Papila Leri Humaka Eka Huvo Leyi Fumaka
Vamakwerhu Lava Rhandzekaka:
I NTSAKO lowukulu eka hina ku mi tsalela papila leri! Ha mi bumabumela hikwalaho ka rirhandzu ni ku tinyiketela loku mi hambetaka mi ku kombisa. Buku Ya Lembe ya nan’waka yi kombisa leswaku mi kulule mi n’watseka hakunene eka lembe leri hundzeke. Eka lembe ra ntirho leri hundzeke hi tlhele hi heta tiawara to tlula gidi ra timiliyoni entirhweni wo chumayela ni ku endla vadyondzisiwa, hi khutaza vanhu hi ku kongoma leswaku va tshinela eka Yehovha. Xana a hi nkateko ku va vatirhi-kulobye na Xikwembu xa hina lexi tlakukeke, ku nga Tata wa hina wa le tilweni?—1 Kor. 3:9.
Loko hi anakanya hi ntirho lowu ha ha langutaneke na wona, hi ni ntshembo leswaku mi ta hambeta mi tekelela moya wa ku hiseka ni ripfumelo ra malandza ya Xikwembu lawa Bibele yi vulavulaka ha wona. Hi xikombiso, muapostola Pawulo a a hisekela ku va la humelelaka swinene eku twariseni ka timhaka ta Mfumo. Swi tikomba onge u tsale papila rakwe ro sungula leri yaka evandlheni ra Vukreste ra le Korinto eka lembe ro hetelela ra nkarhi lowu a wu heteke a ri le Efesa. Malunghana ni makungu yakwe lamantshwa, u tsale a ku: “Ndza ha ta tshama aEfesa kukondza ku fika nkhuvo wa Pentekosta; hikuva ndzi pfulekeriwe hi nyangwa leyikulu leyi yisaka entirhweni, kambe ku ni vakaneti vo tala.”—1 Kor. 16:8, 9.
Pawulo a a kunguhate ku ya eMakedoniya ni le Korinto. Kambe u vone a pfulekeriwe hi nkarhi wo endla ntirho lowu pfunaka, hiloko a tshama nkarhi lowu engetelekeke aEfesa. Pawulo a a fambisana ni swiyimo; u swi vonile leswaku timhaka ta Mfumo a ti ta tswala mihandzu laha a a ri kona, kutani a cinca xiyimiso xa yena. Pawulo u pfulekeriwe hi nyangwa leyikulu ya ntirho wo chumayela, kutani a a tiyimisele ku wu endla hi mbilu ya yena hinkwayo.
Ku endla tano a swi lava matshalatshala lamakulu—ya ku chumayela mahungu lamanene ni ku aka vandlha aEfesa. Pawulo u vule leswi eka vakulukumba va le vandlheni ra le mutini wolowo: “A ndzi tshikanga ku mi byela swilo leswi pfunaka ni ku mi dyondzisa erivaleni ni hi yindlu ni yindlu. Kambe ndzi nyikele vumbhoni hi rixaladza eka Vayuda swin’we ni Magriki malunghana ni ku hundzukela eka Xikwembu ni ku pfumela eka Hosi ya hina Yesu.”—Mint. 20:20, 21.
Hilaha ku fanaka, vo tala va n’wina, vamakwerhu lava rhandzekaka, va tirhise nkarhi lowu va pfulekeleke. Eka lembe ra ntirho leri hundzeke, hi xiringaniso vanhu va 798 938 va hlele swiyimo swa vona leswaku va kota ku hlanganyela eka ntirho wa vuphayona. Van’wana va n’wina va ye etindhawini ta le kule va ya endla ntirho wa vurhumiwa. Mi hangalasa mahungu lamanene hi ku hiseka naswona mi aka mavandlha. Van’wana va n’wina mi dyondze ririmi rin’wana leswaku mi ta pfuna vanhu lava vulavulaka ririmi rimbe lava nga ensin’wini ya n’wina. Van’wanyana va hlele swiyimo swa vona leswaku va ya tirha nsimu leyi nga aviwangiki kumbe laha ku nga ni xilaveko lexikulu. Van’wana va tikume va pfulekeriwe hi nyangwa leyikulu ya ku chumayela exikolweni, entirhweni wa ku tihanyisa kumbe va kuma tindlela tin’wana to chumayela hi ndlela leyi humelelaka, to fana ni ku tirhisa riqingho. Mintokoto leyi humaka emisaveni hinkwayo yi tiyisekisa leswaku vanhu va Xikwembu, lavatsongo ni lavakulu va hisekela ku kuma tindlela to dyondzisa vanhu ntiyiso emisaveni hinkwayo.
Tiyisekani leswaku Yehovha wa ma vona matshalatshala ya n’wina naswona wa ma tlangela swinene. Bibele yi ri: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Hev. 6:10) Hambetani mi xalamukela tindlela leti mi pfulekelaka ta ku yisa vugandzeri bya ntiyiso emahlweni. Van’wana va n’wina va nga kota ku ndlandlamuxa vutirheli bya vona. Hinkwerhu ka hina hi nga lwela ku endla leswaku vutirheli bya hina byi va lebyi humelelaka swinene.
Loko hi ri karhi hi hetisisa ntirho wa hina wa ku chumayela hi pfa hi kanetiwa. Tsundzukani leswaku endzhaku ka loko Pawulo a vulavule hi nyangwa leyikulu ya ku chumayela leyi n’wi pfulekeleke, u tsale a ku: “Ku ni vakaneti vo tala.” Eka Pawulo, vakaneti volavo a va katsa Vayuda ni Vamatiko, laha van’wana va vona va n’wi hlaseleke hi ku kongoma, kasi van’wana a va n’wi lukela mano yo n’wi hehla.—Mint. 19:24-28; 20:18, 19.
Hi langutane ni xiyimo lexi fanaka namuntlha. Tanihi leswi mafambiselo lawa yo homboloka ma nga kusuhi ni ku lovisiwa, ha swi tiva leswaku hi ta kanetiwa hi matimba. Sathana u “hlundzukile swinene,” naswona lava a va karihelaka ngopfu hi lava va tirhelaka Xikwembu. (Nhlav. 12:12) Mi nga rivali leswaku Sathana i “mufumi wa misava.” Yesu u byele vadyondzisiwa vakwe a ku: “Loko a mi ri xiphemu xa misava, misava a yi ta rhandza leswi nga swa yona. Kutani leswi mi nga riki xiphemu xa misava, kambe ndzi mi hlawuleke emisaveni, hikwalaho ka sweswo misava ya mi venga.”—Yoh. 14:30; 15:19.
Hi tiyimisele ku lwa hi matimba leswaku ku nga vi na munhu loyi a tsanisaka ripfumelo leri hi nga na rona eka Xikwembu kumbe a hi tshikisa ku endla ntirho wo chumayela hi ku hiseka. Ha swi tiva leswaku ku ta tshama ku ri ni vanhu lava hi hlasela-ka ni ku hi lukela mano yo hi hehla. Kambe a hi nge tshiki ku hambeta hi chumayela mahungu lamanene ya Mfumo, hi ri karhi hi tiyiseka leswaku hi nkarhi lowu faneleke wa Yehovha, Yesu u ta lovisa Sathana ni vanhu vakwe. Vakaneti a va swi kotanga ku pfala muapostola Pawulo nomu; naswona a va nge swi koti ku miyeta malandza ya Yehovha namuntlha. Moya wa Yehovha wu tirha hi matimba eka vanhu va Yena, hambileswi Sathana a va kariheleke nileswi misava ya yena yi va vengaka. I ntsako lowukulu ku tiva leswaku hi fikelele nhlohlorhi leyintshwa ya nhlayo ya 6 304 645, ya lava va twarisaka mahungu lamanene!
Hi khongelela leswaku mi hambeta mi tirhisa nkarhi wihi ni wihi lowu mi pfulekelaka leswaku mi yisa timhaka ta Mfumo lowu vangamaka wa Yehovha emahlweni. Tiyisekani leswaku ha khathala hi un’wana ni un’wana wa n’wina, naswona hi endla ntirho wa Yehovha Xikwembu xa le Henhla-henhla “hi mbilu yin’we.”—Sof. 3:9.
Vamakwenu,
Huvo leyi Fumaka ya Timbhoni ta Yehovha