Va Endle Ku Rhandza Ka Yehovha

Yesu U Hete Nkarhi A Ri Ni Vana

VUTIRHELI bya Yesu bya malembe manharhu ni hafu a byi ri kusuhi ni ku hela. Ku nga ri khale a fanele a nghena eYerusalema kutani a langutana ni rifu leri vavisaka. A swi tiva kahle leswi a swi n’wi rindzerile, hikuva u byele vadyondzisiwa vakwe a ku: “N’wana wa munhu u ta nyiketiwa emavokweni ya vanhu, naswona va ta n’wi dlaya.”—Marka 9:31.

Hakunene,Yesu a a lava ku tirhisa siku rin’wana na rin’wana, awara yin’wana na yin’wana, ni nkarhi wun’wana na wun’wana lowu a wu sele. Hambiswiritano vadyondzisiwa vakwe a va ha lava nyingiso. Yesu u swi vonile leswaku a va ha lava ndzayo ya matimba malunghana ni xilaveko xa vutitsongahati ni khombo ra ku khunguvanyeka leri tshamaka ri ri kona. (Marka 9:35-37, 42-48) Nakambe a va lava ndzetelo mayelana ni vukati, ku dlaya vukati ni ku tshama wexe. (Matewu 19:3-12) A swi kanakanisi leswaku Yesu a vulavule ni vadyondzisiwa va yena hi ku kongoma na hi ku hiteka, hi ku tiva leswaku a ta fa ku nga ri khale. Nkarhi a wu ri wa nkoka—hi yona mhaka leyi endleke leswaku leswi Yesu a swi endleke endzhaku ka sweswo swi va leswi xiyekaka ku tlula mpimo.

Yesu A Amukela Vana

Mhaka ya Bibele yi ri: “Vanhu va sungula ku n’wi tisela vana lavatsongo leswaku a va khumba.” Loko vadyondzisiwa va vone leswi, xikan’we-kan’we va kombise ku nga swi amukeli. Kumbexana a va anakanya leswaku Yesu a ri wa nkoka ngopfu kumbe a a khomeke ngopfu lerova a a nga ta swi kota ku khathala hi vana. Kutani, wa nga anakanya ku hlamala loku vadyondzisiwa va veke na kona loko Yesu a hlundzukela vona! U va byerile a ku: “Tshikani vana lavatsongo va ta eka mina; mi nga ringeti ku va sivela, hikuva mfumo wa Xikwembu i wa lavo tano.” Kutani Yesu u engete a ku: “Ndzi tiyisile ndzi ri eka n’wina, Mani na mani loyi a nga wu amukeriki mfumo wa Xikwembu ku fana ni n’wana lontsongo a nge pfuki a nghenile eka wona.”—Marka 10:13-15.

Yesu u vone timfanelo leti dzunekaka eka vana. Hi ntolovelo va rhandza ku vutisa naswona va tshembeka. Va amukela marito ya vatswari va vona va tlhela va va yimela eka vana van’wana. Ndlela leyi va amukelaka ni ku dyondziseka ha yona, yi fanele ku tekeleriwa hi vanhu hinkwavo lava navelaka ku nghena eMfun’weni wa Xikwembu. Swi hilaha Yesu a vuleke hakona a ku, “mfumo wa Xikwembu i wa lavo tano.”—Ringanisa Matewu 18:1-5.

Kambe Yesu a a nga tirhisi vana lava tanihi xikombiso ntsena. Mhaka leyi yi swi veka erivaleni leswaku Yesu a swi rhandza ku va swin’we na vona hakunene. Marka u vika leswaku Yesu “a angarha vana, a va katekisa, a va tlhandleka mavoko.” (Marka 10:16) I xiviko xa Marka ntsena lexi hlanganisaka vuxokoxoko bya rirhandzu bya leswaku Yesu “a angarha vana.”a Xisweswo Yesu a a endle swo tlurisa leswi a swi languteriwe hi lavakulu, lava tiseke vana lava eka Yesu leswaku a ta va “khumba” ntsena.

A xi ri xihi xikongomelo xa Yesu loko ‘a tlhandleka mavoko’ ehenhla ka vana? Laha a ku ringanyetiwi mukhuva wa vukhongeri, wo tanihi nkhuvulo. Hambileswi minkarhi yin’wana, ku tlhandleka mavoko a swi vula ku hlawuriwa, minkarhi yin’wana a swi kombisa ku nyika mikateko ntsena. (Genesa 48:14; Mintirho 6:6) Kutani Yesu a nga ha va a lo katekisa vana ntsena.

Eka xiendlakalo xihi na xihi, Marka u tirhisa rito leri nga ni matimba, “mikateko” (ka·teu·lo·geʹo), leri vulaka matimba lama engetelekeke. Leswi swi vula leswaku Yesu u katekise vana hi mbilu hinkwayo, hi ntwela-vusiwana ni hi musa. Swi le rivaleni leswaku a a nga languti vana tanihi lava n’wi dyelaka nkarhi.

Leswi Hi Swi Dyondzaka

Ndlela ya Yesu yo tirhisana ni vana ni vanhu lavakulu a yi nga kavanyeti kumbe ku tsongahata munhu. Buku yin’wana yi ri: “U fanele a n’wayitele hi ku olova ni ku hleka hi ntsako.” A swi kanakanisi leswi vanhu va malembe hinkwawo va titweke va tshunxekile loko va ri na yena. Loko hi anakanya hi xikombiso xa Yesu, hi nga tivutisa, ‘Xana vanhu van’wana va ndzi vona ndzi tshineleleka?’ ‘Xana ndzi tikomba ndzi khomekile swinene lerova a ndzi lavi ku karhatiwa hi swiendlo ni ku karhateka ka van’wana?’ Ku hlakulela ku tsakela vanhu hi ndlela ya xiviri ku ta hi susumetela leswaku hi tinyikela, hilaha Yesu a endleke hakona. Van’wana va ta vona ku va tsakela ka xiviri loku hi nga na kona kutani va hi tshinelela.—Swivuriso 11:25.

Yesu u tsakele ku va swin’we ni vana, hilaha mhaka ya Marka yi kombisaka hakona. Kumbexana u ve ni nkarhi wo va languta loko va tlanga, hikuva u kombetele eka mintlango ya vona eka xin’wana xa swifaniso swa yena. (Matewu 11:16-19) Kumbexana van’wana va vana lava Yesu a va katekiseke a va ri vatsongo swinene hi malembe lerova va nga tlangela leswaku a ri mani ni leswi a swi dyondziseke. Kambe leswi a swi n’wi vangelanga ku titwa a tlanga hi nkarhi wa yena. U hete nkarhi ni vana hikuva a a va rhandza. Swi nga endleka leswaku vo tala va vana lava Yesu a hlanganeke na vona hi nkarhi wa vutirheli byakwe, endzhakunyana va susumeteriwe hi rirhandzu rakwe leswaku va va vadyondzisiwa va yena.

Loko Yesu a hete nkarhi ni vana emavhikini yo hetelela yo nonon’hwa ya vutomi bya yena, hakunene na hina hi nga wu kuma nkarhi wo va na vona eka xiyimiso xa hina lexi khomekeke. Hi fanele hi tsundzuka ngopfu-ngopfu vana lava nga ni swilaveko swo hlawuleka, tanihi vana lava nga riki na vatatana. Entiyisweni, vana hinkwavo va kula loko va nyikiwa nyingiso, naswona i ku navela ka Yehovha leswaku hi va kombisa rirhandzu ni ku va pfuna hilaha hi nga kotaka hakona.—Pisalema 10:14.

[Nhlamuselo ya le hansi]