Ku Tiyisiwa Hi Ntshembo, Ku Susumetiwa Hi Rirhandzu

“Ku sala ripfumelo, ntshembo, rirhandzu, leswi swinharhu; kambe lexikulu eka leswi hinkwaswo i rirhandzu.”—1 VAKORINTO 13:13.

1. I xitsundzuxo xihi lexi muapostola Pawulo a hi nyikaka xona?

MUAPOSTOLA PAWULO u hi tsundzuxa leswaku ripfumelo ra hina ri nga tshoveka ku fana ni xikepe. U vulavula hi ku “va ni ripfumelo ni ripfalo lerinene, leri van’wana va ri bakanyeleke etlhelo kutani ripfumelo ra vona ri tshoveka ku fana ni xikepe lexi tshovekeke.” (1 Timotiya 1:19) Eka lembe-xidzana ro sungula C.E., swikepe a swi endliwa hi timhandzi. Leswaku swi kota ku famba elwandle a swi titshege hi muxaka wa timhandzi ta kona ni vutshila bya ku endla swikepe.

2. Ha yini xikepe xa ripfumelo ra hina xi fanele xi akiwa kahle, naswona sweswo swi lava leswaku hina hi endla yini?

² Lexi hi nga xi vulaka xikepe xa ripfumelo ra hina xi fanele xi tshama xi ri ehenhla ka mati emalwandle lama karihaka, ku nga vanhu. (Esaya 57:20; Nhlavutelo 17:15) Kutani xi fanele xi akiwe kahle, naswona sweswo swi titshege hi hina. Loko “malwandle” ya Vayuda ni Varhoma ma karihela Vakreste vo sungula hi matimba, Yuda u tsarile a ku: “Varhandziwa, hi ku tiaka eripfumelweni ra n’wina ro kwetsima swinene, mi khongela hi moya wo kwetsima, tihlayiseni erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.” (Yudha 20, 21) Tanihi leswi Yudha a nga tlhela a vulavula hi ku lwela “ripfumelo leri nyikiweke vakwetsimi,” xiga lexi nge ‘ripfumelo ro kwetsima swinene’ xi nga ha vula tidyondzo hinkwato ta Vukreste, ku katsa ni mahungu lamanene ya ku ponisiwa. (Yudha 3) Kreste i masungulo ya ripfumelo rero. Hi fanele hi va ni ripfumelo ro tiya leswaku hi namarhela ripfumelo ra ntiyiso ra Vukreste.

Ku Langutana Na Xidzedze Xa “Ku Balekela Mpambukwa”

3. Van’wana va wu tirhisa njhani moya wa “ku balekela mpambukwa”?

³ Emalembeni ya sweswinyana, ku ve ni swiendlakalo swo tala leswi chavisaka swa ku tisunga ka vanhu vo tala, ku dlaya ni minhlaselo ya vutherorisi leswi endliweke hi mimpambukwa ya le xihundleni. Hikwalaho, vanhu vo tala, ku katsa ni varhangeri lava tshembekaka va swa tipolitiki, va kombise ku khumbeka ka vona hi ku sirhelela vanhu lava nga riki na nandzu, ngopfu-ngopfu vana, eka mimpambukwa yo tano leyi nga ni khombo. Xisweswo, “xikwembu xa mafambiselo lawa ya swilo,” lexi handle ko kanakana xi nga xona xi susumetelaka vanhu ku endla swilo leswi swo biha, xi vumbe leswi van’wana va swi vulaka ku balekela mpambukwa, naswona xi lwisana ni vanhu va Yehovha hi ku tirhisa swona. (2 Vakorinto 4:4; Nhlavutelo 12:12) Van’wana va tirhise xiyimo lexi va endla leswaku ntirho wa hina wu kanetiwa. Ematikweni man’wana, va simeke tsima leri xikongomelo xa rona ku nga ku sirhelela vanhu eka “mimpambukwa ya khombo,” laha ku katsiwaka ni Timbhoni ta Yehovha hi mavunwa, xisweswo va vula leswaku hi vakanganyisi. Leswi swi endla leswaku ku nyikela vumbhoni hi yindlu na yindlu swi nonon’hwa ematikweni man’wana ya le Yuropa, naswona swi endla leswaku vanhu van’wana lava a va dyondza Bibele na hina va tshika ku dyondza. Hikwalaho, leswi swi hete vamakwerhu van’wana matimba.

4. Ha yini nkaneto wu nga fanelanga wu hi heta matimba?

⁴ Hambiswiritano, ematshan’weni ya leswaku nkaneto wu hi heta matimba, wu fanele wu tiyisa ripfumelo ra hina ra leswaku hi Vakreste va ntiyiso. (Matewu 5:11, 12) Vakreste vo sungula a va hehliwa hi ku va mpambukwa wa vukanganyisi, naswona a va “kanetiwa” hinkwako-nkwako. (Mintirho 24:5; 28:22) Kambe muapostola Petro u tiyisekise vapfumeri-kulobye, a tsala a ku: “Varhandziwa, mi nga hlamarisiwi hi ku tshwa loku nga exikarhi ka n’wina, loku endlekaka eka n’wina leswaku mi ringiwa, onge hiloko mi humeleriwa hi nchumu lowu nga tolovelekangiki. Ku hambana ni sweswo, hambetani mi tsaka tanihi leswi mi nga vahlanganyeri eku xanisekeni ka Kreste, leswaku mi tsaka ni ku tsakisisa hi nkarhi wa ku hlavuteriwa ka ku vangama kakwe.” (1 Petro 4:12, 13) Nakambe, xirho xa huvo leyi fumaka ya lembe-xidzana ro sungula xi tsarile xi ku: “Swi tekeni hinkwaswo swi ri ntsako, vamakwerhu, loko mi langutana ni miringo yo hambana-hambana, hilaha mi tivaka hakona leswaku mfanelo leyi yi ringiweke ya ripfumelo ra n’wina yi vanga ku tiyisela. Kambe ku tiyisela a ku endle ntirho wa kona wu helela, leswaku mi ta helela ni ku va lava hanyeke etimhakeni hinkwato, mi nga kayiveli nchumu.” (Yakobo 1:2-4) Tanihi leswi swidzedze swi ringaka ku faneleka ka xikepe elwandle, ni swidzedze swa nkaneto swi ta paluxa ku tsana kwihi ni kwihi ka xikepe xa hina xa ripfumelo.

Nhlomulo Wu Tswala Ku Tiyisela

5. Hi nga tiyiseka njhani leswaku ripfumelo ra hina ri tiyile loko hi langutane ni nhlomulo?

⁵ Vakreste va nga tiyiseka hi ku tiyisela ka vona ni hi ku tiya ka ripfumelo ra vona loko va langutane ni swidzedze swa nhlomulo. Ku tiyisela ka hina ku ta “[endla] ntirho wa kona wu helela” emalwandle ya swidzedze loko hi “helela ni ku va lava hanyeke etimhakeni hinkwato, [hi] nga kayiveli nchumu,” ku katsa ni ripfumelo ro tiya. Pawulo u tsarile a ku: “Hi ndlela yin’wana ni yin’wana hi tibumabumela tanihi vatirheli va Xikwembu, hi ku tiyisela swo tala, hi mahlomulo, hi swiyimo swa ku pfumala, hi ku nonon’hweriwa.”—2 Vakorinto 6:4.

6. Ha yini hi fanele hi “[khana] loko hi ri emahlomulweni,” naswona sweswo swi wu tiyisa njhani ntshembo wa hina?

⁶ Swidzedze swa nhlomulo leswi hi nga langutanaka na swona minkarhi yin’wana hi fanele hi swi teka swi ri tindlela to kombisa leswaku xikepe xa hina xa ripfumelo xi le xiyin’weni lexinene naswona xi tiyile. Pawulo u tsalele Vakreste va le Rhoma a ku: “A hi khaneni loko hi ri emahlomulweni, tanihi leswi hi swi tivaka leswaku nhlomulo wu tswala ku tiyisela; ku tiyisela kona ku tswala xiyimo xa ku amukeriwa; xiyimo xa ku amukeriwa xona xi tswala ntshembo, kutani ntshembo a wu endli leswaku munhu a khomiwa hi tingana.” (Varhoma 5:3-5) Ku tiyisela loko hi ri emiringweni swi endla leswaku hi va lava amukelekaka eka Yehovha. Kutani sweswo swi tiyisa ntshembo wa hina.

Leswi Endlaka Leswaku Van’wana Va Tshovekeriwa Hi Xikepe

7. (a) Hilaha marito ya Pawulo ma kombisaka hakona, van’wana va tshovekeriwe njhani hi xikepe xa vona xa moya? (b) Van’wana namuntlha va hambuke njhani entiyisweni?

⁷ Loko Pawulo a lemukise hi ta ku ‘tshovekeriwa hi xikepe,’ a a anakanya hi van’wana lava ‘bakanyeke’ ripfalo ra vona lerinene kutani va lahlekeriwa hi ripfumelo. (1 Timotiya 1:19) Van’wana va vona a ku ri Himenayo na Alekzanda lava hundzukeke vagwinehi, va hambuka entiyisweni ni ku vulavula swilo swo biha. (1 Timotiya 1:20, nhlamuselo ya le hansi ya NW; 2 Timotiya 2:17, 18) Namuntlha, vagwinehi, va nga vanhu lava hambukaka entiyisweni, va tlhava “hlonga ro tshembeka ni ro tlhariha” hi marito, kahle-kahle va luma voko leri a ri ri karhi ri va wundla hi tlhelo ra moya. Van’wana va fana ni “hlonga lero biha,” laha kahle-kahle va nge, “N’wini wa mina wa hlwela.” (Matewu 24:44-49; 2 Timotiya 4:14, 15) A va pfumeli leswaku makumu ya mafambiselo lawa yo homboloka ya swilo ma tshinele, kutani va sola ntlawa wa hlonga leri tshamaka ri xalamukele swilo swa moya hileswi ri tshamaka ri khomekile exikarhi ka vanhu va Yehovha. (Esaya 1:3) Vagwinehi vo tano va humelela eku ‘onheni ka ripfumelo ra van’wana,’ va endla leswaku va tshovekeriwa hi xikepe xa moya.—2 Timotiya 2:18.

8. I yini lexi endleke leswaku van’wana va tshovekeriwa hi xikepe xa vona xa ripfumelo kumbe xi mbombomela?

⁸ Vakreste van’wana lava tinyiketeleke va tshovekeriwe hi xikepe xa ripfumelo ra vona hi ku bakanya ripfalo ra vona kutani va tipeta eka moya wa misava leyi wo lava ku titsakisa hi ndlela leyi nga lawulekiki, ni vunghwavava bya yona. (2 Petro 2:20-22) Van’wana vona va mbombomerisa xikepe xa vona xa ripfumelo, hikuva, hi ku vona ka vona, mafambiselo lamantshwa ya swilo a ma vonaki ma tshinerile. Leswi va nga swi kotiki ku kumisisa nkarhi wa ku hetiseka ka vuprofeta byin’wana kutani va rivala hi “siku ra Yehovha,” va fularhela vugandzeri bya ntiyiso. (2 Petro 3:10-13; 1 Petro 1:9) Hi ku hatlisa va tikuma va tlhelele ematini lama pfindlukeke, yo kariha, ya mafambiselo ya namuntlha ya swilo. (Esaya 17:12, 13; 57:20) Van’wana lava tshikeke ku hlanganyela ni vandlha ra Vukreste ni sweswi va pfumela leswaku vukhongeri bya rona i bya ntiyiso. Kambe, handle ko kanakana, a va lehisanga mbilu ni ku tiyisela hi ndlela leyi lavekaka leswaku va rindzela misava leyintshwa leyi Yehovha Xikwembu a yi tshembiseke. Eka vona, xitshembiso xa ku hanya eParadeyisini a xi hlwela ku hetiseka.

9. Vakreste va nga ri vangani lava tinyiketeleke va endla yini, naswona swilo leswi swi fanele swi hi susumetela ku anakanyisisa hi yini?

⁹ Ematikweni man’wana ya misava, Vakreste va nga ri vangani lava tinyiketeleke swi tikomba onge va dyebyise maseyila ya xikepe xa vona xa ripfumelo. Xikepe xona xa ha ri ehenhla ka mati, kambe ematshan’weni yo ya emahlweni hi ripfumelo lerikulu, va tifambela va nga jahanga. Loko van’wana va kokiwe hi ntshembo wa “Paradeyisi leyi tshineleke,” va tiyimisele swinene ku yi fikelela—va hiseka entirhweni wo chumayela naswona va va kona nkarhi na nkarhi eminhlanganweni hinkwayo, etinhlengeletanweni ni le mintsombanweni. Loko se va ehleketa leswaku ntshembo wa vona a wu nge hatli wu hetiseka hilaha a va anakanya hakona, va sungule ku dyebyisa mavoko. Leswi swi tikomba hileswi va nga ha yiki ngopfu entirhweni wo chumayela ni le minhlanganweni, naswona eka vona ku lahlekeriwa hi minongonoko yin’wana etinhlengeletanweni ni le mintsombanweni a swi vuli nchumu. Van’wana nkarhi wa vona wo tala va wu tirhisa eka swilo swo titsakisa ha swona ni le ku kumeni ka swilo swa manyunyu. Swilo leswi swi hi susumetela ku anakanyisisa hi nsusumeto lowu a hi fanele hi va na wona evuton’wini bya hina malunghana ni ku tinyiketela ka hina eka Yehovha. Xana ku hisekela ka hina ntirho wakwe ku fanele ku titshega hi ntshembo wa “Paradeyisi leyi tshineleke”?

Ntshembo Lowu Fanaka Ni Nsoma

10, 11. Pawulo u wu fanise na yini ntshembo wa hina, naswona ha yini ku fananisa loku ku ri kunene?

¹⁰ Pawulo u kombise leswaku Yehovha u tshembise ku tisa mikateko ha Abrahama. Kutani muapostola loyi u te: “Xikwembu . . . xi nghenelele hi xihlambanyo, leswaku, hi swilo swimbirhi leswi nga hundzukiki [rito ra xona ni xihlambanyo xa xona] leswi ha swona swi nga kotekiki leswaku Xikwembu xi hemba, hina lava balekeleke evuchavelweni hi kuma xikhutazo xa matimba xo khomelela eka ntshembo lowu vekiweke emahlweni ka hina. Ntshembo lowu hi [nga] na wona tanihi nsoma wa moya-xiviri, wu tiyisekisiwile ni ku tiya.” (Vaheveru 6:17-19; Genesa 22:16-18) Ntshembo lowu Vakreste lava totiweke va nga na wona i wa ku hanya hi masiku etilweni. Namuntlha, vunyingi lebyikulu bya malandza ya Yehovha byi ni ntshembo lowu vangamaka wa ku hanya hi masiku emisaveni leyi nga paradeyisi. (Luka 23:43) Loko munhu a nga ri na wona ntshembo wo tano, a nge swi koti ku va ni ripfumelo.

¹¹ Nsoma i nchumu lowu pfunaka swinene, lowu lavekaka leswaku wu khoma xikepe xi nga famba-fambi. A nga kona muchayeri wa xikepe loyi a nga xinyataka a suka ehlalukweni a nga ri na nsoma. Tanihi leswi Pawulo a tshovekeriweke hi swikepe minkarhi yo hlayanyana, a a swi tiva kahle leswaku vutomi bya vachayeri va swikepe hakanyingi a byi titshege hi tinsoma ta xikepe xa vona. (Mintirho 27:29, 39, 40; 2 Vakorinto 11:25) Eka lembe-xidzana ro sungula, xikepe a xi nga ri na njhini yo pfuna muchayeri leswaku a xi kongomisa laha a a lava ku ya kona. Handle ka swikepe swa nyimpi leswi a swi tlutisiwa hi timhandzi, swikepe leswi tolovelekeke a swi fambisiwa ngopfu hi moya. Loko xikepe xi ri ekhombyeni ra ku susumeteriwa emaribyeni, ndlela yin’we ntsena leyi muchayeri wa xona a a yi tirhisa leswaku a pona exidzedzeni a ku ri ku wisa nsoma, hi ntshembo wa leswaku nsoma wa kona wu ta dzima swi tiya etshakwini ra lwandle. Xisweswo, Pawulo u fanise ntshembo wa Mukreste ni ‘nsoma wa moya-xiviri lowu tiyeke.’ (Vaheveru 6:19) Loko hi hlaseriwa hi swidzedze swa nkaneto kumbe hi langutana ni miringo yin’wana, ntshembo wa hina wo hlamarisa wu fana ni nsoma lowu tiyisaka hina mimoya-xiviri leyi hanyaka, leswaku xikepe xa hina xa ripfumelo xi nga kongomi emagiyagiyeni ya khombo ya ku kanakana, kumbe emaribyeni ya khombo ya vugwinehi.—Vaheveru 2:1; Yudha 8-13.

12. Hi nga swi papalatisa ku yini ku kendlukela ekule na Yehovha?

¹² Pawulo u lemukise Vakreste va Vaheveru a ku: “Tivoneleni, vamakwerhu, hi ku chava leswaku ku nga tshuka ku va ni un’wana wa n’wina la vaka ni mbilu yo homboloka leyi pfumalaka ripfumelo, hi ku suka eka Xikwembu lexi hanyaka.” (Vaheveru 3:12) Eka tsalwa ra Xigriki, “ku suka” hi ku kongoma swi vula “ku kendluka,” ku nga ku gwineha. Kambe hi nga ku papalata ku tshovekeriwa hi xikepe hi ndlela yoleyo leyi hundzeletiweke. Ripfumelo ni ntshembo swi ta hi pfuna ku namarhela Yehovha niloko hi langutane ni swidzedze leswikulu swa miringo. (Deteronoma 4:4; 30:19, 20) Ripfumelo ra hina a ri nge fani na xikepe lexi yisiwaka hala ni hala hi timheho ta dyondzo ya vugwinehi. (Vaefesa 4:13, 14) Naswona loko ntshembo wu ri nsoma wa hina, hi ta swi kota ku langutana ni swidzedze swa vutomi tanihi malandza ya Yehovha.

Ku Susumetiwa Hi Rirhandzu Ni Moya Lowo Kwetsima

13, 14. (a) Ha yini nsoma wa ntshembo wa hina wu nga enelanga loko wu ri woxe? (b) Matimba lama hi susumetelaka ku endlela Yehovha ntirho wo hlawuleka ma fanele ma va wahi, naswona ha yini?

¹³ Mukreste a nge swi koti ku nghena emafambiselweni lamantshwa loko nsusumeto wakwe wa ku tirhela Yehovha ku ri ntshembo wa ku hanya hi masiku ntsena emisaveni leyi nga paradeyisi. Hambiloko a hlayisa nsoma wakwe wa ntshembo wu ri nchumu lowu n’wi tiyisaka evuton’wini byakwe, u fanele a tlhandlekela matimba lama susumetaka ya rirhandzu eka sweswo ni le ka ripfumelo rakwe. Pawulo u kandziyise mhaka leyi loko a tsala a ku: “Ku sala ripfumelo, ntshembo, rirhandzu, leswi swinharhu; kambe lexikulu eka leswi hinkwaswo i rirhandzu.”—1 Vakorinto 13:13.

¹⁴ Matimba lama hi susumetelaka ku endla ntirho wo hlawuleka ku fanele ku va ku rhandza Yehovha swi suka embilwini, hikwalaho ka rirhandzu leri nga pimekiki leri yena a hi rhandzaka ha rona. Muapostola Yohane u tsarile a ku: “Loyi a nga riki na rirhandzu a nga tivi Xikwembu, hikuva Xikwembu i rirhandzu. Rirhandzu ra Xikwembu ri kombisiwile eka hina, hileswi Xikwembu xi rhumeke N’wana wa xona la tswariweke a ri swakwe emisaveni leswaku hi ta kuma vutomi ha yena. Loko ku ri hina, hi ni rirhandzu, hikuva hi xona xi nga sungula xi hi rhandza.” (1 Yohane 4:8, 9, 19) Hikwalaho ka ku nkhensa loku hi nga na kona eka Yehovha, nchumu lowu hi wu lwelaka ngopfu a ku fanelanga ku va ku ponisiwa ka hina, kambe ku fanele ku va ku vona ku kwetsimisiwa ka vito rakwe ro hlawuleka ni ku lweriwa ka vuhosi byakwe lebyi faneleke.

15. Rirhandzu leri hi nga na rona eka Yehovha ri fambisana njhani ni mhaka ya vuhosi byakwe?

¹⁵ Yehovha u lava leswaku hi n’wi tirhela hileswi hi rhandzaka yena, ku nga ri Paradeyisi ntsena. Nsonga-vutivi wa Bibele lowu vuriwaka Insight on the Scripturesa wu ri: “Yehovha wa kwetsima hileswi vuhosi bya yena ni ku seketeriwa ka byona hi swivumbiwa swa yena swi sekeriweke ngopfu eka rirhandzu. U rhandza vanhu lava va tsakelaka vuhosi byakwe hikwalaho ka timfanelo takwe letinene ni hileswi byi lulameke, va hlawula vuhosi byakwe ematshan’weni ya byin’wana. (1Ko 2:9) Va tihlawulele ku tirha ehansi ka vuhosi byakwe ematshan’weni yo ringeta ku tiendlela ku rhandza ka vona—va endla tano hileswi va n’wi tivaka nileswi va tivaka rirhandzu, vululami ni vutlhari byakwe, ti nga timfanelo leti va swi xiyaka leswaku ti tlula ta vona kule. (Ps 84:10, 11)”—Vholumo 2, tluka 275.

16. Ha yini rirhandzu leri hi nga na rona eka Yesu ri ri nsusumeto lowukulu evuton’wini bya hina?

¹⁶ Tanihi Vakreste, nakambe hi kombisa rirhandzu eka Yesu hikwalaho ka leswi a hi rhandzaka. Pawulo u te: “Rirhandzu leri Kreste a nga na rona ra hi susumeta, hikuva leswi hi swona leswi hi swi avanyiseke, leswaku munhu un’we u fele hinkwavo; xisweswo hinkwavo va file; naswona u fele hinkwavo leswaku lava va hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Vakorinto 5:14, 15) Kreste hi yena masungulo lawa vutomi bya hina bya moya, ripfumelo ra hina ni ntshembo wa hina swi akiweke ehenhla ka wona. Rirhandzu leri hi rhandzaka Kreste Yesu ha rona ri tiyisa ntshembo ni ripfumelo ra hina, ngopfu-ngopfu loko hi langutane ni ndzingo lowukulu.—1 Vakorinto 3:11; Vakolosa 1:23; 2:6, 7.

17. I matimba wahi lamakulu lawa Yehovha a hi nyikaka wona, naswona nkoka wa wona wu kombisiwa njhani eka Mintirho 1:8 ni le ka Vaefesa 3:16?

¹⁷ Hambiloko rirhandzu leri hi nga na rona eka Xikwembu ni le ka N’wana wa xona ri ri nsusumeto lowukulu evuton’wini bya hina Vakreste, Yehovha u hi nyika nchumu wun’wana lowu hi susumetaka, wu hi nyika matimba ni ku hi tiyisa leswaku hi ya emahlweni ni ntirho wa yena. I matimba yakwe lama tirhaka, kumbe moya lowo kwetsima. Marito ya Xiheveru ni ya Xigriki lama hundzuluxeriweke ma va “moya” hi ku kongoma ma vula ku hunga ka matimba ka moya, tanihi mheho. Swikepe swa maseyila, swo tanihi leswi Pawulo a swi khandziyeke a swi titshega hi matimba lama nga vonakiki ya mheho leswaku swi fika lomu swi yaka kona. Hilaha ku fanaka, hi fanele hi va ni rirhandzu ni nsusumeto wa matimba ya Xikwembu lama tirhaka, lama nga vonakiki, leswaku xikepe xa hina xa ripfumelo xi hi yisa emahlweni ni ntirho wa Yehovha.—Mintirho 1:8; Vaefesa 3:16.

A Hi Yeni Hi Ya Fika Laha Hi Kongomeke Kona!

18. I yini lexi nga ta hi pfuna ku tiyisela miringo yihi ni yihi ya ripfumelo ra hina enkarhini lowu taka?

¹⁸ Ripfumelo ni rirhandzu ra hina swi nga ringiwa swinene hi nga si fika emafambiselweni lamantshwa ya swilo. Kambe Yehovha u hi nyike nsoma ‘wo tiya’—ku nga ntshembo wa hina wo hlamarisa. (Vaheveru 6:19; Varhoma 15:4, 13) Loko hi langutane ni nkaneto kumbe miringo yin’wana, hi nga tiyisela loko hi tiyisiwe kahle hi ntshembo wa hina. Loko swidzedze swi nyiketana hi hina, a hi lweleni ku tiyisa ntshembo ni ripfumelo ra hina.

19. Hi nga hambeta hi xi kongomisa njhani xikepe xa ripfumelo ra hina ku kondza hi ya fika emisaveni leyintshwa ya Xikwembu?

¹⁹ Loko a nga si vulavula hi “nsoma wa moya-xiviri,” Pawulo u te: “Hi navela leswaku un’wana ni un’wana wa n’wina a kombisa ku chivirika [ku “hatlisa,” nhlamuselo ya le hansi ya NW] loku fanaka leswaku a va ni ku tiyiseka loku heleleke ka ntshembo ku fika emakumu, leswaku mi nga vi ni vulolo, kambe mi tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.” (Vaheveru 6:11, 12) Hi ku susumetiwa hi rirhandzu leri hi nga na rona eka Yehovha ni le ka N’wana wa yena, ni hi ku nyikiwa matimba hi moya lowo kwetsima, a hi hambeteni hi kongomisa xikepe xa ripfumelo ra hina ku kondza hi fika emisaveni leyintshwa leyi tshembisiweke hi Xikwembu.

[Nhlamuselo ya le hansi]

Mpfuxeto

◻ Mayelana ni ripfumelo ra hina, i xitsundzuxo xihi lexi Pawulo a hi nyikaka xona?

◻ Van’wana va tshovekeriwe hi xikepe xa moya hi ndlela yihi, naswona van’wana va tsana hi ndlela yihi?

◻ I mfanelo yihi ya Xikwembu leyi faneleke yi fambisana ni ripfumelo ra hina?

◻ I yini lexi nga ta hi pfuna ku fika emisaveni leyintshwa leyi tshembisiweke hi Xikwembu?

[Xifaniso lexi nga eka tluka 16]

Xikepe xa ripfumelo ra hina xi fanele xi endliwe kahle leswaku xi ta kota ku langutana ni swidzedze swa vutomi

[Xifaniso lexi nga eka tluka 17]

Ripfumelo ra hina ri nga tshoveka ku fana ni xikepe

[Xifaniso lexi nga eka tluka 18]

Ripfumelo i nsoma wa vutomi bya hina Vakreste