Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w96 8/15 matl. 30-31
  • Swivutiso Swa Vahlayi

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Swivutiso Swa Vahlayi
  • Xihondzo xo Rindza Xi Huwelela Mfumo Wa Yehovha—1996
  • Tinhlokomhaka Tin'wana Leti Yelana Na Yona
  • Hi Ta Famba Na N’wina
    Xihondzo xo Rindza Xi Huwelela Mfumo Wa Yehovha (Nkandziyiso Wa Vandlha)—2020
  • Xana Xilalelo Xa Hosi Xi Vula Yini Eka Wena?
    Xihondzo xo Rindza Xi Huwelela Mfumo Wa Yehovha—2003
  • “Moya Hi Woxe Wu Nyikela Vumbhoni”
    Xihondzo xo Rindza Xi Huwelela Mfumo Wa Yehovha (Nkandziyiso Wa Vandlha)—2020
  • Ku Hlengeleta Swilo Swa Le Tilweni Ni Swilo Swa Le Misaveni
    Xihondzo xo Rindza Xi Huwelela Mfumo Wa Yehovha—2006
Vona Swo Tala
Xihondzo xo Rindza Xi Huwelela Mfumo Wa Yehovha—1996
w96 8/15 matl. 30-31

Swivutiso Swa Vahlayi

Swiviko swa malembe man’wana swi kombisa leswaku nhlayo ya lava dyaka swifanekiselo swa Xitsundzuxo yi andzilenyana. Xana leswi swi vula leswaku vanhu vo tala lavantshwa va karhi va totiwa hi moya lowo kwetsima?

Ku ni xivangelo lexinene xo pfumela leswaku nhlayo ya Vakreste lava totiweke va 144 000 yi hele eka malembe-xikhume lama hundzeke.

Eka Mintirho 2:1-4, hi hlaya hi ta vanhu vo sungula va ntlawa wolowo lowu hikiweke: “Kuteloko siku ra Pentekosta ri fikile, vadyondzisiwa hinkwavo a va hlengeletanile exivandleni xi ri xin’we. Kutani hi nomu lo, ku twakala mpfumawulo lowu humaka etilweni, wu fana ni ku hunga ka xidzedze, wu tata yindlu hinkwayo leyi a va tshamile ka yona. Kutani va vona leswi fanaka ni malangavi ya ndzilo, swi avana, swi tshama ehenhla ka un’wana ni un’wana wa vona. Hinkwavo va tala hi Moya lowo Kwetsima, kutani va sungula ku vulavula hi tindzimi tin’wana, hilaha Moya wu nga va nyika ku vulavula hakona.”

Endzhaku ka sweswo, Yehovha u hlawule van’wana, naswona u va tote hi moya wa yena lowo kwetsima. Van’wana va magidi va engeteriwile emalembeni wolawo yo sungula ya Vukreste. Enkhubyeni wa Xitsundzuxo xa nkarhi wa hina, hakanyingi xivulavuri xi yisa nyingiso emaritweni ya muapostola Pawulo eka Varhoma 8:15-17, leyi vulaka leswaku lava totiweke va amukela ‘moya lowu va endlaka vana va moya.’ Pawulo u engetele hi ku vula leswaku moya lowo kwetsima lowu va wu amukelaka ‘wu yima ni mimoya ya vona, leswaku i vana va Xikwembu, vadyandzhaka swin’we na Kreste.’ Lava hakunene va totiweke hi moya va swi tiva handle ko kanakana. A ko va ku navela ntsena kumbe ku kombisiwa ka mintlhaveko ni langutelo leri nga riki ra xiviri eka vona vini.

Ha swi twisisa leswaku ku vitaniwa loku ka le tilweni ku ye emahlweni hi malembe-xidzana yo tala, hambileswi emalembeni lama vuriwaka Nguva ya Munyama, ku nga ha vaka ku ve ni minkarhi leyi eka yona nhlayo ya lava totiweke yi veke yitsongo swinene.a Loko Vukreste bya ntiyiso byi pfuxetiwa ekusuhi ni ku hela ka lembe-xidzana leri hundzeke, ku vitaniwe vo tala ivi va hlawuriwa. Kambe swi vonaka onge exikarhi ka va-1930, nhlayo leyi heleleke ya lava 144 000 kahle-kahle a yi fike emakumu. Xisweswo ku sungule ku vonaka ntlawa wa Vakreste vo tshembeka lava nga ni ntshembo wa laha misaveni. Yesu u va vitane “tinyimpfu tin’wana,” leti hlanganaka ni vatotiwa eku gandzeleni tanihi ntlhambi wun’we lowu amukeriwaka.—Yohane 10:14-16.

Mintiyiso eka malembe-xikhume lama hundzeke yi kombisa haswimbirhi ku hetiwa ka ku vitaniwa ka lava totiweke ni mikateko ya Yehovha eka “ntshungu lowukulu” lowu andzaka, lowu ntshembo wa wona ku nga ku pona ‘nhlomulo lowukulu.’ (Nhlavutelo 7:9, 14) Hi xikombiso, enkhubyeni wa Xitsundzuxo hi 1935, laha ku veke ni vanhu vo ringana 63 146, lava dyeke swifanekiselo hi ku ya hi vumbhoni bya ripfumelo ra vona ra leswaku va totiwile a va ri 52 465. Endzhaku ka malembe ya 30, kumbe hi 1965, lava veke kona a va ri 1 933 089 loko nhlayo ya lava dyeke yi hunguteke yi ya fika eka 11 550. Loko hi hlayela malembe ya 30 ku ta fikela sweswi, hi 1995 nhlayo ya lava veke kona yi tlulele eka 13 147 201, kambe lava dyeke xinkwa ni vhinyo va ve 8 645 ntsena. (1 Vakorinto 11:23-26) Swi le rivaleni leswaku, loko malembe-xikhume ma ri karhi ma hundza, nhlayo ya lava tivulaka masalela yi hunguteke ngopfu—kwalomu ka 52 400 hi 1935; 11 500 hi 1965; 8 600 hi 1995. Hambiswiritano, lava nga ni ntshembo wa laha misaveni va katekisiwile, naswona nhlayo ya vona yi andzile swinene.

Xiviko xa sweswinyana lexi kandziyisiweke i xa lembe ra 1995, naswona xi kombisa vanhu van’wana va 28 lava dyeke lava engetelekeke ku tlula va lembe leri hundzeke hambileswi xiringaniso xa lava dyeke eka lava veke kona entiyisweni xi yeke ehansi. Hi ku ya hi ndzinganyeto, mhaka ya leswaku vanhu van’wana va nga ri vangani va hlawule ku dya swifanekiselo a swi fanelanga swi hi khunguvanyisa. Hi malembe yo tala, hambi ku ri vanhu lava a va ha ku khuvuriwa, va sungule ku dya xikan’we-kan’we. Hakanyingi, endzhaku ka nkarhinyana va swi xiyile leswaku lexi a ku ri xihoxo. Van’wana va swi xiyile leswaku va dye swifanekiselo hikwalaho ka ntshikilelo lowu a va ri na wona emirini kumbe emianakanyweni. Kambe eku heteleleni va swi lemukile leswaku kahle-kahle a va vitaneriwanga vutomi bya le tilweni. Va kombele leswaku Xikwembu xi swi twisisa hi musa. Naswona va hambete va xi tirhela tanihi Vakreste lavanene, lava tshembekeke, lava nga ni ntshembo wo kuma vutomi lebyi nga heriki laha misaveni.

Ku hava ni un’we wa hina la faneleke ku karhateka loko hi vona munhu a sungula ku dya swifanekiselo kumbe a nga ha dyi. Kahle-kahle a swi hi khumbi loko entiyisweni munhu a totiwe hi moya lowo kwetsima naswona a vitaneriwe evuton’wini bya le tilweni kumbe a nga vitaneriwanga byona. Tsundzuka xitiyisekiso lexi tiyeke xa Yesu lexi nge: “Hi mina murisi lonene. Ndzi tiva [tinyimpfu] ta mina.” Hilaha swi tiyisekisiweke hakona, Yehovha u tiva lava a va hlawuleke leswaku va va vana va moya. Hi ni xivangelo lexi tiyeke xo pfumela leswaku nhlayo ya lava totiweke yi ta ya emahlweni yi hunguteka hikwalaho ka vudyuhari ni makhombo lama nga languteriwangiki lama nga endlaka leswaku vutomi bya vona bya laha misaveni byi fika emakumu. Kambe, hambileswi lava totiweke hakunene va tshembekaka ku fikela eku feni, ni ku langutela harhi ya vutomi, tinyimpfu letin’wana, leti nga hlantswa tinguvu ta tona engatini ya Xinyimpfana, ti nga langutela ku pona nhlomulo lowukulu lowu tshineleke.—2 Timotiya 4:6-8; Nhlavutelo 2:10.

[Nhlamuselo ya le hansi]

a Vona The Watchtower ya March 15, 1965, matluka 191-2.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela