Xana Wa Nyenyiwa?

IYINI leswi nyimpi ya rixaka, ku hlawuriwa hi rixaka, ku ya hi nghohe, rinyenyo ni ku herisiwa ka rixaka swi fanaka ha xona? Hinkwaswo i vuyelo bya mboyamelo lowu tolovelekeke wa vanhu—ku nga xihlawuhlawu!

Xihlawuhlawu i yini? Nsonga-vutivi wun’wana wu xi hlamusela tanihi “mianakanyo leyi sunguriwaka hi munhu a nga tinyikanga nkarhi kumbe ku tiyimisela ku avanyisa hi vunene.” Tanihi vanhu lava nga hetisekangiki, hi tala ku voyamela eka xihlawuhlawu hi mpimo wo karhi. Kumbexana u nga ha ehleketa nkarhi lowu u nga tshama u fikelela makumu ya mhaka kambe u nga ri na vumbhoni lebyi heleleke. Bibele yi pimanisa mboyamelo wolowo wa xihlawuhlawu ni ndlela leyi Yehovha Xikwembu a avanyisaka ha yona. Yi ri: “Yehova a nga languti le’ŝi langutiwaka hi v̌anhu, hikuv̌a v̌anhu v̌a languta ngohe, kambe Yehova o languta mbilu.”—1 Samuwele 16:7.

Xihlawuhlawu Xi Nga Ku Vavisa

Handle ko kanakana munhu un’wana ni un’wana u tshame a avanyisiwa hi ndlela yo biha hi un’wana hi nkarhi wo karhi. (Ringanisa Eklesiasta 7:21, 22.) Hi ntolovelo, hinkwerhu ka hina ha nyenyiwa. Hambiswiritano, loko mianakanyo ya xihlawuhlawu yo bakanyeriwa etlhelo hi xihatla a yi nge onhi nchumu. I ku fukameriwa ka mianakanyo yo tano loku nga onhaka. Ku nga hi kanganyisa leswaku hi pfumela mavunwa. Hi xikombiso, ehansi ka nkucetelo wa xihlawuhlawu, vanhu van’wana va pfumela hakunene leswaku munhu a nga va ni makolo, vulolo, vuphunta, kumbe ku tikukumuxa ntsena hikuva a ri wa vukhongeri, rixaka kumbe tiko ro karhi.

Minkarhi yo tala ku avanyisa koloko ko biha ku endla leswaku van’wana va khomiwa hi ku ya hi nghohe, hi tihanyi kumbe hambi ku ri ku vavisiwa. Timiliyoni ta vanhu ti lahlekeriwe hi vutomi bya tona eku dlayiweni ka vanhu vo tala hi xitshuketa, ku herisiwa ka rixaka, tinyimpi ta rixaka, ni swivumbeko swin’wana swa xihlawuhlawu lexi tlulaka mpimo.

Emisaveni hinkwayo, tihulumendhe ti lwe ni xihlawuhlawu hi ku tiyisekisa ku nga onhiwi ka mfanelo yo kuma ntshunxeko, nsirhelelo ni ku ringanana, hi nawu. Loko u hlaya vumbiwa kumbe nhlengeleto wa milawu ya tiko ra ka n’wina, handle ko kanakana u ta kuma xiga kumbe ndzulamiso lowu endleriweke ku sirhelela malunghelo ya vaaka-tiko hinkwavo, ku nga khathariseki rixaka, rimbewu kumbe vukhongeri. Hambiswiritano, xihlawuhlawu ni ku hlawuriwa hi rixaka swi hangalake ni misava hinkwayo.

Xana wa nyenyiwa? Xana u tshama u lumbetiwa leswaku u ni makolo, vulolo, vuphunta kumbe ku tikukumuxa ntsena hikwalaho ka rixaka, vukhale, rimbewu, tiko, kumbe vukhongeri bya wena? Xana u tsoniwa lunghelo ra dyondzo leyinene, ntirho, yindlu ni mpfuno wa tiko hikwalaho ka xihlawuhlawu? Loko swi ri tano, xana u nga langutana njhani ni xiyimo lexi?

[Xifaniso lexi nga eka tluka 3]

Ku fukamela xihlawuhlawu ku vanga rivengo ra rixaka

[Xihlovo Xa Kona]

Nina Berman/Sipa Press