Va Endle Ku Rhandza Ka Yehovha

Petro A Chumayela Hi Pentekosta

AKU ri mixo wo hola wa ximun’wana hi lembe ra 33 C.E. Xiyimo a xi tsakisa swinene! A ku ri mphesa-mphesa wa Vayuda na vaproselita lava a va tate magondzo ya Yerusalema. A va huma ematikweni yo kota Elamu, Mesopotamiya, Kapadokiya, Egipta na Rhoma. A swi nyanyula swonghasi ku va vona va ambale tinguvu ta vona ta ndhavuko ni ku twa tindzimi ta vona to hambana-hambana! Van’wana va vona va fambe tikhilomitara ta kwalomu ka magidi mambirhi leswaku va ta va kona exiendlakalweni lexi xo hlawuleka. A xi ri yini? A ku ri Pentekosta—nkhuvo wo tsakisa wa Xiyuda lowu a wu fungha, ku hela ka ntshovelo wa barley.—Levhitika 23:15-21.

Musi a wu tlhandluka wu huma eka magandzelo lama hisiwaka ealtarini etempeleni, kutani Valevhi va yimbelela Tipisalema ta ku Dzunisa (Pisalema 113 ku ya ka 118). Emahlweninyana ka 9:00 a.m., hiloko ku endleka nchumu wun’wana wo hlamarisa. Ku twakale mpfumawulo lowu humaka etilweni, “wu fana ni ku hunga ka xidzedze.” Wu tate yindlu hinkwayo leyi vadyondzisiwa va Yesu Kreste va 120 a va hlangane eka yona. Rungula ra Matsalwa ri ri: “Leswi fanaka ni malangavi ya ndzilo, swi avana, swi tshama ehenhla ka un’wana ni un’wana wa vona. Hinkwavo va tala hi Moya lowo Kwetsima, kutani va sungula ku vulavula hi tindzimi tin’wana, hilaha Moya wu nga va nyika ku vulavula hakona.”—Mintirho 2:1-4.

Un’Wana Ni Un’Wana A Twa Ririmi Ra Rikwavo

Hi ku hatlisa, vadyondzisiwa vo tala a va ri karhi va huma endlwini. Lexi hlamariseke, a va swi kota ku vulavula hi tindzimi to hambana-hambana ta lava va nga entshungwini! Anakanya ndlela leyi a swi hlamarisa ha yona loko muendzi wa le Peresiya ni Muegipta va twa Mugaleliya a vulavula hi ririmi ra vona. Swa twisiseka leswaku ha yini ntshungu wu tshukisiwile. Va vutise va ku: “Mhaka leyi yi yisa kwihi xana?” Van’wana va sungule ku hlekula vadyondzisiwa va ku: “Vanhu lava va pyopyiwile!”—Mintirho 2:12, 13.

Endzhaku, muapostola Petro u yimile kutani a vulavula ni ntshungu. U hlamusele leswaku nyiko leyi ya mahlori ya tindzimi a ku ri ku hetiseka ka xitshembiso xa Xikwembu hi muprofeta Yuwele: “Nḍi ta tšhela moya wa mina e henhla ka nyama hikwayo.” (Mintirho 2:14-21; Yuwele 2:28-32) Ina, Xikwembu a xa ha ku chela moya wa xona lowo kwetsima ehenhla ka vadyondzisiwa va Yesu. Lebyi a byi ri vumbhoni lebyi nga erivaleni bya leswaku Yesu u pfuxiwile eka lava feke kutani a a ri evokweni ra xinene ra Xikwembu etilweni. Petro u te: “Hikokwalaho rixaka hinkwaro ra Vaisraele ri fanele ku tiva mhaka leyi swinene leswaku Yesu loyi mi n’wi vambeke, hi yena loyi Xikwembu xi n’wi endleke Hosi ni Mesiya.”—Mintirho 2:22-36.

Xana vayingiseri va angurise ku yini? Rungula ri ri: “Va tlhaveka timbilu; kutani va ku ka Petro ni ka vaapostola lavan’wana: ‘N’wina varikwerhu, xana hi ta endla yini?’” Petro a hlamula a ku: “Hundzukani, kutani un’wana ni un’wana wa n’wina a khuvuriwa.” Kwalomu ka 3 000 wa vona va endle tano! Kutani endzhaku ka sweswo, “va chivirikela ku dyondzisiwa hi vaapostola.”—Mintirho 2:37-42.

Loko a rhangele xiendlakalo lexi lexikulu, Petro u tirhise xilotlelo xo sungula xa “swilotlelo swa mfumo wa matilo” leswi Yesu a nga n’wi tshembisa ku n’wi nyika swona. (Matewu 16:19) Swilotlelo leswi swi pfulele vanhu vo hambana-hambana malunghelo yo hlawuleka. Xilotlelo lexi xo sungula xi endle swi koteka eka Vayuda leswaku va va Vakreste lava totiweke hi moya. Endzhaku, xilotlelo xa vumbirhi ni xa vunharhu swi endle leswaku Vasamariya ni Vamatiko va kuma lunghelo rolero hi ku landzelelana ka vona.—Mintirho 8:14-17; 10:44-48.

Leswi Hi Swi Dyondzaka

Hambileswi ntshungu lowu wa Vayuda ni vaproselita wu hlanganyeleke hi ku kongoma eku dlayiweni ka N’wana wa Xikwembu, Petro u vulavule na wona hi xichavo a wu vita “vamakwerhu.” (Mintirho 2:29, NW) Pakani ya yena a ku ri ku wu susumetela eku hundzukeni ku nga ri ku wu sola. Xisweswo manghenelo ya yena a ma ri lamanene. U veke timhaka ta yena kutani a seketela tinhla ta yena hi ku tshaha Matsalwa.

Lava va chumayelaka mahungu lamanene namuntlha va endla kahle ku landzela xikombiso xa Petro. Va fanele va ringeta ku simeka mhaka leyi va pfumelelanaka ni vayingiseri va vona ha yona kutani va hlamulana na vona hi vutlharhi hi Matsalwa. Loko ntiyiso wa Bibele wu hlamuseriwa hi ndlela leyinene, lava nga na timbilu leti lulameke va ta wu amukela.—Mintirho 13:48.

Ku hiseka ni xivindzi xa Petro hi siku ra Pentekosta a swi hambane ngopfu ni ku landzula ka yena Yesu kwalomu ka mavhiki ya nkombo lama hundzeke. Enkarhini wolowo Petro a a tshukisiwe ngopfu hi ku chava vanhu. (Matewu 26:69-75) Kambe Yesu a a khongelele Petro. (Luka 22:31, 32) Handle ko kanakana ku humelela ka Yesu eka Petro endzhaku ka ku pfuxiwa ka yena, ku tiyise muapostola loyi. (1 Vakorinto 15:5) Hikwalaho ka sweswo ripfumelo ra Petro a ri helanga. Ku nga ri khale a a chumayela hi xivindzi. Xisweswo u chumayele ku nga ri hi Pentekosta ntsena kambe evuton’wini bya yena hinkwabyo.

Ku vuriwa yini hi loko hi dyohile hi ndlela yo karhi tanihi laha Petro a endleke hakona? A hi hundzukeni, hi khongelela ku rivaleriwa, kutani hi teka magoza yo lava ku kuma mpfuno wa moya. (Yakobo 5:14-16) Xisweswo hi ta ya emahlweni hi ri ni xitiyisekiso xa leswaku ntirho wa hina lowo kwetsima wa amukeleka eka Tata wa hina la teleke musa wa le tilweni, Yehovha.—Eksoda 34:6.