Ku Hanya Hi Ntshunxeko Wa Ku Tinyiketela Ka Vukreste

“Laha moya wa Yehovha wu nga kona, ku ni ntshunxeko.”—2 VAKORINTO 3:17.

1. Timbhoni ta Yehovha ti tinyiketele eka mani, naswona ha yini ti tirhisa switirho swa le nawini?

TIMBHONI TA YEHOVHA ta kholwa leswaku vukhongeri bya tona byi ta tshama hilaha ku nga heriki. Hikwalaho, ti langutele ku tirhela Xikwembu “hi moya ni ntiyiso” hilaha ku nga heriki. (Yohane 4:23, 24) Tanihi vanhu lava tihlawulelaka, Vakreste lava va tinyiketele hi ku helela eka Yehovha Xikwembu naswona va tiyimisele ku hanya hi ku ya hi ku tinyiketela koloko. Hikwalaho, va titshega hi Rito ra Xikwembu ni hi moya wa xona lowo kwetsima. Loko Timbhoni ti fambisana ni ku tinyiketela ka tona ka Vukreste hi ntshunxeko lowu ti wu nyikiweke hi Xikwembu, ti kombisa xichavo lexi faneleke eka xikhundlha xa “valawuri lava tlakukeke” va tihulumendhe naswona ti ti tirhisa kahle tindlela ni malunghiselelo ya nawu. (Varhoma 13:1; Yakobo 1:25) Hi xikombiso, Timbhoni ti tirhisa Sosayiti ya Watch Tower tanihi xitirho xa le nawini—xin’wana eka leswo tala ematikweni yo hambana-hambana—leswaku ti kota ku hetisisa ntirho wa tona wa ku pfuna vanhu-kulobye, ngopfu-ngopfu hi tlhelo ra moya. Kambe Timbhoni ti tinyiketele eka Xikwembu, hayi eka xitirho xo karhi xa le nawini, naswona ku tinyiketela ka tona eka Yehovha a ku nge vi na makumu.

2. Ha yini Sosayiti ya Watch Tower ni switirho swa le nawini leswi fanaka swi tlangeriwa swinene hi Timbhoni ta Yehovha?

² Tanihi malandza lama tinyiketeleke eka Xikwembu, Timbhoni ta Yehovha ti boheka ku landzela swileriso swa Yesu swo “endla vanhu va matiko hinkwawo va va vadyondzisiwa, [ti] va khuvula hi vito ra Tatana ni ra N’wana ni ra moya lowo kwetsima, [ti] va dyondzisa.” (Matewu 28:19, 20) Ntirho lowu wu ta ya emahlweni ku fikela loko ku hela mafambiselo ya swilo, hikuva Yesu u tlhele a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:3, 14) Lembe na lembe, tifektri to kandziyisa ta Sosayiti ya Watch Tower ni tihuvo leti fanaka ta le nawini ti lunghiselela Timbhoni ta Yehovha timiliyoni ta Tibibele, tibuku, tibroxara ni timagazini leswaku ti ti tirhisa entirhweni wa tona wo chumayela emisaveni hinkwayo. Hikwalaho switirho leswi swa le nawini i swa nkoka leswaku swi va kona leswaku swi pfuna malandza lama tinyiketeleke eka Xikwembu ku hanya hi ku ya hi ku tinyiketela ka wona eka xona.

3. Timbhoni ta Yehovha a ti tala ku ri tirhisa hi mongo wihi rito leri nge “Sosayiti” eku sunguleni?

³ Un’wana a nga ha vula leswaku ndlela leyi Timbhoni ti vulavulaka ha yona hi Sosayiti ya Watch Tower—kumbe “Sosayiti” hi ntolovelo—yi komba leswaku a ti yi languti tanihi xitirho xa le nawini ntsena. Xana a ti yi languti tanihi yona leyi vulaka rito ro hetelela etimhakeni ta vugandzeri? Buku leyi nge Timbhoni Ta Yehovha I Vahuweleri Va Mfumo Wa Xikwembu yi veka mhaka leyi erivaleni loko yi ku: “Loko Xihondzo xo Rindza [xa Xinghezi xa June 1, 1938] xi vulavula hi ‘Sosayiti,’ a xi vula ntlawa wa Vakreste lava totiweke lowu simekeke xitirho xexo xa le nawini ni ku xi tirhisa, a swi vuli xitirho xa le nawini ntsena.”a Hikwalaho, rito leri a ri yimela “hlonga ro tshembeka ni ro tlhariha.” (Matewu 24:45) Timbhoni hi ntolovelo a ti tirhisa rito leri nge “Sosayiti” hi mongo lowu. Ina, nhlangano wa le nawini ni “hlonga ro tshembeka ni ro tlhariha” a hi marito lama vulaka nchumu wun’we. Vakongomisi va Sosayiti ya Watch Tower va hlawuriwa hi van’wana, kasi Timbhoni leti ti vumbaka “hlonga ro tshembeka” ti totiwa hi moya lowo kwetsima wa Yehovha.

4. (a) Timbhoni to tala ti vulavula njhani leswaku ti papalata ku twisisiwa hi ndlela leyi hoxeke? (b) Ha yini hi fanele hi ringanisela malunghana ni matirhiselo ya marito?

⁴ Leswaku ku papalatiwa matwisiselo lama hoxeke, Timbhoni ta Yehovha ti ringeta ku va ni vukheta loko ti vulavula ni vanhu. Ematshan’weni yo, “Sosayiti yi dyondzisa leswaku,” Timbhoni to tala ti rhandza ku tirhisa mavekelo yo tanihi lama nge, “Bibele yi vula leswaku” kumbe, “hi ku twisisa ka mina, Bibele yi dyondzisa leswaku.” Hi ndlela leyi ti kandziyisa xiboho lexi Mbhoni yin’wana ni yin’wana yi xi endleke loko yi amukela tidyondzo ta Bibele, naswona ti papalata ku nyika vanhu vonelo leri hoxeke ra leswaku Timbhoni hi ndlela yo karhi ti boheka ku yingisa swileriso swa mpambukwa wo karhi wa vukhongeri. Kavula, swiringanyeto malunghana ni marito lama tirhisiwaka a hi mhaka yo kanetana ha yona. Phela, matirhiselo ya marito i ya nkoka loko ma sivela ku twisisa loku hoxeke. Vakreste va fanele va ringanisela. Bibele yi hi tsundzuxa leswaku hi “nga kanetani hi marito.” (2 Timotiya 2:14, 15) Nakambe Matsalwa ma boxa nsinya wa nawu lowu nge: “Handle ka loko n’wina hi ririmi mi humesa mhaka leyi twisisiwaka hi ku olova, xana leswi vuriwaka swi ta tivisiwa ku yini?”—1 Vakorinto 14:9.

Moya Wa Xikwembu Wu Hunguta Xilaveko Xa Milawu

5. Vakorinto vo Sungula 10:23 yi fanele yi twisisiwa njhani?

⁵ Muapostola Pawulo u te: “Swilo hinkwaswo swa pfumeleriwa; kambe a hi swilo hinkwaswo leswi pfunaka.” U ye emahlweni a ku: “Swilo hinkwaswo swa pfumeleriwa; kambe a hi swilo hinkwaswo leswi akaka.” (1 Vakorinto 10:23) Swi le rivaleni leswaku Pawulo a a nga vuli leswaku swa pfumeleriwa ku endla swilo leswi Rito ra Xikwembu ri swi yirisaka hi ku kongoma. A hi yingani milawu leyi kongomeke leyi lawulaka vutomi bya Vakreste, loko yi ringanisiwa ni milawu ya kwalomu ka 600 leyi a yi nyikiwe Vaisrayele va khale. Hikwalaho, timhaka to tala ti siyeriwa ripfalo ra munhu. Munhu loyi a tinyiketeleke eka Yehovha u ni ntshunxeko lowu tisiwaka hi vukongomisi bya moya wa Xikwembu. Loko Mukreste a endle ntiyiso wu va wa yena, u landzela ripfalo rakwe leri leteriweke hi Bibele naswona u titshega hi vukongomisi bya Xikwembu bya moya lowo kwetsima. Leswi swi pfuna Mukreste la tinyiketeleke ku kumisisa leswi nga ta ‘aka’ ni ku ‘pfuna’ yena ni van’wana. U xiya leswaku swiboho leswi a swi endlaka swi ta khumba vuxaka lebyi a nga na byona na Xikwembu lexi a tinyiketeleke eka xona.

6. Hi nga swi kombisa njhani eminhlanganweni ya Vukreste leswaku hi endle ntiyiso wu va wa hina?

⁶ Mbhoni yi kombisa leswaku yi endle ntiyiso wu va wa yona hi ku hlamula eminhlanganweni ya Vukreste. Eku sunguleni, a nga phindha hi ku kongoma leswi vuriweke ebukwini leyi dyondziwaka. Hambiswiritano, hi ku famba ka nkarhi, u ta endla nhluvuko ku fikela laha a hlamuselaka tidyondzo ta Bibele hi marito yakwe. Xisweswo u kombisa leswaku u antswisa vuswikoti byakwe byo ehleketa, ku nga ri ku phindha ntsena leswi vuriweke hi van’wana. Ku andlala mhaka hi marito yakwe ni ku vula marito lama faneleke ya ntiyiso lama humaka embilwini swi ta n’wi tsakisa ni ku kombisa leswaku wa tiyiseka ha swona emianakanyweni yakwe.—Eklesiasta 12:10; ringanisa Varhoma 14:5b.

7. I swiboho swihi leswi malandza ya Yehovha ma swi endleke hi ku ntshunxeka?

⁷ Timbhoni ta Yehovha ti susumetiwa hi rirhandzu leri ti nga na rona eka Xikwembu ni le ka vanhu-kulobye. (Matewu 22:36-40) I ntiyiso, ti hlanganisiwile swinene hi xiboho xa rirhandzu ro fana ni ra Kreste tanihi vamakwavo va misava hinkwayo. (Vakolosa 3:14; 1 Petro 5:9) Kambe tanihi vanhu lava tihlawulelaka, un’wana ni un’wana wa vona u tiendlele xiboho xo twarisa mahungu lamanene ya Mfumo wa Xikwembu, xo tshama a ri ni vukala-tlhelo eka tipolitiki, xo papalata ngati ni vuhungasi bya mixaka yo karhi ni xa ku hanya hi mimpimanyeto ya Bibele. Leswi a hi swiboho leswi va sindzisiwaka ku swi endla. I swiboho leswi fambisanaka ni ndlela ya vutomi leyi vanhu lava lavaka ku va Timbhoni va tihlawuleleke yona hi ku tirhandzela, va nga si teka goza ra ku tinyiketela ka Vukreste.

Xana Ha Tihlamulela Eka Huvo Leyi Fumaka?

8. Hi xihi xivutiso lexi faneleke xi hlamuriwa kahle?

⁸ Bibele yi swi veka erivaleni leswaku Vakreste va ntiyiso a va tirheli Xikwembu hi ku sindzisiwa. Yi ri: “Yehovha i Moya; naswona laha moya wa Yehovha wu nga kona, ku ni ntshunxeko.” (2 Vakorinto 3:17) Kambe xana mhaka leyi yi nga twananisiwa njhani ni mianakanyo ya “hlonga ro tshembeka ni ro tlhariha” ni Huvo ya rona leyi Fumaka?—Matewu 24:45-47.

9, 10. (a) Nsinya wa nawu wa vunhloko wu tirha njhani evandlheni ra Vukreste? (b) Ku landzela nsinya wa nawu wa vunhloko swi endle leswaku ku laveka yini evandlheni ra Vukreste ra lembe-xidzana ro sungula?

⁹ Leswaku hi hlamula xivutiso xexo, hi fanele hi tsundzuka nsinya wa nawu wa Matsalwa malunghana ni vunhloko. (1 Vakorinto 11:3) Eka Vaefesa 5:21-24, Kreste u hlamuseriwa a ri “nhloko ya vandlha,” loyi ri nga “ehansi” ka yena. Timbhoni ta Yehovha ti twisisa leswaku hlonga ro tshembeka ni ra vutlhari i vamakwavo va Yesu va moya. (Vaheveru 2:10-13) Ntlawa lowu wa hlonga ro tshembeka wu vekiwe hi xikongomelo xo phamela vanhu va Xikwembu ‘swakudya hi nkarhi lowu faneleke.’ Enkarhini lowu wa makumu, Kreste u veke hlonga leri “ehenhla ka hinkwaswo leswi nga swa yena.” Hikwalaho xikhundlha xa rona xi fanele xi xiximiwa hi un’wana ni un’wana loyi a tivulaka Mukreste.

¹⁰ Xikongomelo xa vunhloko i ku hlayisa vun’we ni ku tiyisekisa leswaku “swilo hinkwaswo [swi endliwa] hi ku tenga ni hi ku hleleka.” (1 Vakorinto 14:40) Leswaku ku fikeleriwa leswi eka lembe-xidzana ro sungula, Vakreste vo hlayanyana lava totiweke lava nga swirho swa ntlawa wa hlonga ro tshembeka ni ra vutlhari va hlawuriwile leswaku va yimela ntlawa hinkwawo. Hilaha swi kombisiweke hakona hi swiendlakalo leswi landzeleke, vulanguteri bya huvo leyi yi fumaka ya lembe-xidzana ro sungula a byi amukeriwa hi Yehovha naswona a a byi katekisa. Vakreste va lembe-xidzana ro sungula va ri amukele hi ntsako lunghiselelo leri. Ina, kahle-kahle va amukele vuyelo bya rona lebyinene, naswona va byi tlangerile.—Mintirho 15:1-32.

11. Huvo leyi Fumaka ya namuntlha yi fanele yi langutiwa njhani?

¹¹ Lunghiselelo rero ra ha tirha ni sweswi. Namuntlha, Huvo leyi Fumaka ya Timbhoni ta Yehovha yi vumbiwe hi Vakreste va khume lava totiweke, lava hinkwavo va nga ni makume ya malembe ya ntokoto wa Vukreste. Va nyikela vukongomisi bya moya eka Timbhoni ta Yehovha, hilaha huvo leyi fumaka ya lembe-xidzana ro sungula a yi endla hakona. (Mintirho 16:4) Ku fana ni Vakreste vo sungula, Timbhoni ti tshembe vamakwerhu lava vupfeke va Huvo leyi Fumaka leswaku ti kuma vukongomisi lebyi humaka eBibeleni malunghana ni timhaka ta vugandzeri. Hambileswi swirho swa Huvo leyi Fumaka swi nga mahlonga ya Yehovha ni ya Kreste, hilaha Vakreste-kulobye va nga hakona, Bibele ya hi lerisa: “Yingisani lava rhangelaka exikarhi ka n’wina naswona mi titsongahata, hikuva va tshama va rindze mimoya-xiviri ya n’wina hikuva hi vona va nga ta hlamusela; leswaku va endla leswi hi ntsako ku nga ri hi ku n’unun’uta, hikuva leswi swi nga mi vavisa.”—Vaheveru 13:17.

12. Mukreste un’wana ni un’wana u fanele a tihlamulela eka mani?

¹² Xana xiyimo xa vulanguteri lexi Matsalwa ma xi avelaka Huvo leyi Fumaka xi vula leswaku un’wana ni un’wana eka Timbhoni ta Yehovha u fanele a tihlamulela eka yona hi ta mintirho ya yena? Ku nga ri hi ku ya hi marito lawa Pawulo a ma tsaleleke Vakreste va le Rhoma loko a ku: “Ha yini u avanyisa makwenu? Kumbe ha yini u tlhela u n’wi langutela ehansi makwenu? Hikuva hinkwerhu hi ta yima emahlweni ka xitshamo xa vuavanyisi xa Xikwembu . . . Un’wana ni un’wana wa hina u ta tihlamulela eka Xikwembu.”—Varhoma 14:10-12.

13. Ha yini Timbhoni ta Yehovha ti vika ntirho wa tona wo chumayela?

¹³ Hambiswiritano, xana a hi ntiyiso leswaku Mbhoni yin’wana ni yin’wana yi languteriwe ku vika ntirho wa yona wo chumayela? I ntiyiso, kambe xikongomelo xa kona xi hlamuseriwe kahle eka buku-mpfuno ya Timbhoni, leyi nge: “Valandzeri vo sungula va Yesu Kriste va tsakele swiviko swa nhluvuko entirhweni wo chumayela. (Marka 6:30) Loko ntirho wu humelela, swiviko swa nxaxamelo swi hlanganisiwile ni timhaka ta mintokoto leyi xiyekaka ya lava hlanganyelaka eku chumayeleni ka mahungu lamanene. . . . (Mintirho 2:5-11, 41, 47; 6:7; 1:15; 4:4) . . . Mawaku ndlela leyi a swi khutaza ha yona eka vatirhi volavo va Vakriste vo tshembeka ku twa swiviko swa leswi a swi ri karhi swi hetisisiwa! . . . Hi mukhuva lowu fanaka, nhlengeletano ya Yehovha ya siku ra namuntlha yi lwela ku hlayisa tirhekhodo letinene ta ntirho lowu endliwaka eku hetisekeni ka Matewu 24:14.”

14, 15. (a) Vakorinto va Vumbirhi 1:24 yi tirha njhani eka Huvo leyi Fumaka? (b) I xisekelo xihi lexi Mukreste un’wana ni un’wana a faneleke a endla swiboho swakwe eka xona, hi ku xiya ntiyiso wihi?

¹⁴ Huvo leyi Fumaka i lunghiselelo ra rirhandzu ni xikombiso xa ripfumelo lexi faneleke ku tekeleriwa. (Vafilipiya 3:17; Vaheveru 13:7) Loko huvo leyi yi namarhela yi tlhela yi landzelela Kreste tanihi xikombiso xa yona, yi nga phindha marito ya Pawulo lama nge: “Ku nga ri swona leswaku hi valawuri va ripfumelo ra n’wina, kambe hi vatirhi-kuloni entsakweni wa n’wina, hikuva mi yimile hikwalaho ka ripfumelo ra n’wina.” (2 Vakorinto 1:24) Loko Huvo leyi Fumaka yi xiya mikhuva yo karhi, yi lemukisa hi leswi ku yingisa ndzayo ya Bibele swi pfunaka swona, yi nyikela swiringanyeto malunghana ni ku tirhisa milawu ni misinya ya milawu ya Bibele, yi lemukisa hi ta makhombo lama tumbeleke, ni ku nyika ‘vatirhi-kulobye’ xikhutazo lexi lavekaka. Xisweswo yi hetisisa vulanguteri bya yona bya Vakreste, yi va pfuna ku hlayisa ntsako wa vona, ni ku va aka eripfumelweni leswaku va yima va tiyile.—1 Vakorinto 4:1, 2; Tito 1:7-9.

¹⁵ Loko Mbhoni yi endla swiboho swo karhi hi ku landza ndzayo ya Huvo leyi Fumaka leyi sekeriweke eBibeleni, yi endla tano hi ku tihlawulela, hikuva dyondzo ya yona ya Bibele yi yi khorwisile leswaku leyi hi yona ndlela leyi faneleke. Mbhoni yin’wana ni yin’wana yi susumetiwa hi Rito ra Xikwembu leswaku yi tirhisa ndzayo leyinene ya Matsalwa leyi nyikeriweke hi Huvo leyi Fumaka, yi ri karhi yi swi xiya kahle leswaku swiboho leswi yi swi endlaka swi ta khumba vuxaka lebyi yona yi nga na byona na Xikwembu lexi yi tinyiketeleke eka xona.—1 Vatesalonika 2:13.

Swichudeni Ni Masocha

16. Hambileswi swiboho swa mahanyelo ku nga mhaka ya munhu hi yexe, ha yini van’wana va susiwa?

¹⁶ Kambe loko swiboho swa mahanyelo ku ri mhaka ya munhu hi yexe, ha yini van’wana va Timbhoni ta Yehovha va susiwa? A ku na munhu loyi a nga endlaka xiboho xa leswaku xiendlo xa xidyoho xo karhi xi koxa leswaku munhu a susiwa. Ku ri na sweswo goza leri ri lerisiwa hi Matsalwa loko xirho xa vandlha xi endla swidyoho leswikulu xi nga hundzuki, swo tanihi leswi swi xaxametiweke eka ndzima ya vu-5 ya Vakorinto vo Sungula. Xisweswo, hambileswi Mukreste a nga susiwaka loko a endla vuoswi, goza leri ri tekiwa ntsena loko a ala ku amukela mpfuno wa moya wa varisi va rirhandzu. Timbhoni ta Yehovha a hi tona ntsena ti tirhisaka endlelo leri ra Vukreste. The Encyclopedia of Religion yi ri: “Vandla rin’wana ni rin’wana ri ni mfanelo yo tisirhelela eka swirho leswi kokelaka etlhelo leswi nga xungetaka vuhlayiseki bya rona. Evukhongerini mfanelo leyi hakanyingi a yi tiyisekisiwa hi ku pfumela leswaku [ku susiwa] ku khumba xiyimo xa munhu emahlweni ka Xikwembu.”

17, 18. Swi nga kombisiwa njhani leswaku ku susa swi fanerile?

¹⁷ Timbhoni ta Yehovha i swichudeni swa Bibele. (Yoxuwa 1:8; Pisalema 1:2; Mintirho 17:11) Nongonoko wa dyondzo ya Bibele lowu lunghiseleriwaka hi Huvo leyi Fumaka wu nga fanisiwa na dyondzo ya xikolo leyi lunghiseleriwaka hi huvo ya dyondzo. Hambileswi huvo hi yoxe yi nga riki xihlovo xa dyondzo leyi dyondzisiwaka, yi hlela dyondzo leyi, yi kumisisa madyondziselo ya kona ivi yi nyikela vukongomisi lebyi lavekaka. Loko munhu a sihalala a ala ku hanya hi ku ya hi milawu ya xikolo, a tikisela swichudeni-kulobye, kumbe a onha vito ra xikolo lexi, a nga hlongoriwa. Valawuri va xikolo va ni mfanelo yo teka goza leri leswaku ku pfuneka swichudeni hinkwaswo.

¹⁸ Handle ka ku va swichudeni, Timbhoni ta Yehovha nakambe i masocha ya Yesu Kreste, lama lerisiweke ku “[lwa] nyimpi leyinene ya ripfumelo.” (1 Timotiya 6:12; 2 Timotiya 2:3) Hi ntolovelo loko socha leri nga Mukreste ri ya emahlweni ri tikhoma hi ndlela leyi nga faneliki, swi nga endla leswaku ri nga ha amukeriwi hi Xikwembu. Tanihi leswi socha rin’wana ni rin’wana ra Mukreste ri nyikiweke ntshunxeko wa ku tihlawulela, ri nga tihlawulela leswi ri swi rhandzaka, kambe ri fanele ri byarha vuyelo bya xiboho xa rona. Pawulo u ri: “A nga kona munhu la nga socha la tinghenisaka entirhweni wa bindzu wa vutomi, leswaku a ta amukeriwa hi loyi a n’wi tsariseke ku va socha. Ku tlula kwalaho, hambiloko munhu a hlanganyela emphikizanweni emintlangweni, a nga tlhandlekiwi harhi handle ka loko a hlanganyele emphikizanweni hi ku ya hi milawu ya kona.” (2 Timotiya 2:4, 5) Vakreste lava vupfeke, ku katsa ni swirho swa Huvo leyi Fumaka, va tiveka hi ku helela ehansi ka vulawuri bya Murhangeri wa vona Yesu Kreste, va hlayisa “milawu” leswaku va ta kuma hakelo ya vutomi lebyi nga heriki.—Yohane 17:3; Nhlavutelo 2:10.

19. Endzhaku ka ku kambisisa ntiyiso wa ku tinyiketela ka Mukreste, i yini lexi hi nga tiyisekaka ha xona?

¹⁹ Xana ntiyiso a wu swi veki erivaleni leswaku Timbhoni ta Yehovha i malandza ya Xikwembu, hayi mahlonga ya vanhu? Tanihi Vakreste lava tinyiketeleke lava nga ni ntshunxeko lowu Kreste a va ntshunxeleke wona, va pfumelela moya wa Xikwembu ni Rito ra xona swi lawula vutomi bya vona loko va ri karhi va tirha hi vun’we ni vamakwavo evandlheni ra Xikwembu. (Pisalema 133:1) Vumbhoni bya leswi byi fanele byi herisa ku kanakana kwihi ni kwihi malunghana ni xihlovo xa matimba ya vona. Va nga yimbelela swin’we na mupisalema va ku: “Yehova i matimba ya mina ni šitlhangu ša mina; mbilu ya mina yi tiṭhembele yena, kutani nḍi pfunekile; mbilu ya mina yi ṭakile hikwalaho, kutani nḍi ṅwi twarisa hi tinsimu ta mina.”—Pisalema 28:7.

[Nhlamuselo ya le hansi]

A Wu Ta Hlamurisa Ku Yini?

◻ Sosayiti ya Watch Tower ni switirho leswi fanaka swa le nawini swi ti pfuna njhani Timbhoni ta Yehovha?

◻ Vakreste va pfuneka njhani eka xikhundlha xa Huvo leyi Fumaka ya Timbhoni ta Yehovha?

◻ Ha yini vanhu va Yehovha va vika ntirho wa vona wo chumayela?

◻ Hi le hansi ka swiyimo swihi laha swi faneleke ku susa Mukreste la tinyiketeleke?

[Xifaniso lexi nga eka tluka 19]

Huvo leyi fumaka ya lembe-xidzana ro sungula a yi tiyisekisa leswaku ku va ni dyondzo leyi hlanganeke

[Xifaniso lexi nga eka tluka 23]

Emisaveni hinkwayo, Timbhoni ta Yehovha ti ni ntshunxeko lowu Kreste a ti ntshunxeleke wona