Xiviko Xa Vahuweleri Va Mfumo

Ku Ntshunxeka Eka Nkucetelo Wa Madimona

KU TIRHISA vungoma ku lawule vutomi bya vanhu va timiliyoni to tala. Kambe swa koteka ku ntshunxeka! Leswi hi leswi humeleleke eka vanhu vo tala va le mutini wa khale wa Efesa. Hi ku ya hi xiviko xa Bibele, “lavo tala exikarhi ka lava a va tirhile swa masalamusi, va hlengeleta tibuku ta vona, va ti hisa . . . Hi mukhuva wolowo rito ra Hosi ri nava hi matimba, ri ya ri tiya.”—Mintirho 19:19, 20.

Hilaha ku fanaka vandla ra Vukreste namuntlha ra kula. Hilaha a swi ri hakona le Efesa, exikarhi ka lava va vaka vapfumeri ku ni lava va tshameke va tirhisa vudimona. Ntokoto lowu landzelaka wa le Zimbabwe wu kombisa mhaka leyi.

Gogo (Kokwana) Mthupha a a tiveka ngopfu hikwalaho ka vungoma bya yena bya matimba. Vanhu a va ta eka yena va huma etindhawini ta le kule to tanihi Zambia, Botswana na Afrika Dzonga leswaku a ta va hanyisa hi mirhi ya yena ya xintima. Gogo Mthupha u tlhele a dyondzisa van’wana ndlela yo va n’anga kumbe ku va xingomantanda. Naswona minkarhi yin’wana a a lowa!

Hi Sonto yin’wana nimixo Gogo Mthupha u endzeriwe hi Timbhoni ta Yehovha leti a ti ri evutirhelini bya yindlu na yindlu. U tsakele ku burisana na vona hi xitshembiso xa Bibele xa misava leyintshwa yo lulama, misava yo pfumala minkucetelo hinkwayo leyo biha. U teke buku leyi nge U Nga Hanya Hi Masiku aParadeyisini eMisaveni ivi a pfumela ku va ni dyondzo ya le kaya ya Bibele.a Endzhaku ko va va dyondze kanharhu, u sungule ku va kona eminhlanganweni.

Edyondzweni ya yena ya Bibele, Gogo Mthupha u dyondze leswaku matimba ya yena yo hlawuleka a ma huma eka swivumbiwa swa moya leswo biha leswi xandzukeleke vuhosi bya Yehovha. (2 Petro 2:4; Yuda 6) U tlhele a dyondza leswaku madimona lawa ma tiyimisele ku hambukisa un’wana ni un’wana eka Yehovha ni vugandzeri lebyi tengeke. Tanihi leswi ku tihanyisa ka yena a ku titshege hi vungoma bya swivumbiwa leswi swo biha swa moya, xana a a ta endla yini?

Gogo Mthupha u kombise ku navela ko cukumeta switshungulo swa yena hinkwaswo ni nhundzu ya yena ya vungoma. Leswi swi katse xifunengeto xa yena xa nhloko xo hlawuleka ni “timhondzo ta nkunzi leti a vulavulaka na tona,” leswi a swi tirhisa eka ku hanyisa ka yena ka vun’anga. Gogo Mthupha a a lava ku cukumeta swilo swo tano hinkwaswo leswaku a ta tirhela Xikwembu xi ri xin’we xa ntiyiso lexi hanyaka, ku nga Yehovha.

Kambe, man’wana ya maxaka ya yena ma n’wi kanetile hikuva a a ma khathalela hi tlhelo ra timali. Va n’wi kombele ku hundzisela swilo leswi swa vungoma eka vona, swin’we ni matimba ya yena lama nga riki ya ntumbuluko leswaku va ta ya emahlweni va kuma mali. Gogo Mthupha u arile.

Hi ku pfuniwa hi vandlha ra kwalaho ra Timbhoni ta Yehovha, u hlengelete swilo swa vungoma a swi chela eminkwameni yinharhu leyikulu ivi a swi hisa hinkwaswo. Loko malangavi ma ri karhi ma hisa switirho swa yena swa vugandzeri bya madimona, Gogo Mthupha u te: “Vonani! Rimhondzo leriya a ri swi koti ku tiponisa.”

Hi ku famba ka nkarhi, Gogo Mthupha hi ntsako u kombise ku tinyiketela ka yena eka Yehovha hi nkhuvulo wa mati. Xana u tihanyisa hi yini sweswi? Hi ku xavisa matsavu. Ina, hi matimba ya Rito ra Xikwembu, munhu a nga ntshunxeka eka vugandzeri bya madimona. Gogo Mthupha u ri: “A ndzi si tshama ndzi titwa ndzi ntshunxeke hi ndlela leyi.”

[Nhlamuselo ya le hansi]