Ku Tirha Ni Nhlengeletano Ya Yehovha Hi Ku Tshembeka

“Lo’nene, u ṅwi endlela v̌unene.”—2 SAMUWELE 22:26.

1, 2. Hi swihi swikombiso swin’wana swa vutshembeki leswi hinkwerhu hi nga swi vonaka evandlheni?

SIKU rin’wana nimadyambu nkulu un’wana a a ri eku lunghiseleleni ka nkulumo ya nhlangano wa Vukreste. A a navela ku tshika a humula; ematshan’weni ya sweswo, a ya emahlweni a lunghiselela, a lava swikombiso ni swifaniso swa le Matsalweni leswi nga ta fikelela timbilu ta ntlhambi ni ku wu khutaza. Hi madyambu ya nhlangano wolowo, mpatswa wun’wana wa vatswari lava karhaleke evandlheni rero a wu lava ku tshama ekaya wu tiphina; ematshan’weni ya sweswo, hi ku lehisa mbilu wu lunghiselele vana va wona leswaku va ya enhlanganweni na wona. Endzhaku ka nhlangano, ntlawa wun’wana wa Vakreste wu bule hi nkulumo ya nkulu loyi. Makwerhu un’wana wa xisati u lave ku boxa leswaku makwerhu yoloye u tshame a vavisa mintlhaveko ya yena; ematshan’weni ya sweswo, u vulavula hi tinghitsi hi yin’wana ya tinhla leti a ti nyikeleke. Xana wa wu vona mboyamelo lowu fanaka eka swiyimo leswi?

² Mboyamelo wolowo wu vuriwa vutshembeki. Nkulu loyi u tirhela ntlhambi wa Xikwembu hi vutshembeki; vatswari lava va hlanganyela minhlangano ya vandlha hi vutshembeki; makwerhu loyi wa xisati u seketela vakulu hi vutshembeki. (Vaheveru 10:24, 25; 13:17; 1 Petro 5:2) Ina, eswiyin’weni hinkwaswo swa vutomi, hi vona vanhu va Xikwembu va tiyimisele ku tirha ni nhlengeletano ya Yehovha hi vutshembeki.

3. Hikwalaho ka yini ku tshama hi tshembekile enhlengeletanweni ya Yehovha ya laha misaveni swi ri swa nkoka swonghasi?

³ Loko Yehovha a languta emisaveni leyi leyi onhakeke, u vona ku ri hava vutshembeki. (Mikiya 7:2) Vona ndlela leyi mbilu ya yena yi faneleke yi tsaka ha yona loko a vona vutshembeki bya vanhu vakwe! Ina, vutshembeki bya wena bya n’wi tsakisa. Hambiswiritano, Sathana muxandzuki wo sungula a byi n’wi tsakisi, byi n’wi kombisa a ri muhembi. (Swivuriso 27:11; Yohane 8:44) Swi tive leswaku Sathana u ta ringeta ku herisa vutshembeki bya wena eka Yehovha ni le ka nhlengeletano ya Yena ya laha misaveni. A hi kambisiseni tin’wana ta tindlela leti Sathana a endlaka leswi ha tona. Xisweswo, hi ta swi vona kahle leswi hi faneleke hi swi endla leswaku hi tshama hi tshembekile ku ya fika emakumu.—2 Vakorinto 2:11.

Ku Tshamela Ku Langutisa Ku Nga Hetiseki Ka Van’wana Swi Nga Herisa Vutshembeki

4. (a) Ha yini swi olova ku vona swihoxo eka lava byarhisiweke vutihlamuleri? (b) Xana Kora u tikombise njhani a nga tshembekanga enhlengeletanweni ya Yehovha?

⁴ Loko makwerhu a ri ni vutihlamuleri lebyikulu, swihoxo swa yena swi nga vonaka hi ku olova. Vona ndlela leyi swi olovaka ha yona ku vona ‘xilavi lexi nga etihlweni ra makwerhu kambe hi honisa ntsandze lowu nga etihlweni ra hina’! (Matewu 7:1-5) Hikokwalaho, ku tshamela ku languta swihoxo, swi nga vanga ku pfumala ku tshembeka. Hi xikombiso, xiya ku hambana loku nga kona exikarhi ka Kora na Davhida. Kora a a ri ni vutihlamuleri lebyikulu, naswona kumbexana u tirhe hi vutshembeki ku ringana malembe yo hlayanyana, kambe u sungule ku va ni makwanga. U sungule ku vondzoka vulawuri bya Muxe na Aroni, vazala va yena. Hambileswi Muxe a a titsongahata ku tlula vanhu hinkwavo, entiyisweni Kora u sungule ku n’wi xopaxopa swinene. Handle ko kanakana a a swi vona swihoxo eka Muxe. Hambiswiritano, swihoxo sweswo a swi nga nyiki Kora xisirhelelo xo kombisa ku pfumala vutshembeki enhlengeletanweni ya Yehovha. U dlayiwile exikarhi ka nhlengeletano.—Tinhlayo 12:3; 16:11, 31-33.

5. Hikwalaho ka yini Davhida a nga ha vaka a titwe a ringiwa ku xandzukela Sawulo?

⁵ Hi hala tlhelo, Davhida a a tirha ehansi ka Hosi Sawulo. Sawulo loyi a tshameke a va hosi yo lulama, u hundzuke lowo biha swinene. Davhida a a fanele a va ni ripfumelo, a tiyisela a tlhela a va ni vuswikoti leswaku a kota ku pona nhlaselo wa Sawulo la nga ni mavondzo. Hambiswiritano, loko Davhida a kume nkarhi wo tirihisela, u vule leswaku ‘a swi fanelanga emahlweni ka Yehovha,’ leswaku a endla xiendlo xo pfumala ku tshembeka eka loyi Yehovha a n’wi toteke.—1 Samuwele 26:11.

6. Hambiloko hi vona ku tsana ko karhi ni swihoxo eka vakulu, i yini leswi hi nga fanelangiki hi swi endla?

⁶ Loko van’wana lava rhangelaka exikarhi ka hina va vonaka va avanyisa hi ndlela leyi hoxeke, va vulavula marito lama kombisaka vukari, kumbe va vonaka va kombisa ku ya hi nghohe, xana hi fanele hi n’unun’uta hi vona, kumbexana hi kala hi nghenisa moya wa ku xopaxopa evandlheni? Xana hi ta tshika ku ya eminhlanganweni ya Vukreste ku ri ku kombisa ku lwisana ni mhaka leyi? Nikatsongo! Ku fana na Davhida, a hi nge swi pfumeleli swihoxo swa munhu un’wana swi hi vangela ku nga tshembeki eka Yehovha ni le nhlengeletanweni ya yena!—Pisalema 119:165.

7. Hi swihi swiendlo swin’wana swo biha leswi veke kona malunghana ni tempele ya le Yerusalema, naswona Yesu u titwe njhani hi leswi?

⁷ Xikombiso xa munhu la tshembekeke swinene ku tlula hinkwavo a ku ri Yesu Kreste, loyi a hlamuseriwaka hi ndlela ya vuprofeta tanihi ‘mutshembeki’ wa Yehovha. (Pisalema 16:10) Ku tirhisiwa ka tempele ya le Yerusalema hi ndlela yo biha swi fanele swi tise ntlhontlho wa vutshembeki. Yesu a a swi tiva leswaku ntirho wa muprista lonkulu ni magandzelo a swi fanekisela vutirheli bya yena ni rifu ra yena ra gandzelo, naswona a a wu tiva nkoka lowu swi nga na wona ku va vanhu va dyondza timhaka leti. Kutani a a hlundzuke hi ndlela leyi kombisaka vululami loko a vone leswaku tempele se yi hundzeke “bako ra makhamba.” Hikwalaho ka vulawuri lebyi a a byi nyikiwe hi Xikwembu, i kambirhi a ri karhi a teka magoza yo yi basisa.a—Matewu 21:12, 13; Yohane 2:15-17.

8. (a) Xana Yesu u byi kombise njhani vutshembeki malunghana ni lunghiselelo ra tempele? (b) Xana hi nga swi kombisa njhani leswaku ha swi tlangela ku gandzela Yehovha ni nhlengeletano ya yena leyi tengeke?

⁸ Hambiswiritano, Yesu a a seketela lunghiselelo ra tempele hi vutshembeki. Ku sukela evuhlangini, a a ya eminkhubyeni ya le tempeleni naswona a a hamba a dyondzisa kona. A a hakela hambi ku ri xibalo xa tempele—hambileswi a a nga boheki ku endla tano. (Matewu 17:24-27) Yesu u bumabumele noni leyi nga xisiwana hikwalaho ko va yi hoxe “hinkwaswo leswi a a [yi] ta tihanyisa ha swona” ebokisini ra mali ya tempele. Endzhakunyana ka sweswo, Yehovha u tshike tempele yoleyo hi ku helela. Kambe ku fikela enkarhini wolowo, Yesu a a tshembeka eka yona. (Marka 12:41-44; Matewu 23:38) Namuntlha nhlengeletano ya Xikwembu ya laha misaveni yi le xiyin’weni lexi tlakukeke swinene ku tlula mafambiselo ya Xiyuda ni tempele ya wona. I ntiyiso, a yi hetisekanga; hi yona mhaka leyi ku endliwaka mindzulamiso yo karhi minkarhi yin’wana. Kambe a yi talanga hi vubihi, naswona Yehovha Xikwembu a nga lavi ku yi siva hi yin’wana. Hi nga tshuki hi pfumelela ku nga hetiseki loku hi ku vonaka eka yona ku hi hlundzukisa kumbe ku hi vangela moya lowo biha wo xopaxopa, hi va ni langutelo leri hoxeke. Ku ri na sweswo, a hi tekeleleni vutshembeki bya Yesu Kreste.—1 Petro 2:21.

Ku Nga Hetiseki Ka Hina Vini

9, 10. (a)Xana mafambiselo ya Sathana ya swilo ma ku tirhisa njhani ku nga hetiseki ka hina hi ndlela yo biha leswaku hi phaseka kutani hi wela eku tikhomeni loku kombisaka ku pfumala vutshembeki? (b) Xana munhu loyi a endleke xidyoho lexikulu u fanele a endla yini?

⁹ Sathana u tlhela a ringeta ku hlohlotela ku pfumala vutshembeki hi ku tirhisa ku nga hetiseki ka hina vini. Mafambiselo ya yena ya swilo ma tirhisa ku nga hetiseki ka hina vini, ma hi ringa leswaku hi endla leswo biha emahlweni ka Yehovha. Lexi vavisaka, lembe na lembe vanhu va magidi va wela eku tikhomeni loko biha. Van’wana va kombisa ku pfumala loku ka vutshembeki hi ku hanya vutomi byimbirhi, va hambeta ni swiendlo swo biha loko hi hala tlhelo va ri karhi va xisetela hi ku tikomba va ri Vakreste lava tshembekeke. Loko a angula malunghana ni ntlhandlamano wa swihloko swa magazini wa Xalamuka! emhakeni leyi leswi nge “Vantshwa Va Vutisa . . .” wanhwana un’wana u tsarile: “Swihloko leswi swi vulavula hi vutomi bya mina.” A a hlakulele xinghana xa le xihundleni ni vantshwa lava nga n’wi rhandziki Yehovha. Ku ve ni vuyelo byihi? Wa tsala: “Vutomi bya mina byi sungule ku onhaka, naswona ndzi katseke eku tikhomeni loko biha kutani ndzi boheka ku tshinyiwa. Vuxaka bya mina na Yehovha a byi onhiwile, naswona vatswari va mina ni vakulu a va nga ha ndzi tshembi.”b

¹⁰ Wanhwana loyi u kume mpfuno eka vakulu kutani u tlhelele entirhweni wa Yehovha hi vutshembeki. Kambe, lexi vavisaka van’wana va kuma vuyelo lebyi nga tsakisiki, naswona van’wana a va ha tlheleli evandlheni. Vona ndlela leyi swi antswaka ha yona ku tshembeka ni ku lwisana ni miringo emisaveni leyi yo homboloka! Landzela switsundzuxo swa timagazini ta Xihondzo xo Rindza ni Xalamuka! malunghana ni timhaka leti yelanaka ni vanghana va misava ni vutihungasi lebyi thyakeke. U nga tshuki u wela eka hanyelo ro pfumala ku tshembeka. Kambe loko swi tshuka swi ku humelela, u nga tshuki u tiendla leswi u nga riki swona. (Pisalema 26:4) Ku ri na sweswo, kuma mpfuno. Leswi hi leswi vatswari ni vakulu va Vukreste va rindzeleke swona.—Yakobo 5:14.

11. Ha yini swi nga ha vaka swi hoxile ku tivona hi bihe ku tlula mpimo, naswona i xikombiso xihi xa le Bibeleni lexi nga ta hi pfuna leswaku hi lulamisa langutelo ra hina?

¹¹ Ku nga hetiseki ka hina ku nga ha hi nghenisa ekhombyeni hi ndlela yin’wana. Van’wana lava endlaka swiendlo swo pfumala ku tshembeka a va ha ringeti ni ku tsakisa Yehovha. Tsundzuka, Davhida u endle swidyoho leswikulu swinene. Kambe, endzhaku ka nkarhi wo leha Davhida a file, Yehovha u n’wi tsundzukile tanihi nandza wa yena la tshembekeke. (Vaheveru 11:32; 12:1) Hikwalaho ka yini? Hikuva a nga tshikanga ku ringeta ku tsakisa Yehovha. Swivuriso 24:16 yi ri: “Hikuv̌a l’a lulameke, hambi a nga wa e ka ntlhanu na kambiri, o ta pfuka.” Hakunene, loko hi wela eswidyohweni leswitsongo—ina hi ku phindha-phindha—hikwalaho ka ku tsananyana ko karhi loku hi lwisanaka na kona, hi nga ha tama ha ha ri vo lulama emahlweni ka Yehovha loko hi hambeta hi “pfuka”—leswi vulaka ku hundzuka ka xiviri kutani hi tlhelela endleleni ya ntirho wa vutshembeki.—Ringanisa 2 Vakorinto 2:7.

Tivonele eTindleleni Ta Ku Pfumala Vutshembeki Leti Tumbeleke!

12. Emhakeni ya Vafarisi, xana langutelo ro oma nhloko, ro namarhela nawu ri ku vange hi ndlela yihi ku pfumala vutshembeki?

¹² Nakambe ku pfumala vutshembeki swi ta hi tindlela leti tumbeleke. Swi nga ha vonaka onge i vutshembeki! Hi xikombiso, kumbexana Vafarisi va le sikwini ra Yesu a va anakanya leswaku va tshembeke ngopfu.c Kambe a va nga swi koti ku vona ku hambana exikarhi ka ku va la tshembekeke ni ku va munhu la namarhelaka swinene-nene milawu yo endliwa hi vanhu, hikuva a va ome tinhloko naswona a va avanyisa hi tihanyi. (Ringanisa Eklesiasta 7:16.) Hikwalaho ko endla leswi, entiyisweni a va nga tshembekanga—evanhwini lava a va fanele va va tirhela, hi ku ya hi mongo wa Nawu lowu a va vula leswaku va dyondzisa wona, ni le ka Yehovha hi yexe. Ku hambana ni sweswo, Yesu a a tshembekile hi ku ya hi mongo wa Nawu, lowu a wu sekeriwe erirhandzwini. Xisweswo, a a aka vanhu ni ku va khutaza, hilaha vuprofeta bya Vumesiya a byi vhumbhe hakona.—Esaya 42:3; 50:4; 61:1, 2.

13. (a) Xana vatswari va Vukreste va nga ha kombisa ku pfumala vutshembeki hi ndlela yihi? (b) Hikwalaho ka yini vatswari va fanele va papalata ku hlundzuka ku tlula mpimo, ku xopaxopa, kumbe va tshinya vana va vona hi ndlela leyi hoxeke?

¹³ Vakreste lava byarhisiweke vutihlamuleri byo karhi va vuyeriwa swinene eka xikombiso xa Yesu emhakeni leyi. Hi xikombiso, vatswari lava tshembekeke va swi tiva leswaku va fanele va tshinya vana va vona. (Swivuriso 13:24) Kambe va fanele va tiyiseka leswaku a va va dyisi mbitsi vana va vona hi ku va tshinya hi vukari, va hlundzukile kumbe hi ku tshamela ku va xopaxopa hi tihanyi. Vana lava titwaka onge a va nge swi koti ku tsakisa vatswari va vona kumbe lava vonaka onge vugandzeri bya vatswari va vona byi paluxa swihoxo ni ku va xopaxopa va nga ha hela mbilu, naswona eku heteleleni va nga ha tshika ripfumelo ra ntiyiso.—Vakolosa 3:21.

14. Xana varisi va Vukreste va nga tikombisa njhani va tshembekile eka ntlhambi lowu va wu tirhelaka?

¹⁴ Hilaha ku fanaka, vakulu va Vukreste ni valanguteri lava famba-fambaka va yisa nyingiso eka swiphiqo ni makhombo lawa ntlhambi wu langutanaka na wona. Tanihi varisi lava tshembekeke, va nyikela ndzayo loko yi laveka, va tiyiseka leswaku va sungula va kuma mintiyiso hinkwayo kutani hi vukheta va sekela leswi va swi vulaka eBibeleni ni le tibukwini ta Sosayiti. (Pisalema 119:105; Swivuriso 18:13) Nakambe va swi tiva leswaku tinyimpfu ti titshege hi vona leswaku ti akiwa ni ku wundliwa hi tlhelo ra moya. Kutani va lava ku tekelela Yesu Kreste, Murisi Lonene. Va tirhela tinyimpfu eminhlanganweni ya Vukreste hi vutshembeki vhiki na vhiki—a va ti vavisi, kambe va ti aka ni ku tiyisa ripfumelo ra tona.—Matewu 20:28; Vaefesa 4:11, 12; Vaheveru 13:20, 21.

15. Xana van’wana eka lembe-xidzana ro sungula va swi kombise ku yini leswaku a va tirhisa vutshembeki hi ndlela leyi hoxeke?

¹⁵ Ndlela yin’wana leyi tumbeleke yo pfumala vutshembeki i ku tirhisa vutshembeki hi ndlela leyi hoxeke. Hi ku ya hi langutelo ra Bibele vutshembeki bya ntiyiso a byi hi pfumeleli leswaku hi rhangisa swilaveko swa hina emahlweni ka vutshembeki bya hina eka Yehovha Xikwembu. Vayuda vo tala eka lembe-xidzana ro sungula a va namarhela swinene Nawu wa Muxe ni mafambiselo ya swilo ya Xiyuda. Kambe nkarhi wa Yehovha wu fikile wa leswaku a susa mikateko ya yena eka tiko rero leri xandzukeke a yi nyika tiko ra Israyele wa moya. Ku lo va vanhu va nga ri vangani ntsena lava kombiseke vutshembeki eka Yehovha kutani va amukela ku cinca loku ka nkoka. Hambi ku ri exikarhi ka Vakreste va ntiyiso, vahlayisi van’wana va milawu ya Xiyuda va sindzise ku tlhelela endzhaku eka ‘swilo leswi tsaneke leswi nga nyawuliki’ swa Nawu wa Muxe, lowu hetisekeke hi ku fika ka Kreste.—Vagalatiya 4:9; 5:6-12; Vafilipiya 3:2, 3.

16. Xana malandza ya Yehovha lama tshembekeke ma angula njhani eka mindzulamiso leyi endliwaka?

¹⁶ Ku hambana ni sweswo, vanhu va Yehovha va manguva lawa va tikombise va tshembekile eminkarhini ya ku cinca ka swilo. Tanihi leswi ku vonakala ka ntiyiso lowu paluxiweke ku yaka emahlweni ku vangama, ku ni mindzulamiso leyi endliwaka. (Swivuriso 4:18) Sweswinyana, “nandza la tshembekaka, wo tlhariha” u hi pfunile leswaku hi antswisa matwisiselo ya hina malunghana ni rito leri nge ‘xitukulwana’ leri tirhisiweke eka Matewu 24:34 ni malunghana ni nkarhi wa ku avanyisiwa ka “tinyimpfu” ni “timbuti” loku boxiweke eka Matewu 25:31-46, ku katsa ni ndlela leyi hi yi langutaka ha yona mintirho yin’wana ya tiko. (Matewu 24:45) A swi kanakanisi leswaku vagwinehi van’wana a va ta va va tsake ngopfu loko vunyingi bya Timbhoni ta Yehovha hi ku tinonon’hwisa a byi lo ala byi namarhela eka matwisiselo layo sungula etimhakeni to tano kutani byi ala ku endla nhluvuko. Nchumu wa muxaka wolowo a wu kalanga wu humelela. Hikwalaho ka yini? Vanhu va Yehovha va tshembekile.

17. Xana minkarhi yin’wana varhandziwa va hina va nga byi ringa njhani vutshembeki bya hina?

¹⁷ Hambiswiritano, mhaka ya ku veka vutshembeki endhawini leyi hoxeke yi nga hi khumba swinene ha un’we-un’we. Loko munghana la rhandzekaka kumbe xirho xa ndyangu xo hlawula ndlela leyi tshovaka misinya ya milawu ya Bibele, hi nga ha vona onge hi onheriwe vutshembeki bya hina. Hi ntolovelo, hi rhandza ku tshembeka eka swirho swa ndyangu. Kambe a hi fanelanga hi tshembeka swinene eka vona ku ri ni ku tshembeka eka Yehovha! (Ringanisa 1 Samuwele 23:16-18.) A hi fanelanga hi pfuna vadyohi leswaku va fihla swidyoho leswikulu kumbe hi va yimelela loko vakulu va ringeta ku ‘va lulamisa hi moya wa ku rhula.’ (Vagalatiya 6:1) Ku endla tano swi ta va swi kombisa ku pfumala ku tshembeka eka Yehovha, enhlengeletanweni ya yena ni le ka murhandziwa wa hina. Ku tlula sweswo hinkwaswo, ku sirhelela mudyohi leswaku a nga nyikiwi ndzayo leyi n’wi faneleke, entiyisweni i ku sivela rirhandzu leri Yehovha a a fanele a n’wi kombisa rona. (Vaheveru 12:5-7) Nakambe, tsundzuka leswaku “timbanga le’ti endliwaka hi munghana ti kombisa riranḍu ra yena.” (Swivuriso 27:6) Ndzayo ya ntiyiso, ya rirhandzu leyi sekeriweke eRitweni ra Xikwembu yi nga ha vavisa murhandziwa wa hina la dyoheke la tinyungubyisaka, kambe hi ku famba ka nkarhi yi nga ponisa vutomi!

Vutshembeki Byi Yima Byi Tiyile Ku Nga Khathariseki Nxaniso

18, 19. (a)Xana Akabu a a lava yini eka Naboto, naswona hikwalaho ka yini Naboto a arile? (b) Xana vutshembeki bya Naboto a byi faneriwa hi vuyelo lebyi a byi kumeke? Hlamusela.

¹⁸ Minkarhi yin’wana Sathana u hlasela vutshembeki bya hina hi ku kongoma. Tsundzuka mhaka ya Naboto. Loko Hosi Akabu a n’wi sindzise ku xavisa nsimu yakwe ya vhinya, u hlamule a ku: “Hi v̌ito ra Yehova, nḍi nga ka nḍi nga ku nyiki nḍaka ya v̌atata wa mina!” (1 Tihosi 21:3) Naboto a a ngo sihalala; a a tshembekile. Nawu wa Muxe wu lerise leswaku Muisrayele a a nga fanelanga a yi xavisela makumu misava leyi a yi kumeke tanihi ndzhaka. (Levhitika 25:23-28) Naboto a a swi tiva kahle leswaku hosi leyi leyi kariheke a yi ta n’wi dlaya, hikuva Akabu ana se a a pfumelele nsati wakwe, Yezabele, leswaku a dlaya vaprofeta va Yehovha lavo tala! Kambe Naboto u yime a tiyile.—1 Tihosi 18:4.

¹⁹ Minkarhi yin’wana vutshembeki byi koxa ku lahlekeriwa. Yezabele, loyi a a pfuniwa hi “v̌anhu . . . la’v̌o biha,” u hlohlotele leswaku Naboto a lumbetiwa hi xidyoho lexi a nga xi endlangiki. Hikwalaho ka sweswo, yena ni vana va yena va dlayiwile. (1 Tihosi 21:7-16; 2 Tihosi 9:26) Xana sweswo swi vula leswaku vutshembeki bya Naboto a byi hoxile? Doo! Naboto hi un’wana wa vavanuna ni vavasati vo tshembeka lava ha ‘hanyaka’ emianakanyweni ya Yehovha ni sweswi, lava etleleke hi ku hlayiseka esirheni kukondza ku fika nkarhi wa mpfuko wa vafi.—Luka 20:38; Mintirho 24:15.

20. Xana ntshembo wu nga hi pfuna njhani leswaku hi hlayisa vutshembeki bya hina?

²⁰ Xitshembiso xexo xi tiyisekisa vanhu va Yehovha lava tshembekeke namuntlha. Ha swi tiva leswaku vutshembeki bya hina byi nga ha hi koxa swo tala emisaveni leyi. Yesu Kreste u hakelele vutshembeki bya yena hi vutomi bya yena, naswona u byele valandzeri va yena leswaku a va ta khomiwa hi ndlela yo biha. (Yohane 15:20) Tanihi leswi ntshembo wa yena hi vumundzuku wu n’wi tiyiseke, na hina hi tiyisiwa hi ntshembo wa hina. (Vaheveru 12:2) Xisweswo, hi nga swi kota ku tshama hi tshembekile niloko hi langutane ni minxaniso hinkwayo.

21. Hi swihi switiyisekiso leswi Yehovha a swi nyikaka vanhu va yena lava tshembekeke?

²¹ Entiyisweni, a hi vangani eka hina lava xanisekelaka vutshembeki hi ndlela yoleyo leyi kongomeke namuntlha. Kambe vanhu va Xikwembu va nga ha langutana ni nxaniso lowukulu emahlweni ko va makumu ma fika. Xana hi nga tiyiseka njhani leswaku hi ta hlayisa vutshembeki bya hina? Hi nga tiyiseka hi ku hlayisa vutshembeki bya hina sweswi. Yehovha u hi nyike xileriso lexikulu—xo chumayela ni ku dyondzisa hi ta Mfumo wakwe. A hi namarheleni ntirho lowu hi vutshembeki. (1 Vakorinto 15:58) Loko hi nga pfumeleli ku nga hetiseki ka vumunhu ku herisa vutshembeki bya hina enhlengeletanweni ya Yehovha, naswona hi tivonela eka tindlela leti tumbeleke ta ku pfumala vutshembeki to tanihi ku tirhisa vutshembeki hi ndlela leyi hoxeke, kutani hi ta va hi tilulamisele kahle loko vutshembeki bya hina byo tshuka byi ringiwe swinene. Eka nchumu wihi na wihi, hi fanele hi tiyiseka leswaku Yehovha u tshembekile hi ndlela leyi nga tsandzekiki eka malandza ya yena lama tshembekeke. (2 Samuwele 22:26) Ina, u ta sirhelela vanhu va yena lava tshembekeke!—Pisalema 97:10.

[Tinhlamuselo ta le hansi]

A Wu Ta Hlamurisa Ku Yini?

◻ Xana hi nga swi papalata njhani ku pfumelela ku nga hetiseki ka van’wana ku endla hi kombisa ku nga tshembeki?

◻ Xana ku nga hetiseki ka hina vini ku nga hi yisa njhani eswiendlweni swo pfumala ku tshembeka?

◻ Xana hi nga lwisana njhani ni mukhuva wa ku tirhisa vutshembeki bya hina hi ndlela leyi hoxeke?

◻ I yini lexi nga ta hi pfuna ku hlayisa vutshembeki bya hina eminkarhini ya nxaniso?

[Bokisi leri nga eka tluka 9]

Ku Tirha Hi Vutshembeki eBethele

“Hinkwaswo a swi endliwe hi mukhuva lowo saseka, hi nawu wa kona.” Ku tsale muapostola Pawulo hi ndlela yoleyo. (1 Vakorinto 14:40) Pawulo a a swi tiva leswaku loko vandlha ri ta fambisiwa kahle a ku ta laveka ‘lunghiselelo,’ leswaku ku va ni nhleleko. Hilaha ku fanaka namuntlha, vakulu va fanele va endla swiboho etimhakeni ta xiviri, to tanihi ku avela swirho swa vandlha tindhawu to hambana-hambana ta dyondzo ya buku ya vandlha, ku endla malunghiselelo ya ntirho wa nsimu ni ku kambisisa matirhelo ya nsimu. Malunghiselelo yo tano minkarhi yin’wana ma nga koxa ku ringiwa ka vutshembeki. A hi swileriso leswi huhuteriweke hi Xikwembu, naswona a hi vanhu hinkwavo va nga ta swi amukela.

Xana minkarhi yin’wana u swi kuma swi ku nonon’hwela ku tshembeka eka malunghiselelo man’wana ya timhaka ta xiviri lama endliwaka evandlheni ra Vukreste? Lokoswiritano, u nga kuma leswaku xikombiso xa Bethele xa pfuna. Vito leri nge Bethele, ku nga rito ra Xiheveru leri vulaka “Yindlu ya Xikwembu,” ri thyiwe marhavi hinkwawo ya 104 ya Sosayiti ya Watch Tower, ku katsa na yindlu-nkulu eUnited States.* Vatirhi vo tirhandzela lava tirhaka va tlhela va tshama emiakweni ya Bethele va lava leswaku tindhawu leti ti va leti kombisaka ku xixima ni ku chava Yehovha. Leswi swi lava leswaku un’wana ni un’wana wa vona a tshembeka.

Hakanyingi vaendzi lava yaka eBethele va vulavula hi nhleleko ni ku basa loku va ku vonaka kwalaho. Vatirhi va kona va hlelekile naswona va tsakile; mavulavulelo ya vona ni mikhuva ya vona hambi ku ri ndlela leyi va langutekaka ha yona swi kombisa ku wupfa, swi kombisa leswaku va ni ripfalo ra Vukreste leri leteriweke hi Bibele. Swirho hinkwaswo swa ndyangu wa Bethele swi namarhela mimpimanyeto ya Rito ra Xikwembu hi vutshembeki.

Ku engetela kwalaho, Huvo leyi Fumaka yi swi nyika xibukwana lexi nge Dwelling Together in Unity, lexi hi musa xi andlalaka malunghiselelo lama tirhaka leswaku ndyangu wolowo lowukulu wu kota ku tirha kahle hi vun’we. (Pisalema 133:1) Hi xikombiso, xi khumba timhaka ta byetlelo, swakudya, ntivo-rihanyo, ku ambala ni ku tilunghisa ni timhaka tin’wana leti fanaka na tona. Swirho swa ndyangu wa Bethele swi seketela ni ku namarhela malunghiselelo wolawo hi vutshembeki, hambileswi ku rhandza ka swona ka munhu hi xiyexe ku nga ha swi endlaka swi ehleketa ku endla swilo hi ndlela yin’wana. A swi teki xibukwana lexi tanihi lexi nga ni milawu ni swinawa-nawana swa voko ra nsimbhi, kambe tanihi nxaxamelo wa swikongomiso leswi endleriweke ku kondletela vun’we ni ntwanano. Valanguteri va seketela milawu leyi leyi sekeriweke eBibeleni hi vutshembeki, naswona va yi tirhisa hi ndlela leyinene leswaku va khutaza ndyangu wa Bethele leswaku wu tikarhatela ntirho wa wona lowo kwetsima wa Bethele.

[Nhlamuselo ya le hansi]

* Tifektri leti, tihofisi ni miako yo tshama eka yona a swi vumbi tempele leyikulu kumbe yindlu ya Xikwembu ya moya. Tempele ya Xikwembu ya moya i lunghiselelo ra xona ra vugandzeri lebyi tengeke. (Mikiya 4:1) Hikokwalaho, a yi yimeriwi hi muako wo karhi wa xiviri wa laha misaveni.

[Bokisi leri nga eka tluka 10]

Mutshembeki Na N’wamilawu

Le ndzhaku hi 1916 Encyclopædia of Religion and Ethics yi vule leswaku “ku hambana loku loku nga kona exikarhi ka mutshembeki na n’wamilawu ku nga kumeka eminkarhini hinkwayo ni le tindhawini hinkwato.” Yi hlamuserile: “Ku na n’wamilawu loyi a endlaka leswi a byeriwaka ku swi endla, a nga yi tluli milawu; wa tshembeka eka leswi tsariweke. Ku ni mutshembeki loyi a swi endlaka leswi . . . loyi a tshembekaka eka swo tala, loyi a vekaka mianakanyo ya yena hinkwayo entirhweni wa yena, loyi a endlaka leswaku mianakanyo ya yena yi fambisana ni ku rhandza ka yena ka ku lava ku tirhela.” Endzhakunyana, buku leyi yi te: “Ku tshembeka swi vula leswi tlulaka ngopfu ku va loyi a hanyaka hi nawu. . . . Munhu wo tshembeka a nga fani ni munhu loyi a hanyaka hi nawu tanihi loyi a tirhaka hi mbilu hinkwayo ni mianakanyo hinkwayo . . . A nga tipfumeleli ku endla swidyoho swa hi vomu hi ku endla leswi a a nga fanelanga a swi endla, hi ku tshika ku endla leswi a a fanele a swi endla kumbe a swi endla hi ku pfumala vutivi.”