Mikateko Ya Yehovha ‘eTikweni’ Ra Hina

‘Hinkwaswo swi ta hanya kun’wana ni kun’wana laha xinambyana lexi xi fambaka kona.’—EZEKIYELE 47:9.

1, 2. (a) Mati i ya nkoka ku fikela kwihi? (b) Xana mati ya nambu wa le xivonweni xa Ezekiyele ma fanekisela yini?

MATI i xihalaki lexi hlamarisaka. Swilo hinkwaswo leswi hanyaka swi hanya ha wona. A nga kona eka hina la nga hanyaka nkarhi wo leha handle ka wona. Nakambe hi tshembe wona ku basisa, hikuva mati ma nga n’okisa ni ku susa thyaka. Kutani hi hlamba mimiri ya hina, hi hlantswa swiambalo swa hina, ni ku basisa swakudya swa hina hi wona. Hi ku endla sweswo hi nga ponisa vutomi bya hina.

² Bibele yi tirhisa mati ku kombisa malunghiselelo ya Yehovha ya moya yo nyika vutomi. (Yeremiya 2:13; Yohane 4:7-15) Malunghiselelo lawa ma katsa ku basisiwa ka vanhu va yena hi gandzelo ra nkutsulo ra Kreste ni vutivi bya Xikwembu lebyi kumekaka eRitweni ra xona. (Vaefesa 5:25-27) Exivonweni xa Ezekiyele xa tempele, nambu wa singita lowu khulukaka wu huma etempeleni wu fanekisela mikateko yo tano leyi nyikaka vutomi. Kambe, xana nambu wolowo wu khuluka rini, naswona xana leswi swi vula yini eka hina namuntlha?

Nambu Wu Khuluka eTikweni Leri Pfuxetiweke

3. I yini leswi Ezekiyele a swi voneke, hilaha swi vikiwaka ha kona eka Ezekiyele 47:2-12?

³ Tanihi vabohiwa eBabilona, vanhu va ka va Ezekiyele a va lava malunghiselelo ya Yehovha hakunene. Kutani ke, Ezekiyele u fanele a tsakile swinene loko a vona mati ma pfelela ma huma exikwetsimisisweni kutani ma khuluka ma huma etempeleni ya le xivonweni! Ntsumi yi pima nambu hi swiphemu swa swisungunu swa 1 000. Vuenti bya wona byi engeteleka ku sukela emahlakaleni, byi ya fika ematsolweni, byi enta ku ya fika enyongeni, ku fikela laha munhu a bohekaka ku hlambela. Nambu lowu wu tisa vutomi ni ntswalo. (Ezekiyele 47:2-11) Ezekiyele u byeriwa leswi: “[E]ribuweni ra šinambyana, e nṭungeni wa haleno, ne nṭungeni wa hase, ku ta mila miri hikwayo ya mihanḍu.” (Ezekiyele 47:12a) Loko nambu wu nghena eLwandle leri Feke—nhlengeleto wa mati lama nga riki na vutomi—ku va ni vutomi eka wona! Tinhlampfi ta andza. Ntirho wo phasa tinhlampfi wa humelela.

4, 5. Xana vuprofeta bya Yuwele lebyi vulavulaka hi nambu byi fana ni lebyiya bya Ezekiyele hi ndlela yihi, naswona ha yini leswi swi ri swa nkoka?

⁴ Vuprofeta lebyi byo saseka, swi nga ha endleka byi tsundzuxe vabohiwa lava nga Vayuda hi vuprofeta byin’wana lebyi tsariweke eka malembe-xidzana mambirhi lama hundzeke: “Endlwini ya Yehovha ku ta va ni xihlovo, xi fanele xi cheleta nkova wa Mirhi ya Mimunga.”a (Yuwele 3:18, NW) Vuprofeta bya Yuwele, ku fana ni bya Ezekiyele, byi vhumbha leswaku ku ta khuluka nambu wu huma endlwini ya Xikwembu, ku nga tempele, naswona wu tisa vutomi endhawini leyi nga kwandzasi.

⁵ Xihondzo xo Rindza i khale xi vula leswaku vuprofeta bya Yuwele byi karhi bya hetiseka enkarhini wa hina.b Kutani ke, handle ko kanakana leswi swi tano hi xivono xa Ezekiyele lexi fanaka na xona. Etikweni ra vanhu va Xikwembu, leri pfuxetiweke namuntlha, ku fana ni le Israyele wa khale, mikateko ya Yehovha yi karhi yi khulukela kona hakunene.

Mikateko Leyi Khulukaka Hi Xitalo

6. Xana ku xuviwa ka ngati ealitarini ya le xivonweni ku fanele ku va tsundzuxe yini Vayuda?

⁶ Xana mikateko leyi kumiwaka hi vanhu va Xikwembu lava kondleteriweke, yi huma kwihi? Xiya leswaku mati ma khuluka ma huma etempeleni ya Xikwembu. Hilaha ku fanaka namuntlha, mikateko yi huma eka Yehovha hi ku tirhisa tempele ya yena leyikulu ya moya—malunghiselo ya vugandzeri bya ntiyiso. Xivono xa Ezekiyele xi engetela vuxokoxoko byin’wana bya nkoka. Exivaveni xa le ndzeni, nambu lowu wu khuluka wu hundza hi le alitarini, hi le dzongeni ka yona. (Ezekiyele 47:1) Alitari yi le xikarhi ka tempele ya le xivonweni. Yehovha u yi hlamusela hi vukheta eka Ezekiyele naswona u n’wi lerisa leswaku ngati ya switlhavelo yi xuviwa ehenhla ka yona. (Ezekiyele 43:13-18, 20) Alitari leyi a yi vula leswikulu eka Vaisrayele hinkwavo. Ntwanano wa vona na Yehovha wu tiyisiwe khale loko Muxe a xuve alitari hi ngati, ehansi ka Ntshava ya Sinayi. (Eksoda 24:4-8) Ku xuva alitari ya le xivonweni hi ngati ku fanele ku va tsundzuxe leswaku loko se va tlhelele etikweni ra vona leri pfuxetiweke, mikateko ya Yehovha yi ta hambeta yi khuluka ntsena loko va hanya hi ku ya hi ntwanano lowu va wu endleke na yena.—Deteronoma 28:1-14.

7. Xana alitari yo fanekisela yi vula yini eka Vakreste namuntlha?

⁷ Hilaha ku fanaka, vanhu va Xikwembu namuntlha va katekisiwa hikwalaho ka ntwanano—ntwanano wo antswa, lowuntshwa. (Yeremiya 31:31-34) Na wona i khale wu tiyisiwile hi ngati ya Yesu Kreste. (Vaheveru 9:15-20) Namuntlha, hambi hi van’wana va vatotiwa, lava nga ni xiphemu eka ntwanano lowu, kumbe hi va “tinyimpfu tin’wana,” lava va vuyeriwaka eka wona, alitari leyi yo fanekisela yi vula leswikulu eka hina. Yi fanekisela ku rhandza ka Xikwembu malunghana ni gandzelo ra Kreste. (Yohane 10:16; Vaheveru 10:10) Tanihi leswi alitari yo fanekisela yi nga le xikarhi ka tempele ya moya, gandzelo ra nkutsulo ra Kreste i ra nkoka evugandzerini byo tenga. I xisekelo xa ku rivaleriwa ka swidyoho swa hina ni xa ntshembo wihi na wihi wa nkarhi lowu taka. (1 Yohane 2:2) Xisweswo hi lwela ku hanya hi nawu lowu fambisanaka ni ntwanano lowuntshwa, “nawu wa Kreste.” (Vagalatiya 6:2) Loko ntsena hi endla sweswo, hi ta vuyeriwa eka malunghiselelo ya Yehovha yo nyika vutomi.

8. (a) I yini lexi a xi pfumaleka exivaveni xa le ndzeni xa tempele ya le xivonweni? (b) Xana vaprista va le tempeleni ya le xivonweni a va ta tibasisa ha yini?

⁸ Vuyelo byin’wana i ku va ni xiyimo lexi baseke emahlweni ka Yehovha. Etempeleni ya le xivonweni, xivava xa le ndzeni xi pfumala nchumu wun’wana lowu a wu ri wa nkoka exivaveni xa tabernakela ni le tempeleni ya Solomoni—xihlambelo lexikulu, lexi endzhaku xi vitaniweke lwandle, leswaku vaprista va ta hlamba eka xona. (Eksoda 30:18-21; 2 Tikronika 4:2-6) Xana vaprista va le tempeleni ya le xivonweni xa Ezekiyele a va ta tibasisa ha yini? Phela, ku ni nambu lowuya wa singita lowu khulukaka hi le xivaveni xa le ndzeni! Ina, Yehovha a a ta va katekisa hi ndlela yo tshama va basile naswona va ri lava kwetsimaka.

9. Xana lava va vatotiwa ni lava va ntshungu lowukulu va nga va ni xiyimo lexi baseke hi ndlela yihi namuntlha?

⁹ Hilaha ku fanaka namuntlha, vatotiwa va katekisiwe hi xiyimo lexi baseke emahlweni ka Yehovha. Yehovha u va teka va ri lava kwetsimaka, a va vula lava lulameke. (Varhoma 5:1, 2) Ku vuriwa yini hi “ntshungu lowukulu,” lowu yimeriwaka hi tinyimba leti nga riki ta ndyangu wa vuprista? Va gandzela exivaveni xa le handle, naswona nambu lowu fanaka wu hundza eka xiphemu xexo xa tempele ya le xivonweni. Kutani ke, swa fanela leswi muapostola Yohane a voneke ntshungu lowukulu wu ambale tinguvu to basa loko wu ri karhi wu gandzela exivaveni xa tempele ya moya! (Nhlavutelo 7:9-14) Ku nga khathariseki leswaku va khomiwa hi ndlela yihi eka misava leyi yi onhakeke, va tiyiseka leswaku loko vo hambeta va kombisa ripfumelo egandzelweni ra nkutsulo ra Kreste, Yehovha u va vula lava baseke naswona va ri lava tengeke. Xana va ri kombisa njhani ripfumelo? Hi ku famba eminkondzweni ya Yesu, va va ni ntshembo lowu heleleke eka gandzelo ra nkutsulo.—1 Petro 2:21.

10, 11. Hi xihi xivumbeko xin’wana xa nkoka xa mati yo fanekisela, naswona leswi swi fambisana njhani ni ku anama lokukulu ka nambu?

¹⁰ Hilaha ana se swi vuriweke hakona, ku ni xivumbeko xin’wana xa nkoka xa mati lawa yo fanekisela—vutivi. Eka Israyele la pfuxetiweke, Yehovha u katekisa vanhu va yena hi swiletelo swa Matsalwa hi ku tirhisa vaprista. (Ezekiyele 44:23) Hi ndlela leyi fanaka, Yehovha u katekisa vanhu va yena namuntlha hi swiletelo swo tala malunghana ni Rito ra yena ra ntiyiso, hi ku tirhisa “vaprista va vuhosi.” (1 Petro 2:9) Vutivi malunghana na Yehovha Xikwembu, malunghana ni swikongomelo swa yena hi vanhu, naswona ngopfu-ngopfu malunghana na Yesu Kreste ni Mfumo wa Vumesiya, swi hambete swi khuluka hi xitalo eminkarhini leyi ya makumu. Mawaku ndlela leyi swiphyuphyisi leswi swa moya, leswi hi swi amukelaka, swi taleke ha yona!—Daniyele 12:4.

¹¹ Tanihi leswi nambu lowu ntsumi yi wu pimeke wu yeke wu enta, ni mikateko leyi nyikaka vutomi yo huma eka Yehovha yi ye yi andza swinene leswaku yi ta fikelela vanhu hinkwavo lava longolokaka va nghena etikweni ra hina leri katekeke hi tlhelo ra moya. Vuprofeta byin’wana bya ku kondletela byi vhumbhile byi ku: “Lo’nṭongo o ta v̌a khume ra madzana, lo’nṭongo ngopfu, o ta v̌a tiko le’ra matimba. Mina, Yehova, nḍi hatlisisa ŝilo leŝi e mikarini ya ŝona.” (Esaya 60:22) Marito lawa ma hetisekile—vanhu va timiliyoni va khitikane hi vunyingi, va ta hlanganyela na hina evugandzerini lebyi tengeke! Yehovha u endle leswaku “mati” yo tala, ma kumeka hi vunyingi eka vanhu hinkwavo lava taka eka yena. (Nhlavutelo 22:17) U endla leswaku nhlengeletano yakwe ya laha misaveni yi hangalasa Tibibele ni tibuku leti vulavulaka hi Bibele, hi madzana-dzana ya tindzimi emisaveni hinkwayo. Hi laha ku fanaka, minhlangano ya Vukreste swin’we ni mintsombano yi lunghiseleriwa emisaveni hinkwayo leswaku vanhu hinkwavo va ta kuma mati yo tenga ya ntiyiso. Xana malunghiselelo yo tano ma va khumba njhani vanhu?

Mati Ma Tisa Vutomi!

12. (a) Hikwalaho ka yini mirhi leyi nga exivonweni xa Ezekiyele yi tswala hi ndlela leyi yi tswalaka ha yona? (b) Emasikwini lawa ya makumu xana mirhi leyi yi vekaka mihandzu yi fanekisela yini?

¹² Nambu wa le xivonweni xa Ezekiyele wu tisa vutomi ni rihanyo. Loko Ezekiyele a twa hi ta mirhi leyi nga ta mila ematlhelweni ka nambu, u byeriwa leswi: “Matluka ya yona ma nga ka ma nga v̌uni, mihanḍu ya yona yi nga ka yi nga heri. . . . Mihanḍu ya yona ŝi ta v̌a ŝakudya, matluka ya yona wu ta v̌a muri.” Hikwalaho ka yini mirhi leyi yi tswala hi ndlela leyi yo hlamarisa? “Hikuv̌a mati ya nambu hi la’ma pfelelaka v̌ukwetsimelweni.” (Ezekiyele 47:12b) Mirhi leyi yo fanekisela yi yimela malunghiselelo hinkwawo ya Xikwembu ya ku endla leswaku vanhu va tlhela va va lava hetisekeke, exisekelweni xa gandzelo ra nkutsulo ra Yesu. Sweswi, laha misaveni, masalela lama totiweke ma rhangela eku lunghiseleleni ka swakudya swa moya leswi wundlaka ni ku hanyisa. Endzhaku ka loko lava va 144 000 hinkwavo se va yi kumile hakelo ya vona ya le tilweni, vuyelo lebyi tisiwaka hi ntirho wa vona wa vuprista tanihi leswi va fumaka swin’we na Kreste, byi ta hundzela ni le nkarhini lowu taka, eku heteleleni byi herisa hi ku helela rifu leri vangiweke hi Adamu.—Nhlavutelo 5:9, 10; 21:2-4.

13. Hi kwihi ku hanyisa loku hetisisiweke enkarhini wa hina?

¹³ Nambu wa le xivonweni wu khulukela eLwandle leri Feke leri nga hava swilo leswi hanyaka kutani wu hanyisa hinkwaswo leswi wu swi fikelelaka. Lwandle leri ri fanekisela ndhawu leyi feke hi tlhelo ra moya. Kambe vutomi bya nyuka ‘hinkwako laha ku fikaka nambu lowu wu ndlandlamukeke kambirhi.’ (Ezekiyele 47:9) Hi laha ku fanana, emasikwini lawa ya makumu, kwihi ni kwihi laha mati ya vutomi ma fikeke kona, vanhu a va ri karhi va hanyisiwa hi tlhelo ra moya. Vo sungula lava hanyisiweke hi ndlela leyi i masalela lama totiweke hi 1919. Va tlhele va hanya hi tlhelo ra moya, va suka exiyin’weni xo fana ni rifu, lexi eka xona a va nga tirhi nchumu. (Ezekiyele 37:1-14; Nhlavutelo 11:3, 7-12) Ku sukela enkarhini wolowo mati wolawo lama nga ni vutomi ma fikelele ni vanhu van’wana lava a va file hi tlhelo ra moya, kutani va hanya naswona va vumba ntshungu lowukulu wa tinyimpfu tin’wana lowu yaka emahlweni wu andza, lowu rhandzaka Yehovha naswona wu n’wi tirhelaka. Ku nga ri khale, lunghiselelo leri ri ta fikelela ni vunyingi bya lava nga ta pfuxiwa eku feni.

14. Xana ntirho wo phasa tinhlampfi lowu endliwaka etimbuweni ta Lwandle leri Feke, i yini lexi wu xi fanekiselaka kahle namuntlha?

¹⁴ Vuyelo bya ku hanya emoyeni i ku veka mihandzu. Leswi swi kombisiwa hi ntirho wo phasa tinhlampfi lowu a wu famba kahle etimbuweni ta lwandle leri khale a ri file. Yesu u byele valandzeri vakwe a ku: “Ndzi ta mi endla vaphasi va vanhu.” (Matewu 4:19) Emasikwini lawa ya makumu, ntirho wo phasa tinhlampfi wu sungule hi ku hlengeletiwa ka masalela ya vatotiwa, kambe a wu yimanga kwalaho. Mati lama hanyisaka lama humaka etempeleni ya moya ya Yehovha, ku katsa ni mikateko ya vutivi lebyi kongomeke, swi fikelela vanhu va matiko hinkwawo. Kwihi ni kwihi laha nambu wolowo wu fikeke kona, ku ve ni vutomi hi tlhelo ra moya.

15. I yini lexi kombisaka leswaku a hi hinkwavo lava nga ta amukela malunghiselelo ya Xikwembu yo nyika vutomi, naswona ku ta humelela yini hi vanhu vo tano?

¹⁵ Kunene, a hi vanhu hinkwavo lava amukelaka rungula ra vutomi sweswi; naswona a hi hinkwavo eka lava nga ta pfuxiwa eku feni, hi nkarhi wa ku Fuma ka Kreste ka Gidi ra Malembe, lava nga ta ri amukela. (Esaya 65:20; Nhlavutelo 21:8) Ntsumi yi vula leswaku swivandla swin’wana swa lwandle a swi hanyisiwi. Tindhawu leti ta nhlangasi leti nga riki na vutomi ti “hundzuka munyu.” (Ezekiyele 47:11, NW) Loko ku ri vanhu va siku ra hina, a hi hinkwavo va amukelaka mati lama hanyisaka ya Yehovha loko va nyikiwa wona. (Esaya 6:10) EArmagedoni, hinkwavo lava hlawuleke ku tshama exiyin’weni xa ku fa ni lexi vabyaka hi tlhelo ra moya, va ta hundzuka munyu, hileswaku, va ta loviseriwa makumu. (Nhlavutelo 19:11-21) Hambiswiritano, lava a va ri karhi va nwa mati lawa hi ku tshembeka, va nga langutela ku pona kutani va vona ku hetiseka ko hetelela ka vuprofeta lebyi.

Nambu Wu Khuluka eParadeyisini

16. Xana xivono xa tempele xa Ezekiyele xi ta hetiseka rini ro hetelela naswona hi ndlela yihi?

¹⁶ Ku fana ni vuprofeta byin’wana bya ku kondletela, xivono xa tempele xa Ezekiyele xi hetiseka ro hetelela hi nkarhi wa Mfumo wa Gidi ra Malembe. Kutani ntlawa wa vaprista wu ta va wu nga ha ri kona laha misaveni. “Va ta va vaprista va Xikwembu ni va Kreste, naswona va ta va tihosi swin’we na yena [etilweni] ku ringana malembe wolawo ya gidi.” (Nhlavutelo 20:6) Vaprista lava va le tilweni va ta va swin’we na Kreste eku endleni ka leswaku gandzelo ra nkutsulo ra Kreste ri tirha hi laha ku heleleke. Xisweswo, vanhu lava lulameke va ta ponisiwa, va tlhela va va lava hetisekeke!—Yohane 3:17.

17, 18. (a) Xana nambu lowu nyikaka vutomi wu hlamuseriwa njhani eka Nhlavutelo 22:1, 2, naswona hi wihi nkarhi lowu xivono xexo xi tirhaka ha wona? (b) EParadeyisini, hikwalaho ka yini nambu wa mati ya vutomi wu ta ndlandlamuka swinene?

¹⁷ Kahle-kahle, nambu lowu voniweke hi Ezekiyele hi nkarhi wolowo wu ta khuluka mati ya vutomi lama pfunaka swinene. Lowu i nkarhi lowu ha wona ku tirhaka vuprofeta lebyi tsariweke eka Nhlavutelo 22:1, 2 lebyi nge: “Yi ndzi komba nambu wa mati ya vutomi, lowu tengeke ku fana ni kristala, wu khuluka wu huma exiluvelweni xa Xikwembu ni xa Xinyimpfana wu ya ehansi exikarhi ka ndlela ya wona yo anama. Kutani haleno ka nambu ni hala ntsungeni ka wona a ku ri ni mirhi ya vutomi leyi humesaka mixaka ya mihandzu ya khume-mbirhi, leyi vekaka mihandzu ya yona n’hweti yin’wana ni yin’wana. Naswona matluka ya mirhi a ma ri ya ku hanyisa matiko.”

¹⁸ Hi nkarhi wa Mfumo wa Gidi ra Malembe, vuvabyi hinkwabyo—bya le mirini, bya le mianakanyweni ni le mintlhavekweni—byi ta tshunguriwa. Leswi swi fanekiseriwa kahle hi “ku hanyis[iwa k]a matiko” hi mirhi yo fanekisela. Hikwalaho ka malunghiselelo lama endliwaka hi Kreste ni lava 144 000, “a ku nga v̌i na munhu l’a akeke [kona] l’a nga ta ku: nḍa v̌abya.” (Esaya 33:24) Naswona nambu wu ta fika laha wu anamaka swinene. Wu ta anama ni ku enta leswaku wu pfuna timiliyoni kumbe magidi ya timiliyoni ta vanhu lava pfuxiweke eku feni, lava nga ta nwa mati lawa ya vutomi lama tengeke. Nambu lowu wa le xivonweni wu hanyise Lwandle leri Feke, wu tisa vutomi kwihi ni kwihi laha mati ya wona ma khulukeleke kona. Kutani, eParadeyisini, vavanuna ni vavasati va ta hanya hi ku hetiseka, va hanyisiwa eka rifu leri va ri kumeke eka Adamu, loko va kombisa ripfumelo eka vuyelo bya nkutsulo lowu va nyikiweke wona. Nhlavutelo 20:12 yi vhumbha leswaku “tibuku-nsongwa” ti ta pfuriwa emasikwini wolawo, ti nyikela nhlamuselo leyi engetelekeke leyi twalaka, leyi ni vafi lava pfuxiweke va nga ta pfuniwa ha tona. Lexi vavisaka, van’wana va ta ala ku hanyisiwa, hambi ku ri eParadeyisini. Vaxandzuki lava hi vona lava ‘hundzukaka munyu’ wa ku loviseriwa makumu.—Nhlavutelo 20:15.

19. (a) Xana ku aviwa ka tiko ku ta hetiseka njhani eParadeyisini? (b) EParadeyisini, xana muti wu fanekisela yini? (c) Xana ku va ka muti ekule ni tempele, ku kombisa yini?

¹⁹ Nakambe, hi nkarhi wolowo, ku aviwa ka tiko ra le xivonweni xa Ezekiyele, ku ta hetiseka ro hetelela. Ezekiyele u vone tiko leri aviweke kahle; hi laha ku fanaka, Mukreste un’wana ni un’wana la tshembekaka a nga tiyiseka leswaku u ta va ni ndhawu, ku nga ndzhaka ya yena, eParadeyisini. Handle ko kanakana, ku navela ku va ni yindlu ya wena yo tshama eka yona ni ku yi khathalela, ku ta hetisisiwa hi ndlela leyi hlelekeke. (Esaya 65:21; 1 Vakorinto 14:33) Muti lowu Ezekiyele a wu voneke wu ri fanekisela kahle lunghiselelo ro lawula leri Yehovha a nga ta ri tirhisa emisaveni leyintshwa. Ntlawa wa vaprista lava totiweke wu ta va wu nga ha ri na vanhu hi nyama emisaveni. Xivono xi ringanyeta sweswo hi ku kombisa muti wu ri etikweni leri nga “kwetsimiki” ekule ni tempele. (Ezekiyele 48:15) Loko lava 144 000 va fuma na Kreste etilweni, Hosi yi ta va yi ri ni vayimeri laha misaveni. Malandza ya yona lama nga vanhu ma ta vuyeriwa swinene eka vukongomisi bya rirhandzu bya ntlawa wa tindhuna. Hambiswiritano, ntsindza wa xiviri wa hulumendhe wu ta va wu ri etilweni ku nga ri emisaveni. Un’wana ni un’wana emisaveni, ku katsa ni ntlawa wa tindhuna, va ta va ehansi ka Mfumo wa Vumesiya.—Daniyele 2:44; 7:14, 18, 22.

20, 21. (a) Hikwalaho ka yini vito ra muti ri faneleka? (b) Xana ku twisisa ka hina xivono xa Ezekiyele ku fanele ku hi endla hi tivutisa swivutiso swihi?

²⁰ Xiya marito yo hetelela ya vuprofeta bya Ezekiyele: “Ku suka siku rolero, e v̌ito ra muti v̌a ta ku: Yehova o kona la.” (Ezekiyele 48:35) Xikongomelo xa muti lowu a hi ku nyika vanhu matimba kumbe nkucetelo; naswona a wu akeriwanga ku hetisisa ku rhandza ka munhu wo karhi. I muti wa Yehovha, wu ta hambeta wu hetisisa mianakanyo ni tindlela ta yena ta rirhandzu ni leti twisisekaka. (Yakobo 3:17) Leswi swa hi tiyisekisa swinene leswaku Yehovha u ta ri katekisa vandla ra yena ra vanhu leri hleriweke hi vuntshwa ri va “misava leyintshwa,” hilaha ku nga heriki.—2 Petro 3:13.

²¹ Xana a hi nyanyuki loko hi anakanya hi swilo leswi leswi taka? Hi laha ku faneleke ke, un’wana ni un’wana wa hina u fanele a tivutisa: ‘Xana ndzi titwa njhani hi mikateko yo hlamarisa leyi paluxiweke hi xivono xa Ezekiyele? Xana ndzi wu seketela hi ku tshembeka ntirho lowu endliwaka hi valanguteri va rirhandzu, ku katsa ni lava va masalela lama totiweke ni lava nga ta va swirho swa ntlawa wa tindhuna? Xana vugandzeri byo tenga ndzi byi endla byi va xikongomelo xa mina evuton’wini? Xana ndza pfuneka hilaha ku heleleke hi mati ya vutomi lama khulukaka hi xitalo namuntlha?’ Onge un’wana ni un’wana wa hina a nga hambeta a endla tano naswona hi tsakela malunghiselelo ya Yehovha hilaha ku nga heriki!

[Tinhlamuselo ta le hansi]

U Nga Hlamurisa Ku Yini?

◻ Xana mati lama khulukaka ma huma etempeleni ma fanekisela yini?

◻ Hi kwihi ku hanyisa loku Yehovha a ku endleke hi ku tirhisa nambu wo fanekisela, naswona ha yini nambu wu ye wu kula?

◻ Xana mirhi leyi nga etimbuweni ta nambu yi fanekisela yini?

◻ Xana muti wu ta fanekisela yini hi nkarhi wa ku Fuma ka Gidi ra Malembe, naswona ha yini vito ra muti ri faneleka?

[Swifaniso leswi nga eka tluka 23]

Nambu wa vutomi wu fanekisela lunghiselelo ra Xikwembu ro ponisa