Mi Yima Mi Hetiseka Mi Va Ni Ku Khorwiseka Loku Tiyeke
“Nkarhi hinkwawo u tikarhatela n’wina eswikhongelweni swakwe, leswaku eku heteleleni mi yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.”—VAKOLOSA 4:12.
1, 2. (a) I yini lexi vanhu lava nga riki vapfumeri va xi xiyeke malunghana ni Vakreste vo sungula? (b) Xana buku ya Vakolosa yi ku kombisa njhani ku khathalela ka rirhandzu?
VALANDZERI va Yesu a va karhateka swinene hi vagandzeri-kulobye. Tertullian (mutsari wa lembe-xidzana ra vumbirhi ni ra vunharhu C.E.) u vulavule hi musa lowu va wu kombiseke vana lava nga riki na vatswari, swisiwana ni vadyuhari. Swikombiso swoleswo swa rirhandzu lerikulu swi va tsakise swinene vanhu lava nga riki vapfumeri lerova van’wana va vule leswi malunghana ni Vakreste, ‘Vona ndlela leyi va rhandzanaka ha yona.’
2 Buku ya Vakolosa yi kombisa rirhandzu leri kombisiweke hi muapostola Pawulo ni nakulobye wa yena Epafrasi eka vamakwerhu va le Kolosa. Pawulo u va tsalerile a ku: Epafrasi “nkarhi hinkwawo u tikarhatela n’wina eswikhongelweni swakwe, leswaku eku heteleleni mi yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.” Hi 2001, eka ndzimana ya lembe ya Timbhoni ta Yehovha ku ta va ku ri marito ya Vakolosa 4:12 lama nge: “Mi yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.”
3. Hi swihi swilo swimbirhi leswi Epafrasi a swi khongeleleke?
3 U nga swi xiya leswaku swikhongelo swa Epafrasi leswi a swi endlela varhandziwa va yena a swi ri ni swivumbeko swimbirhi: (1) leswaku “eku heteleleni [va] yima [va] hetiseka” ni (2) leswaku va yima hi “ku khorwiseka loku tiyeke hi ku rhandza ka Xikwembu hinkwako.” Rungula leri ri nghenisiwe eMatsalweni leswaku ku vuyeriwa hina. Kutani tivutise, ‘Ndzi fanele ndzi endla yini leswaku eku heteleleni ndzi ta yima ndzi hetiseka, naswona ndzi va ni ku khorwiseka loku tiyeke hi ku rhandza ka Xikwembu hinkwako? Naswona loko ndzi ri karhi ndzi endla tano, vuyelo bya kona byi ta va byihi?’ A hi voneni.
Lwela Ku ‘Yima U Hetiseka’
4. Vakolosa a va fanele va “hetiseka” hi ndlela yihi?
4 Epafrasi a a swi navela hi mbilu hinkwayo leswaku vamakwavo va yena va moya eKolosa ‘eku heteleleni va yima va hetiseka.’ Rito leri Pawulo a ri tirhiseke, laha ri hundzuluxeriweke ri va “hetiseka,” ri nga ha va ni mongo wa ku helela, ku kula hi ku helela, kumbe ku wupfa. (Matewu 19:21; Vaheveru 5:14; Yakobo 1:4, 25) Swi nga endleka wa swi tiva leswaku loko munhu a va Mbhoni ya Yehovha leyi khuvuriweke a swi n’wi endli a va Mukreste la kuleke hi ku helela. Pawulo u tsalele Vaefesa, lava a va tshama evupela-dyambu bya le Kolosa, leswaku varisi ni vadyondzisi va ringeta ku pfuna “[hinkwavo va] fikelela vun’we eka ripfumelo ni le ka vutivi lebyi kongomeke bya N’wana wa Xikwembu, [va] va vanhu lava kuleke hi ku helela, hi mpimo wa vukulu lebyi nga bya ku tala ka Kreste.” Kun’wana Pawulo u khutaze Vakreste ku va “lava kuleke hi ku helela ematimbeni ya ku twisisa.”—Vaefesa 4:8-13; 1 Vakorinto 14:20.
5. Xana hi nga endla ku hetiseka ku va pakani ya hina leyikulu hi ndlela yihi?
5 Loko ku ri leswaku van’wana eKolosa a va nga si kula hi ku helela hi tlhelo ra moya, kumbe ku wupfa, a va fanele va tivekela pakani yoleyo. Xana a swi fanelanga swi va tano ni namuntlha? Ku nga khathariseki leswaku hi khuvuriwe makume ya malembe lama hundzeke kumbe ha ha ku khuvuriwa tolweni wa masiku, xana hi swi vona kahle leswaku hi endle nhluvuko eka vuswikoti bya hina byo anakanya ni le ka langutelo ra hina? Xana hi rhanga hi anakanya hi misinya ya milawu ya Bibele loko hi nga si endla swiboho? Xana timhaka leti nga ta Xikwembu ni leti khumbaka vandlha i ta nkoka swinene evuton’wini bya hina, kumbe ho ti endla hi xiwelo? Laha a hi nge kombisi tindlela hinkwato leti ha tona hi nga kombisaka ku kula koloko eku hetisekeni, kambe xiya swikombiso swimbirhi.
6. Hi le mhakeni yihi yin’wana laha munhu a nga antswisaka eka yona leswaku a hetiseka, hilaha Yehovha a nga hakona?
6 Xikombiso xo sungula: A hi nge u kulele endhawini leyi vanhu va rixaka rin’wana, tiko, kumbe ndhawu yin’wana a va vengiwa. Se ha swi tiva sweswi leswaku Xikwembu a xi yi hi nghohe kutani na hina a hi fanelanga hi ya hi nghohe. (Mintirho 10:14, 15, 34, 35) Evandlheni kumbe exifundzheni xa hina, ku ni vanhu va tinxaka tin’wana, kutani hi va hi ri exikarhi ka vona. Kambe, xana hi ni langutelo ro biha ku fikela kwihi kumbe hi va ehleketelela swo biha ku fikela kwihi vanhu va tinxaka tin’wana? Xana ha va ‘venga,’ hi hatlisela ku anakanya swo biha loko un’wana wa rixaka rolero a hi dyohelanyana kumbe a hi hoxelanyana? Tivutise, ‘Xana ndza ha fanele ndzi antswisa swinene emhakeni yo va ni langutelo ra Xikwembu ra ku nga yi hi nghohe?’
7. Ku va la hetisekeke tanihi Mukreste swi nga ha katsa ku va ni langutelo rihi hi van’wana?
7 Xikombiso xa vumbirhi: Hi ku ya hi Vafilipiya 2:3, a hi fanelanga hi endla “nchumu hi ku kanetana kumbe hi ku tikurisa, kambe hi mianakanyo yo titsongahata [hi] teka van’wana va ri lava tlakukeke eka [hina].” Xana hi endla nhluvuko ku fikela kwihi emhakeni leyi? Munhu un’wana ni un’wana ku ni laha a siyekaka kona kasi ku ni laha a endlaka kahle kona. Loko ku ri leswaku enkarhini lowu hundzeke a hi hatlisela ku xiya ku tsana ka van’wana, xana se hi endle nhluvuko, a ha ha languteli leswaku va va lava “hetisekeke”? (Yakobo 3:2) Xana se ha swi kota ku vona—hambi ku ri ku lava—tindlela leti van’wana va tlakukeke ha tona eka hina? ‘Ndzi fanele ndzi pfumela leswaku makwerhu loyi wa xisati wa ndzi tlula hi ku lehisa mbilu.’ ‘Luya u ni ripfumelo leri tiyeke ngopfu.’ ‘Entiyisweni, u ni vuswikoti byo dyondzisa ku ndzi tlula.’ ‘Wa ndzi tlula hi ku lawula mahlundzukelo ya yena.’ Kumbexana Vakolosa van’wana a va fanele va endla nhluvuko emhakeni leyi. Ku vuriwa yini hi hina?
8, 9. (a) Epafrasi u khongelele Vakolosa leswaku va “yima” va hetisekile hi ndlela yihi? (b) ‘Ku yima hi hetisekile’ swi vula yini malunghana ni vumundzuku?
8 Epafrasi u khongelele leswaku Vakolosa va ‘yima va hetisekile.’ Swi le rivaleni leswaku Epafrasi a a khongela eka Xikwembu leswaku ndlela leyi Vakolosa a va hetiseke ha yona, ku wupfa ka vona, va va Vakreste lava kuleke hi ku hetiseka, a va fanele va “yima,” kumbe va tshama va ri tano.
9 Hi nga ehleketi leswaku munhu un’wana ni un’wana loyi a vaka Mukreste, hambi ku ri loyi a wupfeke, u ta hambeta a ri tano. Yesu u vule leswaku ntsumi leyi a yi ri n’wana wa Xikwembu “a [yi] yimanga [yi] tiyile entiyisweni.” (Yohane 8:44) Naswona Pawulo u tsundzuxe Vakorinto malunghana ni van’wana lava va tirheleke Yehovha enkarhini lowu hundzeke ku ringana nkarhi wo karhi kambe va tshikeke. U tsundzuxe vamakwerhu lava totiweke hi moya a ku: “Loyi a ehleketaka leswaku u yimile a a tivonele leswaku a nga wi.” (1 Vakorinto 10:12) Leswi swi tiyisa xikhongelo xa leswaku Vakolosa ‘eku heteleleni va yima va hetisekile.’ Loko va kala va hetiseka, va kula hilaha ku heleleke, a va fanele va phikelela, va nga tlhentlhi, va nga karhali, kumbe va khukhuleka. (Vaheveru 2:1; 3:12; 6:6; 10:39; 12:25) Xisweswo a va ta “hetiseka” hi siku ra ku kamberiwa ka vona ni ra ku amukeriwa ka vona ko hetelela.—2 Vakorinto 5:10; 1 Petro 2:12.
10, 11. (a) Epafrasi u hi vekele ntila wihi malunghana ni xikhongelo? (b) Hi ku pfumelelana ni leswi Epafrasi a swi endleke, i ku tiyimisela kwihi loku u nga rhandzaka ku ku endla?
10 Se hi bule hi nkoka wa ku khongelela van’wana hi boxa mavito ya vona, hi vula hi ku kongoma eka Yehovha leswaku hi kombela a va pfuna, a va chavelela, a va katekisa ni ku va nyika moya lowo kwetsima. Xikhongelo xa Epafrasi lexi a a xi endlela Vakolosa a xi ri xa muxaka wolowo. Na hina hi nga swi kota—entiyisweni hi fanele hi—kuma swiringanyeto swa nkoka emaritweni wolawo malunghana ni leswi hi swi boxaka mayelana na hina hi hexe eka Yehovha hi xikhongelo. Handle ko kanakana, hi fanele hi kombela mpfuno wa Yehovha ku fikela emakumu leswaku ha un’we-un’we wa hina ‘eku heteleleni a yima a hetisekile.’ Xana u endla tano?
11 Ha yini u nga phofula xiyimo xa wena exikhongelweni? Byela Xikwembu mayelana ni nhluvuko lowu u wu endleke leswaku u “hetiseka,” u kula hilaha ku heleleke, u wupfa. N’wi kombele a ku pfuna ku xiya laha wa ha faneleke u antswisa kona hi tlhelo ra moya. (Pisalema 17:3; 139:23, 24) A swi kanakanisi leswaku ku kona laha u faneleke u antswisa kona. Kutani, ematshan’weni yo hetiwa matimba hi leswi, kombela Xikwembu hi ku kongoma, u kombela leswaku xi ku pfuna u endla nhluvuko. Kombela hi ku phindha-phindha. Kahle-kahle, ha yini u nga tiyimiseli leswaku vhiki leri taka u ta khongela nkarhinyana wo leha leswaku ‘eku heteleleni u yima u hetisekile.’ Naswona tiyimisele ku swi endla ko tala loko u ri karhi u anakanyisisa hi ndzimana ya lembe. Loko u ri karhi u khongela, yisa nyingiso wa wena eka mimboyamelo leyi u nga ha vaka u ri na yona yo tlhelela endzhaku, yo karhala, kumbe yo hambuka entirhweni wa Xikwembu ni ndlela leyi u nga papalataka ku endla sweswo ha yona.—Vaefesa 6:11, 13, 14, 18.
Khongelela Ku Khorwiseka Loku Tiyeke
12. Ha yini Vakolosa a va lava “ku khorwiseka loku tiyeke” swinene?
12 Epafrasi u tlhele a khongelela nchumu wun’wana lowu a wu ri wa nkoka leswaku Vakolosa va ta va lava kuleke, va yima va amukeleka eka Xikwembu. Na hina hi fanele hi wu khongelela. A ku ri yini nchumu wa kona? U va khongelele leswaku va yima va ri “ni ku khorwiseka loku tiyeke hi ku rhandza ka Xikwembu hinkwako.” Endhawini ya ka vona a ku ri ni tidyondzo ta mavunwa ni tifilosofi leti dlayaka, leti tin’wana ta tona a ti vonaka onge i ta vugandzeri bya ntiyiso. Hi xikombiso, a va tshikileriwa leswaku va hlayisa masiku yo hlawuleka hi ku titsona swakudya ni hi minkhuvo, hilaha a swi laveka hakona evugandzerini bya Vayuda. Vadyondzisi va mavunwa a va kandziyisa ngopfu ku gandzela tintsumi, mimoya leyi nga ni matimba swinene leyi tirhisiweke ku nyikela Nawu eka Muxe. Tianakanye u ri ehansi ka mintshikilelo ya muxaka wolowo! A ku ri ni tidyondzo to tala leti lwisanaka.—Vagalatiya 3:19; Vakolosa 2:8, 16-18.
13. Vakolosa a va ta pfuneka loko va xiya yinhla yihi, naswona sweswo swi nga hi pfunisa ku yini?
13 Pawulo u hlamule hi ku kandziyisa xiphemu xa Yesu Kreste. “Tanihi leswi mi amukeleke Kreste Yesu, Hosi, hambetani mi famba evun’weni na yena, mi dzima timitsu ni ku akiwa eka yena ni ku tiyisiwa eripfumelweni, hilaha mi dyondzisiweke hakona.” Ina, a ku ri ni xilaveko (eka Vakolosa ni le ka hina) xo khorwiseka swinene mayelana ni xiphemu xa Kreste exikongomelweni xa Xikwembu ni le vuton’wini bya hina. Pawulo u te: “Ku tala hinkwako ka mfanelo ya vukwembu ku tshama eka yena hi tlhelo ra miri. Kutani mi ni ku tala hikwalaho ka yena, loyi a nga nhloko ya hulumendhe ni vulawuri hinkwabyo.”—Vakolosa 2:6-10.
14. Ha yini ntshembo a wu ri nchumu wa xiviri eka vanhu va le Kolosa?
14 Vakolosa a va ri Vakreste lava totiweke hi moya. A va ri ni ntshembo wo hlawuleka, ku ya hanya ematilweni, naswona a va ri ni swivangelo swo hlayisa ntshembo wolowo wu vangama. (Vakolosa 1:5) A ku ri “ku rhandza ka Xikwembu” leswaku va va ni ku khorwiseka loku tiyeke malunghana ni ku tiya ka ntshembo wa vona. Xana van’wana a va fanele va wu kanakana ntshembo wolowo? Nikatsongo! Xana ku fanele ku va ni ku hambana namuntlha eka hinkwavo lava nga ni ntshembo lowu va wu nyikiweke hi Xikwembu wa ku hanya eparadeyisini ya laha misaveni? Nikatsongo! Swi le rivaleni leswaku ntshembo wolowo wa nkoka i “ku rhandza ka Xikwembu.” Sweswi anakanya hi swivutiso leswi: Loko u lwela ku va un’wana wa lava “ntshungu lowukulu” lowu nga ta pona “enhlomulweni lowukulu,” xana ntshembo wa wena i wa xiviri ku fikela kwihi? (Nhlavutelo 7:9, 14) Xana i xiphemu xa “ku khorwiseka [ka wena] loku tiyeke hi ku rhandza ka Xikwembu hinkwako”?
15. Pawulo u xaxamete swilo swihi leswi a swi katsa ni ntshembo?
15 Loko hi vulavula hi “ntshembo” a hi vuli pakani ntsena kumbe ku lorha ri lo hosi. Leswi hi nga swi vona eka tinhla leti landzelanaka leti Pawulo a ti tsaleleke Varhoma eku sunguleni. Eka tinhla toleto leti tlhandlamanaka, yinhla yin’wana ni yin’wana yi fambisana ni leyi landzelaka. Xiya laha Pawulo a vekaka “ntshembo” eka nhlamuselo ya yena: “A hi khaneni loko hi ri emahlomulweni, tanihi leswi hi swi tivaka leswaku nhlomulo wu tswala ku tiyisela; ku tiyisela kona ku tswala xiyimo xa ku amukeriwa; xiyimo xa ku amukeriwa xona xi tswala ntshembo, kutani ntshembo a wu endli leswaku munhu a khomiwa hi tingana; hikuva rirhandzu ra Xikwembu ri chululeriwe etimbilwini ta hina hi moya lowo kwetsima.”—Varhoma 5:3-5.
16. Loko u ri karhi u dyondza ntiyiso wa Bibele, i ntshembo wihi lowu u wu kumeke?
16 Loko Timbhoni ta Yehovha ti vulavula na wena ro sungula hi rungula ra Bibele, swi nga ha endleka u kokiwe hi ntiyiso wo karhi, wo tanihi xiyimo xa vafi kumbe ku pfuxiwa ka vafi. Eka vo tala, nchumu lowuntshwa wa nkoka lowu va wu tiveke a ku ri ntshembo lowu sekeriweke eBibeleni wa ku hanya eparadeyisini ya laha misaveni. Tsundzuka hi nkarhi lowu u tweke dyondzo yoleyo ro sungula. Mawaku ntshembo lowu hlamarisaka—vuvabyi ni ku dyuhala swi ta va swi nga ha ri kona, u nga hambeta u hanya leswaku u tiphina hi mihandzu ya mintirho ya wena, naswona ku ta va ni ku rhula ni swiharhi! (Eklesiasta 9:5, 10; Esaya 65:17-25; Yohane 5:28, 29; Nhlavutelo 21:3, 4) U kume ntshembo lowu hlamarisaka!
17, 18. (a) Xana nxaxamelo lowu Pawulo a wu tsaleleke Varhoma wu tswala ntshembo hi ndlela yihi? (b) I ntshembo wa muxaka muni lowu ku vulavuriwaka ha wona eka Varhoma 5:4, 5, naswona xana u na wona wa muxaka wolowo?
17 Hi ku famba ka nkarhi, swi nga ha endleka u kanetiwile kumbe ku xanisiwa. (Matewu 10:34-39; 24:9) Ni le minkarhini ya sweswi, Timbhoni ematikweni yo hambana-hambana ti phangeriwe swilo emakaya ya tona kumbe ti boheke ku va vahlapfa. Tin’wana ti biwile, ti tekeriwa tibuku ta tona ta Bibele, kumbe ku vuriwa swiviko leswi nga mavunwa malunghana na tona eka swihaxa-mahungu. Ku nga khathariseki leswaku u langutane ni nxaniso wa muxaka muni, hilaha Varhoma 5:3 yi vulaka hakona, u khanile loko u ri enhlomulweni, naswona sweswo swi tise vuyelo lebyinene. Hilaha Pawulo a tsaleke hakona, nhlomulo wu ku tswalele ku tiyisela. Kutani ku tiyisela ku endle leswaku u faneriwa hi ku amukeriwa. A wu swi tiva leswaku u le ku endleni ka leswinene, u endla ku rhandza ka Xikwembu, kutani a wu tiyiseka leswaku wa amukeleka eka xona. Hi ku ya hi marito ya Pawulo, u titwe u ri eka “xiyimo xa ku amukeriwa.” Loko a ya emahlweni, Pawulo u tsale leswaku “xiyimo xa ku amukeriwa xona xi tswala ntshembo.” Sweswo swi nga ha twala swi nga tolovelekanga. Ha yini Pawulo a veka “ntshembo” emakumu ka nxaxamelo wolowo? Xana a wu nga ri na wona ntshembo ni khale, loko u sungula ku twa mahungu lamanene?
18 Entiyisweni, laha Pawulo a nga vulavuli hi ntshembo wo sungula lowu hi veke na wona wa vutomi lebyi hetisekeke. Leswi a vulavulaka hi swona swi tlula sweswo; swi entile, swi ni nsusumeto lowukulu. Loko hi tiyisela hi ku tshembeka xisweswo hi swi xiya leswaku ha amukeleka eka Xikwembu, leswi swi ni vuyelo lebyikulu byo engetela ni ku tiyisa ntshembo wa hina wo sungula. Ntshembo lowu a hi ri na wona sweswi wu va wa xiviri swinene, wu ya wu tiya swinene, wu va wa hina ntsena. Ntshembo lowu lowu enteke wu vangama swinene. Wu hangalaka ni miri wa hina. “Kutani ntshembo a wu endli leswaku munhu a khomiwa hi tingana; hikuva rirhandzu ra Xikwembu ri chululeriwe etimbilwini ta hina hi moya lowo kwetsima.”
19. Ntshembo wa wena wu fanele wu va xiphemu xa swikhongelo swa wena swa nkarhi ni nkarhi hi ndlela yihi?
19 Epafrasi a a khongela hi mbilu hinkwayo leswaku vamakwavo va le Kolosa va tshama va ri karhi va khumbiwa ni ku khorwiseka hi leswi a swi ri emahlweni ka vona, va ri ni “ku khorwiseka loku tiyeke hi ku rhandza ka Xikwembu hinkwako.” Onge un’wana ni un’wana wa hina hilaha ku fanaka a nga tshinelela Xikwembu nkarhi ni nkarhi malunghana ni ntshembo wa hina. Eka swikhongelo swa wena swa munhu hi yexe, katsa ntshembo wa wena malunghana ni misava leyintshwa. Tiphofule eka Yehovha malunghana ni ndlela leyi u yi navelaka ha yona, u khorwiseka swinene leswaku yi ta fika. N’wi kombele leswaku a ku pfuna u kurisa ku khorwiseka ka wena. Hilaha Epafrasi a khongeleke hakona leswaku Vakolosa va va ni “ku khorwiseka loku tiyeke hi ku rhandza ka Xikwembu hinkwako,” na wena endla tano. Swi endle ko tala.
20. Loko vanhu va nga ri vangani va hambuka endleleni ya Vukreste, ha yini leswi swi nga fanelanga swi hi heta matimba?
20 A wu fanelanga u hetiwa matimba hi mhaka ya leswaku a hi hinkwavo lava yimaka hi ku hetiseka ni hi ku khorwiseka loku tiyeke. Van’wana va nga ha tsandzeka, va hambukisiwa, kumbe va lan’wa kunene. Sweswo swi humelerile eka vanhu lava a va ri ekusuhi ngopfu na Yesu, ku nga vaapostola va yena. Kambe loko Yudasi a hundzuke muxengi, xana vaapostola lavan’wana va debyise voko kumbe va tshika? Nikatsongo! Petro u tirhise Pisalema 109:8 a kombisa leswaku un’wana a a ta siva Yudasi. Loyi a nga ta n’wi siva u hlawuriwile, naswona vanhu lava tshembekaka eka Xikwembu va ye emahlweni ni xiavelo xa vona xo chumayela hi ku hiseka. (Mintirho 1:15-26) A va tiyimiserile ku yima va hetisekile, va ri ni ku khorwiseka loku tiyeke.
21, 22. Xana ku yima ka wena u hetiseka hi ku khorwiseka loku tiyeke ku ta xiyiwa hi ndlela yihi?
21 U nga tiyiseka hilaha ku heleleke leswaku loko u yima hi ku hetiseka ni hi ku khorwiseka loku tiyeke hi ku rhandza ka Xikwembu hinkwako, ku ta va ni lava nga ta swi xiya. Swi ta xiyiwa swi tlhela swi tlangeriwa. Hi vamani?
22 Vamakwenu va xinuna ni va xisati lava ku tivaka va tlhela va ku rhandza, va ta swi xiya. Hambiloko van’wana va nga swi vuli, vuyelo bya kona byi ta fana ni lebyi hi hlayaka ha byona eka 1 Vatesalonika 1:2-6: “Minkarhi hinkwayo hi nkhensa Xikwembu loko hi vulavula malunghana na n’wina hinkwenu eswikhongelweni swa hina, hikuva minkarhi hinkwayo hi tsundzuka ntirho wa n’wina wo tshembeka ni ku tikarhata ka n’wina ka rirhandzu ni ku tiyisela ka n’wina hikwalaho ka ntshembo lowu mi nga na wona eHosini ya hina Yesu Kreste emahlweni ka Xikwembu tlhelo Tata wa hina. Hikuva . . . mahungu lamanene lawa hi ma chumayelaka a ma humelelanga exikarhi ka n’wina hi ku vulavula ntsena kambe ni hi matimba ni moya lowo kwetsima ni ku khorwiseka lokukulu . . . ; naswona mi ve vatekeleri va hina ni va Hosi.” Vakreste lava tshembekaka lava nga swin’we na wena va ta titwa hi ndlela leyi fanaka loko va xiya leswaku u “yima [u] hetiseka naswona [u] ni ku khorwiseka loku tiyeke hi ku rhandza ka Xikwembu hinkwako.”—Vakolosa 1:23.
23. U fanele u tiyimisela yini haxawa?
23 Kunene, Tata wa wena wa le tilweni u ta swi xiya naswona swi ta n’wi tsakisa. Tiyiseka hi sweswo. Ha yini? Hikuva u yima u hetisekile naswona u khorwisekile hilaha ku tiyeke “hi ku rhandza ka Xikwembu hinkwako.” Pawulo u tsalele Vakolosa hi ku tiyiseka malunghana ni ku famba ka vona “hi mukhuva lowu fanelaka eka Yehovha leswaku [va] n’wi tsakisa hi ku helela.” (Vakolosa 1:10) Ina, swa koteka leswaku vanhu lava nga hetisekangiki va n’wi tsakisa hi ku helela. Vamakwenu va le Kolosa va endle tano. Vakreste-kuloni va karhi va endla tano sweswi. Na wena u nga swi kota! Hikwalaho, lembe leri taka hinkwaro, endla swikhongelo swa wena swa siku ni siku ni swiendlo swa wena swa siku ni siku swi kombisa leswaku u tiyimiserile leswaku “eku heteleleni [u] yima [u] hetiseka naswona [u] va ni ku khorwiseka loku tiyeke hi ku rhandza ka Xikwembu hinkwako.”
Wa Tsundzuka Xana?
• I yini lexi katsekaka eka ‘ku yima ka wena u hetisekile’?
• I yini leswi khumbaka wena leswi u faneleke u swi katsa exikhongelweni?
• Hilaha swi ringanyetiweke hakona eka Varhoma 5:4, 5, i ntshembo wa muxaka muni lowu u lavaka ku va na wona?
• Dyondzo ya hina yi ku susumetele ku va ni pakani yihi haxawa?
[Xifaniso lexi nga eka tluka 20]
Epafrasi u khongelele leswaku vamakwavo va yima va hetisekile, va ri ni ku khorwiseka loku tiyeke malunghana na Kreste ni ntshembo wa vona
[Swifaniso leswi nga eka tluka 23]
Vanhu van’wana va timiliyoni na vona va ni ntshembo lowu fanaka ni wa wena