Ku Va Ni Ripfumelo Eka Xikwembu Xana Swi Lava Singita?

ALBERT a a ri ni malembe lama tlulakanyana 20 loko a sungula ku lavisisa Xikwembu. U kambisise vukhongeri byo tala kambe a nga eneriseki. Loko a hlaya swiphemu swo karhi swa Bibele, u vone ndlela leyi Xikwembu xi tirhisaneke ha yona ni vanhu vo tanihi Nowa, Abrahama, Sara na Muxe. Albert u tikume a tshinele eka Xikwembu xa Bibele. Hambiswiritano, xana a ta tiyiseka leswaku Xikwembu xi kona hakunene?

Madyambu man’wana Albert u ye exihundleni laha a khongeleke kona a ku, “Xikwembu, ndzi kombela u ndzi nyika xikombiso—xin’wana ni xin’wana lexi nga ta kombisa leswaku u kona.” Albert u rindze nkarhi wo leha. Loko a vona ku nga endleki nchumu, ku langutela ka yena “ku hundzuke gome, vuhava, ni ku hlundzuka.”

Ku fana na Albert, vo tala va titwa va lavisise Xikwembu kambe va nga xi kumi. Va nga ha va va pfilunganyiwe hi tidyondzo ta vafundhisi kumbe va hetiwe ntshembo hi bindzu ra vavuri va evhangeli eka thelevhixini. Hi ku tsemiwa nhlana hi vukanganyisi lebyi nga kona eka vapfumeri-kulobye va vona, van’wana a va tiyiseki leswaku va tshemba yini. Kambe, Hosi Davhida wa le Israyele wa khale u tiyisekise n’wana wa yena Solomoni a ku: “Kungaku loko u [xi] lav̌isisa [Xikwembu], u ta [xi] kuma.”—1 Tikronika 28:9.

Kutani, xana Xikwembu xi tikombisa njhani? Xana u fanele u rindzela xikombiso—xiendlakalo lexi tlulaka matimba ya ntumbuluko lexi nga ta ku kombisa leswaku Xikwembu xi kona? Hi ku ya hi nhlawulo wa sweswinyana lowu vikiweke eka magazini wa Time, vanhu vo tlula mbirhi-xa-nharhu va Maamerika va tshembela eka masingita. Xihloko xi tlhela xi vula leswaku “tikereke leti andzaka swinene le Amerika i mintlawa ya Charismatic ni Pentecostal leyi vugandzeri bya yona byi katsaka ‘mahlori ni swihlamariso.’”

Xana hakunene ku pfumela eka Xikwembu swi lava “mahlori ni swihlamariso”? Xi ma tirhisile masingita enkarhini lowu hundzeke. Hi xikombiso: Sawulo wa Tarso, loyi a a xanisa valandzeri va N’wana wa Xikwembu Yesu Kreste, u vone masingita loko a ri endleleni yo huma eYerusalema a ya eDamaska. Ku langutana loku ka singita Yesu la pfuxiweke ku yise eku hundzukeni ka Sawulo. (Mintirho 9:1-22) Xisweswo khale ka muxanisi u hundzuke muapostola Pawulo—un’wana wa vayimeri-nkulu va Vukreste!

Kambe xana minkarhi hinkwayo masingita ma pfuxa n’wangulo wo tano lowunene? Xana ripfumelo ra xiviri eka Xikwembu ri titshege hi ku va munhu a vone singita ro karhi?

[Xifaniso lexi nga eka tluka 3]

N’wana wa Xikwembu u vulavule na Sawulo hi singita le Tarso. Xana u fanele u langutela singita?