‘Yehovha A Nga Ka A Nga Va Cukumeti Vanhu Va Yena’
“Makhombo ya l’a lulameke ma tele ngopfu, kambe Yehova o ṅwi humesa ka wona hikwawo.”—PISALEMA 34:19.
1, 2. (a) Xana Yehovha u va katekisa njhani vanhu va yena namuntlha? (b) Xana Vakreste vo tala va langutana na yini, naswona i swivutiso swihi leswi tlakukaka?
EKU hetisekeni ka vuprofeta bya Bibele, vagandzeri va Yehovha va tshama eparadeyisini ya moya. (2 Vakorinto 12:1-4) Timbhoni ta Yehovha ti le xikarhi ka vagandzeri-kulobye va misava hinkwayo lava vonakaka hikwalaho ka rirhandzu ni vun’we. (Yohane 13:35) Ti kuma vutivi lebyi enteke ni lebyi twisisekaka bya mintiyiso ya Bibele. (Esaya 54:13) Vona ndlela leyi ti nkhensaka Yehovha ha yona hikwalaho ka leswi a ti nyikaka lunghelo ro va vaendzi entsongeni wa yena wa moya!—Pisalema 15:1.
2 Hambileswi hinkwavo lava nga enhlengeletanweni ya Yehovha va tiphinaka hi swilo swa moya, van’wana va tshama hi ku rhulanyana ni ntshamiseko kasi van’wana va hlangavetana ni maxangu yo hambana-hambana. Vakreste vo tala i nkarhi wo leha va ri exiyin’weni lexi vavisaka naswona va hava ntshembo wo ntshunxeka enkarhini lowu taka. I swa ntumbuluko leswaku ehansi ka swiyimo swo tano ku va ni ku hela matimba. (Swivuriso 13:12) Xana maxangu i xikombiso xa leswaku Xikwembu a xi na mhaka? Xana Yehovha u seketela Vakreste van’wana hi ndlela yo hlawuleka loko hihala tlhelo a ri karhi a tshika van’wana?
3. (a) Xana Yehovha u ni vutihlamuleri eka makhombo lama humelelaka vanhu va yena? (b) Hikwalaho ka yini hambi ku ri vagandzeri va Yehovha lava tshembekeke va langutanaka ni maxangu lawa vanhu va langutanaka na wona?
3 Bibele ya hlamula: “Ku nga vi na munhu loyi, loko a ringiwa, a nge: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi leswo biha; naswona, xona hi xoxe, a xi ringi munhu ni un’we.” (Yakobo 1:13) Yehovha i Musirheleri ni Muhlayisi wa vanhu vakwe. (Pisalema 91:2-6) “Yehova a nga ka a nga tšukumeti tiko ra yena.” (Pisalema 94:14) Leswi a swi vuli swona leswaku vagandzeri lava tshembekeke a va nge weriwi hi maxangu. Mafambiselo ya swilo ya misava lama nga kona ma fumiwa hi vanhu lava nga ni ku nga hetiseki loku va ku kumeke tanihi ndzhaka. Vo tala va hombolokile naswona va nga ri vangani va bihe swinene. Ku hava ni un’we eka vona la lavaka vutlhari bya Yehovha. Leswi swi vanga leswaku vanhu va xaniseka swinene. Bibele yi swi veka erivaleni leswaku a hi minkarhi hinkwayo laha vanhu va Yehovha va nga ta swi kota ku pona vuyelo lebyi vavisaka bya ku nga hetiseki ni ku tsana ka vumunhu.—Mintirho 14:22.
Vakreste Lava Tshembekeke Va Langutele Ku Xaniseka
4. I yini leswi Vakreste hinkwavo va nga swi langutelaka ntsena loko va ha hanya emafambiselweni lawa yo biha ya swilo, naswona ha yini?
4 Hambileswi va nga riki xiphemu xa misava, valandzeri va Yesu va hanya emafambiselweni lawa ya swilo. (Yohane 17:15, 16) EBibeleni Sathana u paluxiwa a ri yena mulawuri-nkulu wa misava leyi. (1 Yohane 5:19) Hikokwalaho, Vakreste hinkwavo va nga rindzela ku langutana ni swiphiqo leswikulu, sweswi kumbe enkarhini lowu taka. Hikwalaho ko tsundzuka sweswo, muapostola Petro u ri: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka. N’wi aleleni, mi tiya eku pfumeleni ka n’wina, hi ku tiva leswaku vamakwenu emisaveni hinkwayo va hlangana ni maxangu yo fana ni lawa mi nga na wona.” (1 Petro 5:8, 9) Ina, Vakreste va le misaveni hinkwayo va nga langutela ku xaniseka.
5. Xana Yesu u swi veke njhani erivaleni leswaku Vakreste lava tshembekeke va ta hlangavetana ni swilo leswi vavisaka evuton’wini?
5 Niloko hi n’wi rhandza swinene Yehovha ni ku va lava tshembekeke eka misinya ya yena ya milawu, swilo leswi vavisaka hi ta hlangavetana na swona evuton’wini. Yesu u swi veke erivaleni leswi eka xifaniso xa yena lexi rhekhodiweke eka Matewu 7:24-27, laha a vekeke ku hambana exikarhi ka lava yingisaka marito yakwe ni lava nga ma yingisiki. U fanise vadyondzisiwa lava yingisaka ni wanuna la tlhariheke loyi a akaka yindlu ya yena ehenhla ka ribye lerikulu lero tiya. Lava nga ma yingisiki marito yakwe va fanisiwe ni wanuna wa xihunguki loyi a akaka yindlu yakwe esaveni. Endzhaku ka xidzedze lexikulu, i yindlu leyi akiweke ehenhla ka ribye lerikulu ntsena leyi nga wangiki. Xiya leswaku emhakeni ya yindlu ya wanuna lowo tlhariha, “mpfula yi [nile], maboboma ma ta, timheho ti hunga, swi ba yindlu yoleyo; kambe a yi wanga.” Yesu a a nga vuli swona leswaku nkarhi hikwawo wanuna lowo tlhariha a ta va ni ku rhula ni ntshamiseko. Ku ri na sweswo, vutlhari bya wanuna yaloye a byi ta n’wi lunghiselela leswaku a kota ku hlula xidzedze. Mhaka leyi fanaka yi boxiwa exifanisweni xa muhaxi. Eka xona Yesu u vula leswaku hambi ku ri vagandzeri lava titsongahataka ni va “timbilu leto lulama,” a va ta “veka mihandzu hi ku tiyisela.”—Luka 8:4-15.
6. Exifanisweni xa Pawulo xa switirho leswi nga tshwiki, i vamani lava hlangavetanaka ni miringo leyikulu?
6 Loko a tsalela Vakorinto, muapostola Pawulo u tirhise ririmi ro gega leswaku a kombisa xilaveko xa timfanelo to tiyisela leti nga ta hi pfuna leswaku hi tiyiselela miringo. Nhundzu yo tano yo aka leyi nga tshwiki yo tanihi nsuku, silivhere ni maribye ya risima swi yelana ni timfanelo leti nga ni Xikwembu. (Ringanisa Swivuriso 3:13-15; 1 Petro 1:6, 7.) Hihala tlhelo, mikhuva ya nyama yi fanisiwa ni nhundzu leyi tshwaka. Kutani Pawulo u te: “Ntirho wa munhu loyi wu ta vonaka; hikuva siku ra Hosi ri ta fika ri ri ni ndzilo, ri ta komba leswi ntirho wa un’wana ni un’wana wu nga swona, kutani ndzilo wu ta ringeta ku tiya ka ntirho wa kona.” (1 Vakorinto 3:10-14) Nakambe, laha Bibele yi hlamusela leswaku hinkwerhu ka hina handle ko kanakana, hi ta langutana ni miringo yo karhi leyikulu.
7. Hi ku ya hi Varhoma 15:4, xana Matsalwa ma nga hi pfuna njhani leswaku hi tiyiselela miringo?
7 EBibeleni ku ni timhaka to hlayanyana ta malandza ya Xikwembu lama tiyiseleke maxangu, minkarhi yin’wana ku ringana nkarhi wo leha. Kambe, Yehovha a nga ma cukumetanga. Swi nga ha endleka leswaku muapostola Pawulo a a anakanya hi swikombiso sweswo loko a te: “Hinkwaswo leswi tsariweke hi lava khale, swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Xiya swikombiso swa vavavuna vanharhu, lava hambileswi a va ri ni vuxaka lebyikulu ni Xikwembu va langutaneke ni maxangu yo tala.
Leswi Hi Swi Dyondzaka eVurungurini Bya Bibele
8. I yini leswi Yehovha a swi pfumeleleke swi humelela Yosefa, naswona ku ringana nkarhi wo tanihi kwihi?
8 Yosefa n’wana wa Yakobo a a rhandziwa hi Yehovha ku sukela evuhlangini. Kambe, hambileswi a ku nga ri hikwalaho ka xihoxo xa yena n’wini, u langutane ni maxangu hi ku landzelelana. U tlhakisiwile a tlhela a khomiwa hi ndlela ya tihanyi hi vamakwavo va yena n’wini. U xavisiwile tanihi hlonga etikweni ra vambe laha a hehliweke hi vunwa a tlhela a ‘nghenisiwa ekhotsweni.’ (Genesa 40:15) Kwalaho, “v̌a manya milenge ya yena hi [tinsimbhi], a hanyisa ŝeŝo e tinsimbini.” (Pisalema 105:17, 18) Hi nkarhi wa vuhlonga ni wa ku khotsiwa ka yena, swi le rivaleni leswaku Yosefa u kombele Yehovha hi ku phindha-phindha leswaku a n’wi ntshunxa. Kambe, ku ringana kwalomu ka 13 wa malembe, hambileswi Yehovha a n’wi tiyiseke hi tindlela to hambana-hambana, siku rin’wana ni rin’wana loko ri xa u tikume a ha ri hlonga kumbe mubohiwa.—Genesa 37:2; 41:46.
9. I yini leswi Davhida a bohekeke ku swi tiyiselela ku ringana malembe yo hlayanyana?
9 Mhaka leyi fanaka hi liya ya Davhida. Loko Yehovha a ri karhi a hlawula wanuna la fanelekaka leswaku a fuma Israyele, u te: “Ndzi kumile leswaku Davhida n’wana Yese, i munhu loyi a nga wa mbilu ya mina.” (Mintirho 13:22) Ku nga khathariseki leswi a a ri ni xiyimo lexi rhandzekaka emahlweni ka Yehovha, Davhida u xaniseke swinene. Loko a langutane ni rifu, u tumbele emananga, emabakweni, eminceleni ni le matikweni ya vambe ku ringana malembe yo hlayanyana. Hikwalaho ka leswi a hlotiwa ku fana ni xivandzana, a a karhatiwa hi gome ni nchavo. Hambiswiritano, u tiyiserile hikwalaho ko tiyisiwa hi Yehovha. Hikwalaho ka leswi n’wi humeleleke, Davhida u swi kotile ku vula hilaha ku faneleke a ku: “Makhombo ya l’a lulameke ma tele ngopfu, kambe Yehova o ṅwi humesa ka wona hikwawo.”—Pisalema 34:19.
10. I khombo rihi ro chavisa leri weleke Naboto ni ndyangu wakwe?
10 Esikwini ra muprofeta Eliya, a ko va ni vanhu vo ringana 7000 ntsena eIsrayele lava nga xi nkhinsamelangiki xikwembu xa hava lexi vuriwaka Bali. (1 Tihosi 19:18; Varhoma 11:4) Naboto loyi kumbexana a a ri un’wana wa vona, u voniwe nandzu lowukulu hikwalaho ka ku pfumaleka ka vululami. U khomisiwe tingana hikwalaho ka leswi a hehliweke hi ku va a ri musandzi. Loko a voniwe nandzu, u xupuriwile kutani a gweviwa hi ku ya hi xileriso xa hosi xa leswaku a khandliwa hi maribye a fa, naswona ngati ya yena yi nantsweriwe hi timbyana. Hambi ku ri vana va yena va dlayiwile! Kambe a a ri hava nandzu eka xihehlo xexo. Timbhoni leti a ti lwisana na yena a ti ri to hemba. Mhaka yoleyo hinkwayo a ko va rhengu ra mavunwa leri a ri kunguhatiwe hi Nkosikazi Yezabele leswaku hosi yi ta kota ku kuma nsimu ya Naboto ya vhinya.—1 Tihosi 21:1-19; 2 Tihosi 9:26.
11. Xana muapostola Pawulo u hi byela yini malunghana ni vavanuna ni vavasati vo tshembeka va le matin’wini ya Bibele?
11 Yosefa, Davhida na Naboto vo va swikombiso swinharhu ntsena swa vavanuna ni vavasati lavo tshembeka lava boxiweke eBibeleni lava a va langutane ni maxangu. Muapostola Pawulo u tsale mpfuxeto wa matimu ya malandza ya Yehovha ya le minkarhini ya khale. Eka wona u vulavula hi lava “xanisiw[eke] hi ku hlekuriwa ni ku biwa, hambi ku ri ku bohiwa hi tinketani, va hoxiwa ekhotsweni. Va khandliwile hi maribye, va pulukanyisiwile hi le xikarhi hi ku sahiwa, va dlayiwile hi mabanga, va famba-famba hinkwako va ambele madzovo ya tinyimpfu ni ya timbuti, va swerile, va ri emaxangwini, va twisiwa ku vaviseka, vona lava misava a yi nga va fanelanga! Va tsendzelekile emananga ni le tintshaveni, ni le mabakweni, ni le makheleni ya laha misaveni.” (Vaheveru 11:36-38) Kambe Yehovha a nga va tshikanga.
Yehovha U Khathalela Lava Xanisekaka
12. Hi wahi maxangu man’wana lama Timbhoni ta Yehovha ti hlangavetanaka na wona namuntlha?
12 Ku vuriwa yini hi vanhu va Yehovha namuntlha? Tanihi nhlengeletano, hi nga tshembela eka nsirhelelo wa Xikwembu kutani hi pona emasikwini ya makumu ni le nhlomulweni lowukulu. (Esaya 54:17; Nhlavutelo 7:9-17) Hambiswiritano, ha un’we-un’we, ha swi xiya leswaku “nkari ni khombo, i ŝa [vanhu] hikwav̌o.” (Eklesiasta 9:11) Namuntlha ku ni Vakreste vo tala lava xanisekaka hikwalaho ka makhombo. Van’wana va langutane ni vusweti lebyikulu. Bibele yi vulavula hi ‘swisiwana ni tinoni’ ta Vakreste lava nga enhlomulweni. (Yakobo 1:27) Van’wana va xaniseka hikwalaho ka makhombo ya ntumbuluko, tinyimpi, vugevenga, ku tirhisiwa ka matimba hi ndlela yo biha, vuvabyi ni rifu.
13. I mitokoto yihi yo nonon’hwa leya ha ku vikiwaka sweswinyana?
13 Hi xikombiso, eka xiviko xa tona xa 1996 lexi yaka eka Huvo leyi Fumaka ya Timbhoni ta Yehovha, tihofisi ta marhavi ya Watch Tower ti vike leswaku vamakwerhu van’wana va xinuna ni va xisati va xaniseka emakhotsweni eswiyin’weni leswi chavisaka hikwalaho ka ku namarhela ka vona misinya ya milawu ya Bibele. Mavandlha manharhu ya le tikweni rin’wana ra le Amerika Dzonga ma hangalakile loko mintlawa ya vaxenga-tiko yi sindzise Timbhoni ta madzana leswaku ti suka endhawini yoleyo. Etikweni rin’wana ra le Afrika Vupeladyambu, Timbhoni tin’wana leti khomiweke hi nkarhi wa nkwetlembetano wa nyimpi ya xin’wana-manana, ti dlayiwile. Etikweni rin’wana ra le Amerika Xikarhi, vamakwerhu van’wana va le xiyin’weni xo biha xa swa timali naswona xi nyanye ku biha hikwalaho ka nhlaselo wa xidzedze. Etindhawini tin’wana laha vusweti ni ku pfumaleka ka swakudya swi nga ha vaka swi nga ri swiphiqo leswikulu, minkucetelo yo biha yi nga ha herisa ntsako wa van’wana. Vo tala va karhatiwa hi mintshikilelo ya vutomi bya manguva lawa. Hikwalaho ko va vanhu va nga kombisi ku tsakela, van’wana va nga ha tlhela va hetiwa matimba loko va ri karhi va chumayela mahungu lamanene ya Mfumo.
14. (a) Xana hi dyondza yini eka xikombiso xa Yobo? (b) Ematshan’weni yo anakanya hi ndlela leyi hoxeke, i yini leswi hi faneleke hi swi endla loko hi langutane ni maxangu?
14 Swiyimo leswi a swi fanelanga swi tekiwa tanihi xikombiso xa leswaku Xikwembu a xi khathaleli. Tsundzuka mhaka ya Yobo ni maxangu yo tala lama n’wi xaniseke. A a ri “l’a fambaka hi ku lulama ni ku tenga.” (Yobo 1:8) Vona ndlela leyi Yobo a faneleke a titwe a tshoviwe mbilu ha yona loko Elifasi a n’wi hehla hi ku va a dyohile! (Yobo tindzima 4, 5, 22) A hi fanelanga hi hatlisela ku gimeta hi leswaku hi hlangavetana ni maxangu hikwalaho ka leswi hi dyoheleke Yehovha hi ndlela yo karhi kumbe hikwalaho ka leswi Yehovha a suseke mikateko ya yena. Ku va ni mianakanyo leyi hoxeke loko hi langutane ni nhlomulo swi nga tsanisa ripfumelo ra hina. (1 Vatesalonika 3:1-3, 5) Loko hi ri emaxangwini, i swinene ku anakanyisisa hi mhaka ya leswaku Yehovha na Yesu va le kusuhi ni lava lulameke ku nga khatariseki leswaku ku humelela yini.
15. Xana hi swi tivisa ku yini leswaku Yehovha u karhateka swinene hikwalaho ka maxangu lama humelelaka vanhu va yena?
15 Muapostola Pawulo wa hi tiyisekisa loko a ku: “I mani loyi a nga ta hi hambanisa ni rirhandzu ra Kriste? Xana ma nga va maxangu, kumbe nhlomulo, kumbe ku xanisiwa, kumbe ndlala, kumbe vusweti, kumbe makhombo, kumbe fumu xana? . . . Ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.” (Varhoma 8:35, 38, 39) Yehovha u karhateka swinene hi hina naswona wa ku vona ku xaniseka ka hina. Loko a ha ri mubaleki, Davhida u tsarile a ku: “Mahlo ya Yehova ma languta la’v̌a lulameke, ni tindlev̌e ta yena ti pfulekela ku huwelela ka v̌ona. Yehova o kusuhi ni la’v̌a nga ni timbilu le’ti ṭhov̌ekeke.” (Pisalema 34:15, 18; Matewu 18:6, 14) Tata wa hina wa le tilweni wa hi khathalela naswona lava xanisekaka u va twela vusiwana. (1 Petro 5:6, 7) U hi nyika xin’wana ni xin’wana lexi hi xi pfumalaka leswaku hi kota ku tiyisela, eka maxangu man’wana ni man’wana lawa hi nga ha langutanaka na wona.
Tinyiko Ta Yehovha Ta Hi Hlayisa
16. Hi rihi lunghiselelo leri humaka eka Yehovha leri hi pfunaka leswaku hi tiyisela, naswona njhani?
16 Hambileswi hi nga langutelangiki vutomi lebyi nga riki ni maxangu eka mafambiselo lawa ya khale ya swilo, a hi “tshikiwanga ekhombyeni.” (2 Vakorinto 4:8, 9) Yesu u tshembise ku nyika valandzeri va yena mupfuni. U te: “Ndzi ta kombela Tatana, kutani yena ú ta mi nyika Muchaveleri un’wana, loyi a nga ta va na n’wina hilaha ku nga heriki, a nga Moya wa ntiyiso.” (Yohane 14:16, 17) Hi Pentekosta ya 33 C.E., muapostola Petro u byele vayingiseri va yena leswaku a swi ta koteka leswaku va “amukela nyiko, wu nga Moya lowo Kwetsima.” (Mintirho 2:38) Xana moya lowo kwetsima wa hi pfuna namuntlha? Ina! Matimba ya Yehovha lama tirhaka ma hi nyika mihandzu leyi leyi dzunekaka: “Rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma.” (Vagalatiya 5:22, 23) Timfanelo leti hinkwato ta risima hi tona ti hi pfunaka ku tiyisela.
17. Hi yihi mintiyiso yin’wana ya Bibele leyi tiyisaka ripfumelo ra hina ni ku tiyimisela ka hina ko rindzela Yehovha hi ku lehisa mbilu?
17 Nakambe moya lowo kwetsima wu hi pfuna ku twisisa leswaku mahlomulo lama nga kona sweswi i ‘ya nkarhinyana naswona a ma tiki ngopfu’ loko ma ringanisiwa ni hakelo ya vutomi lebyi nga heriki. (2 Vakorinto 4:16-18) Ha tiyiseka leswaku Xikwembu a xi nge rivali mintirho ya hina swin’we ni rirhandzu leri hi ri kombiseke eka xona. (Vaheveru 6:9-12) Malunghana ni marito ya Bibele lama huhuteriweke, hi chaveleriwa hi swikombiso swa malandza yo tshembeka ya le minkarhini ya khale lama tiyiseleke maxangu yo tala, kambe ma vuriweke lama tsakeke. Yakobo u tsarile a ku: “Loko mi lava xikombiso xa ku lehisa mbilu emaxangwini, vamakwerhu, landzani ntila wa vaprofeta lava vulavuleke hi vito ra Hosi. Langutani, lava hi vulaka leswaku va katekile, hi lava va tiyiseleke.” (Yakobo 5:10, 11) Bibele yi tshembisa leswaku “matimba lamakulu lawa, lama tlulaka hinkwaswo” ma ta hi pfuna leswaku hi tiyiselela miringo. Nakambe Yehovha u hi katekisa hi ntshembo wa ku pfuxiwa eku feni. (2 Vakorinto 1:8-10; 4:7) Hi ku hlaya Bibele siku ni siku, ni ku anakanyisisa hi switshembiso leswi, hi tiyisa ripfumelo ra hina ni ku tiyimisela ka hina ko rindzela Xikwembu hi ku lehisa mbilu.—Pisalema 42:5.
18. (a) I yini leswi hi khutaziwaka ku swi endla eka 2 Vakorinto 1:3, 4? (b) Xana valanguteri va Vakreste va nga tikombisa njhani va ri swihlovo swa nchavelelo ni leswi phyuphyisaka?
18 Ku engetela kwalaho, Yehovha u hi nyike paradeyisi ya moya leyi eka yona hi nga tiphinaka hi rirhandzu ra xiviri ra vamakwerhu va hina va xinuna ni va xisati va Vukreste. Hinkwerhu hi nga chavelelana. (2 Vakorinto 1:3, 4) Ngopfu-ngopfu valanguteri va Vukreste va nga va xihlovo lexikulu xa nchavelelo ni ku phyuphyisa. (Esaya 32:2) Tanihi leswi va nga ‘vavanuna lava nga tinyiko,’ va lerisiwe ku tiyisa lava xanisekaka, ku “tiyisa lava helaka ntamu” ni ku ‘pfuna lava tsaneke.’ (Vaefesa 4:8, 11, 12; 1 Vatesalonika 5:14) Vakulu va khutaziwa ku tirhisa timagazini ta Xihondzo xo Rindza ni Xalamuka! hi ndlela leyinene, ku katsa ni tibuku tin’wana leti humesiwaka hi “nandza la tshembekaka, wo tlhariha.” (Matewu 24:45-47) Tibuku leti ti tamele rifuwo leri sekeriweke eBibeleni leri nga hi pfunaka leswaku hi kota ku ntlhantlha—hambi ku ri ku sivela—swin’wana swa swiphiqo leswi hi vangelaka ku karhateka. Onge hi nga tekelela Yehovha hi ku chavelelana ni ku khutazana eminkarhini yo nonon’hwa!
19. (a) I yini leswi hi pfunaka leswaku hi papalata makhombo man’wana? (b) I mani loyi hi faneleke hi tshembela eka yena hilaha ku heleleke, naswona i yini leswi nga ta hi pfuna leswaku hi tiyisela miringo?
19 Tanihi leswi hi yaka hi nghena swinene emasikwini ya makumu naswona swiyimo swa mafambiselo ya sweswi ya swilo swi yaka swi nyanya ku biha, Vakreste va endla leswi va nga swi kotaka leswaku va papalata maxangu. (Swivuriso 22:3) Ku avanyisa lokunene, ku hluteka emianakanyweni ni vutivi bya misinya ya milawu ya Bibele swi nga hi pfuna leswaku hi endla swiboho hi vutlhari. (Swivuriso 3:21, 22) Hi yingisa Rito ra Yehovha ni ku ri xixima leswaku hi papalata swihoxo leswi nga fanelangiki. (Pisalema 38:4) Hambiswiritano, ha swi xiya leswaku ku hava matshalatshala lawa hi nga ma endlaka leswaku hi herisa ku xaniseka hilaha ku heleleke evuton’wini bya hina. Emafambiselweni lawa ya swilo, vanhu vo tala lava lulameke va langutana ni maxangu lamakulu. Hambiswiritano, loko hi ri ni ntshembo lowu heleleke wa leswaku “Yehova a nga ka a nga tšukumeti tiko ra yena,” hi nga swi kota ku langutana ni miringo ya hina hi ndlela leyi humelelaka. (Pisalema 94:14) Naswona ha swi tiva leswaku mafambiselo lawa ya swilo ni maxangu ya wona ma ta hela ku nga ri khale. Hikokwalaho, onge hi nga tiyimisela leswaku hi nga tshuki hi ‘karhala ku endla leswinene, hikuva hi ta tshovela hi nkarhi wa kona loko hi nga karhali.’—Vagalatiya 6:9.
Xana Hi Dyondze Yini?
◻ Hi yihi miringo leyi Vakreste emisaveni hinkwayo va hlangavetanaka na yona?
◻ I swikombiso swihi swa le Bibeleni leswi hi pfunaka ku twisisa leswaku makhombo lama vaka kona a hi xikombiso xa leswaku Yehovha a nga khathali?
◻ Xana Yehovha u titwa njhani hi maxangu lama welaka vanhu va yena?
◻ I tinyiko tihi tin’wana leti humaka eka Yehovha leti hi pfunaka leswaku hi tiyiselela miringo?
[Swifaniso leswi nga eka tluka 10]
Vanhu vanharhu lava tshameke va langutana ni maxangu i Davhida, Naboto na Yosefa