Xiviko Xa Vahuweleri Va Mfumo

Ntiyiso Wa Bibele Wa Ntshunxa Eka Vungoma

LANGUTELO ra Yehova hi vungoma ri hlamuseriwe kahle eIsrayele hi marito lawa: “Mi nga ṭhuki mi bvumba, hambi ku ri ku hlahluv̌a.” (Levitika 19:26) Kambe xana munhu la katsekeke eku hlahluveni na le vungomeni a nga ntshunxiwa hi ndlela yihi eka matimba ya mademona? Yesu u te: “Na swona mi ta tiva ntiyiso, kutani ntiyiso wu ta mi ntshunxa.” (Yohane 8:32) Leswi swi tikombe ku ri ntiyiso, hi laha swi voniweke ha kona eka ntokoto wa Mbhoni ya le Furwa.

“Loko ndzi rhurhele ekaya ra mina lerintshwa, a ndza ha wisile loko muakelani la nga ni xinghana a tile eka mina ivi a kombela ku pfula horoscope ya mina. Hi ku anghwetla ndzi anakanye ku hambana na yena, leyi a yi nga ri mhaka yintsongo, hikuva hakunene a a toloveleke swinene.

“Hi November 1980 ndzi khome hi vuvabyi, kutani kwalaho u tile ku ta ndzi pfuna. Ndzi tlangele musa wakwe. Ndzi kokeriwe swinene eka yena loko a ndzi tshembise leswaku hakanyingi u ta ta a ta ndzi pfuxa loko ndzi ri karhi ndzi hefemuteka hi ku chava. Kutani ndzi tshubule leswaku a a nga tsakanga ku fana ni leswi a ndzi anakanya swona. Kambe xana xiphiqo lexi xa vungoma xi nga tlhantlhiwa hi ndlela yihi? Hi ku titwa leswaku a ndzi nga ha swi tiyiseli, ndzi bohe kungu ro burisana na yena hi ta ntiyiso.

“Hi sungule ku bula hi swiphiqo swa timali leswi hlamarisaka eka hina vavasati lava nga voxe. Kutani a ku: ‘Ndzi na murhi. Ndzi endla makarata yo gembula.’ Kutani ndzi teka Bibele ya mina ivi ndzi n’wi komba hi laha swi nga na khombo ha kona ku katseka eka minsusumeto leyi nga ni matimba ya leswo biha.

“Leswi swi tlhontlhe bulo ra hina lerikulu hi vungoma. U hlamusele leswaku xin’wana ni xin’wana lexi a byeriweke xona xi hundzile. Ndzi ringete ku n’wi pfuna ku anakanyisisa. Ndzi hambete ndzi n’wi komba marito ya Muxe eka Deuteronoma 18:10, 11, leyi nge: ‘Ku nga ṭhuki ku kumiwa munhu ni uṅwe ka wena l’a . . . hlahluv̌aka, ni mungoma, ni mulori, . . . ni l’a v̌utisaka mimoya, ni l’a bvumbaka, ni l’a v̌utisaka v̌afi.’ Loko ndzi famba, a ku: ‘Ku anakanya leswaku ndzi pfumerile ndzi fanele ku kuma murhi wa swiphiqo swa mina.’ Marito lawa ya ve xikhutazo eka mina swonghasi, hikuva endzhaku ko burisana kan’we, laha a a vulavula hi vungoma, a komba eka nkarhi lowu hundzeke! Eka mina a swi vula leswaku u twisise yinhla hi vundzeni.

“Hi ku va ni ku navela loku nga anerisekiki ka swakudya swa moya, a a hlaya Bibele ku kondza ku va awara ya nharhu kumbe mune nimixo. Xo sungula, a hi dyondza kambirhi hi vhiki. A a va kona eminhlanganweni naswona a endla nhluvuko hi xihatla. Kavula, hi nghene hi vundzeni eka nhloko-mhaka ya vungoma, hi tirhisa Bibele na tibuku ta Watch Tower, kutani u endle kungu ra munhu hi xiyexe ro hisa nchumu wun’wana ni wun’wana lowu a a ri na wona wo fambelana ni vudemona.

“Wansati loyi u tiyiserile naswona hi ku anghwetla a a ri na van’wana eku chumayeleni ka ‘mahungu lamanene.’ Nkarhi na nkarhi a a amukela maqingho yo huma eka tikhasitamu ta yena ta khale, kutani endzhaku ko hlamusela leswaku u tshikile mintirho yakwe ya vungoma, u va rhambele ku ta va ta twa swin’wana leswi tsakisaka swinene. U khuvuriwile kutani sweswi i makwerhu wa xisati.”