Chumayela U Tlhela U Nyikela Vumbhoni Bya Rixaladza

¹ Tanihi “murhangeri ni ndhuna,” Yesu u letele vadyondzisiwa va yena leswaku va lunghekela ntirho lowukulu wo chumayela lowu a wu va yimerile. (Esa. 55:4; Luka 10:1-12; Mint. 1:8) Muapostola Petro u hlamusele ntirho lowu Yesu a va nyikeke wona hi marito lama nge: “U hi lerise leswaku hi chumayela evanhwini ni ku nyikela vumbhoni bya rixaladza bya leswaku loyi hi Yena la lerisiweke hi Xikwembu leswaku a va muavanyisi wa lava hanyaka ni lava feke.” (Mint. 10:42) I yini lexi katsekaka eku chumayeleni hi rixaladza?

² Hi nga dyondza swo tala hi ku xiyisisa xikombiso xa muapostola Pawulo. Loko a hlangane ni vakulukumba va vandlha ra le Efesa, u va tsundzuxile a ku: “A ndzi tshikanga ku mi byela swilo leswi pfunaka ni ku mi dyondzisa erivaleni ni hi yindlu ni yindlu. Kambe ndzi nyikele vumbhoni hi rixaladza eka Vayuda swin’we ni Magriki malunghana ni ku hundzukela eka Xikwembu ni ku pfumela eka Hosi ya hina Yesu.” Hambiloko a langutane ni miringo, Pawulo u tirhe hi matimba leswaku a hundzisela mahungu lamanene eka vanhu vo tala hilaha a nga kotaka hakona. A a nga enerisiwi ntsena hi ku avelana tidyondzo ta xisekelo ni vayingiseri va yena, kambe a a lwela ku va byela “ndzayo hinkwayo ya Xikwembu.” Leswaku a hetisisa leswi, a a tiyimisele ku tirha swi vava ni ku titsona swo karhi evuton’wini. U ye emahlweni a ku: “Moya-xiviri wa mina a ndzi wu teki wu ri wa nkoka eka mina, onge hi loko wu ri lowu rhandzekaka eka mina, loko ntsena ndzo heta pfhumba ni vutirheli lebyi ndzi byi amukeleke bya Hosi Yesu, bya ku nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu.”—Mint. 20:20, 21, 24, 27.

³ Xana hi nga xi tekelela njhani xikombiso xa Pawulo namuntlha? (1 Kor. 11:1) Hi ku lava vanhu lava fanelekaka hambiloko hi langutane ni miringo, hi ku lwela ku fikelela vanhu va tinxaka hinkwato ni tindzimi hinkwato hi mahungu lamanene, ni hi ku chivirikela ku pfuna vanhu lava tsakelaka lava hi va kumaka. (Mat. 10:12, 13) Leswi swi lava nkarhi, matshalatshala ni ku rhandza vanhu.

⁴ Xana U Nga Va Phayona Ra Nkarhinyana? March na April ti nga va tin’hweti letinene to nyikela vumbhoni hi rixaladza hi ku nghenela vuphayona bya nkarhinyana. N’wexemu a swi khutaza swinene ku vona vo tala va endla matshalatshala yo hlawuleka leswaku va nghenela vuphayona bya nkarhinyana!

⁵ Makwerhu wa xisati la nga ni 80 wa malembe hi vukhale loyi a nga na swiphiqo swo tala swa rihanyo u khumbiwe hi xikhutazo xa nhlengeletano ya Yehovha. U tsale a ku: “Swi pfuxe ku tsakela loku a ndzi ri na kona embilwini ya mina ku sukela ni khale, swi endla ndzi titwa ndzi rhandza ku nghenela vuphayona bya nkarhinyana nakambe.” U tivekele pakani yo tirha hi n’hweti ya March. U te: “Xilo xo sungula ku xi endla, a ku ri ku tshama ehansi ndzi kunguhata kahle. Ndzi vulavule ha swona ni n’wana wa mina wa xisati tanihi leswi a ndzi ta lava mpfuno wa yena. U ndzi hlamarisile loko a tata fomo ya vuphayona bya nkarhinyana.” Hi n’hweti yoleyo, makwerhu wa xisati loyi a kuleke u hete tiawara ta 52 evutirhelini bya nsimu. “Minkarhi yo tala a ndzi khongela eka Yehovha leswaku a ndzi engetela matimba loko ndzi titwa ndzi karhele. Loko n’hweti yi hela, a ndzi tsakile swinene ni ku eneriseka naswona ndzi nkhense Yehovha ndzi vuyelela hikwalaho ka leswi a ndzi pfuneke. Ndzi ta tlhela ndzi ringeta nakambe.” Ntokoto wa yena lowu tsakisaka wu nga khutaza van’wana lava swi lavaka hakunene ku nghenela vuphayona bya nkarhinyana hambiloko va ri ni swiphiqo swa rihanyo.

⁶ Makwerhu wa xinuna loyi a heleriweke hi ntirho wo tihanyisa a nga swi langutelanga, u tirhise nkarhi lowu hi ndlela leyi vuyerisaka hi ku nghenela vuphayona bya nkarhinyana. Loko n’hweti yi ri xikarhi u ve la chivirikaka swinene entirhweni wo chumayela naswona loko n’hweti yi hela se a a sungule dyondzo leyintshwa ya Bibele. Loko a ehleketa hi ntokoto lowu u ri: “Hakunene ndzi vuyeriwile en’hwetini leyi!” Mawaku ndlela leyi a a tsake ha yona hikwalaho ka nkongomiso ni mpfuno wa Yehovha! Ina, Yehovha u n’wi chululele mikateko yo tala hikwalaho ka matshalatshala lama engetelekeke lawa a ma endleke entirhweni wa nsimu naswona u ta endla leswi fanaka ni le ka wena.—Mal. 3:10.

⁷ Vo tala a swi va oloveli ku nghenela vuphayona bya nkarhinyana. Nilokoswiritano, vamakwerhu vo tala va swi kotile ku endla tano hambiloko va tirha kumbe va ri ni vutihlamuleri bya ndyangu ku katsa ni mintlhontlho ya munhu hi xiyexe. Ku nyikela vumbhoni hi rixaladza hakanyingi swi lava nkarhi lowu kalaka, ni ku tikarhata, kambe mikateko ya kona i yikulu.—Swiv. 10:22.

⁸ Tin’hweti ta March na April i nkarhi lowunene wo nghenela vuphayona bya nkarhinyana. N’hweti ya March yi ni mahelo-vhiki ya ntlhanu. Ku chumayela hi mahelo-vhiki ni hi nkarhi wa nimadyambu swi nga pfuna van’wana lava tirhaka siku hinkwaro leswaku va nghenela vuphayona bya nkarhinyana. Ku tlula kwalaho, u nga swi kota ku chumayela ni hi tiholideyi hi n’hweti ya April. Van’wana va nga va va wisile exikolweni ni le ntirhweni wo tihanyisa, leswi nga va pfunaka ku hlanganisa tiawara ta 50 leti lavekaka. Nakambe Siku ro Hlawuleka ra timagazini ri ta va hi Mugqivela, April 5. Leswaku u fikelela tiawara ta 50 ensin’wini hi tin’hweti ta March kumbe April, xana u nga tirhisa xin’wana xa swiyimiso leswi ringanyetiweke swa vuphayona bya nkarhinyana, leswi fambisanaka ni xihloko lexi? Vulavurisana ni van’wana hi xiyimiso xa wena; van’wana xi nga va khutaza leswaku va hlanganyela na wena evutirhelini bya nsimu. Loko u nga swi koti ku nghenela vuphayona bya nkarhinyana, tivekele pakani yo karhi etin’hwetini leti, u seketela lava byi ngheneleke. Kunguhata ka ha ri sweswi leswaku u tirha hilaha ku engetelekeke hi March na April.

⁹ Kombisa Ku Tlangela Xitsundzuxo: Lembe na lembe hi nkarhi wa Xitsundzuxo, ku tlangela nkutsulo ku susumeta vanhu vo tala leswaku va “tixavela nkarhi” wa ku va maphayona ya nkarhinyana. (Efe. 5:15, 16) Lembe leri hundzeke eAfrika Dzonga, ku ve ni maphayona ya nkarhinyana ya 8 104 hi March kasi hi April a ma ri 4 929. Sweswo swi endla nhlayo-xikarhi ya maphayona ya nkarhinyana ya 6 516 eka tin’hweti letimbirhi hinkwato. Ringanisa sweswo ni nhlayo-xikarhi ya 1 600 ya lava ngheneleke vuphayona bya nkarhinyana eka tin’hweti leti hundzeke ta lembe ra ntirho. (Le Botswana n’wexemu, ku ve ni maphayona ya nkarhinyana ya 120 hi March ivi hi April ku va na 78, eLesotho ma ve 160 na 203, eNamibia ku ve na 145 na 71, le St. Helena ma ve 14 na 4, kasi le Swaziland ku ve na 219 na 139.) Nguva ya Xitsundzuxo i nkarhi lowunene wo kombisa ku tlangela ka hina gandzelo ra nkutsulo wa Kreste hi ku heta nkarhi lowu engetelekeke evutirhelini bya nsimu.

¹⁰ Tanihi leswi ti-16 ta April ti tshinelaka, anakanyisisa hi leswi Xitsundzuxo xi vulaka swona eka wena. Anakanya hi swilo leswi endlekeke emahlweni ka rifu ra Kreste ni swilo leswi a a karhateka swinene ha swona. Nakambe anakanyisisa hi ntsako lowu a wu vekiwe emahlweni ka Yesu ni ndlela leyi wu n’wi pfuneke ha yona leswaku a tiyisela loko a xanisiwa hi ndlela yo tano. Anakanya hi xikhundlha xa yena xa nkarhi wa sweswi tanihi Nhloko ya vandlha, leyi langutelaka ntirho wo chumayela ni ku endla vadyondzisiwa. (1 Kor. 11:3; Hev. 12:2; Nhlav. 14:14-16) Kutani kombisa ku tlangela ka wena ka hinkwaswo leswi Kreste a swi endleke, hi ku tirha swinene hilaha u nga kotaka hakona eku chumayeleni.

¹¹ Khutaza Van’wana Leswaku Va Nyikela Vumbhoni Hi Rixaladza: Vakulu ni malandza ya vutirheli va nga kota ku khutaza van’wana hi ku nghenela ntirho wa vuphayona bya nkarhinyana. Loko va tirha ni vahuweleri ensin’wini ni loko va endla maendzo ya vurisi, va kuma nkarhi lowunene wo pfuna van’wana leswaku va hlanganyela hi xitalo entirhweni lowu wo hlawuleka. Onge hinkwerhu hi nga khongelela mhaka leyi, xisweswo hi tiyisana eka matshalatshala ya hina yo nyikela vumbhoni hi rixaladza.

¹² Hambileswi vakulu hinkwavo ni malandza ya vutirheli va nga ta seketela malunghiselelo ya vandlha yo heta nkarhi lowu engetelekeke ensin’wini eka tin’hweti ta March na April, mulanguteri wa ntirho hi yena loyi ngopfu-ngopfu a faneleke a endla malunghiselelo ya ntirho wo chumayela. U fanele a hlela tindhawu, masiku ni minkarhi leyi vahuweleri vo tala va nga ta swi kota ku hlanganyela ha yona kutani swi tivisiwa nkarhi na nkarhi evandlheni. Ku nga endliwa malunghiselelo ya leswaku ku hlanganiwa hi minkarhi leyi hambaneke esikwini, leswaku vahuweleri hinkwavo evandlheni va kuma nkarhi wo chumayela hi tindlela to hambana-hambana. Sweswo swi nga katsa ku tirha etindhawini ta mabindzu, ku nyikela vumbhoni eswitarateni, ku tirha hi yindlu na yindlu, ku endla maendzo yo vuyela ni ku nyikela vumbhoni hi riqingho. Nakambe u fanele a hlela leswaku ku va ni minkandziyiso, timagazini ni nsimu leyi eneleke leyi nga ta tirhiwa etin’hwetini teto.

¹³ Hi n’hweti ya March ku ta fambisiwa buku leyi nge Vutivi, hi xikongomelo xo sungula tidyondzo ta Bibele. Swiringanyeto leswinene swo fambisa buku leyi nge Vutivi swi kumeka eka xiengetelo xa Vutirheli Bya Hina Bya Mfumo bya January 2002. Hi April ku ta fambisiwa timagazini ta Xihondzo xo Rindza ni Xalamuka! Ringeta ku tirhisa swingheniso leswi ringanyetiweke leswi kumekaka eka bokisi leri nge “Leswi Hi Nga Swi Vulaka Hi Timagazini.” Hinkwerhu hi fanele hi tinyika nkarhi wa ku lunghiselela kahle leswaku hi ta kota ku nyikela vumbhoni hi rixaladza.

¹⁴ Ha tsaka swinene hi ku tirha ehansi ka nkongomiso wa Nhloko ya vandlha, Kreste Yesu, ni ku va ni lunghelo ro byela van’wana mahungu lamanene! Tanihi leswi tin’hweti ta March na April ti tshinelaka, a hi ringeteni hi matimba ku tlhela hi ti endla tin’hweti to hlawuleka, loko hi ri karhi hi yingisa xileriso xa Kreste xa ku chumayela ni ku nyikela vumbhoni hi rixaladza.

[Bokisi leri nga eka tluka 4]

Swiyimiso Swo Hambana-hambana Swa Vuphayona Bya Nkarhinyana Hi March na April 2003

Siku Tiawara

Musumbhunuku 1 2 — — 2 —

Ravumbirhi 1 — 3 — — —

Ravunharhu 1 2 — 5 — —

Ravumune 1 — 3 — — —

Ravuntlhanu 1 2 — — — —

Mugqivela 5 4 3 5 6 7

Sonto 2 2 3 2 2 3

March 56 56 54 55 50 50

April 50 50 51 53 — —

Xana u nga tirhisa xin’wana xa swiyimiso leswi?