Xiviko Xa Vahuweleri Va Mfumo
U Kume “Dayimani . . . Ya Nxavo Lowukulu”
“MFUMO wa matilo wu fana ni muxavi la lavaka tidayimani letinene; kutani loko a kumile dayimani yin’wana ya nxavo lowukulu, a ya xavisa swilo swa yena hinkwaswo, a tixavela yona.” Hi marito lawa, Yesu u kombise nkoka lowukulu wa Mfumo wa Xikwembu. (Matewu 13:45, 46) Lava va xiyaka nkoka wa Mfumo hakanyingi va titsona swilo swo tala leswaku va ta wu kuma. Leswi swi kombisiwa hi ntokoto lowu landzelaka wa le Xifundzheni xa Pingtung, eTaiwan.
Hi 1991, Nkulukumba na Manana Lin va sungule ku dyondza Bibele ni Timbhoni ta Yehovha. Loko mufundhisi wa kwalaho a tive mhaka leyi, u ringete ku va sindzisa leswaku va nghena kereke ya yena. Tanihi leswi va ka Lin a va ri ni bindzu ro xavisa ngati ya tinguluve ni ya masekwa emakete ya kwalaho, va ehlekete ku vutisa langutelo ra mufundhisi hi mhaka leyi. U te: “Hinkwaswo leswi Xikwembu xi swi endleke swi nga va swakudya swa munhu.” Hi hala tlhelo, Timbhoni ti va khutaze ku xiya leswi Rito ra Xikwembu ri swi vulaka. Va dyondze leswaku Yehovha Xikwembu u languta ngati tanihi leyi kwetsimaka, hikuva “vutomi bya xivumbiwa i ngati.” (Levhitika 17:10, 11, The New English Bible) Hikwalaho Vakreste va ntiyiso va fanele va “tshika . . . ngati.” (Mintirho 15:20) Hikwalaho ko kambisisa Matsalwa emhakeni leyi, va ka Lin va ehlekete ku tshika ku xavisa ngati, hambileswi a ku ri yona leyi a yi va nghenisela mali. Hambiswiritano, hi xinkarhana va langutane ni ndzingo lowukulu.
Loko va nga si dyondza ntiyiso, va ka Lin a va byale mirhi ya 1300 ya betel nati ensin’wini ya vona. Hambileswi a swi ta teka malembe ya ntlhanu leswaku misinya leyi yi va vuyerisa, loko se yi sungule ku tswala kahle, va ka Lin a va ta langutela ku kuma R360-000 hi lembe. Leswi nkarhi wo tshovela ro sungula a wu tshinela, va ka Lin va boheke ku endla xiboho xa nkoka. Va dyondzile edyondzweni ya vona ya Bibele leswaku Vakreste va fanele va tibasisa eka “thyaka hinkwaro ra miri ni ra moya” hi ku papalata ku tirhisa kumbe ku seketela mikhuva leyi nga tengangiki yo tanihi ku dzaha fole, ku tirhisa swidzidzirisi hi ndlela yo biha ni ku ncakunya betel nati. (2 Vakorinto 7:1) Xana a va ta endla yini?
Hikwalaho ko karhatiwa hi ripfalo, Nkulukumba Lin u ehlekete ku tshika dyondzo ya yena. Hi nkarhi lowu fanaka, Manana Lin a a xavise tibetel nati leti humaka eka mincindzu ya vona ya khale ivi a kuma mali yo tlula R14 000. Leswi a ko va xikombiso xa leswi a swi ta ta ku nga ri khale loko vo tshika misinya ya vona yi hanya. Hambiswiritano, ripfalo ra Nkulukumba Lin ri ye emahlweni ri n’wi karhata.
U lwisane ni mhaka leyi ku kondza siku rin’wana a kombela Timbhoni ta kwalaho leswaku ti n’wi tsemela micindzu ya yena ya betel nati. Kambe, Timbhoni ti hlamusele leswaku hi yena a faneleke a endla xiboho; hikwalaho u fanele a ‘byarha vutihlamuleri’ ivi a titsemela misinya hi yexe. (Vagalatiya 6:4, 5) Ti n’wi khutaze ku tsundzuka xitshembiso lexi nga eka 1 Vakorinto 10:13, lexi nge: “A mi si humeleriwa hi miringo leyi tlulaka matimba ya munhu. Xikwembu xa tshembeka, xi nga ka xi nga pfumeri leswaku mi hlangana ni ndzingo lowu wu mi hlulaka; loko wu tshuka wu mi tela, xi ta mi nyika matimba ya ku tiyisela, mi ko mi huma eka wona.” Timbhoni ti tlhele ti kombisana na yena, ti ku: “Loko hi ku tsemela misinya ya wena, u nga ha tisola ivi u hi sola hikwalaho ka ku lahlekeriwa ka wena.” Endzhakunyana, Manana Lin u pfuxiwe hi huwa ya tisaha mixo wun’wana. Nuna wa yena ni vana a va tsema misinya ya betel nati!
Nkulukumba Lin u swi xiyile leswaku Yehovha u tiyisile eka xitshembiso xa Yena. U kume ntirho lowu n’wi siyeke ni ripfalo lerinene, wu n’wi endla leswaku a kota ku va mudzunisi wa Yehovha. U khuvuriwe enhlengeletanweni ya xifundzha ya Timbhoni ta Yehovha hi April 1996.
Ina, Nkulukumba Lin entiyisweni u “xavis[e] swilo swa yena hinkwaswo” ivi a xava “dayimani . . . ya nxavo lowukulu.” Sweswi u ni lunghelo leri nga riki na ku ringanisiwa ro va ni vunghana bya munhu hi xiyexe na Yehovha Xikwembu ni ku tirhela swilaveko swa Mfumo wa Yena.