Xiviko Xa Vahuweleri Va Mfumo

Ku ‘Pfuriwe Nyangwa Ya Ntirho Lowo Saseka’ Ecuba

MUAPOSTOLA Pawulo a a ri muchumayeri la xiyekaka wa mahungu lamanene ya Mfumo wa Xikwembu. U tirhise nkarhi wun’wana ni wun’wana ku avelana ni van’wana switshembiso swa Muvumbi swa vutomi lebyi nga heriki eka vanhu lava yingisaka. Loko a endzele Efesa ya khale, Pawulo u xiye xiyimo lexintshwa lexi a xi ta n’wi pfumelela ku pfuna vanhu vo tala. U te: “Ndza ha ta xwa kwala Efesa . . . . Ndzi pfuleriwe nyangwa ya ntirho lowo saseka.”—1 Vakorinto 16:8, 9.

Timbhoni ta Yehovha eCuba na tona ti ti kume ti ri eswiyin’weni leswintshwa. Hambileswi ti nga si tsarisiwaka ximfumo, Timbhoni sweswi ti kota ku avelana erivaleni hi ntshembo wa Bibele ni vaaka-tiko-kulobye. Sweswinyana, hulumendhe ya le Cuba yi kombise ku tsakela loku tiyeke ka ku pfumelela mintlawa ya vukhongeri byo hambana-hambana leswaku byi tirha byi ntshunxekile. Muungameri Castro u swi veke erivaleni leswaku Timbhoni ta Yehovha i ntlawa wa vukhongeri lowu sweswi wu tsakelaka vuxaka lebyinene ni hulumendhe ya le Cuba.

Xiyimo lexi lexintshwa xi “pfu[le] nyangwa ya ntirho lowo saseka” eka Timbhoni. Hi xikombiso, Timbhoni ta Yehovha ta ha ku pfula rhavi sweswinyana eCuba, leri ri nga ta ti pfuna ku kongomisa ntirho wa tona wa ku chumayela etikweni rero. Timbhoni to tlula 65 000 ti karhi ti pfuna vanhu ku dyondza ni ku twisisa Bibele. Va tirhisa tibuku ta Bibele to fana ni timagazini ta Xihondzo xo Rindza ni Xalamuka! Vunyingi bya Macuba lama voyameleke evuneneni, ma vuyeriwa hi ku dyondza Bibele ni Timbhoni ta Yehovha.

Timbhoni ti tlhela ti khoma minhlangano masiku hinkwawo hi mintlawa leyitsongo exihlaleni hinkwaxo. Minkarhi yin’wana ti tiphina ni hi lunghelo ro khoma tinhlengeletano letikulu ta mintlawa ya kwalomu ka 150. Ti tlangela mpfumelelo hakunene lowu ti nga nyikiwa wona hi valawuri va le Cuba, lowu wu ti nyikaka nkarhi wa ku hlangana ni vamakwavo va xinuna ni vaxisati, ti yimbelelela Xikwembu swidzuniso, ni ku khongela swin’we.

Sweswinyana, ka ha ku khomiwa Ntsombano wa Muganga wa “Ku Xixima Xikwembu” lowu nga yingiseriwa hi vanhu vo tlula 1 000 hi mahelo vhiki manharhu ntsena. Xiviko xin’wana xi vula leswaku “ntshamiseko, vumunhu ni ku rhula” a swi vonaka eka ntsombano wun’wana ni wun’wana. Valawuri va tlangele Timbhoni emhakeni leyi.

Emisaveni hinkwayo, Vakreste va ntiyiso va lwela ku tatisa xileriso lexi va xi nyikiweke hi Xikwembu xa ku chumayela mahungu lamanene ya Mfumo wa Xikwembu. Hi nkarhi lowu fanaka, va lwela ku va ni vuxaka lebyi rhuleke ni valawuri va hulumendhe. (Tito 3:1) Timbhoni ta Yehovha ti landzela ndzayo ya muapostola Pawulo la tsaleke a ku: “Loko swi ri tano, xo sungula, ndzi navela hi matimba leswaku ku kombela, ni ku khongela, ni ku khongelela, ni ku khensa, swi endleriwa vanhu hinkwavo, swi endleriwa ni tihosi, ni hinkwavo lava nge switshan’wini swa le henhla, leswaku hi kota ku hanya vutomi bya ku rhula ni ku tsaka, lebyi nga bya vukhongeri ni lebyi chavisekaka hi matlhelo hinkwawo.”—1 Timotiya 2:1, 2.