Ku Tiyisa Ku Pfumela Ka Hina eRitweni Ra Xikwembu

VANHU vo tala va hlaye Bibele ku tlula buku yihi na yihi. Kambe i vangani lava kombiseke ripfumelo erunguleni ra yona? Bibele hi yoxe yi hlamusela leswaku “a hi hinkwavo lava nga ni ku pfumela.” (2 Vatesalonika 3:2) Entiyisweni, a hi velekiwi na rona ripfumelo. Ri fanele ri hlakuleriwa. Hambi ku ri lava nga ni mpimo wo karhi wa ripfumelo a va fanelanga va ri tekela ehansi. Ripfumelo ri nga tsana ivi ri fa. Hikwalaho, ku laveka matshalatshala leswaku hi tshama hi “[tiyile] swinene eku pfumeleni.”—Tito 2:2.

Kutani, hi xivangelo lexi twalaka Huvo leyi Fumaka ya Timbhoni ta Yehovha yi hlawule nhloko-mhaka leyi nge “Ku Pfumela eRitweni Ra Xikwembu” leswaku yi va ya nongonoko wa mintsombano ya vona ya muganga ya 1997/98. Timiliyoni ta Timbhoni ni van’wana xisweswo se va vile na rona lunghelo ro hlengeletana swin’we leswaku va tiyisa ripfumelo ra vona eRitweni ra Xikwembu.

Rito Ra Xikwembu I Ntiyiso—I Xisekelo Xa Ripfumelo Ra Hina

Yoleyo a ku ri nhloko-mhaka ya siku ro sungula ra ntsombano. Yi sungule hi marito yo bumabumela hinkwavo lava nga kona. Ku va kona entsombanweni a ku ri vumbhoni byo xixima Bibele. Kambe, ku vutisiwe swivutiso leswi tlhontlhaka mianakanyo malunghana ni ntikelo wa ripfumelo ra hina: ‘Xana ha swi kota ku lwela tidyondzo ta hina, hi tirhisa Rito ra Xikwembu tanihi xihlovo xa hina? Xana ha swi tlangela swakudya swa moya, hi nga yi tekeli ehansi Bibele, minhlangano ya vandlha ni tibuku leti sekeriweke eBibeleni? Xana ha kula erirhandzwini, evutivini lebyi kongomeke ni le ku twisiseni?’ Xivulavuri xi khutaze hinkwavo ku yingisela hi vukheta, xi vula leswaku “ku lunghiseleriwe Ntsombano wa Muganga lowu nge ‘Ku Pfumela eRitweni ra Xikwembu’ leswaku wu hi pfuna ku tikambisisa ni ku kambisisa mpimo ni ntikelo wa ripfumelo leri hi nga na rona ha un’we-un’we.”

Nkulumo-nkulu a yi ri na xihloko lexi nge “Ku Famba Hi Ripfumelo, Ku Nga Ri Hi Ku Vona.” (2 Vakorinto 5:7, NW) Xivulavuri xi te: “Ripfumelo ra lava va vaka Timbhoni ta Yehovha a hi ra magugu.” Wa nga vona ndlela leyi leswi swi nga ntiyiso ha yona! Ripfumelo ra xiviri a ri amukeli xin’wana na xin’wana. Ri sekeriwe eka swilo swa xiviri. Vaheveru 11:1 yi ri: “Ku pfumela i ku tshemba loku tiyeke ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki.” Xivulavuri xi te: “Loko hi ta famba hi ku pfumela hakunene, hi fanele hi va ni ripfumelo leri nga ni xisekelo lexi tiyeke.” Hikwalaho ka leswi hi fambaka hi ku pfumela, ku nga ri hi ku vona, a hi lavi vuxokoxoko bya mayelana ni ndlela leyi Yehovha a nga ta hetisisa xivumbeko xin’wana ni xin’wana xa xikongomelo xa yena ha yona ni leswaku u ta xi hetisisa rini. Leswi ana se hi swi tivaka ha yena swi hi nyika ntshembo lowu heleleke ematimbeni ya yena yo hetisisa switshembiso swa yena hi rirhandzu ni hi ku lulama.

Nkulumo leyi nge, “Vantshwa Lava Nga Vakreste—Xiphemu Xa Nkoka Xa Vandlha” yi tsundzuxe vantshwa hi ndlela leyi va nga va risima ha yona eka Yehovha. Va khutaziwe ku kula hi tlhelo ra moya hi ku tirhela tipakani to tanihi ku hlaya Bibele hinkwayo ni ku fikelela swilaveko swa ku tinyiketela ni ku khuvuriwa. Ku va ni dyondzo leyi engetelekeke i mhaka ya munhu hi xiyexe leyi a nga ta anakanya ha yona ni vatswari va yena, kambe loko yi hlawuriwa, xikongomelo xa yona ku fanele ku va ku hlomiseriwa ku tirhela Xikwembu hilaha ku humelelaka swinene minkarhi hinkwayo. Dyondzo ya misava yi nga pfuna swinene loko hi ta “tiyiseka hi swilo swa nkoka swinene” leswi fambisanaka ni ripfumelo ra hina.—Vafilipiya 1:9, 10, NW.

Ku landzele nxaxamelo wa tinkulumo tinharhu leti nga ni xihloko lexi nge “Xana U Landzela Mimpimanyeto Ya Mani?” Ku pfumela eRitweni ra Xikwembu ku hi susumetela ku namarhela mimpimanyeto ya Bibele. Vakreste va yingisa milawu ni misinya ya milawu ya Yehovha. Hi xikombiso, Matsalwa ma hi tsundzuxa leswaku hi nga tirhisi ndzhukano ni nhlambha. (Vaefesa 4:31, 32) Xivulavuri xi vutisile xi ku: “Loko u nyangatsiwa kumbe ku tlhontlhiwa, xana u rhuketela munghana wa wena wa vukati kumbe vana va wena?” Kavula, sweswo swi ta va swi nga ri Vukreste. Nakambe Xikwembu xi ni mimpimanyeto malunghana ni ndlela leyi hi langutekaka ha yona. Vakreste va fanele va ambala “swiambalo leswi langutekaka, hi xichavo.” (1 Timotiya 2:9, 10) Rito “xichavo” ri ni mianakanyo ya ku tixixima, ku fundzha, ku va ni miehleketo leyinene ni ku ringanisela. Hi susumetiwa hi rirhandzu ro rhandza van’wana naswona hi kongomisiwa hi misinya ya milawu ya Bibele ni ku kota ku vona leswi fanelekaka.

Tinkulumo timbirhi leti landzeleke ti katse nkambisiso wa ndzimana hi ndzimana wa Vaheveru 3:7-15 na 4:1-16. Tindzimana leti ta Bibele ti hi tsundzuxa hi khombo ro “tinonon’hwis[a] hi ku xisiwa hi vudyoho.” (Vaheveru 3:13) Xana hi nga humelela njhani enyimpini ya hina yo lwa ni xidyoho? Yehovha wa hi pfuna hi Rito ra yena. Hakunene, “Rito ra Xikwembu ra hanya, naswona ra tirha, . . . ri kota ku hlaya mianakanyo ni makungu ya mbilu.”—Vaheveru 4:12.

Nkulumo yo hetelela eka siku ro sungula ra ntsombano a yi ku “Buku Ya Vanhu Hinkwavo.” Yi kandziyise ku tshembeka, ku pakanisa ni ntikelo wa Bibele. Mawaku ndlela leyi swi nyanyuleke ha yona ku twa xivulavuri xi tivisa ku humesiwa ka broxara leyintshwa ya matluka ya 32 leyi nge Buku Ya Vanhu Hinkwavo! Broxara leyi leyintshwa yi lunghiseleriwe ngopfu-ngopfu vanhu lava, hambi va dyondzekile, va tivaka switsongo hi Bibele. Nkulumo leyi yi gimete hi marito lama nge: “Vanhu va fanele va tikambisisela Rito ra Xikwembu. Ha tiyiseka leswaku loko va tikambisisela yona hi voxe, va ta swi xiya leswaku buku leyi yo hlawuleka, ku nga Bibele, hakunene i buku ya vanhu hinkwavo!”

Tekelela “Muhetisisi Wa Ku Pfumela Ka Hina”

Nhloko-mhaka leyi ya siku ra vumbirhi ra ntsombano yi kokele nyingiso eka Yesu Kreste, “Muhetisekisi wa ripfumelo ra hina.” Hi fanele hi “landzelerisisa mikondzo yakwe.” (Vaheveru 12:2, NW; 1 Petro 2:21, NW) Vo tala eVujaganini va byeriwa leswaku: ‘Pfumela eka Hosi Yesu, kutani u ta ponisiwa!’ Kambe xana ku laveka sweswo ntsena eripfumelweni? Bibele yi vula leswaku “ku pfumela . . . loku nga hava mintirho ku file.” (Yakobo 2:26) Hikwalaho, handle ko pfumela eka Yesu, hi fanele hi endla mintirho leyi a yi endleke, ngopfu-ngopfu hi ku chumayela mahungu lamanene ya Mfumo wa Xikwembu.

Nongonoko wa nimixo wu yise nyingiso entirhweni wo vula evhangeli. Ku fana na Pawulo, hi fanele hi hisekela ku twarisa mahungu lamanene ya ku ponisiwa. (Varhoma 1:14-16) Yesu u chumayele vanhu hinkwako-nkwako. Hambileswi vutirheli bya hina bya nkarhi na nkarhi bya yindlu na yindlu byi humesaka mihandzu, vanhu vo tala va va va nga ri kona emakaya loko hi va endzela. (Mintirho 20:20) Vo tala va le xikolweni, va tirha, va ye eku xaveni kumbe va le ku fambeni. Hikwalaho, hi fanele hi tlhela hi chumayela etindhawini ta mani na mani ni kun’wana ni kun’wana laha vanhu va kumekaka kona.

Nkulumo leyi nge, “Dzima Timitsu, U Tiya eNtiyisweni” yi hi tsundzuxe hi nhlayo leyikulu ya vadyondzisiwa lavantshwa lava khuvuriwaka—ku nga vanhu lava tlulaka 1000 hi xiringaniso siku rin’wana ni rin’wana! I swa nkoka leswaku vanhu lava lavantshwa va dzima timitsu ni ku tiya eku pfumeleni. (Vakolosa 2:6, 7) Xivulavuri xi hlamusele leswaku timitsu ta xiviri ti tswonga mati ni swakudya, hi hala tlhelo ti tiyisa ni ku tshega ximilana. Hilaha ku fanaka, loko va va ni mukhuva lowunene wa ku dyondza ni ku va ni vunakulobye lebyinene, vadyondzisiwa lavantshwa va nga tiya entiyisweni.

Ndzayo leyi a yi faneleka ngopfu-ngopfu eka lava yaka eku khuvuriweni. Ina, hi siku ra vumbirhi ra ntsombano, mintlawa leyikulu ya vadyondzisiwa lavantshwa yi khuvuriwile, yi landzelela xikombiso xa Yesu. Nkulumo leyi nge, “Ku Pfumela eRitweni Ra Xikwembu Swi Yisa Eku Khuvuriweni” yi tsundzuxe lava yaka eku khuvuriweni leswaku ku nghenisiwa hilaha ku heleleke ematini i mfungho lowu fanelaka wa ku fa ka vona emahanyelweni ya vona ya khale yo lava ku titsakisa. Ku humesiwa ka vona ematini ku fanekisela ku hanyisiwa ka vona leswaku va endla ku rhandza ka Xikwembu.

Nkulumo leyi nge, “Lwela Ripfumelo Hi Matimba Hinkwawo” a yi sekeriwe ebukwini ya Bibele ya Yuda. Hi khutaziwe ku sirhelela ripfumelo ra hina hi ku lwisana ni minkucetelo leyi nga ni khombo, yo tanihi ku tikhoma ko biha, vuxandzuki ni vugwinehi. Endzhaku, vatswari—ngopfu-ngopfu vatatana—va nyikiwe nyingiso lowu hlawulekeke eka nkulumo leyi nge, “Wundla Ndyangu Wa Wena.” Ku wundla ndyangu hi swilaveko swa moya, swa nyama ni swa mintlhaveko i ndzhwalo lowu humaka eMatsalweni. (1 Timotiya 5:8) Leswi swi lava nkarhi, ku vulavurisana ni ku tshinelelana. Yehovha Xikwembu wa tsaka hakunene hi ntirho lowukulu lowu vatswari lava nga Vakreste va wu endlaka leswaku va kurisa vana va vona entiyisweni.

Nxaxamelo lowu landzelaka lowu nge, “A Hi Yeni eNdlwini Ya Yehovha,” wu khutaze ku tlangela minhlangano ya Vukreste. Yi hi nyika ku wisa eka mivilelo ya misava leyi. Eminhlanganweni hi ni nkarhi wo khutazana, naswona hi nga kombisa rirhandzu ra hina eka vapfumeri-kulorhi. (Vaheveru 10:24, 25) Minhlangano yi tlhela yi hi pfuna ku lota vutshila bya hina tanihi vadyondzisi, naswona yi kurisa ku twisisa ka hina xikongomelo xa Xikwembu. (Swivuriso 27:17) Onge hi nga tshama hi nga tihambanisi ni vandlha, a hi tsundzukeni marito ya Yesu lama nge: “Laha vambirhi kumbe vanharhu va hlengeletaneke kona hi vito ra mina, na mina ndzi kona exikarhi ka vona.”—Matewu 18:20.

Nkulumo yo hetelela ya siku rolero a yi ku, “Ku Tiya Ka Ripfumelo Ra Wena—Ka Ringiwa Sweswi.” Ripfumelo leri nga ringiwangiki a swi tiveki leswaku ri tiye ku fikela kwihi, ni ntikelo wa rona a wu tiveki. Ri fana ni cheke leyi nga siki cinciwaka. Xana u nga yi kuma mali leyi kombisiweke eka yona? Hilaha ku fanaka, ripfumelo ra hina ri fanele ri ringiwa ku kombisa loko ri tiyile ni ku va ni ntikelo hakunene. (1 Petro 1:6, 7) Xivulavuri xi te: “Minkarhi yin’wana, swihaxa-mahungu swin’we ni valawuri, va xisiwa hi vafundhisi ni hi vagwinehi leswaku va hi hehla, va hi onha vito mayelana ni ripfumelo ra hina ra Vukreste ni ndlela leyi hi hanyaka ha yona. . . . Xana hi ta va pfumelela vanhu lava xisiweke hi Sathana leswaku va hi sivela ni ku hi heta matimba, va hi endla hi va ni tingana hi mahungu lamanene? Xana hi ta ma pfumelela mavunwa lama vuriwaka ehenhleni ka ntiyiso ma khumba mukhuva wa hina wa ku ya emihlanganweni ni wa ku chumayela? Kumbe, xana hi ta yima hi tiyile, hi va ni xivindzi ni ku tiyimisela ku tlula rini na rini leswaku hi hambeta hi twarisa ntiyiso hi Yehovha ni Mfumo wa yena?”

Ku Hanya Hi Ku Pfumela

Nhloko-mhaka leyi ya siku ra vunharhu ra ntsombano a yi sekeriwe emaritweni ya Pawulo lama nge: “Swa vonaka leswaku eka Xikwembu a nga kona loyi a vuriwaka la lulameke hi nawu, hikuva ‘loyi a lulameke u ta hanya hikwalaho ka ripfumelo.’” (Vagalatiya 3:11, NW) Nxaxamelo lowu nge, “Marito Ya Vuprofeta Bya Yuwele eNkarhini Wa Hina,” a ku ri yin’wana ya tinhla-nkulu ta mixo wolowo. Buku ya Yuwele yi kombetela enkarhini wa hina yi tlhela yi vula leswi hi ku hiteka: “Hikuv̌a siku ra Yehova ri ṭhinele, ra ta kukota šira ša Lo-wa-matimba-hinkwawo.” (Yuwele 1:15) Hi mukhuva lowu fanaka ni wa tinjiya leti phikelelaka, Vakreste lava totiweke a va pfumelelanga nchumu xi sivela ku twarisiwa ka Mfumo enkarhini lowu wa makumu.

Buku ya Yuwele yi tlhela yi nyika ntshembo, yi ku: “Uṅwana ni uṅwana l’a khongelaka v̌ito ra Yehova o ta pona.” (Yuwele 2:32) Leswi swi vula leswi tlulaka ku tirhisa vito ra Yehovha ntsena. Ku laveka ku hundzuka loku humaka embilwini, naswona leswi swi katsa ku ala ku endla leswi hoxeke. (Yuwele 2:12, 13) Ku hava nkarhi wo hlwela hikuva Yehovha ku nga ri khale u ta avanyisa matiko hilaha a endleke hakona eka Mowabu, Amoni ni le magangeni ya Seyira emasikwini ya Hosi Yoxafati wa le Yuda.—2 Tikronika 20:1-30; Yuwele 3:2, 12.

Hinkwerhu hi khutaziwe hi nkulumo leyi nge, “Kombisa Ripfumelo Hi Ku Rindzela Yehovha.” Sweswi tanihi leswi hi ngheneke swinene enkarhini wa makumu, hi nga anakanyisisa hi ku hetiseka ka switshembiso swo tala swa Yehovha, naswona hi khathala swinene hi swilo leswi nga ta hetiseka. Vanhu va Yehovha va fanele va ya emahlweni va lehisa mbilu, va tsundzuka leswaku xin’wana ni xin’wana lexi Xikwembu xi xi tshembiseke xi ta humelela.—Tito 2:13; 2 Petro 3:9, 10.

Nongonoko wa nimixo wu gimete hi drama leyi nge, “Hlayisa Tihlo Ra Wena Ri Ri Rinene.” Drama leyi yi vulavulaka hi swilo swa xiviri yi hi khutaze ku kambisisa langutelo ra hina malunghana ni ku hlongorisa swilo leswi vonakaka. Ku nga khathariseki leswaku hi tshama kwihi, loko hi lava leswaku hi nga karhatiwi hi mivilelo evuton’wini bya hina, hi fanele hi landzelela ndzayo ya Yesu yo hlayisa tihlo ra hina ri ri rinene, ri langute eMfun’weni wa Xikwembu.—Matewu 6:22.

Nkulumo ya le rivaleni a yi ri ni nhloko-mhaka leyi nyanyulaka leyi nge, “Ripfumelo Ni Vumundzuku Bya Wena.” Yi nyikele xikombiso xa ku tsandzeka ka varhangeri lava nga vanhu ku tlhantlha swiphiqo swa misava. (Yeremiya 10:23) Matimu ya vanhu ya tshama ya ri karhi ya tiphindha—hi mpimo lowukulu ni lowu onhaka swinene. Xana Timbhoni ta Yehovha ti titwa hi ndlela yihi malunghana ni vumundzuku? Hi pfumela leswaku vanhu lava tshembekaka va ni vumundzuku lebyi vangamaka ehansi ka Mfumo wa Xikwembu. (Matewu 5:5) Xikwembu xi ta hetisisa switshembiso swa vona leswaku ku pfuneka hinkwavo lava nga ni ripfumelo eRitweni ra xona, leri khutazaka ri ku: “Lav̌ani Yehova loko a ha kumeka; huwelelani ka yena, loko a ha ri kusuhi!”—Esaya 55:6.

Yesu u vutise xivutiso xa nkoka malunghana ni siku ra hina. U te: “Loko N’wana-wa-Munhu a ta, xana ú ta kuma ku pfumela ku ri kona emisaveni xana?” (Luka 18:8) Eka nkulumo yo hetelela ku pfuxetiwe nongonoko wa ntsombano ku tlhela ku kombisiwa ndlela leyi wu nyikeleke vumbhoni lebyi twalaka bya leswaku ku pfumela eRitweni ra Xikwembu ku kona, hambileswi hi hanyaka emisaveni leyi nga riki na ripfumelo ni leyi nga ya xinkarhana.

Hambiswiritano, hi nga tivutisa ha un’we-un’we leswaku, ‘Xana ndzi le xikarhi ka lava nga ni ripfumelo leri nga tsekatsekiki eka Xikwembu ni le Ritweni ra xona?’ Ntsombano wa Muganga wa “Ku Pfumela eRitweni Ra Xikwembu” wu fanele wu hi pfuna ku hlamula hi ku ina, eka xivutiso xolexo. Naswona hi ni ku tlangela swinene eka Yehovha, hi leswi a tiyiseke ripfumelo leri hi nga na rona eka yena ni le Ritweni ra yena leri huhuteriweke, ku nga Bibele!

[Swifaniso leswi nga eka tluka 24]

Vatirhi vo tala vo tirhandzela va tirhe hi ntsako leswaku va rhurhela magidi ya vapfhumba

[Swifaniso leswi nga eka tluka 25]

Timbala letikulu ta mintlangu to tanihi leti ti tirhisiwile emisaveni hinkwayo

[Xifaniso lexi nga eka tluka 25]

L. A. Swingle wa Huvo leyi Fumaka a humesa broxara leyintshwa

[Xifaniso lexi nga eka tluka 26]

Vo tala va khuvuriwile va kombisa ku tinyiketela ka vona eka Yehovha

[Swifaniso leswi nga eka tluka 27]

Vatsombani va yimbelele tinsimu ta Mfumo hi ntsako. Xifaniso lexitsongo: drama leyi nge “Hlayisa Tihlo Ra Wena Ri Ri Rinene”