Swivutiso Swa Vahlayi
Xana hi nga vula leswaku malandza ya Xikwembu ya namuntlha, lama nga ni ntshembo wo hanya emisaveni ma ni moya wa Xikwembu hi mpimo lowu fanaka ni wa Vakreste lava totiweke hi moya?
Xivutiso lexi a hi ro sungula xi vutisiwa. Mhaka leyi fanaka ku vulavuriwe hi yona eka The Watchtower ya April 15, 1952 eka “Swivutiso Swa Vahlayi.” Va tele lava veke Timbhoni ku sukela hi nkarhi wolowo, hikokwalaho hi nga tlhela hi langutisa xivutiso lexi, hi pfuxeta leswi nga tshama swi vuriwa hi xihloko xo sungula.
Kahle-kahle, nhlamulo i, ina, vamakwerhu lavo tshembeka va xinuna ni va xisati va ntlawa wa tinyimpfu tin’wana va nga kuma moya lowo kwetsima wa Xikwembu hi mpimo lowu ringanaka ni wa vatotiwa.—Yohane 10:16.
Hambiswiritano, leswi, a swi vuli swona leswaku moya lowu wu tirha hi ndlela leyi fanaka eka vanhu hinkwavo. Anakanya hi malandza ya nkarhi lowu hundzeke ya le mahlweni ka nkarhi wa Vukreste, lama hakunene ma nga amukela moya wa Xikwembu. Hi matimba lama humaka eka moya lowu, man’wana ya wona ma dlaye swivandzana swo leva swinene, ma hanyise lava vabyaka, hambi ku ri ku pfuxa lava feke. Ma tlhele ma lava moya lowu leswaku ma ta kota ku tsala matsalwa lama huhuteriweke ya Bibele. (Vaavanyisi 13:24, 25; 14:5, 6; 1 Tihosi 17:17-24; 2 Tihosi 4:17-37; 5:1-14) The Watchtower yi te: “Hambileswi lava a va nga ri vatotiwa, kambe va tatiwe hi moya lowo kwetsima.”
Hi tlhelo rin’wana, anakanya hi vavanuna ni vavasati va lembe-xidzana ro sungula lava nga totiwa hi moya lowo kwetsima, va va vana va Xikwembu va moya lava nga ni ntshembo wa le tilweni. Hinkwavo ka vona a va totiwile, kambe leswi a swi vuli swona leswaku moya lowu wu tirhe hi ndlela leyi fanaka eka hinkwavo. Leswi swi le rivaleni eka 1 Vakorinto ndzima 12. Kwalaho muapostola Pawulo u hlamusela tinyiko ta moya lowu. Hi hlaya leswi eka ndzimana 8, 9 na 11: “Un’wana ú nyikiwe hi Moya ku vulavula swa vutlhari, un’wana ú nyikiwa ku vulavula swa vutivi, hi ku ya hi Moya wolowo; un’wana ú nyikiwa ku pfumela hi Moya lowu, un’wana kambe ú kuma nyiko yo hanyisa vanhu hi Moya wolowo wun’we kambe hinkwaswo leswi i ntirho wa Moya wolowo wun’we, lowu avelaka tinyiko to hambana eka munhu un’wana ni un’wana hilaha wu rhandzaka hakona.”
Xisweswo, vatotiwa van’wana va nkarhi wolowo a va ti kumanga tinyiko ta moya to endla masingita. Eka 1 Vakorinto ndzima 14, Pawulo u vulavula hi nhlangano wa vandlha lowu eka wona a ku ri ni munhu un’we loyi a a ri ni nyiko ya ku vulavula hi tindzimi, kambe ku ri hava exikarhi ka vona la nga ni nyiko ya ku hundzuluxela. Hambiswiritano eka nkarhi wun’wana lowu hundzeke, un’wana ni un’wana wa vona a a totiwe hi moya lowu. Xana swi nga twakala ku vula leswaku makwerhu loyi a nga ni nyiko ya ku vulavula hi tindzimi a a ri ni moya lowu engetelekeke ku tlula van’wana lava a va ri kona kwalaho? A swi tano. Vatotiwa volavo van’wana a va nga kayiveri swokarhi, onge hiloko va tsandzeka ku twisisa Bibele ku fana ni makwerhu yoloye kumbe va tsandzeka ku langutana ni mindzingo ku fana ni van’wana. Moya lowu a wu tirha hi ndlela yo hlawuleka eka makwerhu loyi a a kota ku vulavula hi tindzimi. Kambe, yena ni lava van’wana a va fanele va tshama ekusuhi na Yehovha naswona va tshama va ‘tale moya’ tanihi laha Pawulo a tsaleke ha kona.—Vaefesa 5:18.
Mayelana ni lava va masalela namuntlha, va wu amukerile moya wa Xikwembu hakunene. Enkarhini wun’wana wu va tirhise hi ndlela yo hlawuleka—hi nkarhi lowu va totiweke ha wona kutani va amukeriwa tanihi vana va moya. Endzhaku ka sweswo va hambete va “tala moya,” va amukela mpfuno wa wona loko va lava ku twisisa Bibele ku antswa, loko va lava ku rhangela entirhweni wo chumayela, kumbe loko va langutane ni miringo—ya munhu hi yexe kumbe leyi khumbaka nhlengeletano.
Hambileswi swirho swa “tinyimpfu tin’wana” swi nga si tshamaka swi totiwa, swa wu amukela moya lowo kwetsima hi ndlela yo karhi. The Watchtower ya April 15, 1952, yi te:
“‘Tinyimpfu tin’wana’ namuntlha ti endla ntirho lowu fanaka wa ku chumayela ku fana ni masalela, ti ri ehansi ka swiyimo leswi fanaka swo tika, naswona ti kombisa vutshembeki ni ku tiyisela loku fanaka. Va dyela etafuleni rin’we ra moya, va dya swakudya leswi fanaka, va amukela mintiyiso leyi fanaka. Leswi va nga va ntlawa wa la misaveni, va ri ni ntshembo wa la misaveni ni ku navela lokukulu ka swilo swa la misaveni, va nga ha tsakela swinene matsalwa lama vulavulaka hi swiyimo swa misava emisaveni leyintshwa; kasi masalela lama totiweke, lama nga ni ntshembo wa le tilweni, naswona ma tsakela swinene swilo swa moya, wona ma nga ha hisekela ku dyondza hi swilo swa moya eRitweni ra Xikwembu. . . . Kambe ntiyiso hi leswaku mintlawa leyi hayimbirhi ka yona yi amukela mintiyiso leyi fanaka ni ku twisisa loku fanaka, kambe swi titshege hileswaku ha un’we wa vona u dyondza swilo swa le tilweni ni swa la misaveni hi mpimo wo tanihi kwihi ni leswaku va twisisa leswi va swi dyondzaka. Moya wa Hosi wu kumeka hi mpimo lowu ringanaka eka mintlawa hayimbirhi ka yona, naswona vutivi ni ku twisisa swi nyikiwa hi ku ringanana eka mintlawa hayimbirhi, xikan’we ni minkarhi leyi ringanaka ya ku swi amukela.”