Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w97 5/15 matl. 30-31
  • Epafrasi—‘Mutirheli La Tshembekaka Wa Kreste’

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Epafrasi—‘Mutirheli La Tshembekaka Wa Kreste’
  • Xihondzo xo Rindza Xi Huwelela Mfumo Wa Yehovha—1997
  • Swihloko
  • Tinhlokomhaka Tin'wana Leti Yelana Na Yona
  • Muvuri Wa Evhangheli Wa Le Nkoveni Wa Lycus
  • Xiviko Xa Epafrasi
  • Wanuna Loyi A A Teka Xikhongelo Xi Ri Xa Nkoka
  • Pfuna Van’wana Leswaku Va Famba Hi Mukhuva Lowu Fanelaka Eka Yehovha
    Xihondzo xo Rindza Xi Huwelela Mfumo Wa Yehovha—2000
  • Mi Yima Mi Hetiseka Mi Va Ni Ku Khorwiseka Loku Tiyeke
    Xihondzo xo Rindza Xi Huwelela Mfumo Wa Yehovha—2000
  • Buku Ya Bibele Ya Vu-51—Vakolosa
    “Matsalwa Hinkwawo Ma Huhuteriwe Hi Xikwembu Naswona Ma Pfuna”
  • “Loko Mi Tiva Swilo Leswi, Ma Tsaka Loko Mi Swi Endla”
    Xihondzo xo Rindza Xi Huwelela Mfumo Wa Yehovha (Nkandziyiso Wa Vandlha)—2018
Vona Swo Tala
Xihondzo xo Rindza Xi Huwelela Mfumo Wa Yehovha—1997
w97 5/15 matl. 30-31

Epafrasi—‘Mutirheli La Tshembekaka Wa Kreste’

IMANI la simekeke mavandlha ya Vukreste le Korinto, Efesa na le Filipiya? Kumbexana a wu ta hlamula hi ku hatlisa: ‘Pawulo, “muapostola wa vamatiko.”’ (Varhoma 11:13) A wu ta va u hlamule kahle.

Hambiswiritano, i mani la simekeke mavandlha eKolosa, Hiyerapoli na le Lawodikiya? Hambileswi hi nga tiyisekiki, swi nga ha endleka ku ri wanuna loyi a a vuriwa Epafrasi. Hambiswiritano, kumbexana u nga tsakela ku tiva swin’wana leswi engetelekeke malunghana ni muvuri loyi wa evhangeli, tanihi leswi a vitaniwaka ‘mutirheli la tshembekaka wa Kreste.’—Vakolosa 1:7.

Muvuri Wa Evhangheli Wa Le Nkoveni Wa Lycus

Vito Epafrasi i nkomiso wa Epafrodito. Kambe Epafrasi a hi yena Epafrodito wa le Filipiya. Epafrasi a huma eKolosa, rin’wana ra mintlawa yinharhu ya mavandlha ya Vukreste enkoveni wa Nambu wa Lycus, le Asia Minor. Kolosa a ri ri eka tikhilomitara ta 18 ku suka eLawodikiya na tikhilomitara ta 19 ku suka eHiyerapoli, exifundzheni xa khale xa Frigiya.

Bibele a yi yi vuli hi ku kongoma ndlela leyi mahungu lamanene ya Mfumo wa Xikwembu ma fikeke ha yona le Frigiya. Hambiswiritano, vanhu va le Frigiya a va ri kona le Yerusalema hi siku ra Pentekosta ya 33 C.E., kumbexana van’wana va vona a va huma eKolosa. (Mintirho 2:1, 5, 10) Hi nkarhi wa vutirheli bya Pawulo bya le Efesa (kwalomu ka 52-55 C.E.), vumbhoni lebyi nyikeriweke endhawini yoleyo a byi ri ni matimba swinene naswona a byi tirha lerova ku nga ri Vaefesa ntsena kambe na “hinkwavo lava akeke etikweni ra Asiya, Vayuda ni vamatiko, va twa rito ra Hosi.” (Mintirho 19:10) Swi nga ha vonaka onge Pawulo a nga chumayelanga mahungu lamanene eNkoveni wa Lycus hinkwawo, tanihi leswi vo tala lava veke Vakreste exifundzheni xolexo va nga kalangiki va n’wi vona.—Vakolosa 2:1.

Hi ku ya hi Pawulo, loyi a dyondziseke Vakolosa malunghana ni “tintswalo ta Xikwembu hi ntiyiso wa tona” a ku ri Epafrasi. Leswi Pawulo a n’wi vitanaka mutirhi-kulobye “la tirhelaka Kriste hi ku tshembeka ematshan’wini ya hina” swi kombisa leswaku Epafrasi a ri muvuri wa evhangeli la hisekaka endhawini yoleyo.—Vakolosa 1:6, 7.

Muapostola Pawulo na muvuri wa evhangeli Epafrasi a va karhateka swinene hi vuhlayiseki bya moya bya vapfumeri-kulobye eNkoveni wa Lycus. Tanihi “muapostola wa vamatiko,” Pawulo u fanele a tsakile loko a kuma mahungu ya nhluvuko wa vona. Hakunene, Pawulo u twe Epafrasi malunghana ni xiyimo xa moya xa Vakolosa.—Vakolosa 1:4, 8.

Xiviko Xa Epafrasi

Vakolosa a va langutane ni swiphiqo leswikulu swinene lerova va byela Epafrasi leswaku a teka riendzo ro leha a ya eRhoma hikwalaho ka xikongomelo xo karhi xo kanela timhaka leti na Pawulo. Xiviko lexi nga ni vuxokoxoko lexi vuriweke hi Epafrasi entiyisweni hi xona xi susumeteleke Pawulo ku tsala mapapila mambirhi lama yaka eka vamakwerhu volavo lava a a nga va tivi. Rin’wana a ku ri papila leri yaka eka Vakolosa. Papila lerin’wana, leri handle ko kanakana va nga tshamangiki na rona, ri rhumeriwe le Lawodikiya. (Vakolosa 4:16) Swa twala ku ehleketa leswaku vundzeni bya mapapila wolawo a ma endleriwe ku angula kahle eka swilaveko swa Vakreste volavo hilaha swi xiyiweke ha kona hi Epafrasi. Xana hi swihi swilaveko leswi a swi voneke? Naswona xana leswi swi hi byela yini hi vumunhu bya yena?

Papila leri yaka eka Vakolosa ri vonaka ri kombisa leswaku Epafrasi a a vilerisiwa hileswaku Vakreste va le Kolosa a va ri ekhombyeni ra tifilosofi ta vuhedeni leti katsaka ku tilan’wa, vungoma ni vukholwa-hava byo gandzela swifaniso. Ku tlula kwalaho, dyondzo ya Vayuda ya ku titsona swakudya ni ku tlangela masiku yo karhi swi nga ha va swi kucetele swirho swin’wana swa vandlha.—Vakolosa 2:4, 8, 16, 20-23.

Leswi Pawulo a tsaleke hi timhaka leti swi hi kombisa ndlela leyi Epafrasi a a xalamuke ha yona ni ku tshembeka eka swilaveko swa Vakreste-kulobye. U kombise nkhathalelo wa rirhandzu eka vuhlayiseki bya vona bya moya, a xiya makhombo ya ndhawu leyi a va tshama eka yona. Epafrasi u lave ndzayo ya Pawulo, kutani leswi swi kombisa leswaku a a titsongahata. Kumbexana u vone xilaveko xo kuma xitsundzuxo eka un’wana la nga ni ntokoto swinene. Hambiswiritano, Epafrasi u endle hi vutlhari.—Swivuriso 15:22.

Wanuna Loyi A A Teka Xikhongelo Xi Ri Xa Nkoka

Loko a gimeta papila leri a ri rhumeleke Vakreste va le Kolosa, Pawulo u ri: “Epafra[si], loyi a nga un’wana wa n’wina, nandza wa Kriste Yesu, wa mi rungula; wa mi anakanya swinene masiku hinkwawo emikhongelweni ya yena, a kombela leswaku mi va lava hetisekeke ni lava tiyeke, eku endleni ka hinkwaswo leswi Xikwembu xi swi rhandzaka. Ndzi mbhoni leswaku u tikarhatela n’wina swinene, n’wina ni lava nga le Lawodikiya, ni le Hiyerapoli.”—Vakolosa 4:12, 13.

Ina, hambiloko a ha ri “mubohiwa-kulo[bye]” na Pawulo le Rhoma, Epafrasi a anakanya hi vamakwavo va yena lava rhandzekaka le Kolosa, Lawodikiya na Hiyerapoli ni ku va khongelela. (Filemoni 23) Hi ku kongoma, ‘u tikarhatele’ vona exikhongelweni. Hi ku ya hi xidyondzi D. Edmond Hiebert, rito ra Xigriki leri tirhisiweke laha ri vula “ntirho lowu lavaka matimba swinene ni lowu tikaka,” xin’wana lexi fanaka ni “nhlomulo” wa mianakanyo lowu tokotiweke hi Yesu Kreste loko a ri karhi a khongela entangeni wa Getsemani. (Luka 22:44) Epafrasi hi mbilu hinkwayo a a navela leswaku vamakwavo va yena va moya va xinuna ni va xisati va kuma matimba ni ku kula hilaha ku heleleke eka Vukreste. Mawaku ndlela leyi makwerhu loyi a tikarhatelaka swilo swa moya a veke nkateko emavandlheni ha yona!

Tanihi leswi Epafrasi a a vitaniwa “nandza-kulorhi la rhandzekaka,” a swi kanakanisi leswaku u tiendle la rhandzekaka eka Vakreste-kulobye. (Vakolosa 1:7) Loko swi koteka, swirho hinkwaswo swa vandlha swi fanele swi tinyikela hi ku ntshunxeka ni hi rirhandzu. Hi xikombiso, ku nga ha nyikeriwa nyingiso eku pfuneni lava vabyaka, lava dyuhaleke kumbe van’wana lava nga ni swilaveko leswi hlawulekeke. Ku nga ha va ku ri ni vutihlamuleri lebyi hambaneke lebyi faneleke byi khathaleriwa evandlheni, kumbe swi nga ha koteka ku hoxa xandla eka ku akiwa ka miako ya swa le tilweni.

Ku khongelela van’wana, hilaha Epafrasi a endleke hakona, i xiphemu xa ntirho wo kwetsima lowu hinkwerhu hi nga wu endlaka. Swikhongelo swo tano swi nga ha katsa marito ya ku khumbeka hi vagandzeri va Yehovha lava bohekaka ku langutana ni makhombo yo hambana-hambana kumbe swiphiqo swa moya kumbe swa nyama. Loko hi tinyiketela hi matimba ya hina hinkwawo hi ndlela leyi, hi nga fana na Epafrasi. Un’wana ni un’wana wa hina a nga va ni lunghelo ni ntsako wo tikombisa a ri “nandza-kulorhi la rhandzekaka” endyangwini wa malandza ya Yehovha lama tshembekaka.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela