Xiviko Xa Vahuweleri Va Mfumo

Hosi Ya Vulavula

SWA khutaza ku tiva leswaku ka ha ri na vanhu lava nga eka swiyimo leswi tlakukeke emisaveni leyi, lava rhandzaka vutshembeki ni vululami ni lava khutazaka ku seketela timfanelo leti. Xikombiso i hosi etikweni ra Vantima laha ntirho wa Timbhoni ta Yehova wu yirisiweke. Inge xiviko xi hi byela:

“Sweswinyana mintlawa yo hambana-hambana ya vukhongeri yi khome ntsombano wa matiko hinkwawo edorobeni ra ka hina, naswona leswi swi katse Makhatoliki, Mapresbyterian, Mapentekosta ni van’wana. Hosi-nkulu yi komberiwe ku va na rito entsombanweni ku ya eku heleni ka swiyenge swo pfala. Lexi hlamariseke lava hlengeletaneke hinkwavo, exikarhi ka swilo swin’wana, yi va byele ku entisa vutshembeki ni mahanyelo lamanene lama tlakukeke ya Timbhoni ta Yehova, yi engetela leswaku loko hinkwavo a va fana ni Timbhoni ta Yehova, a ku ta va ni ku rhula erixakeni.

“Siku leri tlhandlamaka swirho leswi rhangelaka swa tikereke leswi yimelaka ntsombano swi tile exigodlweni xa Hosi ivi hi matimba swi lwa ni xiphemu xa vuvulavuri bya yona lexi dzuniseke Timbhoni ivi swi n’wi vutisa loko a a nga swi tivi leswaku Timbhoni ti yirisiwile etikweni. Hosi yi hlamule hi ku pfumela kambe yi swi byela leswaku a yi kumangi nandzu eka Timbhoni ta Yehova. Yi ye emahlweni yi ku: ‘Hi malembe hinkwawo ya mina tanihi Hosi-nkulu, ni kan’we ku hava ni un’we wa Timbhoni ta Yehova loyi a tisiweke ehubyeni ya mina hi ku endla swihoxo swo nyenyetsa. Hi tlhelo rin’wana, loko mintsumbula yi yiviwile epurasini, hakanyingi ku kumeka leswaku Mukhatoliki i khamba. Loko mintsumbula yi yiviwile, i Mupresbyterian la nga ni vutihlamuleri. Swirho swa kereke ya n’wina swi thyakise tiko ra mina hi ku xixa tinyimba, kutani ku hava ni un’we wa Timbhoni ta Yehova loyi a tisiweke ehubyeni ya mina hi milandzu yo tano. Xana milawu ya Xikwembu a yi siveli vuhomboloki byo tano, kumbe tikereke a ta ha bohiwi hi nawu wa Xikwembu?’ Vafundhisi a va hlamulanga.

“Endzhaku, Hosi-nkulu yi vitane vayimeri va Timbhoni ta Yehova ivi yi va khongotela ku va ni vukheta lebyinene leswaku ku nga vi na ku sola loku tisiwaka evitweni ra Xikwembu xa vona kun’we ni le henhla ka vito ra yona n’wini tanihi Hosi-nkulu leyi vulavuleleke Timbhoni ta Yehova.”

Xiviko xi vula leswaku sweswi vanhu vo tala lavantshwa va lwela ntiyiso. Mbhoni yin’wana yi vula leswaku sweswinyana yi swi kotile ku sungula tidyondzo ta Bibele na tihosi tinharhu endhawini ya ka vona, un’wana wa vona i Hosi-nkulu, kutani hinkwavo hi vunharhu va va kona eminhlanganweni ya Timbhoni ta Yehova!

Yehova Xikwembu u xiya lava va rhandzaka ntiyiso ni ku lulama ivi va vulavulela malandza ya yena.—Matewu 10:42.