Xana U Nghenile Eku Wiseni Ka Xikwembu?
“Munhu la ngheneke eku wiseni ka Xikwembu na yena u wisile emintirhweni yakwe.”—VAHEVERU 4:10.
1. Hikwalaho ka yini ku wisa ku naveleka?
KU WISA. Mayana rito ro tsokombela ni leri rhandzekaka swonghasi! Leswi hi hanyaka emisaveni leyi khomekeke ya namuntlha, vo tala va hina hi nga swi navela ku kuma ku wisanyana. Hambi u muntshwa kumbe u munhu lonkulu, u byi nghenerile vukati kumbe a wu byi nghenelanga, hinkwerhu hi nga ha titwa hi tshikilelekile naswona hi hlakarile hikwalaho ka vutomi bya siku na siku. Eka lava va nga hanyangiki kahle emirini kumbe lava nga ni vugono byo karhi, siku rin’wana ni rin’wana a ri va oloveli. Hilaha Matsalwa ma vulaka hakona, “ntumbuluko hinkwawo wu hambeta wu konya swin’we ni ku vaviseka swin’we ku ta fika sweswi.” (Varhoma 8:22) Loko munhu a wisa a swi vuli swona leswaku u ni vulolo. Ku wisa i xilaveko eka vanhu.
2. Yehovha a a ri karhi a wisa ku sukela rini?
2 Yehovha Xikwembu hi yexe a ri karhi a wisa. Ebukwini ya Genesa, ha hlaya: “Matilo ni misava ni vandla ra swona hinkwaro, swi fika eku heleni ka swona. Hi siku ra vunkombo, Xikwembu xi heta ntirho wa xona lowu xi wu endleke kutani hi siku ra vunkombo xi wisa entirhweni wa xona hinkwawo lowu xi wu endleke.” Yehovha u ri teke ri ri ra nkoka swinene ‘siku leri ra vunkombo,’ hikuva mhaka leyi huhuteriweke yi ya emahlweni yi ku: “Xikwembu xi katekisa siku ra vunkombo ni ku ri hlawulekisa.”—Genesa 2:1-3, NW.
Xikwembu Xi Wisa Eka Ntirho Wa Xona
3. Hi swihi swivangelo leswi nga riki swona swa ku wisa ka Xikwembu?
3 Hikwalaho ka yini Xikwembu xi wisile hi “siku ra vunkombo”? Ina, a xi wisanga hikwalaho ka ku karhala. Yehovha u ni “ntamu lo’wukulu” naswona a nga “karali, a nga heri matimba.” (Esaya 40:26, 28) Naswona Xikwembu a xi wisanga hikwalaho ko lava nkarhi wa ku wisa kumbe ku hunguta rivilo ra matirhelo, hikuva Yesu u hi byerile a ku: “Tata wa mina u ya emahlweni a tirha ku fikela sweswi, na mina ndzi ya emahlweni ndzi tirha.” (Yohane 5:17) Nakambe, “Xikwembu i Moya” naswona a xi lawuriwi hi mindzendzeleko ya le mirini swin’we ni swilo leswi laviwaka hi swivumbiwa swa nyama.—Yohane 4:24.
4. “Siku ra vunkombo” a ri hambane njhani ni ‘masiku’ ya tsevu lama hundzeke?
4 Hi nga swi kotisa ku yini ku tiva leswaku i yini lexi endleke leswaku Xikwembu xi wisa hi “siku ra vunkombo”? Hi ku xiya leswaku hambileswi a xi tsakile hi leswi xi swi endleke eka nkarhi lowu wo leha wa ‘masiku’ ya tsevu lama hundzeke ya ku tumbuluxa, Xikwembu xi katekise “siku ra vunkombo” hi ku kongoma, naswona xi ri “hlawulekisa.” Concise Oxford Dictionary yi hlamusela rito “hlawulekisa” tanihi “nchumu lowu nyiketeriweke hi ku hlawuleka kumbe lowu endliweke wu va wa (xikwembu kumbe wa xikongomelo xo karhi xa vukhongeri).” Xisweswo, ku katekisa ka Yehovha “siku ra vunkombo” ni ku ri hlawulekisa, swi kombisa leswaku rona swin’we ni “ku wisa” ka yena swi ni ku yelana ko karhi ni ku rhandza ka yena swin’we ni xikongomelo xa yena lexi hlawulekeke, ku nga ri swilaveko swa yena n’wini. Hi kwihi ku yelana ka kona?
5. I yini leswi Xikwembu xi swi sunguleke hi ‘masiku’ yo sungula ya tsevu ya ku tumbuluxa?
5 Eka ‘masiku’ ya tsevu lama hundzeke ya ku tumbuluxa, Xikwembu xi endle mindzhendzeleko ni milawu hinkwayo leyi lawulaka ndlela leyi misava ni hinkwaswo leswi yi rhendzeleke swi tirhaka ha yona, kutani a swi endla swi tirha. Sweswi vativi va sayense va karhi va dyondza ndlela leyi swilo leswi swi endliweke hi ndlela leyi hlamarisaka ha yona. Eku heleni ka “siku ra vutsevu,” Xikwembu xi vumbe mpatswa wo sungula wa vanhu kutani xi wu veka ‘entangeni wa Edeni hi tlhelo ra le vuxeni.’ Eku heteleleni, Xikwembu xi tivisa xikongomelo xa xona malunghana ni ndyangu wa vanhu swin’we ni misava hi marito lawa ya vuprofeta: “Tswalanani mi andza, mi tata misava, mi yi fuma, mi fuma tinhlampfi ta lwandle ni swivumbiwa leswi hahaka swa matilo ni swivumbiwa hinkwaswo leswi famba-fambaka ehenhla ka misava.”—Genesa 1:28, 31; 2:8, NW.
6. (a) Eku heleni ka “siku ra vutsevu,” xana Xikwembu xi titwise ku yini hi swilo hinkwaswo leswi xi swi tumbuluxeke? (b) “Siku ra vunkombo” ri hlawuleke hi mongo wihi?
6 Loko “siku ra vutsevu” ra ku tumbuluxa ri ya eku heleni, tsalwa ri ri: “Xikwembu xi vona hinkwaswo leswi xi swi endleke, kutani waswivo, a swi ri swinene ngopfu.” (Genesa 1:31, NW) Xikwembu a xi enerisekile hi hinkwaswo leswi xi swi endleke. Kutani xi wisa, kumbe xi tshika ku ya emahlweni xi tumbuluxa swilo emisaveni. Hambileswi ntanga lowu nga paradeyisi a wu hetisekile ni ku saseka, a wu hlanganisa ndhawu yitsongo ntsena, naswona a wu ri ni swivumbiwa swimbirhi ntsena leswi nga vanhu emisaveni. A swi ta teka nkarhi wo leha leswaku misava ni ndyangu wa vanhu swi fikelela xiyimo lexi Xikwembu xi lavaka leswaku swi va eka xona. Leswaku leswi swi hetiseka, xi veke “siku ra vunkombo” leri nga ta endla leswaku hinkwaswo leswi xi swi tumbuluxeke eka ‘masiku’ ya tsevu lama hundzeke, swi endleka hi ku landza ku rhandza ka xona ko kwetsima. (Ringanisa Vaefesa 1:11.) Loko “siku va vunkombo” ri ya eku heleni, misava hinkwayo a yi ta va se yi ri paradeyisi, yi akiwe hi ndyangu wa vanhu lava hetisekeke hilaha ku nga heriki. (Esaya 45:18) “Siku ra vunkombo” ri vekeriwe etlhelo, kumbe ri endleriwe ku hetisisa ku rhandza ka Xikwembu malunghana ni misava ni vanhu. Hi mongo wolowo ri ‘hlawulekisiwile.’
7. (a) Xikwembu xi wise hi ndlela yihi hi “siku ra vunkombo”? (b) Xana swilo swi ta va swi ri njhani loko “siku ra vunkombo” ri hela?
7 Kutani Xikwembu xi wise eka ntirho wa xona wa ku tumbuluxa hi “siku ra vunkombo.” Swi fana ni loko xi lo yima kutani xi pfumelela swilo leswi xi swi sunguleke leswaku swi ya emahlweni hilaha xi lavaka hakona. Xa tiyiseka leswaku eku heleni ka “siku ra vunkombo,” swilo hinkwaswo swi ta va se swi yime hi ndlela leyi xi lavaka ha yona. Hambiloko ko va ni swihinga, swi ta va se swi lunghisiwile. Vanhu hinkwavo lava yingisaka va ta vuyeriwa loko ku rhandza ka Xikwembu ku endleka hi xitalo. A xi kona lexi nga ta endla leswaku leswi swi nga hetiseki hikuva Xikwembu xi ri katekisile “siku ra vunkombo,” naswona xi ri “hlawulekisa.” Mawaku ntshembo wonghasi eka vanhu lava yingisaka!
Israyele U Tsandzekile Ku Nghena Eku Wiseni Ka Xikwembu
8. Xana Vaisrayele va sungule rini ku tlangela Savata naswona a va yi tlangela hi ndlela yihi?
8 Tiko ra Israyele ri vuyeriwile eka lunghiselelo ra Yehovha ra ku tirha ni ra ku wisa. Hambi ku ri emahlweni ka ku va xi nyika Vaisrayele Nawu le Ntshaveni ya Sinayi, hi ku tirhisa Muxe Xikwembu xi va byele xi ku: “Xiyani mhaka ya leswaku Yehovha u mi nyike savata. Hi yona mhaka leyi hi siku ra vutsevu a mi nyikaka xinkwa xa masiku mambirhi. Un’wana ni un’wana a a tshame endhawini yakwe. Ku nga humi munhu hi siku ra vunkombo endhawini ya yena.” Hiloko “vanhu va hambeta va hlayisa savata hi siku ra vunkombo.”—Eksoda 16:22-30.
9. Hikwalaho ka yini nawu wa Savata wu fanele wu ve nchumu lowu amukelekaka eka Vaisrayele?
9 Lunghiselelo leri a ri ri rintshwa eka Vaisrayele lava va ha ku ntshunxiwaka evukhumbini aEgipta. Hambileswi Vaegipta ni van’wana a va pima nkarhi hi masiku ya ntlhanu ku ya eka ya khume, a swi tshembisi leswaku Vaisrayele lava nga mahlonga a va nyikiwa siku ro wisa. (Ringanisa Eksoda 5:1-9.) Kutani swa fanela ku vula leswaku vanhu va Israyele va ku tsakerile ku cinca loku. Ematshan’weni yo languta xilaveko xa Savata xi ri ndzhwalo kumbe nchumu lowu tshikilelaka, va fanele va swi tsakerile ku yi landzela. Kahle-kahle, hi ku famba ka nkarhi Xikwembu xi va byerile leswaku Savata a yi ri xitsundzuxo xa leswaku va tshame va va mahlonga aEgipta ni ku va ntshunxa ka xona.—Deteronoma 5:15.
10, 11. (a) Loko a va lo yingisa, xana Vaisrayele a va ta va va langutele ku kuma yini? (b) Hikwalaho ka yini Vaisrayele va tsandzekile ku nghena eku wiseni ka Xikwembu?
10 Loko Vaisrayele lava humeke na Muxe aEgipta a va yingisile, a va ta va va ve ni lunghelo ra ku nghena etikweni leri tshembisiweke “leri khulukaka ntswamba ni vulombe.” (Eksoda 3:8, NW) Kwalaho a va ta va va kume ku wisa ka xiviri, ku nga ri hi Savata ntsena kambe vutomi bya vona hinkwabyo. (Deteronoma 12:9, 10) Hambiswiritano, sweswo a swi vanga tano. Malunghana na vona, muapostola Pawulo u tsarile: “A ku ri vamani lava tweke kambe va [tlhontlheke ku hlundzuka] lokukulu? Entiyisweni, xana hinkwavo a va endlanga tano, lava humeke aEgipta va ri ehansi ka Muxe? Ku tlula kwalaho, xana i vamani lava nyenyetseke Xikwembu hi malembe ya makumemune? Xana a ku nga ri lava dyoheke, lava mintsumbu ya vona yi weke emananga? Kambe, xana i vamani lava xi va hlambanyeleke leswaku a va nge ngheni eku wiseni ka xona loko ku nga ri lava nga yingisangiki? Kutani ha swi vona leswaku a va nghenanga hikwalaho ko pfumala ripfumelo.”—Vaheveru 3:16-19.
11 Vona dyondzo ya matimba swonghasi eka hina! Hikwalaho ka ku pfumala ka xona ripfumelo eka Yehovha, xitukulwana xexo hinkwaxo a xi swi kumanga hinkwaswo leswi a xi tshembiseke swona. Ematshan’weni ya sweswo, va lovile emananga. Va tsandzekile ku vona leswaku tanihi leswi va nga vatukulu va Abrahama, Xikwembu xi ta tirhisa vona leswaku xi hetisisa ku rhandza ka xona, ku nga ku katekisa matiko hinkwawo ya misava. (Genesa 17:7, 8; 22:18) Ematshan’weni yo pfumelelana ni ku rhandza ka Xikwembu, va kavanyetiwe hi ku helela hi ku navela ka vona ka siku na siku ni ka vutianakanyi. Onge hi nga ka hi nga weli eka xiendlo xo tano!—1 Vakorinto 10:6, 10.
Ku Wisa Ka Ha Ri Kona
12. Hi kwihi ku langutela loku a ka ha ri kona eka Vakreste va lembe-xidzana ro sungula, naswona a va ta ku kumisa ku yini?
12 Endzhaku ka ku boxa ku tsandzeka ka Israyele ku nghena eku wiseni ka Xikwembu hikwalaho ko pfumala ripfumelo, Pawulo u yise nyingiso wa yena eka vapfumeri-kulobye. Hilaha swi kombisiweke hakona eka Vaheveru 4:1-5, u va tiyisekisile leswaku ‘ku sale xitshembiso xa ku nghena eku wiseni ka [Xikwembu].’ Pawulo u va khutaze leswaku va kombisa ripfumelo eka “mahungu lamanene,” hikuva “hina lava hi kombiseke ripfumelo ha nghena eku wiseni.” Tanihi leswi Nawu ana se a wu susiwile hi gandzelo ra nkutsulo ra Yesu, laha Pawulo a a nga vulavuli hi ku wisa ka xiviri loku a ku tisiwa hi Savata. (Vakolosa 2:13, 14) Hi ku tshaha Genesa 2:2 na Pisalema 95:11, Pawulo a a khutaza Vakreste va Vaheveru leswaku va nghena eku wiseni ka Xikwembu.
13. Loko a tshaha Pisalema 95, hikwalaho ka yini Pawulo a yise nyingiso eka rito “namuntlha”?
13 Ntshembo wa ku nghena eku wiseni ka Xikwembu wu fanele wu ve “mahungu lamanene” eka Vakreste va Vaheveru, hilaha ku wisa ka Savata ku veke “mahungu lamanene” hakona eka Vaisrayele. Hikwalaho ke, Pawulo u khutaze vapfumeri-kulobye leswaku va nga tshuki va endla xihoxo lexi fanaka ni lexi Israyele a xi endleke emananga. Loko a tshaha ndzimana leyi sweswi yi vuriwaka Pisalema 95:7, 8, u yise nyingiso eka rito “namuntlha,” hambileswi se a ku ri khale Xikwembu xi wisile ku tumbuluxa. (Vaheveru 4:6, 7) A ku ri yihi yinhla ya Pawulo? A a vula leswaku “siku ra vunkombo,” leri Xikwembu xi ri vekeleke ku hetisisa xikongomelo xa xona malunghana ni misava ni vanhu hi ku helela, a ra ha ya emahlweni. Hikwalaho, a swi ri swa nkoka leswaku Vakreste-kulobye va endla swilo hi ku pfumelelana ni xikongomelo xexo ematshan’weni yo khomeka hi timhaka ta vona vini. Nakambe u tlhele a tsundzuxa a ku: “Mi nga nonon’hwisi timbilu ta n’wina.”
14. Xana Pawulo u swi kombise njhani leswaku “ku wisa” ka Xikwembu ka ha ri kona?
14 Ku tlhandlekela kwalaho, Pawulo u kombise leswaku “ku wisa” loku tshembisiweke a ku nga ri ku tshama eTikweni leri Tshembisiweke ntsena, ehansi ka vurhangeri bya Yoxuwa. (Yoxuwa 21:44) “Hikuva loko Yoxuwa a a va yise endhawini yo wisela eka yona,” ku vula Pawulo, “endzhaku ka sweswo Xikwembu a xi ta va xi nga vulavulanga hi siku rin’wana.” Hikwalaho ka sweswo, Pawulo u engeterile a ku: “Kutani ku sale ku wisa hi savata ka vanhu va Xikwembu.” (Vaheveru 4:8, 9) ‘Ku wisa koloko ka savata’ i yini?
Nghena Eku Wiseni Ka Xikwembu
15, 16. (a) Xana xiga lexi nge “ku wisa hi savata” xi vula yini? (b) ‘Ku wisa entirhweni wa wena n’wini’ swi vula yini?
15 Xiga lexi nge “ku wisa hi savata” xi hundzuluxeriwe xi huma eka rito ra Xigriki leri vulaka “ku tlangela savata.” (Kingdom Interlinear) Profesa William Lane u ri: “Rito leri ri kume mongo wa rona eka nawu wa Savata lowu tumbulukeke eka Vuyuda lowu sekeriweke eka Eksoda 20:8-10, laha a ku kandziyisiwa leswaku ku wisa ni ku dzunisa swi famba swin’we . . . [Ri] kandziyisa mhaka ya ku tlangela ni ku tsaka, leswi endliwaka loko ku gandzeriwa ni loko ku dzunisiwa Xikwembu.” Kutani ke, ku wisa loku tshembisiweke a ku vuli ku ntshunxiwa entirhweni. I ku suka eka ntirho lowu karharisaka, lowu nga pfuniki nchumu, u ya eka ntirho lowu tsakisaka lowu dzunisaka Xikwembu.
16 Leswi swi seketeriwa hi marito ya Pawulo lama landzelaka: “Hikuva munhu la ngheneke eku wiseni ka Xikwembu na yena u wisile emintirhweni yakwe, hilaha Xikwembu na xona xi wiseke emintirhweni ya xona.” (Vaheveru 4:10) Xikwembu a xi nga lo karhala loko xi wisa hi siku ra vunkombo ra ku tumbuluxa. Ematshan’weni ya sweswo, xi lo tshika ku endla ntirho wa ku tumbuluxa laha misaveni leswaku xi pfumelela swilo leswi xi swi endleke swi ndlandlamuka, swi fikelela ku vangama ka swona loku heleleke, swi tisa ku dzuneka ni xichavo eka xona. Leswi hi nga xiphemu xa ntumbuluko wa Xikwembu, hi fanele hi fambisana ni lunghiselelo rero. Hi fanele hi ‘wisa eka mintirho ya hina vini,’ leswi vulaka leswaku, hi fanele hi tshika ku ringeta ku sasa mintirho ya hina eka Xikwembu leswaku hi ta kuma ku pona. Ematshan’weni ya sweswo, hi fanele hi va ni ripfumelo ra leswaku ku pona ka hina ku titshege hi gandzelo ra nkutsulo ra Yesu Kreste, leri ha rona, swilo hinkwaswo swi nga ta tlhela swi endliwa swi pfumelelana ni xikongomelo xa Xikwembu.—Vaefesa 1:8-14; Vakolosa 1:19, 20.
Rito Ra Xikwembu Ri Nyika Matimba
17. Hi yihi ndlela leyi landzeleriweke hi Israyele wa nyama leyi hi faneleke hi yi papalata?
17 Vaisrayele va tsandzekile ku nghena eku wiseni loku Xikwembu a xi va tshembise kona hikwalaho ka ku ka va nga yingisi ni ku pfumala ripfumelo. Hikwalaho ka sweswo, Pawulo u khutaze Vakreste va Vaheveru a ku: “Hikwalaho a hi endleni hinkwaswo leswi hi nga swi kotaka leswaku hi nghena eku wiseni koloko, hi ku chava leswaku un’wana a nga wela entileni lowu fanaka wa ku ka a nga yingisi.” (Vaheveru 4:11) Vayuda vo tala va lembe-xidzana ro sungula a va ri kombisanga ripfumelo eka Yesu, naswona vunyingi bya vona byi xaniseke swinene loko fambiselo ra swilo ra Vuyuda ri hela hi 70 C.E. Vona ndlela leyi swi nga swa ntikelo ha yona leswaku hi va ni ripfumelo eka rito ra Xikwembu ra xitshembiso namuntlha!
18. (a) Hi swihi swivangelo leswi Pawulo a swi nyikeke, leswaku hi va ni ripfumelo eritweni ra Xikwembu? (b) Xana rito ra Xikwembu “ri kariha ku tlula banga rihi na rihi leri tsemaka hi matlhelo mambirhi” hi ndlela yihi?
18 Hi ni swivangelo swo twala swa ku kombisa ripfumelo eritweni ra Yehovha. Pawulo u tsarile: “Rito ra Xikwembu ra hanya naswona ri ni matimba, ri kariha ku tlula banga rihi na rihi leri tsemaka hi matlhelo mambirhi, ri tlhava hambi ku ri ku ya fika emaaveni ya moya-xiviri ni moya, ni ya mahlangano [swin’we] ni mongo [wa wona], naswona ra swi kota ku twisisa miehleketo ni makungu ya mbilu.” (Vaheveru 4:12) Ina, Rito ra Xikwembu kumbe rungula ra xona, ri “kariha ku tlula banga rihi na rihi leri tsemaka hi matlhelo mambirhi.” Vakreste va Vaheveru a va fanele va tsundzuka leswi weleke vakokwa wa vona. Va honise ku avanyisa ka Yehovha ka leswaku va ta lova emananga, kutani va ringeta ku nghena eTikweni leri Tshembisiweke. Kambe Muxe u va tsundzuxile: “Vaamaleke ni Vakanana va le mahlweni ka n’wina; kunene mi ta wa hi banga.” Loko Vaisrayele va sihalarile va ya emahlweni, “Vaamaleke ni Vakanana lava a va tshama entshaveni yoleyo va rhelela, va sungula ku va dlayetela ni ku va hangalasa ku ya fika eHorma.” (Tinhlayo 14:39-45, NW) Rito ra Yehovha ri kariha ku tlula banga rihi na rihi leri tsemaka hi matlhelo mambirhi, naswona wihi na wihi loyi a ri honisaka hi vomu, handle ko kanakana u ta tshovela leswi a swi byaleke.—Vagalatiya 6:7-9.
19. Xana rito ra Xikwembu ri ‘tlhava’ hi matimba ku fikela kwihi, naswona ha yini hi fanele hi vona vutihlamuleri bya hina eka Xikwembu?
19 Rito ra Xikwembu ri ni matimba hakunene “ri tlhava hambi ku ri ku ya fika emaaveni ya moya-xiviri ni moya, ni ya mahlangano [swin’we] ni mongo [wa wona]”! Ri fikelela mianakanyo ni minsusumeto ya vanhu, hi ndlela yo fanekisela ri tlhava ri ya fika eka mongo lowu nga le ndzeni-ndzeni ka marhambu! Hambi leswi Vaisrayele lava ntshunxiweke evukhumbini bya le Egipta va pfumeleke ku hlayisa Nawu, Yehovha a a swi tiva leswaku le ndzeni-ndzeni ka vona a va ma tlangeli malunghiselelo ni swilaveko swa yena. (Pisalema 95:7-11) Ematshan’weni yo endla ku rhandza ka yena, a va hisekela ku enerisa ku navela ka vona ka nyama. Hikwalaho, a va nghenanga eku wiseni loku Xikwembu xi ku tshembiseke, kambe va lovile emananga. Hi fanele hi yingisa mhaka leyi, hikuva “a xi kona xivumbiwa lexi nga vonakiki emahlweni ka [Xikwembu], kambe swilo hinkwaswo swi lo dla, swi paluxeka erivaleni ematihlweni ya loyi hi nga ta tihlamulela eka yena.” (Vaheveru 4:13) Kutani ke, a hi hetisiseni ku tinyiketela ka hina eka Yehovha naswona hi nga vi lava “tlhelelaka endzhaku eku lovisiweni.”—Vaheveru 10:39.
20. I yini lexi xi tshineleke, naswona hi fanele hi endla yini sweswi leswaku hi ta nghena eku wiseni ka Xikwembu?
20 Hambileswi “siku ra vunkombo”—siku ra Xikwembu ra ku wisa—ra ha yaka emahlweni, xa ha ku hisekela ku hetiseka ka xikongomelo xa xona hi misava ni vanhu. Ku nga ri khale, Hosi ya Vumesiya, Yesu Kreste, yi ta teka goza, yi herisa vakaneti hinkwavo va ku rhandza ka Xikwembu emisaveni, ku katsa na Sathana Diyavulosi. Hi nkarhi wa ku Fuma ka Kreste ka Gidi ra Malembe, Yesu swin’we ni vafumi-kulobye va 144000 va ta endla leswaku misava ni vanhu va fikelela xiyimo lexi heleleke lexi Xikwembu xi lavaka xona. (Nhlavutelo 14:1; 20:1-6) Sweswi i nkarhi wa ku kombisa leswaku hi hanyela ku endla ku rhandza ka Yehovha Xikwembu. Ematshan’weni yo lava ku sasa swiendlo swa hina emahlweni ka Xikwembu ni ku tirhela swilaveko swa hina, sweswi i nkarhi wa ku ‘wisa emintirhweni ya hina vini’ kutani hi mbilu hinkwayo hi tirhela swilaveko swa Mfumo. Hi ku endla sweswo ni hi ku tshama hi tshembekile eka Tata wa hina wa le tilweni, Yehovha, hi ta va ni lunghelo ro vuyeriwa eka ku wisa ka Xikwembu, sweswi ni hilaha ku nga heriki.
U Nga Hlamusela Ke?
◻ Hikwalaho ka yini Xikwembu xi wisile hi “siku ra savata”?
◻ Hi kwihi ku wisa loku Vaisrayele a va ta va va ku kumile, kambe ha yini va tsandzekile ku ku kuma?
◻ I yini lexi hi faneleke hi xi endla leswaku hi ta nghena eku wiseni ka Xikwembu?
◻ Xana rito ra Xikwembu ra hanya, ri ni matimba naswona ri kariha ku tlula banga rihi na rihi leri tsemaka hi matlhelo mambirhi hi ndlela yihi?
[Xifaniso lexi nga eka tluka 16, 17]
Vaisrayele va yi hlayisile Savata, kambe a va nghenanga eku wiseni ka Xikwembu. Wa swi tiva leswaku hikwalaho ka yini?