Tlangela Xitsundzuxo Hi Ndlela Ya Kona

AKU ri hi madyambu ya Nisan 14, 33 C.E., laha Yesu a simekeke Xitsundzuxo.a A ha ku heta ku tlangela nkhuvo wa Paseka ni vaapostola va yena va 12, kutani hi nga tiyiseka hi siku ra kona. Endzhaku ko hlongola Yudasi wa muxengi, Yesu “a teka xinkwa, kutani loko a nkhensile, a xi phema, a nyika vadyondzisiwa, a ku: ‘Tekani; leswi i miri wa mina.’ Kutani a teka xinwelo, a nkhensa, a va nyika xona; va nwela ka xona hinkwavo. A ku ka vona: ‘Leswi i ngati ya mina, ngati ya ntwanano, leyi halateriwaka lavo tala.’”—Marka 14:22-24.

Yesu u lerise vadyondzisiwa va yena ku tlangela rifu ra yena hikwalaho ka nkoka wa rona. (Luka 22:19; 1 Vakorinto 11:23-26) Rifu ra yena a ku ri rona ntsena gandzelo leri a ri ta kota ku kutsula vanhu eka ndzhukano wa xidyoho lexi kumiweke hi ndzhaka ni rifu. (Varhoma 5:12; 6:23) Xinkwa ni vhinyo leswi a swi tirhiseke a swi fanekisela miri wa yena lowu hetisekeke ni ngati ya yena. Hikwalaho ka leswi hi tivaka siku ra kona ro sungula, hi tlangela xiendlakalo lexi hi siku leri fambelanaka na rona kan’we hi lembe, hilaha a swi endliwa ha kona hi Paseka ya Vayuda. Kambe hi fanele hi endla tano hi ndlela ya kona. Hikwalaho ka yini?

Muapostola Pawulo u vule leswaku lava hlanganyelaka eka xinkwa ni vhinya swo fanekisela va ta “vula rifu ra Hosi, yi kondza yi ta.” (1 Vakorinto 11:26, xiitaliki i xerhu.) Xisweswo nkhuvo lowu wu ta va wu kombetela eka rifu ra Yesu ni leswi ri vulaka swona eka vanhu. Xiendlakalo lexi xi ta va xi ri xa nkoka, nkarhi wo kombisa vunene bya Xikwembu ni ku tlangela loku hi faneleke hi va na kona eka Yehovha ni le ka N’wana wakwe. (Varhoma 5:8; Tito 2:14; 1 Yohane 4:9, 10) Hikwalaho, Pawulo u tsundzuxile: “Hikokwalaho, un’wana ni un’wana la dyaka xinkwa lexi, kumbe la nwelaka exinwelweni xa Hosi hi mukhuva lowu nga lulamangiki, ú ta va ni nandzu wo dyohela miri ni ngati ya Hosi.”—1 Vakorinto 11:27.

Hi Ndlela Ya Kona—Njhani?

Handle ko kanakana, Xikwembu a xi nge tsaki loko hi thyakisa xiendlakalo lexi hi ku hlanganyela eka mikhuva leyi nga amukelekiki kumbe ku tekelela mikhuva ya vuhedeni. (Yakobo 1:27; 4:3, 4) Leswi a swi ta sivela swiendlakalo leswi tolovelekeke swa Easter. Hi ku landzela xileriso xa Yesu xo ‘endla leswi hi ku n’wi anakanya,’ hi lava ku tlangela Xitsundzuxo hilaha a xi simekeke ha kona. (Luka 22:19; 1 Vakorinto 11:24, 25) Leswi a swi ta sivela swivumbeko leswi engeteriweke hi tikereke ta Vujagana eku tlangeleni loku. New Catholic Encyclopedia ya pfumela leswaku “Masa ya namuntlha yi hambane swinene ni nkhuvo wo olova swinene lowu a wu endliwa hi Kreste ni Vaapostola va Yena.” Naswona hi ku tlangela Masa nkarhi na nkarhi, hambi ku ri siku na siku, Vujagana byi hambukile eka leswi Yesu a swi endleke naswona va xi endle xiendlakalo lexi tolovelekeke.

Pawulo u tsalele Vakreste va le Korinto malunghana ni ku hlanganyela hi ndlela leyi nga riki yona hikuva a ku pfuke xirhalanganya evandlheni mayelana ni Xilalelo xa Hosi. Van’wana a va nga ku xiximi ku kwetsima ka xona. A va ta ni swakudya swa vona swo lalela ivi va swi dya emahlweni kumbe hi nkarhi wa nhlangano. Hakanyingi a va dya va tlhela va nwa ku tlula mpimo. Leswi swi va endle va khudzehela ni ku va humba mano. Hikokwalaho ko ka va nga xalamukanga emianakanyweni ni hi tlhelo ra moya, a va nga “vonisisi swinene ta miri wa Hosi” naswona xisweswo va ve ni “nandzu wo dyohela miri ni ngati ya Hosi.” Hi nkarhi lowu fanaka, lava a va nga ri na swona swakudya swo lalela a va khomiwa hi ndlala ivi na vona va hambuka. Ku hava ni un’we wa vona loyi a ri exiyin’weni xo dya swifanekiselo hi ku tlangela ni ku xiya nkoka wa xiendlakalo hi laha ku teleke—leswaku nkhuvo a wu ri wo tsundzuka rifu ra Hosi. Leswi swi va tisele ku avanyisiwa, hikuva a va kombisa ku delela, hambi ku ri ku xi sandza.—1 Vakorinto 11:27-34.

Ku Twisisa Ka Laveka

Van’wana va dye swifanekiselo swa Xitsundzuxo hambileswi endzhaku va swi xiyeke leswaku a va nga fanelanga va endle tano. Lava dyaka swifanekiselo swa Xitsundzuxo hi mukhuva wa kona va hlawuriwe hi Xikwembu naswona va ni vumbhoni bya moya wa Xikwembu emhakeni yoleyo. (Varhoma 8:15-17; 2 Vakorinto 1:21, 22) A hi xiboho xa vona hi voxe kumbe ku tiyimisela ka vona vini loku va endlaka va faneleka. Xikwembu xi pime nhlayo ya lava nga ta fuma na Kreste ematilweni yi va 144 000, leyi ku nga nhlayo yitsongo loko yi ringanisiwa ni hinkwavo lava vuyeriwaka hi nkutsulo wa Kreste. (Nhlavutelo 14:1, 3) Nhlawulo wu sungule esikwini ra Yesu, hikokwalaho, namuntlha a hi vangani lava dyaka. Naswona tanihileswi van’wana va vona va yaka va fa, nhlayo yoleyo yi fanele yi hunguteka.

Xana munhu a nga dya swifanekiselo hi mukhuva lowu nga lulamangiki hikwalaho ka swivangelo swihi? Ku nga ha va ku ri hikwalaho ka langutelo ra vukhongeri ra nkarhi lowu hundzeke—ra leswaku hinkwavo lavo tshembeka va ya etilweni. Kumbe ku nga ha va ku ri hi ku navela kumbe ku va ni vutitivi—ku titwa ka leswaku munhu wa faneleka ku tlula van’wana—ni ku navela xikhundlha. Kumbexana swi vangiwa hi mintlhaveko ya matimba leyi vangiwaka hi swiphiqo leswikulu kumbe maxangu lama endlaka munhu a lahlekeriwa hi ku navela vutomi emisaveni. Swi nga ha tlhela swi vangiwa ni hi ku va ni vuxaka bya le kusuhi ni loyi a nga ni ku vitaniwa ka le tilweni. Hinkwerhu hi fanele hi tsundzuka leswaku xiboho xi endliwa hi Xikwembu ntsena, ku nga ri hina. (Varhoma 9:16) Kutani loko munhu, ‘endzhaku ko tikambela,’ a kuma leswaku hakunene a a nga fanelanga a dya swifanekiselo, sweswi u fanele a tshika.—1 Vakorinto 11:28.

Ntshembo lowu Xikwembu xi wu nyikeke vanhu vo tala i wa vutomi lebyi nga heriki emisaveni ya paradeyisi. Wolowo i nkateko lowukulu lowu hi faneleke ku wu langutela, ni lowu hi nga wu tsakelaka hi ku olova. (Genesa 1:28; Pisalema 37:9, 11) Hi laha misaveni laha lavo tshembeka va nga ta tlhela va hlangana ni varhandziwa va vona lava pfuxiweke eku feni naswona va ta hlangana ni vanhu vo lulama va le minkarhini ya khale, vo kota Abrahama, Sara, Muxe, Rahava, Davhida na Yohane Mukhuvuri—lava hinkwavo ka vona va feke emahlweni ka ku va Yesu a pfula ndlela ya vutomi bya le tilweni.—Matewu 11:11; ringanisa 1 Vakorinto 15:20-23.

Lava nga ni mintshembo ya laha misaveni va tlangela Xilalelo xa Hosi hi ndlela ya kona hi ku va kona ka vona ni ku yingisela ka vona hi xichavo, hambileswi va nga dyiki xinkwa ni vhinyo. Na vona va vuyeriwa hi gandzelo ra Kreste, leri va endlaka va va ni xiyimo lexinene emahlweni ka Xikwembu. (Nhlavutelo 7:14, 15) Loko va ri karhi va yingisela nkulumo leyi nyikeriwaka, ku tlangela ka vona swilo leswo kwetsima ka tiyisiwa, naswona ku navela ka vona ko tshama va ri ni vun’we ni vanhu va Xikwembu ka kula hinkwako-nkwako.

Lembe leri, endzhaku ka ku pela ka dyambu hi Ravumbirhi, April 2, Xitsundzuxo xi ta tlangeriwa emavandlheni hinkwawo yo tlula 78 000 ya Timbhoni ta Yehovha emisaveni hinkwayo. Xana u ta va kona?

[Nhlamuselo ya le hansi]

[Xifaniso lexi nga eka tluka 8]

Timbhoni ta Yehovha ti tlangela Xitsundzuxo kan’we hi lembe