Ntiyiso Wu Hundzula Vutomi

SWI khomisa gome kambe i ntiyiso leswaku vutomi bya vanhu vo tala swinene namuntlha bya nonon’hwa, naswona a byi tsakisi. Xana swa koteka leswaku vanhu vo tano va kuma ntsako? Van’wana i swigevenga leswi hlaselaka vanhu-kulobye. Xana va nga va swirho swo tshembeka evanhwini? Nhlamulo eka swivutiso leswi haswimbirhi i ina. Vanhu va nga hundzuka. Vutomi byi nga hundzuriwa. Muapostola Pawulo u swi kombisile leswaku swi nga fikeleriwa hi ndlela yihi loko a tsale a ku: “Mi pfumela ku hundzuka mi va vantshwa emiehleketweni ya n’wina, mi ta kota ku twisisa leswi ku rhandza lokunene ka Xikwembu, loku nkhensekaka ni ku hetiseka, ku nga swona.”—Varhoma 12:2.

Ku boxiwa ka “ku rhandza lokunene ka Xikwembu” ku nga hi tsundzuxa leswi Yesu a swi vuleke eka vadyondzisiwa va yena malembe yo tlula 20 emahlweni ka ku va Pawulo a tsala marito lama nga laha henhla. Yesu u te: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Loko Yesu a vulavula hi “ntiyiso,” a a vula rungula leri huhuteriweke hi Xikwembu—ngopfu-ngopfu rungula ra mayelana ni ku rhandza ka Xikwembu—leri hi hlayiseriweke rona eBibeleni. (Yohane 17:17) Xana ntiyiso wa Bibele wa va ntshunxa vanhu hakunene? Xana ku hanya hi ku pfumelelana ni ku rhandza ka Xikwembu ka byi hundzula vutomi hakunene? Hakunene ka swi endla. Xiya swikombiso swi nga ri swingani.

Ku Va Ni Xikongomelo eVuton’wini

Ku nga ri khale ngopfu, Moisés, wa le Gibraltar, a ri wanuna la nga tsakangiki. U ri: “A ndzi ri xidakwa naswona a ndzi etlela exitarateni. Ndzi titwe ndzi heleriwe hi ntshembo. Vusiku byin’wana ni byin’wana a ndzi kombela Xikwembu leswaku xi ndzi pfuna leswaku ndzi nga voni siku ra mundzuku. Ndzi ririle loko ndzi ri karhi ndzi vutisa Xikwembu leswaku ha yini ndzi velekiwile loko ndzi ri munhu la nga pfuniki nchumu, la nga tirhiki, la nga riki na ndyangu naswona ndzi nga ri na la nga ndzi pfunaka. Ha yini ndzi fanele ndzi ya emahlweni ndzi hanya?” Kutani ku humelela xin’wana.

Moisés u ya emahlweni: “Ndzi swi tivile leswaku Xikwembu xi xi twile xikhongelo xa mina loko ndzi hlangana na Roberto, un’wana wa Timbhoni ta Yehovha. Roberto u ndzi nyike Bibele ni kopi ya xipfuneto xo dyondza Bibele lexi nge I Yini Leswi Xikwembu Xi Swi Languteleke Eka Hina?a Siku rin’wana ni rin’wana hi dyondze Bibele swin’we hi tshame ebencini leri a ndzi etlela eka rona ni vusiku. Endzhaku ka n’hweti Roberto u fambe na mina enhlanganweni eHolweni ya Mfumo ya kwalaho ya Timbhoni ta Yehovha. Hi ku hatlisa, ntiyiso wa Bibele a wu cince langutelo ra mina hi ku helela. A ndza ha etleli eswitarateni; a ndza ha nwi kumbe ku dzaha. Vutomi bya mina byi cincile, naswona ndzi tsakile. Ndzi tiyimisele ku khuvuriwa ku nga ri khale ivi ndzi tirhela Yehovha tanihi un’wana wa Timbhoni ta yena.”

Mawaku ku hundzuriwa konghasi! Loko vanhu va nga ri na ntshembo, hakanyingi xivangelo xa kona ku va ku ri ku pfumala vutivi. A va xi tivi Xikwembu kumbe swikongomelo swa xona leswi hlamarisaka. Emhakeni ya Moisés, loko a kume vutivi byolebyo, byi n’wi nyike matimba ni xivindzi xo hundzula vutomi bya yena. Xikhongelo xa mupisalema lexi yaka eka Xikwembu xi hlamuriwile emhakeni ya Moisés: “Ruma ku v̌onakala ka wena ni v̌unene bya wena, ŝi nḍi fambisa, ŝi nḍi yisa e nṭhav̌eni ya ku kwetsima ka wena ne tindlwini ta wena.”—Pisalema 43:3.

Le Belize, Daniel u ve ni ntokoto lowu fanaka. Daniel a a nga etleli eswitarateni—a a ri ni ntirho lowu xiximekaka. Kambe u lwisane ni ku godzomberiwa hi swidzidzirisi ni xihoko naswona a a hanya vutomi byo biha ku ringana malembe ya 20. Hambileswi a kurisiwe a ri Mukhatoliki, Daniel a a vona vutomi byi nga ri na xikongomelo, naswona a a kanakana vukona bya Xikwembu. U ye etikerekeni to hambana-hambana a lava mpfuno kambe a kuma leswaku vo tala va vanghana va yena lava yaka ekerekeni hambi ku ri van’wana va vanghana va yena lava nga vafundhisi a va tirhisa swidzidzirisi ni xihoko hi ndlela yo biha. Hi nkarhi lowu fanaka, nsati wa yena a ri ekusuhi no n’wi thala.

Hikwalaho ko heleriwa hi ntshembo Daniel u yile a ya tshunguriwa endhawini ya vutshunguri. Hambiswiritano, a swi tiva leswaku endzhaku ka ku ntshunxiwa ka yena, u ta tlhelela hi ku hatlisa eku tirhiseni ka swidzidzirisi loko a nga kumi mpfuno. Kambe mpfuno wa muxaka muni? Hi May 1996, masiku mambirhi endzhaku ka loko a humile endhawini ya vutshunguri, Daniel u ye eka un’wana wa Timbhoni ta Yehovha ivi a n’wi hlamarisa hi xikombelo lexi nge, “Ndzi kombela u dyondza na mina Bibele.” Mbhoni yi hlele ku dyondza Bibele na Daniel kambirhi hi vhiki, naswona ku nga ri khale Daniel u sungule ku pfumelelanisa vutomi bya yena ni ku rhandza ka Xikwembu ivi a siva vanghana va yena va khale hi vanghana va Vakreste lava a va nga tirhisi swidzidzirisi kumbe xihoko hi ndlela yo biha ni lava a va papalata mahanyelo yo biha. Xisweswo Daniel u kume leswaku leswi Bibele yi swi vulaka i ntiyiso: “L’a fambaka ni tintlhari o ta tlhariha, kambe l’a tolov̌elaka ŝihunguki o ta onhaka.” (Swivuriso 13:20) Hi ku hatlisa u te: “I ro sungula evuton’wini bya mina ku va ndzi tive leswi swi vulaka swona ku va ni ripfalo leri tengeke.” Vutomi bya Daniel na byona byi hundzuriwile.

Le Puerto Rico, wanuna un’wana u tokote ku hundzuka loku xiyekaka. A ri ekhotsweni naswona a langutiwa tanihi loyi a nga ni khombo swinene, tanihi leswi a dlaye vanhu vo hlaya. Xana ntiyiso wa Bibele a wu ta n’wi hundzula? Ina. Un’wana wa Timbhoni ta Yehovha u swi kotile ku n’wi nyika tikopi ta timagazini ta Xihondzo xo Rindza na Xalamuka!, naswona u kombele leti engetelekeke hi ku hatlisa. Dyondzo ya Bibele yi sunguriwile na yena, naswona loko ntiyiso wa Bibele wu sungula ku khumba mbilu ya yena, ku hundzuka loku a ku endleke a ku voniwa hi vanhu hinkwavo. Xin’wana xa swikombiso swo sungula swa ku hundzuka ka yena a ku ri ku tsemeta misisi ya yena yo leha ivi a susa malebvu ya yena lawa a ma nga languteki.

Bibele yi vula leswaku Xikwembu xi rivalela vadyohi lava hundzukaka hakunene ivi va hundzula ni mahanyelo ya vona. Pawulo u tsarile a ku: “Xana a mi tivi leswaku lavo homboloka va nga ka va nga dyi ndzhaka ya Mfumo wa Xikwembu, xana? . . . Hi leswi van’wana va n’wina a mi ri swona; kambe sweswi mi basisiwile.” (1 Vakorinto 6:9, 11) Handle ko kanakana, marito lawa ma chavelele wanuna loyi, hilaha marito ya Mintirho 24:15 ma endleke hakona, lama nge: “Lavo lulama ni lava nga lulamangiki va ta pfuka eku feni.” U te: “Ndzi lava ku va kona loko ku ri karhi ku pfuxiwa vafi leswaku ndzi ta kombela ku rivaleriwa eka lava ndzi va dlayeke.”

Ku Va Xirho Xa Ndyangu Lowuntshwa

Siku rin’wana Luis, muvuri wa evhangeli wa nkarhi hinkwawo wa Timbhoni ta Yehovha le Argentina, u tivisiwe eka jaha leri a ri ri ni matimu lama nga tsakisiki. Leswi a tshikiwe hi vatswari va yena a ha ku velekiwa, u kuriseriwe etindhawini to hambana-hambana to hlayisa lava lavaka mpfuno. Loko a ri ni kwalomu ka malembe ya 20, u twe hi tindhawu ta laha mana wa yena a nga kona ivi a anakanya ku ya tshama ekusuhi na kona. U tirhe hi matimba, a hlengeleta mali yo tala, ivi a ya edorobeni leri mana wa yena a ri eka rona. Mana wa yena u tshame na yena ku kondza mali ya yena yi hela ivi a n’wi kombela leswaku a famba. Ku hlongoriwa loku ku n’wi endle a ehleketa ku tisunga.

Hambiswiritano, Luis u swi kotile ku avelana ntiyiso wa Bibele ni jaha leri. Ntiyiso wolowo wu katsa xitiyisekiso lexi nge: “Hambi loko tatana na manana v̌a nga nḍi ṭhika, Yehova o ta nḍi rola.” (Pisalema 27:10) Jaha leri ri kume leswaku ri ni Tatana wa le tilweni loyi a nga ta ka a nga ri tshiki. Sweswi u tsakile ku va xirho xa ndyangu lowuntshwa, ndyangu wa Yehovha.

Wanuna un’wana etikweni rolero u byele un’wana wa Timbhoni ta Yehovha leswaku a a rhandza magazini wa Xihondzo xo Rindza. Ha yini? Hikuva wu hlayise vukati bya yena. Swi vonaka onge siku rin’wana wanuna loyi, loko a suka laha a tirhaka kona, u vone magazini wa Xihondzo xo Rindza laha va lahlaka kona thyaka, lowu a wu ri ni xihloko lexi nge “Ku Dlaya Vukati” xi tsariwe hi maletere lamakulu. Tanihi leswi vukati bya yena a byi ri ekhombyeni naswona yena ni nsati wa yena a va sungule ku lava ku hambana hi nawu, u teke magazini lowu ivi a sungula ku wu hlaya. U ye na wona ekaya ivi a wu hlaya ni nsati wa yena. Mpatswa lowu wu ringete ku tirhisa ndzayo leyi sekeriweke eBibeleni leyi nga eka magazini lowu. (Vaefesa 5:21–6:4) Vuxaka bya vona byi antswile hi ku hatlisa. Va tshike ku lava ku hambana naswona sweswi va dyondza Bibele va ri mpatswa lowu hlanganeke.

Le Uruguay, wanuna un’wana la vuriwaka Luis a a nga tsakangi. Ku godzomberiwa hi swidzidzirisi, vungoma, ku gandzela swikwembu swa hava, ku tirhisa xihoko hi ndlela yo biha—leswi a ku ri swin’wana swa swilo leswi a swi endla vutomi bya yena byi hlanga-hlangana. Eku heteleleni, Luis hikwalaho ko hetiwa matimba hilaha ku heleleke u ve la pfumelaka leswaku Xikwembu a xi kona. Munghana wa yena u n’wi nyike buku leyi nge Life—How Did It Get Here? By Evolution or by Creation?b Leswi swi endle leswaku a hlangana swa xinkarhana ni Timbhoni ta Yehovha, kambe Luis u tlhelele ebyaleni ni le swidzidzirisini hi ku hatlisa. Loko nkarhi wun’wana hikwalaho ka ku vaviseka lokukulu, a tikume a tshame endhawini leyi a yi tele hi thyaka, u khongerile, a kongomisa xikhongelo xa yena eka “tata wa Yesu Kreste,” tanihi leswi a nga tiyiseki hi vito ra Xikwembu.

U kombele Xikwembu leswaku xi n’wi komba loko ku ri na xivangelo xo va a velekiwile. Luis u ri: “Siku leri tlhandlamaka, munhu loyi ndzi n’wi toloveleke u ndzi nyike buku leyi a nga ha yi tirhisi. A yi ku yini? Nhlavutelo—Ku Chaputa Ka Yona Loku Hlamarisaka Ku Tshinele!c Buku leyi yi n’wi pfunile ku hlamula xivutiso xa yena. Luis u khongerile nakambe leswaku a pfuniwa ku kuma vukhongeri lebyi nga ta n’wi komba ndlela yo tirhela Xikwembu. Mawaku xihlamariso xa kona! Bele ya le rivantini yi ririle naswona hala handle a ku yime Timbhoni ta Yehovha timbirhi. Luis u sungule ku dyondza Bibele na tona hi nkarhi wolowo. U endle nhluvuko hi xihatla naswona sweswi u titwa a katekile ku va Mbhoni leyi khuvuriweke. U hanya vutomi lebyi baseke naswona u pfuna van’wana ku kuma xikongomelo xa vutomi bya vona. Eka yena, marito ya Pisalema 65:2 ma ve ntiyiso: “Wena l’a yingisaka mikhongelo! V̌anhu hikwav̌o v̌a ta ta ka wena!”

Le Philippines, Allan a a ri mulweri wa swichudeni. A a ri wa nhlangano lowu xikongomelo xa wona a ku ri ku “wisa hulumendhe leswaku switukulwana swa nkarhi lowu taka swi ta ringana.” Kambe, siku rin’wana u vulavurisane ni Timbhoni ta Yehovha ivi a dyondza xikongomelo xa Xikwembu hi vanhu eBibeleni. Xikongomelo xolexo xi katsa xitshembiso lexi huhuteriweke lexi nge: “Ku sele nkarinyana, kutani lo’wo biha a nga ka a nga ha v̌i kona . . . V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.” (Pisalema 37:10, 11) Allan u te: “Hi ku hatlisa ndzi swi xiyile leswaku leswi nhlangano wa hina a wu lwela swona a swi tshembisiwe khale eBibeleni. Hinkwaswo swilo leswi a hi swi navela hi ku hiseka swi ta tisiwa ehansi ka Mfumo wa Xikwembu.” Sweswi Allan u seketela Mfumo wa Xikwembu naswona u pfuna van’wana ku va ni ripfumelo entiyisweni wa Bibele.

Ina, vutomi bya hundzuriwa loko vanhu va yingisa ntiyiso wa Rito ra Xikwembu, ku nga Bibele. Hakunene, wa ta nkarhi lowu vanhu hinkwavo lava poneke va nga ta va va twananise vutomi bya vona ni ku rhandza ka Xikwembu. Wa nga vona ku hundzuka ko tano! Kutani, vuprofeta lebyi byi ta hetiseka: “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.”—Esaya 11:9.

[Tinhlamuselo ta le hansi]