Hinkwerhu A Hi Dzuniseni Yehovha!

“Ḍunisani Yehova e matlhelweni ya v̌uša.”—ESAYA 24:15.

1. Vito ra Yehovha a ri langutiwa njhani hi vaprofeta va yena, ku hambana ni langutelo rihi leri nga kona namuntlha eVujaganini?

YEHOVHA—vito ra Xikwembu leri vangamaka! Vona ndlela leyi vaprofeta lava tshembekeke va le minkarhini ya khale a va tsaka ha yona loko va vulavula hi vito rero! Hi ntsako a va dzunisa Hosi ya vona Leyikulu, Yehovha, leyi vito ra yona ri yi kombisaka tanihi Muhetisisi Lonkulu wa Swikongomelo. (Esaya 40:5; Yeremiya 10:6, 10; Ezekiyele 36:23) Hambi ku ri lava vuriwaka vaprofeta-ntsongo a va tiphofula swinene loko va dzunisa Yehovha. Un’wana wa vona a a ri Hagayi. Ebukwini ya Hagayi, leyi nga ni tindzimana ta 38, vito ra Xikwembu ri tirhisiwa minkarhi ya 35. Vuprofeta byo tano a byi twali kahle loko vito ra Yehovha ra risima ri siviwa hi xithopo lexi nge “Hosi,” hilaha lava vuriwaka vaapostola lavanene va Vujagana va ri hundzuluxelaka hakona eka vuhundzuluxeri bya vona bya Bibele.—Ringanisa 2 Vakorinto 11:5.

2, 3. (a) Xana vuprofeta byin’wana lebyi xiyekaka malunghana ni ku kondleteriwa ka Israyele byi hetiseke njhani? (b) Hi wihi ntsako lowu masalela ya Vayuda ni vanghana va vona va hlanganyeleke eka wona?

² Eka Esaya 12:2, ku tirhisiwa swivumbeko swimbirhi swa vito leri.a Muprofeta loyi wa twarisa: “V̌onani, Šikwembu i ku kuṭula ka mina; nḍi ta v̌a ni ku ṭhemba, a nḍa ha tšhav̌i ntšhumu, hikuv̌a [Jah, Yehovha, NW] i matimba ya mina ni risimu ra nga; hi yena l’a nḍi poniseke!” (Nakambe vona Esaya 26:4.) Xisweswo, malembe ya kwalamu ka 200 Israyele ri nga si ntshunxiwa evuhlongeni eBabilona, Jah Yehovha hi ku tirhisa muprofeta wakwe Esaya u nyikele xitiyisekiso xa leswaku yena i Mukutsuri wa vona la nga ni matimba hinkwawo. Vuhlonga byebyo a byi ta va kona ku sukela hi 607 ku ya fika eka 537 B.C.E. Esaya u tlhele a tsala: “Hi mina Yehova l’a endleke ŝilo hikwaŝo. . . . Nḍi byela ta Koreš, nḍi ku: I murisi wa mina, o ta endla ku ranḍa ka mina hikwaku; o ta ku ka Yerusalem: U ta tlhela u akiwa! E ka tempele, o ta ku: A ku akeriwe masungulo!” Xana a a ri mani Korexe loyi? Hilaha ku xiyekaka, a a ri Hosi Korexe wa Peresi, loyi a hluleke Babilona hi 539 B.C.E.—Esaya 44:24, 28.

³ Leswaku ku hetiseka marito ya Yehovha lama tsariweke hi Esaya, Korexe u humese xileriso lexi yaka eka Israyele la nga evuhlongeni a ku: “O kwihi e šikari ka ṅwina l’a nga wa tiko ra šona? Šikwembu ša yena a ši v̌e na yena, a ta tlhandlukela Yerusalem, e tikweni ra Yuda, a pfuša yindlu ya Yehova, Šikwembu ša Israel! Hi šona Šikwembu le’ši nge Yerusalem!” Masalela ya Vayuda lama tsakeke swinene swin’we ni Vanetinimi lava nga riki Vaisrayele ni vana va malandza ya Solomoni, va tlhelele eYerusalema. Va fike hi nkarhi lowu faneleke leswaku va tlangela Nkhuvo wa Mintsonga hi 537 B.C.E. ni ku endlela Yehovha magandzelo ealtarini ya yena. Eka lembe leri tlhandlamaka, hi n’hweti ya vumbirhi, va endle masungulo ya tempele ya vumbirhi, va ri karhi va ba huwa ya ntsako va dzunisa Yehovha.—Ezra 1:1-4; 2:1, 2, 43, 55; 3:1-6, 8, 10-13.

4. Esaya tindzima 35 na 55 ti ve ntiyiso hi ndlela yihi?

⁴ Vuprofeta bya Yehovha lebyi vulavulaka hi ku kondletela a byi ta hetiseka hi ndlela leyi vangamaka swinene eIsrayele: “Tiko ra ntlhohe ri ta ṭaka, ni tiko le’ri omeke; makwanḍasi ma ta ṭakisisa, ma rumbuka kukota koṅhwa! . . . Kutani v̌a ta v̌ona ku kwetsima ka Yehova, ni v̌ukulu bya Šikwembu ša hina.” “Mi ta huma hi ku ṭaka, mi ta fambisiwa hi ku rula, tinṭhav̌a ni ŝiṭunga ŝi ta ṭaka ngopfu e mahlweni ka ṅwina, . . . ŝi ta twarisa Yehova, ši ta v̌a šikombiso le’ši nga heriki, le’ši nga herisiwiki.”—Esaya 35:1, 2; 55:12, 13.

5. Hikwalaho ka yini ntsako wa Israyele wu ve wa xinkarhana?

⁵ Hambiswiritano, ntsako wolowo wu lo va wa xinkarhana. Vanhu lava a va akelane na vona va lave ku tihlanganisa na vona eripfumelweni leswaku va aka tempele. Eku sunguleni, Vayuda va ve ni xivindzi xo va byela va ku: “Mi nga ka mi nga akeli Yehova, Šikwembu ša hina, e yindlu ŝiṅwe na hina; hi ta akelela Yehova, Šikwembu ša Israel, hi ri ŝeru, hi laha hi lerisiweke ha kona hi hosi Koreš, hosi ya Persia.” Hiloko vaakelani volavo va hundzuka vakaneti lava nga ni khombo swinene. “V̌a sungula ku herisa matimba ya tiko ra Yuda ni ku v̌a tšhav̌isa ku aka.” Va tlhele va byela Ataserkisi mutlhandlami wa Korexe mavunwa, loyi a humeseke xileriso xo sivela ku akiwa ka tempele. (Ezra 4:1-24) Ntirho wu yimile ku ringana malembe ya 17. Lexi vavisaka, Vayuda va wele entlhan’wini wo rhandza rifuwo enkarhini wolowo.

“Yehova Wa Mav̌andla” Wa Vulavula

6. (a) Yehovha u angule njhani eka xiyimo lexi a xi ri kona le Israyele? (b) Hikwalaho ka yini nhlamuselo leyi tikombaka yi ri ya vito ra Hagayi yi faneleka?

⁶ Nilokoswiritano, Yehovha u kombise ‘ntamu ni matimba yakwe’ ehenhla ka Israyele hi ku rhumela vaprofeta va yena lava xiyekaka, ku nga Hagayi na Zakariya leswaku va lemukisa Vayuda hi vutihlamuleri bya vona. Vito ra Hagayi ri fambelana ni nkhuvo, hikuva ri vonaka onge ri vula leswaku “La Tswariweke eNkhubyeni.” Hilaha ku faneleke, u sungule ku profeta hi siku ro sungula ra n’hweti ya Nkhuvo wa Mintsonga, hi nkarhi lowu Vayuda a va fanele va “ṭaka ŝinene.” (Deteronoma 16:15) Hi ku tirhisa Hagayi, Yehovha u nyikele marungula ya mune hi nkarhi wa masiku lama tlulaka 112.—Hagayi 1:1; 2:1, 10, 20.

7. Marito ya Hagayi yo sungula ma fanele ma hi khutaza njhani?

⁷ Loko a sungula vuprofeta byakwe, Hagayi u te: “Ku v̌ula Yehova wa mav̌andla.” (Hagayi 1:2a) Xana ku nga va ku ri vamani “mav̌andla” lawa? I mavuthu ya Yehovha ya tintsumi, lawa minkarhi yin’wana eBibeleni ma vuriwaka mavuthu ya nyimpi. (Yobo 1:6; 2:1; Pisalema 103:20, 21; Matewu 26:53) Xana a swi hi khutazi namuntlha leswi Hosi Leyikulu Yehovha hi yexe a tirhisaka mavuthu lawa lama nga hluriwiki, ya le tilweni leswaku a kongomisa ntirho wa hina wo kondletela vugandzeri bya ntiyiso emisaveni?—Ringanisa 2 Tihosi 6:15-17.

8. I langutelo rihi leri khumbeke Israyele, naswona ku ve ni vuyelo byihi?

⁸ Xana a wu ri wihi mongo wa rungula ro sungula ra Hagayi? Vanhu a va ku: “Nkari a wu si fika; a hi wona nkari lowu yindlu ya Yehova yi nga akiwaka ha wona!” Ku akiwa ka tempele, leyi yimelaka ku kondleteriwa ka vugandzeri bya Xikwembu, a ku nga ha ri nchumu wo sungula eka vona. Se a va tiakela tiyindlu ta swiyimo swa le henhla swinene. Ku hlongorisa rifuwo a swi tsanise ku hisekela ka vona vugandzeri bya Yehovha. Hikwalaho ka sweswo, mikateko ya yena a yi susiwile. Masimu ya vona a ma nga ha humesi nchumu, naswona a va kayivela ni swiambalo swa nkarhi wa xixika lexi a xi titimela swinene. Mali leyi a va yi kuma a yi nga ha nyawuli, naswona a swi vonaka onge hi loko va cheletela mali enkwameni lowu nga ni timbhovo to tala.—Hagayi 1:2b-6.

9. Hi xihi xitsundzuxo xa matimba, lexi akaka, lexi Yehovha a xi nyikeleke?

⁹ Yehovha u nyikele ndzayo leyi ya matimba kambirhi a ku: “Langutisisani tindlela ta ṅwina e timbilwini ta ṅwina.” Handle ko kanakana, mufumi wa Yerusalema Zorubabele, na Yoxuwab muprista lonkulu, va teke goza naswona hi vurhena va khutaze vanhu hinkwavo leswaku va “yingisa rito ra Yehova, Šikwembu ša v̌ona, hi marito ya muprofeta Hagai, hi laha ingi a rumiwile i Yehova, Šikwembu ša v̌ona; kutani tiko ri tšhav̌a Yehova.” Ku tlula kwalaho, “Hagai, murumiwa wa Yehova, a v̌ulav̌ula ni v̌anhu hi ku lerisa ka Yehova, a ku: Nḍi na ṅwina, ku v̌ula Yehova.”—Hagayi 1:5, 7-14.

10. Yehovha u ma tirhise njhani matimba yakwe hikwalaho ka Israyele?

¹⁰ Vanhu van’wana va khale va le Yerusalema va nga ha va va anakanye leswaku ku kwetsima ka tempele leyi pfuxetiweke a ku nga ta va “ntšhumu” loko ku ringanisiwa ni ka tempele leyo sungula. Hambiswiritano, kwalomu ka masiku ya 51 endzhakunyana, Yehovha u byele Hagayi ku twarisa rungula ra vumbirhi. U huwelerile a ku: “Tiyisela, Zorobabel; ku v̌ula Yehova; tiyisela, na wena Yošua, muprista lo’nkulu, ṅwana Yotsadak! Tiyisani, na ṅwina hikwenu v̌anhu v̌a tiko leri, ku v̌ula Yehova, mi v̌a mi tira; hikuv̌a nḍi na ṅwina, ku v̌ula Yehova wa mav̌andla. . . . Mi nga tšhav̌i!” Yehovha, loyi hi nkarhi lowu faneleke a a ta tirhisa matimba ya yena hinkwawo leswaku a ‘tsekatsekisa tilo ni misava,’ u tiyisekise leswaku nkaneto wolowo hinkwawo, hambi ku ri nsivelo lowu humaka eka mufumi, wu herisiwa. Ku nga si hela malembe ya ntlhanu, ku akiwa ka tempele ku humelerile swinene.—Hagayi 2:3-6.

11. Xikwembu xi yi tate njhani tempele ya vumbirhi hi ‘ku kwetsima lokukulu’?

¹¹ Xitshembiso lexi xiyekaka xi hetisekile enkarhini wolowo: “Le’ŝi ranḍekaka ŝa matiko hikwawo ŝi ta ta kwala, nḍi v̌a nḍi ta ta yindlu leyi hi ku kwetsima, ku v̌ula Yehova wa mav̌andla.” (Hagayi 2:7) Swilo sweswo “le’ŝi ranḍekaka” a ku ri vanhu lava nga riki Vaisrayele, lava teke ku ta gandzela etempeleni yoleyo, tanihi leswi a yi kombisa ku kwetsima ka vukona bya yena lebyi xiyekaka. Xana tempele leyi leyi pfuxetiweke a yi ri njhani loko yi ringanisiwa ni leyi akiweke esikwini ra Solomoni? Muprofeta wa Xikwembu u twarisile: “Ku kwetsima ka yindlu ya le nḍaku ku ta tlula ka le’yo sungula, ku v̌ula Yehova wa mav̌andla.” (Hagayi 2:9) Eku hetisekeni ko sungula ka vuprofeta lebyi, tempele leyi pfuxetiweke yi tshame nkarhi wo leha ku tlula yindlu leyo sungula. A ya ha ri kona loko Mesiya a humelela hi 29 C.E. Ku tlula kwalaho, emahlweni ko va valala va yena lava gwineheke va n’wi dlaya hi 33 C.E., Mesiya hi yexe u yi kwetsimisile loko a chumayela ntiyiso eka yona.

12. Hi xihi xikongomelo lexi titempele timbirhi leto sungula ti xi hetisiseke?

¹² Tempele leyo sungula ni ya vumbirhi eYerusalema ti hetisise xikongomelo lexinene xo kombisa swivumbeko swa nkoka swa ntirho wa Mesiya wa vuprista, ni ku hlayisa vugandzeri bya Yehovha lebyi tengeke byi tshama byi ri kona emisaveni ku kondza Mesiya a humelela hi xiviri.—Vaheveru 10:1.

Tempele Ya Moya Leyi Kwetsimaka

13. (a) Hi swihi swiendlakalo leswi veke kona ku sukela hi 29 ku ya eka 33 C.E. malunghana ni tempele ya moya? (b) Hi xihi xiphemu xa nkoka lexi gandzelo ra Yesu ra nkutsulo ri veke na xona eka swiendlakalo leswi malunghana ni tempele ya moya?

¹³ Xana vuprofeta bya Hagayi lebyi vulavulaka hi ku kondletela byi ni nhlamuselo leyi hlawulekeke eminkarhini ya le ndzhaku? Hakunene byi na yona! Tempele leyi pfuxetiweke eYerusalema yi ve xivindzi xa vugandzeri hinkwabyo bya ntiyiso emisaveni. Kambe a yi fanekisela tempele ya moya leyi kwetsimaka swinene ku tlula yona. Yona yi sungule ku tirha hi 29 C.E. hi nkarhi wa ku khuvuriwa ka Yesu eNambyeni wa Yordani, loko Yehovha a tote Yesu ku va Muprista Lonkulu, naswona moya lowo kwetsima wu xikela ehenhla ka yena kukotisa tuva. (Matewu 3:16) Endzhaku ka loko Yesu a hete vutirheli bya yena bya laha misaveni hi ku fa rifu ra gandzelo, u pfuxeriwe etilweni, leri fanekiseriweke hi Vukwetsimisiso bya le tempeleni, naswona kwalaho u yise ntikelo wa gandzelo rakwe eka Yehovha. Leswi swi tirhe tanihi nkutsulo wo funengeta swidyoho swa vadyondzisiwa va yena, ni ku pfula ndlela ya leswaku va totiwa hi siku ra Pentekosta ya 33 C.E., leswaku va va vaprista-ntsongo etempeleni ya Yehovha ya moya. Vutirheli bya vona byo tshembeka exivaveni xa tempele emisaveni, ku kondza va fa, a byi ta endla leswaku va pfuxeriwa etilweni enkarhini lowu taka, leswaku ntirho wa vuprista wu ya emahlweni.

14. (a) Hi wihi ntsako lowu a wu fambisana ni ku hisekela ntirho ka vandlha ra Vukreste ro sungula? (b) Hikwalaho ka yini ntsako lowu wu ve wa xinkarhana?

¹⁴ Magidi ya Vayuda lava hundzukeke—kutani ku landzela Vamatiko—va khitikanele evandlheni rero ra Vukreste, naswona va hlanganyerile eku twariseni ka mahungu lamanene ya vulawuri bya Mfumo wa Xikwembu lowu taka ehenhla ka misava. Endzhaku ka malembe ya kwalomu ka 30, muapostola Pawulo u swi kotile ku vula leswaku mahungu lamanene ma chumayeriwile “eka swivumbiwa hinkwaswo leswi nge hansi ka tilo.” (Vakolosa 1:23) Kambe endzhaku ka ku fa ka vaapostola, ku sungule vugwinehi lebyikulu, naswona ku vonakala ka ntiyiso ku sungule ku tsana. Vukreste bya ntiyiso a byi funengetiwe hi mimpambukwa ya Vujagana, leyi sekeriweke eka tidyondzo ni tifilosofi ta vuhedeni.—Mintirho 20:29, 30.

15, 16. (a) Xana vuprofeta byi hetiseke njhani hi 1914? (b) Hi kwihi ku hlengeleta loku a ku endleka emakun’wini ya lembe-xidzana ra vu-19 ni le ku sunguleni ka lembe-xidzana ra vu-20?

¹⁵ Ku hundze malembe-xidzana yo hlayanyana. Kutani, hi va-1870, ntlawa wa Vakreste lava tshembekeke wu sungule ku dyondza Bibele hi vuenti. Hi ku tirhisa Matsalwa, wu swi kotile ku kombetela eka lembe ra 1914 tanihi leri funghaka makumu ya “minkarhi ya vamatiko leyi vekiweke.” Ku sukela enkarhini wolowo “mikari” ya nkombo yo fanekisela (malembe ya 2520 ya vulawuri bya vanhu lebyi fanaka ni xivandzana) yi herile ivi Kreste Yesu a vekiwa exiluvelweni xa vuhosi etilweni—Loyi a nga na ‘mfanelo ya le nawini’ yo va Hosi ya le misaveni ya Vumesiya. (Luka 21:24, NW; Daniyele 4:25; Ezekiyele 21:31, 32) Ngopfu-ngopfu ku sukela hi 1919 ku ya emahlweni, Swichudeni leswi swa Bibele, leswi namuntlha swi tiviwaka swi ri Timbhoni ta Yehovha, a swi ri karhi swi hangalasa mahungu lamanene, ya Mfumo lowu taka hi matimba, emisaveni hinkwayo. A ku ri hi 1919 laha magidi ma nga ri mangani ya vona ma amukeleke xirhambo xo teka goza, lexi humesiweke entsombanweni eCedar Point, Ohio, U.S.A. Va ye va engeteleka hi nhlayo ku fikela hi lembe ra 1935, loko 56 153 wa vona va vike ntirho wa nsimu. Hi lembe rero, 52 465 wa vona va hlanganyerile eku dyeni ka swifanekiselo swa xinkwa ni vhinyo eka Xitsundzuxo xa lembe na lembe xa rifu ra Yesu, xisweswo va kombisa ntshembo wa tona wo va vaprista swin’we na Kreste Yesu exiphen’wini xa le tilweni xa tempele ya Yehovha leyikulu ya moya. Nakambe va ta tirha na yena tanihi tihosi-kulobye eMfun’weni wa yena wa Vumesiya.—Luka 22:29, 30; Varhoma 8:15-17.

¹⁶ Hambiswiritano, Nhlavutelo 7:4-8 na 14:1-4 yi komba leswaku ntsengo wa nhlayo ya Vakreste lava lava totiweke i 144 000 ntsena, laha vunyingi bya vona byi hlengeletiweke eka lembe-xidzana ro sungula, ku nga si sungula vugwinehi lebyikulu. Ku sukela eku heleni ka lembe-xidzana ra vu-19 ni ku ya fika eka ra vu-20, Yehovha a a ri karhi a hlengeleta ro hetelela ntlawa lowu wa vanhu lava humaka ematikweni hinkwawo, lava basisiwaka hi Rito rakwe, leswaku va vuriwa lava lulameke hikwalaho ko kombisa ripfumelo eka gandzelo ra ndzivalelo ra Yesu, kutani eku heteleleni va funghiwa va va Vakreste lava totiweke leswaku va endla nhlayo leyi heleleke ya lava 144 000.

17. (a) Hi kwihi ku hlengeleta loku a ku ri karhi ku ya emahlweni ku sukela hi va-1930? (b) Hikwalaho ka yini Yohane 3:30 yi ri ya nkoka emhakeni leyi? (Nakambe vona Luka 7:28.)

¹⁷ I yini leswi landzelaka loko nhlayo hinkwayo ya vatotiwa yi hlawuriwile? Hi 1935, entsombanweni lowu nga rivalekiki lowu a wu ri eWashington, D.C., U.S.A., ku tivisiwe leswaku “ntshungu lowukulu” wa Nhlavutelo 7:9-17 i ntlawa lowu a wu ta vonaka “endzhaku” ka lava 144 000, naswona ntshembo wa wona a ku ta va vutomi lebyi nga heriki emisaveni ya paradeyisi. Endzhaku ko n’wi tivisa erivaleni Yesu la totiweke, Yohane lowo Khuvula, loyi ku pfuxiwa ka yena ku nga ta va ka laha misaveni tanihi un’wana wa “tinyimpfu tin’wana,” malunghana na Mesiya u te: “Yena ú fanele ku ya a kula, mina ndzi ya ndzi tsongahala.” (Yohane 1:29; 3:30; 10:16; Matewu 11:11) Ntirho wa Yohane lowo Khuvula, wo lunghiselela Mesiya vadyondzisiwa a wu hela tanihi leswi Yesu a tekeke ntirho wo hlawula nhlayo leyi engetelekeke ya lava a va ta va exikarhi ka lava 144 000. Hi va-1930 swilo swi sungule ku cinca. Nhlayo ya lava “vitaniweke ni ku hlawuriwa” leswaku va va exikarhi ka lava 144 000, yi hungutekile, kasi nhlayo ya “ntshungu lowukulu” wa “tinyimpfu tin’wana,” yi sungule ku andza swinene. Ntshungu lowu lowukulu wu hambeta wu andza tanihi leswi mafambiselo lawa yo biha ya misava ma yaka ma tshinelela makumu ya wona eArmagedoni.—Nhlavutelo 17:14b, NW.

18. (a) Hikwalaho ka yini hi ku tiyiseka hi nga langutelaka leswaku “timiliyoni leti hanyaka sweswi a ti nge fi”? (b) Hikwalaho ka yini hi fanele hi tekela Hagayi 2:4 enhlokweni, hi ku chivirika?

¹⁸ Eku sunguleni ka va-1920, nkulumo ya le rivaleni leyi twarisiweke swinene, leyi nyikeriweke hi Timbhoni ta Yehovha a yi ri ni xihloko lexi nge “Timiliyoni Leti Hanyaka Sweswi A Ti Nge Fi.” Leswi swi nga ha va swi kombise ku tiyiseka ku tlula mpimo enkarhini wolowo. Kambe namuntlha xiga xexo xi nga vuriwa hi ku tiyiseka lokukulu. Ku engeteleka ka ku vonakala ka vuprofeta bya Bibele, swin’we ni mpfilumpfilu lowu nga kona emisaveni leyi leyi faka, swi kombisa kahle leswaku makumu ya mafambiselo ya Sathana ma tshinele swinene! Xiviko xa Xitsundzuxo xa 1996 xi komba leswaku a ku ri ni vanhu va 12 921 933, lava eka vona ku ngo va 8757 ntsena (,068 wa tiphesente) wa lava kombiseke ntshembo wa vona wa le tilweni hi ku hlanganyela eku dyeni ka swifanekiselo. Ku kondleteriwa ka vugandzeri bya ntiyiso ku ta hela ku nga ri khale. Kambe hi nga tshuki hi loloha entirhweni wolowo. Ina, Hagayi 2:4 ya hlamusela: “Tiy[ani], na ṅwina hikwenu, v̌anhu v̌a tiko leri, ku v̌ula Yehova, mi v̌a mi tira; hikuv̌a nḍi na ṅwina, ku v̌ula Yehova wa mav̌andla.” Onge hi nga lwela leswaku mintshikilelo ya ku rhandza swilo leswi vonakaka kumbe ku rhandza misava, yi nga tshuki yi tsanisa ku chivirikela ka hina ntirho wa Yehovha!—1 Yohane 2:15-17.

19. Hi nga hlanganyela njhani eku hetisekeni ka Hagayi 2:6, 7?

¹⁹ Hi ni lunghelo leri tsakisaka ro hlanganyela eku hetisekeni ka manguva lawa ka Hagayi 2:6, 7: “Hikuv̌a Yehova wa mav̌andla o v̌ulav̌ula, a ku: Nḍa ha ta ṭekaṭekisa kaṅwe, e nkarini lo’wu nga kusuhana, e tilo ni misav̌a, ni lwandle ni tiko le’ri omeke. Nḍi ta ṭekaṭekisa ni matiko hikwawo, kutani le’ŝi ranḍekaka ŝa matiko hikwawo ŝi ta ta kwala, nḍi v̌a nḍi tata yindlu leyi hi ku kwetsima, ku v̌ula Yehova wa mav̌andla.” Makwanga, vuhomboloki ni rivengo swi hangalakile emisaveni ya lembe-xidzana leri ra vu-20. Entiyisweni yi le masikwini ya yona yo hetelela, naswona Yehovha u sungurile ku yi “ṭekaṭekisa” hi ku tirhisa Timbhoni ta yena ku ‘huwelela siku ra yena ra ku tirihisela.’ (Esaya 61:2, ringanisa NW.) Ku tsekatsekisa loku ko sungula ku ta chaputa loko misava yi lovisiwa eArmagedoni, kambe ku nga si fika nkarhi wolowo, Yehovha u hlengeleta “le’ŝi ranḍekaka ŝa matiko hikwawo” leswaku swi endla ntirho wakwe—ku nga vanhu lava titsongahataka, lava fanaka ni tinyimpfu, emisaveni. (Yohane 6:44) “Ntshungu [lowu] lowukulu” sweswi wu ‘nyikela ntirho wo kwetsima’ exivaveni xa laha misaveni xa le ndlwini ya yena ya vugandzeri.—Nhlavutelo 7:9, 15.

20. Hi kwihi laha xuma xa risima swinene xi nga kumiwaka kona?

²⁰ Ntirho lowu endliwaka etempeleni ya Yehovha ya moya wu vuyerisa swinene ku tlula rifuwo rihi na rihi ra swilo leswi vonakaka. (Swivuriso 2:1-6; 3:13, 14; Matewu 6:19-21) Ku tlula kwalaho, Hagayi 2:9 ya vika: “Ku kwetsima ka yindlu ya le nḍaku ku ta tlula ka le’yo sungula, ku v̌ula Yehova wa mav̌andla; e šiv̌andleni leši, nḍi ta v̌eka ku rula, ku v̌ula Yehova wa mav̌andla.” Xana marito lawa ma vula yini eka hina namuntlha? Xihloko xa hina lexi tlhandlamaka xi ta hi byela.

[Tinhlamuselo ta le hansi]

Swivutiso Swa Mpfuxeto

◻ Hi xihi xikombiso xa vaprofeta lexi hi faneleke hi xi landzela malunghana ni vito ra Yehovha?

◻ Hi xihi xikhutazo lexi hi xi kumaka eka rungula ra Yehovha ra matimba leri yaka eka Israyele la kondleteriweke?

◻ Hi yihi tempele yo kwetsima ya moya leyi tirhaka namuntlha?

◻ Hi kwihi ku hlengeleta loku endliweke hi ku landzelelana eka lembe-xidzana ra vu-19 ni ra vu-20, leswi endleke leswaku ku va ni ku langutela kwihi lokukulu?

[Swifaniso leswi nga eka tluka 7]

Mavuthu ya Yehovha ya le tilweni ma kongomisa ni ku seketela Timbhoni ta yena emisaveni