I Yini Lexi Nga Xa Nkoka eVuton’wini Bya Wena?

“Nḍi kombise ndlela leyi nḍi fanelaka ku famba ha yona!”—PISALEMA 143:8.

1. Xana Hosi Solomoni u gimete hi ku vula yini malunghana ni ku tikarhata ni ku humelela ka munhu?

HANDLE ko kanakana wa swi tiva leswaku vutomi byi ni mintirho ni swilaveko swo tala. Loko u anakanyisisa hi swona, u nga ha vona swin’wana swa swona swi ri swa nkoka. Mintirho ni swilaveko swin’wana a hi swa nkoka ngopfu, kumbexana swi nga ha va swi ri swa hava. Loko sweswo u swi xiya, swi vula leswaku u pfumelelana ni wanuna un’wana wo tlhariha eka lava tshameke va va kona, Hosi Solomoni. Endzhaku ka loko a anakanyisise hi mintirho ya vutomi hi vukheta, u gimete hi ku: “Tšhav̌a Šikwembu, u hlayisa milawu ya šona, hikuv̌a hi yona fanelo hikwayo ya munhu.” (Eklesiasta 2:4-9, 11; 12:13) Xana leswi swi vula yini eka hina namuntlha?

2. Hi xihi xivutiso xa xisekelo lexi vanhu lava chavaka Xikwembu va faneleke va tivutisa xona, naswona hi swihi swivutiso swin’wana leswi yelanaka?

² Loko u lava ku “tšhav̌a Šikwembu, u hlayisa milawu ya šona,” tivutise xivutiso lexi lexi tlhontlhaka, ‘Xana i yini lexi nga xa nkoka evuton’wini bya mina?’ I ntiyiso, swi nga ha endleka u nga anakanyisisi hi xona xivutiso lexi siku na siku, kambe ha yini u nga anakanyisisi hi xona sweswi? Kahle-kahle, xi pfuxa swivutiso swin’wana leswi yelanaka, swo tanihi leswi, ‘Xana ndzi nga ha va ndzi khathalela ngopfu ntirho wa mina kumbe ntirho lowu ndzi wu thwaseleke kumbe swilo leswi vonakaka? Xana kaya ra mina, ndyangu ni van’wana lava rhandzekaka i va nkoka hi ndlela yihi evuton’wini bya mina?’ Muntshwa a nga ha tivutisa, ‘Xana dyondzo yi teka nyingiso ni nkarhi wa mina wo tanihi kwihi? Kahle-kahle, xintirhwana xo hungasa, ntlango, kumbe ku titsakisa kumbe thekinoloji yo karhi hi swona swilo swa nkoka eka mina?’ Naswona ku nga khathariseki vukhale bya hina kumbe swiyimo swa hina, hi fanele hi tivutisa kahle, ‘Xana ku tirhela Xikwembu ku ni xiphemu xihi evuton’wini bya mina?’ Swi le rivaleni leswaku u nga pfumela leswaku ku ni xilaveko xo rhangisa swilo leswi nga swa nkoka. Kambe, xana mpfuno wa ku swi hlela hi vutlharhi hi nga wu kuma njhani, naswona hi nga wu kuma kwihi?

3. Xana ku simeka swilo swa nkoka swi katsa yini eka Vakreste?

³ “Lexi nga xa nkoka,” i xiga lexi nga ni mongo lowu vulaka nchumu lowu nga wo sungula eka swilo leswin’wana hinkwaswo kumbe lowu lavaka leswaku ku rhangisiwa wona ku sungula. Ku nga khathariseki leswaku u wun’wana wa Timbhoni ta Yehovha kumbe u wun’wana wa timiliyoni ta swichudeni swa Rito ra Xikwembu leswi nga ni timbilu letinene leswi hlanganyelaka na tona, anakanya hi ntiyiso lowu: “Šilo šiṅwana ni šiṅwana ši ni nkari wa šona, kutani nkari wu kona wa hikwaŝo le’ŝi endliwaka e hansi ka tilo.” (Eklesiasta 3:1) Swa fanela leswaku sweswo swi katsa ku kombisa ka wena nkhathalelo wa rirhandzu wa vuxaka bya ndyangu. (Vakolosa 3:18-21) Swi katsa ku wundla ndyangu wa wena hi ku tshembeka hi ntirho wo tihanyisa. (2 Vatesalonika 3:10-12; 1 Timotiya 5:8) Nakambe leswaku u kota ku wisa, u nga ha va ni nkarhi wo endla xintirhwana xo hungasa kumbe ku titsakisa kumbe mintlango ya nkarhi na nkarhi. (Ringanisa Marka 6:31.) Hambiswiritano, loko u anakanyisisa kahle, xana a wu swi voni leswaku ku hava ni xin’we xa leswi lexi nga xa nkoka evuton’wini? Xi kona lexi nga xa nkoka ngopfu evuton’wini.

4. Xana Vafilipiya 1:9, 10 yi fambelana njhani ni ku hlela ka hina swilo swa nkoka?

⁴ Entiyisweni wa swi xiya leswaku misinya ya milawu ya Bibele leyi kongomisaka i mpfuno wa risima eku hleleni ka swilo swa nkoka ni le ku endleni ka swiboho swa vutlharhi. Hi xikombiso, eka Vafilipiya 1:9, 10, Vakreste va khutaziwa ku “kula masiku hinkwawo, [va] va ni vutivi ni ku twisisa loku hetisekeke.” Hi xikongomelo xihi? Muapostola Pawulo u engeterile a ku: “Mi ta kota ku hlawula leswi nga swinene ku tlula swin’wana.” (Xiitaliki i xerhu.) Xana sweswo a swi twali? Exisekelweni xa vutivi lebyi kongomeke, Mukreste la twisisaka a nga ha hlawula lexi faneleke ku va xo sungula—lexi nga xa nkoka—evuton’wini.

Xikombiso Lexinene Malunghana Ni Lexi Nga Xa Nkoka

5. Loko ma hlamusela xikombiso lexinene lexi siyeriweke Vakreste, xana Matsalwa ma xi kombisa njhani lexi a xi ri xa nkoka evuton’wini bya Yesu?

⁵ Hi kuma xiphemu xa risima xa vutivi eka marito ya muapostola Petro lama nge: “Mi vitaneriwe swona, hikuva Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landzelela.” (1 Petro 2:21) Ina, leswaku hi kuma vumbhoni lebyi vulavulaka hi xilo xa nkoka evuton’wini, hi nga ha kambisisa leswaku Yesu Kreste a a anakanya yini hi swona. Pisalema 40:8 yi profete malunghana na yena yi ku: “Šikwembu ša nga, nḍi ṭakela ku endla ku ranḍa ka wena! Kutani nawu wa wena wu le mbilwini ya mina.” Leyi i ndlela leyi a phofuleke ha yona marito lama fanaka: “Swakudya swa mina i ku endla ku rhandza ka Loyi a ndzi rhumeke, ni ku heta ntirho wa yena swinene.”—Yohane 4:34; Vaheveru 12:2.

6. Xana hi nga va ni vuyelo lebyi fanaka ni bya Yesu hi ku rhangisa ku endla ku rhandza ka Xikwembu ku sungula hi ndlela yihi?

⁶ Xiya xilotlelo xexo—ku endla ku rhandza ka Xikwembu. Xikombiso xa Yesu xi kandziyisa leswi vadyondzisiwa va yena va fanelaka va swi endla swilo swa nkoka evuton’wini bya vona, hikuva u vule leswaku “mudyondzisiwa un’wana ni un’wana la dyondzekeke swinene, ú ta va tanihi mudyondzisi wa yena.” (Luka 6:40) Nakambe loko Yesu a famba hi ndlela leyi Tata wakwe a lava yona, u kombise leswaku a ku ri ni “ku šura ka ku ṭaka” hi ku rhangisa ku rhandza ka Xikwembu emahlweni. (Pisalema 16:11; Mintirho 2:28) Xana wa swi twisisa leswaku sweswo swi vula yini? Loko valandzeri va Yesu va hlawula ku endla ku rhandza ka Xikwembu ku va nchumu wa nkoka evuton’wini bya vona, va ta tiphina hi “ku šura ka ku ṭaka” ni vutomi bya xiviri. (1 Timotiya 6:19) Hikwalaho ku ni swivangelo swo hlayanyana swo va hi endla ku rhandza ka Xikwembu ku va ka nkoka evuton’wini bya hina.

7, 8. Hi yihi miringo leyi Yesu a a langutane na yona, naswona hina hi nga dyondza yini eka leswi?

⁷ Endzhakunyana ka loko Yesu a kombise ku tinyiketela ka yena leswaku a endla ku rhandza ka Xikwembu, Diyavulosi u lave ku n’wi hambukisa. Hi ndlela yihi? Hi ku n’wi ringa etindhawini tinharhu. Nkarhi wun’wana ni wun’wana Yesu a a hlamula hi Matsalwa handle ko tilumaluma. (Matewu 4:1-10) Kambe a ha langutane ni miringo yin’wana emahlweni—ku xanisiwa, ku hlekuriwa, ku xengiwa hi Yudasi, swihehlo swa mavunwa naswona ku landzele rifu emhandzini ya nxaniso. Kambe, ku hava ni wun’we wa miringo leyi lowu endleke N’wana la tshembekaka wa Xikwembu leswaku a hambuka endleleni ya yena. Loko a ri exiyin’weni xo nonon’hwa, Yesu u khongerile a ku: “Ku nga endliwi ku rhandza ka mina, kambe a ku endliwe ku rhandza ka wena! . . . A ku endliwe ku rhandza ka wena!” (Matewu 26:39, 42) Xana un’wana ni un’wana wa hina a nga fanelanga a khumbeka hi xikombiso lexi lexinene lexi hi siyeriweke xona, lexi nga hi endlaka hi “chivirika eku khongeleni”?—Varhoma 12:12.

⁸ Ina, loko hi hlela leswi nga swa nkoka evuton’wini, nkongomiso wa Xikwembu wu ni mpfuno swinene, ngopfu-ngopfu loko hi langutane ni valala va ntiyiso ni lava lwisanaka ni ku rhandza ka Xikwembu. Tsundzuka loko Hosi yo tshembeka Davhida a kombele nkongomiso hi ku phikelela loko a langutane ni nkaneto wa nala. Hi ta twisisa nkoka wa leswi loko hi kambisisa xiphemu xa Pisalema 143. Leswi swi fanele swi hi pfuna ku twisisa ndlela leyi hi nga tiyisaka ha yona vuxaka bya hina bya munhu hi xiyexe na Yehovha ni ku tlhela swi hi tiyisa leswaku hi hambeta hi rhangisa ku endla ku rhandza ka Xikwembu evuton’wini bya hina.

Yehovha U Yingisa Swikhongelo Swa Hina A Tlhela A Swi Hlamula

9. (a) Hambileswi Davhida a a ri mudyohi, xana marito ni swiendlo swa yena swi paluxa yini? (b) Ha yini hi nga fanelanga hi lan’wa ku endla leswo lulama?

⁹ Hambileswi a a ri munhu la faka la nga mudyohi, Davhida a tshemba leswaku Yehovha u ta rhiya ndleve eka xikombelo xa yena. Hi ku titsongahata u komberile a ku: “Yehova, yingisa šikhongelo ša mina; u riya ndlev̌e, u yingisa ku khongela ka mina! Nḍi hlamule hikwalaho ka v̌uṭhembeki bya wena, ni ku lulama ka wena. U nga tengisani na nanḍa wa wena! Hikuv̌a a ku na munhu e ka la’v̌a hanyaka, l’a nga kumiwaka a lulamile mahlweni ka wena.” (Pisalema 143:1, 2) Davhida a a ku xiya ku nga hetiseki ka yena, kambe mbilu ya yena a yi helerile eka Xikwembu. Xisweswo, a tiyiseka leswaku u ta kuma nhlamulo hi ku lulama. Xana leswi a swi hi khutazi? Hambiloko hi tsandzeka ku fikelela ku lulama ka Xikwembu, hi nga tiyiseka leswaku xa hi yingisa loko timbilu ta hina ti helerile eka xona. (Eklesiasta 7:20; 1 Yohane 5:14) Loko hi ri karhi hi tiyisela eku khongeleni, hi fanele hi tiyimisela ku “hlula leswo biha hi leswinene” emasikwini lawa yo biha.—Varhoma 12:20, 21; Yakobo 4:7.

10. Ha yini Davhida a ve ni minkarhi ya maxangu?

¹⁰ Davhida a a ri ni valala tanihi leswi na hina hi nga na vona. Ku nga ha va ku ri ku balekela Sawulo, ku lava vutumbelo enhoveni, etindhawini leti nga fambekiki, kumbe leswi a ri hosi leyi a yi karhatiwa hi valala, Davhida u ve ni minkarhi ya maxangu. U hlamusele ndlela leyi leswi swi n’wi khumbeke ha yona: “Nala u šanisa moya wa mina . . . O nḍi susumetele munyameni . . . Moya wa mina wu ni gome e nḍeni ka mina, kutani mbilu ya mina yi kanakaneka e nḍeni ka mina.” (Pisalema 143:3, 4) Xana u tshame u va ni xivangelo xo va u titwa hi ndlela leyi?

11. Hi yihi minkarhi ya maxangu leyi malandza ya Xikwembu ya manguva lawa ma langutaneke na yona?

¹¹ Ntshikilelo wa nala, miringo leyi vangiwaka hi xiphiqo lexikulu xa timali, vuvabyi lebyikulu, kumbe swiphiqo swin’wana leswi dyisaka mbitsi swi vangele vanhu van’wana va Xikwembu leswaku va titwa va heleriwa hi matimba. Nkarhi wun’wana ni timbilu ta vona a ti twala onge ti khomiwe hi vusindza. Swi tikomba, onge hiloko un’wana ni un’wana wa vona u huwelerile a ku: “U hi nghenisile makhombyeni ya ku tala ne ku v̌av̌isekeni; kambe u ta tlhela u hi hanyisa . . . U ta tlhela u [hi] miyeta kambe!” (Pisalema 71:20, 21) Xana va pfuniwe hi ndlela yihi?

Ndlela Yo Langutana Ni Matshalatshala Ya Nala

12. Xana Hosi Davhida u langutane ni khombo ni miringo hi ndlela yihi?

¹² Pisalema 143:5 yi kombisa leswi Davhida a swi endleke loko a rhendzeriwe hi khombo ni miringo leyikulu: “Nḍi ehleketa mikari ya khale, nḍi anakanya hikwaŝo leŝi u ŝi endleke, nḍi ṭunḍuka hikwaŝo leŝi mav̌oko ya wena ma ŝi endleke.” Davhida u tsundzuke ku tirhisana ka Xikwembu ni malandza ya xona ni ndlela leyi yena hi yexe a ponisiweke ha yona. U anakanyisise hi leswi Yehovha a swi endleke hikwalaho ka vito ra Yena lerikulu. Ina, Davhida u hambete a anakanyisisa hi mintirho ya Xikwembu.

13. Loko hi langutana ni miringo, xana ku anakanyisisa hi swikombiso swa khale ni swa manguva lawa swa malandza yo tshembeka, swi nga hi pfuna hi ndlela yihi leswaku hi tiyisela?

¹³ Xana hakanyingi a hi ku tsundzuki ku tirhisana ka Xikwembu ni vanhu va xona? Hakunene ha tsundzuka! Leswi swi katsa rhekhodo leyi endliweke hi ‘vunyingi lebyikulu bya timbhoni’ ta le mahlweni ka minkarhi ya Vukreste. (Vaheveru 11:32-38; 12:1) Vakreste lava totiweke hi lembe-xidzana ro sungula na vona va khutaziwe ku “anakanya masiku lama hundzeke” ni leswi va swi tiyiseleke. (Vaheveru 10:32-34) Ku vuriwa yini hi mintokoto ya malandza ya Xikwembu eminkarhini ya manguva lawa, yo tanihi leyi hlamuseriwaka eka buku leyi nge, Timbhoni Ta Yehovha I Vahuweleri Va Mfumo Wa Xikwembu?a Timhaka leti tsariweke eka yona ni le ka tibuku tin’wana ta hi pfuna leswaku hi tsundzuka ndlela leyi Yehovha a pfuneke ha yona vanhu vakwe leswaku va tiyisela ku yirisiwa, ku khotsiwa, ku pfukeriwa hi mintshungu, ku xanisiwa ni ku tirhisiwa tanihi mahlonga etikampeni. Ku ve ni miringo ematikweni lama hlaseriweke hi tinyimpi, yo tanihi Burundi, Liberia, Rwanda ni le khale ka Yugoslavia. Loko nkaneto wu sungule ku tikomba, malandza ya Xikwembu ma tiyiserile hi ku hlayisa vuxaka lebyi tiyeke na Yehovha. Voko ra yena ri seketele lava endleke leswaku nchumu wa nkoka evuton’wini bya vona ku va ku endla ku rhandza ka yena.

14. (a) Hi xihi xikombiso xin’wana xa ku va Xikwembu xi seketela munhu la nga exiyin’weni lexi nga ha vaka xi fana ni xa hina? (b) Xana u dyondza yini eka xikombiso xexo?

¹⁴ Hambiswiritano, u nga ha vula leswaku a wu si tshama u xanisiwa hi ndlela yo tano ya tihanyi, naswona u nga ha vona onge swi nge ku humeleli nikatsongo. Hambiswiritano, nseketelo wa Xikwembu eka vanhu va xona minkarhi yin’wana a wu va nga leswi van’wana va nga ha swi langutaka swi ri swiyimo leswi nga tolovelekangiki. Xi seketele vanhu vo tala lava “tolovelekeke” eka swiyimo leswi “tolovelekeke.” Hi lexi xin’wana xa swikombiso swo tala leswi nga kona: Xana wa xi vona xifaniso lexi nga laha henhla, naswona xana xa ku pfuna leswaku u tsundzuka ku tirhisana ka Xikwembu ni vanhu va xona? Xi humelele eka Xihondzo xo Rindza xa December 1, 1996. Xana u yi hlayile mhaka leyi hlamuseriweke hi Penelope Makris? Mayana xikombiso xa risima swonghasi xa vutshembeki bya Vukreste! Xana wa swi tsundzuka leswi a swi tiyiseleke eka vaakelani, ndlela leyi a lweke ni mavabyi lamakulu ha yona ni matshalatshala lawa a ma endleke leswaku a hambeta ni vutirheli bya nkarhi hinkwawo? Ku vuriwa yini hi ntokoto wa yena lowu vuyerisaka wa le Mytilene? Yinhla leyi nga ya nkoka hi leyi, Xana swikombiso swo fana ni lexi u swi vona swi ri mpfuno eka hina hinkwerhu loko hi hlela leswi nga swa nkoka, hi ku rhangisa ku endla ku rhandza ka Xikwembu evuton’wini bya hina?

15. Hi swihi swiendlo swin’wana swa Yehovha leswi hi fanelaka hi anakanyisisa ha swona?

¹⁵ Swa hi tiyisa ku anakanyisisa hi mintirho ya Yehovha, hilaha Davhida a endleke hakona. Leswaku a hetisisa xikongomelo xa yena, Yehovha u endle lunghiselelo leri ponisaka hi ku tirhisa rifu ra N’wana wakwe, hi ku n’wi pfuxa eku feni ni ku n’wi kwetsimisa. (1 Timotiya 3:16) U simeke Mfumo wa yena wa le tilweni, u basise matilo hi ku susa Sathana ni madimona yakwe ni ku kondletela vugandzeri bya ntiyiso laha emisaveni. (Nhlavutelo 12:7-12) U simeke paradeyisi ya moya naswona u katekise vanhu vakwe hi ku va andzisa. (Esaya 35:1-10; 60:22) Vanhu va yena sweswi va nyikela vumbhoni byo hetelela ku nga si sungula nhlomulo lowukulu. (Nhlavutelo 14:6, 7) Ina, hi ni swo tala swo anakanyisisa hi swona.

16. Xana hi khutaziwa ku anakanyisisa ha yini, naswona leswi swi ta kandziyisa yini eka hina?

¹⁶ Ku hambeta hi anakanyisisa hi mintirho ya mavoko ya Xikwembu ematshan’weni yo tshama hi anakanyisisa hi leswi vanhu va tikarhatelaka swona, swi ta endla mianakanyo ya hina yi tiva swinene leswaku matimba ya Yehovha lama tirhaka a ma hluriwi hi nchumu. Kambe mintirho yoleyo a yi katsi mintirho ya xiviri leyi hlamarisaka ya ntumbuluko leyi nga ematilweni ni laha misaveni. (Yobo 37:14; Pisalema 19:1; 104:24) Mintirho ya xona leyi hlamarisaka yi katsa magoza yo ponisa vanhu va xona eka ntshikilelo wa nala, hilaha yi kombisiweke hakona eka leswi humeleleke vanhu va xona va minkarhi ya khale.—Eksoda 14:31; 15:6.

Ku Tiva Ndlela Leyi Hi Fanelaka Hi Famba Ha Yona

17. Xana Yehovha a a ri wa xiviri eka Davhida hi ndlela yihi, naswona leswi swi nga hi tiyisekisa njhani?

¹⁷ Davhida u khongelele mpfuno leswaku ndzhongo wa vutomi wu nga n’wi omeli: “Nḍi tlakusa mav̌oko ya mina e ka wena, moya wa nga wu ni tora hikwalaho ka wena, kukota misav̌a le’yi omeke. Yehova, hatlisa u nḍi hlamula! Moya wa mina wa titiv̌ala. U nga ṭhuki u nḍi fihlela mombo wa wena, leŝaku nḍi nga fani ni v̌anhu la’v̌a šikelaka e sireni.” (Pisalema 143:6, 7) Hambileswi Davhida a ri mudyohi, a a swi tiva leswaku Xikwembu xa xi xiya xiyimo xa yena. (Pisalema 31:7) Minkarhi yin’wana na hina hi nga ha vona onge vumoya bya hina byi le hansi swinene. Kambe xiyimo a hi lexi hetaka matimba. Yehovha la yingisaka swikhongelo swa hina, a nga ha hatlisisa ku kondleteriwa ka hina hi ku tirhisa vakulu lava nga ni rirhandzu leswaku va hi phyuphyisa, hi swihloko leswi nga eka Xihondzo xo Rindza, kumbe hi tinkulumo ta minhlangano leti ti tikombaka onge ti lo endleriwa hina.—Esaya 32:1, 2.

18, 19. (a) I yini leswi hi fanelaka hi swi kombela hi mbilu hinkwayo eka Yehovha? (b) Xana hi nga tiyiseka hi yini?

¹⁸ Ku tshemba ka hina Yehovha ku hi susumetela ku n’wi kombela hi ku: “Nḍi nantŝise rito ra tintŝalo ta wena . . . Hikuv̌a nḍi ṭhembile wena. Nḍi kombise ndlela leyi nḍi fanelaka ku famba ha yona!” (Pisalema 143:8) Xana u n’wi xumbadzile Makwerhu Makris, loyi a ri yexe le xihlaleni lexitsongo xa Greece? Kutani ke, xana wena a nga ku xumbadza loko u ri karhi u endla ku rhandza ka yena ku va nchumu wa nkoka evuton’wini bya wena? Diyavulosi ni malandza ya yena va lava ku ringeta ku sivela kumbe ku yimisa ntirho wa hina wo huwelela Mfumo wa Xikwembu hi ku helela. Ku nga khathariseki leswaku hi tirha ematikweni lawa vugandzeri bya ntiyiso byi pfumeleriwaka kona kumbe hi tirha laha byi tshikileriwaka kona, swikhongelo swa hina leswi nga ni vun’we swi pfumelelana ni xikombelo xa Davhida: “Yehova, nḍi kuṭule ka v̌alala v̌a mina! Nḍi tšhav̌ela ka wena.” (Pisalema 143:9) Ku sirheleleka ka hina eka khombo ra moya ku titshege hi ku tshama ka hina endhawini leyi nga vutumbelo ya La-nge-henhla-henhla.—Pisalema 91:1.

¹⁹ Ku tiyiseka ka hina hi swilo leswi nga swa nkoka ku ni xisekelo lexi tiyeke. (Varhoma 12:1, 2) Hikwalaho ke, lwisana ni matshalatshala ya misava yo ringeta ku ku rhwexa leswi yi ehleketaka leswaku i swa nkoka hi ku ya hi makungu ya vanhu. Hambeta u endla leswaku xiphemu xin’wana ni xin’wana xa vutomi bya wena xi kombisa lexi u xi tivaka leswaku i xa nkoka—ku nga ku endla ku rhandza ka Xikwembu.—Matewu 6:10; 7:21.

20. (a) Hi dyondze yini mayelana na Davhida eka Pisalema 143:1-9? (b) Namuntlha Vakreste va kombisa moya wa Davhida hi ndlela yihi?

²⁰ Tindzimana ta kaye leto sungula ta Pisalema 143 ti kandziyisa vuxaka lebyikulu bya munhu hi xiyexe bya Davhida na Yehovha. Loko a rhendzeriwe hi valala, hi ku ntshunxeka u kombele Xikwembu hi ku phikelela leswaku a kuma nkongomiso. U pfule mbilu ya yena, u lave mpfuno wa ndlela yo lulama leyi a nga ta famba ha yona. Swa fana ni namuntlha eka masalela lama totiweke hi moya lama nga emisaveni ni vanakulobye va vona. Vuxaka bya vona na Yehovha va byi languta byi ri bya risima loko va kombela kongomiso wa yena hi ku phikelela. Va hambeta va rhangisa ku endla ku rhandza ka Xikwembu, ku nga khathariseki mintshikilelo ya Diyavulosi ni misava.

21. Ha yini swi ri swa nkoka leswaku hi veka xikombiso lexinene loko hi lava ku dyondzisa van’wana lexi nga xa nkoka evuton’wini bya vona?

²¹ Vanhu va timiliyoni lava dyondzaka Bibele ni Timbhoni ta Yehovha va fanele va swi xiya leswaku ku endla ku rhandza ka Xikwembu i ka nkoka. Hi nga ha va pfuna leswaku va twisisa leswi loko hi bula hi ndzima 13 ya buku leyi nge Vutivi Lebyi Yisaka eVuton’wini Lebyi Nga Heriki, leyi kandziyisaka misinya ya milawu leyi katsekaka emhakeni yo va hi va vayingisi va Rito.b Kavula, va fanele va vona xikombiso lexinene eka hina xa leswi hi va dyondzisaka swona. Endzhaku ka nkarhinyana, na vona va ta yi tiva ndlela leyi va fanelaka ku famba ha yona. Loko vanhu lava va timiliyoni hi voxe va swi twisisa leswaku hi swihi leswi nga swa nkoka ngopfu evuton’wini bya vona, vo tala va ta susumeteleka ku teka magoza ya ku tinyiketela ni ku khuvuriwa. Ku sukela kwalaho, vandlha ri nga ha va pfuna leswaku va hambeta va famba endleleni ya vutomi.

22. Hi swihi swivutiso leswi nga ta kambisisiwa exihlokweni lexi landzelaka?

²² Vo tala ana se va swi xiya leswaku ku rhandza ka Xikwembu ku fanele ku va ka nkoka ngopfu evuton’wini bya vona. Hambiswiritano, xana Yehovha u hambeta a dyondzisa malandza ya yena leswaku ma endla ku rhandza ka yena hi ndlela yihi? Xana leswi swi va pfuna yini? Swivutiso leswi swi ta kambisisiwa kun’we ni bulo ra ndzimana-nkulu, Pisalema 143:10, exihlokweni lexi landzelaka.

[Tinhlamuselo ta le hansi]

Hi Yihi Nhlamulo Ya Wena?

◻ Hi ku tirhisa Vafilipiya 1:9, 10, hi nga simeka swilo swa nkoka hi ndlela yihi?

◻ Xana Yesu u kombise lexi nga xa nkoka evuton’wini bya yena hi ndlela yihi?

◻ Xana hi nga dyondza yini eka swiendlo swa Davhida loko a ri ehansi ka miringo?

◻ Xana Pisalema 143:1-9 yi pfuna hina namuntlha hi ndlela yihi?

◻ I yini lexi fanelaka ku va xa nkoka evuton’wini bya hina?

[Xifaniso lexi nga eka tluka 10]

Swiendlo swa Davhida swi kombise ku titshega ka yena hi Yehovha

[Xihlovo Xa Kona]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s