Hambeta U Nyikela Nyingiso Eku Dyondziseni Ka Wena

“Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava ku yingisaka.”—1 TIMOTIYA 4:16.

1, 2. Hikwalaho ka yini ku laveka vadyondzisi lava hisekaka hi xihatla namuntlha?

“FAMBANI mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Hi ku ya hi xileriso lexi xa Yesu Kreste, Vakreste hinkwavo va fanele va tikarhatela ku va vadyondzisi. Ku laveka vadyondzisi lava hisekaka, leswaku va ta pfuna vanhu va timbilu letinene leswaku va tiva Xikwembu nkarhi wu nga si hela. (Varhoma 13:11) Muapostola Pawulo u khutazile a ku: “Chumayela rito, u va eka rona hi xihatla hi nguva leyinene, hi nguva ya ku karhateka.” (2 Timotiya 4:2) Leswi swi vula ku dyondzisa endzeni ni le handle ka vandlha. Ina, ntirho wo chumayela hi woxe a wu vuli ku twarisa rungula ra Xikwembu ntsena. Leswaku vanhu lava tsakelaka va va vadyondzisiwa, va fanele va dyondzisiwa hi ndlela leyi humelelaka.

² Hi hanya ‘eminkarhini ya mangava leyi swi nonon’hwaka ku langutana na yona.’ (2 Timotiya 3:1) Vanhu va onhiwe mianakanyo hi tifilosofi ni tidyondzo ta mavunwa. Vo tala va le ‘munyameni emianakanyweni’ naswona va ‘heleriwe hi ntlhaveko hinkwawo wa ku tikhoma lokunene.’ (Vaefesa 4:18, 19) Van’wana va ni timbanga leti vavaka emintlhavekweni. Ina, vanhu va “vavisiwile ni ku tsalangana ku fana ni tinyimpfu leti nga riki na murisi.” (Matewu 9:36) Hambiswiritano, hi ku tirhisa vutshila byo dyondzisa, hi nga swi kota ku pfuna vanhu va timbilu letinene leswaku va endla mindzulamiso leyi lavekaka.

Vadyondzisi eVandlheni

3. (a) Xana xileriso xa Yesu xa ku dyondzisa xi katsa yini? (b) I vamani lava nga ni vutihlamuleri lebyikulu byo dyondzisa evandlheni?

³ Hi ku tirhisa lunghiselelo ra dyondzo ya Bibele ya le kaya, timiliyoni ta vanhu ti kuma ndzetelo lowu kongomeke. Kambe, loko se va khuvuriwile, lavantshwa va lava mpfuno wun’wana leswaku va “dzima timitsu ni ku simekiwa emasungulweni.” (Vaefesa 3:17) Loko hi ri karhi hi hetisisa xileriso xa Yesu lexi tsariweke eka Matewu 28:19, 20, kutani hi kongomisa vanhu lavantshwa enhlengeletanweni ya Yehovha, va pfuneka hi ku dyondzisiwa evandlheni. Hi ku ya hi Vaefesa 4:11-13, vavanuna va vekiwe leswaku va “va varisi ni vadyondzisi, hi xikongomelo xa ku ololoxa vakwetsimi, hikwalaho ka ntirho wa vutirheli, leswaku va aka miri wa Kreste.” Minkarhi yin’wana, vutshila bya vona byo dyondzisa byi katsa ku ‘tshinya, ku holovela, ku khongotela, hi mbilu yo leha.’ (2 Timotiya 4:2) Ntirho wa vadyondzisi a wu ri wa nkoka swinene lerova loko a tsalela Vakorinto, Pawulo u vulavule hi vadyondzisi endzhakunyana ka ku boxa vaapostola ni vaprofeta.—1 Vakorinto 12:28.

4. Xana vuswikoti byo dyondzisa byi hi pfuna njhani leswaku hi yingisa xikhutazo xa Pawulo lexi tsariweke eka Vaheveru 10:24, 25?

⁴ Ina, a hi Vakreste hinkwavo lava tirhaka tanihi vakulu, kumbe valanguteri. Hambiswiritano, hinkwerhu hi tsundzuxiwa leswaku hi khutazana “erirhandzwini ni le mintirhweni leyinene.” (Vaheveru 10:24, 25) Ku endla tano emihlanganweni swi katsa tinhlamulo leti lunghiseleriweke kahle, leti humaka embilwini, leti ti nga akaka ni ku khutaza van’wana. Vahuweleri va Mfumo lava nga ni ntokoto va nga ha ‘khutaza emintirhweni leyinene’ hi ku avela lavantshwa vutivi ni ntokoto wa vona loko va tirha na vona ensin’wini. Hi minkarhi yo tano kumbe hi xitshuketa, ndzetelo wa nkoka wu nga nyikeriwa. Hi xikombiso, vavasati lava wupfeke va khutaziwa leswaku va va “vadyondzisi va leswi nga swinene.”—Tito 2:3.

Va Endliwe Va Pfumela

5, 6. (a) Xana Vukreste bya ntiyiso byi hambana njhani ni vugandzeri bya mavunwa? (b) Xana vakulu va va pfuna njhani lavantshwa leswaku va endla swiboho leswinene?

⁵ Xisweswo, Vukreste bya ntiyiso byi hambana swinene ni vukhongeri bya mavunwa, lebyi vunyingi bya byona byi ringetaka ku lawula mianakanyo ya swirho swa byona. Loko Yesu a ri laha misaveni, varhangeri va vukhongeri a va ringeta ku lawula vutomi hinkwabyo bya vanhu hi ku tirhisa mikhuva leyi tshikilelaka, leyi vekiweke hi vanhu. (Luka 11:46) Vafundhisi va Vujagana hakanyingi va endle tano.

⁶ Kambe, vugandzeri bya ntiyiso, i “ntirho wo kwetsima” lowu hi wu endlaka hi “matimba ya [h]ina ya ku anakanya.” (Varhoma 12:1) Malandza ya Yehovha ma ‘endliwa ma pfumela.’ (2 Timotiya 3:14) Minkarhi yin’wana, lava va rhangelaka va nga ha boheka ku veka swikongomisi ni maendlelo ya swilo leswaku vandlha ri ta tirha kahle. Kambe, ematshan’weni yo lwela ku endlela Vakreste-kulobye swiboho, vakulu va va dyondzisa ku “hambanisa leswi lulameke ni leswi hoxeke.” (Vaheveru 5:14) Leswi ngopfu-ngopfu vakulu va swi endla hi ku wundla vandlha hi “marito ya ripfumelo ni ya dyondzo leyinene.”—1 Timotiya 4:6.

Ku Nyikela Nyingiso Eku Dyondziseni Ka Wena

7, 8. (a) Xana vanhu lava nga ni vuswikoti byitsongo va swi kotisa ku yini ku va vadyondzisi? (b) I yini lexi kombisaka leswaku munhu u fanele a tiyimisela hi yexe leswaku a ta va mudyondzisi la humelelaka?

⁷ Kambe, a hi tlheleleni eka xileriso lexi hi nyikiweke xona xo dyondzisa. Xana swi lava vutshila, dyondzo kumbe vuswikoti byo karhi leswaku munhu a nghenela ntirho lowu? A swi bohi. Hi xitalo, ntirho lowu wo dyondzisa wa misava hinkwayo wu endliwa hi vanhu lava tolovelekeke lava nga riki na vuswikoti byo hlawuleka. (1 Vakorinto 1:26-29) Pawulo wa hlamusela: “Hi ni xuma lexi [vutirheli] eswibyeni swa vumba [mimiri leyi nga hetisekangiki], leswaku matimba lama tlulaka lama tolovelekeke ma va ya Xikwembu, ku nga vi ya hina.” (2 Vakorinto 4:7) Ku humelela lokukulu loku veke kona, entirhweni wo chumayela hi Mfumo emisaveni hinkwayo, i vumbhoni bya leswaku moya wa Yehovha wu ni matimba!

⁸ Hambiswiritano, swi lava matshalatshala lamakulu leswaku munhu a va “mutirhi la nga riki na nchumu wo khomiwa hi tingana ha wona, [a] ri tamela khwatsi rito ra ntiyiso.” (2 Timotiya 2:15) Pawulo u khutaze Timotiya a ku: “Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava ku yingisaka.” (1 Timotiya 4:16) Xana munhu u wu nyikerisa ku yini nyingiso eku dyondziseni ka yena, endzeni ni le handle ka vandlha? Xana ku endla leswi swi lava leswaku munhu a dyondza vutshila kumbe tindlela to karhi to dyondzisa?

9. I yini lexi nga xa nkoka swinene ku tlula vuswikoti bya ntumbuluko?

⁹ Handle ko kanakana Yesu u kombise tindlela leti hlamarisaka ta ku dyondzisa eka Dyondzo ya yena leyi dumeke ya le Ntshaveni. Loko a heta ku vulavula, “mintshungu yi hlamarisiwa hi ndlela yakwe yo dyondzisa.” (Matewu 7:28) Ina, a nga kona eka hina la nga dyondzisaka ku fana na Yesu. Hambiswiritano, a swi bohi leswaku hi va swivulavuri swa xiyimo xa le henhla loko hi ta va vadyondzisi lava humelelaka. Phela, hi ku ya hi Yobo 12:7, hambi ku ri ‘swifuwo’ ni ‘swivumbiwa leswi nga ni timpiko’ swi nga dyondzisa, hambi swi miyerile! Hambiloko hi nga ha va hi ri ni vuswikoti kumbe vutshila byo karhi, xa nkoka swinene i ‘muxaka wa vanhu’ lava hi nga vona—timfanelo leti hi nga na tona ni mikhuva ya moya leyi hi yi hlakuleleke, leyi swichudeni swi nga yi tekelelaka.—2 Petro 3:11; Luka 6:40.

Swichudeni Swa Rito Ra Xikwembu

10. Xana Yesu u xi veke njhani xikombiso lexinene tanihi xichudeni xa Rito ra Xikwembu?

¹⁰ Mudyondzisi la humelelaka wa mintiyiso ya Matsalwa, u fanele a va xichudeni xa Rito ra Xikwembu. (Varhoma 2:21) Yesu Kreste u veke xikombiso lexi xiyekaka emhakeni leyi. Loko a ha endla vutirheli byakwe, Yesu u kombetele ni ku vulavula marito lama fambisanaka ni lama kumekaka eka tibuku ta kwalomu ka hafu ya Matsalwa ya Xiheveru.a Ku tiva ka yena Rito ra Xikwembu ku vonake kahle loko a ri ni malembe ya 12, loko a kumiwa “a tshame exikarhi ka vadyondzisi, a va yingisela ni ku va vutisa.” (Luka 2:46) Loko se a kurile, Yesu u swi endle mukhuva ku ya esinagogeni, laha Rito ra Xikwembu a ri hlayiwa kona.—Luka 4:16.

11. Hi yihi mikhuva leyinene ya ku dyondza leyi mudyondzisi a faneleke a yi hlakulela?

¹¹ Xana u muhlayi la hisekaka wa Rito ra Xikwembu? Loko u ri hlayisisa u ta swi kota ku “twisisa ku tšhav̌a ka Yehova, u ta kuma ku tiv̌a ka Šikwembu.” (Swivuriso 2:4, 5 ) Kutani ke, hlakulela mukhuva lowunene wo dyondza. Ringeta ku hlaya xiphemu xo karhi xa Rito ra Xikwembu siku ni siku. (Pisalema 1:2) Swi endle mukhuva ku hlaya nkandziyiso wun’wana ni wun’wana wa Xihondzo xo Rindza ni Xalamuka! loko wu fika. Nyikela nyingiso swinene emihlanganweni ya vandlha. Titolovete ku endla ndzavisiso hi vukheta. Hi ku dyondza ku ‘lavisisa swilo hinkwaswo hi ku pakanisa,’ u ta papalata ku hundzeleta swilo kumbe ku ba etlhelo loko u dyondzisa.—Luka 1:3.

Rhandza Ni Ku Xixima Lava Dyondzisiwaka

12. Xana Yesu a a va languta njhani vadyondzisiwa va yena?

¹² Mfanelo yin’wana ya nkoka i ku va ni langutelo lerinene hi lava hi va dyondzisaka. Vafarisi a va nyenya vanhu lava yingisaka Yesu. Va vulavule va ku: “Ntshungu lowu wu nga wu tiviki Nawu i vanhu lava rhukaniweke.” (Yohane 7:49) Kambe Yesu a a va rhandza a tlhela a va xixima vadyondzisiwa vakwe. U te: “A ndza ha mi vitani mahlonga, hikuva hlonga a ri swi tivi leswi n’wini wa rona a swi endlaka. Kambe ndzi mi vitane vanakulorhi, hikuva swilo hinkwaswo leswi ndzi swi tweke eka Tatana ndzi mi tivise swona.” (Yohane 15:15) Leswi swi kombisa ndlela leyi vadyondzisiwa va Yesu va faneleke va wu endla ha yona ntirho wo dyondzisa.

13. Xana Pawulo a a titwisa ku yini hi lava a va dyondzisaka?

¹³ Hi xikombiso, Pawulo a a nga ri na wona moya wo pfumala xinghana kumbe wa ku honisa swichudeni swakwe. U byele Vakorinto a ku: “Hikuva hambiloko mo va ni vakongomisi va khume ra magidi eka Kreste, entiyisweni a mi na vatatana vo tala; hikuva ndzi ve tata wa n’wina eka Kreste Yesu hikwalaho ka mahungu lamanene.” (1 Vakorinto 4:15) Minkarhi yin’wana, Pawulo u ririle loko a ri karhi a tsundzuxa lava a va dyondzisaka! (Mintirho 20:31) Nakambe u lehise mbilu ni ku kombisa musa hi ndlela leyi hlamarisaka. Hikwalaho u swi kotile ku byela Vatesalonika a ku: “Hi ve ni ku olova eka n’wina, hi ndlela leyi manana la wundlaka a khathalelaka vana vakwe ha yona.”–1 Vatesalonika 2:7.

14. Hikwalaho ka yini ku rhandza xichudeni xa hina xa Bibele ku ri ka nkoka? Kombisa.

¹⁴ Xana wa n’wi tekelela Yesu na Pawulo? Ku rhandza ka hina swichudeni hi mbilu hinkwayo, ku nga endla leswaku ku pfumala vuswikoti byo karhi bya ntumbuluko ku nga vonaki loko hi ri na kona. Xana swichudeni swa hina swa Bibele swa swi vona leswaku ha swi rhandza hakunene? Xana ha tinyika nkarhi wa ku swi tiva? Loko wansati un’wana wa Mukreste a nonon’hweriwa ku pfuna xichudeni xakwe leswaku xi endla nhluvuko emoyeni, hi musa u vutisile a ku: “Xana ku na leswi swi ku karhataka?” Xichudeni lexi xi sungule ku phofula leswi nga embilwini ya xona, xi boxa swivilelo swo tala ni ku karhateka loku xi nga na kona. Mbulavurisano lowu lowunene wu endle leswaku xichudeni lexi xi teka goza. Etimhakeni to tano swa fanela ku nyikela mianakanyo ya Matsalwa ni marito yo chavelela swin’we ni xikhutazo. (Varhoma 15:4) Kambe, xiyani: Swi nga ha endleka xichudeni xa Bibele xi endla nhluvuko hi xihatla, kambe xa ha ri ni tindlela ta misava leti xi faneleke xi lwisana na tona. Kutani swi nga ha va swinene ku ka hi nga tolovelani swinene ni munhu wo tano. Ku fanele ku vekiwa mindzilakana leyi faneleke ya Vukreste.—1 Vakorinto 15:33.

15. Xana hi nga xixima xichudeni xa hina xa Bibele hi ndlela yihi?

¹⁵ Ku xixima swichudeni swa hina swi katsa leswaku hi nga ringeti ku lawula vutomi bya swona. (1 Vatesalonika 4:11) Hi xikombiso, hi nga ha va hi hlaya ni wansati la tshamaka ni wanuna kambe va nga tekananga hi nawu. Swi nga ha endleka va ni vana swin’we. Loko se a kume vutivi lebyi kongomeke bya Xikwembu, wansati a nga ha lava ku lulamisa timhaka na Yehovha. (Vaheveru 13:4) Xana u fanele a tekana ni wanuna loyi kumbe u fanele a hambana na yena? Kumbexana hi nga ha vona onge loko o tekana ni wanuna loyi, loyi a nga swi tsakeriki swilo swa moya, nhluvuko wa yena wu nga kavanyeteka enkarhini lowu taka. Hi hala tlhelo, hi nga ha vona onge vana va ta hlupheka kutani swa antswa a tekana na yena. Ku nga khathariseki leswaku timhaka ti yimise ku yini, hi ta va hi nga kombisi xichavo ni rirhandzu ku nghenelela timhaka ta xichudeni kutani hi ringeta ku xi byela leswi hina hi anakanyaka swona etimhakeni to fana ni leti. Phela, hi yena a nga ta langutana ni vuyelo bya xiboho lexi a xi endlaka. Xana a swi nge vi swinene ku letela xichudeni leswaku xi tirhisa ‘matimba ya xona ya ku twisisa’ kutani xi tiendlela xiboho malunghana ni leswi xi nga ta swi endla?—Vaheveru 5:14.

16. Xana vakulu va nga kombisa ntlhambi wa Xikwembu rirhandzu ni xichavo hi ndlela yihi?

¹⁶ I swa nkoka swinene leswaku vakulu va vandlha va khoma ntlhambi hi rirhandzu ni hi xichavo. Loko a tsalela Filemoni, Pawulo u te: “Hambileswi ndzi nga ni mavulavulelo yo ntshunxeka lamakulu mayelana na Kreste yo ku lerisa leswaku u endla leswi faneleke, kambe ku ri na sweswo ndzi ku khongotela exisekelweni xa rirhandzu.” (Filemoni 8, 9) Minkarhi yin’wana, ku nga ha va ni swiyimo leswi hetaka matimba evandlheni. Swin’wana swi nga ha lava leswaku ku tiyisiwa voko. Pawulo u khutaze Tito leswaku a “hambeta [a] tshinya [vadyohi] hi rilondzo, leswaku va hanya eripfumelweni.” (Tito 1:13) Hambiloko swi ri tano, valanguteri va fanele va tivonela leswaku va nga holoveli vandlha. Pawulo u tsarile a ku: “Hlonga ra Hosi a ri fanelanga ri lwa, kambe ri fanele ri olova eka hinkwavo, ri fanelekela ku dyondzisa, ri tikhoma eka leswo biha.”—2 Timotiya 2:24; Pisalema 141:3.

17. Hi xihi xihoxo lexi Muxe a xi endleke, naswona vakulu va nga dyondza yini eka xona?

¹⁷ Valanguteri va fanele va hamba va titsundzuxa leswaku va tirhisana ni “ntlhambi wa Xikwembu.” (1 Petro 5:2) Muxe, hambileswi a a ri munhu wa ku titsongahata, u tshame a hambukanyana. Vaisrayele “v̌a karihisile moya wa yena, na yena a v̌ulav̌ula hi nomu hi ku hatlisa.” (Pisalema 106:33) Xikwembu xi hlundzukile swinene hikwalaho ka ku holoveriwa ka ntlhambi wa xona, hambileswi ntlhambi a wu ri ni xihoxo. (Tinhlayo 20:2-12) Loko vakulu va langutane ni ntlhontlho lowu fanaka namuntlha, va fanele va lwela ku dyondzisa ni ku letela hi vutlhari ni hi musa. Vamakwerhu va angula kahle loko va anakanyeriwa ni ku khomiwa tanihi vanhu lava lavaka mpfuno, ku nga ri tanihi vanhu lava nga ta ka va nga ha lunghi. Vakulu va fanele va va ni langutelo lerinene leri Pawulo a a ri na rona loko a te: “Hi ni ku tiyiseka eHosini malunghana na n’wina, leswaku ma swi endla swilo leswi hi swi lerisaka ni leswaku mi ta ya emahlweni mi swi endla.”—2 Vatesalonika 3:4.

Ku Pfumelelana Ni Swilaveko Swa Vona

18, 19. (a) Xana hi nga pfumelelana njhani ni swilaveko swa swichudeni swa Bibele leswi nga ni vuswikoti lebyitsongo? (b) Xana hi nga swi pfuna njhani swichudeni leswi karhatiwaka hi timhaka to karhi?

¹⁸ Mudyondzisi lonene wa tiyimisela ku pfumelelana ni vuswikoti ni ku tsana ka swichudeni swakwe. (Ringanisa Yohane 16:12.) Eka xifaniso xa Yesu xa titalenta, n’wini u nyike ‘un’wana ni un’wana malunghelo hi ku ya hi vuswikoti bya yena.’ (Matewu 25:15) Hi fanele hi landzelela ntila lowu fanaka loko hi fambisa tidyondzo ta Bibele. Hi ntumbuluko, i nchumu lowu navelekaka ku heta buku leyi sekeriweke eBibeleni hi nkarhi wo koma. Kambe, swi fanele swi tsundzukiwa leswaku vanhu a va na vuswikoti lebyi fanaka byo hlaya kumbe byo khoma mianakanyo leyintshwa hi ku hatlisa. Hikwalaho, ku laveka leswaku munhu a tirhisa vutlhari leswaku a kota ku vona leswaku hi rini laha a nga sukaka eka yinhla yin’wana a ya eka yin’wana hi nkarhi wa dyondzo, loko vanhu lava tsakelaka swi va tikela ku dyondza hi ku hatlisa. Ku ri ni ku heta dyondzo hi rivilo ro karhi, xa nkoka swinene i ku pfuna swichudeni leswaku swi twisisa leswi swi dyondziwaka.—Matewu 13:51.

¹⁹ Leswi swi tano ni hi swichudeni swa Bibele leswi swi karhatiwaka hi timhaka to tanihi Vunharhu-un’we ni tiholideyi ta vukhongeri. Hambileswi hi ntolovelo swi nga bohiki leswaku hi nghenisa ndzavisiso lowu sekeriweke eBibeleni eka swidyondzo swa hina, leswi hi nga swi endla minkarhi yin’wana loko swi ta pfuna. Ku ringanisela ka laveka leswaku hi nga nonokisi nhluvuko wa xichudeni swi nga fanelanga.

Hiseka!

20. Xana Pawulo u xi veke njhani xikombiso emhakeni yo hiseka ni ku kombisa ku khorwiseka eku dyondziseni ka yena?

²⁰ Pawulo u ri: “Mi pfurha hi moya.” (Varhoma 12:11) Ina, hambi hi fambisa dyondzo ya Bibele ya le kaya kumbe hi nyikela nkulumo evandlheni, hi fanele hi hiseka. Pawulo u byele Vatesalonika a ku: “Mahungu lamanene lawa hi ma chumayelaka a ma humelelanga exikarhi ka n’wina hi ku vulavula ntsena kambe ni hi matimba ni moya lowo kwetsima ni ku khorwiseka lokukulu.” (1 Vatesalonika 1:5) Xisweswo, Pawulo ni vanghana vakwe a va hundziselanga “mahungu lamanene ya Xikwembu ntsena eka [vona], kambe ni mimoya-xiviri ya [vona].”—1 Vatesalonika 2:8.

21. Xana hi nga endla yini leswaku hi tshama hi ri lava hisekaka eka swiavelo swa hina swa ku dyondzisa?

²¹ Ku hiseka loku humaka embilwini ku va kona loko munhu a khorwiseka swinene leswaku swichudeni swa hina swa Bibele swi fanele swi twa leswi hi nga na swona. Hi nga tshuki hi lahlekeriwa hi xikongomelo xa ntirho wa hina wo dyondzisa. Mutsari Ezra u wu nyikerile swinene nyingiso eku dyondziseni kakwe emhakeni leyi. U “v̌ekile mbilu ya yena e ku lav̌a milawu ya Yehova, ni ku tira ha yona ni ku dyonḍisa v̌a-Israel.” (Ezra 7:10) Hi fanele hi endla tano hi ku lunghiselela hi rixaladza ni ku anakanyisisa hi ntikelo wa mhaka ya kona. A hi khongeleni eka Yehovha leswaku a hi nyika ripfumelo ni ku khorwiseka. (Luka 17:5) Ku hiseka ka hina ku nga pfuna swichudeni swa Bibele leswaku swi rhandza swinene ntiyiso. Ina, ku nyikela nyingiso eku dyondziseni ka hina ku nga ha tlhela ku lava leswaku hi tirhisa tindlela to karhi to dyondzisa. Xihloko xa hina lexi landzelaka xi ta hlamusela tin’wana ta tona.

[Nhlamuselo ya le hansi]

Wa Tsundzuka Xana?

◻ Hikwalaho ka yini ku laveka vadyondzisi lava nga ni vutshila, lava nga Vakreste, namuntlha?

◻ Hi yihi mikhuva leyinene ya ku dyondza leyi hi nga yi hlakulelaka?

◻ Hikwalaho ka yini ku rhandza ni ku xixima lava hi va dyondzisaka swi ri swa nkoka swinene?

◻ Xana hi nga pfumelelana njhani ni swilaveko swa swichudeni swa hina swa Bibele?

◻ Hikwalaho ka yini ku hiseka ni ku khorwiseka swi ri swa nkoka swinene loko hi dyondzisa van’wana?

[Xifaniso lexi nga eka tluka 10]

Vadyondzisi lavanene hi lava va nga swichudeni swa Rito ra Xikwembu

[Xifaniso lexi nga eka tluka 13]

Rhandza swichudeni swa Bibele