“Ku Langutela Hi Mahlongati”

“Ku langutela hi mahlongati ka ntumbuluko ku rindzele ku hlavuteriwa ka vana va Xikwembu.”—VARHOMA 8:19.

1. I ku yelana kwihi loku nga kona exikarhi ka xiyimo xa Vakreste va namuntlha ni xa Vakreste va lembe-xidzana ro sungula?

XIYIMO xa Vakreste va ntiyiso namuntlha xa fana ni xa Vakreste va lembe-xidzana ro sungula. Vuprofeta byi pfune malandza ya Yehovha ya minkarhi yoleyo ku lemuka nkarhi lowu Mesiya a a ta humelela ha wona. (Daniyele 9:24-26) Vuprofeta lebyi fanaka byi vhumbhe ku lovisiwa ka Yerusalema kambe a byi nga tamelanga nchumu lexi a xi ta pfuna Vakreste leswaku va wu tiva ka ha ri emahlweni nkarhi lowu muti wolowo a wu ta lovisiwa ha wona. (Daniyele 9:26b, 27) Hi ku fanana, vuprofeta lebyi byi pfune swichudeni leswi tshembekaka swa Bibele eka lembe-xidzana ra vu-19 leswaku swi tshama swi rindzile. Hi ku hlanganisa “mikari ya ntlhanu na mimbiri” ya Daniyele 4:25 ni “mikarhi ya Vamatiko,” a va langutele leswaku Kreste u ta amukela matimba ya Mfumo hi 1914. (Luka 21:24, King James Version; Ezekiyele 21:25-27) Hambileswi buku ya Daniyele yi nga ni vuprofeta byo tala, ku hava ni byin’we eka byona lebyi pfunaka swichudeni swa Bibele swa namuntlha ku kumisisa hi ku kongoma leswaku mafambiselo hinkwawo ya swilo ya Sathana ma ta lovisiwa rini. (Daniyele 2:31-44; 8:23-25; 11:36, 44, 45) Hambiswiritano, leswi swi ta humelela ku nga ri khale, hikuva hi hanya ‘enkarhini wa makumu.’—Daniyele 12:4.a

Ku Xalamuka Hi Nkarhi Wa Vukona Bya Kreste

2, 3. (a) Hi byihi vumbhoni lebyikulu bya leswaku hi hanya enkarhini wa vukona bya Kreste ematimbeni ya vuhosi? (b) I yini lexi kombisaka leswaku Vakreste a va fanele va hambeta va xalamuka hi nkarhi wa vukona bya Yesu Kreste?

² Ina, vuprofeta byi endle leswaku Vakreste va tshama va languterile loko Kreste a nga si nyikiwa matimba ya Mfumo hi 1914. Kambe “xikombiso” lexi Kreste a xi nyikeke malunghana ni vukona byakwe ni ku hela ka mafambiselo ya swilo xi nyikele swiendlakalo. Naswona swo tala swa swona a swi ta voniwa loko vukona byakwe byi sungurile. Swiendlakalo swo tano—tinyimpi, ku kayivela ka swakudya, ku tsekatseka ka misava, mintungu, ku andza ka vuhomboloki, ku xanisiwa ka Vakreste ni ku chumayeriwa ka mahungu lamanene ya Mfumo emisaveni hinkwayo—i vumbhoni lebyikulu bya leswaku sweswi hi hanya enkarhini wa vukona bya Kreste loyi a nyikiweke matimba ya vuhosi.—Matewu 24:3-14; Luka 21:10, 11.

³ Kambe, mongo wa xitsundzuxo lexi Yesu a xi nyikeke vadyondzisiwa vakwe loko a lelana na vona hi lowu nge: “Tshamani mi langutile, tshamani mi hitekile, . . . tshamani mi rindzile.” (Marka 13:33, 37; Luka 21:36) Loko u wu hlaya hi vukheta mongo wa xikhutazo lexi xa ku xalamuka u ta kuma leswaku Kreste a a nga vulavuli ngopfu hi ku tshama hi xalamukele swinene xikombiso xa ku sungula ka vukona byakwe. Ku ri na sweswo, a a lerisa vadyondzisiwa vakwe va ntiyiso leswaku va tshama va xalamukile hi nkarhi wa vukona byakwe. Xana Vakreste va ntiyiso a va fanele va tshama va xalamukele yini?

4. Xikombiso lexi Yesu a xi nyikeke a xi ta pfuna yini?

⁴ Yesu u nyikele vuprofeta byakwe lebyikulu loko a hlamula xivutiso lexi nge: “Xana swilo leswi swi ta endleka rini [swiendlakalo leswi yisaka eku lovisiweni ka mafambiselo ya swilo ya Vayuda], naswona xi ta va xihi xikombiso xa vukona bya wena ni xa makumu ya mafambiselo ya swilo?” (Matewu 24:3) Xikombiso lexi vhumbhiweke a xi nga ta tirha ku fungha vukona bya Kreste ntsena, kambe ni swiendlakalo leswi yisaka eku heleni ka mafambiselo ya swilo ya namuntlha lama hombolokeke.

5. Yesu u swi kombise njhani leswaku hambiloko a ri kona hi tlhelo ra moya, a ha ta “ta”?

⁵ Yesu u kombise leswaku hi nkarhi wa “vukona” byakwe (Xigriki, pa·rou·siʹa) a a ta ta hi matimba ni ku vangama. Malunghana ni ku “ta” koloko (loku kombisiwaka hi tinhlamuselo ta rito ra Xigriki leri nge erʹkho·mai), u te: “Endzhaku ka sweswo xikombiso xa N’wana wa munhu xi ta humelela etilweni, endzhaku ka sweswo tinyimba hinkwato ta misava ti ta tiba hi xirilo, kutani ti ta vona N’wana wa munhu a ta a ri emapapeni ya tilo hi matimba ni ku vangama lokukulu. . . . Kutani dyondzani mhaka leyi hi xifaniso xa nkuwa: Hi ku hatlisa loko rhavi ra wona leritsongo ri sungula ku olova naswona ri humesa matluka, ma swi tiva leswaku ximumu xi le kusuhi. Hi ku fanana na n’wina, loko mi vona swilo leswi hinkwaswo, tivani leswaku [Kreste] u le kusuhi, etinyangweni. . . . Hikokwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona. . . . Tshamani mi lunghekile, hikuva N’wana wa munhu u ta fika hi nkarhi lowu mi nga wu ehleketiki.”—Matewu 24:30, 32, 33, 42, 44.

Yesu U Ta Hi Xivangelo Xihi?

6. Ku lovisiwa ka “Babilona Lonkulu” ku ta tisa ku yini?

⁶ Hambileswi a veke kona tanihi Hosi ku sukela hi 1914, Yesu Kreste wa ha ta fanela a avanyisa mafambiselo lawa ni munhu ha un’we a nga si tsema timhaka ehenhleni ka lava a va kumaka va ri vo homboloka. (Ringanisa 2 Vakorinto 5:10.) Ku nga ri khale Yehovha u ta susumeta mianakanyo ya vafumi va politiki leswaku va lovisa “Babilona Lonkulu,” mfumo wa misava wa vukhongeri bya mavunwa. (Nhlavutelo 17:4, 5, 16, 17) Muapostola Pawulo u vule hi ku kongoma leswaku Yesu Kreste u ta lovisa “munhu wo kala nawu”—vafundhisi lava gwineheke va Vujagana, ku nga xiphemu lexikulu xa “Babilona Lonkulu.” Pawulo u tsarile a ku: “Lowo kala nawu u ta hlavuteriwa, loyi Hosi Yesu a nga ta n’wi dlaya hi moya wa nomu wakwe a n’wi endla a nga koti nchumu loko vukona byakwe byi humelela erivaleni.”—2 Vatesalonika 2:3, 8.

7. Loko N’wana wa munhu a fika hi ku vangama ka yena, xana u ta tisa vuavanyisi byihi?

⁷ Ku nga ri khale, Kreste u ta avanyisa vanhu va matiko hi ku ya hi ndlela leyi va khomeke vamakwavo wakwe ha yona lava ha riki emisaveni. Ha hlaya: “Loko N’wana wa munhu a fika hi ku vangama kakwe, tintsumi hinkwato ti ri na yena, u ta tshama exiluvelweni xakwe xo vangama. Naswona matiko hinkwawo ma ta hlengeletiwa emahlweni kakwe, kutani u ta hambanisa vanhu van’wana eka van’wana, ku fana ni loko murisi a hambanisa tinyimpfu eka timbuti. Naswona u ta veka tinyimpfu evokweni rakwe ra xinene, kambe timbuti eka lera ximatsi. . . . Kutani hosi yi ta [angula tinyimpfu] yi ku, ‘Ndzi tiyisile ndzi ri eka n’wina, Mpimo lowu mi swi endleke ha wona eka un’wana wa vamakwerhu lava lavatsongo, mi swi endle ha wona ni le ka mina.’ . . . Kutani [timbuti ti] ta loviseriwa makumu, kambe lavo lulama va ta ya evuton’wini lebyi nga heriki.”—Matewu 25:31-46.

8. Pawulo u ku hlamusela njhani ku ta ka Kreste a ta tsema timhaka ehenhleni ka vanhu lava nga xi chaviki Xikwembu?

⁸ Hilaha swi kombisiweke hakona exifanisweni xa tinyimpfu ni timbuti, Yesu u tsema timhaka ehenhleni ka hinkwavo lava nga chaviki Xikwembu. Pawulo u tiyisekise vapfumeri-kulobye lava xanisekaka hi ta “ku wisa swin’we na hina eku hlavuteriweni ka Hosi Yesu a huma etilweni swin’we ni tintsumi takwe ta matimba a ri endzilweni lowu pfurhaka malangavi, a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu. Vona va ta kuma nxupulo wa vuavanyisi bya ku loviseriwa makumu emahlweni ka Hosi ni le ku vangameni ka ntamu wa yona, enkarhini wolowo u ta va a tela ku vangamisiwa mayelana ni vakwetsimi vakwe.” (2 Vatesalonika 1:7-10) Tanihi leswi swiendlakalo leswi hinkwaswo leswi nyanyulaka swi nga emahlweni ka hina, xana a hi fanelanga hi va ni ripfumelo ni ku tshama hi ku xalamukele hi mahika ku ta ka Kreste?

Ku Rindzela Ku Hlavuteriwa Ka Kreste Hi Ku Hiteka

9, 10. Ha yini vatotiwa lava va ha riki emisaveni va rindzela ku hlavuteriwa ka Yesu Kreste hi mahika?

⁹ ‘Ku hlavuteriwa ka Hosi Yesu a huma etilweni’ a ku nge endliwi hi xikongomelo xo lovisa lavo homboloka ntsena kambe ni ku hakela lavo lulama. Masalela ya vamakwavo va Kreste lava totiweke lava ha riki emisaveni ma nga tama ma xaniseka emahlweni ka ku hlavuteriwa ka Kreste, kambe ma tsaka hileswi ma nga ni ntshembo lowu vangamaka wo ya hanya etilweni. Muapostola Petro u tsalele Vakreste lava totiweke marito lama landzelaka: “Hambetani mi tsaka tanihi leswi mi nga vahlanganyeri eku xanisekeni ka Kreste, leswaku mi tsaka ni ku tsakisisa hi nkarhi wa ku hlavuteriwa ka ku vangama kakwe.”—1 Petro 4:13.

¹⁰ Vatotiwa va tiyimisele ku tshama va tshembekile ku fikela loko Kreste a ‘va hlengeleta va va swin’we na yena’ leswaku “mfanelo leyi ringiweke” ya ripfumelo ra vona “yi kumeka yi ri xivangelo xa ku vongiwa, ku vangamisiwa ni ku xiximiwa eku hlavuteriweni ka Yesu Kreste.” (2 Vatesalonika 2:1; 1 Petro 1:7) Malunghana ni Vakreste volavo vo tshembeka lava tswariweke hi moya, ku nga vuriwa leswi: “Vumbhoni lebyi khumbaka Kreste byi [vuriwile] hilaha ku tiyeke exikarhi ka n’wina, lerova a ku na nyiko leyi mi kayivelaka swo karhi eka yona, loko ma ha ku rindzele hi mapfundza ku hlavuteriwa ka Hosi ya hina Yesu Kreste.”—1 Vakorinto 1:6, 7.

11. Vakreste lava totiweke va endla yini loko va ha rindzele ku hlavuteriwa ka Yesu Kreste?

¹¹ Masalela lama totiweke ma ni mintlhaveko leyi fanaka ni ya Pawulo, loyi a tsaleke a ku: “Ndzi anakanya leswaku ku xaniseka ka nguva ya sweswi a hi nchumu loko ku ringanisiwa ni ku vangama loku hi nga ta hlavuteriwa kona.” (Varhoma 8:18) Ripfumelo ra vona a ri fanelanga ri tiyisiwa hi ku hlayela minkarhi. Va tshama va khomekile entirhweni wa Yehovha, va vekela vanghana va vona va “tinyimpfu tin’wana” xikombiso lexinene. (Yohane 10:16) Vatotiwa lava va swi tiva leswaku makumu ya mafambiselo lawa yo homboloka ma tshinele, kutani va yingisa xikhutazo xa Petro lexi nge: “Hlomiselani mianakanyo ya n’wina ntirho, hlayisani mianakanyo ya n’wina yi ri leyi hlutekeke hi ku helela; vekani ntshembo wa n’wina eka musa lowu nga faneriwiki lowu mi nga ta tiseriwa wona eku hlavuteriweni ka Yesu Kreste.”—1 Petro 1:13.

“Ku Langutela Hi Mahlongati Ka Ntumbuluko”

12, 13. Ntumbuluko wa vanhu “wu vekiwe ehansi ka vuhava” hi ndlela yihi, naswona tinyimpfu tin’wana ti navela yini?

¹² Xana ni tinyimpfu tin’wana ti na leswi ti hanyaka ti swi langutele hi mahlongati? Ti na swona hakunene. Endzhaku ka loko a vulavule hi ntshembo wo vangama wa lava amukeriweke hi Yehovha leswaku va va “vana” va yena lava tswariweke hi moya tlhelo “vadyandzhaka-kulobye na Kreste” eMfun’weni wa le tilweni, Pawulo u te: “Ku langutela hi mahlongati ka ntumbuluko ku rindzele ku hlavuteriwa ka vana va Xikwembu. Hikuva ntumbuluko wu vekiwe ehansi ka vuhava, ku nga ri hi ku rhandza ka wona, kambe hikwalaho ka loyi a wu vekeke, exisekelweni xa ntshembo, leswaku ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.”—Varhoma 8:14-21; 2 Timotiya 2:10-12.

¹³ Hikwalaho ka xidyoho xa Adamu, vana va yena hinkwavo va “vekiwe ehansi ka vuhava,” va velekiwa va ri evuhlongeni bya xidyoho ni rifu. A va swi kotanga ku tintshunxa evuhlongeni byo tano. (Pisalema 49:7; Varhoma 5:12, 21) Ina, tinyimpfu tin’wana ti swi navela swinene ku “ntshunxiwa evuhlongeni bya ku onhaka”! Kambe loko sweswo swi nga si humelela, ku fanele ku endleka swin’wana hi ku ya hi minkarhi ni tinguva ta Yehovha.

14. Ku ta katseka yini eku ‘hlavuteriweni ka vana va Xikwembu,’ naswona leswi swi ta pfuna njhani leswaku vanhu va “ntshunxiwa evuhlongeni bya ku onhaka”?

¹⁴ Masalela ya “vana va Xikwembu” lava totiweke ma fanele ma rhanga ma ‘hlavuteriwa.’ Xana leswi swi ta katsa yini ke? Hi nkarhi lowu faneleke wa Xikwembu, tinyimpfu tin’wana ti ta swi xiya leswaku vatotiwa eku heteleleni va ‘funghiwile’ ni ku vangamisiwa leswaku va fuma na Kreste. (Nhlavutelo 7:2-4) “Vana va Xikwembu” lava pfuxiweke na vona va ta ‘hlavuteriwa’ loko va hlanganyela na Kreste eku loviseni ka mafambiselo ya swilo ya Sathana lama hombolokeke. (Nhlavutelo 2:26, 27; 19:14, 15) Kutani hi nkarhi wa Mfumo wa Kreste wa Gidi ra Malembe, va ta tlhela va ‘hlavuteriwa’ tanihi vaprista lava va tirhaka ku lunghiselela mpfuno wa gandzelo ra nkutsulo ra Yesu eka “ntumbuluko” lowu nga wa vanhu. Leswi swi ta endla leswaku vanhu va “ntshunxiwa evuhlongeni bya ku onhaka” kutani eku heteleleni va nghena eka “ntshunxeko lowu vangamaka wa vana va Xikwembu.” (Varhoma 8:21; Nhlavutelo 20:5; 22:1, 2) Tanihi leswi tinyimpfu tin’wana ti nga ni ntshembo wo tano wo hlawuleka, xana swa hlamarisa leswi ti “[rindzeleke] ku hlavuteriwa ka vana va Xikwembu” hi “mahlongati”?—Varhoma 8:19.

Ku Lehisa Ka Yehovha Mbilu Swi Vula Ku Ponisiwa

15. I yini lexi hi nga fanelangiki hi xi rivala malunghana ni nkarhi wa Yehovha wa swiendlakalo?

¹⁵ Yehovha i Muhlayisi Lonkulu wa Nkarhi. Ku hlayisa ka yena nkarhi ku ta va loku hetisekeke. Swilo minkarhi yin’wana swi nga ha va swi nga humeleli hilaha hina a hi swi langutele hakona. Hambiswiritano, hi nga pfumela hi ku helela leswaku switshembiso hinkwaswo swa Xikwembu swi ta hetiseka. (Yoxuwa 23:14) A nga ha va a pfumelela swilo swi teka nkarhi wo leha ku tlula lowu vo tala a va langutele wona. Kambe a hi tinyiketeleni ku twisisa tindlela ta yena naswona hi tsakela vutlhari byakwe. Pawulo u tsarile a ku: “Mawaku ku enta ka rifuwo ni vutlhari ni vutivi bya Xikwembu! Vuavanyisi bya xona a byi lavisiseki, ni tindlela ta xona a ti landzeleriseki! Hikuva ‘i mani loyi se a tivaka mianakanyo ya Yehovha, kumbe i mani loyi a veke mutsundzuxi wa yena?’”—Varhoma 11:33, 34.

16. I vamani lava kumaka nkarhi wo pfuneka hi ku lehisa mbilu ka Yehovha?

¹⁶ Petro u tsarile a ku: “Varhandziwa, leswi mi rindzeleke swilo leswi [ku lovisiwa ka “matilo” ni “misava” ya khale ivi swi siviwa hi “matilo lamantshwa” ni “misava leyintshwa” leyi tshembisiweke hi Xikwembu], endlani hinkwaswo leswi mi nga swi kotaka leswaku emakumu a mi kuma mi ri lava pfumalaka xivati, lava nga solekiki ni lava nga ni ku rhula. Ku tlula kwalaho, tekani ku lehisa mbilu ka Hosi ya hina ku ri ku mi ponisa.” Hikwalaho ka ku lehisa mbilu ka Yehovha, vanhu van’wana va timiliyoni va karhi va nyikiwa nkarhi wo ponisiwa hi “siku ra Yehovha,” leri ri nga ta ta ri nga rindzeriwanga “ku fana ni khamba.” (2 Petro 3:9-15) Ku lehisa ka yena mbilu nakambe ku nyika un’wana ni un’wana wa hina nkarhi wo ‘hambeta a tirhela ku ponisiwa ka yena hi ku chava ni ku rhurhumela.’ (Vafilipiya 2:12) Yesu u vule leswaku hi fanele hi ‘tivonela’ naswona hi ‘hiteka’ loko hi lava ku amukeriwa ni ku pona loko hi “yima emahlweni ka N’wana wa munhu” loko a ta eku avanyiseni.—Luka 21:34-36; Matewu 25:31-33.

Hambetani Mi Rindza Hi Ku Tiyisela

17. I marito wahi ya muapostola Pawulo lawa hi faneleke hi ma yingisa?

¹⁷ Pawulo u khutaze vamakwavo va moya leswaku va veka mahlo ya vona, “ku nga ri eka swilo leswi voniwaka, kambe eka swilo leswi nga voniwiki.” (2 Vakorinto 4:16-18) A a nga lavi nchumu xi va sivela ku vona hakelo ya le tilweni leyi vekiweke emahlweni ka vona. Hambi hi Vakreste lava totiweke kumbe hi va tinyimpfu tin’wana, a hi hambeteni hi tsundzuka ntshembo wo hlamarisa lowu vekiweke emahlweni ka hina, hi nga wu fularheli. A hi ‘hambeteni hi rindza hi ku tiyisela,’ hi kombisa leswaku “hina a hi muxaka wa vanhu lava tlhelelaka endzhaku eku lovisiweni, kambe hi muxaka lowu nga ni ripfumelo eku londzovotiweni ka moya-xiviri wu hanya.”—Varhoma 8:25; Vaheveru 10:39.

18. Ha yini hi nga tshikaka minkarhi ni tinguva hi ku tiyiseka emavokweni ya Yehovha?

¹⁸ Hi nga tshika minkarhi ni tinguva hi ku tiyiseka emavokweni ya Yehovha. Switshembiso swa yena ‘a swi nge hlweli’ ku hetiseka hi ku ya hi xiyimiso xakwe xa nkarhi. (Habakuku 2:3) Hi nkarhi lowu fanaka, xikhutazo xa Pawulo eka Timotiya i xa nkoka lowukulu eka hina. U te: “Ndza ku lerisa swinene-nene emahlweni ka Xikwembu na Kreste Yesu, loyi a nga ta avanyisa lava hanyaka ni lava feke, naswona hi ku humelela kakwe ni mfumo wakwe, chumayela rito, u va eka rona hi xihatla hi nguva leyinene, hi nguva ya ku karhateka . . . Endla ntirho wa muevhangeli, hetisisa vutirheli bya wena hi xitalo.”—2 Timotiya 4:1-5.

19. Lowu wa ha ri nkarhi wa leswaku vanhu va Yehovha va endla yini, naswona ha yini?

¹⁹ Vutomi byi le khombyeni—bya hina ni bya vaakelani va hina. Pawulo u tsarile a ku: “Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava ku yingisaka.” (1 Timotiya 4:16) Mafambiselo lawa ya swilo lama hombolokeke ma saleriwe hi nkarhi wo koma swinene. Loko ha ha rindzele swiendlakalo leswi nyanyulaka leswi nga emahlweni ka hina hi ku hiteka, hi nga tshuki hi rivala leswaku lowu wa ha ri nkarhi ni nguva ya Yehovha ya leswaku vanhu vakwe va chumayela mahungu lamanene ya Mfumo. Ntirho wolowo wu fanele wu hetisisiwa hi ndlela leyi nga ta n’wi enerisa. “Kutani,” hilaha Yesu a vuleke hakona, “hi kona makumu ma nga ta fika.”—Matewu 24:14.

[Nhlamuselo ya le hansi]

Mpfuxeto

◻ Malunghana ni ku hlayela minkarhi, xana xiyimo xa hina xi fana njhani ni xa Vakreste va lembe-xidzana ro sungula?

◻ Ha yini Vakreste va fanele va ‘tshama va rindzile,’ hambi ku ri enkarhini wa vukona bya Kreste?

◻ Ha yini ntumbuluko wa vanhu wu swi langutele hi mahlongati “ku hlavuteriwa ka vana va Xikwembu”?

◻ Ha yini hi nga tshikaka minkarhi ni tinguva hi ku tiyiseka emavokweni ya Yehovha?

[Xifaniso lexi nga eka tluka 17]

Vakreste va fanele va tshama va xalamukile eku languteleni ka vona ku ta ka Kreste

[Xifaniso lexi nga eka tluka 18]

Masalela lama totiweke ma tshama ma khomekile entirhweni wa Yehovha, a ma seketeli ripfumelo ra wona hi ku hlayela minkarhi