Ku Khotsiwa.” Kwalaho ku vuriwe leswi: “Ku kombisa vutshembeki eka nhlengeletano ya Yehova enkarhini wa ku khotsiwa kakwe, muungameri wa Sosayiti ya Watch Tower, Joseph F. Rutherford, hi December 25, 1918, u tsale leswi landzelaka: ‘Hikuva ndzi arile ku landzula kun’we na Babilona, kambe ndzi ringetile ku tirhela Hosi ya mina hi ku tshembeka, ndzi le khotsweni, leswi ndzi swi nkhensaka. . . . Ndzi hlawula ku amukeriwa hi Yena ivi ndzi n’wayitela ndzi ri ekhotsweni, ku tlula ku landzula kumbe ku amukela hi Xivandzana ivi ndzi ntshunxeka kutani ndzi amukeriwa emisaveni hinkwayo.’”b

18, 19. Hi swihi swikombiso leswi xiyekaka swa vutshembeki lebyi tiyeke swa minkarhi ya manguva lawa leswi hi nga na swona?

¹⁸ Hi ni swikombiso leswi hlamarisaka swa vutshembeki lebyi tiyeke eka Vakreste van’wana vo tala lava tiyiseleleke ku xanisiwa. Exikarhi ka vanhu volavo vo tshembeka hi laha ku tiyeke ku ni Timbhoni ta Yehovha ta le Jarimani emfun’weni wa Manazi, leti kombisiweke eka vhidiyo ya Purple Triangles, leyi hangalasiweke swinene hi ririmi ra Xinghezi. Nakambe lava xiyekaka i Timbhoni ta Yehovha to tala ta le Afrika leti tshembekeke hi laha ku tiyeke, to tanihi letiya ta le Malawi. Kwalaho, murindzi un’wana wa khotso u tiyise vumbhoni bya ku tshembeka loku tiyeke ka Timbhoni, a ku: “A va nge landzuli. Vo ya va andza.”

¹⁹ Munhu a nge ti hlayi ti-Yearbook of Jehovah’s Witnesses ta sweswinyana, ivi a nga tsakisiwi hi vutshembeki lebyi tiyeke lebyi kombisiweke hi Vakreste va ntiyiso, vo tanihi lavaya va le Greece, Mozambhiki na Poland. Vo tala va vona va xanisiwe hi ndlela leyi vavisaka swinene; van’wana va dlayiwile. Tluka 177 ra 1992 Yearbook ri kombisa xifaniso xa vavanuna va kaye va Vakreste le Etopiya lava hlangavetaneke ni ntlhontlho wo hlayisa vutshembeki lebyi tiyeke ku fikela loko va dlayiwa. Tanihi Timbhoni ta Yehovha, xana a hi tsaki ku va ni swikombiso swo tala leswinene leswi hi khutazaka ku hlangavetana ni ntlhontlho wo hlayisa vutshembeki lebyi tiyeke?

20. I yini leswi humelelaka loko hi tshama hi tshembeke hi laha ku tiyeke?

²⁰ Hi ku ala miringo ni mintshikilelo hi ku tshembeka hi laha ku tiyeke, hi tiendla lava xiximekaka. Kutani, xana hi lava ku kumiwa hi ri eka tlhelo ra mani eka mphikamakaneta leyi yo hlayisa vutshembeki lebyi tiyeke? Hi ku hlangavetana ni ntlhontlho wo hlayisa vutshembeki lebyi tiyeke, hi yima etlhelweni ra Yehovha Xikwembu eka mphikamakaneta leyi kutani hi kombisa Sathana Diyavulosi a ri muhembi wo nyenyetsa, la hombolokeke tanihi leswi ana a nga tano! Hikwalaho hi kuma ku amukeriwa hi Muvumbi wa hina, Yehovha Xikwembu, ni hakelo ya vutomi lebyi nga heriki entsakweni. (Pisalema 37:29; 144:15b) Leswi lavekaka eku hlangavetaneni ni ntlhontlho wo hlayisa vutshembeki lebyi tiyeke swi ta kaneriwa exihlokweni lexi landzelaka.

[Tinhlamuselo ta le hansi]

A Wu Ta Hlamurisa Ku Yini?

◻ Ha yini ku tshembeka hi laha ku tiyeke ku ri ntlhontlho?

◻ Ha yini ku nga vuriwaka leswaku “ku tshembeka hi laha ku tiyeke” i xiga lexi hlawulekeke swinene?

◻ Hi swihi swikombiso swa le Matsalweni leswi hi nga na swona swa vanhu lava nga hetisekangiki lava a va tshembeke hi laha ku tiyeke?

◻ Hi swihi swikombiso leswinene swa manguva lawa swa vutshembeki lebyi tiyeke leswi hi nga na swona?

[Xifaniso lexi nga eka tluka 11]

Charles Taze Russell

[Xifaniso lexi nga eka tluka 12]

Yesu hakunene a a ri “mutshembeki” wa Yehovha

[Xifaniso lexi nga eka tluka 13]

Yobo, hambileswi a a nga hetisekanga, u tikombe a ri la tshembekeke hi laha ku tiyeke eka Xikwembu

[Xifaniso lexi nga eka tluka 14]

Pawulo u veke xikombiso lexinene xa vutshembeki lebyi tiyeke eka Yehovha