Ndlela Yin’we Ntsena Yo Ya eVuton’wini Lebyi Nga Heriki
“Hi mina ndlela ni ntiyiso ni vutomi.”—YOHANE 14:6.
1, 2. Yesu u yi fanise na yini ndlela leyi yisaka evuton’wini lebyi nga heriki, naswona hi wihi mongo wa xifaniso xakwe?
EDYONDZWENI yakwe leyi tivekaka swinene ya le Ntshaveni, Yesu u fanisa ndlela yo ya evuton’wini lebyi nga heriki ni gondzo leri munhu a nghenaka eka rona hi nyangwa. Xiya leswaku Yesu u kandziyisa leswaku ndlela leyi yo ya evuton’wini a yi olovi, a ku: “Nghenani hi nyangwa leyo khuma; hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini [lebyi nga heriki] yi khumile, ni gondzo ra kona ri larile, naswona a hi vangani lava ri kumaka.”—Matewu 7:13, 14.
2 Xana wa wu kuma mongo wa xifaniso lexi? Xana a xi kombisi leswaku ku ni gondzo kumbe ndlela yin’we ntsena leyi yisaka evuton’wini, ni leswaku hi ta fanela ku tivonela swinene leswaku hi nga hambuki endleleni yoleyo leyi yisaka evuton’wini? Kutani ke, xana i yini ndlela leyi yin’we ntsena leyi yisaka evuton’wini lebyi nga heriki?
Xikhundlha Xa Yesu Kreste
3, 4. (a) Bibele yi xi kombisa njhani xikhundlha xa nkoka xa Yesu malunghana ni ku ponisiwa ka hina? (b) Xikwembu xi sungule rini ku paluxa leswaku vanhu va nga kota ku hanya hi masiku?
3 Handle ko kanakana, Yesu u ni xikhundlha xa nkoka malunghana ni ndlela yoleyo, hilaha Petro muapostola wakwe a vuleke hakona a ku: “A ku na ku ponisiwa eka un’wana, hikuva ku hava vito rin’wana [handle ka ra Yesu] ehansi ka tilo leri nyikiweke vanhu leri hi faneleke ku ponisiwa ha rona.” (Mintirho 4:12) Hilaha ku fanaka, muapostola Pawulo u te: “Nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Yesu hi byakwe u vule leswaku ndlela yin’we ntsena leyi yisaka evuton’wini lebyi nga heriki hi yena, hikuva u te: “Hi mina ndlela ni ntiyiso ni vutomi.”—Yohane 14:6.
4 Xisweswo i swa nkoka leswaku hi xixima xikhundlha lexi Yesu a nga na xona eku endleni ka leswaku swi koteka ku hanya hi masiku. Hikwalaho, a hi kambisiseni xikhundlha xakwe hi vukheta swinene. Xana wa swi tiva leswaku, endzhaku ka ku dyoha ka Adamu, Yehovha Xikwembu u swi tivise rini leswaku vanhu va ta kuma vutomi lebyi nga heriki? U swi tivise endzhakunyana ka ku dyoha ka Adamu. Sweswi a hi kambisiseni ndlela leyi lunghiselelo ra leswaku Yesu Kreste a va Muponisi wa vanhu ri vuriweke ha yona ro sungula ka ha ri emahlweni.
Mbewu Leyi Tshembisiweke
5. Hi nga yi hlamusela njhani nyoka leyi kanganyiseke Evha?
5 Yehovha Xikwembu u tirhise ririmi ro fanekisela a hlamusela leswaku Muponisi la tshembisiweke i mani. U endle tano loko a avanyisa “nyoka” leyi vulavuleke na Evha kutani yi n’wi ringa leswaku a tlula swileriso swa Xikwembu hi ku dya mbhandzu lowu yirisiweke. (Genesa 3:1-5) Ina, nyoka yoleyo a yi nga ri nyoka yinene. A ku ri xivumbiwa xa moya xa matimba lexi eBibeleni xi vuriwaka “nyoka ya khale, leyi vuriwaka Diyavulosi na Sathana.” (Nhlavutelo 12:9) Sathana u tirhise xiharhi lexi nga nyawuriki tanihi muvulavuleri wa yena leswaku a kanganyisa Evha. Hikwalaho, loko Xikwembu xi avanyisa Sathana, xi n’wi byele xi ku: “Nḍi ta v̌eka ku v̌engana e šikari ka wena ni wansati, ni šikari ka rišaka ra wena ni rišaka ra wansati; [rixaka ra wansati] ri ta ku faya nhloko, wena u ri luma širenḍe.”—Genesa 3:15.
6, 7. (a) I mani wansati loyi a velekaka “rišaka”? (b) Mbewu leyi tshembisiweke i mani, naswona yi hetisisa yini?
6 I mani “wansati” loyi a nga nala eka Sathana kumbe loyi a vengiwaka hi yena? Tanihi leswi “nyoka ya khale” yi hlamuseriwaka eka Nhlavutelo ndzima 12, ni wansati loyi a vengiwaka hi Sathana u hlamuseriwa kona. Eka ndzimana 1, xiya leswaku u hlamuseriwa a ri loyi a “hloveke hi dyambu, a yime en’wetini, a rhwale tinyeleti ta khume-mbirhi enhlokweni.” Wansati loyi u yimela nhlengeletano ya Xikwembu ya le tilweni ya tintsumi leti tshembekaka, kasi “n’wana wa xinuna,” loyi a velekiwaka hi yena, u yimela Mfumo wa Xikwembu, laha Yesu Kreste a nga Hosi eka wona.—Nhlavutelo 12:1-5, The Jerusalem Bible.
7 Hikwalaho, i mani “rišaka” kumbe n’wana wa wansati, leri ku vulavuriwaka hi rona eka Genesa 3:15, leri nga ta faya Sathana ‘enhlokweni,’ kutani ri n’wi dlaya? Hi loyi Xikwembu xi n’wi rhumeke a suka etilweni leswaku a velekiwa hi singita hi wanhwana, ina, i Yesu la veke munhu wa nyama. (Matewu 1:18-23; Yohane 6:38) Ndzima 12 ya Nhlavutelo yi kombisa leswaku tanihi Mufumi wa le tilweni la pfuxiweke, Mbewu leyi, ku nga Yesu Kreste, yi ta rhangela eku hluriweni ka Sathana, ivi hi ku ya hi Nhlavutelo 12:10, yi simeka “mfumo wa Xikwembu xa hina ni vulawuri bya Kreste wa xona.”
8. (a) Hi wihi nchumu lowuntshwa lowu Xikwembu xi wu lunghiseleleke malunghana ni xikongomelo xa xona xo sungula? (b) I vamani swirho swa hulumendhe leyintshwa ya Xikwembu?
8 Hikwalaho, Mfumo lowu wu nga ehansi ka Yesu Kreste i nchumu lowuntshwa lowu Xikwembu xi wu lunghiseleleke malunghana ni xikongomelo xa xona xo sungula xa ku va vanhu va hanya hi masiku emisaveni. Loko Sathana a xandzukile, Yehovha u hatlise a teka goza ro herisa vuyelo hinkwabyo bya vuhomboloki hi ku tirhisa hulumendhe leyi leyintshwa ya Mfumo. Loko Yesu a ri emisaveni, u kombise leswaku a a nga ta va yexe eka hulumendhe leyi. (Luka 22:28-30) A ku ta hlawuriwa van’wana exikarhi ka vanhu va nyama, kutani lava a va ta hlangana na yena etilweni leswaku va fuma swin’we, xisweswo a va ta va xiphemu xa vumbirhi xa mbewu ya wansati. (Vagalatiya 3:16, 29) EBibeleni, nhlayo ya lava va nga ta fuma swin’we na Yesu—lava hinkwavo va hlawuriweke exikarhi ka vanhu lava dyohaka emisaveni—yi vikiwa yi ri 144 000.—Nhlavutelo 14:1-3.
9. (a) Ha yini Yesu a a fanele a ta emisaveni a ri munhu wa nyama? (b) Yesu u yi herise njhani mintirho ya Diyavulosi?
9 Hambiswiritano, emahlweni ko va Mfumo wolowo wu sungula ku fuma, xiphemu-nkulu xa mbewu yoleyo, ku nga Yesu Kreste, a xi fanele xi ta emisaveni. Ha yini? Hikuva u vekiwe hi Yehovha Xikwembu tanihi Loyi a a ta “herisa mintirho ya Diyavulosi.” (1 Yohane 3:8) Wun’wana wa mintirho ya Sathana a ku ri ku yenga Adamu leswaku a dyoha, leswi endleke leswaku vana hinkwavo va Adamu va weriwa hi xidyoho ni rifu. (Varhoma 5:12) Yesu u herise ntirho lowu wa Diyavulosi hi ku nyikela vutomi bya Yena byi va nkutsulo. Xisweswo, u veke masungulo yo ntshunxa vanhu eka xigwevo xa xidyoho ni rifu ivi a pfula ndlela yo kuma vutomi lebyi nga heriki.—Matewu 20:28; Varhoma 3:24; Vaefesa 1:7.
Leswi Nkutsulo Wu Swi Endlaka
10. Yesu na Adamu a va yelana hi ndlela yihi?
10 Leswi vutomi bya Yesu byi hundziseriweke embelekweni wa wansati byi suka etilweni, u velekiwe a ri munhu la hetisekeke, a nga nyamisiwanga hi xidyoho xa Adamu. A a ta swi kota ku hanya hi masiku emisaveni. Hi ku fanana, Adamu u vumbiwe a ri munhu la hetisekeke a ri ni ntshembo wa ku hanya hi masiku emisaveni. Muapostola Pawulo a a vulavula hi ku yelana exikarhi ka vanhu lava vambirhi loko a tsala a ku: “‘Munhu wo sungula Adamu u ve moya-xiviri lowu hanyaka.’ Adamu lowo hetelela [Yesu Kreste] u ve moya lowu nyikaka vutomi. Munhu wo sungula u huma emisaveni naswona u endliwe hi ntshuri; munhu wa vumbirhi u huma etilweni.”—1 Vakorinto 15:45, 47.
11. (a) Leswi Adamu na Yesu va swi endleke swi va khumbe njhani vanhu? (b) Hi fanele hi ri languta njhani gandzelo ra Yesu?
11 Ku yelana exikarhi ka lava vambirhi—ku nga vona ntsena vanhu vambirhi lava hetisekeke lava tshameke va hanya emisaveni—ku kandziyisiwa hi marito ya Bibele ya leswaku Yesu “[u tinyikerile] leswaku a va nkutsulo lowu yelanaka eka hinkwavo.” (1 Timotiya 2:6) Xana Yesu a a yelana na mani? Ina, a a yelana na Adamu loko a ha ri munhu la hetisekeke! Xidyoho xa Adamu wo sungula xi endle leswaku vanhu hinkwavo va avanyiseriwa rifu. Gandzelo ra “Adamu lowo hetelela” ri veka xisekelo xa ku kutsuriwa ka hina exidyohweni ni le ku feni, leswaku hi ta kota ku hanya hi masiku. Gandzelo ra Yesu i ra risima swonghasi! Muapostola Petro u te: “Swilo leswi onhakaka, silivhere kumbe nsuku, a mi kutsuriwanga ha swona.” Ku ri na sweswo, Petro u hlamusele a ku: “A ku ri hi ngati ya risima, leyi fanaka ni ya xinyimpfana lexi nga solekiki, lexi pfumalaka xivati, yi nga ya yena Kreste.”—1 Petro 1:18, 19.
12. Bibele yi ku hlamusela njhani ku herisiwa ka ku avanyiseriwa ka hina rifu?
12 Bibele yi yi hlamusela kahle ndlela leyi ku avanyiseriwa ka vanhu rifu ku nga ta herisiwa ha yona, yi ku: “Leswi vanhu va mixaka hinkwayo va soriweke hikwalaho ka xivi xin’we [xa Adamu], hi ku fanana ni hikwalaho ka xiendlo xin’we ntsena xa ku tsetselela [ku tshembeka ka Yesu ka vutomi hinkwabyo ku fikela eku feni ka yena], vanhu va mixaka hinkwayo va vuriwa lava lulameleke vutomi. Hikuva tanihi leswi vo tala va veke vadyohi hi ku ka munhu un’we [Adamu] a nga yingisanga, hi ku fanana, vo tala va ta va lava lulameke hikwalaho ka ku yingisa ka munhu un’we [Yesu].”—Varhoma 5:18, 19.
Ntshembo Lowu Tsakisaka
13. Ha yini vo tala va titwa hi ndlela leyi va titwaka ha yona malunghana ni ku hanya hi masiku?
13 Lunghiselelo leri ra Xikwembu ri fanele ri hi tsakisa swinene! Xana a swi ku tsakisi leswi ku lunghiseleriweke Muponisi? Loko ku vutisiwe xivutiso lexi nge, “Xana wa swi navela ku hanya hi masiku?” eka nkambisiso lowu endliweke hi phepha-hungu eka doroba-nkulu rin’wana ra le Amerika, nhlayo leyi hlamarisaka ya vanhu lava endlaka tiphesente ta 67,4 yi hlamule yi ku, “E-e.” Ha yini va vule leswaku a va swi lavi ku hanya hi masiku? Handle ko kanakana, xivangelo hileswi vutomi emisaveni sweswi byi nga ni swiphiqo swo tala swinene. Munhu un’wana u te: “Mianakanyo ya ku va ndzi hanya malembe ya 200 a yi ndzi tsakisi.”
14. Ha yini ku hanya hi masiku swi ta tsakisa hilaha ku heleleke?
14 Kambe Bibele a yi vulavuli hi ku hanya hi masiku emisaveni leyi vanhu va vabyaka, va dyuhala ni ku weriwa hi makhombo man’wana. A swi tano, hikuva Yesu, tanihi Mulawuri wa Mfumo wa Xikwembu, u ta herisa swiphiqo sweswo hinkwaswo leswi vangiweke hi Sathana. Hi ku ya hi Bibele, Mfumo wa Xikwembu ‘wu ta seletela ni ku ti herisa hinkwato’ tihulumendhe ta misava leyi leti tshikilelaka vanhu. (Daniyele 2:44) Enkarhini wolowo, ku hlamula xikhongelo lexi Yesu a xi dyondziseke valandzeri vakwe, “ku rhandza” ka Xikwembu ku ta “endliwa emisaveni, hilaha ku endliwaka hakona etilweni.” (Matewu 6:9, 10, Today’s English Version) Emisaveni leyintshwa ya Xikwembu, loko ku susiwe vubihi hinkwabyo, mpfuno wa nkutsulo wa Yesu wu ta tirhisiwa hi ku helela. Ina, vanhu hinkwavo lava fanelekaka va ta tlhela va va ni rihanyo leri hetisekeke!
15, 16. Hi swihi swiyimo leswi nga ta va kona emisaveni leyintshwa ya Xikwembu?
15 Ndzimana leyi landzelaka ya Bibele yi ta tirha eka vanhu lava hanyaka emisaveni leyintshwa ya Xikwembu: “Mmiri wa yena wu hlukela e ku tlula v̌uhlangini. A tlhelela masikwini ya v̌untŝha bya yena.” (Yobo 33:25) Ku ta hetiseka ni xitshembiso xin’wana xa Bibele lexi nge: “Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka; ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka.”—Esaya 35:5, 6.
16 Anakanya: Ku nga khathariseki malembe ya hina enkarhini wolowo, hambi i 80, 800, kumbe ku tlula, mimiri ya hina yi ta tshama yi hanye kahle. Swi ta endleka hilaha Bibele yi tshembisaka hakona: “A ku nga v̌i na munhu l’a akeke [kona] l’a nga ta ku: nḍa v̌abya!” Enkarhini wolowo ku ta hetiseka ni xitshembiso lexi nge: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Esaya 33:24; Nhlavutelo 21:3, 4.
17. Hi nga langutela leswaku vanhu emisaveni leyintshwa ya Xikwembu va kota ku endla yini?
17 Emisaveni yoleyo leyintshwa, hi ta swi kota ku tirhisa byongo bya hina lebyi hlamarisaka, hi ndlela leyi Muvumbi wa hina a a lava hi byi tirhisa ha yona loko a byi endla byi va ni vuswikoti lebyi nga hikiwangiki bya ku dyondza. Anakanya swilo leswi hlamarisaka leswi hi nga swi endlaka! Hambi va ri vanhu lava nga hetisekangiki va tirhise swiaki swa laha misaveni va endla swilo hinkwaswo leswi hi swi vonaka ekusuhi na hina—tinqingho ta selula, swikurisa-marito, swikomba-nkarhi, swiciyoti, tikhompyutara, swihahampfhuka, ina, ku hlaya swona i ku xurha. Ku hava ni xin’we xa swona lexi endliweke hi swilo leswi kumiweke exivandleni xin’wana xa le kule evuakweni. Leswi hi nga ta hanya hi masiku ku nga ri khale, vuswikoti byo endla swilo eParadeyisini leyi taka ya laha misaveni byi ta va byi nga hikiwanga!—Esaya 65:21-25.
18. Ha yini vutomi byi ta va lebyi nga phirhiki nikatsongo emisaveni leyintshwa ya Xikwembu?
18 Naswona vutomi a byi nge phirhi. Hambi ku ri sweswi hi anakanya hi leswi hi nga ta dya swona, hambiloko se hi dye ko tala swinene. Loko hi ta va vanhu lava hetisekeke, hi ta swi tsakela hi mpimo lowu engetelekeke swakudya swo xawula swa misava leyi nga Paradeyisi. (Esaya 25:6) Naswona minkarhi hinkwayo hi ta tsakela ku khathalela swiharhi swo tala laha misaveni, ni ku tsakela ku saseka ka ku pela ka dyambu, tintshava, milambu ni minkova. Kunene, vutomi a byi nge vi lebyi phirhaka emisaveni leyintshwa ya Xikwembu!—Pisalema 145:16.
Ku Fikelela Swilaveko Swa Xikwembu
19. Ha yini swi twala ku pfumela leswaku ku ni leswi lavekaka leswaku hi kuma nyiko ya Xikwembu ya vutomi?
19 Xana u nga langutela ku nyikiwa nyiko yo hlamarisa ya Xikwembu ya vutomi lebyi nga heriki eParadeyisini u lo tikhondlela mavoko? Xana a swi twali leswaku Xikwembu xi ta lava swo karhi eka hina? Swa twala hakunene. Xikwembu a xo swi pfuketana xi hi hoxela nyiko. Xi yi tshineta ekusuhi na hina, kambe hi fanele hi tikarhatela ku yi fikelela. Ina, sweswo swi lava matshalatshala. U nga ha vutisa xivutiso lexi fanaka ni lexi mufumi lontsongo la fuweke a xi vutiseke Yesu, u ku: “Xana ndzi fanele ndzi endla yini leswinene leswaku ndzi ta kuma vutomi lebyi nga heriki?” Kumbe u nga veka xivutiso hi ndlela leyi mulanguteri wa khotso wa le Filipiya a vutiseke muapostola Pawulo ha yona, u ku: “Xana ndzi fanele ku endla yini leswaku ndzi ponisiwa?”—Matewu 19:16; Mintirho 16:30.
20. Hi xihi xilaveko lexikulu xa ku kuma vutomi lebyi nga heriki?
20 Hi vusiku bya le mahlweni ka ku fa ka yena, Yesu u kombise xilaveko-nkulu loko a khongela eka Tata wakwe wa le tilweni a ku: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Xana a hi xilaveko lexi twalaka ku tiva Yehovha, loyi a endleke leswaku swi koteka ku hanya hi masiku, ni ku tiva loyi a hi feleke, Yesu Kreste? Kambe a ku laveki ku nghenisa vutivi byo tano ntsena.
21. Hi swi kombisa njhani leswaku ha xi fikelela xilaveko xa ku kombisa ripfumelo?
21 Nakambe Bibele yi ri: “Loyi a kombisaka ripfumelo eka N’wana u ni vutomi lebyi nga heriki.” Kutani yi ya emahlweni yi ku: “Loyi a nga yingisiki N’wana a nge byi voni vutomi, naswona vukarhi bya Xikwembu byi tshama eka yena.” (Yohane 3:36) U nga kombisa leswaku u ni ripfumelo eka N’wana hi ku hundzula vutomi bya wena byi pfumelelana ni ku rhandza ka Xikwembu. U fanele u fularhela ndlela yihi ni yihi leyi hoxeke leyi kumbexana a wu famba ha yona kutani u teka goza ra ku endla leswi tsakisaka Xikwembu. U fanele u endla leswi muapostola Petro a swi leriseke, loko a ku: “Hikokwalaho, hundzukani mi hundzuluka leswaku ku hlanguriwa swidyoho swa n’wina, leswaku tinguva ta ku phyuphyisiwa ti ta ta ti huma eka Yehovha hi xiviri.”—Mintirho 3:19.
22. Hi wahi magoza lama katsekaka emhakeni ya ku landzela mikondzo ya Yesu?
22 Hi nga tshuki hi rivala leswaku ndlela yin’we ntsena yo kuma vutomi lebyi nga heriki i ku kombisa ripfumelo eka Yesu. (Yohane 6:40; 14:6) Leswaku hi ni ripfumelo eka Yesu hi swi kombisa hi ku “landzelerisisa mikondzo yakwe.” (1 Petro 2:21) Sweswo swi katsa yini? Loko Yesu a khongela Xikwembu, u te: “Waswivo! Ndza ta . . . ku ta endla ku rhandza ka wena, Wee, Xikwembu.” (Vaheveru 10:7) I swa nkoka leswaku u tekelela Yesu hi ku pfumela ku endla ku rhandza ka Xikwembu kutani u nyiketela vutomi bya wena eka Yehovha. Endzhaku, u fanele u kombisa ku tinyiketela koloko hi ku khuvuriwa ematini; na Yesu u tinyiketile leswaku a khuvuriwa. (Luka 3:21, 22) Ku teka magoza wolawo swi fanerile hi ku helela. Muapostola Pawulo u vule leswaku “rirhandzu leri Kreste a nga na rona ra hi susumeta.” (2 Vakorinto 5:14, 15) Njhani? Phela, rirhandzu hi rona ri nga susumeta Yesu leswaku a nyikela vutomi byakwe hikwalaho ka hina. Xana sweswo a swi fanelanga swi hi susumetela ku angula hi ku kombisa ripfumelo eka yena? Ina, swi fanele swi hi susumetela ku landzela xikombiso xakwe xa rirhandzu xa ku tinyikela leswaku a pfuna van’wana. Kreste a a hanyela ku endla ku rhandza ka Xikwembu; na hina hi fanele hi endla tano, hi nga ha tihanyeli.
23. (a) Lava va kumaka vutomi va fanele va engeteriwa eka yini? (b) Ku laveka yini eka lava va nga evandlheni ra Vukreste?
23 Kambe a swi heleli kwalaho. Bibele yi vula leswaku loko vanhu va 3 000 va khuvuriwile hi Pentekosta ya 33 C.E., va ‘engeteriwile.’ Va engeteriwa eka yini? Luka u ri: “Va [hambete] va tinyiketela edyondzweni ya vaapostola ni ku avelana swilo.” (Mintirho 2:41, 42) Ina, a va hlangana swin’we leswaku va dyondza Bibele ni ku va ni xinakulobye, xisweswo va engeteriwa kumbe va va swirho swa vandlha ra Vukreste. Vakreste vo sungula a va va kona nkarhi na nkarhi eminhlanganweni leswaku va ta kuma dyondzo ya moya. (Vaheveru 10:25) Timbhoni ta Yehovha na tona ti endla tano namuntlha, naswona ta ku khutaza leswaku u va na tona eminhlanganweni leyi.
24. ‘Vutomi bya xiviri’ i yini, byi ta kumiwa njhani naswona rini?
24 Vanhu va timiliyoni sweswi va landzela gondzo ro khuma leri yisaka evuton’wini. Ku hambeta u famba egondzweni leri ro khuma swi lava ku tikarhata swinene! (Matewu 7:13, 14) Pawulo u kombise leswi eka xikhutazo xakwe lexi fikelelaka mbilu lexi nge: “Lwana nyimpi leyinene ya ripfumelo, khomelela swinene evuton’wini lebyi nga heriki lebyi u vitaneriweke byona.” Ku lwa nyimpi leyi swa laveka leswaku hi “khomelela swinene evuton’wini bya xiviri.” (1 Timotiya 6:12, 19) Vutomi byebyo a hi vutomi bya sweswi, bya maxangu ni ku karhateka ni ku xaniseka, leswi hi vangeriweke swona hi xidyoho xa Adamu. Ku ri na sweswo, i vutomi emisaveni leyintshwa ya Xikwembu, leyi yi nga ta va kona ku nga ri khale loko gandzelo ra nkutsulo ra Kreste ri tirhisiwa eka hinkwavo lava rhandzaka Yehovha Xikwembu ni N’wana wa yena loko mafambiselo lawa ya swilo ma ta va ma herisiwile. Onge hinkwerhu ka hina hi nga hlawula vutomi—‘vutomi bya xiviri’—vutomi lebyi nga heriki emisaveni leyintshwa ni leyi vangamaka ya Xikwembu.
U Nga Hlamurisa Ku Yini Ke?
◻ I mani nyoka, wansati ni rixaka leri ku vulavuriwaka ha rona eka Genesa 3:15?
◻ Yesu a a yelana njhani na Adamu, naswona nkutsulo wu endle leswaku ku koteka yini?
◻ I yini lexi u nga xi langutelaka lexi nga ta endla leswaku misava leyintshwa ya Xikwembu yi va leyi tsakisaka swinene eka wena?
◻ I swilaveko swihi leswi hi faneleke hi swi fikelela leswaku hi hanya emisaveni leyintshwa ya Xikwembu?
[Xifaniso lexi nga eka tluka 10]
Eka lavantshwa ni lavakulu, Yesu hi yena ntsena ndlela leyi yisaka evuton’wini lebyi nga heriki
[Xifaniso lexi nga eka tluka 11]
Hi nkarhi wa Xikwembu lowu faneleke, lava dyuhaleke va ta tlhela va va vanhu lava tiyeke