Siku Ra Yehovha Ri Tshinele

“Yingisani leŝi, ṅwina ŝidyuhati! Riyani ndlev̌e, ṅwina hikwenu v̌aaki v̌a tiko!”—YUWELE 1:2.

1, 2. Hi xihi xiyimo lexi a xi ri kona eYuda lexi endleke leswaku Yehovha a huhutela Yuwele leswaku a vula vuprofeta byakwe bya matimba?

“YO! SIKU leri! Hikuv̌a siku ra Yehova ri ṭhinele, ra ta kukota šira ša Lo-wa-matimba-hikwawo.” Vona xitiviso lexi chavisaka swonghasi! A ku ri rungula ra Xikwembu leri yaka eka vanhu va xona, leri vuriwaka hi muprofeta wa xona Yuwele.

² Marito lawa ya Yuwele 1:14, 15 ma tsariwe eYuda, kumbexana kwalomu ka lembe ra 820 B.C.E. Swintshabyana swa rihlaza a swi sasekise tiko enkarhini wolowo. Mihandzu ni mavele a swi tele swinene. Madyelo a a ma anamile naswona ma ri ya rihlaza. Kambe, a ku ri ni nchumu lowu nga fambiki kahle. Vugandzeri bya Bali a byi andzile eYerusalema ni le tikweni ra Yuda. Vanhu a va tikhoma hi ndlela yo biha emahlweni ka xikwembu lexi xa mavunwa. (Ringanisa 2 Tikronika 21:4-6, 11.) Xana Yehovha a a ta pfumela leswaku swilo leswi swi ya emahlweni?

3. Xana Yehovha u tsundzuxe vanhu malunghana na yini, naswona xana matiko ma fanele ma lunghekela yini?

³ Buku ya Bibele ya Yuwele a yi hi siyi hi ri ni ku kanakana malunghana ni nhlamulo ya xivutiso lexi. Yehovha Xikwembu a a ta lwela vuhosi byakwe ni ku hlawulekisa vito rakwe ro kwetsima. Siku ra Yehovha lerikulu a a ri tshinele. Hi nkarhi wolowo Xikwembu a xi ta avanyisa matiko hinkwawo “[e]nkov̌eni wa Yosafat.” (Yuwele 3:12) A va lunghekele ku lwa ni Lowa Matimba Hinkwawo, Yehovha. Na hina, hi langutane ni siku lerikulu ra Yehovha. Kutani ke, a hi kambisiseni swinene marito ya vuprofeta ya Yuwele ya siku ra hina, ni ya nkarhi lowu hundzeke.

Nhlaselo Wa Switsotswana

4. Xana xi ta va xikulu ku fikela kwihi xiendlakalo lexi Yuwele a tsundzuxeke ha xona?

⁴ Hi ku tirhisa muprofeta wa yena, Yehovha u ri: “Yingisani leŝi, ṅwina ŝidyuhati! Riyani ndlev̌e, ṅwina hikwenu v̌aaki v̌a tiko! Šana mhaka le’yo tano yi ṭhama yi humelela e mikarini ya ṅwina, kumbe mikarini ya v̌atata wa ṅwina? Ambelani v̌ana v̌a ṅwina, ni v̌ana v̌a ṅwina e ka v̌ana v̌a v̌ona, ni v̌ana v̌a v̌ona e ka rišaka riṅwana.” (Yuwele 1:2, 3) Vakulukumba ni vanhu hinkwavo a a va langutele nchumu lowu nga si tshamaka wu endleka evuton’wini bya vona hinkwabyo kumbe emasikwini ya vakokwa wa vona. A wu ta hlamarisa lerova a ku ta vulavuriwa ha wona hambi ku ri eka xitukulwana xa vunharhu! Xana xiendlakalo lexi xo hlawuleka a ku ri yini? Leswaku hi kuma nhlamulo, a hi titekeni hi ri le ndzhaku, esikwini ra Yuwele.

5, 6. (a) Hlamusela ntungu lowu Yuwele a vhumbheke leswaku wu ta va kona. (b) Xana i mani Muvangi wa ntungu wolowo?

⁵ Yingisa! Yuwele u twa ku bonga loku nga ekule. Xibakabaka xi hundzuka xa ntima, naswona mpfumawulo wolowo wo chavisa wa engeteleka loko munyama wu ya wu kula. Hiloko papa leri fanaka ni musi ri xika. I vandla ra switsotswana leswi fikaka eka timiliyoni hi nhlayo. A swi nga onhi, a swo mbumburhela kunene! Sweswi languta Yuwele 1:4. Vahlaseri lava va nga switsotswana, a hi vandla ra tinjiya leti nga ni timpapa ntsena. Vonani! Nakambe ku ni vunyingi bya tinjiya to pfumala timpapa, leti nga ni ndlala swinene, leti fambaka ehansi. Tinjiya ti fika hi xitshuketa, ti tisiwa hi moya naswona mpfumawulo wa tona wu fana ni wa makalichi. (Yuwele 2:5) Hikwalaho ka ndlala leyi ti nga na yona, timiliyoni ta tona hi ku hatlisa ti nga hundzula ndhawu leyi fanaka ni paradeyisi yi va kwandzasi.

⁶ Swivungu na swona swi tinyike matimba—swivungwana swa tinsumba ni maphaphatana. Swivungu swo tala, leswi nga ni ndlala, swi nga mbumburhela matluka ya swimilana hakatsongo-tsongo, tluka hi tluka, kukondza swimilana swi kala swi heleriwa hi rihlaza ra swona. Naswona vunyingi bya leswi swi salaka, swi dyiwa hi tinjiya. Naswona leswi swi siyiwaka hi tinjiya, swi hetiwa hi mahele lama tsutsumaka. Kambe xiya leswaku: Eka Yuwele ndzima 2, ndzimana 11, Xikwembu xi vula leswaku vuthu leri ra tinjiya i “v̌andla ra [xo]na.” Ina, a xi ri xona Muvangi wa ntungu wa tinjiya lowu a wu ta hlasela tiko leri ni ku tisa ndlala leyikulu. Rini? Emahlweninyana ka ‘siku ra Yehovha.’

“Hanyanyani, Ŝidakwa”!

7. (a) Xana a xi ri njhani xiyimo xa varhangeri va vukhongeri va le Yuda? (b) Xana varhangeri va Vujagana namuntlha, va le xiyin’weni lexi fanaka ni xa varhangeri va vukhongeri va le Yuda hi ndlela yihi?

⁷ Ntshungu wo pfumala xichavo, lowu wu nga varhangeri va vukhongeri va Yuda, wa boxiwa loko ku vuriwa xileriso lexi: “Hanyanyani, ŝidakwa, mi kolola! Na ṅwina hikwenu, v̌anwi v̌a vinyo, rilelani ḍov̌a ra vinyo le’ri wutliwaka e noṅwini wa ṅwina!” (Yuwele 1:5) Ina, swidakwa swa moya swa le Yuda swi byeriwe leswaku swi ‘hanyanya,’ swi xalamuka. Kambe u nga anakanyi leswaku lawa ko va matimu ya khale ntsena. Kona sweswi, emahlweni ka siku lerikulu ra Yehovha, vafundhisi va Vujagana hi ndlela yo fanekisela, va xurhe vinyo yo tsokombela lerova a va xi twi xileriso lexi xo huma eka La-nge-henhla-henhla. Vona ndlela leyi va nga ta hlamala ha yona loko va pfuxiwa evurhongweni bya vona bya moya, hikwalaho ka ku pyopyiwa, hi siku lerikulu leri chavisaka ra Yehovha!

8, 9. (a) Xana Yuwele u ti hlamusela njhani tinjiya ni vuyelo bya nhlaselo wa tona? (b) Namuntlha, tinjiya ti yimela vamani?

⁸ Vona vuthu rero lerikulu swonghasi ra tinjiya! “Hikuv̌a tiko ri hlasele karikweru, i tiko ra matimba le’ri nga hlayiwiki. Meno ya rona i meno ya tinghala, ni tinhlaya, i tinhlaya ta nghala ya ntŝele. Ri onhile masimu ya mina ya vinya, ri ṭhov̌ile mikuwa ya nga; ri ŝi phaphile, ri hangalasa makamba e hansi; marav̌i ya ŝona ma ṭhama ma basile. U kolola kukota wanhwana l’a ambaleke šuka ro khwaša, a rilela nuna wa v̌untŝha bya yena!”—Yuwele 1:6-8.

⁹ Xana vuprofeta lebyi byi vulavula hi “tiko” rinene ra tinjiya, ntlhambi wa tinjiya lowu hlaselaka Yuda? Doo, byi vulavula hi swin’wana swo tlula sweswo. Eka Yuwele 1:6 na Nhlavutelo 9:7, vanhu va Xikwembu va vuriwa tinjiya. Vandla ra tinjiya ra namuntlha a hi un’wana handle ka vuthu ra tinjiya leti totiweke ta Yehovha, leti sweswi ti pfuniwaka hi vanghana va kwalomu ka 5600 000 lava nga “tinyimpfu tin’wana” ta Yesu. (Yohane 10:16) Xana a mi tsaki leswi mi nga xiphemu xa ntshungu lowu lowukulu wa vagandzeri va Yehovha?

10. Xana hi byihi vuyelo bya ntungu wa tinjiya eYuda?

¹⁰ Eka Yuwele 1:9-12 hi hlaya hi vuyelo bya ntungu lowu wa tinjiya. Mintlhambi leyi hi ku landzelelana yi mbumburhele tiko hi ku helela. Leswi a va ri hava mavele, vhinyo ni mafurha, vaprista lava nga tshembekiki a va nga ha ta swi kota ku ya emahlweni ni mintirho ya vona. Hambi ku ri misava hi yoxe a yi kolola, hikuva tinjiya ti herise mavele, naswona mirhi ya mihandzu a yi siyiwe yi ri hava mihandzu. Leswi mirhi ya vhinya yi onhiweke, swindzendzele leswi gandzelaka Bali, leswi swi nga swidakwa swa moya, a swi ri hava vhinyo.

‘Tibeneni Swifuva, N’wina Vaprista’

11, 12. (a) I vamani va tivulaka vaprista va Xikwembu namuntlha? (b) Xana ntungu wa tinjiya wa siku ra namuntlha wu va khumba njhani varhangeri va vukhongeri va Vujagana?

¹¹ Yingisa rungula ra Xikwembu leri yaka eka vaprista volavo lava hambukeke: “Ṅwina v̌aprista, ambalani mašuka mi tiba ŝifuv̌a! Rilani, ṅwina la’mi tirelaka altari.” (Yuwele 1:13) Loko vuprofeta bya Yuwele byi hetiseka ro sungula, vaprista va Valevhi a va tirha ealtarini. Kambe ku vuriwa yini hi ku hetiseka ko hetelela? Namuntlha, vafundhisi va Vujagana va tinyike xikhundlha xo tirha ealtarini ya Xikwembu, va tivula leswaku hi vona vatirheli va xona, “v̌aprista” va xona. Kambe, i yini lexi humelelaka sweswi leswi tinjiya ta Xikwembu ta manguva lawa ti endlaka ntirho wa tona?

¹² Loko “v̌aprista” va Vujagana va vona vanhu va Yehovha va endla ntirho wa vona ni ku twa xitsundzuxo lexi va xi twarisaka xa ku avanyisa ka Xikwembu, va nyangatseka. Va tiba swifuva ni ku karhateka ni ku hlundzuka hikwalaho ka vuyelo lebyi vavisaka bya rungula leri ra Mfumo. Naswona va kolola leswi mintlhambi ya vona yi va balekelaka. Leswi madyelo ya vona ma mbumburheriweke, va tiambexa tinguvu to khwaxa, va rila tanihi leswi mali yi nga ha ngheniki kahle. Ku nga ri khale va ta lahlekeriwa ni hi mintirho ya vona! Kahle-kahle, Xikwembu xi va byela leswaku va rila vusiku hinkwabyo hikwalaho ka leswi makumu ya vona ma tshineleke.

13. Xana Vujagana byi ri hinkwabyo byi ta xi amukela xitsundzuxo xa Yehovha?

¹³ Hi ku ya hi Yuwele 1:14, va ta kuma ku wisa ntsena loko vo hundzuka, va kombela ‘mpfuno eka Yehovha.’ Xana hi nga rindzela leswaku ntlawa hinkwawo wa vafundhisi va Vujagana wu hundzukela eka Yehovha? Nikatsongo! Va nga ri vangani eka vona va nga ha xi amukela xitsundzuxo xa Yehovha. Kambe ndlala ya moya leyi varhangeri va vukhongeri va nga na yona swin’we ni valandzeri va vona, yi ta tshama yi ri kona. Muprofeta Amosi u vhumbhile a ku: “V̌onani, ku v̌ula Yehova, ma ta masiku lawa nḍi nga ta ruma ndlala e misav̌eni, yi nga ri ndlala ya v̌uŝa, ni loko ri ri tora ra mati, kambe yi nga ndlala ya marito ya Šikwembu.” (Amosi 8:11) Hi hala tlhelo, mawaku ndlela leyi hina hi tsakaka ha yona, hi nkhuvo wa moya lowu Xikwembu xi hi lunghiselelaka wona hi rirhandzu hi ku tirhisa “hlonga ro tshembeka ni ro tlhariha”!—Matewu 24:45-47.

14. Xana ntungu wa tinjiya i xikombiso xa yini?

¹⁴ Ntungu wa tinjiya a wu ri xikombiso xa ku ta ka nchumu wo karhi. A ti ri xikombiso xa yini? Yuwele u hi vekela mhaka erivaleni, loko a ku: “Yo! siku leri! Hikuv̌a siku ra Yehova ri ṭhinele, ra ta kukota šira ša Lo-wa-matimba-hikwawo.” (Yuwele 1:14, 15) Nhlaselo wa misava hinkwayo wa vuthu ra tinjiya, ra Xikwembu, namuntlha, wu komba kahle leswaku siku lerikulu leri chavisaka ra Yehovha ri tshinele. Ina, vanhu hinkwavo va timbilu letinene va ri langutele hi mahlo-ngati siku rero ro hlawuleka ra nkonaniso leri ha rona ku avanyisa ka Xikwembu ku nga ta tisiwa ehenhla ka lavo biha kutani Yehovha a hlula tanihi Hosi ya Vuako Hinkwabyo.

15. Hikwalaho ka xiyimo lexi vavisaka xa tiko, xana lava va yingisaka xitsundzuxo xa Xikwembu va endlisa ku yini?

¹⁵ Hilaha Yuwele 1:16-20 yi vulaka hakona, swakudya a swi herile eYuda wa khale. Hikwalaho ka sweswo ni ntsako a wu nga ha ri kona. Switlati a swi nga ha ri na nchumu, naswona madulu ma mbundzumuxiwile. Hikwalaho ka leswi madyelo ma onhiweke hi tinjiya naswona tiko se a ri ri hava swimilana, tihomu a ti tsendzeleka ti nga tivi laha ti yaka kona naswona mintlhambi ya tinyimpfu a yi lova. Vona khombo ronghasi! Exikarhi ka swiyimo swa muxaka lowu, ku humelele yini hi Yuwele? Hi ku ya hi ndzimana 19, u te: “Nḍi huwelela ka wena, Yehova!” Ni namuntlha, vanhu vo tala va swi yingisa switsundzuxo swa Xikwembu kutani va khongela Yehovha Xikwembu hi ripfumelo.

“Siku Ra Yehova Ra Ta”

16. Hikwalaho ka yini ‘vaaki va tiko’ va fanele va rhurhumela?

¹⁶ Yingisani xileriso lexi lexi humaka eka Xikwembu: “Yimbani timhalamhala e Sion, mi yimba tinanga e nṭhav̌eni ya mina le’yo kwetsima! V̌aaki hikwav̌o v̌a tiko a v̌a rurumele.” (Yuwele 2:1) Hikwalaho ka yini va fanele va endlisa xileswi? Vuprofeta bya hlamula: “Hikuv̌a siku ra Yehova ra ta, ri fikile, siku ra munyama ni mihihi, siku ra mapapa ni tihunguv̌a! Ra ta kukotisa loko v̌uronga byi ṭhinelela byi ya mahlweni e tinṭhav̌eni.” (Yuwele 2:1, 2) Siku lerikulu ra Yehovha ri tshinela hi ku hatlisa swinene.

17. Xana tiko ni vanhu va le Yuda va khumbeke njhani hi ntungu wa tinjiya?

¹⁷ Anakanya matimba lawa xivono lexi xa muprofeta xi veke na wona loko tinjiya leti nga karhaliki ti hundzula ndhawu leyi fanaka ni ntanga wa Edeni yi va marhumbi. Yingisa ndlela leyi vuthu ra tinjiya ri hlamuseriwaka ha yona: “Loko v̌a v̌oniwa, o nge i timangwa, v̌a ṭuṭuma kukota la’v̌a khanḍiyeke mahantši. Loko v̌a twiwa, o nge i mpfumawulo wa magolonyi la’ma tlula-tlulaka e tinhlohlorini ta tinṭhav̌a, o nge tinhlahle le’ti balekaka e malangav̌ini ya nḍilo loko wu hisa nhov̌a. V̌a fana ni v̌andla ra matimba le’ri tilungiseleke ku lwa. E mahlweni ka v̌ona, matiko ma rurumela, mimombo hikwayo yi hunḍuka.” (Yuwele 2:4-6) Hi nkarhi wa ntungu wa tinjiya esikwini ra Yuwele, maxangu ya vagandzeri va Bali ma engetelekile, naswona swikandza swa vona a swi languteka swi karhatekile.

18, 19. Xana ntirho wa vanhu va Xikwembu namuntlha wu fana ni lowuya wa ntungu wa tinjiya hi ndlela yihi?

¹⁸ Tinjiya leti leti nga karhaliki, leti nga ni vukheta a ti yimisiwanga hi nchumu. A ti tsutsuma “kukota tinhenha” hambi ku ri ku khandziya makhumbi. Loko ‘tin’wana ti wisiwa hi tlhari, letin’wana a ti nga hambuki.’ (Yuwele 2:7, 8) Vona ndlela leyi vuthu ra Xikwembu ra tinjiya to fanekisela ta namuntlha ri hlamuseriweke kahle ha yona! Ni namuntlha, vuthu ra Yehovha ra tinjiya ri ya emahlweni ri nga hambuki. A ku na “rirhangu” ra vakaneti leri ti sivelaka. A ti byi tshiki vutshembeki bya tona eka Xikwembu kambe ti tiyimiserile ku langutana ni rifu, hilaha magidi-gidi ya Timbhoni leti ‘wisiweke hi tlhari’ hikwalaho ko ala ku losa Hitler hi nkarhi wa mfumo wa Manazi wa le Jarimani, ma endleke hakona.

¹⁹ Vuthu ra tinjiya ra Xikwembu ra manguva lawa ri nyikele vumbhoni hi rixaladza ‘emutini’ wa Vujagana. (Yuwele 2:9) Leswi ri swi endle emisaveni hinkwayo. Ri karhi ri hlula swihinga hinkwaswo, ri nghena emakaya ya vanhu va timiliyoni, ri vulavula ni vanhu exitarateni, ri vulavula na vona hi riqingho ni ku vulavula na vona hi tindlela hinkwato leti kotekaka loko ri ri karhi ri huwelela rungula ra Yehovha. Ina, ri hangalase magidi ya timiliyoni ta tibuku ta Bibele naswona ra ha ta hangalasa to tala swinene, ina, to tala swinene entirhweni wa rona lowu yaka emahlweni—erivaleni na hi yindlu na yindlu.—Mintirho 20:20, 21.

20. I mani loyi a seketelaka tinjiya ta manguva lawa, naswona vuyelo hi byihi?

²⁰ Yuwele 2:10 yi kombisa leswaku ntlhambi lowukulu wa tinjiya wu fana ni papa leri nga pfalaka dyambu, n’weti ni tinyeleti. (Ringanisa Esaya 60:8.) Xana swa tika ku vona leswaku i mani loyi a rhangelaka vuthu leri? Mpfumawulo lowu wa tinjiya wu fambisana ni marito ya Yuwele 2:11 lama nge: “Yehova a pfumisa rito ra yena e mahlweni ka v̌andla ra yena, hikuv̌a magov̌ela ya yena i la’makulu ngopfu, ni muheti[sisi] wa rito ra yena o ni matimba; hikuv̌a siku ra Yehova hi le’rikulu, ra tšhav̌isa, i mani l’a nga ri tiyelaka?” Ina, Yehovha Xikwembu u rhumela vuthu rakwe ra tinjiya sweswi—siku ra yena lerikulu ri nga si fika.

“Yehovha A Nga Nonoki”

21. Xana ku ta endleka yini loko ‘siku ra Yehovha ri ta ku fana ni khamba’?

²¹ Ku fana na Yuwele, muapostola Petro u vulavule hi siku lerikulu ra Yehovha. U tsarile: “Siku ra Yehovha ri ta ta ku fana ni khamba, leri ha rona matilo ma nga ta hundza hi huwa leyi chavisaka, kambe swiaki leswi nga ta hisa ngopfu swi ta n’oka, naswona misava ni mintirho leyi nga eka yona swi ta yimburiwa.” (2 Petro 3:10) Hi ku kuceteriwa hi Sathana Diyavulosi, “matilo” lawa ma nga tihulumendhe to biha, ma fuma ehenhla ka “misava,” leyi yi nga vanhu lava tihambaniseke ni Xikwembu. (Vaefesa 6:12; 1 Yohane 5:19) Matilo ni misava leyi yo fanekisela a swi nge poni loko ku hisa ka vukarhi bya Xikwembu ku fika hi siku lerikulu ra Yehovha. Ematshan’weni ya sweswo, swi ta siviwa hi “matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.”—2 Petro 3:13.

22, 23. (a) Xana hi fanele hi titwisa ku yini hi tintswalo ta Yehovha ta ku lehisa mbilu? (b) Xana hi fanele hi angurisa ku yini leswi siku ra Yehovha ri tshineleke?

²² Hikwalaho ka swiphiqo swa siku ra namuntlha ni miringo leyi ringaka ripfumelo ra hina, hi nga ha rivala xihatla xa minkarhi ya hina. Kambe leswi tinjiya to fanekisela ti yaka emahlweni, vanhu vo tala va ma amukela mahungu ya Mfumo. Hambileswi Xikwembu xi swi pfumeleleke leswi, a hi fanelanga hi teka ku lehisa ka xona mbilu, ku ri ku hlwela. “Yehovha a nga nonoki malunghana ni xitshembiso xa yena, hilaha vanhu van’wana va ehleketaka hakona leswaku i ku nonoka, kambe u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.”—2 Petro 3:9.

²³ Leswi ha ha rindzeleke siku lerikulu ra Yehovha, a hi tsundzukeni marito ya Petro lama tsariweke eka 2 Petro 3:11, 12 lama nge: “Leswi swilo leswi hinkwaswo swi nga ta n’oka, n’wina mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, mi ri karhi mi rindzela ni ku hamba mi tsundzuka vukona bya siku ra Yehovha, leri ha rona matilo ma nga ta hela hi ku tshwa naswona swiaki leswi hisaka ngopfu swi nga ta n’oka!” Swiendlo ni mintirho leyi kahle-kahle swi katsa ku fambisana ni vuthu ra tinjiya ra Yehovha hi ku va ni xandla swinene eku chumayeriweni ka mahungu lawa lamanene ya Mfumo, nkarhi na nkarhi, makumu ma nga si fika.—Marka 13:10.

24, 25. (a) Xana u angurisa ku yini eka lunghelo ro hlanganyela entirhweni wa vuthu ra Yehovha ra tinjiya? (b) Hi xihi xivutiso lexi twisisekaka lexi Yuwele a xi tlakusaka?

²⁴ Vuthu ra Xikwembu ra tinjiya a ri nge tshiki ku endla ntirho wa rona kukondza siku lerikulu, leri chavisaka ra Yehovha ri fika. Vukona bya vuthu leri ra tinjiya leri nga yimisekiki i vumbhoni lebyi xiyekaka bya leswaku siku ra Yehovha ri tshinele. Xana a wu tsaki ku tirha swin’we ni tinjiya leti totiweke ta Xikwembu ni vanghana va tona eka nhlaselo lowu wo hetelela, siku lerikulu, leri chavisaka ra Yehovha ri nga si fika?

²⁵ Siku ra Yehovha ri ta va lerikulu swonghasi! A swi hi hlamarisi leswi ku tlakukaka xivutiso lexi nge: “I mani l’a nga ri tiyelaka?” (Yuwele 2:11) Xivutiso lexi ni swin’wana swo tala swi ta hlamuriwa eka swihloko swimbirhi leswi landzelaka.

Xana U Nga Hlamusela?

◻ Hikwalaho ka yini Yehovha a tsundzuxe Yuda hi ntungu wa switsotswana?

◻ Eka ku hetiseka ka vuprofeta bya Yuwele esikwini ra namuntlha, xana tinjiya ta Yehovha i vamani?

◻ Xana varhangeri va Vujagana va titwisa ku yini hi ntungu wa tinjiya, naswona xana van’wana va vona va nga endla yini leswaku va pona vuyelo bya wona?

◻ Xana ntungu wa tinjiya wu hlasele ku fikela kwihi eka lembe-xidzana ra vu-20, naswona wu ta ya emahlweni wu hlasela ku fikela rini?

[Xifaniso lexi nga eka tluka 9]

Ntungu wa switsotswana a wu ri xikombiso xa ku ta ka nchumu wun’wana lowu chavisaka swinene

[Xihlovo Xa Kona]

Barren tree: FAO photo/G. Singh

[Xifaniso lexi nga eka tluka 10]

Yehovha Xikwembu u rhangela ntungu wa tinjiya wa siku ra namuntlha

[Laha Xifaniso Xi Humaka Kona eka tluka 8]

Locust: FAO photo/G. Tortoli; locust swarm: FAO photo/Desert Locust Survey