Onge Yehovha A Nga Amukela Ku Tihlamulela Ka Wena
“Oho! Šikwembu ša mina! Nḍi anakanye ne mhakeni leyi, . . . Oho! Šikwembu ša mina, u nḍi anakanya, u nḍi endla le’ŝinene!”—NEHEMIYA 13:22, 31.
1. I yini leswi pfunaka lava tinyiketeleke eka Xikwembu leswaku va tiendlela vito lerinene eka Yehovha?
MALANDZA ya Yehovha ma na wona mpfuno lowu heleleke lowu lavekaka leswaku ma tiendlela vito lerinene eka yena. Ha yini? Hikuva ma ni vuxaka lebyikulu ni Xikwembu tanihi leswi ma nga xiphemu xa nhlengeletano ya xona ya laha misaveni. Xi paluxe swikongomelo swa xona eka wona, naswona xi ma nyike mpfuno ni vutlhari bya moya hi ku tirhisa moya wa xona lowo kwetsima. (Pisalema 51:11; 119:105; 1 Vakorinto 2:10-13) Hi ku xiyisisa malunghiselelo lawa yo hlawuleka, Yehovha hi rirhandzu u lava leswaku malandza ya yena ya laha misaveni ma tihlamulela malunghana ni leswi ma nga swona ni leswi ma nga swi hetisisa hi matimba ya yena ni hi mpfuno wa moya wa yena lowo kwetsima.
2. (a) Hi tihi tindlela leti Nehemiya a tiendleleke vito lerinene ha tona eka Xikwembu? (b) Xana Nehemiya u gimete buku ya Bibele leyi nga ni vito ra yena hi xikombelo xihi?
2 Munhu un’wana la tiendleleke vito lerinene eka Xikwembu a ku ri Nehemiya, mucheleri wa vhinyo wa Hosi ya Peresi Ataserkisi (Longimanus). (Nehemiya 2:1) Nehemiya u ve mufumi wa Vayuda naswona u pfuxete rirhangu ra Yerusalema a langutane ni valala ni makhombo. Hikwalaho ko hisekela vugandzeri bya ntiyiso, u tirhise Nawu wa Xikwembu naswona u khathalele lava tshikileriweke. (Nehemiya 5:14-19) Nehemiya u khutaze Valevhi leswaku va tibasisa nkarhi na nkarhi, va rindza tinyangwa ni ku kwetsimisa siku ra Savata. Hikwalaho u khongerile a ku: “Oho! Šikwembu ša mina! Nḍi anakanye ne mhakeni leyi, u nḍi ṭeṭelela hi v̌ukulu bya tintŝalo ta wena!” Nakambe swa fanela leswi Nehemiya a gimeteke buku ya yena leyi huhuteriweke hi Xikwembu hi xikombelo lexi nge: “Oho! Šikwembu ša mina, u nḍi anakanya, u nḍi endla le’ŝinene!”—Nehemiya 13:22, 31.
3. (a) Xana u nga n’wi hlamusela njhani munhu la endleka leswinene? (b) Loko hi anakanyisisa hi mahanyelo ya Nehemiya, hi swihi swivutiso leswi hi nga tivutisaka swona?
3 Munhu la endlaka leswinene u ni mahanyelo lamanene naswona u endla mintirho leyinene leyi vuyerisaka van’wana. Nehemiya a a ri munhu wo tano. A a chava Xikwembu hi vuenti naswona a hisekela ngopfu vugandzeri bya ntiyiso. Tlhandla-kambirhi, a a ma tlangela swinene malunghelo ya yena entirhweni wa Xikwembu naswona u tiendlele vito lerinene eka Yehovha. Loko hi anakanyisisa hi mahanyelo ya yena hi nga ha susumeteleka ku tivutisa, ‘Xana ndzi ma languta njhani malunghelo ni vutihlamuleri lebyi ndzi nyikiweke hi Xikwembu? Xana ndzi tiendlela vito ra njhani eka Yehovha Xikwembu na Yesu Kreste?’
Vutivi Byi Hi Byarhisa Vutihlamuleri
4. Xana Yesu u nyike valandzeri va yena ntirho wihi, naswona i yini lexi lava “hlawuleriweke vutomi lebyi nga heriki” va xi endleke?
4 Yesu u nyike valandzeri vakwe ntirho lowu: “Yanani eka vamatiko hinkwavo, mi va endla vadyondzisiwa va mina, mi va khuvula . . . , mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20) Leswaku vanhu va va vadyondzisiwa a va fanele ku dyondzisiwa. Xisweswo lava dyondzisiweke naswona va “hlawuleriweke vutomi lebyi nga heriki,” a va ta khuvuriwa, hilaha Yesu a endleke hakona. (Mintirho 13:48; Marka 1:9-11) Ku navela ka vona ko hlayisa swilo hinkwaswo leswi a leriseke swona a ku ta huma embilwini. A va ta fikelela ku tinyiketela hi ku nghenisa ni ku tirhisa vutivi lebyi kongomeke bya Rito ra Xikwembu.—Yohane 17:3.
5, 6. Xana Yakobo 4:17 hi fanele hi yi twisisa hi ndlela yihi? Kombisa ku tirha ka yona.
5 Loko vutivi bya hina bya Matsalwa byi entile, ripfumelo ra hina ri va ni xisekelo lexinene. Hi nkarhi lowu fanaka, vutihlamuleri bya hina eka Xikwembu bya kula. Yakobo 4:17 yi ri: “Munhu loyi a tivaka leswo lulama leswi a fanelaka ku swi endla, kambe a nga swi endli, i mudyohi.” Entiyisweni marito lawa ma seketela leswi mudyondzisiwa Yakobo a swi vuleke mayelana ni ku tinyungubyisa ematshan’weni yo titshega hi Xikwembu hi ku helela. Loko munhu a swi tiva leswaku a nge endli nchumu lowu tshamaka hi masiku handle ka mpfuno wa Yehovha kambe a nga wu amukeli mpfuno wolowo, lexi i xidyoho. Kambe marito ya Yakobo ma nga ha tirha ni le ka swidyoho leswi endliwaka hi ku honisa. Hi xikombiso, exifanisweni xa Yesu xa tinyimpfu ni timbuti, timbuti ta avanyisiwa, hayi hikwalaho ka swiendlo swo biha, kambe hikwalaho ka ku nga pfuni vamakwavo va Kreste.—Matewu 25:41-46.
6 Wanuna un’wana loyi Timbhoni ta Yehovha a ti fambisa dyondzo ya Bibele na yena, nhluvuko wa yena wa moya a wu nga nyawuli, swi le rivaleni leswaku a ku ri hikwalaho ka leswi a nga tshikanga ku dzaha hambileswi a swi tiva leswaku a fanele ku tshika. Nkulu un’wana u n’wi kombele ku hlaya Yakobo 4:17. Endzhaku ka loko a hlamusele nkoka wa tsalwa leri, nkulu loyi u te: “Hambileswi u nga khuvuriwangiki, u fanele ku tihlamulela naswona wa boheka ku byarha vutihlamuleri bya xiboho xa wena hi ku helela.” Lexi tsakisaka, wanuna loyi u angule kahle, u tshike ku dzaha, naswona hi ku hatlisa a fanelekela nkhuvulo ku nga xikombiso xa ku tinyiketela ka yena eka Yehovha Xikwembu.
eVutirhelini Bya Hina Hi Ni Vutihlamuleri
7. Hi yihi ndlela yin’wana yo kombisa ku tlangela ka hina “ku tiv̌a ka Šikwembu”?
7 Ku navela ka hina ka mbilu hinkwayo ku fanele ku va ka ku tsakisa Muvumbi wa hina. Ndlela yin’wana yo kombisa ku tlangela ka hina “ku tiv̌a ka Šikwembu” i ku hetisisa ntirho wo endla vadyondzisiwa va N’wana wa xona, Yesu Kreste. Leyi na yona i ndlela yo kombisa rirhandzu ra hina eka Xikwembu ni le ka muakelani wa hina. (Swivuriso 2:1-5; Matewu 22:35-40) Ina, vutivi bya hina hi Xikwembu byi hi byarhisa vutihlamuleri, naswona hi fanele hi languta vanhu-kulorhi tanihi lava nga ha vaka vadyondzisiwa.
8. Ha yini hi nga vulaka leswaku Pawulo u titwe a ri ni vutihlamuleri eka Xikwembu hikwalaho ka vutirheli bya yena?
8 Muapostola Pawulo a swi tiva leswaku ku amukela ni ku yingisa mahungu lamanene hi mbilu hinkwayo swi tisa ku ponisiwa, kasi ku ma ala ku nga vanga ku lovisiwa. (2 Vatesalonika 1:6-8) Hikwalaho u titwe a ri ni vutihlamuleri eka Yehovha hikwalaho ka vutirheli bya yena. Kahle-kahle, Pawulo ni vanghana va yena a va byi tlangela swinene vutirheli bya vona lerova hi vukheta a va papalata hambi ku languteka onge va kuma mali hi byona. Tlhandla-kambirhi, mbilu ya Pawulo yi n’wi susumetele ku vula a ku: “Loko ndzi twarisa Mahungu Lamanene, a hi leswi ndzi nga tidzunisaka ha swona, hikuva swa ndzi boha ku ma twarisa; ndzi ta va ni khombo loko ndzi nga twarisi Mahungu Lamanene!”—1 Vakorinto 9:11-16.
9. Hi wihi nandzu lowukulu lowu Vakreste hinkwavo va faneleke va wu riha?
9 Leswi hi nga malandza ya Yehovha lama tinyiketeleke, ‘swa hi boha ku twarisa mahungu lamanene.’ I ntirho wa hina ku chumayela rungula ra Mfumo. Hi amukele vutihlamuleri lebyi loko hi tinyiketela eka Xikwembu. (Ringanisa Luka 9:23, 24.) Ku tlula kwalaho, hi ni nandzu lowu hi faneleke hi wu riha. Pawulo u te: “Eka Magriki swin’we ni le ka Vabarbara, eka lavo tlhariha swin’we ni le ka swihunguki ndzi ni nandzu: kutani ndzi ni mapfundza yo vula mahungu lamanene ni le ka n’wina kwalaho Rhoma.” (Varhoma 1:14, 15, NW) Pawulo a ri ni nandzu hikuva a swi tiva leswaku a ku ri ntirho wa yena ku chumayela leswaku vanhu va ta twa mahungu lamanene kutani va ponisiwa. (1 Timotiya 1:12-16; 2:3, 4) Hikwalaho u tirhe hi matimba leswaku a hetisisa ntirho wa yena ni ku riha nandzu wa yena eka vanhu-kulobye. Leswi hi nga Vakreste, na hina hi ni nandzu wo tano lowu hi faneleke ku wu riha. Ku chumayela hi Mfumo i ndlela yin’wana leyikulu yo kombisa rirhandzu ro rhandza Xikwembu, N’wana wa xona ni vaakelani va hina.—Luka 10:25-28.
10. Xana van’wana va ndlandlamuxe vutirheli bya vona hi ku endla yini?
10 Ndlela yin’wana yo tiendlela vito lerinene eka Xikwembu i ku tirhisa vuswikoti bya hina leswaku hi ndlandlamuxa vutirheli bya hina. Hi xikombiso: Vanhu va tinxaka to tala ta matiko va khitikanele eBritain emalembeni ya sweswinyana. Leswaku ku fikeleriwa vanhu lava hi mahungu lamanene, maphayona lama tlulaka 800 (vachumayeri va Mfumo va nkarhi hinkwawo) swin’we ni madzana ya Timbhoni tin’wana va dyondza tindzimi to hambana-hambana. Leswi swi ve ni vuyelo lebyinene evutirhelini. Phayona rin’wana leri dyondzisaka ntlawa wa Machayina ri te: “A ndzi nga si tshama ndzi ehleketa leswaku ndzi ta pfuka ndzi dyondzise Timbhoni tin’wana ririmi ra mina leswaku ti ta kota ku avela van’wana ntiyiso hi ndlela leyi. Swa tsakisa hakunene!” Xana u nga ndlandlamuxa vutirheli bya wena hi ndlela leyi fanaka?
11. Xana ku ve ni vuyelo byihi loko Mukreste un’wana a nyikele vumbhoni hi xitshuketa?
11 A swi kanakanisi leswaku un’wana ni un’wana wa hina a nga endla leswi a swi kotaka leswaku a ponisa munhu loyi a nwelaka. Hilaha ku fanaka malandza ya Yehovha ma ni mapfundza eku tirhiseni ka vuswikoti bya wona leswaku ma nyikela vumbhoni nkarhi wun’wana ni wun’wana. Ku nga ri khale Mbhoni yin’wana a yi tshame ekusuhi ni wansati un’wana ebazini ivi yi burisana na yena hi Matsalwa. Leswi a a tsakisiwe hi leswi a swi tweke, wansati loyi u vutise swivutiso swo tala. Loko Mbhoni leyi yi ri kusuhi ni ku xika ebazini wansati loyi u yi kombele leswaku yi ta ekaya ra yena, hikwalaho ka leswi a ha ri ni swivutiso swo tala. Mbhoni yi pfumerile. Vuyelo byi ve byihi? Dyondzo ya Bibele yi sunguriwile, naswona endzhaku ka tin’hweti ta tsevu wansati loyi u ve muhuweleri wa Mfumo la nga khuvuriwangiki. Hi ku hatlisa a fambisa tsevu wa tidyondzo ta Bibele ta le kaya ta yena n’wini. Mawaku hakelo yo tsakisa swonghasi hikwalaho ko tirhisa vuswikoti byakwe entirhweni wa Mfumo!
12. Xana vuswikoti bya hina tanihi vatirheli hi nga byi tirhisa njhani hi ndlela leyinene entirhweni wa nsimu?
12 Vuswikoti bya hina tanihi vatirheli byi nga ha tirhisiwa hilaha ku humelelaka ensin’wini hi ku tirhisa minkandziyiso yo tanihi buku ya matluka ya 192 leyi nge Vutivi Lebyi Yisaka eVuton’wini Lebyi Nga Heriki. Hi April 1996, Komiti yo Tsala ya Huvo leyi Fumaka ya Timbhoni ta Yehovha yi pfumelele ku kandziyisiwa ka buku leyi nge Vutivi hi tindzimi ta 140, naswona ku sukela enkarhini wolowo 30 500 000 wa tikopi ta yona ana se a ti kandziyisiwile hi tindzimi ta 111. Buku leyi yi tsariwe hi xikongomelo xo pfuna swichudeni swa Bibele leswaku swi dyondza hilaha ku eneleke hi Rito ra Xikwembu ni swikongomelo swa xona leswaku swi tinyiketela eka Yehovha kutani swi khuvuriwa. Tanihi leswi vahuweleri va Mfumo va nga taka va nga ha fambisi dyondzo ya le kaya ya Bibele ni xichudeni xin’we malembe yo tala, va nga swi kota ku fambisa tidyondzo ni vanhu vo tala kumbe va kurisa xiphemu xa vona entirhweni wa yindlu na yindlu ni le ka swiphemu swin’wana swa vutirheli. (Mintirho 5:42; 20:20, 21) Hikwalaho ko xiya vutihlamuleri bya vona eka Xikwembu, va endla leswaku vanhu va lemuka switsundzuxo swa Xikwembu. (Ezekiyele 33:7-9) Kambe xikongomelo-nkulu xa vona i ku xixima Yehovha ni ku pfuna vo tala hilaha swi nga kotekaka hakona leswaku va dyondza mahungu lamanene hi nkarhinyana wutsongo lowu wa ha saleke wa mafambiselo lawa yo biha ya swilo.
Ku Tiendlela Vito Lerinene Tanihi Mindyangu
13. Ha yini mindyangu leyi chavaka Xikwembu yi fanele yi va ni dyondzo ya ndyangu ya Bibele ya nkarhi na nkarhi?
13 Munhu un’wana ni un’wana ni ndyangu wun’wana ni wun’wana lowu amukelaka Vukreste bya ntiyiso wu ni vutihlamuleri eka Xikwembu naswona wu fanele wu “kongoma eku hetisekeni” ivi wu va lowu “tiy[eke] eku pfumeleni.” (Vaheveru 6:1-3; 1 Petro 5:8, 9) Hi xikombiso, lava dyondzeke buku leyi nge Vutivi va tlhela va khuvuriwa va fanele va engetela vutivi bya vona bya Matsalwa hi ku va kona eminhlanganweni nkarhi hinkwawo swin’we ni ku hlaya Bibele ni tibuku tin’wana ta Vukreste. Mindyangu leyi chavaka Xikwembu yi fanele yi tlhela yi va ni dyondzo ya ndyangu ya nkarhi na nkarhi, hikuva yoleyo hi yona ndlela ya nkoka yo ‘tshama hi xalamukile, hi tiyile eripfumelweni, hi va vavanuna, hi va ni matimba.’ (1 Vakorinto 16:13) Loko u ri nhloko ya ndyangu, hi wena ngopfu-ngopfu loyi a nga ni vutihlamuleri eka Xikwembu hi ku tiyiseka leswaku ndyangu wa wena wu wundliwa kahle hi tlhelo ra moya. Tanihi leswi swakudya swa nyama leswi akaka swi hoxaka xandla eka rihanyo ra miri, hikwalaho swakudya swo tala swa moya swa nkarhi na nkarhi swa laveka loko wena ni ndyangu wa wena mi ta tshama mi ‘hanyile eripfumelweni.’—Tito 1:13.
14. Xana ku ve ni vuyelo byihi loko xinhwanyetana lexi dyondzisiweke kahle xa Muisrayele xi nyikele vumbhoni?
14 Loko ku ri ni vana endyangwini wa wena, Xikwembu xi ta amukela ku tihlamulela ka wena loko u va nyika vuleteri lebyinene bya moya. Dyondzo yo tano yi ta pfuna vona, hilaha yi pfuneke hakona xinhwanyetana xa Muisrayele lexi a xi khome hi Vasiriya emasikwini ya muprofeta wa Xikwembu Elixa. Xi ve nandza wa xisati wa nkata Namani, ndhuna ya vuthu ra Vasiriya leyi nga ni nhlokonho. Hambileswi xinhwanyetana lexi a xi ri xitsongo, xi byele n’wini wa xona wa xisati xi ku: “Loko hosi ya nga ingi a ri mahlweni ka muprofeta l’a nge Samaria, a ta ṅwi hanyisa.” Hikwalaho ka vumbhoni bya xona, Namani u ye eIsrayele, naswona eku heteleleni u pfumelelane ni nkongomiso wa Elixa wa leswaku a a hlamba ka nkombo eNambyeni wa Yordani, naswona u basisiwile eka nhlokonho lowu. Tlhandla-kambirhi, Namani u ve mugandzeri wa Yehovha. Mawaku ntsako lowu xinhwanyetana lexi xi veke na wona!—2 Tihosi 5:1-3, 13-19.
15. Ha yini swi ri swa nkoka leswaku vatswari va nyika vana va vona vuleteri lebyinene bya moya? Hlamusela.
15 A swi olovi ku kurisa vana lava chavaka Xikwembu emisaveni leyi leyi nga hava mahanyelo leyi nga ematimbeni ya Sathana. (1 Yohane 5:19) Hambiswiritano, ku sukela loko Timotiya a ri ricece, kokwa wa yena wa xisati Luwisa ni mana wa yena Yunika, va swi kotile ku n’wi dyondzisa Matsalwa. (2 Timotiya 1:5; 3:14, 15) Ku dyondza Bibele ni vana va wena, ku famba na vona eminhlanganweni ya Vukreste nkarhi na nkarhi, naswona eku heteleleni va famba na wena evutirhelini, hinkwaswo ka ha ri xiphemu xa ndlela yo letela leyi u faneleke ku tihlamulela ha yona eka Xikwembu. Mukreste un’wana wa le Wales, loyi sweswi a nga ni malembe lama nga ehenhla ka va-80, u tsundzuka leswaku emalembeni ya va-1920, tata wa yena a a famba na yena mpfhuka wa 10 wa tikhilomitara ehenhla ka ntshava (20 wa tikhilomitara ku ya ni ku vuya) leswaku va ya hangalasa swiphephana swa Bibele eka vanhu lava a va tshama eribuweni. U vula marito lawa hi ku tlangela a ku: “Loko hi ri karhi hi famba-famba hi ndlela leyi tatana u nghenise ntiyiso embilwini ya mina.”
Vakulu Va Tihlamulela—Njhani?
16, 17. (a) Hi wahi malunghelo lawa vakulukumba lava vupfeke hi tlhelo ra moya eIsrayele wa khale a va ri na wona? (b) Loko hi ringanisa xiyimo lexi a xi ri kona eIsrayele wa khale, ha yini ku laveka swo tala eka vakulu va Vakreste namuntlha?
16 Wanuna wo tlhariha Solomoni u te: “Misisi ya timpfu i hari ya šitšhavo, yi kumeka e ndleleni ya ku lulama.” (Swivuriso 16:31) Kambe malembe ya munhu a hi wona ntsena ma hlomisaka munhu leswaku a va ni vutihlamuleri evandlheni ra vanhu va Xikwembu. Vakulukumba lava vupfeke hi tlhelo ra moya eIsrayele wa khale a va ri vaavanyisi ni vafambisi lava hlayisaka vululami ni ku rhula, nhleleko lowunene ni rihanyo ra moya. (Deteronoma 16:18-20) Hambileswi xiyimo lexi xi fanaka ni xa vandlha ra Vukreste, ku laveka swo tala eka vakulu tanihi leswi makumu ya mafambiselo lawa ya swilo ma tshinelaka. Ha yini?
17 Vaisrayele a va ri ‘vanhu lava hlawuriweke’ lava Xikwembu xi va poniseke le Egipta wa khale. Tanihi leswi va kumeke Nawu hi ku tirhisa muhlanganisi wa vona, Muxe, vatukulu va vona a va velekeriwe erixakeni leri tinyiketeleke naswona a va yi tiva milawu ya Yehovha ya mahanyelo. (Deteronoma 7:6, 11) Hambiswiritano, ku hava munhu la velekiwaka erixakeni ro tano leri tinyiketeleke namuntlha, naswona a hi vangani lava kulelaka emindyangwini leyi chavaka Xikwembu leyi wu tivaka kahle ntiyiso wa Matsalwa. Lava ha ku sungulaka ku “hanya entiyisweni” hi vona lava ngopfu-ngopfu va lavaka ndzetelo malunghana ni ndlela yo hanya hi ku pfumelelana ni misinya ya milawu ya Matsalwa. (3 Yohane 4) Hikwalaho vona vutihlamuleri lebyi byarhisiwaka vakulu lava tshembekaka loko va ri karhi va “landza ntila wa marito lama tiyeke ya xiviri” swin’we ni ku pfuna vanhu va Yehovha!—2 Timotiya 1:13, 14.
18. Hi wihi mpfuno lowu vakulu va vandlha va faneleke va lunghekela ku wu nyikela, naswona ha yini?
18 Xihlangi lexa ha deyaka xi nga ha khuguka ivi xi wa. Xi titwa xi nga hlayisekanga naswona xi lava mpfuno ni nseketelo wa vatswari. Munhu la tinyiketeleke eka Yehovha na yena a nga ha khuguka kumbe ku wa hi tlhelo ra moya. Hambi ku ri muapostola Pawulo u vone swi ri swa nkoka ku lwela ku endla leswo lulama kumbe leswinene emahlweni ka Xikwembu. (Varhoma 7:21-25) Varisi va ntlhambi wa Xikwembu va fanele va nyikela mpfuno hi rirhandzu eka Vakreste lava dyoheke kambe lava hakunene-nene va hundzukaka. Loko vakulu va endzele wansati un’wana la tinyiketeleke loyi a a endle xihoxo lexikulu, u vule marito lawa emahlweni ka nuna wa yena la tinyiketeleke a ku: “Ndza swi tiva leswaku mi ta ndzi susa!” Kambe u khavaxele mihloti loko a byeriwe leswaku vakulu a va lava ku tiva leswaku hi wihi mpfuno lowu a wu laveka leswaku va kondletela ndyangu hi tlhelo ra moya. Hi ku vona leswaku va fanele va tihlamulela, vakulu a va tsakile ku pfuna mupfumeri-kulobye la hundzukeke.—Vaheveru 13:17.
Hambetani Mi Tiendlela Vito Lerinene
19. Xana hi nga hambeta hi tiendlela vito lerinene eka Xikwembu hi ndlela yihi?
19 Vakulu va vandlha swin’we ni malandza man’wana hinkwawo ya Xikwembu va fanele va hambeta va tiendlela vito lerinene eka Yehovha. Leswi swa koteka loko hi namarhela Rito ra Xikwembu ni ku endla ku rhandza ka xona. (Swivuriso 3:5, 6; Varhoma 12:1, 2, 9) Ngopfu-ngopfu hi lava ku endla leswinene eka vamakwerhu eku pfumeleni. (Vagalatiya 6:10) Hambiswiritano, ntshovelo wa ha ri wukulu, naswona vatirhi va ha ri vatsongo. (Matewu 9:37, 38) Hikwalaho a hi endleleni van’wana leswinene hi ku chumayela rungula ra Mfumo hi ku hiseka. Yehovha u ta ku amukela ku tihlamulela ka hina loko hi hetisisa ku tinyiketela ka hina, hi endla ku rhandza ka yena naswona hi twarisa mahungu lamanene hi ku tshembeka.
20. Xana hi dyondza yini loko hi anakanyisisa hi swiendlo swa Nehemiya?
20 Hikwalaho a hi hambeteni hi va ni swo tala swo swi endla entirhweni wa Hosi. (1 Vakorinto 15:58) Naswona hi endla kahle loko hi anakanyisisa hi Nehemiya, loyi a pfuxeteke rirhangu ra Yerusalema, a endleke leswaku Nawu wa Xikwembu wu landzeriwa, naswona hi ku hiseka a tlakuseke vugandzeri bya ntiyiso. U kombele leswaku Yehovha Xikwembu a n’wi tsundzuka hikwalaho ka leswinene leswi a swi endleke. Onge u nga kombisa ku tinyiketela ka wena eka Yehovha, naswona onge a nga amukela ku tihlamulela ka wena.
Hi Tihi Tinhlamulo Ta Wena?
◻ Hi xihi xikombiso lexi vekiweke hi Nehemiya?
◻ Ha yini vutivi byi hi byarhisa vutihlamuleri eka Xikwembu?
◻ Xana hi nga tiendlela vito lerinene hi ndlela yihi eka Yehovha evutirhelini bya hina?
◻ Xana mindyangu yi nga endla yini leswaku yi tiendlela vito lerinene eka Xikwembu?
◻ Xana vakulu va Vakreste va tihlamulela hi ndlela yihi?
[Swifaniso leswi nga eka tluka 18]
Ku fana na Pawulo, hi nga tihlamulela hi ndlela leyinene eka Xikwembu tanihi vahuweleri va Mfumo
[Xifaniso lexi nga eka tluka 19]
Xana vana va wena va tiyile eripfumelweni ku fana ni xinhwanyetana xa Muisrayele ekaya ra Namani?