Swivutiso Swa Vahlayi

Xana ku nga vuriwa leswaku ku twisisiwa loku ka ha ku lulamisiwaka ka rito “xitukulwana” eka Matewu 24:34 (NW) ku pfumelela mianakanyo ya leswaku makumu ya mafambiselo lawa ya swilo ma nga ha teka nkarhinyana wo leha?

Sweswo a hi ntiyiso. Ku hambana ni sweswo, matwisiselo lawa ya ha ku antswisiwaka ya mhaka leyi ma fanele ma hi pfuna ku tshama hi langutele makumu nkarhi na nkarhi. Ha yini ku nga vuriwaka leswi?

Phela, tanihi laha Xihondzo xo Rindza xa November 1, 1995, xi hlamuseleke hakona, Yesu u tirhise xivulwa “xitukulwana lexi” eka vanhu vo homboloka va le nkarhini wa yena. (Matewu 11:7, 16-19; 12:39, 45; 17:14-17; Mintirho 2:5, 6, 14, 40) A ku nga ri nhlamuselo ya ku leha ka nkarhi lowu vekiweke lowu sungulaka hi siku ro karhi.

Kahle-kahle, “Swivutiso Swa Vahlayi” eka nkandziyiso wolowo wa Xihondzo xo Rindza swi nyikele nyingiso eka tinhla-nkulu timbirhi: “Xitukulwana xa vanhu a xi nge tekiwi xi ri nkarhi lowu nga ni malembe yo karhi lama vekiweke” naswona, “Vanhu va xitukulwana va hanya nkarhi wo koma swinene.”

Hakanyingi hi tirhisa rito “xitukulwana” hi ndlela leyi. Hi xikombiso, hi nga ha ku, ‘Masocha ya xitukulwana xa Napoléon a ma nga tivi nchumu mayelana ni swihaha-mpfhuka ni tibombo ta athomo.’ Xana hi ta va hi vulavula ntsena hi masocha lama velekiweke lembe rin’we na Napoléon? Xana hi ta va hi vulavula ntsena hi masocha ya Mafurwa lama feke emahlweni ka Napoléon? Nikatsongo; hi ku tirhisa ko tano ka rito “xitukulwana” hi ta va hi nga ringeti ku veka malembe ya nhlayo yo karhi. Kambe, hi ta va hi kombetela eka nkarhi wo koma swinene, ku nga ri madzana ya malembe ku sukela eka nkarhi wa Napoléon ku ya enkarhini lowu landzeleke.

Swa fana ni ku twisisa ka hina leswi Yesu a swi vuleke evuprofeteni bya yena lebyi a byi nyikeleke eNtshaveni ya Mitlhwari. Ku hetiseka ka swiphemu leswi swo hambana-hambana swa vuprofeta byolebyo swi kombisa leswaku makumu ya mafambiselo lawa ma le kusuhi. (Matewu 24:32, 33) Tsundzuka leswaku hi ku ya hi Nhlavutelo 12:9, 10, loko ku simekiwa Mfumo wa Xikwembu wa le tilweni hi 1914, Sathana u cukumeteriwe emisaveni. Nakambe Nhlavutelo yi vula leswaku Sathana sweswi u karihe swinene. Ha yini? Hikuva wa swi tiva leswaku “nkarhi wa yena wu komile.” (Xiitaliki i xerhu.)—Nhlavutelo 12:12.

Xisweswo a swi fanerile leswi Xihondzo xo Rindza xa November 1 a xi ri ni xihlokwana lexi nge “Hitekani!” Hilaha ku faneleke ndzimana leyi landzelaka yi te: “A hi fanelanga hi tiva nkarhi lowu kongomeke wa swiendlakalo. Ematshan’weni ya sweswo, ku languta ka hina ku fanele ku va eku hitekeni, hi hlakulela ripfumelo leri tiyeke ni ku tshama hi khomekile entirhweni wa Yehovha—ku nga ri eku hlayeleni ka nkarhi.” Kutani xi tshahe marito ya Yesu lama nge: “Tlharihani mi hiteka, hikuva a mi tivi leswaku nkarhi wu ta va rini. Kutani leswi ndzi mi byelaka swona, ndzi byela hinkwavo, ndzi ri: ‘Hitekani!’”—Marka 13:33, 37.