‘Hlawulekani eMahanyelweni Hinkwawo Ya N’wina’

“Leswi loyi a nga mi vitana a hlawulekeke, hlawulekani na n’wina emahanyelweni hinkwawo ya n’wina. Hikuva ku tsariwile va ku: ‘Hlawulekani, hikuva mina ndzi hlawulekile.’”—1 PETRO 1:15, 16.

1. Ha yini Petro a khutaza Vakreste leswaku va kwetsima?

HA YINI muapostola Petro a nyikele ndzayo leyi nga laha henhla? Hikuva u vone xilaveko xo va Mukreste un’wana ni un’wana a hlayisa mianakanyo ni swiendlo swa yena swi fambisana ni ku kwetsima ka Yehovha. Xisweswo, u tsale marito lawa emahlweni ka ku va a tsala lama nga laha henhla a ku: “Pfukani emiehleketweni! Tikhomeni! . . . Tanihi vana lava nga ni ku yingisa, mi nga landzi ku navela ka n’wina loko biha loku a mi ri na kona mi nga si tiva nchumu.”—1 Petro 1:13, 14.

2. Ha yini ku navela ka hina a ku nga kwetsimanga loko hi nga si dyondza ntiyiso?

² Ku navela ka hina ko sungula a ku nga hlawulekanga. Ha yini? Hikuva vo tala va hina a hi landzelela ndlela ya swiendlo swa misava emahlweni ka ku va hi amukela ntiyiso wa Vukreste. Petro a swi tiva leswi loko a swi veka erivaleni hi ku tsala a ku: “Tshikani ku endla leswi tsakeriwaka hi vamatiko, . . . swi ringene loko mi swi endlile eminkarhini leyi hundzeke. Khale a mi hanya hi ku endla swa manyala, hi ku navela ku titsakisa, hi ku pyopyiwa, ni makolo, ni ku va swilovekelo, ni ku gandzela swikwembu swa hava leswi nga lavekiki.” Kavula, Petro a nga yi boxanga mintirho leyi nga kwetsimangiki leyi tolovelekeke emisaveni ya hina ya manguva lawa, tanihi leswi a yi nga tiviwi hi nkarhi wolowo.—1 Petro 4:3, 4.

3, 4. (a) Xana hi nga lwisana njhani ni ku navela loko biha? (b) Xana Vakreste va fanele va nga vi na yona mintlhaveko? Hlamusela.

³ Xana u swi xiyile leswaku ku navela loku hi loku tsakisaka nyama, switwi ni mintlhaveko? Loko hi swi pfumelela swi hi fuma, hi ku olova mianakanyo ni swiendlo swa hina swi ta va leswi nga kwetsimangiki. Leswi swi kombisa xilaveko xo pfumelela matimba ya ku anakanya ku va ma lawula swiendlo swa hina. Pawulo u swi veke hi ndlela leyi: “Loko swi ri tano vamakwerhu, ndza mi khongotela hikwalaho ka tintswalo ta Xikwembu, leswaku mi nyiketa vutomi bya n’wina hinkwabyo, byi va mhamba leyi hanyaka, leyi hlawulekeke, leyi amukelekaka eka Xikwembu; hi wona magandzelele ya n’wina ya xiviri.”—Varhoma 12:1, 2.

⁴ Leswaku hi yisa gandzelo leri kwetsimaka eka Xikwembu, hi fanele hi pfumelela matimba ya ku anakanya ma hi lawula, ku nga ri ya mintlhaveko. Wa nga vona leswaku i vanhu vangani lava katsekeke eka ku tikhoma loko biha hikwalaho ka ku va va pfumelele mintlhaveko ya vona yi lawula mahanyelo ya vona! Xana sweswo a swi vuli swona leswaku mintlhaveko ya hina yi fanele yi lawuriwa; handle ka swona ntsako hi ta wu komba hi ndlela yihi entirhweni wa Yehovha? Hambiswiritano, loko hi lava ku humesa mihandzu ya moya ematshan’weni ya mintirho ya nyama, kutani hi fanele hi endla mianakanyo ya hina yi anakanya ku fana ni ya Kreste.—Vagalatiya 5:22, 23; Vafilipiya 2:5.

Vutomi Lebyi Kwetsimaka, Nxavo Lowu Kwetsimaka

5. Ha yini Petro a karhateka swinene hi xilaveko xo kwetsima?

⁵ Ha yini Petro a a kharhateka hi xilaveko xa ku kwetsima ka Vukreste? Hikuva a wu xiye kahle nxavo lowo kwetsima lowu hakeriweke wo ponisa vanhu lava yingisaka. U tsarile: “Ma swi tiva leswaku mi kutsuriwile eka tindlela leti nga pfuniki nchumu, leti mi ti kumeke eka vatata wa n’wina; mi kutsuriwile ku nga ri hi swilo leswi onhakaka ku fana ni silivhere kumbe nsuku, kambe hi ngati ya nkoka ya Kriste, leyi fanaka ni ya xinyimpfana lexi nga riki na vulema kumbe xivati.” (1 Petro 1:18, 19) Ina, Xihlovo xa ku kwetsima, Yehovha Xikwembu, u rhumele N’wana wa yena la tswariweke a ri swakwe, “Muhlawuleki,” leswaku a ta emisaveni a ta nyikela nkutsulo lowu a wu ta pfumelela vanhu leswaku va va ni vuxaka lebyinene na Xikwembu.—Yohane 3:16; 6:69; Eksoda 28:36; Matewu 20:28.

6. (a) Ha yini swi nga hi oloveli ku hlayisa ku tikhoma loku kwetsimaka? (b) I yini lexi nga hi pfunaka ku hlayisa ku tikhoma ka hina ku tengile?

⁶ Hambiswiritano, hi fanele hi swi xiya leswaku a swi olovi ku hanya vutomi lebyi kwetsimaka exikarhi ka misava leyi onhakeke ya Sathana. U vekela Vakreste va ntiyiso mintlhamu, lava ringetaka ku hanya emafambiselweni ya yena ya swilo. (Vaefesa 6:12; 1 Timotiya 6:9, 10) Mintshikilelo ya ntirho wo tihanyisa, ku kanetiwa hi vandyangu, ku hlekuriwa exikolweni ni ntshikilelo wa tintangha, swi lava leswaku vumoya lebyi tiyeke byi va bya nkoka eka munhu leswaku a hlayisa vukwetsimi. Sweswo swi kandziyisa xiphemu xa nkoka xa dyondzo ya hina ya munhu hi xiyexe ni ku va kona ka hina eminhlanganweni ya Vukreste nkarhi na nkarhi. Pawulo u laye Timotiya: “Landza ntila wa marito lama tiyeke ya xiviri, lawa u ma tweke eka mina, eku pfumeleni ne rirhandzwini leri nga ka Kriste Yesu.” (2 Timotiya 1:13) Ha ma twa marito wolawo lama nyikaka rihanyo eHolweni ya hina ya Mfumo ni le dyondzweni ya hina hexe ya Bibele. Ma nga hi pfuna leswaku hi kwetsima eku tikhomeni ka hina ka siku na siku eswiyin’weni swo tala swo hambana-hambana.

Ku Tikhoma Loku Kwetsimaka eNdyangwini

7. Xana ku kwetsima ka hina ku fanele ku byi khumba njhani vutomi bya hina bya ndyangu?

⁷ Loko Petro a tshahe Levhitika 11:44, u tirhise rito ra Xigriki leri nge haʹgi·os, leri vulaka, “loyi a hambaneke ni xidyoho kutani a tinyiketela eka Xikwembu, la hlawulekeke.” (An Expository Dictionary of New Testament Words, hi W. E. Vine) Xana leswi swi fanele swi hi khumba hi ndlela yihi evuton’wini bya hina bya ndyangu wa Vukreste? Swi vula leswaku hakunene vutomi bya hina bya ndyangu byi fanele byi sekeriwa erirhandzwini, hikuva “Xikwembu i rirhandzu.” (1 Yohane 4:8) Rirhandzu ra ku tinyiketela i mafurha lama olovisaka vuxaka exikarhi ka vanghana va vukati ni le xikarhi ka vatswari ni vana.—1 Vakorinto 13:4-8; Vaefesa 5:28, 29, 33; 6:4; Vakolosa 3:18, 21.

8, 9. (a) Hi xihi xiyimo lexi minkarhi yin’wana xi vaka kona ekaya ra Vukreste? (b) I ndzayo yihi leyi twalaka leyi Bibele yi yi nyikelaka emhakeni leyi?

⁸ Hi nga ha ehleketa leswaku ku kombisa rirhandzu ro tano, swi ta tiendlekela endyangwini wa Vukreste. Kambe, hi fanele hi swi lemuka leswaku a hi minkarhi hinkwayo laha rirhandzu ri lawulaka ndyangu ku fikela laha a ri fanele ri fika kona emakaya man’wana ya Vakreste. Swi nga ha vonaka onge hi kombisa rirhandzu eHolweni ya Mfumo, kambe vona ndlela leyi ku kwetsima ka hina ku nga ha helaka hi ku olova ha yona loko hi fika ekaya. Kutani hi xitshuketa hi nga ha rivala leswaku wansati wa ha ri makwerhu wa hina wa xisati wa Mukreste kumbe leswaku wanuna wa ha ri makwerhu wa xinuna yaluya (naswona kumbexana nandza wa vutirheli kumbe nkulu) loyi a a faneriwa hi ku xiximiwa eHolweni ya Mfumo. Ha nyangatseka, naswona ku nga sungula ku va ni timholovo letikulu. Vutomi byimbirhi byi nga sungula ku hi nghena hakatsongo-tsongo. A ka ha ri wanuna la fanaka na Kreste la nga ni vuxaka ni wansati kambe i wanuna ni wansati lava kanetanaka. Va rivala leswaku ku fanele ku va ni xiyimo lexi kwetsimaka ekaya. Kumbexana va sungula ku vulavula ku fana ni vanhu va misava. Wa nga vona ndlela leyi swi olovaka ha yona ku vula marito ya ndzhukano, yo sapatela lama nga ha yaka emahlweni ma vuriwa!—Swivuriso 12:18; ringanisa Mintirho 15:37-39.

⁹ Hambiswiritano, Pawulo wa tsundzuxa: “Eku vulavuleni ka n’wina mi nga tshuki mi tirhisa marito ya tingana, [Xigriki, loʹgos sa·prosʹ, “marito lama nyamisaka,” hikwalaho lama nga hlawulekangiki] kambe tirhisani ntsena marito lama pfunaka, lama akisaka ni ku hlamula leswi lavekaka, kutani ku vulavula ka n’wina ku ta tisa nkateko eka lava va mi yingisaka.” Kutani sweswo swi kombetela eka vayingiseri hinkwavo ekaya, ku katsa ni vana.—Vaefesa 4:29; Yakobo 3:8-10.

10. Xana ndzayo leyi khumbaka ku kwetsima yi tirha hi ndlela yihi eka vana?

¹⁰ Naswona nkongomiso lowu wa ku kwetsima wu tirha hilaha ku fanaka eka vana va le ndyangwini wa Vukreste. Wa nga vona ndlela leyi swi va olovelaka ha yona ku vuya ekaya va huma exikolweni ivi va sungula ku encisa mavulavulelo ya vuxandzuki ni ya ku nga xiximi ya tintangha ta vona ta misava! Vana, mi nga kokiwi hi langutelo leri kombisiweke hi vafana lava nga tlharihangiki lava rhukaneke muprofeta wa Yehovha ni lava milomu ya vona yi sandzaka ku fana ni ya vantshwa va namuntlha. (2 Tihosi 2:23, 24) Mavulavulelo ya n’wina a ma fanelanga ma thyakisiwa hi mavulavulelo ya le xitaratini lama rhukanaka ya vanhu lava lolohaka swinene kumbe lava nga riki na mhaka na ku tirhisa marito lama faneleke. Leswi hi nga Vakreste, ku vulavula ka hina ku fanele ku va loku hlawulekeke, loku tsakisa, loku akaka, loku nga ni musa ni loku “nandzihaka.” Ku fanele ku hi hlawula hi ri lava hambaneke ni vanhu van’wana.—Vakolosa 3:8-10; 4:6.

Ku Kwetsima Eku Hanyisaneni Ka Hina Ni Swirho Swa Ndyangu Leswi Nga Riki Vapfumeri

11. Ha yini ku kwetsima ku nga vuli ku tivona hi ri lava lulameke?

¹¹ Loko hi vukheta hi ri karhi hi ringeta ku va lava hlawulekeke, a hi fanelanga hi vonaka hi ri lava titlakusaka ni ku tiendla lava lulameke ku tlula van’wana, ngopfu-ngopfu loko hi tirhisana ni swirho swa ndyangu leswi nga riki vapfumeri. Ku tikhoma ka hina ka musa ka Vukreste ku fanele ku va pfuna ku vona leswaku hi hambanile hi ndlela leyi pfunaka, leswaku ha swi tiva ku kombisa rirhandzu ni ntwela-vusiwana, hilaha Musamariya wa musa wa le xifanisweni xa Yesu a endleke hakona.—Luka 10:30-37.

12. Xana vatekani lava nga Vakreste va nga endla ntiyiso wu va lowu kokaka swinene eka vanghana va vona va vukati hi ndlela yihi?

¹² Petro u kandziyise nkoka wa langutelo lerinene eka swirho swa ndyangu leswi nga riki vapfumeri loko a tsalele vavasati lava nga Vakreste: “Swi tano na n’wina, vavasati lava tekiweke: Titsongahateni eka vanuna va n’wina, leswaku van’wana va nga kokiwa hi mahanyelo ya n’wina vasati va vona, hambiloko va nga yingisi Rito. A va nga byeriwi hi munhu, hikuva va ta vona xichavo xa n’wina ni ku tenga ka mikhuva ya n’wina.” Wansati la nga Mukreste (kumbe wanuna emhakeni yoleyo) a nga endla ntiyiso wu va lowu tsakisaka eka munghana wa vukati la nga riki mupfumeri loko ku tikhoma ka yena ku ri loku tengeke, ka ku anakanyela ni loku xiximekaka. Leswi swi vula leswaku ku fanele ku va ni ku pfumelelana ni swiyimo eka xiyimiso xa swa le tilweni leswaku munghana wa vukati la nga riki mupfumeri a nga titwi a lahlekile kumbe a titwa a honisiwa.a—1 Petro 3:1, 2.

13. Xana minkarhi yin’wana, vakulu ni malandza ya vutirheli va nga va pfuna hi ndlela yihi, vavanuna lava nga riki vapfumeri leswaku va twisisa ntiyiso?

¹³ Vakulu ni malandza ya vutirheli minkarhi yin’wana va nga pfuna hi ku lava ku tiva wanuna la nga riki mupfumeri hi ku va ni vunghana na yena. Hi ndlela leyi a nga ha swi vona leswaku Timbhoni i vanhu lava tolovelekeke, lavanene, lava nga ni swilo swo tala leswi tsakisaka, ku katsa ni timhaka tin’wana handle ka Bibele. Emhakeni yin’wana, nkulu u tsakele xintirhwana xa wanuna un’wana xa ku phasa tinhlampfi. U swi kotile ku herisa xihinga lexi a xi ri kona kutani a sungula vunghana. Wanuna yoloye eku heteleleni u ve makwerhu la khuvuriweke. Emhakeni yin’wana, wanuna la nga riki mupfumeri a tsakela ngopfu tinyenyana leti vuriwaka vusunyani. Vakulu a va lan’wanga. Un’wana wa vona u ye a ya hlaya hi mhaka ya tinyenyana toleto leswaku nkarhi lowu taka loko a hlangana na wanuna loyi, a ta sungula bulo hi mhaka ya yena leyi a yi rhandzaka swinene! Hikwalaho, ku va lava hlawulekeke a swi vuli ku va lava nga pfumelelaniki na swiyimo kumbe ku va ni mianakanyo leyi nga nyawuriki.—1 Vakorinto 9:20-23.

Xana Hi Nga Va Lava Kwetsimaka Hi Ndlela Yihi eVandlheni?

14. (a) Hi rihi endlelo rin’wana ra Sathana ro onha vandlha? (b) Xana hi nga wu ala njhani ntlhamu wa Sathana?

¹⁴ Sathana Diyavulosi i mulumbeti, hikuva vito ra Xigriki leri nge Diyavulosi, di·aʹbo·los, ri vula “muhehli” kumbe “mulumbeti.” Ku lumbeta i byin’wana bya vutshila bya yena lebyikulu, naswona u ringeta ku byi tirhisa evandlheni. Endlelo rakwe leri a ri rhandzaka swinene i rihlevo. Xana hi pfumela ku va swiphukuphuku swa yena hi ku tikhoma loku loku nga hlawulekangiki? Xana sweswo swi nga humelela hi ndlela yihi? Hi ku sungula rihlevo, hi ku ri phindha-phindha, kumbe hi ku ri yingisela. Xivuriso xa vutlhari xi ri: “Munhu wa lunya o byala timholov̌o, muhlev̌i o hambanyisa v̌anakulobye.” (Swivuriso 16:28) I yini murhi wa rihlevo kumbe ku lumbeta? Hi fanele hi tiyiseka leswaku ku vulavula ka hina minkarhi hinkwayo ka aka naswona ku sekeriwe erirhandzwini. Loko hi languta leswinene ematshan’weni ya leswo biha leswi ngo ehleketeleriwa eka vamakwerhu, bulo ra hina ri ta tsakisa ni ku va ra moya nkarhi hinkwawo. Tsundzuka leswaku swa olova ku xopaxopa. Naswona munhu la hlevaka vanhu van’wana eka wena, a nga ha ku hleva eka van’wana na wena!—1 Timotiya 5:13; Tito 2:3.

15. Hi tihi timfanelo leti fanaka ni ta Kreste leti nga ta pfuna ku hlayisa hinkwavo evandlheni va kwetsimile?

¹⁵ Leswaku hi hlayisa vandlha ri kwetsimile, hinkwerhu hi fanele ku va ni mianakanyo ya Kreste, naswona ha swi tiva leswaku mfanelo leyikulu ya yena i rirhandzu. Xisweswo, Pawulo u laye Vakolosa leswaku va va ni ntwela-vusiwana ku fana na Kreste: “Hikokwalaho, leswi mi nga vitaniwa hi Xikwembu ku va vahlawuriwa va xona lava rhandziwaka, ambalani moya wa tintswalo, ni vunene, ni ku titsongahata, ni ku rhula, ni ku leha mbilu . . . , [rivalelanani] . . . Ehenhla ka leswi hinkwaswo, ku laveka rirhandzu, ri nga rona leri ri bohaka swilo hinkwaswo swi twanana hi ku hetiseka.” Kutani u engeterile: “Kutani endlani leswaku ku rhula ka Kriste ku fuma etimbilwini ta n’wina.” Hakunene loko hi ri ni moya lowu wo rivalela, hi nga hlayisa vun’we ni ku kwetsima ka vandlha.—Vakolosa 3:12-15.

Xana Ku Kwetsima Ka Hina Ka Vonaka Eka Vaakelani Va Hina?

16. Ha yini vugandzeri bya hina lebyi kwetsimaka byi fanele byi tsakisa?

¹⁶ Ku vuriwa yini hi vaakelani va hina? Xana va hi languta njhani? Xana hi kombisa ntsako wa ntiyiso, kumbe hi wu endla wu vonaka wu tika? Loko hi kwetsima tanihi leswi Yehovha a kwetsimaka, kutani swi fanele swi vonaka hi mavulavulelo ya hina ni ku tikhoma ka hina. Swi fanele swi va erivaleni leswaku vugandzeri bya hina lebyi kwetsimaka i vugandzeri lebyi tsakisaka. Ha yini swi ri tano? Hikuva Yehovha Xikwembu xa hina i Xikwembu lexi tsakeke, lexi lavaka leswaku vagandzeri va xona va tsaka. Xisweswo, malunghana ni vanhu va Yehovha va le minkarhini ya khale, mupisalema u vule leswi: “Ku katekile tiko leri Yehova a nga Šikwembu ša rona!” Xana hi kombisa ntsako wolowo? Xana vana va hina va kombisa ku tsaka loko va ri exikarhi ka vanhu va Yehovha eHolweni ya Mfumo ni le tinhlengeletanweni?—Pisalema 89:15, 16; 144:15b.

17. I yini lexi hi nga xi endlaka hi ndlela leyi tirhaka leswaku hi kombisa ku kwetsima loku ringaniseriweke?

¹⁷ Hi nga tlhela hi kombisa ku ringanisela eka ku kwetsima ka hina hi ku va ni ntirhisano ni musa eka vaakelani va hina. Minkarhi yin’wana swa fanela leswaku vaakelani va tirhisana, kumbexana va basisa emugangeni kumbe, ku fana ni le matikweni man’wana, ku pfuneta ku antswisa mapato ni mapato lamakulu. Emhakeni leyi, ku kwetsima ka hina ku va erivaleni hi ndlela leyi hi khathalelaka ha yona mintanga, majarati, kumbe swilo swin’wana. Loko hi siya nhulu ya thyaka kumbe majarati ya hina ma nga basanga, kumbexana hambi ku ri timovha ta khale leti onhakeke leti voniwaka hi vahundzi va ndlela, xana hi nga vula leswaku hi khoma vaakelani va hina hi xichavo?—Nhlavutelo 11:18.

Ku Kwetsima eXikolweni Ni Le Ntirhweni

18. (a) Hi xihi xiyimo lexi nonon’hwaka eka Vakreste namuntlha? (b) Xana hi nga va lava hambaneke ni misava hi ndlela yihi?

¹⁸ Muapostola Pawulo u tsalele Vakreste lava nga le mutini lowu nga kwetsimangiki wa Korinto: “Ndzi mi tsalerile epapileni ra mina leswaku mi nga tolovelani ni vaoswi; a ndzi nga vuli nikutsongo ku hambana ni vanhu va misava leyi lava nga vaoswi, kumbe lava nga ni makwanga, kumbe vaxisi, kumbe lava gandzelaka swikwembu swa hava; e-e, hikuva loko mi endla sweswo, a swi ta vula leswaku mi rhurha emisaveni leyi.” (1 Vakorinto 5:9, 10) Lexi i xiyimo lexi nonon’hwaka eka Vakreste, lava faneleke ku hlangana ni vanhu lava tikhomeke hi ndlela yo biha kumbe lava nga tikhomangiki kahle siku na siku. Lowu i ndzingo lowukulu wa ku tshembeka, ngopfu-ngopfu eka mindhavuko ya laha ku hlaseriwa hi tlhelo ra rimbewu, vuhomboloki ni ku nga tshembeki swi khutaziwaka kumbe swi amukelekaka kona. Endhawini leyi a hi nge swi koti ku hunguta mimpimanyeto ya hina leswaku hi ta vonaka hi ri “vanhu lava tolovelekeke” eka lava nga kusuhi na hina. Ematshan’weni ya sweswo, ku tikhoma ka hina ka Vukreste loku nga ni musa kambe loku hambaneke ni ka van’wana ku fanele ku hi endla hi vonaka hi nga fani ni van’wana loko hi langutiwe hi vanhu lava twisisaka, lava tivaka xilaveko xa vona xa moya ni lava languteleke swilo swo antswa.—Matewu 5:3; 1 Petro 3:16, 17.

19. (a) Hi yihi miringo leyi n’wina vana mi langutanaka na yona exikolweni? (b) I yini lexi vatswari va nga xi endlaka leswaku va seketela vana va vona ni ku tikhoma ka vona loko kwetsima?

¹⁹ Hilaha ku fanaka, ku ni miringo yo tala leyi vana va hina va langutaneke na yona exikolweni. Xana n’wina vatswari ma xi endzela xikolo lexi vana va n’wina va dyondzaka ka xona? Xana ma swi tiva leswaku i xiyimo xa muxaka muni lexi nga kona? Xana mi ni vuxaka ni vadyondzisi? Ha yini swivutiso leswi swi ri swa nkoka? Hikuva etindhawini to tala ta le madorobeni emisaveni hinkwayo, swikolo swi hundzuke ndhawu ya madzolonga, swidzidzirisi ni rimbewu. Xana vana va wena va nga hlayisa vutshembeki bya vona ni ku tikhoma ka vona ko kwetsima hi ndlela yihi, loko va nga kumi nseketelo lowukulu wa ntwela-vusiwana eka vatswari va vona? Hilaha ku fanelaka Pawulo u tsundzuxe vatswari a ku: “Vatatana, mi nga hlundzukisi vana va n’wina, leswaku va nga ti hela mbilu.” (Vakolosa 3:21) Ndlela yin’wana yo dyisa vana mbitsi i ku tsandzeka ku twisisa swiphiqo ni miringo ya vona ya siku na siku. Ku va hlomisela ku langutana ni miringo exikolweni, swi sungula exiyin’weni xa vumoya bya kaya ra Vakreste.—Deteronoma 6:6-9; Swivuriso 22:6.

20. Ha yini ku kwetsima ku ri ka nkoka eka hina hinkwerhu?

²⁰ Eku heteleleni, ha yini ku hlawuleka ku ri ka nkoka eka hina hinkwerhu? Hikuva i xisirhelelo xo lwisana ni minhlaselo ya misava ni ku anakanya ka Sathana. I nkateko sweswi ni le nkarhini lowu taka. Ku hi pfuna leswaku hi tiyiseka hi vutomi lebyi nga ta va bya xiviri emisaveni leyintshwa ya ku lulama. Ku hi pfuna ku va Vakreste lava ringaniselaka, lava tshinelelekaka ni lava swi kotekaka ku vulavula na vona—ku nga ri lava nga tsakisiwiki hi nchumu vo pfumala tintswalo. Hi ku komisa, ku hi endla hi fana na Kreste.—1 Timotiya 6:19.

[Nhlamuselo ya le hansi]

Wa Tsundzuka Xana?

◻ Ha yini Petro a vone ku ri ni xilaveko xo laya Vakreste malunghana ni ku kwetsima?

◻ Ha yini swi nga olovi ku hanya vutomi lebyi kwetsimaka?

◻ I yini lexi hinkwerhu ka hina hi nga xi endlaka leswaku hi antswisa ku kwetsima endyangwini?

◻ Leswaku vandlha ri tshama ri kwetsimile, i mahanyelo wahi lama nga hlawulekangiki lawa hi faneleke hi ma papalata?

◻ Xana hi nga va lava kwetsimaka entirhweni ni le xikolweni hi ndlela yihi?

[Swifaniso leswi nga eka tluka 16, 17]

Leswi hi nga Timbhoni ta Yehovha, hi fanele hi tsaka eku tirheleni Xikwembu ni le mintirhweni yin’wana