Chumayela Mahungu Lamanene Hi Mapfundza
1 “Ndzi navela ku mi vona . . . Ndzi ni mapfundza yo vula mahungu lamanene ni le ka n’wina.” Leyi i ndlela leyi muapostola Pawulo a tiphofuleke ha yona eka xingheniso xa papila rakwe leri a ri ya eka vamakwerhu va le Rhoma. Ha yini Pawulo a ri ni mapfundza ya ku va endzela? U te: “Leswaku ndzi ta kuma mihandzu yo karhi ni le ka n’wina . . . Hikuva a ndzi khomiwi hi tingana hi mahungu lamanene; entiyisweni, i matimba ya Xikwembu ya ku ponisa.”—Rhom. 1:11-16.
2 Pawulo u kombise mapfundza lama fanaka loko a vulavula ni vakulukumba va le Efesa. U va tsundzuxile a ku: “Ku sukela esikwini ro sungula leri ndzi ngheneke ha rona emugangeni wa Asiya . . . , a ndzi tshikanga ku . . . mi dyondzisa erivaleni ni hi yindlu ni yindlu. Kambe ndzi nyikele vumbhoni hi rixaladza eka Vayuda swin’we ni Magriki.” (Mint. 20:18-21) Ensin’wini hinkwayo leyi a a averiwe yona, Pawulo a tiyimisele ku hangalasa mahungu lamanene ya ku ponisiwa ni ku humesa mihandzu ya Mfumo. I moya lowunene swonghasi wo wu tekelela!
3 Hi nga ha tivutisa: ‘Xana ndzi kombisa mapfundza lama fanaka eku twariseni ka mahungu lamanene endhawini ya ka hina? Ematshan’weni ya ku teka ntirho wa ku chumayela tanihi ndzhwalo, xana ndzi ni mapfundza ya ku byela vanhu vo tala mahungu lamanene hilaha swi nga kotekaka hakona? Xana ndzi anakanyele swiyimo swa mina hi xikhongelo? Xana ndzi ringetile ku tirhisa tindlela hinkwato leti nga kona ensin’wini ya ka hina, to tanihi hi ku chumayela hi yindlu ni yindlu, eswitarateni, etindhawini ta mabindzu, hi ku tirhisa riqingho ni ku nyikela vumbhoni hi xitshuketa?’
4 Hlanganyela Hi Mapfundza Hi April: N’hweti ya April i nkarhi lowunene wa ku tikarhata swinene entirhweni wa ku chumayela. Ku hungutiwa ka tiawara leti lavekaka ku fanele ku endla leswaku vo tala va swi kota ku nghenela vuphayona bya nkarhinyana. Kumbexana swiyimo swa wena swi ta ku pfumelela leswaku u va phayona ra nkarhinyana hi n’hweti ya April na May. Kumbexana u nga swi kota ku nghenela vuphayona bya nkarhi hinkwawo hikwalaho ka leswi tiawara leti lavekaka ti hungutiweke. Loko u ri muhuweleri wa vandlha, xana eka n’hweti leyi ni leyi taka u nga tirha nkarhi lowu engetelekeke evutirhelini ku tlula lowu u toloveleke ku wu tirha, u seketela lava swi koteke ku nghenela vuphayona? Loko u endla tano u ta tsakisa mbilu ya Yehovha!
5 Ku fana na Pawulo, vahuweleri hinkwavo va Mfumo va fanele va hambeta va kombisa mapfundza hi ku gingiriteka entirhweni wa ku chumayela. Ku endla hikwaswo leswi hi nga swi kotaka evutirhelini swi ta hi nyika ntsako wa xiviri. Pawulo a tsakile entirhweni wakwe wo kwetsima. Hi ta va hi endla kahle loko hi tekelela xikombiso xakwe lexinene.—Rhom. 11:13; 1 Kor. 4:16.